عاجل: الناس بتتخانق مع بعض في الشارع على البنزين

كنت راجعة البيت لقيت زحمة على البنزينة اللي جنب الكتدرائية، البنزينة دي عادة بتبقى فاضية في الوقت اللي انا باروح فيه اللي هو الساعة حداشر بالليل لقيت الدنيا زحمة والناس عمالة تتخانق مع صاحب البنزينة لانه انكر في الاول ان فيه بنزين وبعدين قال لهم خلاص يبقى مافيش تفويل ح تاخدوا بس كل واحد عشرة لتر، والناس كانت عايزة تفول قبل الساعة اتناشر صاحب البنزينة كان واقف مع ظابط بتلات نجوم والناس عمالة تتخانق وتاخد من عمال البنزينة الخابور ده اللي بيحطوه في العربية عشان يمونوا بيه، مش عارفة اسمه ايه، المهم انا صورت الخناقة بس بغبائي الفيديوهات على الميموري بتاعة التليفون والميموري كارد بتاعي نسيته في اللاب توب واللاب توب في التربلشوتر ومش عارفة ح يرجعوه امتى اول ما يرجع لحضن امه ح انزل لكوا الفيديوهات خصوصا ان الناس كانت سعيدة قوي ان فيه حد بيصور وواحد قال لصاحب البنزينة: كل التهريج اللي بتعمله ده ح ينزل في التلفزيون
:)
عشان عمال البنزينة صحابي مونوا لي عشرين من ورا صاحب البنزينة، بس صاحب البنزينة لما لقى نفسه بيتصور هو والظابط قال للعمال خلاص خلاص ادوا الناس اللي هم عايزينه
!!!!
انتظروا الفيديوهات ان شاء الله، اذا مارجعش بكرة ح استلف ميموري كارد من اي حد واحمله بسرعة
بالمناسبة انا باشتغل على البي سي وابتدى يعمل حركات قرعة
يا ح الظابط بالذمة انا مش مسلياك؟ ما بلاش قلة المزاج دي
كمان كان فيه بنزينة تانية جنب صيدلية علي وعلي وكانت زحمة وفوق بعضها
وانا اللي كنت فاكرة ان الحكومة استعانت بصديق ذكي؟ يعني هم بيعاقبوا الناس عشان ما شاركتش في الاضراب؟