ليه حذفت بوست زغلول النجار

لا طبعا مش عشان ما باحبش وجع الدماغ

ده انا باموت فيه يعني والا كنت حذفت بوست جيفارا

الحقيقة والله انا مش لتاتة لغرض اللت الحريمي يعني

انا باحب المناقشة لانها بتفتح افاق في التفكير وعادة اي كتاب

باقراه مش باستفاد منه تماما الا اذا اتناقشت فيه مع حد قاريه ويكون له

وجهة نظر مختلفة عني

اللي حصل ان بوست زغلول النجار اثار نقاش كتير واراء كتير

بمختلف الاساليب وانا مش باكتب حاجة الا لما اكون مقتنعة بيها جدا

ارحم دماغك ادلى بدلوه مشكورا وان اختلفت معاه في حاجات

فهو قال كلمة تسببت في ان دماغي تزقزق واحس اني مش متأكدة من رأيي مية في المية

قال لي اشمعنى قابلة الاعجاز البلاغي اللي في القرآن ومش متقبلة فكرة الاعجاز العلمي؟

اللي زقزق لي دماغي ان القياس جائز وفقا للمعطيات:

كل نبي بيجي بمعجزة تتحدى اكثر المجالات ازدهارا في عصره

زي معجزة موسى اللي تحدت السحر ومعجزة عيسى اللي تحدت الطب

وسيدنا محمد بعث في قوم عرب وصلوا لقمة البلاغة اللغوية

بس سيدنا محمد آخر الانبياء والمفترض ان القرآن معجزة قائمة الى يوم

الساعة وعليه فهو معجزة متجددة

واللغة العربية دلوقت في البتنجان يعني اي حد بيعرف عربي عاتشي زينا

ويقرا القرآن مش ح يتمكن من ملاحظة الاعجاز اللغوي

وبما ان دلوقت العلم هو معبود البشرية فعلى القرآن انه يتحداه لانه معجزة متجددة

دي المعطيات اللي ارحم دماغك استند عليها في قياسه عشان يوصل لنتيجته

اظن يعني

بس فيه معطيات اخرى زي ان العلم بيغلط وبيغير رأيه

وزي المعطيات الكتير اللي ذكرتها قبل كده في البوست اللي مسحته

واللي استندت عليها عشان اوصل للنتيجة اللي وصلت لها ان القرآن لا يجوز

التعامل معه ككتاب نظريات علمية

وعليه فدماغي قعدت تودي وتجيب وده دليل على ان متغير ارحم دماغك

وهو المتغير الطارئ على دماغي

:)

خلاني ابقى مش مقتنعة مية في المية من كلامي اللي قلته

ولسة برضه ما اقتنعتش بالكلام اللي هو قاله

وانا ما اقدرش احط حاجة على المدونة انا مش متأكدة اني مقتنعة بيها

لمجرد المكابرة او استخسار فولتات الكهربا اللي استنفدت في كتابة البوست

مدام ترددت يبقى ده يستلزم الطقوس اللي باعملها لما اتحير في امر ما:

اشتري شوية كتب بشأن الموضوع عكس بعض

واقعد اقراها ورا بعضه وبعدين

احل كام مربع سودوكو وكام مربع كلمات متقاطعة

وبعدين اتنح وافتح بقي للدبان واسرح في الهيول

يمكن اوصل الى اني كنت غلطانة وارحم دماغك صح وعليه فانا مدينة له

باني اصرح بده لكل اللي قروا المناقشة

يمكن اوصل الى اني كنت صح وهو غلطان وعندي ادلة اكتر

وعليه فواجبي اني اوضح له ادلتي يمكن تكون غايبة عليه

يمكن اوصل اننا احنا الاتنين غلطانين وفيه حل تالت ولازم برضه افصل

يمكن اقرر اني ما يبقاش عندي قرار اصلا في الموضوع ده

على حسب الكتب المتوافرة وصعوبة مربعي السدوكو والكلمات المتقاطعة

وعدد ونوع وحجم الدبان اللي ح يدخل بقي

ولحد ما اوصل لقرار فمش ممكن استمر حاطة حاجة ابتديت اتشكك في صحتها

واذا كنت غلطانة فانا باعتذر مقدما واستغفر الله اذا كانت ذنب

واذا كنت مش غلطانة فانا باخزق عنيكوا مقدما والحمد لله

:)

محبة والله

====

بما ان الموضوع اتفتح بقى في سكة الاعترافات فكمان راجي

لفت نظري اني غبية

هو ما اقليش انت غبية بس لما قريت تعليقه حسيت اني غبية

لان انا دماغي زقزقت لكن اللي علقوا على الموضوع غالبا

لسة مقتنعين برأيهم وقدحوا زناد فكرهم عشان يكتبوا تعليقاتهم

قمت بمنتهى الغباوة بدل ما اعمل

editing

للبوست بتاعي انا وامسح التعليقات بتاعتي اللي هي ردا على الناس

واسيب تعليقات الناس زي ماهي

مسحت البوست كله بتعليقاته

وكأني قفلت موضوع بينما الحقيقة انا لسة بافتحه

بس التصرف ده مش عن قصد بقى ده غباوة اصلي مش نايمة كويس

طيب يا شباب اديني باقول الموضوع مازال مفتوح واحنا لسة في مجال المناقشة

ايه رأيكوا في موضوع الاعجاز العلمي للقرآن؟

هل هو صحيح زي ما ارحم دماغك بيقول امتداد او قياس جائز على

الاعجاز اللغوي للقرآن

وللا ده تسفيه من شأن القرآن ومساواته بنظريات علمية قد تتبدل وتتغير

خصوصا اننا مش بنطلع نظريات جديدة علمية من القرآن

ده العلم بيكتشف النظرية واحنا بنطبقها على الاية

يعني بنطبل في المتطبل

طيب هل ده مش تطبيل في المطبل ولا حاجة

وانما تجديد في طريقة تفسير القرآن

واحنا عارفين ان مفسر القرآن لازم يحصل سبع علوم اولا

عشان ياخد إجازة انه يفسر القرآن

طيب هل مع تطور الدنيا السبع علوم دول زادوا علمين تلاتة

او منهج تفسير القرآن اتغير او اتعدل

وللا ده تهجيص مننا ومحاولة لتلفيق تفسيرات على هوانا

عشان نستقطب بيها ناس لدين هو بالفعل مش محتاج

كل التلازيق دي عشان يستقطب القلوب؟

طيب هل المنهج ده سببه اننا بالذات عايزين نستقطب الخواجات

وبنلفق لهم اي تفسير عشان نستميلهم

- ودي من الحاجات اللي ممكن تصيبني بالجنان -

؟؟؟؟؟

وللا ده عمل بنصيحة الرسول خاطبوا الناس على قدر عقولهم

وكل ناس وثقافة لهم منهج؟

ايه بقى؟

ايه؟

نعم؟

ها قولوا كده وانا اقول

وبعدين ح انزل ان شاء الله ادور على كتب واقول لكوا عليها

اه صحيح نسيت

صديق عزيز عليا قوي لما قرا كلامي قال لي ده مش تدوين ده لعب عيال

لا ماهو حضراتكوا انا مش صعيدية

احب اعرفكوا بشخصي الضعيف

بقى انا مؤمنة ان كل اقتناع او حتى عقيدة قابلة للمراجعة اذا الانسان

صادف دليل على بطلانها او بطلان بعضها

يعني انا مش باتكلم صحيح غير في اللي انا مقتنعة بيه تماما

لكن لو لقيت كلام تاني عليه دليل اكبر واوثق لازم انصاع له

عشان انا باحب الحقيقة وبادور عليها

ومستعدة بسلاسة اتنازل عن حاجة كنت مقتنعة انها صح بمجرد

اني الاقي دليل قطعي الثبوت على حاجة عكسها

وباحترم عقل الانسان جدا وباحب اسمع من كل الناس

اللي حصل ان كلام ارحم دماغك كان بيوازي في المنطق الكلام

اللي انا مقتنعة بيه وعليه فانا دلوقت مش عارفة احدد

لحد ما اجمع معطيات اكتر

وبرضه ساعدونا يساعدكوا ربنا لا خاب من استشار

====

هيييييييييييه عمرو عزت ده مجدع بصحيح

لقالي التعليقات على صفحة جوجل التعليقات اهي

انا سايبة شوية من تعليقاتي مش كلها ومخلية كل تعليقات الناس

وارجو ان المناقشة ما تتقفلش وياريت نستفيد كلنا

أبو على يقول...
يعنى يا ست اٍحنا لسه ما فقناش من علقة جيفارا تقومى تدخلى علينا بالبوست المصيبه ده ؟؟طيب .. اٍن هى اٍلا هباله جديدة تضاف لهبالة الرسام الدنماركى اللى ولع هو و أسرته و هبالة البت اللى أتسخطت سحليه و الغابة اللى أشجارها كاتبه شهادة التوحيد و بيضة الفرخه اللى مكتوب عليها لفظ الجلاله و الشجره المباركه اللى على طريق الاٍسماعيليه و هكذا كل يوم نخترع حاجه نهين بها ديننا و شخصيتنا اللى بحق ربنا فى الحضيضالأفاق زغلول النجار و من على شاكلته يتاجرون بقرآن ربنا لأجل مصالح لا أشك ثانيه أنها مصالح دنيوية فى المقام الأول و اٍلا فعليه اٍثبات أنه لا يتقاضى الملايين من الفضائيات التى تستضيفه و من الجرائد التى يكتب فيها مثل هذه العباطات يعنى لو ثبت ثبوت اليقين كمان 100 سنه مثلا أن بعض ما فسره النجار من آيات الله و أرجعها لظاهرة علمية لو ثبت فيما بعد أن هذه النظرية خطأ أو غير دقيقة ألا يكون هذا تقليلا من شأن القرآن المفترى عليه ؟؟تحميل القرآن و تأويله بأكثر مما يحتمل يدخل تحت بند القدح فيه و هو عمل اٍجرامى لا ينم اٍلا عن جاهل لا يقل جهلا عن الذين فسروا قوله تعالى (لا تنفذون اٍلا بسلطان ) أن المقصود هنا سمو حضرة جناب سلطان بيه أبن عبدالعزيز أول رائد فضاء عربى .. و اللى مش عاجبه يشرب من البحر
19 أكتوبر, 2007 01:59 ص
ارحم دماغك! يقول...
طيب يا ست نوارة..هو بس عشان نجيب الرواية من أولها..الدكتور زغلول النجار مقالش انه ناسا قالت انه القمر مقسوم نصين..معلش أنا عارف انه الإخوة الساقطين آداب مش بيفهموا في الجيولوجيا..الرواية كالتالي:الدكتور زغلول روى، انه في مؤتمر، قام أحد اللوردات البريطانيين المسلمين، وقال قصة إسلامه، وتضمنت انه كان بيبحث في الأديان، فكان ضمن ما أحضره هو نسخة مترجمة عن القرآن الكريم، وأول ما بدأ كانت سورة القمر، ولما قرأ "اقتربت الساعة وانشق القمر" اعتبر الكلام غير منطقي فترك القرآن..يقول، والكلام لا يزال للورد، انه جلس بعدها بفترة أمام التلفزيون، ولقي برنامج لمذيع شاب عمال يشتم في سنسفيل ناسا..ويقول انه بالمليارات اللي بتصرفها كان ممكن يأكلوا الناس الجعانة في العالم كله..فالراجل الممثل لناسا قال له، الحقائق اللي اكتشفناها تساوي أكثر، واقناع الناس بيها يتطلب مال أكثر..فلما قال له زي إيه..قال لما صعد أبوللو للقمر وبتحليل العينات..وبعد البحث في صور الأقمار الصناعية..وجدنا انه في حزام من الصخور المتحولة لافف جسم القمر..وده عشان يحصل محتاج انه القمر ينقسم نصين ويرجع تاني..دي الرواية اللي رواها زغلول النجار عن اللورد (اللي انا مش فاكر كان اسمه أحمد إيه بالضبط)..واللي انتقدها وائل باشا اللي الله أعلم اذا كان يعرف إيه هي الصخور المتحولة والفرق بينها وبين النارية والرسوبية أصلا ولا لأ :)إيه علاقتها باللي هو جايبه؟..ومعلش يعني بتؤكدي انه الراجل كذب مع اني مش عارف اذا كنتي برضو عندك ما ينفي وجود حزام من الصخور المتحولة من عدمه!
19 أكتوبر, 2007 02:22 ص
جبهة التهييس الشعبية يقول...
ايوة انا قريت الكلام ده في الاهرام وبصراحة ما دخلش دماغيايه واحد طالع في التلفزيون يقول اكتشفنا ان القمر كان مشقوق ولو ده حصل ما اتكتبش ده واتعمل له البروباجندا الامريكاني اياها ليه دول كل ما يكتشفوا فسية يعملوا عليها باللودي حاجةالحاجة التانية ان وائل جايب من وكالة ناسا كلام غير كدهالحاجة التالتة انا رافضة اساسا فكرة مقارنة القرآن باكتشافات علمية ممكن يبقى لها عدة تفسيرات صحيحة او خاطئةانا عايزة افهم هو القرآن ناقصه ايه عشان نفبرك له نظريات علمية تأكدهوبعدين قعدت فترة اتابع مقالاته في الاهرام واجيبها يمين وشمال واقول والنبي الاجانب لو اسلموا عشان الكلام ده يبقوا معاتيه
19 أكتوبر, 2007 02:28 ص
ارحم دماغك! يقول...
والله يا حاجة جبهة المكتشفات العلمية اللي تعد بالآلاف احنا مبنسمعش عن أغلبها..ومعلش اسمحيلي..ناسا فعلا مش بتكتشف فسا لو أردنا الموضوعية :)لو جبتي مجلة اسمها مجلة العلوم، وهي نشرة صادرة في الكويت وعبارة عن محاولة لاصدار نسخة عربية من أميريكان ساينتست..هاتعرفي فعلا انه زغلول النجار غلط انه توجه لينا بأي كلام عن العلم قبل ما يكون عندنا علم أصلا!!أبحاث واكتشافات بتؤكدها تجارب بالآلاف، أولا تسعين في المية من اعلاميينا غير مؤهلين أصلا لفهمها، ده غير اننا أصلا معندناش اعلاميين متخصصين في الشأن العلمي اللهم إلا كام فلتة كدة، عايزة تسمعي فيييين؟انا مش باؤكد الرواية ولا بانفيها، والتقارير بتاعت وائل دي ببساطة ملهاش أي علاقة بالكلام اللي بتقولي انه وائل نسبه لدكتور زغلول ولا تثبته أو تثبت عكسه، وكل ده ملوش علاقة أصلا رواية الدكتور زغلول..وده شئ عادي جدا انه يحصل، لأنه اللي بيتكلم أصلا واحد ملوش أي علاقة بالحقل العلمي التجريبي ولا حتى نتوقع انه عنده تخيل عام!أما عن كونك تقبلي أو لا تقبلي فدي حرية شخصية..لكن أنا لما أكون أعلم بشكل يقترب من اليقين، انه الكون يتمدد، وبعدين أقرأ في القرآن آية زي (والسماء بنيناها بأيد وإنا لموسعون) وبعدين أقول مفيش حاجة اسمها اعجاز علمي أبقى انا لامؤاخذة حمار..حمار اني أشوف الآية بعيني في القرآن واشوفها بعيني في الحقل التجريبي العلمي، واحط إيدي على عيني وأقول لأ لأ..أنا مافبركش نظريات!!أنا هارجع واقول هو غلطان فعلا..يتكلم معانا احنا في اعجاز علمي إيه وبتاع إيه؟..الاعجاز العلمي للعلماء، والاعجاز اللغوي للبلغاء، أما السفهاء فيرووا يناموا أحسن..وبما ان احنا لا عندنا علم ولا نيلة، وعندنا بعض البلغاء وكثير من السفهاء، فينفع الشيخ الشعراوي مع نسبة مش بطالة منا صنعتهم الكلام واللغة..والأغلبية لسة عايزين نعلمهم حاجة أصلا عشان يبقى في معاهم لغة حوار..
19 أكتوبر, 2007 02:48 ص
أبوفارس يقول...
أتفق معك فى معظم ماقلتى..تخيللى..بيعجبنى أوى مفهوم غريب جدا للعلم منتشر حدانا..كلما ظهرت نظريه جديده..نقولهم قديمه ياخواجه..نعرفها من قبلكم..وكأننا بنلعب بصره ع القهوه..بس لى ملحوظه..أوربا أخذت من العالم اﻷسلامى أقل بكثير مما أخذت من الحضاره الصينيه وبالذات فى مجال التكنولوجيا..البارود..البوصله..الورق..الطباعه..علوم التعدين "الميترولوجى" وغيرها..هى اﻷساس المادى للحضاره الغربيه وكلها أساسا صينيه..العلوم النظريه كالبصريات والرياضيات كانت مراجعها اﻷساسيه حتى ربما القرن السادس عشر عربيه..فكره الفصل بين الشريعه والفلسفه فكره أين رشد أعطت دفعه للتفكير العلمى فى أوربا..أما أخونا "الفشار" فده فيلم لوحده..تحياتى..خالد
19 أكتوبر, 2007 03:03 ص
brokenheart يقول...
صباح التهييس بالمناسبة انا مش باحب الحركات القرعة اللى بيعملها علماءنا الافاضل بتوع الازهر ومن شابههم بالمناسبة فيه على يوتوب مقطع لعمرو اديب فى مقابلة مع احد علماء الازهر ومعاه كتاب اجازه الازهر تقريبا عن الزواج واداب الزواج والزفاف وفيه شوية كلام فارغ ياريت اللى يعرف الموضوع دة يبقى يشوف مدى الهرتلة اللى علماءنا وكتابنا بقم بيهرتلوها وبيقولوا للناس عليها وكانها دستور او قانون لابد من العمل به لانها فى الاول والاخر بتهز صورة الاسلام قدام الغرب الله يحرقهم ((العلماء والغربيين على حد سواء)) مطرح ما راحوا بجد اللى بيحصل دة بيقلل من قيمة الاسلام بشكل عام وبيقلل من قيمتنا كمسلمين وبيؤيد فكرة الغرب عننا اننا عالم همج ومتخلفين ......... للاسف
19 أكتوبر, 2007 03:04 ص
brokenheart يقول...
تمت إزالة هذه الرسالة بواسطة المؤلف.
19 أكتوبر, 2007 03:06 ص
ارحم دماغك! يقول...
والله معلوماتي الضعيفة بتقول انه زغلول النجار فعلا قدم أبحاث في استغلال طاقة الأرض، ودوران الأقمار الصناعية، واستغلال الأبار الحارة في توليد الطاقة..والله أعلم في إيه تاني..خدي بالك انك بتتكلمي عن واحد أقل جامعة طلبته قبل كدة كانت الملك فهد للبترول والمعادن..واتقدر هناك تقدير مش بيتقدره العلماء الأمريكان والبريطان اللي كانوا فيها، بالمناسبة ده كله انا شفته بعيني محدش قال لي :)طبعا احنا في ظل حكومتنا الرشيدة، محدش بص في أي من هذه الأبحاث ولو على سبيل التجربة..مش معقول هنيجي نحاسبه..مفيش فايدة..برضو كلام ملوش أصل..وتفسير القرآن يافندم حاجة، وموضوع الاعجاز العلمي حاجة تانية..واذا كان مش عاجبك انه تفسير الآية جاي على حقيقة علمية أصبحت شبه قطعية النهاردة، اتفضلي عرفينا بتفسير الرسول..هو الرسول نفى انه الآية على ظاهرها؟..وإيه اللي يضطرني للتأويل أصلا؟..إذا كان علماء الشريعة نفسهم مش بيؤولوا إلا لعلّة!..لكن إذا كان النص الظاهر نفسه حقيقة علمية وكلام حاصل وانا شفته، أؤول ليه؟..إيه العلة؟..ولا برضو بس لأنه الفكرة لا تروقك يبقى نقفل الاجتهاد في وش أي شخص يشوف حاجة على أساس علمي منطقي؟والرسول صلى الله عليه وسلم هو اللي قال لنا "التمسوا غريب القرآن"..على الأقل يبقى فيها شوية سنس..وبعدين روقي دمك احنا مش بنتخانق يعني :)))
19 أكتوبر, 2007 03:14 ص
جبهة التهييس الشعبية يقول...
ابو فارسلا معلش بقىالعلوم الصينية وصلت لنا الاولومش عيب اننا نقول قديمة يا خواجةلانهم قعدوا فترة كبيرة ما يعترفوش بفضل الحضارة الاسلامية مع ان الحضارة الاسلامية لما اخدت من اللي قبلها ادتهم الفضل الكاملوسيطرة الحضارة الاسلامية وتأثيرها على النهضة الاوروبية لم تتبين بشكل كام غير في عصرنا الحديثمؤخرا لما العلماء الجداد اخيرا ابتدوا يعترفوا بفضل الحضارة الاسلاميةيا عمي انا كنت بادرس جون ميلتون وكان بيبقى ناقش قصيدة كاملة من ابو العلاء المعري ولا حتى يعمل له اشارة الحراميوكولريدج كان متأثر بالقرآن في صورهيعني تأثير الحضارة الاسلامية مش بس كان قوي في العلوم وفي الادب والشعر والفلسفة حتى علوم الاقدمين اللي استفادوا منها زي الصين واليونان والرومان وصلتهم عن طريقناوده مش معناه اننا نتركن على تاريخنا وننامبالعكس المفروض ان ده يبقى محفز لينا اننا نرجع تاني زي ما كناوبرضه في البحث العلمي المفروض انك بتشير للمراجع اللي انت استفدت منها واوروبا في القرون اللي فاتت ما كانش عندها الامانة الكافية انها ترجع للعلماء المسلمين الفضلوالطب والكيميا والرياضيات والمنطق والفلسفة وعلم الاجتماع وعلم النفس كله مبني على انجازات وتطوير العلماء المسلمينفي وقت هم كانوا بيلعبوا في مناخيرهم ولما دخلوا الاندلس حرقوا تلاتلاف طبيبة وصيدلانية بتهمة السحر وقفلوا الحمامات عشان الحموم حرام بل انهم كمان كانوا بيحرقوا الشعراء عشان سحرة فما تقوليش اتأثروا بالصينيين اكترbrokenheartممكن اعرف ايه اهمية صورتنا في الغرب اذا كانت حقيقتنا بتضرنا احناهو احنا بنمثل يا خوانااحنا عايزين نتقدم تاني عشان الغرب يقول علينا شاطرين وللا عشان نفسنابجد انا الكلام ده بينرفزني ما ملعون ابوهم ع السبحة يعني احنا فين هو يااما نتحايل عليهم عشان يسلموا يا اما ندور على طريقة نقلدهم بيها عشان نعجبهمده لو قيس مش ح يعمل ده كله عشان ليلىايه الحب غير المبرر دهحاجة عاتشفية مؤثرة جداانا ما اعرفش ايه حكاية كتاب الزفاف دهماله؟
19 أكتوبر, 2007 03:17 ص
جبهة التهييس الشعبية يقول...
ارحم دماغكيادي بريطانيا واوروبا الله يحرقهم بجاز وسخهم وجامعاتهم واللي عايز يتلزق فيهم وياخد منهم الاعترافما بيتنيل ياخد صفحة كاملة في الاهرام ما يكتب فيها ابحاثه العظيمة اللي انت بتتكلم عليهافاروق الباز عمل مشروع ممر التنمية وعرضه طبعا على الحكومات المتعاقبة وضربوا عليه طناشراح منزله كتاب ونشره في الجرايد وعمل بيه هيصة وبوليكة عشان يقول للناس يا نااااااااااس فيه عربي عامل مشروع للتنميةامممممممممم جامعة الملك سعوووووووووودلا انا مليش فيه دهلا الملك سعود ولا ولاد الملك سعود ولا دولة الملك سعودالابحاث والاكتشافات العظيمة ما اتنشرتش ليه بدل الكلام اللي يضحك اللي هو كاتبهاينشتين عمل نسختين من نظرية النسبيةنسخة يفهمها العلماء اللي زي حضرتكونسخة تانية مبسطة يفهمها العوام والجهلة والدهماء من الامثاليوقريتها وفهمتها تصور؟انا فهمت نظرية النسبية وزغلو بخلان عليا بابحاثه وعمال يشتغل في تخصص مش بتاعهلا هو كده بيفسر القرآن طبعانعمل ايه لو بعد ميت سنة زي ما ابو علي بيقول ثبت بالدليل القطعي عدم صحة كل النظريات ديوما تقوليش دليل قطعي دي والنبيعشان من ميت سنة بس كان فيه ادلة قطعية على حاجات دلوقت اللي يقولها يبقى بيهوبصمن ميت سنة بسوالقرآن بقاله الف وربعميت سنة ما حدش يقدر يشكك فيه الا اللي بيكابريبقى ليه نحط ابو قرش على ابو قرشينوكل الايات اللي هو جابها لمقارنتها بالنظريات العلمية تحتمل تأويلات كتيرة ثم ان ما حدش عارف العلم ح يوصل لفين ويمكن يفنى خالص حد ضامن بكرة فيه ايهوللا انت من عباد العلم اللي بيقولوا العلم العلم يحيا العلم عمره ما ح يموتانا شخصيا بيجيني احساس ان البشرية ح يجيلها يوم وكل الحضارة العلمية بتاعتها دي ح تنهار ومش ح يفضل منها اثروارد ان ده يحصلووارد ما يحصلش بس ده احساسيعند الاحساس بقى اوعى وشك الغوغاء والدهماء بيحسوا اكتر من العلماءلا ربنا ما يجيبش خناق ولا حاجة
19 أكتوبر, 2007 03:28 ص
ارحم دماغك! يقول...
عمالة تقولي اننا عايشين عالة عليهم ومش عاجبك اعترافهم بيه ورجوعهم ليه!طب جامعاتنا بتعترف بيه وبتخليه يدرّس لولادنا..على فكرة هو عايش في مصر بشكل أساسي وأصلا أصلا في جامعة قناة السويس، وطلبناه في ندوات في اسكندرية، وبرضو مش عاجب..قلنا العالم المتمدن كله فعلا بلا مبالغة معترف بيه..برضو مش عاجب!أقول جامعة الملك فهد تقولي سعود!..سعود؟..يعني حتى الخلط اللي حصل هنا يعني لي انك متعرفيش مركز جامعة الملك فهد في الشرق الأوسط إيه..طبعا هي مش معهد بن جوريون لكن أقصد بالنسبالنا كعالم عربي!ياست نوارة..انتي خايفة، حقك..لكن مش القرآن اللي يتخاف عليه..أنا واثق في العلم..حقي برضو..لأني عارف إيه هو، بادرسه، وباجربه، وباتعامل مع نظرياته يوميا..متحجريش عليا بقى!..واللي يقول انه الكلام اللي انا قلته زائف أو حقيقي، واحد بيفهم فيه!يعني لو انتي رافضة المبدأ نفسه قولي أنا رافضة المبدأ..لكن متروحيش تقيمي الكلام من ناحية علمية وتقولي انه كذب وتزوير وانتي مش عارفة إيه هو!..ومعندكيش ما يؤهلك أصلا لرده من الناحية العلمية!كون الراجل مفسرش أبحاثه وكان نفسك تقريها ده شئ جميل، ممكن نقترح عليه فعلا، لكن ده ملوش علاقة بكلامه عن كتابه اللي هو مؤمن بيه، ومدى الاعجاز اللي ظهر له فيه في مجاله هو برضو!..ده مينفيش ده، ومش عشان هو مفسرش أبحاثه لحضرتك يبقى كلامه خايب أو يضحك..أنا ماما ربنا يديها الصحة خدت وقت طويل على ما اقتنعت اننا في مجموعة شمسية تنتمي لمجرة قطرها مئة ألف سنة ضوئية..حقها..لكن في المقابل محدش طلع يقول علماء الفلك بيخرفوا عشان بس ماما، هي خريجة آداب وكانت التانية على دفعتها بالمناسبة وست عظيمة بكل المقاييس، لكن مع ذلك محدش خد بكلامها..ماما قالت لي مش يمكن يطلع الكلام ده غلط زي نظرية العناصر الخمسة بتاعة اليونان؟..والله الكلام شكله منطقي، بس أبدا مش لشخص عرف ليه احنا بنقول والله النجم ده يبعد عنا كام سنة ضوئية وليه الكواركات بتركب بروتونات!وهارجع أقول لك، لو من النوع الموسوس ومتفرقش معاكي تعرفي إيه اللي خللى العلماء يقولوا انه الكون بيتمدد من عدمه ولا يفرق معاكي إيه اللي على أساسه وصفوا تركيب الذرّة، يبقى قولي كدة، لكن متقوليش ده حقيقي أو مزيف بناء على كلام مش علمي!
19 أكتوبر, 2007 03:46 ص
جبهة التهييس الشعبية يقول...
يا عمي ارجع اقرا البوست تاني واقرا ردودي تانيانا مش عالمة عشان افتي في العلموزغلول النجار مش مفسر قرآن عشان يفسر في القرآنوما فتتش في العلم الخص لك البوست يمكن طويل عليك1- حكيت الحكاية الخاصة بوائل وقلت ماحدش رد على اتهامه لزغلول بانه كداب2- ما يهمنيش زغلول كداب وللا مش كداب يهمني انه اساسا ما ينفعش يعمل كده في القرآن العلم مع احترامي الشديد له لا يرقى الا رسالة الله الى العالمين على مرة العصور وحتى تقوم الساعة وعليه فلا يجوز اثبات صحة القرآن من خلال نظريات علمية تتغير وتتبدل3- سبب اندفاع زغلول لتفسير القرآن وفقا للنظريات العلمية هو رغبته في استقطاب الاوروبيين للاسلام لانهم حسب رأيه العلم مسيطر على كل تفكيرهم4- دي اهانة وذل ما بعده ذل وكأن القرآن ليس له قيمة الا اذا تطابق مع النظريات العلمية اللي معرضة انها تتغير وبدل ما طريقتهم في عبادة العلم تتغير نأيف لهم الدين عشان يفضلوا برضه بيعبدوا العلم بس تحت اسم الاسلام5- شيء مقزز جدا الروح المنهزمة اللي بتتملق الغرب وعايزة تستقطبهم باي طريقة ولو بتلزيق تفسيرات للقرآن ما سمعناش عنها قبل كده وباهدار قيمة القرآن ومساواته بالنظريات العلمية اللي هي انتاج بشري وليست انتاج الهي مثل القرآن6- القرآن بيستمد قيمته من نفسه مش من نظريات علمية وضعها بشر اصابوا او اخطأوا مش دي قضيتي7- مغازلة الغرب الى هذه الدرجة فيها عنصرية مذمومة واولى ان الانسان يبحث عن المستعد للدخول في الاسلام بشكل اسرع- تذكر سورة عبس حين عاتب الله رسوله على اهماله لواحد غلبان عشان بيتحدث مع واحد من اسياد قريش - 8- الناس في افريقيا ممكن يدخلوا الاسلام زي الهوا بس احنا بنهملهم عشان مش مستنضفينهم وعاملين نلحس جزم الاوروبيين عشان يدخلوا الاسلاموده اصعب لان الانسان لما بيبقى منتصر بيبقى متكبر واقل استعدادا لقبول كلمة الله9- تاني زي البوست اللي قبل اللي فات انا مصممة اننا بنعاني من هزيمة نفسية هي اللي عملت فينا كده وضحكت علينا الناس10- زغلول النجار وغيره من العلماء عليهم واجب ناحيتنا وناحية المستضعفين في الارض والخواجات لما يحبوا يعرفوا عن الاسلام مش محتاجينه احنا اللي محتاجينه فمافيش داعي يتعب نفسه في مسألة خلافية وهو امامه مهمة حتمية- فقه الاولويات -انا مش خايفة على القرآن انا خايفة علينا احناوخايفة على محاسبة ربنا لينا على الافارقة اللي بيرقصوا عريانين حوالين النار ولما واحد بس كويتي راح لهم اسلم على ايده مئات الاف بمنتهى السهولة وبقوا من خيرة المسلمينجتنا وكسة في روح العبيد المتحكمة فينادي النقطة الاساسية اللي باتكلم فيها وح افضل اتكلم فيها لحد ما تتغير او اهلك دونهالازم نتخلص من نفسية العبيدالهزيمة الاقتصادية تتعوضالهزيمة السياسية تتعوضعدد القتلى الكبير نخلف غيرهملكن الهزيمة الروحية المتمكنة مننا ما تتعوضشماذا يفيد الانسان اذا ربح العالم وخسر نفسه
19 أكتوبر, 2007 04:02 ص
ارحم دماغك! يقول...
جميل جدا..1- فعلا أول مرة اسمع حكاية وائل ولو اني عارف رأيه من زمان في الدكتور زغلول عن طريق منتدى كان فيه..كون محدش رد ده يعني ليا انه كالعادة الناس بتتكلم معاه في موضوع أول مرة يسمعوا عنه..2- الكلام عن اعجاز علمي في القرآن حاجة، وإثبات صحته من خلال النظريات دي حاجة تانية، لازم الأول نبقى عارفين اللي بنتكلم عنه..وبعدين احنا ليه اعتبرنا اثبات اعجاز القرآن من الناحية البلاغية جميل وحلو؟..وماحدش قال اننا بنثبت صحته عن طريق لغة بشر بتتغير وبتندثر؟..ممكن تتخيلي انه في فرق لكن فعلا مفيش..اللي خلى شوية أغبياء يقولوا انه القرآن فيه أخطاء لغوية، مع اننا أصلا ومع انه فطاحل اللغة كلهم اتفقوا على جعل القرآن هو الفيصل والمقياس اللي بيحتكم إليه في مسائل اللغة!ده وجه اعجاز وده وجه اعجاز، مش مسألة اثبات لصحته من عدمه!..بالمناسبة موضوع الاعجاز العلمي ده من قبل أي ظهور اعلامي للدكتور زغلول، يعني الراجل مألفش من عنده..3- وتفكيره هو كمان يا ست نوارة!..مهو ده تخصصه واللي هو بيفهم فيه!4- ويعني احنا كنا بنعبد اللغة لما اقتنعنا انه القرآن معجز بلاغيا؟وياترى فين تأييف الدين ده؟..5- اللي فات برضو بيرد على مسألة مساواة القرآن بالنظريات العلمية، في فرق كبير، لا زغلول ولا انا ولا أي حد مقتنع بالاعجاز العلمي قال انه القرآن عبارة عن نظريات علمية..كل الحكاية بنقول انه عندنا معارف انسانية النهاردة مجرّبة وواضحة لنا تماما بناء على هيصة كبيرة..ولقينا انه القرآن أشار إليها بوضوح..زي ما أشار لمراحل تكون الجنين في بطن أمه..دي شفناها بعنينا (بمجرد توفر أجهزة السونار) ولقيناها في القرآن!!6- صح..محدش قال حاجة :)7- يافندم سيبك من الغرب دلوقتي، أنا شخصيا أكره انه نقرن بين العلم والغرب وكأنه بتاعهم هم..كان أولى بنا احنا اننا نسير في الأرض فننظر كيف بدأ الخلق، لنعلم أنه الحق زي ما بيأمرنا القرآن بالضبط..كونه هو يستهدف بالدعوة الغرب (وحتى الشرق المتقدم) فالراجل حظه كدة!..قرعته جت كدة!..ده تخصصه ودول الناس اللي هتفهمه!للأسف :)8- مش معنى انه في تقصير في الدعوة في إفريقيا اننا نلوم على واحد بيحاول في الغرب..اللي يناسب الأفارقة غير اللي يناسب الغربيين وزغلول النجار مش هينفع معاهم بنكلة، المفروض واحد خطيب وأصحاب المال هم اللي يشوفوا الأفارقة ويبعتوا الدعاة، لأنهم شعوب عاطفية..انما ألوم على النجار عشان بيستغل مجاله وملكاته مع اللي يفهموه؟..طب هو ذنبه إيه؟9- ماشي انا معاكي في وجود الهزيمة النفسية..لكن كدة ده إيه؟يعني ماجيش في الحاجة الصح واقول ده من الهزيمة النفسية..معلش مانا ممكن أقول انه المسلمين مش عايزين يقتنعوا بأنه كتابهم معجز من الناحية العلمية بسبب الهزيمة النفسية برضو!10- مانا سبق وقلت لك..هو ماسابش مهمته تجاهنا، لا سافر وقعد برة بعد ما أخد جايزة نوبل مثلا ولا غيره، الراجل قاعد بيعلم الولاد وبيقدم الأبحاث..احنا ماستفدناش، ده مكنش بسببه!حاجة كنت عايز أقولها هو انه في فرق بين النظرية العلمية، والمشاهدات الواضحة اللي جاءت بسبب التطور العلمي، يعني حاجة زي نجوم السوبر نوفا لما لقطنا موجاتها ورصدناها، حاجة زي مراحل تكون الأجنة..دي مش مجرد نظريات :) حتى تمدد الكون بعد التجارب الأخيرة بقى في حكم هذه المشاهدات :)
19 أكتوبر, 2007 04:28 ص
TAFAHA يقول...
طب تصدقي بالله عليا الطلاق عليا الطلاق عليا الطلاق من مراتي اللي لسه معرفش هتجوزها امتى وازاي وليهومع اني ازهري وفي تانية ثنوي وعندي ستاشر سنه وتلت تربع يعن في شهر واحد الجي ليلة راس السنه هتم 17 سنهومع اني مش عارف انا بكتي كدا ليه بس مش فاهم حاجة من البوست ده مع اني عارف ان القمر انشق بالفعل ايام الرسول بيقلبو تاني ليه ولاد ال..... دولليه بيتكلمو عن قرأنا ليه وفي نهاية هذا التعليق احب اهدي اغنيةان شاللله يا رب تنشلو في حته خطرةلجميع الي بيشتمو دينا ويزعلوكي في حاجة:)
19 أكتوبر, 2007 04:37 ص
الطائر الحزين يقول...
السلام عليكماعتقد انكم تركتم القضية الاساسية ودخلتم فى نقاش جدلى حول دكتور زغلول النجار ذاته وكأن هناك من يكرهه وأخر يحبةاعتقد أن الموضوع ببساطة هو سؤال محدد هل القرآن يمكن ان نستنبط منه نظريات علمية ؟؟اعتقد ان كان هذا جائز لكنا أول المكتشفين والمخترعين لكل جديد فى الكون من خلال التفسير القرآنى لكن هناك فرق بين الاكتشاف و الاختراع وبين أن يوافق الاختراع نفسة أية جاء بها القرآنبداية من كروية الأرض وفى النهاية اتضح أنها على شكل بيضة لتوافق "والارض بعد ذلك دحاها"يعنى لا اعتقد ان القرآن كتاب يحوى كل العلوم فى الكون (طب و هندسة وراثية و كيمياء عضويةو فلك و .....هذا ما اراهوجزاكم الله خيرا
19 أكتوبر, 2007 06:56 ص
Abu Lahab يقول...
العزيزة جبهة:أرجو أن تسمحي لي بنقطتين:الأولى: أن الالوان الفاقعة الجديدة التي لونتي بها موقعك ستكون أكثر نجاعة وفاعلية في الإحتجاج على معاملة الدولة للصحافيين من إغلاق الموقع. وأعتقد الآن أن الدولة وأجهزة قمعها ستستجيب صاغرة لمطالبك بتحسين معاملة الصحافيين مقابل استعمال ألوان معقولة :-).ثانيا: لقد قمت بالرد على زعمين (مثنى مزاعم) من مزاعم الدكتور النجار ، الأول عن انشقاق القمر والثاني عن ادعائه أن مكة مركز الأرض. وتجدي هذه الردود في مدونة أبو لهب.وأثناء دراستي للدكتور النجار ، بحثت عن مقالاته العلمية المنشورة في المجلات العلمية المعترف بها فوجدت أن عددها هزيل وأن تخصصه يتعلق بدراسة السبخات المائية ، ولم يقم هذا الرجل المتاجر بالإسلام والمسلمين بأي بحث علمي حقيقي بعد أن دخل في سفاهة وهراء الإعجاز العلمي للقرآن والسنة. والحقيقة أن هذا الرجل يمثل فضيحة ومخزاة فكرية للعرب والمسلمين على المستوى العالمي.تحياتي ومحبتي
19 أكتوبر, 2007 07:30 ص
مهندس مصري يقول...
أولاً كده و علشان نهدي اللعب و نصفي النفوس السلام عليكم و رحمة الله و بركاتهمعلش يا نوارة بما إنها جبهة و شعبية كمان يعني للشعب كله و بما إنه ما ينفعش نهيس في العلم بصي يا ستيفيه فرق بين النظرية العلمية و دي تحتمل الصواب و الخطأ و مازالت تخضع للشكو بين الحقيقة العلمية التي ثبتت بالدليل العلمي القاطع و تصمد لأي شكزي نظرية إن الأرض مركز الكون و إن الشمس هيه اللي بتلف حواليهادي كانت نظرية و ليها مشاهدات بتدعمها زمانو كان ضدها نظرية إن الشمس مركز الكون و إن الأرض و بقية الكواكب هيه الي بتلف حوالين الشمس ودي أثبتها كوبرنيكس حسابياً و نقض النظرية بتاعة الأرض مركز الكون لكن الكنيسة أجبرته على نفي نظريته أمام الناس و إلا سيعدمكل دي كانت نظريات لحد ما طلع البشر خارج الأرض و شافوها بتلف حوالين الشمس بل و اتضح ان الكون مش المجموعة الشمسية بتاعتنا دي بس بل فيه مجرة درب التبانة اللي بننتمي لها و هي بتنتمي لتجمع مجري كبير و كل حاجة بتلف حوالين مركزالأرض بتلف حوالين الشمس و الشمس بتلف حوالين مركز المجرة و المجرة بتلف حوالين مركز التجمع المجري و التجمع المجري بيلف حوالين مركز لسه ما نعرفوشو كل ده بقى حقائق علمية و ليست نظريات يبقى لو لقيت كلام في القرءان بيقول نفس الكلام أو معناه نفس الكلام يبقى إعجاز و لا لأأطوار الجنين اللي صورها القرءان قبل السونار إعجاز و لا لأالأرض بعد ذلك دحاهافهموها زمان فهم و كان صح و مازال صح بس لما أفهم أنا منها إن ربنا بيشير لبيضاوية الأرضو اللي بتقترب علميا من مجسم معقد بنسميه في علم المساحة الشكل الجيوديسييبقى أنا صح و هما كمان كانوا صحو مازالوا صحمن إعجاز القرءان إنه بيخاطب الناس على قدر عقولهم في أي زمان و مكان و كل واحد بيفهمه على قد علمهوعلى فكرة أنا ضد التخاريف اللي بتقول إن القرءان فيه العلم الدنيوي كله كلامك صح في نقطة إن القرءان مش كتاب نظريات علمية و لكن فيه إشارات علمية لطيفة لبعض الحقائق العلمية اللي خلقها ربنا و بيثبتها العلم الحديث دلوقتيبقى ساعة ما تثبت علمياً حقيقة بشكل علمي نهائي و ألاقي القرءان قال عليها من 1400 سنة يبقى إعجاز و لا لألكن أنا معاك ضد ربط القرءان الثابت بأي نظرية متغيرة لم تثبت صحتها و لم تصبح قاطعة بعدو الإختلاف في الرأي لا يفسد للود قضية
19 أكتوبر, 2007 10:58 ص
عباس العبد يقول...
ازيك يا جبهة انتى عاملة ايه ؟انا عارف ان مليش فى الموضوع ده بس عايز اقول حاجة الى عامل بيفهم .... يدى امارة على فهمه ........يا سيدى الفاضل الاعجاز العلمى فى القرأن مين الى اكتشفه مين الى عمل الابحاث ؟مين الى وصل الى ان الكون بيتمدد ؟مين الى عمل كل ده ؟الغرب يا استاذ ..........فلما يكون الغرب هو الى اكتشف الكلام ده و القرأن موجود من 14 قرن و المؤمنين بيه مفهموش انه فيه اعجاز علمى الا لما الغرب وصل للأكتشافات دى معنى كده ان الغرب احسن من ربنا لأن ربنا فضل مخبى المعلومة و مقلهاش فى حين ان الغرب مبخلش على الناس بالمعلومات لما وصلها الغرب احسنلأن الغرب بابحاثه و مجهوداته وصل داخل الزمن بحاجات خالق الزمن كان مخبيهايا اما يبقى البحث العلمى حقيقة مادية و ملوش دعوة بالدين علشان كده ربنا مجبش سيرته بل دفعك بس للبحثيعنى معنى كده فى النقطة دى برضه ان الغرب اكثر اسلاما منك....ليه المسلمين مش هم الى وصلوا للحقائق العلمية دى و بعد ده يركبوها زى ما يركبوها؟ على الاقل يبقى مجهدهم و قرأنهم و ايمانهم و علمهم .... ساعتها العالم كله ينبهر لكنطيب حقولك حاجة تسمع عن ابن باز مفتى السعودية فى عز الثورة العلمية و انفجار فكرة الاعجاز العلمى خرج على جمهور المسلمين و قال ان الارض مسطحة مش كروية و ان الى يقول انها كروية يبقى خارج عن الدين اكيد عارفين الموضوع ده..........زغلول النجار بيلعب مع الغرب لعبة كنت حقولها لما هم يقولوا حاجة يدور و يقولهم كنت حقولها لأنه ما يملكش حاجة يقدمها للغرب و لا للعرب لا علم و لا سياسة و لا فكر و لا ثقافة و لا معرفة حيقدم ايه فقدم حاجة هم ميعرفوش عنها حاجة و انها قديمة عندنا ايه هى ؟الاعجاز العلمى و ريح دماغه لا بحث و لا علم هم يتعبوا و يشقوا و يتقدموا بس ولاد كلب حيخشوا جهنم انما احنا مبنعملش حاجة و حنخش الجنة حدف ..........المصيبة الاكبر و الى هى مجننانى ان فكرة الاعجاز العلمى اساسا مسروقة من الغرب عارفين ليه ؟بسبب نظرية الخلق الغرب المتدين لما حب يخرج نظرية الخلق و التكوين من الكتاب المقدس لأظهار قدرة الله لجأ لنفس الفكرة الى بيطبقها السيد زغلول النجار ياخدوا الاية و يدورولها على سند علمى يعنى الاعجاز العلمى مش بتاعكوا ده تقليد للغرب حتقولى ازاى حقولك الحمد لله جبهة التهييس بذات نفسيها هى الى مفجرة الموضوع من اسبوع راجعوا التدوينة و انتم حتعرفوا قصدى و انا عندى كتب من نوعية الحقائق الكونية فى الايمان المسيحى يعنى حتى الاعجاز سارق فكرته مش كفاية انه وصل للفكر ده من سرقة علوم الغرب و نسبها للمعرفة الاسلامية الى مقلتش ولا كلمة الا لما الغرب وصل لأ .... ده واخد الفكرة نفسيها من الغرب ........حسبى الله و نعم الوكيل ....لا مواخذه يا جبهة طولت عليكى
19 أكتوبر, 2007 11:31 ص
جبهة التهييس الشعبية يقول...
انا سؤالي موضوع الاعجاز العلمي في القرآن ده طلع امتىوالاكتشافات العلمية مش نكتة ولا حاجةمن اكتر من تمن قرون الشريف الإدريسي اكتشف كروية الارضوما حدش ربط ما بين اكتشافه وما بين القرآن ولا دخل القرآن في الموضوع خالصلا حد قال القرآن بيقول كرويةولا حد قال له يا كافر القرآن بيقول مش كرويةابن خلدون في مقدمته قال انه في احتمال ان الانسان يكون تطور من مخلوقات اخرىلا حد قال له يا كافر ولا حد قال له يا مؤمنده كان قاضي قضاة المالكية في مصرولا هو استدل على الكلام ده بالقرآنابن رشد حط نظرية ان العالم بعد خط الاستوا بيكتمل بما ان الارض مكورةوقال ان المنطق بيقول انه بما ان الارض مكورة وبما انه فيه خط فاصل احنا ما نعرفش هو ايه يبقى لو حسبناها هندسيا ممكن نفترض انه على الناحية التانية فيه ارض صيفها شتاءنا وشتاها صيفنا- وقتها الرحلات ما عرفتش تكتشف اللي بعد خط الاستوا ولا استراليا - ولا حد قال له يا كافر ولا حد قال له كلامك موجود في القرآنورغم ان ابن خلدون علق على كلام بن رشد بان دي نظرية لم تثبت بعد بالدليل القطعي وعليه فلا يمكن تأكيد صحة هذا الافتراض او نفيه الا بعمل رحلات تقدر تؤكد هذا الكلاموابن سينا اكتشف حاجات كتير في الوظائفكللللللللللل دول حمير وما بيفهموش وما ربطوش العلم بالقرآن وهو زغلول النجار واللي زيه اللي جابوا التايهة؟انا شايفة ان علماء المسلمين الاوائل كانوا مؤمنين بالتخصص ورغم مسوعيتهم الا ان ما حدش فيهم اتجرأ يفسر القرآن بما يهبط بمستواه من كتاب الهي الى كتاب تختبر صحته بالنظريات العلمية

====

دي التعليقات اللي عمرو عرف يجيبهالي من صفحة الجوجل

فيه ناس تانية قدحت الزناد بس الزناد طار مش لاقينه

ايدهم معانا يتعبوا بس شوية

انا شخصيا مبسوطة من النقاش وشايفة انه ممكن يؤدي لحاجة

كويسة الى جانب برضه اللي عنده كتاب وللا حاجة يقول لنا عليه

انا مش باثق في مواقع النت معلش

اصلي دقة قديمة

كتاب كده امسكه في ايدي واقرا الله لا يسيئكوا وانا لو لقيت ح ابقى اقول لكوا