ابوس رجليكوا نستحمل مع بعض شوية

قطع لساني لو كان قصدي بالتدوينة دي أني ازايد على حد وللا اشكك في حد وللا اطعن في حد، الهي تفرمني الكهربا واتقطع تحت قطر لو ده كان قصدي وللا قريب من قصدي انا كل اللي عايزة اقوله للمدونين: ابوس رجليكوا نستحمل مع بعض شوية
والله العظيم عارفة ان الظروف صعبة، والفرص قليلة، والعيشة تقرف الكلب الاعور الحزين، والبني ادم بيزهق، والامور ملتبسة، وما بقاش باين الاخضر من الابيض من البتنجاني، وكل واحد فينا عامل زي المتوضي اللي محبوس في كنيف ومش عارف يعدل قعدته ازاي عشان ما يتنجسش وفي الاخر بيزهق ويتخنق ويقول انشالله ماصليت
ووالله كمان مرة عارفة ان مافيش مدون لجأ للتدوين عشان يعمل سبوبة (كلهم اللي اعرفه واللي ما اعرفوش واللي مصاحباه واللي متخانقة معاه) لان ببساطة اللي عايز يسبب ح يبقى عنده مخ، واللي عنده شوية مخ يعرف ان دي مش احسن وسيلة يعمل بيها سبابيب، وانه مش شوية على الناس انها تتشتم ويتقال عليها الكلام القذر اللي بيتقال في الجرايد
والله العظيم عارفة ده كله
معلش معلش معلش
ابوس رجليكوا معلش وحياة اي نبي في الدنيا معلش
اتصلت بيا واحدة بنت لطيفة وظريفة ومصرية وغلبانة وكانت ح تخليني اعيط من غلبها بتقول لي: فيه مشروع من الجامعة الامريكية عشان اربعة وعشرين مدون من مصر وامريكا وقطر يقابلوا مجموعة شخصيات و...ولسة ح تكمل قلت لها معلش انا عارفة ان الجامعة الامريكية مليانة شباب وطنيين وكويسين وانا مش بازايد على حد والله بس انا عايزة اعرف المشروع ده متمول منين قالت لي من
اليو اس ايد
US AID
المساعدة الامريكية، الله يكرمكوا، والنبي والنبي والنبي، والنبي كمان مرة ما بقاش ينفع خلاص، نرحم نفسنا بقى
الوضع كالآتي: الحكومة بتاخد تمويل من امريكا، المعارضة بتاخد تمويل من امريكا (او على الاقل ما عندهاش مانع تاخد تمويل وتنسق وتجتمع مع امريكا وتظبط معاها لو ح توصلهم للحكم)، المجتمع المدني (مع كامل احترامي ليه ولدوره ولانه الوحيد اللي بينجدنا لما بنتدهول) برررررررررضه بياخد تمويل وما بقاش في دين ام البلد دي اي حاجة مستقلة خالص غير المدونين
والولايات المتحدة الامريكية عاملة زي شيخ المنصر اللي مش عايزة اي عيل يخرج من تحت ايدها واشرافها عشان تبقى كاسرة عين الجميع وتبقى زي الاخطبوط محاصرة البلد من كل ناحية
والمشاريع دي مشاريع
people to people
لتحسين صورة امريكية وخدمة المصالح الامريكية، ياعمي انا ما عنديش مانع اني اخدم مصالح امريكا لو مش متعارضة مع مصالح الغلابة اللي بيسفوا التراب في ام البلد دي، يا ناس مابقاش ينفع انصاف الحلول، الجوع الهلامي اللي احنا فيه ده مصدره: خدمة مصالح امريكا
الفقر والتهميش والبطالة والبؤس والظلم والتنكيل وحسني مبارك كمان مصدره: خدمة مصالح امريكا
وامريكا عايزة تحط ايدها على كل الاستبن اللي موجود في البلد عشان لما تحب تخلص من مبارك يبقى كل البدائل تحت ايدها ودي سياسة عامة مالهاش علاقة ببوش ولا بكلينتون ولا بانجيلينا جولي واي اهبل يتهياله انه ح يقدر يقنع الولايات المتحدة الامريكية بانهم يعملوا معادلة:
win win
يبقى اهبل اهبل اهبل اهبل اهبل
واي واحد ح يفتكر انه صايع: واروح اخد فلوسنا، دي فلوسنا دي (الكلام ده صحيح دي فلوسنا بس هو مش صايع) واقول لهم في وشهم يا ولاد الكلب يا مستعمرين واتكلم واشرح لهم اصلهم مش فاهمين واشرح للناخب الامريكي واقول لهم واعمل واسوي
ما تقول يا حبيبي أو يا حبيبتي...ما تقول من هنا للصبح، لو كلام الامريكان اللي ناموا في الشارع وهم بيقولوا
occupation is a crime
نفع يبقى كلامك ينفع، انت قلت وريحت نفسك، وهم بلعوك شئت ام ابيت، حطوا ايدهم عليك وعرفوا اولك فين واخرك فين، مش باقول بيشترونا باقول بيبلعونا، في الاخر انت مساهم في المشروع الرأسمالي الامبريالي الكبير بتاعهم حتى وانت بتشتمهم، خلاص ما بقتش مستقل، خلاص ما بقتش مصدر حيرة ليهم عرفوك وعرفوا امكانياتك ويمكن يفرمتوك كمان: علموك وللا مولوك وللا حتى ضحكوا في وشك وبقالهم ايادي بيضاء عليك، مش ح تقدر تتكلم زي ما كنت بتتكلم ولو اتكلمت ح تبقى بتتكلم في اطار منظومتهم، كأنك بتشتغل في شبكة مخدرات وبتقول: ما انا باقول لهم المخدرات غلط وحرام وضد القانون، ثم انا ما باهربش المخدرات، انا بس باقدم الشاي والقهوة ليهم! يعني ياريتك متآمر، وللا عميل، ده انت خدام وخدام اهبل كمان
الكلام ما بيخوفش الاستعمار والرأسمالية، اللي يخوفهم انك تبقى خارج منظومتهم، ما تصعش وتقول ما انا باشارك في مشاريعهم وانا برة منظومتهم، كده يبقى بنضحك على نفسنا
انت تحب تبقى زي المواطن الامريكي؟ ايه؟ ياريت مش كده؟
لا مش ياريت...عشان المواطن الامريكي اللي انت شايفه عايش في هنا يوم ماحد بيدافع عنهم بيقول: غلابة ومش عارفين حاجة وموحولين في عجلة الشغل ليل نهار عشان يسددوا اقساط
عشان حتى المواطن الامريكي النشط (في مجال حقوق الانسان على سبيل المثال لا الحصر) بيدن في مالطا وفي الاخر هو جزء من المنظومة الرأسمالية الاستعمارية بالضرايب اللي بيدفعها شاء ام ابى، ومجهوداته مش بتعمل حاجة اكتر من انها بتجمل صورة امريكا وتقول ان فيها ديمقراطية والوضع مش بيتغير والسياسة الامبريالية اللي بتخدم الرأسمالية الشرسة اللي مصت دمنا مش بتتغير، بالعكس، الناشطين دول بيجروا ريق المقموعين اللي في منطقتنا انهم يجروا على امريكا ويبقى نفسهم يبقوا زيها، واحنا مش ح نبقى زيها، ولا ح نبقى زي اسرائيل احنا خدامين وح نفضل خدامين وده وضعنا في الخريطة، ومش ح تروح للمستعبدك وتقول له لو سمحت ما تستعبدنيش
اللي عايز يعمل حاجة للبلد دي هنا مكانه، اللي عايز يفك السحر والاسر مكانه هنا
هنا
في وسط العفانة والفساد والكنيف والفقر والمرض والجهل والشتايم والادعاءات والعيشة اللي تقرف الكلب الحزين وانعدام الفرص والواسطة والرشوة من غير ما يتركن على مسند اللي صنعه هم الجهة اللي هي السبب في اللي احنا فيه، مش ح يحلوا المشاكل اللي عملوها، مش ح يصححوا اخطاءهم لانهم مش شايفين انها خطأ والمواطن الامريكي عاجز اكتر مننا واحنا في ايدنا نغير اكتر ماهو في ايده يغير
استراتيجية
people to people
مش ح تغير لصالحنا حاجة، كل اللي ح يتغير ح يبقى لصالح السياسات اللي احنا بنقول اننا ضدها، وبكرة لما تشبع وترتاح تنسى زي غيرك ما نسي، واللي مخلي المدونين صادقين انهم مكويين ولازم يفضلوا مكويين ولازم يفضلوا جهة مستقلة ولازم يفضلوا حاجة محيرة ماحدش عارف يحط ايده عليهم ولا يبلعهم ومالناش سلاح غير كده، لو كنا شايلين سلاح من اللي هو بيموت كنت قلت نشتري سلاح انشالله من الشيطان انا في حرب، لكن لما يبقى سلاحك الكلام ما ينفعش تبيعه لحد وانت فاكر نفسك صايع وبتشتري، انت مش بتشتري انت بتبيع وانت مضحوك عليك وما اخدتش تمن كمان
الظرف صعب، وكل اللي رايح واللي جاي بيهزأ فينا وبيقول علينا عيال هابلة ولاسعة وايه يعني نضال الكي بورد ورغايين وحتى مؤخرا قالوا الفيس بوك ده بتاع الشواذ
معلش نستحمل مع بعض شوية، هو احنا اطفال رضع يعني؟ مش عارفين نستحمل بلدنا؟ بلدنا عيانة مش عارفين نصبر عليها لما تخف؟