للأخوة اللي قطعوا وشي عشان العلم لا يكيل بالبتنجان

وقلت ان مش صحيح ان العلم موضوعي ولا حاجة ومافيش حاجة اصلا اسمها موضوعية من الاساس وكل عالم بيعمل بحث وبيدعي فيه انه بيتحرى الموضوعية وبيرمي وراه كل خلفيته الثقافية والفكرية والدينية والاجتماعية كداب وان كل ده بيأثر عليه وهو بيعمل البحث بتاعه سواء كان واعي او غير واعي، والعلم بيغلط زي اي حاجة تانية بتغلط، مش لان الانسان غلاط ولا لان التجربة ممكن يكون ناقصها حاجة بس، ولكن لان معرفة العالم ده جه منين ومجتمعه هو ايه وايه المفاهيم اللي بتحكمه مهمة ولازم توضع في الحسبان لان التجربة بتطلع نتيجة لكن كيفية قراءة النتيجة بتعتمد على ذاتية العالم اللي بتتحكم فيها مفاهيم واهواء كتيرة. والعلم لا يكيل بالبتنجان وبكرة كل ده يترمي في الزبالة ويجي غيره زي ما اللي قبله اترمى في الزبالة وجه غيره، ومش بيجي غيره عشان العلماء بقوا اشطر، بس عشان مافهيمهم اتغيرت وطريقة قراءتهم للنتائج هي اللي اتغيرت. وعشان كده انا ضد فكرة الاعجاز العلمي للقرآن مش من نفس منظور الناس اللي بتعلي العلم على القرآن لا سمح الله، وخلينا نجيب من الآخر يعني العالم اللي بتقول لا القرآن ده كتاب موعظة انما العلم حاجة تانية هم أساسا شايفين ان القرآن ده تخريف والعلم هو اللي مصدر ثقة عشان ده بقى اللي مبني على حقائق وتجارب واستقراء للنتائج والكلام الخرا ده، والتانيين اللي عايزين يحشروا العلم في القرآن الحقيقة انهم مهزومين هزيمة نفسية قدام هيمنة العلم، اللي هو مجال انساني زي اي مجال، وانا شخصيا شايفاه زيه زي النجارة والحدادة والطبيخ، وسيلة انسانية الواحد ما يستغناش عنها لكن ماهواش مقدس زي ما انا شايفة ان كل الناس مقدساه كده.
طيب انا مش ح اكلم بتوع الاعجاز العلمي في القرآن عشان هم غلابة اصلا وصعبانين عليا، انا باكلم الاخوة اللي عاملين ان العلم ده هو الوسيلة الوحيدة لمعرفة الحقائق واي حاجة غير مبنية على اساس منهج علمي تبقى في الهجايص وتحتمل التأويل والعلم هو الفيصل في كل حاجة لان العلم موضوعي ولا يخضع للمصالح ولا الاهواء و"انا اصلي بافكر بامنهج علمي انما انت بتفكري بمنهج عاطفي"
طيب اسمع انت عشان بتحب الكلام ده....
ده
http://www.livescience.com/health/060908_brainy_men.html
بحث بيقول ان الرجالة اذكى من الستات واتبعوا في البحث المنهج العلمي اللي اكلتوا دماغنا بيه..اخدوا عينة من كل الاعمار وعملوا لهم اختبار آي كيو اللي هو اختبار ذكاء وقالوا ان النتيجة طلعت ان الرجالة اذكى من الستات.
(ماشي يا بتوع الاعلان العالمي لحروق اللسان؟)
طيب بلاش ده...ايه رأي حضرتك انك في نظر العلم غبي
اهو بحث علمي
http://news.independent.co.uk/sci_tech/article3067222.ece
اتبع نفس المنهج العلمي من اخذ عينة عشوائية من كل الاعمار وعمل تجربة بانه اجرى لهم اختبار ذكاء وفحص للحامض النووي بتاعهم ومن استقراء النتائج ثبت ان البيض اذكى ناس في الدنيا وكل الملونين: اماثلك وامثالي اغبى ناس في الدنيا، خاصة الافارقة، يعني لابسانا لابسانا.
وبعيدا عن اني ست وافريقية وملونة (او بنية زي ما بيسمونا) مش ممكن اصدق ابدا، مهما كان شكي في قدراتي العقلية (واللي بالمناسبة شك كبير قوي)، ان جورج بوش، عشان ابيض وراجل، ممكن يبقى اذكى مني والا انتحر احسن.
بذمة النبي، اي نبي، موسى نبي عيسى نبي محمد نبي، بذمتهم جميعا ده كلام يدخل عقل عيل صغير بيريل على البافتة؟
هل حد في الدنيا يقدر يقول العلم لا يكيل بالبتنجان والعلم منزه عن الاهواء الشخصية وعن الذاتية والعالم في اقصى الصين بيبحث بنفس الموضوعية اللي بيبحث بيها العالم في امريكا الشمالية واللي بيجمعهم الموضوعية والتحرر الفكري من اي موروث ثقافي وفكري؟
اللي ح يقول كده ح ادب صوابعي الاتنين في عينيه
زي ما طبيخ الهنود مليان شطة وطبيخ المصريين مليان توم - وحش قوي التوم بالليل - وطبيخ الخواجات مسلوق
كذلك العلم
مششششش ممكن باي حال من الاحوال اصدق ان عالم اوروبي ابيض ملحد ح يطلع نفس النتيجة اللي ح يوصلها عالم اوروبي ابيض مسيحي وعالم تاني اوروبي ابيض يهودي وعالم تالت عربي ملون مسلم وعالم رابع عربي ملون مسيحي لما يحلفوا لي على المية تجمد
والله لو حلفتولي على كل المصاحف والتوراهات والاناجيل اللي انطبعت من اول اختراع الطابعة لحد النهاردة لا يمكن اصدق الكلام ده
ولا يمكن اصدق ان النتائج العلمية مصدر ثقة من غير ما ابحث في اصل العالم اللي انتج النظرية العلمية
بقى اساسا فكرة اختبار الذكاء دي ما تدخلش دماغي اصلا
مين اللي حط الاختبارات دي؟ وعلى اي اساس اتحطت؟ ومين اللي قال ان دي طريقة سليمة لقياس مستوى الذكاء؟ هو يعني ايه ذكاء اصلا؟ هو مين من الاصل اللي له الحق انه يحكم على بني ادم انه ذكي وللا غبي؟
انا شخصيا شايفة ان الذكاء والغباء مسألة ارادية بحتة الانسان هو اللي بيقرر ببعض السلوكيات انه يتصرف بغباء او ما يفهمش او يتصرف بغباء وممن نفس البني ادم الذكي مرة واحدة يقلب غبي لو سلوكه اتغير والعكس صحيح
من تجربتي الشخصية بالاقي ان الانسان لما بيستذكى روحه زيادة لدرجة انه يشوف كل الناس اغبيا او يستغبى روحه زيادة لدرجة معوقة بتكون النتيجة واحدة انه بيأتي بتصرفات واقوال غبية يا اما بسبب الاهمال والاستعلاء الناتج عن الثقة الزايدة او التعويق والارتباك الناتج عن عدم الثقة الزايدة.
وده رأيي مش مبني على أبحاث علمية وسخة...ورايي ده بيعبر عني ومش بافرضه على غيري وادي نفسي حق اني احكم على جنس كامل او نوع كامل انه غبي او ذكي
طيب احنا في مصر عندنا هنا - بسبب موروث اجتماعي - عقدة اسمها عقدة مجموع طيب دي حاجة فاهمينها وعارفين نحلها وبتكون نتيجتها ان من كتر ما اللي بيجيب مجموع كبير بيتهياله انه اذكي مخلوق على الارض وقبل ما يتكلم معاك يسألك انت جبت مجموع كام في الثانوية العامة بتكون النتيجة انه بيبقى اغبى واحد في الدنيا وبيتصرف تصرفات غبية لانه حاسس ان كل اللي حواليه اغبيا وهو بقى اللي جايب مجموع زي قصة السلحفاة والارنب ( ملحوظة: انا جايبة مجموع كبير في الثانوية العامة عشان ماحدش يفتكر اني باطلع عقدي بس على الناس ومن غير مذاكرة والله ووالله كمان مرة طول عمري باتصرف بغباء ووقعت نفسي وقعات غبية باضرب نفسي بالجزمة عليها لحد دلوقت) ومن خلال هذه التجربة الحية في حياتي عرفت ان مافيش معيار واحد للذكاء ومافيش حد يقدر يحكم على غيره هو غبي وللا ذكي.
باي حق بقى سي واتسون وللا الراجل التاني ده بقى مسك اختبار ذكاء معين حاطه ناس بني ادمين زينا زيهم وحكم على الستات والملونين انهم اغبيا وان اذكى ناس في الدنيا هو الذكر الابيض
- الذكر الابيض دي عاملة زي دكر البط -
وايش عرفنا ان الابحاث دي مش مدفوعة دفعا عشان تخلي العالم اكثر ذكورية وتخدم المصالح الامبريالية؟ زي ما ايش عرفنا ان الابحاث الطبية مش معمولة مخصوص عشان تخدم مصالح شركات الادوية العالمية؟ وايش عرفنا ان الكمبيوتر ده ما اخترعهوش عشان القوى الامبريالية تحكم سيطرتها على العالم وتتبع الناس نفر نفر؟
وايش عرفنا ان الابحاث الجيولجية ما اتعملتش بطريقة تطلع نتيجة تخدم فكر معين؟
المفروض او اللي بيتقال ان الابحاث العلمية اصلا بتبقى مبنية على الشك ثم التجربة ثم استقراء النتاج ثم وضع كذا افتراض لتفسير النتائج دي والبدء في استبعاد النتيجة الاقل احتمالا ثم الاكثر فالاكثر لحد ما يوصل لنتيجة هي الاقرب احتمالا انها تكون التفسير الصحيح صح؟
ايش عرفك؟ عرفت منين يعني نطيت في مخ العلماء وعرفت شاكين وللا فيه حاجة في دماغهم معينة عايزين يثبتوها وبيتلاعبوا بالابحاث العلمية زي ما الانسان يقدر يتلاعب باي حاجة؟
طيب ما الانسان بيتلاعب بالقانون المحلي والدولي
وبيتلاعب بالدين
وبيتلاعب حتى بالكتب المقدسة اللي نازلة من عند ربنا ويأولها على هواه
يبقى ايش عرفك انه ما بيعملش كده في العلم
ايش عرفك انه ما عملش حاجة دقيقة جدا في اثناء التجربة عشان يطلع النتيجة اللي هو عايزها او اللي مدفوع انه يعوزها؟
ايش عرفك انه ما استبعدش القراءة الاصح للنتيجة وفضل عليها قراءة تانية تخدم مصالح معينة؟
طيب فيه بحث تاني بيقول ان الستات اذكى من الرجالة...مين قال لك ان اللي عملوا البحث ده مش مدفوع لهم فلوس من المنظمات النسائية العالمية عشان يطلع النتيجة دي؟ بلاش يبقى مدفوع له....متعاطف مع الظلم اللي واقع على الستات وعايز يثبت انهم اذكى
فيه باحث تاني اهو
http://gladwell.typepad.com/gladwellcom/2007/12/race-and-iq.html
بيقول ان الاعراق مالهاش دخل بمستوى الذكاء وان الذكاء له علاقة بالظروف الاجتماعية والبيئة وبيزيد ويقل على حسب المتغيرات
وحاطط لينك في الاخر لبحث علمي برضه اتبع نفس الاسلوب اللي اتبعه الباحث العنصري عشان يثبت ان الفقرا مثلا بسبب سوء التغذية والضغط النفسي وسوء احوال المعيشة وقلة التعليم بيبقوا مستوى ذكاءهم اقل بصرف النظر عن العنصر
ومين قال له كده بقى؟ انا كل الفقرا اللي شفتهم في حياتي يودوك البحر ويرجعوك عطشان
ايه سر الابحاث دي؟ وليه طرح السؤال ده بتاع مين اذكى من مين؟
عشان هم فعلا عبدة العلم، هم لما بيتكلموا عن الذكاء بيتكلموا عن الذكاء الاكاديمي
عمرك حليت اختبار ذكاء؟ كل اختبارات الذكاء بتنصب على حل مسائل رياضية وهندسية وقدرات لغوية واستنتاجات منطقية وقوة ملاحظة
طيب فيه واحد يبقى نبيه وشاطر ولهلوبة وما دخلش مدارس ولو اديته مسألة من المسائل دي مش ح يعرف يحلها
كده بقى غبي؟ طيب هو ممكن يديلك مشكلة من المشاكل الحدادة مثلا اللي هو بيعرف يحلها عشان دي شغلته وانت تحتاس فيها وانت باشمهندز قد الدنيا
يبقى مين فيكوا اللي غبي؟
فيه حاجة تانية الاخ واتسون العنصري ما اخدش باله منها
اختلاف مناهج التعليم في دول العالم: مش كل الناس بتتعلم بنفس المنهج ولا كل المدارس بتدرس نفس المواد بنفس الطريقة
لما تدي لواحد نرويجي عنده اربعتاشر سنة مسألة حسابية اخدها في المدرسة ح يعرف يحلها
لما يجي واحد مثلا من الصين وعنده اربعتاشر سنة وتديله نفس المسألة مش ح يعرف يحلها بس يعرف يحل غيرها وغيرها دي الواد النرويجي ما يعرفش يحلها صح؟
لما تجيب مواطن مكسيكي عايش وسط صالات القمار وقرفان في حياته وعيشته كلها وتعمل له اختبار ونفس الاختبار تطبقه على واحد امريكي ابيض عايش في طبقة متوسطة وتخرج بنتيجة ان الامريكي الابيض اذكى يبقى انت اللي غبي مش المكسيكي
ايه سر كل ده وليه ابحاث في مدى ذكاء الستات والرجالة والاعراق والاجناس
واتسن جابها من الاخر قال: بنطالب لهم بحقوق متساوية بينما الحقيقة انهم مش زينا هم اقل.
وفكرة هم اقل يبقى يستاهلوا حقوق اقل دي يمكن احنا ما نفهمهاش لكن هي مفهومة قوي في التراث الغربي من اول اليوتوبيا بتاعة افلاطون مرورا بيوتوبيا مور وفلسفة نيتشه ونظرية داروين اللي بيصبوا كلهم في مدام انت اقل محتاج فرص كتيرة ليه؟ ما انت غبي اصلا مش ح تعرف تستغل الفرص دي؟ انا اولى منك عشان انا اذكى وح اعرف استغل الفرص احسن وانت تسمع كلامي وتمشي ورايا عشان انت غبي وح تضر بمصلحتك لكن انا اذكى وعارف فين مصلحتك....مش هو الفكر الامبريالي من الاساس مبني على كده؟
the white man's burden
عبء الرجل الابيض القوي الذكي النبيه الانسان الطيب بالفطرة انه يقود الاجناس الاقل نحو سعادتها وهنائها وتحضرها
وييجي واحد يقول لي الشعب حاجة والحكومة حاجة تانية؟ طيب هم العلماء اللي بيطلعوا النتائج دي من الشعب وللا من عند امي؟ حتى لو مدفوعين...مش هم اللي بيشكلوا وجدان ومفاهيم شعوب بتقدس العلم كأنه ربنا وفوق ربنا كمان؟
معنى كلامي اننا نسيب العلم وندروش؟
انا ما قلتش كده...لما اقول نسيب العلم زي ما اقول نسيب الطبيخ وناكل الاكل ني
بس زي ما كل الناس بتطبخ طبيخها في بيتها
احنا كمان من حقنا نعمل ابحاثنا العلمية في بيتنا من بيئتنا ومن تربتنا ومن خلفيتنا ومش ممكن كل ما يشخوا في ودانا نصدقهم
طيب على الاقل الناس اللي مغرمة بالعلم دي ما يفكروا بمنهج علمي شوية....ما تحاول تشك شوية يا عمي مش كل ما تسمع عن نظرية علمية تتكلم عنها على اساس ان خلاص مافيش بعدها كلام زي واحد صاحبي انت ما تعرفوش بيقول لي: انت بتتناقشي في ايه - مع العلم اني ما اتناقشتش ولا حاجة ده هو طلع في وشي كده من غير سبب - العلم خلاص اثبت نظرية النشوء والتطور كل الابحاث والحفريات وتحاليل الحامض النووي بتقول كده...خلاص العلم حسم الموضوع
والله لا كنت فتحت بقي في موضوع النشوء والتطور دي قبل كده ولا فتحته بعد كده وانا شخصيا ما عنديش مانع تطلع صح او غلط
انا عندي مانع انك تتكلم عن العلم بوصفه القول الفصل وانه ما بيغلطش ده بيتطور يعني ازاي بتحب العلم وانت مش بتفكر باسلوب علمي
مش كل بحث يطلع نصدقه كده على طول...ما هو مش كل خبر بتقرا بتصدقه، مش كل حاجة تسمعها تصدقها، انت اللي بتقرر تصدق ايه وما تصدقش ايه. اشمعنى الابحاث العلمية بتصدقها غميضي كده على طول؟ مش العلم مبني على اساس الشك؟ ما تبقى عالم كده وتشك اذن انت دبوس
والتصديق برضه مالوش علاقة بالاسباب الموضوعية والدلائل المنطقية، ده له علاقة برغبتك الشخصية، سواء كنت عارف وللا مش عارف، انت بتنقي انت عايز تصدق ايه لان المنطق برضه وسيلة، وعلى رأي السفوسطائيين انا اقدر اطرح وجهة نظر وادلل عليها بالمنطق لحد ما تقتنع بيها وتبصم بالعشرة انها صحيحة وبعدها اقول وجهة النظر اللي عكسها على طول وادلل عليها بالمنطق والحجة لحد ما ترمي نفسك من الشباك وتبقى مش عارف الصح فين والغلط فين
حتى في العلم الابحاث بتناقض بعضها وكلها معتمدة على الشك والتجربة والاستقراء
واستفت قلبك دي مش في الدين بس دي في كل حاجة في الدنيا دماغك هي ريسك
وانا بقى ماديش عقلي لغيري ابدااااااااااااااااااااااااااا
ولا لاينشتاين نفسه