Tuesday, 20 March 2007

المركب بتغرق يا قبطان



آخر جملة قالها مساعد قبطان العبارة اللي غرقت
اللي مات فيها مات
الله يرحمه
واللي فقد فيها فقد
الله يرحمه
واللي قتل الناس وهرب هرب
الله ينتقم منه
لكن اللي نجوا واتعرف انهم نجوا
واتصوروا على التلفزيون وهم بيركبوا الميني باص
اللي اختفى هو واللي فيه
نقول ايه عليهم
على رأي أطاطة في فيلم عوكل
الميت بيتلبس له اسود
والحي بيتلبس له الابيض
لكن التايه بيتلبس له ايه؟ أديدس؟
والله ما بانكت ولا باهرج
منظر الاهالي وهم تايهين اللي عرضته العاشرة مساء
الواحد يعيش بيه ازاي
تسوى كام أرواح الناس يا كابتشن ممدوح؟
تسوى كام خلعة قلب الأهالي على ولادهم واخواتهم وهم مش عارفين هم فين وايه اللي بيحصل لهم
يا سعادة اللي هرب الكابتشن ممدوح؟
تسوى كام صرخة مساعد القبطان: المركب بتغرق يا قبطان؟
فين القبطان ده؟
ولو مات....فين جثته؟
فين أهله؟ عايزين نشوفهم....عايزين نعرف اذا حزانى زي اهالي بقية الناس
وللا فرحانين بنجاته؟ وللا تايهين ومش عارفين هو فين؟
ايه اللي حصل في العبارة؟
وكاتبشن ممدوح مش عارفين تجيبوه ازاي؟
اشمعنى لما بيبقى واحد من الجماعات الاسلامية
بيلف كعب داير على مصر وامريكا واروبا ويفقد شرفه الف مرة في كل بلد
ويا ترى قانون مكافحة الارهاب ح يجيب لنا ممدوح السفاح؟
ويا ترى ايه اللي مخلي ممدوح ده واثق من نفسه كويس قوي؟
ايه اللي يعرفه عن الحكومة؟
متشارك معاها في ايه مطمنه قوي كده ومسهل له انه يقتل الناس
ويخطفهم كمان
عشان ما يفتحوش بقهم
ايه اللي يعرفه المخطوفين مش عايزينا نعرفه؟
طيب وديتوهم فين؟
طيب
انا باكلمكوا نيابة عن اهالي المخطوفين
رجعوهم لاهاليهم وانا ضامنة برقبتي انهم مش ح يفتحوا بقهم
وكفاية الفزع وشقى العمر اللي غرق مع الكرامة والانسانية
اعتبروهم شحنة جزم
بلاش تعاملوهم على انهم مواطنين
عشان انا عارفة ان المواطن في مصر ارخص من جزمة باتا
شارك في التظاهرة التدوينية (أكواد أغنية يا قبضتي...ضعها على مدونتك)
:
وقع هنا للقصاص أسرانا: إلى الأمم المتحدة
وقع للقصاص لأسرانا: إلى نقابة المحامين
وقع ضد التعديلات الدستورية

at

4 comments:

  1. Anonymous20 March 2007 at 03:03

    الجزم ممكن كون تسوى اكتر ، على الاقل ليها سعر و تمن ، و هى اللى بيداس بيها ، لكن المواطن لا ليه سعر و لا ماركة و لا اى حاجة ، و هو اللى يداس عليه ، انا مش قادرة اتصور اللى بيحصل ده ، و التوهان ده مش فى الميكروباس بس ، فى باخرة و لا سفينة و لا عبارة و لا مش عارفة ايه بكاملها ضايعة ، و اللى بيتقال انه اكلها السمك ، نفسى اشوفعه السمك اللى اكل العبارة كلها و مسبش حنى حديدة

    ReplyDelete
  2. Anonymous20 March 2007 at 11:23

    ارجوا ارسال دعوة عزيزتى للقصاص من المدعو ممدوح اسماعيل
    والمطالبة برأسه حيا او ميتا
    وترحيله الى البلاد

    للقصاص لغرقانا من ضحايا العبارة واسماك القرش

    الثار من السفـــــــاح

    ReplyDelete
  3. Anonymous20 March 2007 at 12:37

    اه شفتها فى العاشره مساء بيقولك طاقم العباره رموهم تانى فى البحر علشان هم المسؤلين عن موت الناس دى و لذلك اقاموا الحد عليهم الرحمه يارب.يحيى

    ReplyDelete
  4. Anonymous20 March 2007 at 13:59

    ويرجعوهم ليه ، هيحصل ايه يعنى للى اخدوهم لو مرجعوش لسه هيتعبوا نفسهم ويرجعوهم

    ReplyDelete

Note: only a member of this blog may post a comment.