حاجة غريبة قوي حصلت بخصوص التاج

فيه حاجة غريبة قوي حصلت

مصر هي أمي مرر لي تاج عشان احكي خمس حاجات ما حدش يعرفها عني

وكان ردي إن مافيش حاجة ماحدش يعرفها عني

وانا باتفسح ع النت لقيت مدونة كاريكاتوز ولقيته قال تلات حاجات

كل الناس تعرفها عني

زي إن كان عندهم مدرس سموه سركاريا

واحنا كمان كان عندنا مدرسة وفي اولى ثانوي وكنا مسمينها سركاريا

وزي انه بيكلم نفسه بصوت عالي

والحقيقة كل الناس تعرف اني باكلم نفسي بصوت عالي

وماما لما تفتح عليا الاودة وتلاقيني باكلم نفسي تقفل تاني وتسيبني

وزي إنه بيشغل أغنية ويعمل كأنه هو المطرب

وكل الناس تعرف إني باعمل كده

بس هو بيلبس بدلة الخطوبة

أنا ما عنديش بدلة خطوبة

ده اول فرق

تاني فرق إن كل الناس تعرف عني المعلومات دي

تالت فرق إني بالإضافة للحاجات دي

وأنا صغيرة كان نفسي أطلع رقاصة

وكنت مصممة لدرجة إن أهلي اتخضوا وخدوا الموضوع بجد

وقعدت أقنعهم إني مش ح اشتغل في كباريهات ده انا ح اشتغل في فنادق خمس نجوم

وح اعمل أفلام تكسر الدنيا

ولحد دلوقت باحب الرقص والرقاصة اللي بترقص حلو زي نعيمة عاكف وكاريوكا وفريدة فهمي

احترمها احترام بالغ

والرقاصة اللي بترقص وحش زي فيفي عبده ولوسي ودينا

باحس إنهم بيهينوني أنا شخصيا

بس دي برضه حاجة كل الناس تعرفها عني

حتى اصحابي اللي كانوا بيلعبوا معايا وانا صغيرة

عارفين ان كل واحد كان بيبقى عليه دور يألف قصة اللعبة اللي ح نلعبها

كل واحد يألف قصة شكل

اللي يعمل العصابة والبوليس

واللي يعمل مدرسة وأولاد في الفصل

واللي يعمل حفلة شاي

واللي يعمل إننا رواد فضاء

ولما يجي الدور عليا اقول لهم أنا رقاصة

وباشتغل في كباريه وفلان البلطجي بتاعي

وفلانة المغنية اللي بارقص على أغانيها

وأعمل كل مرة قصة رصيف نمرة خمسة

وعشان ما يزهقوش من القصة هي هي

باعمل لكل واحد فيهم دور شبه الحاجة اللي بيحبها

حتى لما كانوا هم اللي بيألفوا

لازم أقول لهم وأنا أعمل دور رقاصة

حتى في قصص رواد الفضاء

كنت أقول لهم

ونحط في القصة إن فيه رقاصة طلعت معاكوا رحلة رواد الفضاء

بس الحقيقة ما جاتش فرصة أطلع رقاصة

ولما وصلت للإعدادي

قالوا لي إن الرقص عيب

واللي بيشتغلوا رقاصات دول بيبقوا ستات مش كويسة

فاكتفيت بأني أتفرج على الرقص في التلفزيون وبس

عشان كمان قالوا لي إن ما يصحش واحدة مؤدبة زيي تروح مكان فيه رقاصة بترقص ع الحقيقة

والحقيقة برضه أحسن

بدل ما أقل عقلي وأقوم أرقص معاها

ولحد دلوقت باتضايق من الرقصات الجداد لانهم
بيتعاملوا مع الرقص على انه وسيلة لاثارة الغرائز مش على انه فن

بس يا مصر هي أمي دي مش أسرار

كل الناس تعرف عني الكلام ده

اقصد كل اللي يعرفوني

كمان كل اللي يعرفوني يعرفوا إني باحب أغني قوي

وإن صوتي وحش قوىىىىىىىىىىىىىىىىىىىىىىىىىىىى

ومرة رئيس القطاع دخل عليا وانا باغني

في الشغل

بص لي بذهول فبصيت له بألاطة وثقة

وقلت له: معلش يا أستاذ حسن أنا ما اقدرش أشتغل من غير ما أغني

فضحك وقال لي: خلاص يا نوارة غني

الأستاذ حسن اتحال ع المعاش

ودلوقت فيه مديرين جداد

موقفين علينا واحد يكتب أسامينا ويراقبنا طول الشفت

واحد منهم كتب إني باضحك وأغني بصوت عالي

بس معلش

أنا واخدة اذن من رئيس القطاع السابق

والعقد شريعة المتعاقدين