الاسم : صابر
التهمه : مصري
السن : أصغر سن عصري
رغم انسدال الشيب
ضفاير ضفاير من شوشتى لما لتحت خصري
المهنه : المهنة وارث عن جدودي والزمان
صنع الحضاره والنضاره والامان
البشره : قمحى
القد : رمحى
الشعر : اخشن م الدريس
لون العيون : اسود غطيس
الانف : نافر كا لحصان
الفم : ثابت فى المكان
ولما جيت ازحزحه عن مطرحه
كان اللى كان
جهه الميلاد: فى أي اوضه مضلمه
تحت السما
على ارض مصر
من أي دار وسط النخيل
مطرح ما يجري النيل
ما دام ما يكونش قصر
الحكم: من سبع تلاف سنه
وانا هنا راقد سجين
اطحن على ضراسي الحجر
من الضجر
وابات حزين
ملحوظة: سالنى سائل حبستك طالت وليه
لانى طيب وابن نكته وابن ايه
ما فيش مخالفه ركبتها ضد القانون
لانى خايف
والقانون سيفه ف اديه
تسأل عليا المخبرين فى أي حين
تسمع وتفهم قصتي الف وبيه
الاسم صابر ع البلا ايوب حمار
شيل الحمول من قسمتى والانتظار
اغرق فى انهار العرق طول النهار
والم همى فى المسا وارقد عليه
عرفت ليه ؟
أحمد فؤاد نجم
معتقل القلعة
1974
No comments:
Post a Comment
Note: only a member of this blog may post a comment.