Thursday, 17 May 2007

أنا مسافرة الليلة دي والاعمار بيد الله

انا مسافرة الليلة دي تركيا ان شاء الله
السفرية جات فجأة وعرفت بيها قبلها بكام يوم عشان كده كنت باخرج صبح وبعد الضهر عشان اخلص الورق بسرعة
ان شاء الله ح احضر مؤتمر عاملاه مؤسسة كاسبن النسائية عنوانه المرأة في مواجهة العولمة
ادعوا لي ربنا يوفقني ويبقى العمل خالص لله
ده اولا
ثانيا : بقى هالله هالله ع الجد والجد هالله هالله عليه
الاعمار بيد الله والرسول امر برد الحقوق والمظالم والوصية عند السفر
انا بقى ان شاء الله مسامحة اي انسان ليا عنده حقوق مادية او معنوية
من اول كلمة قالها في حقي في وشي او من ورايا
لحد اكبر اذية اتئذيتها من اي انسان عايش او ميت (حتى السادات: فيما يخص حقوقي الشخصية عنده بس)
مرورا باي حقوق مادية (ديون – امانة – سرقة)
وطبعا اللي يعرفوني يعرفوا قد ايه انا غلاوية والقرار ده يبقى صعب عليا قوي
بس الحقيقة انا ما بقتش طيبة جدا يعني عشان انا مسافرة والاعمار بيد الله
بس انا باقدم السبت
عشان اي انسان له حقوق عندي
اذا كانت مادية (ديون – امانة – وما افتكرش اني سرقت حاجة من حد)
ياريت ياخدها مني دلوقت او من اهلي (بابا وماما) وانا مسافرة وسواء عايشة او ميتة
واللي له عندي حقوق معنوية ايا كانت من اول الكلمة لحد اللكمة
او اي انسان ظلمته بقصد او من غير قصد
في وشه او من وراه (بما اني نمامة درجة اولى) يسامحني
خصوصا لو مت
ولو مش عايز يسامحني يبقى منه لله بقى
يعني مش معقول ابقى ميتة وما يسامحنيش
مش بااااااااارضه
دي الوصية العامة
الوصية الخاصة موجهة لصحابي
والحمد لله هم كتير
عشان كده مش ح الحق اكلمهم كلهم دلوقت
يا شباب
أنا كاتبة الوصية بتاعتي وحاطاها في الدرج التاني في مكتبي اللي عليه الكمبيوتر في اودتي
من ضمن الوصية ان متبرعة بكل ما يصلح من اعضائي
بس بلاش مخي ولا لساني عشان ربنا ما يحاسبكوش
بشرط ان الطبيب ما ياخدش مقابل على اعضائي خالص
وياريت تنقوا طبيب طيب يتبرع هو كمان باجره
وياريت الاعضاء دي تبقى من نصيب واحد فقير
طبعا كل ما املك من حيطان الدنيا
الا وهو الكمبيوتر والموبايل والهدوم وفقط
يا تتبرعوا بيهم للفقرا يا تبيعوهم وتتبرعوا بتمنهم!!!! مش عايزة تريقة عارفة انهم مش ح يجيبوا حاجة
خلاص اتبرعوا بيهم
طبعا انتوا اللي ح تشرفوا على موضوع التبرعات دي لان ماما وبابا مش ح يبقى فيهم دماغ
العربية عليها اقساط ح تخلص سنة 2009
طبعا الاقربون اولى بالمعروف اذا حد من اخواتي او اهلي عايزها ياخدها
اذا عملوا فيها عواطفجية وقالوا ما نركبش عربية نوارة بعدها
يبقى تدوها لعماد الكبير
يقلبها تاكسي
ويكمل بقية الاقساط هو
اذا كان يقدر ع الاقساط اظنهم 400 جنيه
اصل المرتب بيتحول ع البنك
الباقي من تحويل المرتب برضه لعماد الكبير لو ح ياخد العربية عشان يسدد الاقساط بيهم
او يعمل بيهم اللي هو عايزه
لو عماد قال انه مش محتاجها
شوفوا اي عواطلي يقلبها تاكسي ويشتغل عليها
بس لازم يكون غلبان وضاربه السلك
ملحوظة: لما العربية تعطل منه حذاري ثم حذاري يدعي عليا
ويقول ربنا يجحمك مطرح ما رحتي دي عربية دي؟
تاخدوا بالكوا من بابا وماما واخواتي
ثالثا: محاكمة اسلام نبيه الشهر الجاي
لو ما كنش ليا عمر احضرها لازم حد يحضرها ويسجل كل حاجة بالموبايل بتاعي وبعدين بعد ما ينزلهم
ع اليوتيوب ويبقى يتبرع بالموبايل زي ما هو عايز بعد كده
رابعا: قانون التأمين الصحي
لو مت وعدى من تحت شنبكوا يبقى عيب عليكوا
لو عشت وعدى من تحت شنبنا يبقى عيب علينا
الحملة بتاعة التأمين الصحي أمانة في رقبتكوا
خامسا: لو مت وحد فيكوا متخانق مع التاني تتصالحوا
وكل واحد عارف نفسه
وخيرهما من بدأ بالسلام

لو عشت بقى
يبقى ح نيمك من المغرب يا تركيا

يا خوفي ما متش واعيش واتورط في التسامح ده كله
ملحوظة أخيرة: وصيتكوا وائل عباس يا بتعة
خلوا بالكوا منه عشان شكلهم كده بيدبروا له حاجة حقيرة
على رأي خالد البلشي: الأمر مدبر له بليل
ولو بعد الشر جرا له حاجة
يبقى مافيناش ولا راجل بقى
بما فيهم انا
ولو إني باتنشق على الموت عشان اخلص على الاقل من اشكال معينة
الا اني لو اتمنيت اعيش
يبقى بس عشان اللي يهوب ناحية الناس المحترمة
اللي زي وائل عباس
اكل دراعه
مراقب مصري
شايف ده
وصيتك برضه
لحد ما ارجع ان شاء الله
ولو ما رجعتش
وصيتك برضه
انت فاهم ها
وش بيغمز
at

37 comments:

  1. Anonymous17 May 2007 at 21:42

    انتي بتتكلمي ولا اللي مسافرة بلاد الواق واق تجاهد التتار

    مش ساعه و نص في الطيارة

    انما نقول اية محدثة نعمه بقى

    و ماتخافيش يا بنت نجم لان محدش حايرضى نتبرع لة بلسانك و لا بمخك

    و دة طبعا لان لسانك حايسمم اللي يتركبلة

    و مخك لان محدش حايلاقية اصلا هو جالك منين المخ دة



    و بالنسبة لعربيتك ام ربعميت جنية قسط انا مش عارف يا خويا عربية اية اللي قسطها ربعميت ملطوش دي لما الشاهين المصري المعفنة قسطها 800 جنية شكلها عربية مكوة من اللي بتتطبق و تتشال في الجيب و بتتشحن بالشاحن
    المهم ماتخافيش لان محدش حاياخدها و لا عماد الكبير و لا غيرة و غالبا حانرميهالك وراكي في البحر وتحصلك و القروش تلعب بيها بعد ماتاكلك

    بالمناسبة مش حايبقالك اكل عيش في تركيا لان البنات هناك مزز رشاقة و بياض و شعر اصفر و عيون زرقة و مش حاتعرفي تاكلي عيش مع التراكوة
    خليكي في المحلي و ارضي بقليلك

    ReplyDelete
  2. Anonymous17 May 2007 at 22:27

    ايه يا نوارة

    انا قلت انتي مسافرة جوانتانمو

    ولا جالك استدعاء للجيش

    وهتحاربي لوحدك

    تروحي وتيجي بالسلامة

    ReplyDelete
  3. Anonymous17 May 2007 at 22:43

    السلام عليكم
    ربنا يوفقك تروحى وترجعى بالسلامة
    بس خايف وانتى راجعة يتهموكى بالسعى للإنقلاب على المجلس القومى للمرأة وعلى أهدافه وإتهامك بالعمالة لصالح دول علمانية أصولية راديكالية أى حاجة بقى ماهو كل جاهز
    ربنا معاكى ..بالمناسبة بلاغى سلامى لعمنا الفاجومى...مجرد وجودى فى مصر وإحساسى أنى ممكن أشوفه فى الوقت اللى أحبه كان بيسعدنى لكن دلوقتى الغربة ياأختى...وما أدراك ماالغربة
    ربنا يستر علينا

    ReplyDelete
  4. Anonymous17 May 2007 at 22:55

    ولو إن عيني كانت في العربية بس ما دام طلع لسة عليها أقساط يبقى حلال على عماد الكبير بقى.... هههههههههه... بالنسبة للواد إسلاك نبيه ما تقلقيش لو متي وعدى من تحت شنبنا يبقى هنحلق شنبنا ولو عشتي وعدى من تحت شنبنا برضو يبقى مع بعض هنطبق الخطة ج وطبعا أنسب مكان ليها هو ميدان سليمان الحلبي... بس يا ريت تعيشي عشان الخطة ج لخوزقة الظالم والمفتري وابن الحرام مش هيبقى لها طعم من غيرك

    تروحي وترجعي لنا بألف سلامة يا أحلى النواوير اللي في الدنيا

    ReplyDelete
  5. Anonymous18 May 2007 at 00:55

    المركب اللى تودّى







    وترجّع بالسلامة





    وربنا يديكى العمر وتشوفى هيثم







    هيثم جمال مبارك







    وهو رئيس لجنة السياسات





    وتسمعيه بودانك وهو بيحلف عالمصحف الشريف إنه مش ناوي يرشح نفسه للرياسة

    ReplyDelete
  6. Anonymous18 May 2007 at 00:55

    المركب اللى تودّى







    وترجّع بالسلامة





    وربنا يديكى العمر وتشوفى هيثم







    هيثم جمال مبارك







    وهو رئيس لجنة السياسات





    وتسمعيه بودانك وهو بيحلف عالمصحف الشريف إنه مش ناوي يرشح نفسه للرياسة

    ReplyDelete
  7. Anonymous18 May 2007 at 01:54

    نوارة
    بعد الشر عليكي ألف مرة
    داحنا محتاجينك و محتاجين لسانك ده يقوفلنا في كام موضوع
    بعدين لا مؤاخذة يا نوارة أنا عايزة العربية...عيني منها الصراحة خخصوصا ان أبويا قلب مني العربية و اداها لابنه الي هو أخويا !!!

    تروحي وترجعي بألف سلامة يا قمررررررر

    ReplyDelete
  8. Anonymous18 May 2007 at 02:09

    روووووحى يا نووور يا حبيبتشى
    أنا مسامحاااااااااكى

    كشفت راسى ودعيتلك
    يجعلك فى كل خطوة موضوع

    قبلاتشى وانتشى فى طريقك للغربة
    أمووواااااة

    ReplyDelete
  9. Anonymous18 May 2007 at 02:17

    اياكي تسمعي كلام سي مجهول دا
    محطم معدنيات السمر اللي زيينا لا هتلاقي الاجنبي مرطرط قدامك بما ان كل اللي هناك صفر وخضر وبما انهم مرطرطين الزباين بدور علي الجديد المتميز اللي مش موجود هناك أسأليني انا بما اني كنت السمرة وأم شعر كرلي (أكرت يعني )الوحيدة ف مدينة طويلة عريضة ..م الاخر انا بشجع الاجنبي لان المحلي معظمه ضاربه السلك
    ...تحيا عقدة الخواجة

    هي عربيتك نوعها ايه بالظبط؟ تكونش عربية يد؟ ع العموم كنت فاكراكي هتسيبي لي عجلة من الاربعة اهي تنفع بما اني بفكر اشتري عربية ..
    طب والايشارب الموف بتاعك مين اللي هياخدوه؟ انا عيني فيه من اول ما شفتك لابساه ف مركز الدراسات الاشتراكية من كام شهر، صحيح راسي مش متغطيه بس اهو ينفع لما اكبر واحتمال ابقي حاجة ...
    متقلقيش كدة كدة قانون التأمين الصحي هيعدي، وكمان قانون الجمعيات وكادر المعلمين ، وحماية المستهلك صحيح لسه مجابوش سيرته لكن كله جاى ف الدورة البرطمانية الحالية ...كمان الواد اسلاك نبيه هيطلع براءة وهيحبسوا عماد وناصر امين وهيطالبوكي بدفع تعويض لتغطيتك للمحاكمة مع الواد التاني دا مراقب مصري ..

    متقلقيش السمك مش هيرضي ياكلك اكيد واصله اخبار تهييسك ولسانك اللي بينقط عسل دا غير اني متقلقيش موصية عليكي وقلت لهم انك تبعي ..بما اني زي القطط بتسع ارواح وملبس

    خلي بالك انت مديونة لي بمج عصير قصب او برتقان من عند كوستا ومش مسامحة الا لما تعزميني عليهم او تدفعي خمسة ستة جنيه.. امال اسامحك ببلاش؟ ولو عاوزة دعوة ممكن اعملك ديسكونت واخليها عشرة جنيه مسامحو + دعوة بما انك فقير زيينا وكنت مخمومة فيكي

    متقلقيش عن نفسي هبقي وكيلة عنك ربنا بس يستر لاني متأكدة انك ملكيش ديون علي حد ولا حقوق مادية لكن خوفي يا بدران وادهم وحسنين لا تطلعي مديونة بكتير

    اما هدومك والكمبيوتر والمكتب اللي عليه بقي فأنا هعمل لك معرض زي بتاع السلع اللخربانة دي وابيعهم هدعي انى هتبرع بيهم بس طبعا هضرب عليهم ومحدش هيطول منى حاجة
    أما عربيتك هبعتها وكالة البلح تبرع مني يعملوا عليها ابحاث لزوم تطوير العربيات اللي قسطها لا يتعدي الربعميت جنيه


    كفاية تهييس انا تعبت


    تروحي وتيجي بالسلامة بس مش هسامح ف العصير الا لما اشربه علي حسابك

    ReplyDelete
  10. Anonymous18 May 2007 at 02:23

    الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , المعتقل منذ حوالي 20 يوماً , ويعاني وضعاً صحياً سيئاً داخل محبسه نظراً لكبر سنه البالغ 80 عاماً , وتتمثل الحملة في نشر البوست الجاهز المتفق عليه بدءاً من يوم الجمعة الموافق 18/5/2007 والنشر سيستمر لمدة اسبوع ( مما يعنى أنه اذا لم يستطيع أحد المدونين النشر يوم الجمعه فهو يستطيع النشر لمدة اسبوع كامل ) , كما تشمل الحملة تثبيت صور شيخ المجاهدين في جميع المدونات المشاركة ( تأخذ الصور حفظ بإسم , أو عبر رابط عنوان رفعها على الانترنت ) , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...


    البوســـت بعنوان

    أن تكون أبو الفـتــــــــوح شوشــــة


    حملة الإفراج عن شيخ المجـاهدين

    في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

    أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

    أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

    أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

    أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

    أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

    أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

    أن تكون أبو الفتوح شوشة فهذا معناه ألا يرحموا شيبتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

    أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

    أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

    أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...


    الروابط :

    مدونة انسى تعلن بدء حملة الافراج عن شيخ المجاهدين
    http://ensaa.blogspot.com/2007/05/blog-post_17.html

    مدونة انسى تذيع نبأ اعتقال شيخ المجاهدين
    http://ensaa.blogspot.com/2007/04/blog-post_9947.html

    مجلّة "فلسطين المسلمة" تذيع فقرات من جهاد شيخ المجاهدين
    http://www.fm-m.com/2003/aug2003/story24.htm

    تقرير صحيفة المصريون عن اعتقال قدامى رجال الاخوان المسلمين
    http://www.almesryoon.com/ShowDetails.asp?NewID=34088&Page=1

    عن جهاد شيخ المجاهدين المصريين في فلسطين pdf ملف
    http://www.fm-m.com/2003/aug2003/pdf/51.pdf

    لمعرفة معلومات متعلقة بحياة شيخ المجاهدين يرجى زيارة مدونة الحرية لأبو الفتوح
    http://freeaboalftouh.blogspot.com/

    رابط تقرير جريدة الدستور عن شيخ المجاهدين بتاريخ 13/5/2007
    http://www2.0zz0.com/2007/05/17/21/81829036.jpg

    ReplyDelete
  11. Anonymous18 May 2007 at 08:24

    صحبتك اللات في رحلاتك في الجو، ومناة في سفر البر ، والعزى تتكفل بعزتك وصحتك وترجعيلنا غانمة.

    عبد العزى إبن عبد المطلب
    أبو لهب

    ReplyDelete
  12. Anonymous18 May 2007 at 11:33

    والله لكم حق تهيسوا

    ReplyDelete
  13. Anonymous18 May 2007 at 12:00

    السلام عليكم ورحة الله وبركاته

    ازيك يا نوارة ان شاء الله تقرى دة بعد

    ترجعى بالسلامة ان شاء الله

    جميلة اوى وصيتك ان شاء الله توريها لاحفاد احفادك بعد عمر طويل ان شاء الله

    الى انا حاسس بية بقى انك هاتعيشى بذنب التسامح دة باقى عمرك ان شاء الله

    المهم تركيا بلد جميلة اوى وفيها كتير هاتشوفية وهاتزورية وهايعجبك ان شاء الله

    ومدام سامحتى الناس ان شاء الله يسحك رب الناس دنيا واخرة وانا مسامحك وان شاء الله الباقى يسامحوكى

    الرسول صلى الله علية وسلم قال (أستودع الله دينك، وأمانتك، وخواتيم عملك) [أبوداود].


    ولو لحقتى تقرى دة قبل ما تسافرى فخية معاكى واقرية وانتى فى الطيارة

    كان رسول الله صلى الله عليه وسلم إذا ركب الجمل، وخرج في سفر، كبر ثلاثًا، ثم قال: (سبحان الذي سخر لنا هذا وما كنا له مقرنين وإنا إلى ربنا لمنقلبون. اللهم إنا نسألك في سفرنا هذا البِرَّ والتقوى ومن العمل ما ترضى. اللهم هوِّن علينا سفرنا هذا، واطوِ عنَّا بُعْدَه. اللهم أنت الصاحب في السفر، والخليفة في الأهل. اللهم إني أعوذ بك من وَعْثَاء السفر، وكآبة المنظر، وسوء المنقلب في المال والأهل) [مسلم]

    وبعدين انا معرفش انتى رايحة على انهى خطوط جوية بس الخوف ميدخلوكيش البلد تانى ويعملو هندو يبقى لعبوها صح

    توصلى بالسلامة وترجعى بالسلامة ان شاء الله

    ReplyDelete
  14. Anonymous18 May 2007 at 12:33

    اعتقد ان انا الوحيد اللى ليا حق عندك و مش مسامح فيه

    ReplyDelete
  15. Anonymous18 May 2007 at 12:40

    nawara ... 7atw7shene .. awe awe...
    ana mkotch 23raf 2nak msafra 3'er mal blog dlw2tee :( kada tasafre man 3'er mat2olelee....
    bgad 7atwa7shene 2weee...
    howa yom bayn mal sob7 asln...
    ellaptop el 2wal sorto 2t3wgat ..y3ne 3shan ashooff lazm y23wag rase yamsak el laptop zay el katb 3shan ashoof...we man b3dha shwayat 7wrat kda bardo... y3ne yoom mabtdee zay el fol.. laptop m7wal we mstba7 ..
    we lama 2sl7o 2l2kee saftreee :X

    bgad ana ma7'no2a fash7'

    7a'le balak man nfsak...
    msh 3rfa leh bas ana 2kt2bt gedan...2kt2bt 27'er 7aga...
    nawara 7'ale balak man nfsak..

    m2olteesh 7atrga3ee emta ???
    7ATRGA3EEE 2MTAAA?????

    .......

    ReplyDelete
  16. Anonymous18 May 2007 at 15:07

    ههههههههه...عسل يا نواره حتي و أنتي مسافره و بتحضري الشنط
    بالتوفيق باذن الله و ترجعلنا بألف سلامه و نستقبلك في المطار بأغنيه المصريين أهما
    تحياتي لكي

    ReplyDelete
  17. Anonymous18 May 2007 at 21:21

    :) تروحي و ترجعي بالف سلامة يا نوارة

    ReplyDelete
  18. Anonymous18 May 2007 at 22:17

    eh ya bnty da be3ed l shar 3leeki inshallah eli yekrahooki teru7i w terga3i bl salama
    enjoy ur trip w 7awli maytnesebsh 3leeki hnaak :D
    Take care

    ReplyDelete
  19. Anonymous19 May 2007 at 00:10

    tro7e w terga3e b alf salama ya nawaretna
    el blogspot hyb2a na2so el spot el asassy elly mnawarna kollena

    terga3e belsalama w tenawarena ya nawaret masr kollaha

    ReplyDelete
  20. Anonymous19 May 2007 at 00:34

    إيه يا نوارة هو إنت مسافرة تركيا على ناقة
    تروحي و ترجعي بالسلامة
    بس و النبي تزوريلنا الأوليا اللي في تركيا
    :D

    ReplyDelete
  21. Anonymous19 May 2007 at 08:04

    حبيبتي نوارة
    تروحي وترجعي بالسلامة إن شاء الله..وتعملي أحلى شغل
    وبعد الشر عليكي
    عايزه أقولك ان انت بجد جميلة قوي.. وأنا بحبك
    هتوحشيني
    خلي بالك من نفسك
    :) :)

    ReplyDelete
  22. Anonymous19 May 2007 at 08:43

    تروحى وترجعة بالسلامة .. ربنا قادر يحيكى
    وبالنسبة لواشل متقلقيش هما مش ناويين حاجة دلوتى هههههه اصل انا المصدر بتاعه ....... بس طبعا مش هينفع اكتب اسمى فى الكومنت ده
    بس وائل لسه عليه بدرى تبعاً لاخر الاخبار

    خللى بالك من نفسك
    لا اله الا الله

    ReplyDelete
  23. Anonymous19 May 2007 at 10:33

    حلوة قوى ان وائل من الشرفاء دى

    هههههههههههههههههههههه

    انتى خلاص بقيتى مقضياها مصالح انتى كمان يا نوارة

    اخص بقيتى من الشلة الوسخة

    يالا اهى كلها مصالح و مؤتمرات و سفريات

    ReplyDelete
  24. Anonymous19 May 2007 at 10:51

    ربنا يوفقك في المؤتمر ويثبت قلبك في السفر ويؤجرك خير علي نيتك وترجعي بمليون سلامة

    اما موضوع عربة الكدة ده فاظن عماد الكبير يتسجن اكرم له

    ReplyDelete
  25. Anonymous19 May 2007 at 11:38

    ايه يا بنتى انتى رايحة فين بالضبط
    عموما تروحى وترجعى بالسلامة
    وتشوفى إسلام نبيه وهو متعلق على حبل المشنقة كده إن شاء الله

    ReplyDelete
  26. Anonymous19 May 2007 at 12:55

    فكرتيني بامي وهي رايحة العمرة...خالتك فلانة ليها عندنا فلوس بتاعت اللحمة..ما تنسيش تديهوملها لو مت...طنطك علانة كانت سالفة قرشين...سامحي فيهم و ما تطلبيش بيهم...ايه يا اما وجع القلب ده...ما بينوبنيش منكم غير تقطيع القلب...هو انا ناقصة مواجع...والله يا نوارة لو مارجعتي بالسلامة لهخلف بنت وهسميها نوارة عشان ابقى اهريها ضرب انتقاما منك....ربنا يرجعك بالسلامة و يخيب ظنك يا رب...عشان نبقى نشوف هتستمر حملة التسامح دي ولا هو كلام وبس....البلد فعلا محتاجة ناس زيك يا نوارة....خلي بالك من نفسك ...ووحياة ابوكي ابقى احرمينا من وصاياكي دي ..لحسن اعصابي بتتعب

    ReplyDelete
  27. Anonymous19 May 2007 at 16:10

    نوارة

    نسيت أقولك

    بما إن تركيا قريبة كتير من الشام

    فحاولي تخطفي رجلك عشان أقوم بالواجب.

    و أظنك ح تنيمي الشام من العصر و ليس من المغرب

    هههههههه

    وفقك الله و رزقك الاخلاص

    و ترجعي بالسلامة لمدونتك

    و تمارسي رياضة الحرب بالكلمات

    شاء من شاء و أبّى من أبّى

    ReplyDelete
  28. Anonymous19 May 2007 at 20:58

    إنتي خايفه من الأمن ما يعدكيش في المطار و يأخدوها فرصه ويقبضوا عليكي ويقولوا كان معاها منشورات بتحرض علي قلب نظام الحكم والرموز الوطنيه زي إسلام نبيهه باشا ... هههههههه... تروحي وترجعي بالسلامه يا نواره

    ReplyDelete
  29. Anonymous20 May 2007 at 10:12

    لو كنت شرير مثقف هاعلق كده
    التحليل الثقافى لوصية نواره

    الوصية هى رغبة أخيرة لشخص مقبل على الموت، وقد تعددت الشرائع فى الاقرار بأهميتها، وذهبت الشريعة الاسلامية لوجوب الاستجابة لها، واشتثنت من هذا الوجوب ما يخالف الشرع، ومن منطلق هذا التعريف سنتوقف عند أمرين أوردتهما الباحثة والكاتبة نوارة البساتين أحمد عزت فى مدونتها التى تبث على الشبكة الدولية للمعلومات فى معرض تقديمها لوصيتها لقراء المدونة، الأمر الأول هو رغبتها فى التبرع بأعضائها، والأمر الثانى هو ايصاءها بسيارتها لتؤول لعماد الكبير، أما الأمر الثانى فقد لوحظ أنها بعد ديباجة طويلة مؤثرة عن عماد واستحقاقه لهذا الأصل المملوك لها قد أوضحت أن السيارة مدينة بأقساط، وقد تفضل أحد النبهاء بتوضيح أن ما قالت أنه قسطها الشهرى أقل بكثي جداً من أقل قسط لسيارة صغيرة ماركة فيات كالاونو والثمانية وعشرين، ويذهب إلى أن القسط لا يقل عن ستميه وخمسين جنيه بأى حال، وبافتراض صدقها فى قيمة القسط، قمنا بحسبة صغيرة فوجدنا أن جلة ما تبقى عليها من أقساط يقارب الخمس عشرة ألفا من الجنيهات سيلزم بها من حصل على السيارة، وفى حال تعثره سيودع السجن لحين الوفاء بالمبلغ، وقد أشار أحدهم إلى ان السيارة نفسها قد لا تسدد حال بيعها هذا المبلغ نظرا لمستوى القيادة الردئ الذى عرفت به الموصية، ومن ثم تعد وصيتها هنا نوعا من الشرك الذى نصبته للمستفيد من الوصية، المسكين عماد الكبير، وليست بحال تبرعا، فلو أرادت عن حق هذا التبرع، لقالت مثلا إننى اوصى بها إليه غير منقوصه، وليسدد عنى دينى منها من أموالى أو موجوداتى الأخرى، لتذهب إليه خالصة. الأمر الثانى متعلق بتبرعها باعضاءها، وهى وصية متعلقة بشرط، صعب التحقق، تبرعها مكرمة لا شية فيها، إن أجازها العلماء، والحقيقة أن ثلاثة أرباعهم لم ترق لهم فكرة التبرع بالأعضاء ولم يحسموا أمرهم منها للآن، والمؤسسة تراوغ فى هذا الأمر الذى تعطل معه إصدار تشريع يبيح نقل الأعضاء بين البشر وفق أصول معتبرة، لكن بفرض أن التشريع سيمر وسيجاز تنفيذ وصيتها، وجدناها تتبرع بما لن يفيدها حال وفاتها من جسد مكتوب عليه الفناء بمجرد صعود الروح لبارئها، وهو تبرع أشبه بالتبرع الملابس القديمة التى ضاقت على المرء، فإما أن يتبرع بها لغيره، أو يتركها لتأكلها العته، وفى تبرعه خير أكبر، وهو تبرع غير مكلف، الأنكت أنها أشارت بطرف خفى وبصورة ساخرة لرغبتها فى التبرع بعضوين هما المخ واللسان، وهو تبرع ملتبس وغامض بل وملغم، فكما تعرفون يؤخذ المرء يوم القيامة بأصغريه، قلبه ولسانه، وقيل أن المقصود بالقلب هو جهاز التحكم الكور اوف كونترول الذى اكتشف العلماء فيما بعد مع تطو ر الطب أنه المخ وليس القلب العضو، الهارت، وهى تود التبرع بهذين العضوين ليتورط أحد الغافلين فيأخذهما بما عليهما من دين للناس، شتمة هنا وسبة هناك، وعقلها الذى أدار مؤامراتها التى حاكتها ضد الإنسانية، صفقة غير مربحة، إذ تمر على الصراط يوم القيامة لتقول هابا هابا على طريقة الخرس، فيظن الناظرين أنها لم تقترف فى حياتها ذنبا لسانيا، فيمررونها من على الصراط باعتبارها مسكينة لم يتح لها أن تحصل على هذا العضو الذى يكب الناس على مناخيرهم فى النار يوم القيامة بحصائده، وتحمل ذنوب عقلها فى كشف حساب من نقل له مخها، ويتحمل هو كلفة ما فعلت فيرمى فى جهنم، بينما هى تنعم فى الجنة، لكن هيهات وألف هيهات، لا تقبلوا منها تبرع، ولا يغرنكم ديباجاتها الدينية وما اوردته من جمل تستدر العطف وما قالته حول التسامح، انها دست السم فى عسل الوصية فلا تقربوها.

    ولو كنت شرير ديماجوجى ماركة هتفونيا هاعلق كده
    قال وصية قال، على ايه يا ست، وبعدين بقى م الاخر فيه شك انك طفشانه بفلوس البنوك وفيه تأكيد انك مستلفه بضمان الوظيفة تلتمية اربعة تلاتين الف جنيه وستميه وخمسين، ومتعثرة، وهاتخلعى من تركيا لمكان غير معلوم، وبجملة اللى هربوا محدش هايجيبك، وتبقى بعد كام سنه ترجعى وتعملى مع الحكومة بوليكة تصالح بعد ما تشمطيهم فى الصحافة الاجنبية فيتصالحو معاكى ومتدفعيش حاجة
    اطلعى من دول يا حلوة ورجعى فلوس البلد
    جتكم البلاوى كترتم ومليتم البلد

    ولإنى مش ده ولا ده وغلبان وقلبى ابن كلب بفته بيضا منقطه بمبى هاقولك
    تروحى وترجعى بالسلامة والمهم تنبسطى وتعمليك كام شبطه ينحكى عنهم، وابقى جيبلنا معاكى نوجا تركى، مفيش زيها فى الدنيا

    ReplyDelete
  30. Anonymous20 May 2007 at 12:07

    نوارة

    جيت متأخر اعذرنى

    ترجعى بالسلامة إن شاء الله

    ReplyDelete
  31. Anonymous20 May 2007 at 16:13

    إيه يا بنتى هوه إنتى مسافرة بجمل و قافلة جمال؟
    دى أقرب من اسوان بالطيارة
    :)))

    تروحى و ترجعى بالسلامة إن شاء الله

    ReplyDelete
  32. Anonymous20 May 2007 at 17:59

    ربنا يجيبك بالسلامه
    تحياتي للمدونات الجميلة و الراي الحر

    ReplyDelete
  33. Anonymous20 May 2007 at 18:29

    تروحى وترجعى بألف سلامه
    انا يمكن معرفكيش بس الكلام عجبنى اوى

    ReplyDelete
  34. Anonymous21 May 2007 at 05:06

    نوارتى
    ألا مؤتمر كاسبن ده بيبيعوا فيه ايه؟ لو لقيتيلى جاكتات جلد للعيال مقاس 8 و 10 هابقى حقيقى متشكرة ليكى بس خللى بالك هقسط لك على كام شهر ..
    ايه بقى الكلام اللى يقطع القلب ده .. ترجعى لنا بألف سلامه ان شاء الله .. وليكى عندى لاتيه بدال القهوة اللى نكدت عليكى بيها يومها
    يالا ماتغيبيش

    ReplyDelete
  35. Anonymous21 May 2007 at 15:29

    تروحي و ترجعي بالسلامة ان شاء الله ..و الله خير حافظا و هو ارحم الراحمين

    ReplyDelete
  36. Anonymous21 May 2007 at 16:04

    الســــــلام عليكم
    تروحى وترجعى بالســـلامة اختى الحبيبة
    فى أمان الله ورعايته

    ReplyDelete
  37. Anonymous16 July 2007 at 04:08


    صور بنات بنت بنوتات صورة عرايس فتيات انسات طفلات جميلة رائعة نساء سيدات بنوتة بنوت banat girls cute sweet صور بنات جميلة للتواقيع صور رمزية انيمي
    كرتون توقيع توقيعات صورة رمزية لتوقيع للتوقيع رسوم
    بنات بنوتات فتيات بنت بنوتة

    ReplyDelete

Note: only a member of this blog may post a comment.