Saturday, 26 May 2007

لأقدم مهنة في التاريخ

عندي واحدة صاحبتي دايما تبص لي وتقول انا منصابة في صحابي
الحقيقة انا كمان منصابة في صحابي
واحدة صاحبتي اتقدم لها عريس وقال لها: طبعا انت عارفة الحياة تعاون
قالت له: اه طبعا
قال لها: كويس...مرتبك كام بقى؟
البت جالها ذهول قالت له: ايه ده ايه ده..على طول وش كده؟ طيب
العب بعواطفي واضحك عليا وقول لي بحبك واتجوزني وخد فلوسي
كده يعني
واحدة تانية معرفة مش صاحبة
قال لها العريس: طبعا انا ظروفي المادية مش قد كده والبلد مافيهاش شغل
ها-
انت عارفة طبعا ان كل ست محتاجة لراجل...انا اقوم بواجباتي الزوجية وانت تصرفي والمليان يكب ع الفاضي-
قالت له: وبالنسبة للاعمال المنزلية؟
قال لها: والله انا ماليش فيها بس ممكن اساعدك ولو اني افضل انك تجيبي حد يساعدك في البيت
قالت له: وده برضه ح يبقى على حسابي برضه.. آه....طيب وحضرتك يعني الساعة بكام؟
نعم-
الساعة...الساعة بكام...اصل انا معروض عليا حاجة حلوة قوي وعليها خصم واوفر...اأجر ساعة اخد عليها ساعة تانية مجانا وممكن لو الخدمة ما عجبتنيش استرد فلوسي
ايه ده انت بتتريقي عليا؟
لا طبعا
آه باحسب
اول مرة في حياتي اسمع تعبير "اقدم مهنة في التاريخ" كنت في ثانوي وسمعتها في فيلم ايس كريم في جليم
وما فهمتهاش...بس لما عمرو دياب قالها لسيمون هي زعلت وانا ما فهمتش ليه هي زعلت وسألت صاحبتي اللي قاعدة جنبي: هي ايه اقدم مهنة في التاريخ دي؟
قالت لي: الصيد
قلت لها: طيب ودي تزعل في ايه؟
قالت لي: يمكن عشان من غير شهادات؟
لما كبرت شوية فهمت يعني ايه اقدم مهنة في التاريخ
مش ده موضوعنا
موضوعنا إن الستات لما هم اللي كانوا بيشتغلوا اقدم مهنة في التاريخ
كانوا بيبقوا مكسوفين ومكسورين ومنبوذين وحالهم بالبلا
وعمر ما واحدة منهم حسست "الزبون" انها بتعمل فيه جميلة
كمان لما كان زماااااااااااااان الرجالة بيدفعوا مهر وشبكة ويجيبوا البيت ويجهزوه ويصرفوا على العيلة
كانت يا عيني الست تبقى قاعدة في البيت تكنس وتمسح وتطبخ وتخبز وتعمل مربات ومخلل وتدمس فول
وحتى تدبح الفرخة في البيت احسن من دبح الفرارجي وتخيط الهدوم وفيه ستات كانت بتخيط الشنط والملابس الداخلية وتخلف وتربي العيال
وهو يرجع من الشغل زي اللي راجع من فتح مكة: فين الاكل انا راجع من الشغل..عايز ارتاح انا راجع من الشغل...مش عايز دوشة انا راجع من الشغل
وهي لانها ما كانتش بتشتغل كانت فاكرة ان الشغل ده زي اختراع المفاعل النووي: اما الحق اخلص الاكل قبل ما الافندي بتاعي يرجع يا قلبي من الشغل بيرجع هلكان
وسعادة الهلكان يرجع يقعد كما الشلتة في البيت...اصله راجع من الشغل
وهي بتشتغل من طلعة النهار لحد بالليل عشان تخدم اللي راجع من الشغل وفاتح البيت
لما الستات اشتغلوا اكتشفوا ان الشغل ده ماهواش نكتة ولا حاجة
وإنه أرحم بكتييييييير من هلكة غلي الهدوم وخبز العيش وتفصيل الملابس الداخلية
يعني ماهي بترجع من الشغل طرزان تطبخ وتنضف وتذاكر للعيال
وهو هو: كما الشلتة في البيت...اصله راجع من الشغل
طيب ما انا راجعة من الشغل
اشمعنى انت
اشمعنى انا؟
طيب بقى مافيش شغل
وكل واحد يعمل شغلانة
انا ذكر النحل
وانت الشغالات
بس الخلية بتاعتنا مافيهاش ملكات
فيها شغالات
متخلفات
حتى ما بيطلعش من كمهم يموتوا الذكر
عشان ما يعملش زحمة في الخلية
صدق اللي قال:
سيد الحبايب يا حنانا ننا
وسيد الحبايب بيتعامل زي ما ست الحبايب ربته
ازاي بقى ربته؟
at

18 comments:

  1. Anonymous26 May 2007 at 14:33

    مجتمع ذكورى + عقليات منحطة = مجتمع منحط

    ReplyDelete
  2. Anonymous26 May 2007 at 14:47

    هههههههه
    أنا عاجبنى قوى اللى راح قال للبنت ، إن كل واحدة محتاجة لراجل، هوه يقوم بواجباته الزوجيه و هيه تصرف على البيت!!!
    لأ و إيه، عنده ثقة فى نفسه قوى!

    بس على فكرة، دى مش أقدم مهنة فى التاريخ

    والله رجالة تكسف، ، منهم لله

    ReplyDelete
  3. Anonymous26 May 2007 at 15:00

    انا كمان كنت اول مره اسمعها واستغربت قوي وسالت ناس كتييييييير اللي بقلي معرفش
    واللي يبصلي باحتقار ويمشي ويسبني
    وحياتك لسه عارفاها من قريب

    انما انتي مستغربه ليييه ماهو دا بقي حال اغلب الكائنات اللي مفروض ان اسمها رجاله
    مع انهم ولامؤخذا مبقوش رجاله
    راجل ايه دا اللي يقبل ان مراتو تصرف عليه وتديله المصروف
    حاجه تقرف

    ReplyDelete
  4. Anonymous26 May 2007 at 15:03

    دي خيبة والله
    بس هو دة اللي بيحصل فعلا
    انتي عارفة انا مش باشتغل وبيطلع روح اهلي نفر نفر في البيت ومع الاولاد
    الله يكون في عون الستات اللي بتشتغل
    ويمكن علشان كل المسئولية اللي بتبقى على الستات بتلاقيهم بيقابلوكي بأبتسامة جميلة بالزات في المصالح الحكومية
    ساعتها الواح بيدعي ان جوزها يقعدها في البيت ويرحمنا
    وسلام كبير مربع علشانك يا نوارة

    ReplyDelete
  5. Anonymous26 May 2007 at 16:16

    الموضوع ده بأة ظاهرة تستحق الدارسة...المصيبة ان حتى واجباته الزوجية دى بح فش برضه...وده طبيعي يعنى ماهو هو تنازل عن دوره كراجل...حيقوم بواجباته الزوجية ازاى يعنى؟!!
    الأكادة باة يا نونة ان دلوقت طالع لك موضة جديدة...اما يقولك الموضه دلوقت مرافقة...بلا جواز بلا وجع قلب...ولا حتى جواز عرفى وكلام فارغ...اما يقولك -ده اذا كان متدين يعنى ويعرف ربنا شوية شوية خلى بالك مش اوى يعنى- يقولك نتجوز جواز مسيار...يعنى ايه؟ يعنى هو مش عليه اى التزامات مادية...يعنى مرافقة برضه...بس بغطاء شرعى! قال يعنى كده بقى جواز
    والقصة مش قصة مصاريف...ولا فلوس...انما مسئولية..قوامة
    بصى كل العلاقات فى مجتمعنا اختلت...مجتمعنا نفسه مختل...ايش معنى العلاقة دى يعنى اللى مش حتبقى مخلولة؟! اهو كله خلل (بضم الخاء)
    والله ما انا عارفة احنا محتاجين اصلاح من القاعدة ولا من الراس
    والله كويس اننا لسه فينا شوية عقل وشكلنا شكل الناس الطبيعيين
    الظاهر اننا كلنا محتاجين ولادة جديدة..مش بس النظام

    ندى

    ReplyDelete
  6. Anonymous26 May 2007 at 16:22

    بلاش تروحي عند تمر حنة كتيير
    السكة ديه وحشة واخرها مش كويس
    احنا عايزين نفرح فيكي


    ارجو انك تكوني قريتي تعليقي علي البوست السابق
    تحياتي
    بحري من اسكندرية

    ReplyDelete
  7. Anonymous26 May 2007 at 16:31

    احمد
    معلش اصلي كنت خايبة في الجبر وشاطرة في الهندسة
    ممكن ترسم شكل هندسي تشرح بيه المعادلة بتاعتك

    بليفر
    ههههههههههههههههههههههه
    على رأيك واثق من نفسه ليه قوي كده

    شيماء
    يا ستي الحياة تعاون
    بس التعاون اللي افهمه ان الاتنين يتشاركوا في الحياة
    مش هو يبقى داخل بالمجهود

    شاهي

    اه طبعا انا شخصيا مستعدة اشتغل اربع شغلانات برة البيت وما اشتغلش جوة البيت خالص

    ندىىىىىىىىىىىىىىىىىى

    لا والنبي
    جديدة المسيار دي
    ملعوبة بجد
    انت بتجيبي سيرة القاعدة ليه؟ ح تروحي في داهية

    بحري
    والنبي يا خويا ده انا كان بقالي كتير ما رحتش اخدت الشاي عندها
    انما تقول ايه بقى في اللي بيقعوا في سكتي
    مش باقول لك منصابة

    ReplyDelete
  8. Anonymous26 May 2007 at 16:58

    العزيزي جبهة التهييس:

    كما تعلمين ، فإن زوجتي إم جميل تعمل في حمل الحطب من شعاب مكة إلى معبد العزى تسامت وتعالت, وهي أيضا عندما تأتي للبيت بعد أن ينهد حيلها ، تقوم بالطبخ وكنس البيت والعناية بالأولاد وحلب الناقة. في كل هذا الوقت أجلس أنا في بيت الندوة لمناقشة الأمور الهامة في العالم.
    كما يمكن أن تتخيلي، فإن هذا العمل قد بدأ ينخر في صفات أم جميل التي تزوجتها من أجلها ، مما يصعب علي القيام بواجباتي الزوجية. ولا أكتمك أني أفكر أحيانا أن أعتنق دين إبن أخي محمد حتى أضم لأم جميل ثلاث زوجات أخر. إثنتين لمساعدتها في نقل الحطب ، والثالثة تكون بنت صغيرة، حلوة ونغنوشة تجعل عندي بعضا من حافز ليساعدني في القيام بواجباتس الزوجية.

    تحياتي ومحبتي
    أبو لهب

    ReplyDelete
  9. Anonymous26 May 2007 at 17:11

    هو أنا زمان كنت باقول ، ان ممارسة أقدم مهنة في التاريخ أوفر للطرفين ، بس ماحدش كان معبرني ، دلوقتي أنا متأكد من ذلك
    خصوصا ان الموضوع مابيدخلش فيه طبيخ و نضافة بيوت و تشخيخ عيال ، خناق عمال على بطال ، طبعا البدايل كتيرة جدا ، الاعتماد على النفس و الصابون بالنسبة للراجل ، و على كل ماهو طويل و مدور بالنسبة للست
    كمان تشغيا قنوات فضائية زي فتافيت و برامج طبيخ بيقوي شوكة الرجالة و يخليهم يطبخوا لنفسهم
    ربنا يخلي صبحي

    ReplyDelete
  10. Anonymous26 May 2007 at 17:19

    عارفة لو ماكنتش لسة داخلة في حوار صدمتني فيه أفكار صديق كنت متخيلة انه عقلية تحترم , كنت قلت انت بتبالغي

    هو عقلية كويسة فعلا , لكن بمجرد تفكيره في خطوبة و سؤالي عن خطيبته لقيت الأفكار دي ظهرت على السطح

    الأنكت بقى انه يجيب آيتين و حديث يغلف بيهم كلامه حتى لو مالهمش علاقة بيه , المهم انه يقول انه كدا مؤمن و اللي بيعمله دا من تمام ايمانه

    حاجة تخنق

    ReplyDelete
  11. Anonymous26 May 2007 at 19:02

    هههههههههههههههه
    نواره انا عارف معارفِك كتير
    الائيش نصيب عند حد من معارف الساعه على 10 و قابل للتفاوض مع بعض إمكانيات الطبخ
    :D
    ( يارب الكومنت دا يتعملوا دليت او ينفجر او اللي في بالي ماتدخلش عندك النهارده عشان دي فيها علقه اصل انا بدور على إمكانيات تظبيط بعد الضهر عشان في ناس عقبال عندك متكلمين عليا :$ )

    ReplyDelete
  12. Anonymous26 May 2007 at 19:02

    و الله ضحكتيني يا نواره...بس انت جبتي من الأخر، العيب علي اللي ربته فعلا...زمان كان الراجل راجل ، مش بس فكرة حقوق زوجيه و كده لأن الجواز لا مؤاخذه مش بس سرير، لكن راجل زمان كان يعتمد عليه و كان بيشيل مسؤليه .. الست ما كانتش بتشيل هم الفلوس هتيجي من فين ولا مين هيقدم للعيال في المدارس و لا مين هيودي العيال و كان في اغلب الاحيان كمان بيجيبلها حد يساعدها في البيت

    دلوقتي الرجاله اللي بجد فعلا اصبحوا جنس مهدد بالانقراض، التربيه الحديثه طلعت لينا رجاله خرعه و بنات مسترجله و كان طبيعي جدا ان العلاقه تتعكس....حتي دلوقتي شوفي الجيل بتاعنا بيربي عياله علي الدلع المريء ازاي.....العيال دي هيطلعوا معندهومش مانع يحملوا و يرضعوا و مش بعيد يوافق ان مراته تجوز عليه تلاته كمان ، اهم يساعدوه في شغل البيت

    ReplyDelete
  13. Anonymous26 May 2007 at 21:45

    اتفضل عندنا
    و النعمة دا انتي اللي تتفضل على راسي من فوق ، أهو كلامك ده جه على الجرح ، يا فندم مع اخترامي ده ماسموش دلع ، دي اسمها علوقية
    العلوقية هي انك تتلعي و تلاقي الناس تستجيب للدلع ، فتدلعك اكتر ، فتبتدي لامؤخذه تتعولقي ، هي دي العلوقية ، و قديما قالوا اللي يلاقي الدلع و مايدلعش ربنا يدخله النار
    يعني القصد ان الرك علينا ، احنا اللي بنعولق عيالنا ، عايز دي ، طيب يا بابا ، أنا هاخد دي ، حاضر يا بابا ، اللبس ده مش عاجبني ، نغيره يا بابا ، يحرق أبو بابا لإبن بابا
    بس عشان أطلع كل اللي في بطني ، فعل التعليق - أن تجعله علقا - هو فعق نسائي بالدرجة الأولى ، يعني الراجل بيحاول على قد ما يقدر يكحرت عياله ، بس المدام دايما بتحاول تعولهم ، بحجه ان ابني ما ينفعش يتحرم من حاجه
    أهم دول العلوق اللي هايجروا من البلد لما الأكريكان يدخلوها

    ReplyDelete
  14. Anonymous26 May 2007 at 22:39

    انا كمان علي فكرة اول مرة سمعت فيها تعبير اقدم مهنه في التاريخ كان في فيلم ايس كريم في جليم ..وبردو مش عرفت معناها بس استنتجت انها حاجه وحشه

    وبمناسبة انك انتي كمان منصابه في صحابك ..احب اقولك اننا في الهوي سوي ..واحدة صاحبتي لسه متجوزة من شهرين واحد بعد قصة حب عشر سنين _بجد مش مجازا_ المهم ان كان في مشاكل بينه وبين اهلها من ايام الخطوبه ..قوم ايه ..الواد بعد ما اتلايم علي البت في بيته وبقت حامل للأسف الشديد..قعدها من الشغل ..ومنعها انها تروح عند اهلها بيتهم ولا اهلها وامها يزروها في البيت ..جايه تقولي سألت شيخ قالي طاعة الزوج واجبه ..طب بس يعني لما يبقي زوج ... و... و... وتيجي تقوليلي اطبق الشرع ماالشرع بردو بيقول معاشرة بالمعروف او تسريح بالمعروف بردو
    المهم يعني ان الهانم كانت بتحوش من شغلها وهي اللي فرشت تلات تربع شقة الزوجيه من غير ما اهلها يعرفوا..عادي بقي ..البيه اصله كفايه عليه المجهودات الذاتيه

    اما بقي بالنسبه لشغل البيت ..طبعا انا مش ضده ..بس نفسي بجد الرجاله اللي بتقول انا برجع من الشغل مهدود تجرب مرة مثلا وقفة المطبخ من صباحية ربنا عشان تحضير الاكل وللا المسح والكنس ولا انهم حتي يقضوا يوم واحد بس مع الولاد ويشوفوا طلباتهم ما بين اكل وشرب وحموم ومذاكرة وهدة حيل وسكتي عيالك خليهم يبطلوا زن انا جاي من الشغل مهدود .. دا غير بقي لو كانت الست بتشتغل وبيتحرق دمها كمان برة وجوة ولو فتحت بقها الكلمه اللي تسمعها بيتك اولي بيكي يا هانم بدل المرمطه ..طب والنبي لو حسبناها كدا ..الراجل بيدفع في المهر والشقه والمقدم والمؤخر وخلافه مبلغ من المال بيضمن بيه واحدةتنضفله البيت وتطبخله الاكل وتخلفله عيال وتربيهم دا غير الواجبات الاخري المتعلقه بمزاج سي السيد المفروض عليها تلبيتها .دا احنا لو حسبنا ان كل واحده من الحجات دي وظيفه مثلا يعني طباخه وخدامه وبيبي سيتر ومربية اطفال و ...يبقي الوظايف دي كلها ممكن تكلف اي راجل كام في الشهر تقريبا. تفتكري بقي مين الخسران في المعادله دي ..طبعا انا عارفه ان دي كلها واجبات الزوجه مافيش كلام ..بس لما يبقي في المقابل حرقة دم ونناكل وننكر زي القطط ..ويبقي لاحمد ولا شكران كمان يبقي دي معادله فاشله فاشله فاشله

    ReplyDelete
  15. Anonymous27 May 2007 at 02:01

    عزيزتى نواره أنتى ما سمعتيش عن الشاب اللى علق ورق فى مترو الأنفاق طالب عروسه و مش مهم تكون مطلقه و معاها أطفال وكاتب نمره موبايله ولما سألوه قال بمنتهى الصراحه انه بيعتبر ده نوع من التكافل الأجتماعى يعنى يعمل ايه يروح يموت نفسه ؟ والحقيقه انى تعاطفت معاه لأنه صريح ودوغرى وبعدين احنا لازم نغير مفاهيمنا الباليه عن الزواج يعنى ليه الراجل والست ما يتعاونوش فى كل حاجه ؟وبعدين أنا شايفه أن أستنطاع الراجل ده سببه دايما واحده ست أما أمه أو أخته أو زوجته اللى بتحط فى بقها جزمه قديمه وتستحمل عشان البيت ما يتخريبش ومش عارفه ليه كل الستات بتخاف من شبح الطلاق للأسف عندنا مفاهيم كتيره لازم تتغير وياريت يا نواره تتبنى فكره انشاء جمعيه لمساعه المطلقات لازم الرجاله يوصلهم رساله مهمه جدا خلاص مش هانستحمل رزالتكم أكتر من كده والباب يفوت جمل صدقينى سبب لستقواء الرجاله ان الست بتخاف من الطلاق مع انه افضل ميت مره من حياه بلا كرامه والاولاد اللى تربيهم ام مهزومه ومحبطه مش ممكن يطلعوا أسوياء ومعذره للاطاله

    ReplyDelete
  16. Anonymous27 May 2007 at 02:03

    والله اقدم كهنه في التاريخ الناس فهموها غلط وكله من اللي ما يتسموا الرجاله...بس كلامك تحفه بجد

    ReplyDelete
  17. Anonymous27 May 2007 at 14:07

    انا مبسوطة جدا من البوست ده
    وبفكر في انشاء جمعية المرأة المتوحشة تشتركي؟؟
    تحياتي ومودتي ودمتي

    ReplyDelete
  18. Anonymous27 May 2007 at 14:28

    انا موافق ابدل

    ReplyDelete

Note: only a member of this blog may post a comment.