أنا زهقانة من حياتي
:من امبارح وأنا عمالة أعيط وأبربر في ودن صحابي
إهئ إهئ إهئ
في كليب القفا أمين الشرطة هو اللي لبسها
وظابط خرج منها
هي البلد دي عدوة الغلابة؟
هم مستكبرين طبعا إن ظابط يتحبس في حرامي
مع إن خبير الأصوات قال إنه هو صوت الضابط
أنا مش قادرة أنسى وش أمين الشرطة وهو بيسمع الحكم
إهئ إهئ إهئ
اتكلفت مكالمات كتير
بس عشان أعيط
غادة والشرقاوي ما يعرفوش بعض خالص
:بس هم التنين كان لهم نفس رد الفعل
فترة صمت
فترة صمت
فترة صمت
:ثم
طب ليه يعني؟ أنا مش فاهم/فاهمة حاجة
:الشرقاوي بس زود جملة قعد يكررها كتير
لا يا شيخة لا...مش معقول يا شيخة لا
الغريبة بقى إني أول مرة في حياتي أعرف إن الحرامي
مصمم يبقى دقيق في شهادته
يعني لما سألوه وانت بتضرب شفت الظابط
قال أنا شفت الظابط كريم وهو واقف ع السلم وكان بيزعق
وبعدين أمين الشرطة دخلني وأنا كنت مدي ضهري
الظابط دخل، أنا عارف صوته
بس الشهادة لله ما شفتش وشه لاني كنت مدي ضهري
يعني ساعة ما كنت باضرب كنت سامع صوت الضابط كريم
بس ما شفتش وشه...بس أنا عارف صوته!!!!! معلش بقى
عمركوا شفتوا حرامي خايف من شهادة الزور؟
يعني هو امبارح في العاشرة مساء
قال في الثانيتين اللي عرف يتكلم فيهم
أنا متأكد أنه هو بس ساعتها ما كنتش شايف وشه
لا ومصمم يبقى دقيق لآخر لحظة
اللي يغيظ بقى إن أمين الشرطة اسم الله
أو أمين الشوربة زي ما غادة بتقول
لامؤاخذة حمار
سمع كلام المحامي وصمم إن الشريط متفبرك
يعني المحامي قرطسه ولبسها له بس عشان يخرج الظابط
والامين لبس العمة تاني
زي ما لبسها أولاني وضرب الحرامي
معلش أنا عايزة حد يقابل الحرامي ده
مش عشان القضية بس عشان يعملوا عليه فيلم سينما
حرامي طوله حوالي مية وخمسين سم
ووزنه حوالي تلاتين كيلو
محبوس بتهمة السرقة
والجاي المحكمة بالبدلة الزرقا اللي بيلق فيها لدرجة ان صوابه مش باينة من الكم
والكاب من كتر ماهو واسع عليه نازل على عنيه
ومصمم يبقى شديد الدقة في الادلاء بشهادته
حرامي خايف يكدب
مع انه متأكد إن الضابط هو اللي أمر بضربه
مش حاجة عجيبة دي
طبعا ريهام - أحد الذين بربرت في ودانهم - لقتها فرصة
عشان تأكد نظرية المؤامرة اللي هي معتمداها كتفسير أوحد للحياة
بس المرة دي ما عرفتش تفسر
: كل اللي قالته
فيييييه سرررررر....مسيرنا نعرفه
ريهام بتفكرني بميل جيبسون في فيلم
Conspiracy Theory
تفضل تقول تفسيرات مهلفطة ومجانيني
وفي الآخر يتبين إن الكلام الجنان ده هو اللي طلع صح
ماهو يا إما ريهام عبقرية
يا إما بلدنا هطلة
أنا شخصياً مش عارف مين الغلبان مش من الغلبان ..
ReplyDeleteأنا مش ناسي لما أحد السادة الغلابة كان حيرجعني من الزقازيق للمنصورة ماشي بعد ما اشتريت منه استمارة علشان إجراءات بأعملها بعشرة جنيه في حين إنها باتنين جنيه ونص بس!
إكليشيه "دانا غلبان" بقى مجرد تصريح للصغير إنه يسرق ويعمل كل اللي هو عايزه ، معلش يا أوختشي الواد غلباااان!
السرقة يا أستاذة نوارة زي الكورة ، أشبال وفريق رديف وفريق أول ، الحرامي الصغير اللي عنده طموح بيبقى غلبان في الأول ، وبيكتسب خبرة في الأشبال علشان يطلع فرود كبير من بتوع المليارات!
اللي يشوف مصر من تحت حيفاجأ ببلدأما عن التعذيب ، فمش عجبة إن الواحد يتعذب في قسم ، إيه يعني ، ما اللي أد أباهاتنا وأمهاتنا بيتعذبوا في المعاشات ، واحنا بنتبهدل وبيطلع عين أسلافنا علشان نعمل خدمة وننزل ونطلع ويسرقنا الناس الغلابة المساكين عقبال ما نطلع استمارة ما تسواش تمن الحبر اللي انكتبت بيه!
تاني غير اللي كان شايفه من فوق في إعلانات الست هالة سرحان ، نورت مصر! :)
مصر هي بلاد العجائب التي لم يكتب عنها لويس كارول!
سلام يا نوارة يا قائدة جبهة التهييس الشعبية
ReplyDeleteانا بس عندي سؤال يستفزني
انتي يعني ما عندكيش حاجة غير المدونة؟
حرام عليكي كل ما آجي عشان أعلق على موضوع ألاقي 10 مواضيع جداد
يللا بارك الله فيكي ويارب يقويكي
انا بس كنت عايزة أعلق على موضوع المقال بتاعة الست البعثية دي انا نسيت اسمها
صدقيني يا نوارة ده موضوع مهم جدا جدا جدا
ولو كل الناس التفتت للي بتقوليه وفكرت كدة كان زماننا غير كدة خالص
وكمان بخصوص السيد حسن نصرالله واسباب حبنا ليه
انتي نسيتي سبب اساسي جدا جدا جدا وهو خصلة الشعر المتدلية تحت العمامة ولا انت ايه رأيك؟ مش ليها سحر رائع بردو؟
ومعلش استحملي الأخ المسي نفسو "مسلم" شوية، الناس اللي زي دي مكرسة حياتها عشان تقرف العقلاء وتنرفزهم ولما نتنرفز بيشعروا بالانتصار، وأتمنى انو يكون شايف اللي بيحصل في العراق اليومين دول من قتل للشيعة، هو يمكن حيقول ان الشيعة بينتحروا، عشان الشيعة بيقتلوا السنة وبيقتلوا بعضهم كمان
يللا الله يهديه ويهدينا لما فيه خير أمتنا
سلام وتحياتي الكثيرة لعقلك الجميل