فيلم تسجيلي عن فرانتز فانون

انا قلت اللي ح يلاقي لي الكتاب ح اعيش خدامته طول العمر من هنا، ومواطن مصري نزل عليا لينكات من هنا الظاهر كان بيدور على خدامة والفلوس مقصرة معاه
:)
عموما الكتاب انا كلمت ديوان وبعت لمكتبة في لندن عشان انا مش عارفة اشتري اونلاين، الظاهر الكتب مش بتتباع للمصريين مش عارفة بقى مكتبة لندن دي ح ترد عليا وانا واحدة من العالم التالت وباعتة بالميل وماليش رقم حساب في البنك، الا هو الشرا لازم برقم حساب وحاجات كده؟ يعني ما ينفعش يطلبوا مني الفلوس وابعتهالهم بالامانة؟ ما اعرفش كمان ديوان ح تجيبه وللا لا؟ بس انا حطيت الموضوع في دماغي وحسكوا معايا
بس مواطن جاب لي لينك لفيلم تسجيلي عن فرانتز فانون، انتوا ما تعرفوش انا باحب الراجل ده قد ايه الله يرحمه، مش معقول ابدا، لما تقرا كلامه تحس انك عايز ترمي نفسك من الشباك من كتر الاعجاب
دول اللي انا باحبهم

Spike Lee
ده اسمه بالعنجليزي عشان اللي عايز يدور على افلامه
احلى افلام باحبها له
Malcolm X
Do the Right thing
She Hate Me
All the Invisible Children
Inside Man
ابقى انزلها لكوا والله بالذات انسايد مان

آه...الاخراني ده سبايك لي، ده مخرج، انا باحبه مووووووووت، عمل تقريبا اهم الافلام الامريكاني الحديثة كلها وافلامه مختلفة تماما عن كل اللي في السوق الامريكاني من حيث الفكرة والتكنيك وكل حاجة، هو بيكتب معظم افلامه، وطبعا بيخرجها واحيانا بيمثل فيها، بس تلاتربع افلامه ممنوعة تروح العالم العربي، اصلها افلام محرضة، انا باحبه موت، لاسع وخلل واجن مني في موضوع نظرية المؤامرة وكل شوية يطلع يقول في التلفزيونات: الايدز ده اللي عملوه البيض في المعامل والمختبرات بتاعتهم وبيجربوا فينا، والدليل ان افريقيا اكتر قارة فيها ايدز واغلب المصابين بالايدز من الملونين والشواذ
:)
ماشي انا ممكن اخرف كده بيني وبين نفسي لكن مش ح اطلع اقول الكلام ده في التلفزيون، بس هو عسل، مخرج انا شخصيا شايفاه ما حصلش
المهم
اللنك بتاع الفيلم اللي سابهولي مواطن مصري اهو: امانة امانة تشوفوا الست اجزاء بتوعه مش ح تندموا والله، والانجليزي بتاعه سهل موت والاكسنت واضحة لان معظم المتحدثين الانجليزي مش لغتهم الاصلية بيزكوا زينا كده
ان شاء الله لما اروق انزل جزء جزء بالترجمة تقريبا ح يبقى البوست اللي جاي على طول

وعلى فكرة انا محضرة لكوا مفاجئة بس مش ح تجهز الا بعد اسبوعين ان شاء الله