ياللي مش عامل مدونة اعمل..لجل عيون ضحايا العبارة

اللي حصل ان الاستاذ المحامي ياسر فتحي صرح في المؤتمر النهاردة انه عنده مستندات بتؤكد ان ممدوح اسماعيل وزع رشاوي على الفضائيات والصحف وفيه كتير منهم قبلوا ما عدا الشرفاء وهم قليل والكلام ده كلامه..اظن انا منزلة ده في الفيديو، المهم الاستاذ ياسر قال ان فيه مستندات كتير حب ينشرها في الفضائيات وهم رفضوا
انا كنت دخلت متأخر احمد عبد الفتاح قال لي اني قبل ما ادخل الاستاذ ياسر فتحي قال: احنا ح نعمل حملة على النت ح يقوم بيها المدونين. لما رحت سألته بعد المؤتمر مين المدونين اللي اتفقتوا معاهم قال لي: احنا بندور عليكوا
يعني الراجل اتكلم بثقة اننا ح ناخد الحملة على عاتقنا من قبل ما يلاقينا ولا حتى يكلم حد فينا
متهيالي دي ثقة كبيرة المفروض نبقى قدها، وزي ما قلنا التدوين ده مش رتبة ولا شغلانة اي حد يقدر يبقى مدون، عشان كده باقول لاي مواطن محروق على بتوع العبارة ومش عارف يعمل ايه يعمل مدونة ويشارك في الحملة
الاستاذ فتحي اداني انا واحمد نمرة الاستاذة سمر عشان ننسق معاها، ما اعرفش بصراحة ننسق معاها ايه؟ بس انا ح اتصل بيها عشان لو عندها مستندات من اللي الاعلام رفض ينشره ناخدها وننزلها ونوزعها على المدونات ولو وصلت لاخبار ح اقول لكوا
لحد كده اللي بيسأل نعمل حملة ازاي؟ هي محتاجة فكاكة؟ هو احنا كنا بنعمل ايه قبل كده؟
فيه شقين في القضية
المقتولين والمفقودين، النهاردة الاستاذ ياسر فتحي قال: بالنسبة للمفقودين..انا عايز اقول لهم حاجة ..الشركة لما بتقول لهم ولادكوا ح يرجعوا بعد ما القضية تخلص فهي بتضحك عليهم..الولاد مش ح يرجعوا لانهم عارفين ان لو الولاد رجعوا ح نفتح القضية تاني
واحد من اللي قاعدين من اهالي المفقودين قال: يعني نسيب ولادنا
فطلب منهم انهم يعملوا له توكيل لان فيه كتير يتعمل في قضية المفقودين
احنا ح ننشر صور المفقودين والقتلى وفيديوها على قد ما نقدر وح اتصل بسمر واشوف ممكن نعمل ايه واقول لكوا
طبعا مش ممكن انشر نمرتها على النت...بس نوزعها على بعض حبي كده على الميل او بالتليفون

ده فيديو لاحد اهالي الضحايا...مراته وعياله الاربعة

وده واحد بيقول لنا ليه هو ما اخدش عزا ابوه: اذا كان ممدوح اسماعيل بريء يبقى اهالينا هم المجرمين..ناخد عزاهم ليه بقى

وهو هو نفس الشخص بيتكلم تاني..ابوه اللي راح..وبيتكلم عن اتحاد رأس المال مع السلطة..راجل صعيدي خلوه يتكلم في السياسة...خلوا كل الناس تبقى بتتكلم في السياسة

على رأي ماجدة الرومي: شو خصنا بالسياسة
النظام ده غبي؟ بيعمل للناس وعي سياسي غصب عنهم؟
الناس قلبها محروق

عمالين يقولوا لهم اخدتوا تلتميت الف جنيه ومش مصدقين ان الناس الفقرا دي مش مبهورة بالتلتميت الف جنيه...فاكرين ان ولادهم رخاص عندهم زي ما هم رخاص عند الحكومة

وتاني ح ننزل كلام الاستاذ ياسر فتحي عشان هو موضع حاجات كتير
اول فيديو

وتاني فيديو

وتالت فيديو


ورابع فيديو

اظن هم بس
واي جديد ح اقول لكوا عليه وبرضه احمد عبد الفتاح ح يبقى متابع
النكتة بقى اني لما رحت للاستاذ ياسر فتحي قلت له: استاذ ياسر انا نوارة جبهة التهييس الشعبية واحمد ياللالي..الراجل بص لنا كده وهو مستغرب من الاسامي :) امال لو عرف ان فيه مدونة اسمها شبشب بصباع ومدونة اسمها الزرافة الحسودة ح يعمل ايه؟
-----------
حاجة كمان...بما ان كل يوم نظرية المؤامرة بتثبت واقعيتها وكل مرة اقول لنفسي يا بت ما تبقيش شكاكة كده وفي الاخر تطلع الدنيا فعلا مؤامرة ويطلع شكوكي في محلها لحد ما ح اتجنن زي ميل جيبسون في فيلم كونسبيرسي ثيوري...فاهتمامنا الشديد جدا بالعبارة، وحملة التشهير...وباكرر التشهير على ممدوح اسماعيل لحد ما يندم انه اتولد واللي اتعمل في اسلام نبيه مش ح ييجي نص اللي ح يتعمل في ممدوح اسماعيل ان شاء الله، ده كله ما يعنيش اننا ننسى الاسير المصري اياد ابو حسنة

هم قبضوا على شباب ستة ابريل بعد ما عرفنا اننا لنا اسير في اسرائيل وبعدين طلعوا الحكم في نفس يوم ماتش الاهلي والزمالك وعارفين وقع الحكم ده...كل ده ممكن يبقى له علاقة بانهم عايزين يشتتونا عن اياد ابو حسنة لان طبعا دي اسرائيل وما ينفعش نزعل اسرائيل..يموت الف والقاتل يهرب في ستين داهية بس ما نتخانقش مع اسرائيل
على اي حال...اي حد كلامي مش ح يعجبه براحته، بس افتكروا ان جناني طلع صح في حاجات قبل كده..ما علينا..اياد ابو حسنة اسير مصري في اسرائيل ومش لازم يتنسي..بعيدا عن نظرية المؤامرة دي مسألة مبدأ

على فكرة يا حكومة وسخة
احنا لينا خمسين نفس
ميت نفس
مليون نفس
تمانين مليون نفس بتعداد المصريين
ويا احنا يا انتي