دي مش قوات اسرائيلية بتهدم بيوت فلسطينيين عشان تبني مستوطنات
دي مش فلسطينية اتهد بيتها في قصف اسرائيلي
دول مش لاجئين في مخيم عين الحلوة
دول مش اطفال جنوب لبنان في اثناء الحرب
دول فلاحين بلدنا من كفر العلودول اللي اشتروا قراريطهم من منتفعي الاصلاح الزراعي بعقود صورية
ودول اللي ما عندهمش دخل غير من اراضيهم ومواشيهم
ومالهمش بيوت غير بيوتهم اللي هدتها السلطات المصرية قال عشان
تعمل محطة مياه وقبل ما تطردهم وتعذب اللي اعترض منهم وتخرب بيوتهم
رفعت عليهم قضية عشان بنوا على ارض زراعية
(يعني فلاحين وبيزرعوا ح يسكنوا فين؟ في مدينة الرحاب؟)
أبناء مصر عاملين ملف كامل وشغل هايل وفيلم مفصل عن قضيتهم
(ياريت نسيب العيال دي تشتغل ونبعد عنهم بوقفاتنا الاحتجاجية؟)
والقضية باختصار ان دول بقالهم يجي خمسين سنة في الارض دي
صحيح عقودهم صورية والدولة رافعة عليهم قضية
اللي لحق منهم يعمل مصالحة عمل والباقي اتحكم عليه بالسجن
وشوف البجاسة يا اخي اخفوا عنهم خبر السجن لحد ما جم يهدوا بيوتهم
الناس راحت ببراءة للقسم عشان يستغيثوا ان بيوتهم بتتهد راحوا قابضين عليهم عشان عليهم احكام
يعني شغل لامؤاخذة نسوان قارحة بجد يعني وفي الاخر
اربعتاشر اسرة اتسكنت وخمس اسر مستنيين نصيبهم وخمسة وتلاتين اسرة
في مخيمات اللاجئين بيشربوا مية ملوثة ونايمين في العراء وعايشين عيشة
اعطني الناي وغني
والدولة عايزة تديهم على المحصول اللي يسوى الفين جنية خمسميت جنيه بس
وعلى القيراط الفين جنيه وهو يسوى اكتر من ميت الف جنيه
----
فيه حاجة قاسية عايزة اقولها بس الحقيقة هي مالهاش حل تاني
ابناء مصر كانوا قالوا ان الناس في حاجة عاجلة لبطاطين وخيام وادوية
ومساعدات انسانية
بس معلش المساعدات دي لو وصلت واتسكنوا في الخيام والعشش
ح تبقى عشوائيات جديدة والدولة ح تطنش وهم ممكن يهدوا
ويتأقلموا على الوضع اللي هم فيه
انا عارفة انه منطق قاسي بس فعلا اي مساعدة ح تتقدم
ح تضرهم على المدى البعيد والدولة ح ترميهم على بيت المحسنين العمار
كالعادة
No comments:
Post a Comment
Note: only a member of this blog may post a comment.