شفيق يا راجل بقت أغنية وطنية

"وقف الخلق ينظرون جميعا كيف ابني قواعد المجد وحدي"

اغنية كانت بتعبر عن نهضة مصرية

اقتصادية علمية فكرية لمقاومة الاحتلال

مش بس بالسلاح وانما كل اللي قدر على سلاح

كان بيقاوم بيه ان شالله يكتب شعار على الحيطة

===

"مصر التي في خاطري وفي فمي"

كانت بتحث المواطنين على التضحية

بكل غالي وغالي عشان مصر تكمل نهضتها

===

فدادين خمسة

كانت بتعبر عن فرحة الناس

- اللي اخدوا خازوق بعد كده -

بعودة الاراضي لاصحابها الاصليين

اللي هم الفلاحين

ملحوظة: واحدة صديقة قالت لي

ان عادة دفن الاكل عشان الفلاحين

ما ياكلوش لحمة

اللي كان بيعملها الاغنياء قبل الثورة

رجعت تاني زي ما الاراضي اتاخدت

من الفلاحين تاني

===

خللي السلاح صاحي

كانت بتحمس الناس اللي كانوا

بيستعدوا للمعركة

صحيح طلع انهم هم والمغني بس

اللي استعدوا للمعركة

وان اللي المفروض يخوضها كان كان واقف

مستنيهم في الغرب بس هم

جولوا من الشرق قالوا له: بخخخخخ

بس الناس عملوا اللي عليهم

===

اغنية شيرين عبد الوهاب الوطنية

الاخيرة واللي ما عرفتش منها حاجة

غير ان كاتب الاغنية بيحب مصر

يعني زي ما كلنا بنحبها

بس لما حب يقول هو ليه بيحبها

قعد يتكلم على انه شرب مية

وراح المصيف

ومشي في الشارع

ولما يعطش يشرب

ولما يبقى حران يقول الدنيا حر

ولما تقول له يا شفيق يرد

يعني انا مش عايزة اتحامل على اللي عملوا

الاغنية لان فعلا يعني

وبدون اي حزازات

البلد دي ما قدمتش للجيل ده اي حاجة

يعني لا ادمجته في حركة وطنية

تحررية حقيقية

ولا علمته او عالجته بالمجاني

وبخلت عليه بكل حاجة

حتى بالحلم

حتى بالخدعة يا اخي

وكل اللي جده وفره في تعليم وعلاج ابوه

ابوه دفعه في تعليمه وعلاجه هو

ده حتى جده اللي تظاهر في سعد سعد يحيا سعد

وكان من ضمن المشاركين في الاكتتاب

لتوكيل طلعت باشا حرب انه يعمل اقتصاد وطني

شغله راح في الهوا

وكل التضحيات اللي عملها

والتبرعات اللي دفعها في تأسيس وطن

حر مستقل

تم الاستيلاء عليها والدولة قالت ح نأمم

عشان الفايدة تعم

طيب حاضر

قوم بعد ما امموا فلوس الناس وشقاهم

صدقوا نفسهم ان الحاجات دي بتاعتهم

وباعوها

زي اللي عملت لجوزها توكيل

وبعد مامات فوجئت ان الناس جاية تطردها من بيتها

وتقول لها اشتريناه بحر مالنا

ويا قلب امهم الجيل ده

ولا اكل حاجة ولا شرب عليها مية

بس بيحبها يعني

لسبب مجهول

انا عن نفسي مش عارفة باحبها ليه

بس باحبها

يمكن لاسباب شفيق يا راجل اللي لما يبقى

مستعجل يمد

او يمكن يكون عندي ميول مازوخية

زي اللي عند مؤلف الاغنية الوطنية

بتاعة حسين الجسمي: ده وانتي مطلعة عيني

باحبك موت