ظاهرة الامهات الكلبة

طبعا امبارح كان عيد الام اللي انا مش باحبه لان لان الامهات نعمة ربنا يديمها وكل واحد يشكر نعمة ربنا بالطريقة اللي هو شايفهما مناسبة وكل يوم مش يوم في السنة المهم يعني بس طبعا قعدوا يتكلموا عن الام ودور الام وكده
بس انا حسيت انهم بيتكلموا عن امهاتنا احنا، مش امهات جيلنا
انتوا مش ملاحظين ان امهات جيلنا وكمان اللي اصغر مني شوية وبقوا امهات انتشرت بينهم ظاهرة الام الكلبة؟ عارفينها دي؟ اللي تشوفها بتعمل ايه في العيال تبقى عايز تقتلها عشان العيل ده احسن له يبقى يتيم من انه يبقى عنده ام كده
لو حد يذكر بوستات الرجالة والستات اللي كتبتها وخلصنا منها ان المشكلة في الامهات المصريات انها بتحب عيالها بطريقة قريبة شوية من الجنان، قريبة كتير من الجنان وده ممكن يأثر على العيال ويديهم تصورات عن نفسهم مش حقيقية عشان امهاتهم بقى مفهماهم انهم ما حصلوش ولا ح يحصلوا
بس دول امهاتنا، ووالله مش امي بس كل امهات صحابي وصحبات ماما، وكمان يمكن اللي بتشتغل بتاخد بالها من عيالها اكتر لان بيبقى عندها احساس بالتقصير بتحاول تعوضه بانها تبالغ في الاهتمام
لكن انا دلوقت باشوف امهات كلبة كلبة كلبة، وشفت منهم كتير بصراحة، كام، يعني واحد اتنين، بتاع ستة كده شفتهم في ظرف سنتين بس بعيدا عن الامهات اللي بترمي عيالها في الشارع من الفقر دول غلابة وانا شخصيا باتعاطف معاهم لانها بتبقى قليلة الحيلة ونوع الفقر اللي احنا فيه غير مسبوق الحقيقة مش ناقصنا غير ناكل قطط وكلاب زي ايام الشدة المستنصرية وبعيدا برضه عن امهات بتشتغل وتجري على لقمة العيش لان يا اما فلوس الراجل مش مكفية يا اما هو خالع ايده اصلا من الصرف وده بيبقى غالبا لا مؤاخذة يعني نو اوفنس ودي ظاهرة تانية انتشرت برضه ما كانتش موجودة بالطريقة الفظيعة دي
لكن انا باتكلم عن امهات ظروفهم كويسة نسبيا مش جعانين يعني، وطول الوقت مش بتفكر غير في نفسها، وبالنسبة لها عيالها دول كومبارس صامت دورهم في الحياة انهم يسكتوا واذا ما سكتوش ينضربوا وسايباهم ومطلوقة في الشارع او حتى قاعدة تعمل شات وتتفسح على النت او باصة في الصقف او متفرغة لجوزها تحاصره او اذا مافيش جوز يبقى كل يوم بترسم على راجل جديد مع ان معظم الامهات الكلبة ان لم يكن كل اللي شفتهم ما بيشتغلوش وطول الوقت مش عايزة ابنها او بنتها عايزة تخزنه في اي داهية حضانة جدة الجيران يلعب في الشارع يروح يموت في داهية المهم ما يوريهاش وشه ده فيهم واحدة كانت بتسيب ابنها عند مرات ابوه اللي هي بتكرهها عمى بس عشان تخلص منه وما كانش هاممها ان ابنها ما بقاش يحبها
النوع ده من الامهات ممكن تستخدم ابنها لتحقيق مكاسب شخصية ( يا تبتز بيه جوزها، يا تشنكل بيه راجل: وش مسكنة كده) وساعتها تفتكر انها مخلفة غير كده ما بتفتكرش موضوع انها خلفت ده خالص وحاجة فوق الوصف الناس تحكي وتتحاكى عليها حاجة انا مش عارفة افهمها: ازاي ام ومش طايقة تقعد مع ابنها نص ساعة على بعض وهي ما ورهاش حاجة؟ ومش متحملة مسئوليته في اي حاجة خالص، ولا عندها ظروف ضاغطة على اعصابها تخليها مش عايزة ابنها او بنتها، طب جابتهم في الدنيا ليه؟
وليه الظاهرة دي بقيت اشوفها؟ وكتير نسبيا، طب اول واحدة نموذج شاذ، تاني واحدة نموذج شاذ، تالت واحدة نموذج شاذين طب كل دول شواذ؟ فجأة كده حياتي اتملت بالشواذ؟ طب ما شفتش الشواذ دول في جيل امهاتنا ليه؟
فيه حاجة مش مظبوطة