لو عليك قضية حول للانجيلية

يعني بصرف النظر عن ان اللي كتب الخبر على العربية نت مصمم يستخدم كلمة الملة النصرانية :) ومحسسني اني دخلت في مسلسل تاريخي بس الخبر ده بيقول ان فيه تلاتة اتنين فلسطينيين وواحد لبناني كانوا مسلمين "ارهابيين سابقين" قتلوا عدد مهول من الناس - بيقولوا يهود - لكن ربنا تاب عليهم وبقوا مسيحيين انجيليين، التلاتة دول الحزب الجمهوري داير بيهم في كل حتة وطالقهم على الامريكان يرغوا ويتكلموا بيقولوا ايه بقى؟ بيقولوا ان احسن وسيلة للقضاء على الارهاب هي تحويل كل المسلمين في العالم الى مسيحيين انجليين بالذات، ما اعرفش في الفيلا دي بالذات ليه؟ ليه مش مسيحيين وخلاص؟ ده سؤال بيطرح نفسه بقوة بس مش مهم
المهم انهم ودوهم لطلبة جامعة كولومبيا ودول طلبة اجارك الله لسانهم طويل وما بيرحموش فيهم واحد اسمه حيدر حمزة سأل سؤال منطقي جدا: طب لما انتوا ارهابيين وقتلتوا ناس كتير امال انتوا هنا بتعملوا ايه؟ يعني انتوا مش في السجن ليه دلوقت حاليا؟
التلاتة دولم بيقولوا انهم كانوا بيحاربوا اسرائيل، كانوا مقاومين يعني، وفيهم واحد بيقول انه وهو عنده سبعتاشر سنة قتل ميتين ومش عارف كام اسرائيلي، طيب هل ايه؟ بالنوسبة لنا احنا نو بروبلم، هم كانوا بيقاوموا، بالنوسبة لامريكا دولم ارهابيين، والمفروض ان امريكا دولة قانون ابسط حاجة المفروض يسلموم لحليفتهم اسرائيل عشان تحاكمهم، هم دولم مش عائدين تائبين وربنا فتحها في وشهم؟ طيب مش التوبة برضه يلزم لها تكفير ذنوب؟ وللا اللي عليه قضية يحول انجيلي ويبقى كده ميت فل وسبعتاشر؟
اذا كان كده يبقى بسرعة حولوا التوربيني لانجيلي قبل ما يتنفذ فيه حكم الاعدام وبرضه اللي عليه ايصالات ، شيكات، قضية دعارة، قضية مخضروات، يحول بسرعة وهو ربنا ح يكرمه اخر كرم
دوقت هي مش امريكا دي دولة علمانية ودولة قانون؟
ايه دخل القانون في انهم بقوا انجيليين؟
دوقت مش الشعب الامريكي ده شعب غلبان وطيب وامير وبينضحك عليه وبيتحط على الجرح يطيب ومالوش ذنب في اي حاجة ده حتى انتخب بوش من تحت راس بن لادن المجرم اللئيم والقاتل الاثيم؟
طيب ماحدش من طلبة جامعة كولومبيا علق على ان دول خارجين عن القانون غير الطلبة العرب
طيب الشعب الطيب الامير المحترم اللي احسن مننا اكيد واكيد كمان حكومته اللي هو انتخبنا بتقتلنا عشان احنا السبب مش عشان هو عنصري ولا حاجة احساسه وتلاتة واقفين يقولوا له قتلنا ودبحنا وسفحنا وبعدين ربنا هدانا والحل ان المسلمين يتحولوا للانجيلية عشان نقضي على الارهاب
يا سلاااااااااااااام ده ايه الديمقراطية دي كلها
طيب واللي ما يرضاش يتحول للانجيلية يتحصل فيه ايه يا بكيزة
يتقتل طبعا
ماهو بقى اللي مش عايز يبقى مش ارهابي يبقى يتقتل واهم نصحونا وعقلنا في راسنا نعرف خلاصنا عايزين نتنصح نتنصح مش عايزين نتنصح ما نتنصحش ويابخت من قتلني وطرطر عليا ولا سابني في حالي وفرج الناس عليا ماهو ده اللي الانسة وفاء سلكان كانت بتقوله في الجزيرة: الاسلام ده دين ارهاب مالوش حل ومافيش حل غير اننا نقضي على الاسلام ونخلي المسلمين بقى يفوقوا لنفسيتهم يا امتن بقى يبقوا ارهابيين وذنبهم على جنبهم وكما ان الارهابي السابق لما يتحول الى انجيلي تسقط عنه القضايا فان الارهابي الحالي يا الدفع يا الحبس
اصل الاسلام دين قتال وبيجبر الناس انها يا تسلم يا تدفع جزية
طب يا اخت امريكا مافيش اوبشن الجزية ده الله يخليكوا؟ يعني يا انجيلي يا ميت؟