حملة الدعاء على اصحاب التشريفات

حضراتكوا اكيد بتخرجوا في الشارع زي اي انسان طبيعي ما بيخرج في الشارع، واكيد بيبقى وراكوا مواعيد زي ما اي كائن حي بيبقى وراه مواعيد، السؤال اللي بيطرح نفسه على ترابيزة السفرة: هل بتوصلوا في معادكوا؟
اقصد لما بيبقى فيه تشريفة بتوصل في معادك؟ الاجابة طبعا لا واللي ح يقول اه ح اضربه بالقلم على وشه، طيب هل حضرتك او حضرتي عندنا قوائم بمواعيد التشريفات عشان اليوم اللي يبقى فيه تشريفة ننزل بدري شوية او نأجل المعاد او نشرب سم فيران ونخلص من حياتنا؟ على رأي راقية براهين بالطبع لأ واكيد حضرتك بتقف، لامؤاخذة، زي الكلب والباشا الظابط معطلك والدوق معدي بتشريفته وعادة الدوق بيبقى جاي من مدينة اكتوبر رايح مصر الجديدة او جاي من مصر الجديدة رايح العاشر من رمضان او امبابة او العجوزة المهم انه لازم يجيب اول الكوبري لاخره وانت تقف زي الكلب، مافيش حاجة يا كابتن ما تزعلش كده كلنا كلاب

طب ايدك معايا يا كابتن انت وهو ولو راسك متغطية بكوفيرتة وللا حاجة اكشفها وادعي معايا: الهي وانت جاهي يا اصحاب التشريفات يوقف لكوا المراكب السايرة، الهي لا تكسبوا ولا تربحوا قادر يا كريم، يخصم من رصيدكوا في البنوك ومناصبكوا وصفقاتكوا على قد ما بيتخصم للموظفين بسبب العطلة على الكوبري، الهي كل مشوار تخرجوا فيه وتوقفوا حال الناس يبقى اوله نكد واوسط غم واخر خسارة بالمليارات، الهي يقلق منامكوا زي ما بتضيعوا وقتنا ولا تناموا ليل ولا نهار، قادر يضيع عليكوا صفقات بيع البلد زي ما بتضيعوا عمرنا في الاشارات، الهي الكاربيراتيرات بتاعة العربيات كلها تتخرم وتجيب بنزين وتتزحلقوا من فوق الكوبري، الهي يرزقكوا بمفصلة مدببة على الكوبري تفرقع عجلة العربية ام اتنين مليون قادر يحرق دمكوا بجاز وسخ زي ما بتحرقوا دمنا واحنا ملطوعين، الهي تفرقع في وشكوا ازازة كوكاكولا وغطاها يلبس في عنيكوا زي ما بنفرقع في وش بعض وبنلبس في بعض من الغل اللي مش عارفين نفشه فين، يا رب يا ربنا تطلعوا برة مناصبكوا وتتلطعوا زي الكلاب معانا في تشريفة جربوع تاني يزنقكوا ويسخن العربية ويعصب السواقين
ربنا يبتليكوا بسواق ميكروباص اضبش يدخل في العربية المصفحة ويعجنها لكوا، يا رب امريكا تقلب عليكوا وتعطل لكوا سفرياتكوا، الهي وانتوا راكبين الطيارة ورايحين امريكا تقبضوا المعلوم الطيارة تعطل في نص السكة وتفضلوا متشعلقين في الهوا
ينكد عليكوا بحق كل اسعاف مات فيها مريض، يسود عيشتكوا بحق كل موظف اتحسب له تأخير، يطربقها على دماغكوا بحق كل واحد خطيبته فسخت خطوبتها عشان لطعها، الهي يوقف لكوا كل ماشي في حياتكوا وينيم لكوا كل واقف ولا صيدليات الدنيا ومستشفياتها تنجيكوا
قادر يا كريم
---
سيبكوا بقى من الدعاء لغزة، غزة وللا فلسطين وللا العرب كلهم مش عايزين دعوات دول عايزين رجالة وعندهم مخ وللاسف الصنف ده شاحح من السوق ولما بيبقى فيه مخ اوبشن الرجالة بيبقى عطلان ولما بيبقى فيه رجالة بروجرام المخ بيبقى ما نزلش على الهارد ديسك اصلا والاغلبية لا ده ولا ده ومش حلها الدعا

دلوقت احنا فعلا محتاجين حملة دعاء على اصحاب التشريفات لان فعلا مافيش في ايدنا حاجة نعملها مافيش غير ان ربنا يستجيب دعواتنا على كل صاحب تشريفة انشالله واحد بس قوم يبقى عبرة لمن يعتبر ومن لا يعتبر
انا معوقة بانرات يا ريت حد يتطوع من المتضررين من التشريفات ويعمل لنا بانر للحملة دي