اقتراح بلجنة تقصي حقائق شعبية في احداث المحلة

ده بمناسبة ان المحلة بلطجية وصيع وضربوا الامن بوشهم على ايده، خلاص مش كفاية ان الواحد يستخدم عقله ويوزن الامور بالمنطق ويفكر كده الامن اللي معاه رصاص مطاطي محرم دوليا وقنابل مسيلة للدموع رصاص حي ازاي ح يبقى ضحية اهالي عزل؟ وازاي الاهالي كان معاهم سلاح وهم كانوا خارجين من الشغل اصلا، لو داخلين بسلاح المصنع ح يدخلوه ازاي، ولو دخلوا بيه ح يخرجوا من المصنع بيه ازاي وهم اساسا اشتغلوا بالعافية والضرب واتحبسوا في المصنع عشان يشتغلوا بالعافية
مش لازم الواحد يحسب عدد الضحايا من الاهالي وعدد المصابين من الامن عشان يعرف على طول مين اللي اعتدى على مين
ولا لازم الواحد يشوف ازاي الاصابات في الاهالي وصلت للموت والعمى والاصابات في الامن كانت ابسط كتير
كل ده مش مهم لانه محتاج تشغيل مجهود بسيط قوي في العقل البشري وطبعا احنا بنخاف نحرق سعرات حرارية في التفكير عشان مافيش اكل ويمكن نحتاج نجتر السعرات دي كمان شوية
فيه اقتراح وصلني من صديق وده نصه:

نواره

فيه فكرة محددة يمكن تساهم فى التخفيف عن إخوانا بتوع المحلة، إنتى بدأتى باتهامات يكاد الجميع يقسم على صحتها لرجال الأمن انهم مارسو البلطجة، وفيه أصوات جت من المحلة بتؤكد إن الأمن عمل كده وإن فيه فلول من البلطجية اتلمو من المحلة ومن قرى مجاورة لها وحتى من طنطا والمنصورة ساهمت فى استباحة المدينة تحت سمعهم وبصرهم عشان يبقى فيه مبرر لفرض حالة طوارئ على المدينة وقادة العمال المية وخمسين يلبسو قواضى معتبرة يا إما ينحبسو بيها أو يتساومو على حريتهم وصمتهم فى ضوء وجودها. مقترحى هو لجنة شعبية لتقصى حقيقة ما جرى فى المحلة تجمع أكبر قدر من الشهادات للناس عن اللى جرى ودور الأمن فيه ودور البلطجية وياريت يقوم بيها المراكز الحقوقية وخبراء قانونيين شباب التدوين اللى عنده صورة واللى عنده فيديو واللى عارف إسم بلطجى من اللى شاركو واللى شاف مين بالظبط كان بيكسر، ده هايخليهم يفكرو يفضو الموضوع منعا للشوشرة ويسيبوهم، هما مبدئيا بدأو يجيبو ورا وعرفو ان العمال لحمهم مر بس برضو لسه بيلمو فى قيادات العمال اللى من غيرهم يتقلص تحركهم ادعى لده بسرعة وشوفى الردود إيه ولو سمحتى بلاش اسمى ومش باهزر خلى الموضوع كده وقولى جانى من صديق... أيوه يا ستى أنا راجل جبان خلاص...

---
انا باقترح كمان ان يبقى في اللجنة دي مركز النديم ومركز هشام مبارك (المركز ابونا) وحد من جرنال البديل

وانظر الصورة اذا كان حد عنده نظر لامؤاخذة يعني