شتمت واحد في الشارع وقلت له يابن الجزمة

ومخنوقة ومتضايقة وركبتي واجعاني ودراعي واجعني وبطني وضهري واجعني
مش عشان شتمت وانا بقى البت المؤدبة لا سمح الله، لكن عشان هو ما يستاهلش الشتيمة وكمان ما ردش عليا
الدنيا زحمة الظاهر فيه تشريفة لواحد ابن ستين جزمة قديمة فعلا، وعربيات الشرطة في كل حتة وقاعدة اتحين الفرصة عشان واحد فيهم يقع في ايدي واشتمه واقول له ارحموا دين ابونا من ام التشريفات انتوا وصاحب التشريفة بتقبضوا مرتباتكوا من ضرايبنا الهي تنزل عليكوا سم هاري تحرق بطونكوا يا حرامية يا ولاد الكلب الهي لا تكسبوا ولا تربحوا وتصرفوا ضرايبنا اللي بتضربوها في جيوبكوا وتستعبدونا بيها على المرض الهي ينتقم منكوا انتقام عزيز مقتدر دنيا واخرة ولا تشوفوا يوم حلو في حياتكوا الهي يوقف لكوا المراكب السايرة وينكد عليكوا يا بعدا زي ما انتوا معكرين علينا عيشتنا ومصعبين حياتنا ليل نهار...وانا قاعدة احضر وصلة الردح دي، واحد سايق نص نقل يا حبيبي قال عايز يعمل غرزة في ام الزحمة دي وانا جنبه والعربية اللي قدامي بيني وبينها شبرين وهو عايز يعمل غرزة في الشبرين دول ازاي ما اعرفش واديله كلاكس مافيش وبعدين لقى ان الامر مستحيل خصوصا اني كبست عليه وهو كابس عليا لدرجة اني اترعبت من الرعب طلعت راسي من الشباك وقلت له يا ابن الجزمة الراجل بص لي بصة تقطع القلب وما ردش عليا
يا ريته رد عليا
يا ريته رد عليا وسب لي ميت دين وميتين عشان ما احسش بالذنب ده كله طول ما انا ماشية بعد كده عمالة استغفر واعيط وصوابع رجليا بتترعش وركبتي بتنغز ودراعي واقف وبطني بتكركب وضهري قافش
- اه انا لما باتضايق دي الاعراض اللي بتظهر عليا- ومافيش حاجة مضايقاني غير انه ماردش عليا
طب اعمل ايه انا دلوقت؟ ربنا يغفر لي ويغفر له، يارب يجيله عربية بي ام دبليو وفلوس كتير بالحلال ويفرح ويتهنى بقية عمره وما يتضايقش ابدا طول حياته يا رب امين والنبي يارب
ويخرب بيت اللي عصبني وخلاني اشتم واحد مالوش ذنب