اخبار الجزيرة في تنصير العشيرة

لما قريت العنوان بتاع الخبر ده
استوهايألي اني ح اقرا بقى شهادة الناس دي ان الكنائس التبشيرية في الجزائر استغلت فقرهم مثلا او طيبة قلبهم او سذاجتهم وبرائتهم وشربتهم حاجة اصفرا وصحيوا من النوم لقوا نفسهم حامل
انما الخبر كله بيتكلم عن عيال صغيرة كانت في السن اللي كل العيال فيه بتبقى بتدور على نفسها وشخصيتها المستقلة
بعيد عن اهلهم في كل حاجة ومن ضمنها الدين، ماحدش ضحك عليهم ولا ضربهم على ايدهم هم راحوا بدافع الفضول وكل جريمة الكنيسة من وجهة نظر كاتب الخبر والمعلقين على الخبر ان لما جالهم ناس بيقولوا لهم ساعدونا فساعدوهم على المستوى المعنوي وادوهم كتب واخدوهم معسكرات
يعني كنت مستنية اقرا جملة واحدة على عن فلوس اخدوها، او عن مزز اغروهم يتبعوا الدين، او عن شرائط فيديو فاضحة للشيوخ زي ما بنسمع، ابدا، العيال دخلوا الديانة المسيحية بمحض ارادتهم وقعدوا فيها شوية وزي ما دخلوها بدون اي ضغوط برضه طلعوا منها بمحض ارادتهم بدون اي ضغوط ومن غير ما حد يهددهم مثلا، طيب ليه التعامل مع الامر على انه كارثة قومية؟ وايه المقصود من كتابة خبر زي ده بالطريقة دي؟
ماهو لو كل واحد حط نفسه مكان التاني مشاكل كتير ح تتحل، لما ييجي واحد عايز يدخل الاسلام ويقول لمسلم لو سمحت انا عايز كتب المسلم ح يقول له لا امشي يالا من هنا؟
مش مهم صياغة الخبر سيبكوا منه
شوفوا التعليقات اذا كان من دولم وللا دوكهمة، حسيت ان الاسلام والمسيحية دول الاهلي والزمالك وكل واحد عمال يشجع وواحد يقول وايه يعني احنا مش محتاجين عدد يعني احنا اكتر من المسلمين وواحد يقول له اكتر ازاي احنا مليار ونص في الف وربعميت سنة لكن انتوا اتنين مليار في الفين سنة يعني احسبها كده ح تلاقي احنا اكتر
:))
مش عارفة حسبة برمة دي الهدف منها ايه؟ ولا عارفة الخبر اصلا الهدف منه ايه؟ ناس دخلت دين بمحض ارادتها وخرجت منه بمحض ارادتها وخلاص، فين الخبر؟ مش كل الناس بتقرا نص الخبر على فكرة، فيه ناس كتير بتقرا العناوين وتبني عليها استنتاجات
فيه كام واحد في اورومبا والدول المتقدمة بيغير دينه تلاتين الف مرة في السنة؟ مش ممكن ح يفضلوا يعملوا تقرير عن كل واحد فيهم يعني يبقى ح نسيب شغلنا وح نسيب الناس اللي بتموت في العراق زي الرز ونسيب الاطفال اللي بيندبحوا في فلسطين ونسيب القمة العربية العرة والرؤساء العرب الاعر وثورة التبت على الصين والمجاعات والفياضانات والتقارير اللي بتقول ان نص سكان العالم تحت خط الفقر ونسيب الجوع اللي وصل لدرجة غير مسبوقة في العالم ونسيب الغنا الفاحش برضه اللي وصل الى درجة غير مسبوقة ونسيب الناس اللي بتموت بعضها على العيش ونسيب الامراض الناتجة عن الاحتلال ونقعد نتفرغ لكل واحد بيمارس حقه الطبيعي في انه يفكر ويقرر هو عايز يعتنق ايه في حياته ونمسك قصة عادية جدا بتحصل لكل الناس وكل يوم ونحيك حواليها قصص عن المؤامرات ونستفز مشاعر الناس الدينو كروية
بدل ما كانت الجزيرة تعمل تقرير زي ده، ما عملوش ليه تقرير مثلا عن الامراض الاجتماعية والهزيمة الروحية والنفسية والفكرية اللي بيعاني منها المواطنين - خاصة الشباب - في مجتمعاتنا من كل دين وملة ومن كل الفئات الاجتماعية وعلى اختلاف مستواهم التعليمي والثقافي؟ وليه رغم اننا مثلا في مصر او في الجزائر او دول تانية كتير ما عندهاش احتلال عسكري الا اننا بنعاني من كل الامراض الناتجة عن الاحتلال العسكري؟ وده معناه ايه؟ وحله يبقى ازاي؟
مش دي حاجة اهم برضه؟ وافيد؟
السؤال اللي بيلح على في دماغي: فين الخبر في الخبر؟