جاوب ع الأسئلة دي بأمانة
يا ريت يبقى معانا يعني نتشارك
بس لو ما حبتش جاوب عليها بينك وبين نفسك
وافتكرها كويس
عشان للحديث بقية
الأسئلة: أولا : أذكر تلات مميزات او حاجات إيجابية في حياتك
ثانيا: اذكر تلات ايجابيات في شغلك او دراستك
ثالثا: اذكر تلات ايجابيات في بلدك مخلياك لسة قاعد فيها
رابعا: اذكر تلات ايجابيات في شخصيتك
خامسا: اذكر تلات حاجات بيعجبوك في شكلك ومظهرك الخارجي
سادسا: فاكر اسوأ تجربة مرت عليك في حياتك؟ طيب بقى اذكر تلات مميزات في التجربة دي
ملحوظة: الاجابة بمفيش ممنوع
دور في دماغك واتعب روحك لحد ما تلاقي التلاتة في كل نقطة
ملحوظة تانية: بكرة محاكمة اسلاك نبيه في دار القضاء العالي الساعة حداشر الصبح
يا ريت يبقى معانا يعني نتشارك
بس لو ما حبتش جاوب عليها بينك وبين نفسك
وافتكرها كويس
عشان للحديث بقية
الأسئلة: أولا : أذكر تلات مميزات او حاجات إيجابية في حياتك
ثانيا: اذكر تلات ايجابيات في شغلك او دراستك
ثالثا: اذكر تلات ايجابيات في بلدك مخلياك لسة قاعد فيها
رابعا: اذكر تلات ايجابيات في شخصيتك
خامسا: اذكر تلات حاجات بيعجبوك في شكلك ومظهرك الخارجي
سادسا: فاكر اسوأ تجربة مرت عليك في حياتك؟ طيب بقى اذكر تلات مميزات في التجربة دي
ملحوظة: الاجابة بمفيش ممنوع
دور في دماغك واتعب روحك لحد ما تلاقي التلاتة في كل نقطة
ملحوظة تانية: بكرة محاكمة اسلاك نبيه في دار القضاء العالي الساعة حداشر الصبح
أولا: 3 ايجابيات في حياتي هي وجود يوسف ( ابن أختي في حياتي), قربي من ربنا بيزيد والحمدلله, والقرايـــة الي مبزهقش منها...
ReplyDeleteثانيا: 3 ايجابيات في دراستي هي ان دكتور باسم بيديني( قد ايه بحترم البني ادم ده و بحبه جدا جدااا..فعلا أول مرة أحس بمعنى ان مدرس أو دكتور بيديكي مادة يأثر فيكي وفي أفكارك), ان القسم الي أنا فيه بدأ يشد اهتمامي أكتر من الأول, اني بدرس حاجلت ملهاش دعوة بمجالي بس اكتشفت انها بتفيدني جدا جدا...
ثالثا: 3 ايجابيات في البلد هي انها جابت واحد زي جاهيين و نجم و حداد و ده خلى عندي ايمان انها هتجيب تاني و تاني,و ان كل مبتخنق بلاقي النيل قدامي أشكيلوا همي و أقولوا على أسراري... و كفاية وجود أهلي فيها..
رابعا: 3 ايجابيات في شخصيتي, اني على ما بيقولوا اجتماعية, بحب المعرفة بمعنى ان لو في حاجة شدت انتباهي بعود أدور عليها في كذا مكان و أسأل عليها خلق الله...و ان بحب يوم ماعمل حاجة تبقى كاملة و مفيهاش غلطة..
خامسا: 3 حاجات في شكلي ... النضارة الي بلبسها ههههههه معرفش ليه بس بحبها...قصر طولي مع اني كنت كارها بس بحبه دلوقتي...و ستليل لبسي هههههههههه
سادسا: أسوأ تجربة اني اكتشفت حاجة هزت العيلة عندي...
وايجابيتها اني عرفت امتى أسكت عن سر و امتى لازم افضحوا و دي مش معناها خيانة للأمانة....
عرفت ازاي أفرق بين الناس و أعرف من المحترم و مين الخسيس...و أخيرا و ليس مؤخرا اني عرفت اازاي أخود حقي من الي ظلمني بكل احترام من غير خناق و زعيق...
أسئلتك صعبة قوي على فكرة يا نوارة.. أنا بقى مستنية أقرا ايجاباتك انتي...
السلام عليكم
ReplyDeleteأيه غيرتى المهنة من صحفية ..ماشى الإجابات تحت يادكتورة نوارة بس أنا كده هاتفضح عل الانترنت ماعلينا
أولا:3ايجابيات الأب والأم والعائلة المترابطة بفضل الله
ثانيا:3 ايجابيات فى دراستى مدرستى من الإيواء حتى ألإعدادية مدرسة نادى شباب إمبابة الخاصة(منادى وطلعله مدرسة), كلية العلوم , أستاذى وأخى الدكتور عصام وقسم الحشرات
ثالثا:3 ايجابيات فى البلد الجغرافيا (المكان عبقرى جدا)والتاريخ( تاريخ عريق وأصالة) والناس (شديدى الطيبة والود)(بس للأسف أنا مسافر ومش قاعد فيها دلوقتى) بس أكيد راجع تانى بشوق كبييير ليها
رابعا :3 إيجابيات فىشخصيتى الناس بتقول أنى حالم وخيالى وأنا باقول عن نفسى أنى واقعى قوى
خامسا: 3 حاجات فى شكلى القصروالأنف الفرعونية والدماغ المدورة
سادسا: أسوأتجربة دخولى المشرحة ثلاث مرات لإستلام جثث فى المرة الأولى جار لى وأولاده كلهم مسافرين ولم يكن يوجد غير زوجته وأنا وأمى ولا بد أندخل لأستلم جثته
الثانية وفاة أبنة عمتى فى حادث وكان لابد من دخولى لعربة الإسعاف فى موقع الحادثة للتعرف على الجثمان
الثالثة لإستلام جثة أخى وأستاذى الدكتور عصام عقب حادث أيضا
أتعلمت منهم الثبات جدا وكيف التعامل مع الموقف
بجد بقى علشان انتى فكرتينى بحاجات غريبة أنا مستنى إيجاباتك
الله يرحم كل الأموات والأحياء يارب
بالنسبه لي فلن أستطيع اجابه هذه الاسئله لاني حاسسها من لوغاريتمات اأسئله الثانويه العامه...ممكن أجاوب الاسئله دي بس بالنسبه للسلبيات
ReplyDeleteتحياتي لكي
جالكم الدكر ... جالكم اللى ما بيرحمش
ReplyDeleteاجاوب على الاسئلة و انا طريح الفراش مسجى انا على عتبات الموت من اللوز و سنينها
يتبختر عليكم بأجاباته الىل مالهاش مثيل جيمى هود ( هتاف جماهيرى و تصفيق حاد يرج المسرح )
أولا : 3 ايجابيات فى حياتى
- ان اهلى واطيين و انى انفصلت عنهم فى سن مبكر و دة تقريبا كدة خلانى راجل حبتين
ثانيا : سنوات الوحيدة سنتين فى حياتى قضيتهم تقريبا معزول عن الناس دول خلونى اخرج من الاشرنقة قادر انى ارفع اى حد على الخازوق
ثالثا : ان الستات بتحبنى ... و بيقولك فى الاثر من أحبته النساء رضى عنه الرب و عاش سعيد متهنى حتى من غير ام و اب
======================
ثلاث ايجابيات فى شغلى و دراستى
- اجدع حاجة فى الجامعة انى نفضت ليها و قضيت 9 سنين دراسة و دة خلانى اتعلم حاجات تانيه بدل تضيع الوقت بحشو الراس على الفاضى
- اكتر حاجة ايجابية فى شغلى ان كل اللى بشتغل عندهم لازم يحبونى تقريبا علشان مش بسرقهم و تقريبا لانى بنجز فى الشغل علشان بتخنق
- اكتر حاجة ايجابية فى شغلى كمان .. ان الناس بتبلع غرورى و تناكتى فى الشغل علشان تقريبا انى شاطر فيه
===========================
ثلاث ايجابيات فى البلد
اولا : فيها بابا نجم
ثانيا : فيها الناس الغلابة اللى عمر المناضلين القرود دول ما شافوهم و لا هايشوفوهم
ثالثا : فيها الزمالك و فيها الاهلاوية علشان اهزقهم
=============================
ثلاث ايجابيات فى شخصيتى
أولا / اساسى الحاجة المشهور بيها انى مش بكذب لانى ببساطة مش بخاف من حاجة و بصراحة اكثر دى الحاجة الوحيدة اللى بتفشخر بيها و بتفشخ قوى لما حد يتكلم انى مش بكذب ابدا
ثانيا / الناس النظيفة بس اللى تحبنى و الوسخ هوه اللى يكرهنى لدرجة ان ناس اصحابى بقوا يستعملوها ترمومتر يقيسوا بيه الاوساخ من الناس النظيفة من فرق الناس اللى بتحبنى و اللى بتكرهنى و انتى فاهمة و انا فاهم بقة يا ناوناو :d
ثالثا / انى مش بزعل من حاجة و مقضيها ضحك حتى على نفسى لان بصراحة بعتبر انى فى مسرحية و انا دفعت تذاكرها فى الماضى و لاازم استمتع بقة بالفرجة يا معلم
======================
ايجابيات شكلى
- طولى و كتافى العريضة مدارية وزنى الىل عمال اخسر فيه سنة بعد سنة
- طبعا شعرى اللى هاحلقه زيرو لو الزمالك كسب الكاس الصراحة اكتر منه نزر ان الدنيا بقت حر قوى و شعرى مبهدلنى الله يكون فى عون الستات
- مناخيرى صحاب الجامعة اطلقوا عليها فى السابق سر الجاذبية لانهم قعدوا يدوروا انا مختلف عنهم فى ايه و ليه البنات تحبنى انا لقيوا انى اطول مناخير فيهم و اكبرها حجما و بصراحة انا بعتز بمناخيرى جدا لدرجة انى كتبت عنها اغنيه اسمها مناخيرى المية مية سر الجاذبية
=========================
اسوأ تجربى
تجربة ترحيلى 13 يوم كعب داير
الايجابيات
اولا : عرفت ان البلد دى بنت وسخة و كرهت مبارك و تقريبا انا الوحيد و عمرى ما شوفتها فى حد اللى اتلدع الاول و بعد كدة كرهه كل الناس بيحصلها العكس
ثانيا : و الله ما لاقى حاجة ايجابية كانت تجربة بنت وسخة من اولها لاخرها
و ساعتها و لا كنت لاقى لجنة اعاشة و لا اعلام و طلع دين امى و لا حد كان يعرف عنى حاجة
الله يكرمهم صحابى بقة بعد ما خرجت الحاجة الايجابيه انهم كانوا بيحطولى مرهم على ظهرى من ورم الضرب
تقريبا دى الايجابية الوحيدة اصحابى
أولا : أذكر تلات مميزات او حاجات إيجابية في حياتك
ReplyDeleteياخراشي انا مش لاقي :S
والله مش عارف بس يمكن اني اتولدت و اتربيت في واحد من الاماكن الشعبيه جداً يمكن هوا اللي اث كتير على فكري المصانع الحربيه صورها بعدي بناصيه و المنطقه اللي انا فيها ناصر بناها عشان تكون مساكن لعمال المصانع
ثانيا: اذكر تلات ايجابيات في شغلك او دراستك
انا بدرس هندسة ميكانيكا إتصوري ممكن يكون في مازايا ؟
بس اجمل حاجه في تعليمي كله انني الانجليش بتاعي قوي و اللي زود دا اني اشتغلت فتره تلي ماركتر
ثالثا: اذكر تلات ايجابيات في بلدك مخلياك لسة قاعد فيها
قهوة البورصه و الممر و سعد الحرامي واحد من الحجات اللي لو سافرت هيوحشوني جداً
ان البلد دي اندفع فيها كتير يعني علي مدى الميت سنه اللي فاتت ( على سبيل المثال و ليس الحصر ) شوف في كام مليون واحد دفع حياته تمن لحرية البلد من حروب لتعذيب لمعتقلات
فميهونش عليا ان الناس دي تروح حياتهم في الهوا
رابعا: اذكر تلات ايجابيات في شخصيتك
عندي طولت بال قد تتحول إلى برود مش بمِل
اوبن ميندد زي مابيقولوا يعني عندي القدره اني اتقبل الرأي الآخر و اتناقش مع اي حد اياً كان إنتمائه او تفكيره
عندي فضول بيواديني في داهيه في بعض الاحيان و احيان اخرى بتعلم منه
خامسا: اذكر تلات حاجات بيعجبوك في شكلك ومظهرك الخارجي
شعري الطويل و المنكوش بعشقه ( محدش بيحبه :( )
دأني الطويله مش بحب احلأ دأني بحس براحه نفسيه و هي طويله و برده محدش بيحبها بس مش مهم
( انا بستحما و الله بس انا بحب كدا :D (
سادسا: فاكر اسوأ تجربة مرت عليك في حياتك؟
ايوه لما كشفت علاقات ابويا النسوانيه و صاحبت البنت اللي مان مصاحبها و واجهته ههههههههه
طيب بقى اذكر تلات مميزات في التجربة دي
اتعلمت انني مخلفش عشان ميتعملش فيا كده هههههههه
لا التجربه دي علمتني ان الجواز حاجه محترمه اتر من ان اي واحد غبي غير مسؤول يخوضها و التجربه بشكل عام فادتني كتير و ضرتني كتيييير
ايه الاسئلة الصعبة ديه؟؟
ReplyDeleteاول ما قريت الاسئلة طلبت قهوة سادة بن غامق دبل من الساعي علشان اركز معاكي ومع اللي جاوبو علي الاسئلة العقد دية
الظاهر مفيش فيدة لازم الواحد يتحلي بالشجاعة شوية ويجاوب لا مفر
اولا : اول 3 حاجات ايجابية في حياتي
جوازي من مراتي لان الجواز في حد ذاته كان حلم بعيد المنال بالنسبة لي
اتنين -خروجي للعمل مبكرا اثناء الدراسة وعملي في حاجات كتير واماكن كتير اوي
تلاتة - تركي العمل في الصحافة وكمان تركي للأخوان كجماعة وتنظيم وفي حاجة مهمة اوي وجود فيروز في حياتي
ثانيا: 3 ايجابيات في شغلي
حبي الشديد له ونجاحي فيه
شغال في شركة محترمة تلتزم جدا مع عملائها واسمها معروف
دخلي فيها معقول وقاعد قدام الكمبيوتر طول النهار
تلات حاجات مخلياني لسه متهبب في البلد ديه
اولا لاني بحبها بجد بدون سبب يمكن علشان انا اسكندراني فحبي لمصر نابع من حبي لاسكندرية
كمان علشان فيها ناس يستهلوا ان الواحد يستحمل علشانهم اهلي واصحابي والزمالك المعفن
وكمان علشان لسه عندي امل انها تبقي احسن من كده مليون مرة
رابعا : ايجابيات في شخصيتي
التفاؤل والامل حتي في الحاجات اللي مفهاش امل ابسط مثل لده تشجيعي للزمالك ومتسامح مع اللي مختلف عني
وبحب التغيير للافضل وبتعلم من أخطائي
الاعتماد علي النفس والمسئولية بدخل بصدري في اي موضوع وفجأه القي نفسي مسئول عنه
خامسا : 3حاجات في شكلي
اممممممممممممم
صعبة ديه شوية
بس عموما الناس اللي حواليه بيقولو ان شعري ناعم وعنيه لونها عسلي فاتح ووسيم بشكل عام
علي فكرة ده كلام اغلب الناس ما عدا مراتي فهي شيفاني قصير وبكرش وحاجة عفشة بس بتموت في
سادسا : اسوأ تجربة
جينا للنكد
شوفوا هي مش تجربة واحدة دول كتتتتتتتتتتيييييييييررررررررر
بس اكتر حاجة معلمة جوه
علي فكرة انا مش عارف اكتب بسهولة وكل شوية امسح الكلام
المهم
دخولي مشرحة مستشفي الشاطبي للاطفال لرؤية سما بنت اختي اللي ماتت بسرطان الدم وعمرها ثلاث سنوات ونص
وموقف تاني بالشاطبي بس المرة ديه في الجهة المقابلة مجمع الكليات النظرية في مظاهرات المسجد الاقصي في رمضان لما خد رصاصة في وشي وحطيط ايدي علي عيني لقتها كلها دم
بس الحمد لله كانت تحت عيني بمليمترات
ساعتها حاسيت اني اتعميت
رغم اني شوفت الدم
تقولوا ايه بقه هطل
طبعا التجربتين مختلفين تماما بس برضه طلعت بدروس مشتركة
لني اصبحت قدري جدا ومبخفش من القادم لانه كله بتاع ربنا
الثبات والتصرف في المواقف الصعبة
ان لكل شيئ ضريبة وتمن واللي مش عايز يدفع يروح
سلام بقه علشان انا حعبط وارغي كتير
أنا حاسس إن الأسئلة دى ملعوب من ملاعيب نواره، حلوه ملاعيب نواره دى تنفع إسم مدونه، ورغم هذوه الاحساس بالمؤامرة أنا هاجاوب الأسئلة وبكل الصدك رغم إنى كنت باترعب من الاسئلة الشخصية ودايما باكدب فيها عشان بصراحة كده أنا شخصية هامشية جدا وتافهة جدا وم الاخر ملهاش اى لازمة فى ام الحياة، وأنا طبعا مش فى ذكورة جيمى قدس الله سره وكلامى موجه للمزز، وهاضطهدك ياجيمى لحد ما تحلق وتبقى أهلاوى ومناخيرك تصغر، تقريبا لسه فيا شوية جراءة بحكم كونى افتراضى لسه وما نضجتش
ReplyDeleteأولا : تلات مميزات او حاجات إيجابية في حياتك
واحد: لوجى، مادو، شيرى
ثانيا: إنى اتعلمت الرسم
ثالثا: إنى رغاى
______________
ثانيا: تلات ايجابيات في شغلك او دراستك
أولا: باشتغل اللى بافهم فيه بس، وبمزاجى ووفق أصول المهنة، وغير كده أسهل حاجة أقول باى باى، وارجع هو لمقرى الرسمى اللى هو القهوة ولا ازعلش واستقلت تسع مرات فى تلاتشر سنه وعاوز أدخل جينيز ريكوردس حد يدلنى على عنوانها الله لا يسيئه
ثانيا: ماباشتغلش عند الحكومة بس مفيش مانع آخد فلوسها فى شغل مهنى مش تعريصى
ثالثاً: تقريبا حصلت على أحسن تعليم فى أم البلد دى ودرست بره بس عندى إحساس طاغى والمصحف الشريف إنى حمار كبير
______________
ثالثا: تلات ايجابيات في بلدك مخلياك لسة قاعد فيها
أولا: إنها فقرانى ومعييش فلوس تقضى السفر بره ومابحبش الخليج اللى السفر له سهل
ثانيا: أنا زبال بطبعى ومافيش أزبل م القاهرة عشان كده فيه توافق نفسى بينى وبينها يصل لحدود العلاقة الآثمة خصوصا الحته اللى فيها القهوة حته اقل وصف ليها انسانيا ومشهديا انها وسخة حتى لما سافرت بره كنت مخنوق م النضافة وطهقت بسرعة وبقيت زى الاهبل بادو فين الشوارع الوسخة واروح امشى فيها وارجو يابتوع النضافة انكم ماتفتكرونيش باهزر فعلا مابستريحش للاماكن اللى مناظرها مرتبة ومنسقة، مش باكرهها بس بالاقى نفسى فى الاماكن المنعكشه والعشوائية
ثالثا: أنا رغاى وكل حكاياتى اللى باستلم بيها ودان سواء المصريين او الاجانب اصحابى مصدرها مصر تاريخ جغرافيا فلسفة سياسة بتنجان رومى بتنجان عروسى كله مصرى، فخايف لو سافرت انى مش هالاقى حكايات ارغى بيها وانا مؤمن لحد يقين الماء انى لو مارغيتش هاموت فمحافظ على حياتى وقاعد هنا
_____________
رابعا: اذكر تلات ايجابيات في شخصيتك
أولا: إنى رغاى لحد بيخلى اللى مش حاببنى وحابب القعاد معايا مايعملهاش تانى وبيطفش
ثانيا: أنا صاحب صاحبى وابن وسخه مع الباقيين
ثالثا: أنا زهقى وملول وده بيخلينى دايما عاوز اعمل حاجه جديدة فكل شوية لى افتكاسة ابقى مؤمن بيها وبادافع عنها زى ماتكون حته من جتتى وبعد ما تنضج وتبقى محل اعجاب الاخرين ابطلها على طول واخلع او اسيبها لغيرى وادور على حاجه من الاسكراتش وهامولا جره
______________
خامسا: تلات حاجات بيعجبوك في شكلك ومظهرك الخارجي
أولا: أنيق لحد يحرج سعيد زلابيه ويجعله يشعر إنه فعلا معفن ومحدش ابن كلب يسألنى مين سعيد زلابيه ده وكيف تبدو أناقته
ثانيا: أفلج.... أبلج
ثالثا: أمشى الهوينى كما يمشى الوجى الوحل ومش كده وبس كمان واثق الخطى أمشى ملكا طالق الحسن شجى الكبرياء عبق السحر كأنفاس الربا طالق الطرف كأحلام عبدالله
كان نفسى فى السؤال ده بالذات يبقى فيه رابعا وعاشرا بس هالتزم بالمطلوب وامرى لله
_______________
سادسا: اسوأ تجربة مرت عليك في حياتك؟
آه: حبيت واحده كده فى الحقيقة مش عارف كنت باحبها ولا عايز منها حاجة بطاله بس كانت مديانى ريق وانا كنت خارج من تجربة نص لبه المهم على رأى واحد صاحبى ماكان ينبغى اجتماعيا ان يحدث هذا بيننا. وقد حدث. وقررت بعد ضغط صديقى إنى افض الحكاية واقفلها، كنا نعمل فى مكان واحد، كلهم اصحاب دراستى، يعنى مش صحوبيه عادية، فجأه قررت تنتقم منى، ذهبت ليهم ووريتهم الاميلات المتبادلة بيننا، كانت تبعتلى حاجات كده فارد بحاجات أوسخ، خدت كلامى بس ووريته للناس، كله عارف انى قبيح، بس مش دنئ للدرجة اللى الرسايل بينتها، فعلا كانت من غير سياق انها هى اللى جرتنى تشير لدناءة لا تجوز مع امرأة متزوجة وزميلة. واجهنى من أحبونى بينهم، انا كداب كبير، لكن فى هذه التجربة احتقرت نفسى فعلا وانتقمت منها، قلت ان ما حدث هو حقيقتى، ومن صدم فى فليفارقنى، كنت بانتقم من نفسى فعلا، اقسم اننى عجزت ساعتها ان انظر فى المرآه، صغرت وانكمشت، حتى حدثتنى صديقة أكبر سنا وابعد خبرة ثم فاجأتنى أنها لا تصدق أنى فعلتها وشددت على أن احكى لها كل ما يتعلق بالموضوع، رفضت أياما لكنى كنت متناقض بداخلى أحاول الهروب من هذا الصغر والانكماش والاحساس بكراهية الذات، تكلمت معها بعد الحاح دام اسابيع، فاجأتنى بأنها وغيرها كن يشككن فى نوايا امرأى متزوجه تدعى أن فلانا يرسل لها هذا الذى يضايقها وشككها اكثر حفظها للتفاصيل الدقيقة لما قلته لها واعادتها له مرات عن ظهر قلب وما حكيته من حكايات قذرة ألفت نصفها. المهم نصحتنى بأن اقطع علاقتى بالجميع وابدأ من جديد واتجاوز هذه اللحظة، فشلت لعامين متتالين أن اتخطى احساسى بخسارة كل اصدقائى الذين احببتهم، كلما كلمنى احدهم ارد بسخرية ولامبالاة فاشعره بانى لا اريد معرفته، لكن بدأت ألين وبدأ قله منهم يرجعون لصداقتى واقمت صداقات جديدة، والغريب أنها طلقت بعد ذلك من زوجها بحجة عدم الانجاب، وقابلتنى فى نادى شهير، وقالت لى إن ما فعلته كان سببا رئيسيا فى مأساتها وأنى يجب أن أعوضها، تعاملت معها بسخرية وتكبر ولامبالاه حتى اشعرتها انها كانت مجرد مومس من بين كثيرات عرفتهن ونسيتهن، قالت لى سأدمرك، قلت لها متحديا فلتفعلى فانهارت وقالت اريدك قلت لها انتى كنت بالنسبة لى تجربة واكتملت ولا حاجة لى بتكرارها فلن احصل على متعة أول مرة وتركتها ومضيت.
طيب بقى اذكر تلات مميزات في التجربة دي
أولا: اكتشفت كم انا كذاب تافه وحقير فى هذه التجربة وكم كلفنى ذلك
ثانيا: أن الاصدقاء فعلا هم من يرضون بك على وساختك أما من يريدونك طاهرا وأن لمحوا فيك بقعة قذاره تركوك فهم فعلا لا يحبونك ولو احبوك لاعانوك وجعلوك تزيل قذاراتك، انت لست ملاكا وهم كذلك، فلما نبتغى الانقياء الاطهار البيض كالصينى لنصادقهم وهم ليسوا من هذا العالم، الصداقة معاونه وسابورت مش عظة الاحد ولا خطبة الجمعة
وأخيرصرت بوهيميا، لم أعد أرتدى ملابس فخمة، ولم أعد اهتم بقوامى الرياضى، كرشت وصرت اتعمد الحديث بسوقية، وادبح الكذابين بسخريتى وتشنيعى، وارتاد المقهى لساعات طويله، واكتب كلما جال بخاطرى خاطر وأقرأ كدودة لا تهدأ، وصرت أحب بجراءة، أحسست أننى قتلت الشخصية الاخرى وابقيت القذر الجرئ الحقيقى الذى كنت أخفيه وحاولت تنظيفه واهم ما نظفته فيه هو النفاق وعبادة الصور والمظاهر والاحلام الكاذبة، بت أعيش يومى ولا انتظرغدى فليس لى رغبة فى مزيد ولا اسعى لمحبة الاخرين ارتك المحبة تأتى وحدها وان لم تأت لا انتظرها ، صارت متعتى هى أن أسخر من العالم، وأن اعريه وافضحه
منعت المظاهر قدر استطاعتى وفرضت هذا على بيتى واولادى، الكل بات يعرف أننى مستعد للانفجار فى اى لحظة وفى وجه أى كائن كان لا أعمل حسابا لكبير أو صغير طالما ضغط على العرق الحساس أو مارس ابتذالا لا اقدره أو حاول ابتذاذى بشكل ما
الاهم أننى أحسست طيلة الاعوام منذ هذه التجربة للآن براحة هائلة وبقدرة غير عادية على تطوير ذاتى، ونقدها وتحولت من محبة السيارات الفارهة واستعراض معرفتى بانواعها وماركات الملابس ودور الازياء ومودة العام وارتياد الاماكن الفخمة والنوادى الاستقراطية ومرافقة الكائنات البلاستيكية وتقفى حكايات الكبار النميمة بها والمشاركة فى انشطة مجتمع الارستقراط لأجد نفسى ملقى عن طيب خاطر فى زبالة وسط البلد التى عشقتها وعشت فيها متخفيا، واكتشفت كم بها من حقيقيون وكائنات اخرى طفيلية لكنها اهون سوء من مجتمع بلاستيكى غبى
مش قلتلكم رغاى وكذاب
بس الله يسامحك يانواره
استهلكتى كاقة الحكى عندى النهاردة
طيب هيك أسئلة كيف بدنا نجاوب عليها
ReplyDeleteمن غير شيزلونج
و موسيقا كلاسيك
و اضاءة خافتة؟؟؟
يا بنتى حرام عليكى، إنت بتلحقى تكتبى التدوينات دى إمتى؟
ReplyDeleteطيب امال لو الإنترنت عندك سريع و مش مطلع عينك زى ما إنتى بتقولى كنتى حتكتبي كام مدونة؟
:))))))
على العموم أنا مش بقر عليكى، انا بس معجب بسرعة صوابع حضرتك على الكيبورد، كفاية قر لغاية كدة بقى، ندخل على الشغل التقيل
أولا:تلات مميزات و حاجات إجابية فى حياتى.
1)مدرستى اللى إتعلمت فيها من حضانة لثانوى، إديتنى تعليم صح، و ربتنى كويس اصلى بصراحة انا حاسس إنى اهلى مش هما اللى ربونى، فيا إما طلعت شيطانى ، يا إما إتربيت فى المدرسة بقى
2)إنفصالى عن اهلى من بداية الجامعة و إقامتى لوحدى. أعتقد إن ده خلانى
معتمدش على حد فى الدنيا غير نفسى، و دى حاجة إجابية
3)إن انا صعيدى، و من الصعيد الجوانى،يعنى معجون بطينة البلد دى، وفعلا فخور إنى قناوى. أهو أحسن من المنوفية
:))))
ثانيا:تلات إجابيات فى شغلى
1) شغلى مرتبط شوية بالفن و الثقافة عموما، ده أثر كتير فى شخصيتى، و فى تذوقى، و إتساع إهتمامى بمختلف أنواع الفنون من أول الرسم للتمثيل
2)شغلى خلانى اقابل "موزايك"من البشر، من كل الطبقات و من كل المحافظات.
ربطنى اكتر بالناس اللى فى البلد دى، مع إنى ساعات ببقى بحلم بقنبلة تنفجر تشيل كل المصريين اللى فوق سن التلات سنين، علشان دولة خلاص باظوا مفيش أمل فى إصلاحهم
3)بعمل الحاجة اللى انا بحبها من أيا ما كنت طفل، مع إنى إكتشفت إن الموضوع مش زى ما انا كنت متخيل، بس أهوه الواحد بيعافر
ثالثا:تلات إجابيات فى بلدى مخليانى لسه قاعد
1)البلد نفسها، لأنى سافرت براها كتير و شفت أحسن منها كتير، بس مش عارف ليه أول لما ببقى بعيد، ببقى بجد بعدّ الايام علشان أرجع.
طبعا بعد ما برجع بيومين بضرب نفسى بالجزمة غنى رجعت، بس اهو داء ربنا يشفينا منه
2)أهلى و اصحابى، يمكن ما بشوفهمش كتير و لمدة كبيرة، بس فعلا لما بسافر بحس قد إيه هما مهمين فى حياتى، مهم حتى الشعور بس إنهم حيبقوا موجودين فى لحظات لو إحتجتهم
3)حاسس إن بكره حيكون أحسن بكتير، مش عارف ده تفاؤل ولا عبط، بس بجد، انا شايف إن المستقبل فى البلد دى
رابعا:تلات إجابيات فى شخصيتى، صعبة قوى دى!!!ممكن حد يقدر يتكلم عن نفسه؟
ماشى، نحاول
1)ممكن أكون متفائل شوية، مع إنى مريت فى حياتى بظروف زى القطران، بس دايما بحس إن أى حاجة بتحصل ليه، حتى لو كانت كارثة، بيكون فيها خير ليا، و ده عن تجارب شخصية كتير.
2) مبحبش أأذى حد، و براعى الناس اللى حوليا حتى لو هما ميستهلوش، يمكن تكون دى فعلا أكتر حاجة إجابية فيا.
3) واقعى جدا فى تعاملى مع الدنيا، يعنى مقتنع تمام إن مفيش حاجة فى الدنيا أبيض صريح، أو أسود صريح، كل الدنيا درجات بين الأبيض و الأسود
خامسا: أكتر تلات حاجات بتجبنى قى شاكلى، بصراحة أبقى كداب لو قلت حاجة واحدة بتعجبنى، أنا مقتنع إن خارج المنافسة فى الموضوع ده، بس مدام لازم أجاوب، حقول اللى الناس قالوهولى مجاملة
1) عيونى
2) أنفى ،دى انا فعلا مش مقتنع بيها
3)إيدى، ومعرفش ليه إسألوا البنات اللى قالولى كده، انا عمرى متخيلت أصلا إن غيدى ممكن تتوصف
:))
سادسا:أسوأ تجربة مرت عليا، هى أكيد وفاة والدى ، و هيه لسه قريب الحقيقة فمش حقدر أحدد إجابياتها إيه
بس ممكن تكون
1) عرفت قيمة حاجة إسمها "أب"فى الدنيا ديه، يا جماعة ده الاب ده طلع حيطة كبيرة كلنا سنتسند عليها و إحنا مش حاسين
2)عرفت قيمة الدنيا، إنها أبسط من مما كنت اتخيل، غنها فى الاخر عبارة عن رحلة قصيرة مهما طالت، و بقيت بفكر أكتر إزاى تبقى دنيتى أفيد علشان تبقى حياتى فيها كان ليها قيمة
3)قربتنى من امى اكتر، و بقيت شايل همها قوى
......................
بس كده!!!دى كانت أسئلة طويلة قوى، بس كويس إن الواحد يفتح و يتكلم شوية عن اللى جواه، شكرا يا نوارة
تحياتى ليكى، أنا هارف غنك حتكونى كتبتى كام بوست كده فى الوقت اللى انا رديت فيه على أسئلتك، أروح أقراهم بقى
:))))
اجدع حاجة فى بحرى انه زملكاوى و اسكندرانى و بكدة هوه صاحبى و حبيبى و كفائة
ReplyDeleteيا حاج
ادينى عقلك و امشى حافى
نيهاهاهاهاهاها