اتشليت..عليا الطلاج اتشليت

داخل لي مواطن مصري وسايب لي الخبر ده
ايه يا مواطن هو ده حصان الاستقبال بعد فترة غياب؟ سيرة ومسيرة السيد جمال مبارك، يعني حتى مش ابوه، يعني ح تخلونا نقل ادبنا ليه؟ ما سيرة ومسيرة السيد معروفة لكل اللي راح لندن واللي ما راحش وانا مش ح افسر بقى، وقلنا مافيش داعي يا اخوانا للكلام ده دي امور صخصية وسكتنا وحطينا في بقنا جزمة قديمة، انما تعملوا لنا مصنصن اوزاعي تحكوا لنا فيه صيرة ومصيرة الصيد جمال بمناسبة ايه؟ عشان هو مين يعني؟ ايه اهميته في الحياة؟ انتوا بتغيظونا ليه؟ واحد بيتعامل معانا على اساس اننا ريحتنا وحشة بادئ ذي بدء كده من قبل ما يتكلم وقرفان مننا وتربية انجلترا والجامعة الامريكية وبيكرهنا لله في لله من غير ما نعمل له حاجة اللهم غير ان معظم الناس عندنا المية مقطوعة عندهم واحيانا ما عندهمش مواسير مية اصلا فمش بيستحموا
وطبعا المصنصن ح يقدم سيرة حياة انسان بينبرنبه المثل في التقدم والثقافة والذكاء والوطنية عشان كل شباب مصر يبقى عاملين كده...شايفين يا شباب؟ لازم يبقى دمكوا يلطش كده عشان ينبرنبكوا المثل
----
وبما ان الحياة وجهات نظر فانت تقدر تقرا وجهة نظر الفلاحين اللي بينطردوا من اراضيهم هنا
وبمناسبة المصنصن اللي بينبرنبه المثل نقدر نتبنى وجهة نظر اصدقاء جمال مبارك اللي بيطردوا الفلاحين، بقى الحكاية ومافيها ان بصل الحر والصنان طلع قانون يطرد بيه الفلاحين من اراضيهم تقدر تقرا تفاصيله هنا
مع اعتراضي على الكتابة عن الفلاحين المصريين بالعنجليزي...كاتبين الكلام ده لمين يعني؟ النبي عربي
وصاحب اول طلقة غبية فتحت باب النوبارية بينفذ القوانين
فيه اسلوبين لطرد الفلاحين الرعاع اللي مليانين براغيت وطين وقرف ومش بيستحموا وريحتهم وحشة خالص من الاراضي
الاسلوب الاول بالعنف، بالدراع يعني، بس مش ده اول حاجة اتبعت، ليه؟ لاننا بطبعنا كحكومة رشيدة بالنا طوييييييييييييل واحصابنا هادييييييييييييييييييييةةةةةةةةةةة
ابتدوا ازاي، بانهم يقرفوا الفلاحين في اراضيهم وزراعاتهم، لو تذكروا كنا اتكلمنا عن موضوع اجبار الفلاحين على الاحجام عن زراعة القطن بالطريقة الحكومية الذكية صاحبة القرية الذكية، والحمامات الذكية، (الحمامات الذكية دي مشروع قومي هايل ح يخلي الشعب يستمتع باحلى شخة ذكية) وكل حاجة عندنا دلوقت بقت ذكية ومافيش اغبيا غير امثالنا من الغوغاء والدهماء
ايه بقى الطريقة دي: اول سنة طلعوا لهم القطن مليان دود، الكلام ده من اربع سنين، تاني سنة طلع القطن اصفر اصفررررررررررررررر حزين مهزول، تالت سنة اللي هو السنة اللي فاتت الفلاحين شافوا اللي ما شافهوش جدهم الفلاح الفصيح اللي كان بيدن ويصيح: العود كامل بجدوره وورقه ومافيش زهرة...مافيش زهرة، كيف ياعم؟ ما خبراش، ارتضح ان شوية البذور اللي كان يوسف والي بعتها اسرائيل تسنجفها من ضمنها بذور معالجة متشال منها الثمرة
وطبعا زي ما احنا عارفين القطن بيتعب التربة ومكلف جدا بس المفروض، المفروض انه زمااااااااااااان كان مربح، وكان الناس بتجهز بناتها في موسم القطن، وبتجوز ولادها في موسم القطن، وبتعلي البيت دور في موسم القطن، وبتنجد في موسم القطن، وبعد ما يكسبوا من القطن يريحوا التربة بزراعة البرسيم يحشوه ويأكلوه للبهايم، البهايم اللي علفهم برضه غلي بالمناسبة، فبقت زراعة القطن بتخسر وتربية البهايم بتكلف ومافيش قدامك غير تزرع كنتالوب ولب
فيه زراعات عند الفلاحين مرتبطة بالقيم الاجتماعية، يعني زراعة الكنتالوب واللب بتسبب للفلاح احراج، مش عارفة ليه؟ ده غير انها مش مربحة للدرجة دي
المهم يعني مسودين عيشة الفلاحين عشان يطفشوا من اراضي اسيادهم ويرجع اسيادهم يزرعوا الارض يوسفندي وبرتقان ويصدروه ويبيعوا ويكسبوا والحكومة تكسب وكله يكسب الا الفلاحين لانهم ما بيرضوش طبعا يشغلوا اللي كانوا بيشتغلوا قبل كده ، اولا: لانهم جرابيع، ثانيا: لان عينيهم فتحت وعبد الناصر ملكهم اراضي وساوى الجرابيع بالاسياد، وعيالهم كمان راحت المدارس مع ان فيه قول مأثور بيقول لا تعلموا اولاد السفلة العلم، وطبعا ناس جرابيع وعينيهم مفتحة يشتغلوا ازاي عند الاقطاعيين الاصلا ولاد الناس المحترمة اللي بياكلوا بالشوكة والسكينة واللي يفيض منهم يدفنوه (ملحوظة: ظاهرة دفن اللحمة رجعت تاني في المنوفية والعهدة ع الراوي)
طبعا الفلاح المصري بطبعه نفسه حلوة، يعني ما بيقرفش ويطفش من ارضه مهما حصل، ياما دقت على راسه طبول يعني، ده كان بيقلع مركوبه ويمشي حافي لما يعدي قدام سراية الباشا، ما جراش حاجة لما يستحمل الدين والفلس سنة ورا سنة وموسم ورا موسم وربنا مع المنكسرين جابر
جابر؟
ربنا خلق الناس طبقات، مش معقولة يعني يتساوى الاسياد بالشغالين، زمن الجرابيع انتهى، بقت العائلات الاقطاعية ترفع قضايا وتكسبها وتاخد حكم قضائي بانها تاخد الاراضي اللي كانت تحت الحراسة
كيف يا عب رحيم ومين المسئول
الحق والحق يقال ان كل مجلس قيادة الثورة ايديهم ملطخة بدماء الفلاحين
عبد الناصر فيه اراضي صادرها وفيه اراضي حطها تحت الحراسة جميل؟ طيب الاراضي اللي تحت الحراسة ازاي يوزعها والقضاء ما فصلش فيها؟ وزعها وهي متنازع على ملكيتها
قانون بصل الحر والصنان دعم الملاك الاقطاعيين وحفظ لهم حق رفع القضايا والاخلاء بالقوة
والطلعة الجوية دلوقت بتخلي الفلاحين، والفلاحين يستحملوا قطن اصفر، قطن مدود، قطن موف، هافان، اي حاجة الا انهم ينطردوا من اراضيهم، ح يروحوا فين
يروحوا فين يعني ايه؟ الفلاحين اللي انتوا بتدافعوا عنهم دول بقى عندهم دش وتلفزيون
الفلاحين دول مش غلابة زي ما انتوا فاكرين
يعني البني ادم عشان عنده دش وتلفزيون ينطرد من ارضه لمجرد انه فلاح ببراغيت وسولت له نفسه الدنيئة انه يجيب دش ويتفرج على مسلسل حدائق الشيطان
طب ما دول اصحاب الارض الاصليين، وعبد الناصر الحرامي سرقهم واممهم وادا الفلاحين الجرابيع، هو عايز يشارك ربنا رزقه؟ ربنا عمل اغنيا وفقرا، هو عايز يساوي الناس؟
يعني لما محمد علي احتكر اربعة مليون فدان واخدها من الفلاحين ومن الملاك وحتى من الاقطاعيين المماليك ماحدش قال له انت بتشارك ربنا رزقه
ولما ابنه الصايع سماعين بتاع قطعة من اوروبا اللي كان بيوزع المسلات بتاعتنا كأنه بيوزع بونبوني على صحابه الخواجات اخد الاراضي وقعد يقتطعها ويديها لاصحابه وجواسيس الانجليز واي صايع في تركيا مش لاقي له شغلانة ييجي يقول نكتة للخديوي يقوم الخديوي مديله ارض ويعمله بيه وهو جربوع في بلده بس كل مؤهلاته انه ابيض، ماحدش برضه شايف ان كده بيشاركوا ربنا في رزقه
فيه كتاب حلو قوي، هو دراسة دكتوراه عن الاقطاع قبل الثورة بيشرح فيه وضع الفلاحين والاقطاع وازاي ان مجلس النواب كان كله من كبار الملاك اصحاب الاراضي، وازاي انهم كانوا بيصرفوا للفلاحين اجرتهم حتة جبنة ورغيف شعير وطمطماية وكانوا بيضربوهم بالكرباج
اسم الكتاب: كبار ملاك الاراضي الزراعية ودورهم في المجتمع المصري 1914-1952
تأليف الدكتور: عاصم الدسوقي، بيتباع في مكتبة ديوان بتلاتين جنيه انصحكوا بقراءته
وعدنا من حيث بدأنا
وبقت الوزارة بتاعتنا من اعيان العصر: رجال الاعمال
ومجلس الشعب: من الاعيان والملاك، ومش ح اقول بقى مين من اعضاء مجلس الشعب صحاب اقتراح الاسراع في اعادة الاراضي الاقطاعية للعائلات عشان الضرب في الميت حرام وكفاية اللي هم فيه دلوقت
والفلاحين بينضربوا من البوليس زي زمان بالظبط
لان الفلاحين مش غلابة، وعندهم دش، وما بقوش يصحوا بدري زي زمان، والفلاحات بقت تحط منكير ودي كلها ذنوب كافية لتعذيبهم وتشريدهم
عرفتوا بقى سر مصنصن سيرة ومسيرة الحاج جمال؟
هو هو نفس سر مصنصن الملك فاروق
وفيلم السادات
هو احنا حاطين التيتة في بقنا؟ هم فاكرينا امريكان عشان لما يعملوا لنا كام مسلسل نصدقهم كده على طول؟
ده احنا الحريفة العريفة غيرش الايام المدعوقة