Monday 1 August 2011

الجيش والشرطة والشعب واللجان الشعبية وبعض المعتصمين ايد واحدة

دي شهادتي على عملية فض الاعتصام ومش عايزة حد يقرف في امي انا لسه راجعة، انا بس بادون اللي حصل قبل ما انساه 
امبارح لاول مرة من تلات اسابيع انام في سريري، بس نمت نووووووم.... وكتير، وعلى بعضه، اول مرة انام كتير على بعضه
وبعدين صحيت الصبح قعدت اتوت واستظرف على خلق الله، وبعدين اخدت قرار اني اقف على البوابات، عادة مش باحب اقف على البوابات عشان حكيت لكم انا باتحول الى صندوق الدنيا او دبابة جيش من اللي العرسان بيتصوروا جنبها، بس قلت النهاردة حاقف على البوابات عشان الناس صايمة واخد ثواب اني اقف في الوقت ده اللي ماحدش عنده قوة يقف على البوابة فيه
مش معايا ساعة بس رحت قبل الهجوم مباشرة، لقيت عربيات شرطة عسكرية مرشقة في كل مكان وعربيات امن مركزي مرشقة في كل مكان دخلت من عبد المنعم رياض لقيت البوابة فيها عدد قليل وبيقولوا لي ابعتي لنا ناس جالنا اخبارية ان الامن المركزي جاي.. دخلت لقيت الناس بتصفر بتصفر رحت على مكان الصفافير عند بوابة باب اللوق لقيت عربيات امن وعربيات شرطة عسكرية وناس خرجت برة البوابات تمنعهم رحت خارجة برة وقلت لهم تعالوا عايزين ناس عند عبد المنعم رياض، فواحد قال لي يا نوارة خلي الناس هنا ولمي ناس من جوة، دول واقفين بيحموا البوابات، قلت له دول برة، قال لي ماهم عشان يمنعوهم يقتحموا، فقلت له طيب، ورحت الم الناس من جوة والف واجعر: اللي قاعد ما بيعملش حاجة يروح عند عبد المنعم رياض، الناس اتلمت عند عبد المنعم رياض لقيت صفافير وطبول الحرب عند بوابة طلعت حرب، رحت عند بوابة طلعت حرب لقيتها مهوية فبرضوا مشيت اجعر واقول: ماحدش يقعد في الخيم، تعالوا نوزع نفسنا عند البوابات، وانا بالف لقيت بوابة القصر العيني ومحمد محمود مهويين والناس بتصفر عندهم الناس جريت على البوابتين وبعدين صفافير من طلعت حرب فجريت على بوابة طلعت حرب وانا بارضه باجعر: ماحدش يقعد في الخيم.. ماحدش يقعد في الخيم، فواحد قاعد في الخيمة راح مزعق لي: ايه يا نوارة؟ في ايه؟ ما ردتش عليه طبعا يعني مش وقت خناق.. بس الشهادة لله كل الناس اللي ساعتها كانوا موجودين عمالين يقولوا لي يا نوارة، ييجي واحد يقول لي انت مشهورة اقول له اتلهي على عينك، اشمعنى مشهورة في الاعتصام ومش مشهورة برة الاعتصام؟ ماحدش يعني بيوقفني في الشارع ويمضيني على اوتوجرافات ولا حاجة، ده هو حتة برنامج غلبان في قناة التحرير مرة في الاسبوع وتقريبا ماحدش بيشوفه غير اصحابي
المهم، بصيت حواليا اشوف انهي بوابة مهوية اكتر حاجة عشان اقف عندها، لقيت طلعت حرب مهوية رحت اقف عندها، جه هشام يسلم عليا وقال لي على فكرة تشكيلات امن مركزي جاية عليكم، حتسألني مين هشام حاقولك مالكش دعوة، واحد اعرفه وخلاص، ده مش وقت اسئلة، طبعا الناس على البوابات عمالين يقولوا لي ارجعي يا نوارة ورا، وانا مش باسمع الكلام، وبعدين كان فيه ناس واقفين على الرصيف وساندين على السور الاخضر ده، منهم واحد راح برضه منادي عليا: يا نوارة اتق الله... فواحد من المعتصمين - اللي طلع معتصم مش تحريات عسكرية - قاله: مالك ومالها؟ ماهي متقية الله.. وانا ما ردتش عليه طبعا
بعدين فوجئت بخبط عند بوابة باب اللوق رحت ابص لقيت من ورايا مدرعات جيش دخلت الميدان رحت ابص عليهم لقيت حد بيسحبني من ايدي بابص لقيته محمود زغلول، لسه بيسحبني بعيد عن مدرعات الجيش اللي دخلت - تقريبا من عمر مكرم - لقينا مدرعات داخلة من باب اللوق، جينا ننتحي جانبا تجاه هدى شعراوي لقينا الامن المركزي داخل، والناس واقفة تصقف وتقول هييييييه.. الله اكبر... الله اكبر... الجيش والشعب ايد واحدة.. الجيش والشعب ايد واحدة... رحنا واقفين بقى، حنعمل ايه؟ بعدين محمود لقيته بيسحبني ودخل بيا في الشارع اللي هو متفرع من طلعت حرب وفيه عربيات كتير ده، مش عارفة اسمه ايه، باقوله انت واخدني فين؟ قالي انا عايزك تمشي عشان عايز ارجع الميدان، قلت له لا انا حارجع الميدان، قالي انت وشك معروف، قلت له ما انا مغطية وشي بالطرحة.. اه نسيت اقولكم، غطيت وشي بالطرحة عشان كان فيه قنابل مسيلة للدموع عند محمد محمود، المهم فضل يزن عشان يمشيني وانا ازن عشان اقعد راح داخل بيا في شارع باب اللوق، قلت له انا عايزة اخش الميدان، فضل يشدني ومعاه واحد تاني كان جاي من جوة، لقيت واحد ما اعرفوش فجأتن قال: خشي يا استاذة نوارة.. خشي انت نجمة.. لازم تخشي.. بصراحة استفزني، هو مال اهله اصلا، ومحمود زعق له، المهم سهيت محمود والشاب اللي معاه ومشيت ناحية الميدان راح محمود لاحقني، حاولنا نخش الميدان لقينا الشرطة العسكرية قافلة الميدان، وشفت واحد بيتقبض عليه شكله غلبان، وعربية شرطة عسكرية فيها اتنين شكلهم نشطاء - اللي هم العيال المطولة شعرها دي - وبعدين محمود فضل يدور على واحدة اسمها منة، لقيناها في الاخر، قالت لنا ان اللي في عربية الشرطة العسكرية ده اسمه موسى، قعدت انا ومحمود نحاول نخش الميدان مقفلينه من كل ناحية، وناس عمالة تقول الجيش والشعب ايد واحدة وظابط جيش بيصورهم وبيشاور لهم عشان يعلوا صوتهم، وستات عادية من المحجبات التخان دول، عمالين يقولوا علينا احسن احسن.. تميم جه ياخدني، فمحمود ما صدق قالي امشي انت معاه وانا حاجيب منة لانها تاهت مني تاني، فضلوا يقبضوا على الناس، وشايفين وشي وما قبضوش عليا، ومعايا تميم ما جوش ناحيته، وعارفينا بدليل انهم كانوا بينادونا باسامينا، تميم قال لي ده فيه ناس متحاصرة عند مسجد عمر مكرم، قلت له طب اروح لهم، فضلنا ماشيين، كل ما نيجي نخش من شارع نلاقيهم قافلينه بالامن المركزي، بقينا ندخل شوارع جانبية، يسلم علينا ناس شكلها غريب وعايزين يتكلموا ويسألونا انتوا رايحين فين؟ وبعدين يسيبونا، فضلنا نحاول نخرم من شوارع جانبية عشان نوصل لمسجد عمر مكرم لا عرفنا ننفد من اي شارع، ولا حد قبض علينا مع اننا كنا مقطورين، ومقطورين ايه؟ شعب كامل ماشي ورانا ونبص لهم يبتسموا لنا ويفضلوا ماشيين ورانا، وتميم يقول لي: يا رب يقبضوا علينا، دي حاجة كويسة في مصلحة الاعتصام هههههه، بعدين تميم قالي تعالي البيت الاول ارتاحي شوية وننزل تاني، رحنا البيت بعد شوية كلمني احمد زين وقال لي انه عند مسجد عمر مكرم وانهم بيدخلوا يجيبوا الناس من جوة، بس اللي فهمته من احمد زين انه مش اقتحام، بس بيخشوا يجيبوا الناس، واحمد كان معاه علاء سيف، احمد بيقول لي ان فيه واحد قالهم انتوا حيتقبض عليكم، ومسكوا علاء وسابوه بتاع تلات مرات، بعدين لقيت علاء على التويتر بيقول مين قال اني مستهدف؟ ما فضلت اعدي قدامهم ما عملوليش حاجة، فشوفوا بقى علاء روايته ايه بالظبط عشان انا ما شفتش بعيني، بعدين احمد قال لي ان فيه شوية دخلوا يحتموا بالمجمع فموظفين المجمع سلموهم للشرطة العسكرية، وان فيه حوالي 20 من اهالي الشهدا معاه دلوقت وان الشرطة العسكرية ضربتهم، واعتقلوا شوية منهم، بعدين محمود كلمني وقال لي انه تحت البيت، فنزلت انا وتميم لقيناه هو ومنة، وبعد شوية جم ولد وبنت مش عارفاهم، ومنة راسها والف سيف تروح ميدان التحرير تاني، فتميم قالها لو فيه حد لازم يروح يتفقد ميدان التحرير يبقى انا ونوارة عشان لو اتقبض علينا حيتعرف الموضوع والدنيا حتتقلب، لكن انت لو حصل لك حاجة ممكن ما يعملش مشكلة، رحت انا وتميم عشان نعرف نوصل للميدان ابدا.. وماشي ورانا موتوسيكل قاطرنا خطوة خطوة، لدرجة بقينا بقى نخش في اي شوارع عشان نشوف ايه حكايته نلاقيه ماشي ورانا، رجعنا ما لقيناش محمود والشباب، طلعنا البيت، تميم قعد يأتت فيا شوية، ودكتورة رضوى تسكته وتقوله مش وقته الكلام ده، وعمو مريد يطيب خاطري، بعدين شرحت له وجهة نظري، ما عجبوش كلامي دخل نام، شوية واحمد زين اتصل بيا وقال لي انا تحت البيت، عمو مريد نزلني عشان يتأكد اني في امان، نزلت لقيته مع ميار ولقيت وليد ومعاه كام حد جايين من شارع جانبي، ووليد متصاب في ضهره بعصايا، وبيقول لي ده فيه عيال من اللي كانوا معتصمين معانا اول ما حصل الهجوم لبسوا الخوذ، ابراهيم فين وفين بقى على ما صحي ههههههههههههههه هم يضحك وهم يبكي، كلمني عشان يطمن عليا، لقيت ليلى حسن سليمان برضه جاية مع خطيبها وبتقول الناس بقت تزقنا على الشرطة العسكرية وتسلمنا لهم وهم يسيبونا، بعدين مشيت مع احمد وميار لحد ما وصلنا عربيتي، لقيتهم زقوها بعيد عن الميدان، ركبنا العربية ووصلت ميار لمكان ركنتها واحمد نزل ياخد تاكسي، بعدين قلت اخد لفة في الميدان... من اول ما دخلت الميدان بالعربية، لقيت عيال كتير انا عارفاهم من اول يوم معانا في الاعتصام، معاهم شوم - من ضمنهم عيال كانت طردت الباعة الجائلين، عارفاهم بالشكل كويس عشان كل مرة كانوا يتخانقوا مع البياعين، ومن ضمنهم عيال كتير من بتوع: يسقط المشير، وفيهم اتنين من اللي كانوا سخنانين على قفل المجمع، ومنهم عيال كتير من اللجان الشعبية بس كل دول لابسين جيش مش حاجة تانية، اه والامن المركزي كان حونين قوي، كان ناقص يحضر لنا الرضعة ويكرعنا، اللي اتغابى علينا الجيش والناس اللي طلعوا انهم مش ناس، بس كان فيه ناس ناس وكانوا بيتغابوا علينا برضه - المهم ان المعتصمين دول لابسين جاكيتات جيش وخوذ، وفيه منهم عيال على الموتوسيكلات، كتير كتير كتير.. كتير قوي، تقريبا الاعتصام كله عدا انا واصحابي واهالي الشهدا، فقرا واغنيا، لابسين الجاكيتات دي والخوذ، وعربية زبالة بتنضف الميدان، والعيال اللي على الموتوسيكلات عمالين يلفوا حوالين الصينية ويعملوا: تيت تيت تت تييييت.
المهم انا كنت فاكرة ان لينا ومنى سيف مشيوا لانهم كانوا بايتين، فتوقعت انهم يروحوا الصبحية دي يرتاحوا، حتى تميم سألني عليهم قلت له دول في البيت.... اتضح انهم كانوا موجودين، هم كده ما ناموش خالص، بعدين محمد قاسم بعت لي رسالة: امشي من الميدان بيقبضوا على الناس. بعدين فضلت الف شوية، ماحدش قبض عليا ولا حاجة، يمكن عشان كنت في العربية، بعدين مشيت قلت افطر مع امي بقى، رحت اشتري سجاير وقلت لبتاع الكشك فضوا اعتصام التحرير، قال لي: اه.. احسن.. قلت له: احسن ليه؟ قال لي: سادين السكة واحنا رمضان، قلت له: انت عارف ايه اللي عمل المشكلة؟ المشكلة ان اهالي الشهدا الفقرا ما اخدوش حقهم، والظباط اللي قتلوا عيالهم بيشتغلوا لسه ولا اتوقفوا ولا اتحبسوا، وواحد قال لي: اللي قتل ابني جوة في القسم باروح واجي عليه.. اعمل ايه بقى؟ اخد حقي بايدي؟ بعدين جات الشرطة ضربتهم يوم 28 فالناس سخنت ونزلت لهم، وجه يوم 8 يوليو كان الناس سخنانة عشان اهالي الشهدا، بعدين اعتصموا والاعتصام كان كويس، بس جات قوى سياسية نحت اهالي الشهدا وطلعتهم برة الصورة، وبقت المنصات تتكلم عن مطالب القوى السياسية الدستور والمواد فوق الدستورية والناس تتكلم باسمنا زي ممدوح حمزة وبقى اهالي الشهدا واللي نزلوا تضامنوا معاهم مركونين على الرف واللي واكل الصورة هي القوى السياسية، فالناس انفضت عن الاعتصام، جم الاسلاميين نزلوا يوم 29 يوليو وقالوا يا مشير يا مشير م النهاردة انت امير فادوا شرعية للمجلس، وكان اصلا الاسلاميين نازلين يتخانقوا مع القوى السياسية ومالهمش في موضوع الشهدا ده زي ما القوى السياسية ما جابتش سيرتهم ولما نجيب سيرتهم ونقولهم يا جدعان ده اعتصام اهالي الشهدا يقولوا لنا كفاية متاجرة بدماء الشهداء! يعني حتى ولا عايزين يسمعوا سيرتهم.. لو الف كلب ماتوا ما كانوش عملوا كده، وعليه العوض ومنه العوض في اللي راحوا، احنا لو حكمنا بعد كده واحد وادانا بالجزمة القديمة وعمل فينا اوسخ من اللي عمله مبارك يبقى له الف حق.. احنا ناس مش باكيين على اللي ماتوا منا ومفرطين في دمهم.. فقال لي: معاكي حق.. ربنا يرزقنا بحاكم عادل.. قلت له: مش حيرزقنا.. انا باقولك اهو... طول ما كل واحد بيفكر في نفسه ومصلحته وماحدش سائل عن اللي ماتوا ربنا مش حيرزقنا الا بمصيبة تشيلنا ويعاقبنا على اللي فرطنا في دمهم دول.. ورحت ماشية وسايباه، رحت كشك تاني اشتري كروت شحن ورحت فاتحة نفس الحوار: فضوا اعتصام التحرير.. لقيت البياع بقى المرة دي ثوري: هو بعد اللي حصل في العباسية فيه كلام يا انسة؟ انت عارفة ساعة ما كنا في العباسية كان فيه ناس من اللي قالوا لك لازم نعتصم ونقعد في ميدان العباسية وما نمشيش.. فاكراهم؟ قلت له ايوة، اتخانقت مع واحد فيهم ابيض كده وطول بعرض وقلت له انت مين انا مش عارفاك؟ قال لي: اهو ده بقى تحريات عسكرية في سين 28.. لما لقيت ان نص المظاهرة طلعوا بيشتغلوا في سين 28 وعاملين ثوريين وبيحدفوا طوب على الجيش ولقيت شوية منهم كانوا معانا في الاعتصام قفلت من الاعتصام وما رحتوش تاني.. طلع كان معتصم معانا يا عيني
اتصل بيا احمد حلمي وقال لي: انا والله مشيت الساعة ستة الصبح من الميدان.. قلت له: انت مش مضطر يا احمد تبرر انك مشيت.. ام المزايدات دي بقى انا زهقت.. في عز ما بننضرب ناس تقول امال فين فلان؟ وناس قاعدة على التويتر مالهاش تلاتين لازمة عمالة تزايد علينا، وواحد يزايد عليا اني ما اتصابتش ولا اتقبض عليا.. فاحمد قالي: طب بس اهدي.. احنا لازم نعمل حاجة، مش ممكن الناس تنضرب تمشي كده، قلت له: شوف كده حتعملوا ايه وبلغني
بعدين منى سيف كلمتني عشان تطمن عليا، قلت لها: يا منى الاعتصام كله لبس خوذ وجاكيتات جيش.. ايه ده؟ قالت لي: عارفة.. شفتهم، قلت لها: طب ايه؟ الشعب كله بيشتغل مع الجيش ولا... استني استني.. فاكرة يا منى لما قالوا الجيش في حالة استنفار وعمل استدعاءات لناس كتير؟ قالت لي: قصدك ايه؟ قلت لها: هو كده.. عملت استدعاءات للمجندين عشان يشغلهم علينا.. اي حد تعرفيه اتجند في الجيش بقى حرصي منه.. ما تتعامليش غير مع اللي عنده التصاق في الفخذين
بعد شوية اتصلت بيا ميار وقالت لي: فيه واحد اسمه احمد جيفارا اتصل بيا وقال لي ان فيه 200 اسم مطلوبين واسمك فيهم ما تنزليش التحرير، قلت لها لو عايزيني حيجولي البيت، قالت لي ما انا سألته قال لي لا، هم مش حياخدوا حد من البيت هم حياخدوا اي حد من الميتين اسم دول لو نزل التحرير.. قلت لها طب هاتي لي بقية الاسماء.. قالت لي حاحاول حاضر. وانا مستنياها تجيب لي الاسماء
اه صحيح.. نسيت اقولكم:
كان فيه واد بدقن عند بوابة باب اللوق لما الجيش كان قافل الميدان عمال يقول للناس: احنا مشينا يوم الجمعة.. اللي فضلوا دول البلطجية
انتهى
والله الموفق

63 comments:

ماجد الجلاد said...

كل ما نثق فى حد ناخد خاذوووق وناخده مغرررى كمان
دى مؤامرة كبيرة بتنفذ وهتنهى بمحاكمة الحقير مبارك فى الشهر المبارك فياخد حكم مخفف أو يطلع براءه والناس هتقول ارحموا عزيز قوم يا عينى وخلص الحوار..

لو عندك وقت ابقى اقرى البوست ده

http://teain50.blogspot.com/2011/07/blog-post_28.html

Unknown said...

ربنا معاكم مجلس الغربان شكلة حيلبد كتير :(

maomran67 said...

ياريت الشعب بعد كده ما يرجعش يعيط

وجهة نظري said...

واضح الكلام جداً

sabrafamily76 said...

ربنا هيعقبنه بذنب الشهدا دول وأهاليهم .بس أنا عن نفسي ربنا يشهد عليا مش موافقة عن إلي بيحصل ده وبحاول اوعي الناس .بس أنا كل إلي صعبان علي هي مصر إلي هينزل عليها غضب ربنا بسبب قلة من العبيد إللي يبكون جلاديهم لكن المشكلة انهم مسيطرين على المال و الإعلام وبيضللوا بقية الناس .المشكلة إن الاسلاميين كمان إلي الواحد كان فكر انهم ذاقوا الظلم ومش ممكن يظلموا الناس بقوا نسخة طابق الأصل من الحزب الوطني .

utopia said...

رمضان كريم على الكريم بس
كان واضح يا استاذة من زمان كلام الراجل بتاع الكشك التانى من الخناقات كل شوية والبلطجة علبوابات والمزايدات من غير سبب
وانتى كنتى عارفة ده وبتقوليه
لازم تعترفوا انكوا وقعتوا فى فخ اتنصب
ناس كتير وانا منهم مشينا من الاعتصام بنفس السبب .ارجوكم النشطاء هما اللىبيقرروا يبقى يقرروا بهدوء ومن غير انفعال ....لو الاعتصام اتنقل لمكان تانى بعيد عن الطريق يكون افضل مؤقتا لغاية ما يتجهز لرد هادى وعقلانى ...وياريت النشطاء ينزلوا للناس بقا انا عارف والله انهم نضاف بس مش بينزلوا ليه مثلا يعرفو الناس ايام الجمع مثلا بعد الصلاة بالشهداء واللى عملوه وحكاية كل شهيد ويفهموهم
غلط الناس تتساب للتلفزيون الاعلام بيغسل اكثر نظافة والموضوع محتاج تنظيم وحركة الناس هاتنام ...الحقوا نفسكم واتفقوا مع الاخوان على تعديل قانون الانتخابات المشبوه ولو ما رضيوش افضحوهم ...الفرص بتضيع والثورة معاه
ربنا يستر من ولادك عليكى يا مصر

علاء said...

على العموم تانى مرة اخدمك مع انى كلبت منك تنشرى اسامى العملا وامن الدوله اللى فى الميدان المهم انتى ما اتقبضش عليكى علشان انتى معروفه وناشطة واللى وصل للمجلس من كل الحركات ان اللى مش هيمشى بلطجى والبيعه كله معموله عشان الميدان يفضى والناس تفرح انه فضى ومعظم اللى صرفوا فلوس على اللجان الشعبيه تبع المجلس واستعراض السلفى كان كفيل انه يرهب اى ناشط ويقول حسبى الله وبس فهمتى

علاء said...

ضمنهم عيال كتير من بتوع: يسقط المشير، وفيهم اتنين من اللي كانوا سخنانين على قفل المجمع، ومنهم عيال كتير من اللجان الشعبية بس كل دول لابسين جيش مش حاجة تانية، اه والامن المركزي كان حونين قوي، كان ناقص يحضر لنا الرضعة ويكرعنا، اللي اتغابى علينا الجيش والناس اللي طلعوا انهم مش ناس، دا كلامك وانا قلت ليكى ان اللى فى الميدان وبيعملوا كدا دول شغلانتهم انهم يبوظوا شكلنا وطلبت منكم تنشرى اسمائهم

hardway said...

أيه الكلام الكتير ده..وكله مالوش لازمه
وأيه الاسماء دي كلها..منه..ميار..لينا ومني..كل ده كان بينام في الميدان..معقول ده الواحد حمار انه منزلش الميدان.....
نرنر أنتم نازلين تاني...ياريت ياريت
خليها بعد رمضان...وكتر ي من الحلو..الخناشير خليهم في البيت........
وأنت مستغربة جدا ان الاهالي بتسلمكم للشرطة العسكرية..انت باين عليكي عبيطة وصدقتي انك ثورجية وصاحبة الثورة..
روحي ونامي في سريرك ..ماحدش عايز منكم
اي شئ
الا اذا كانت هذه وظيفة ولقمة عيشك منها

BestItalianPizza said...

و الله الشعب اللى يسيب الثوار دول لوحدهم يستاهل يتحكم بأوسخ أوسخ أوسخ من مبارك

ahmedfito said...

المشكلة ان شباب برئ بيتعامل مع تعالب فكرهم شيطانى ومايعرفوش ربنا
واظاهر كده ان الامل الوحيد فى ظباط الجيش الشرفاء اذا كان لسه فيه حد شريف وبيتقى الله

وحسبنا الله ونعم الوكيل

nosseir said...

يا نوارة انتوا بتعرفوا تسوقوا عربيات كويس بس مش بتعرفوا تدوسوا فرامل..والنتيجة لبستوا النهاردة فى الحيط

EG25's said...

hardway , الواد ده وسخ اوي
نواره .. فين اتحادكم ؟؟
فين النظام .. فين الرد ؟؟

EG25's said...

hardway انا اول مره بشارك هنا لاجلك وبس عايز اقولك شوفلك حاجه عدله اعملها دانت امك واختك ومراتك وبنتك مش هايفلتو من اللي انت بتعمله ده ربك يمهل ولا يهمل
نواره : فين النظام .. فين الرد انتوا تايهين من بعض
لا يضيع حق ورائه مطالب و لسه في ناس كتير ساكته ناس كتير من اصل الثوره مستنيه يومين

hayat ank said...

الواد اخويا بقله الجيش ضرب فى الناس المعتصمه قالى يستهلوا انا بروح وصحابى كمان الموجودين هم الاعه الجائلين وبتوع العرقسوس والمانجه الى كانوا بيتخانقوا مع المعتصمينوشويه البلطجيه والجيش دخل علشان الموجودين مش ثوار دول بلطجيه وبتوع التحرير دول موقفين حال البلد انا حالى واقف من ساعه الثوره الحل فى ان الثوره توصل للنااااااااااااااااس وتحس بيهم النشطاء قبل كده الى حموهم الناس والثوره الى حمتها الناااااااس والناس هى الى بتخوف الجيش والشرطه ارجعوا تانى للناس الناس هم الحللللللللللللللل

كيوبيد said...

اولا حمد الله على سلامتك ثانيا مستحيل من 4المستحيلات ان الشعب يكون مع المجلس ايد واحده الجيش اولادنا صحيح لكن عملين زى الجماعة لا اسلامية كده متربى على عقيدة السمع والطاعه .مش موضوعنا ده المهم دلوقتى هو الشباب الى راحو عايزين حد واصل كده وله كلمة مسموعه عن البشرية دى وله اتصالات يدخل لهم احسن بكره الصبح القى لهم قضية فى النيابة العسكرى لازم ضغط ومن اليلة دى على المجلس اما بخصوص الاعتصام انا لية راى ناخد الشهر ده استراحه ونرجع بعد منه احسن الجماعات ايه تقول علينا مش بنصوم ولا بنصلى فية الميدان موجود وكمان علشان نركز مع المخلوع ونشوف محكامته ريحه على فين هو كمان مش يمكن نلقى واخده براء وطالع لينا زى العفريت تانى ومش بعيد مراشح نفسو كمان نواره الى عايزك تكونى متاكده منو ان الشعب ده خلاص خراج من عباية الخوف والقهر ومش هايرجع له تانى باذان الله

hayat ank said...

الجييييييييييييتيييييييييييييييش ولالالالالالالالالالادالوستيييييييييييييت الى اعدتى تهليلى ليهم شهور وبلغتى عن الضباط فنزلوا فضوا الاغتصام بالقوه ومن ساعتها بقت عاده عندهم يضربوا ويسحلوا فى الناس وفى الاخر يطلعوا بكام كدبه يضحكوا بيها علينا ويسدقوا نفسهم

أبو أمك said...

حمد الله على السلامة
بس أنا معنديش اوتوجراف
ممكن تمضيلي على ورق العنب ؟

Tarek Mohamed Abdel Hady said...

انتي مصدقة نفسك يا نوارة؟؟ يا بنتي انتو فقدتوا الشارع خلاص.. مفيش أي شعبية ولا أي تعاطف من الشعب.. انتي ورطتي نفسك قوي واتمطعتي قوي في المطالب وفي التهجيص وفعلاً كان تهييس عالي قوي..

rasha2210 said...

بلاش رنة ياس فالله متم نوره و ريحوا شويه و بعدين نواصلوا باذن الله، و حاليا قلوبنا معاكم و مع الحق وفي اللحظه اللي ربنا رايدها
حتلاقي الناس شحم و لحم قدامك

Tarek Mohamed Abdel Hady said...

انتي صدقتي نفسك يا نرنر؟؟ انتوا بجد مش أذكياء خالص.. انتو فقدتوا كل تعاطف وشعبية بين المواطنين.. مبقاش حد معاكو غير العلمانيين والنشطاء اللي شعرهم طويل ودول يا عيني سيس قوي ومكروهين قوي.. لمي الدور بقى وشوفي حاجة تانية غير موضوع الاعتصامات اللي ريحتها بقت وحشة زي البكابورت

Gamal Abdel Hamid said...

حسبى الله ونعم الوكيل

Anonymous said...

bullshit viva islam

شوقية said...

ازاي اهالي الشهدا ما اخدوش حقهم امال الشيك ابو 30 الف اللي اتكلم عنه الفنجري ده بيعمل ايه
واللواءات اللي اتشالت من الداخلية
حتي مبارك وكلابه هايتحاكموا الاربعاء

وعلي فكرة مش انتوا لوحدكم اللي نزلتوا ايام الثورة احنا شارعنا كله كان نازل في ميدان الممر في الاسماعيلية فمش عايزين مزايدة من حد يطلع يتنك ويقول المعتصمين دول هم اللي جابولك حقك وانت قاعد في بيتكم

المشخصاتي said...

ياريت الناس تقرأ مقالة علاء الاسواني النهارد ة..

mutargim said...

http://al-agenda.blogspot.com/2011/07/blog-post_31.html

ياسر كامل said...

شعب يستاهل حكامه فعلا

elzahraamegahed said...

شوقية

ده كان اعتصام (بعض) أهالى شهداء الثورة الذين لم تعترف بيهم الدوله كشهداء وده بسبب إستشهاد أبنائهم أمام أقسام الشرطه ولذلك اعتبرتهم بلطجيه

والمشكله الحقيقيه إن عدد بسيط جدا من أهالى الشهداء هما اللى معتصمين (لأن شهداء الثورة تجاوزوا ألف والمختفين كذلك أكتر من ألف) وعدد ضعيف جدا من الثوار متضامن معاهم ، والعدد كان حوالى 670 فرد معظمهم شرطه عسكرية

ربنا ما يكتبهاش علينا ماحدش عارف أهالى الشهدا دول بيهم ايه... لكن أرجو أن ربنا يصبرهم ويحتسبوا ولادهم شهداء عند ربنا كباقى أسر الشهداء التى لم تعتصم وإن شاء الله الثوره لما هتنجح بإن سلطه مدنيه منتخبه تيجى للحكم كل أوامر الثوره هتتنفذ

وده اللى المفروض نركز عليه وهو إننا نحشد ضد صلاحيات للمجلس فى المواد الحاكمة للدستور وإننا نحمى الانتخابات من أى تزوير محتمل بدمنا

AYMAN said...

حقوكوا ياعم مصلحه بالدولار وكمان ميار و لينا و مني..كل ده كان بينام في الميدان طبعا لازم تستقتلوا بس والله لو رجعتوا تانى الناس هيه اللي حتديكوا بالجزم وبعدين تسلمكم للشرطة العسكرية..

ساعي الخير said...

اللهم صلي علي النبي اللهم صلي علي النبي

مبدئياً يعني الأسلام يعني العدل

و مطلب الناس كلها و قصدها

هو العدل

الليبرالية برضه بيقولوا عدل

و عدالة اجتماعية

يبقي فين الخلاف

الخلاف في التفاصيل

يعني اللي عايزين الأسلام هيعملوا ايه

بالضبط

و اللي عايزين الليبرالية هيعملوا ايه بالضبط

و بعدين المطالب التوافقية هي

اللي تخللي الناس تحب شغلها

فيزيد الأنتاج

بمعني توفر السلع و فرص العمل

بمعني زوال البطالة و الأجور المحدودة

بمعني اتقان العمل في رصف الشوارع

و المنشآت و بمعني خدمات أفضل

في المستشفيات و أماكن الخدمة العامة

بمعني بساطة الأجراءات

و قلة الممنوعات و المخالفات

بمعني قلة التراخيص

بمعني قلة الرشوة

و نهاية قلة الذمة

و قلة الأدب

يا نوارة

لفي علي العمال و الموظفين و التجار

و البياعين أنتي باين عليكي بتلفي

علي الناس الغلط

اللي بيحكوا في حاجات عجيبة

ما تفرقش مع الناس

عموماً

مطلب توافقي

أن السلام ما يتفرضش بالعافية

في صورة حجاب و لحية

أو مناهج بعينها

ما يتفرضش

بجماعة زي هيئة الأمر بالمعروف في

السعودية

و كمان الليبرالية

ما تتدخلش في حياة الناس

بطريقة مستفزة

و تفرض منع ختان و غيره

ممكن تلفي علي النخب

و تطلبي منهم أن كل واحد يسجل

مخاوفه من اي طرف

و تروحي بيها لكل الأطراف

تخليهم يأمنوا بعض من المخاوف دي

و كل شئ بالأتفاق

و كل أتفاق لابد يتكتب

و يتوقع عليه بشهود

و فجأتن تلاقي نفسك عملتي

من غير ما تدري

وثيقة شرف

فوق دستورية

فوق بدنجانية

اهي وثيقة تعاهد ع الخير

توضح الأمور

و قولي للسلفية و الأخوان أن دي

زي حزب الفضول

و هم هيفهموها

و بعدين دي هتبقي زي اتفاق

علشان كل طرف يأمن الآخر

و بأنه لن يفرض عليه ما لا يرضاه

و عموما

الكلام ده بتاع النخب

لكن الغلابة و المساكين

اللي أنتي مطنشاهم

و مضيعة وقتك مع النخب

ليهم مطالب توافقية

اذا متحققلهمش

العدل في اقصر فترة ممكنة

من تلات لتسع شهور ع الأكتر خالص

بالنقض بالأستنئاف

بأول درجة و تاني درجة

بكلة كله

اذا متحقق لهمش شغلانة شريفة

بحد أدني للأجور

جنيه و ربع ذهب

و اذا ما اخدوش حرية التعليم

و العمل

و الله ليضربوكم كلكم بالجزمة

.... ينعل

و لا بلاش

ربنا يهديكي تسمعي للفقراء و المساكين

و تلمي الطماعين بتوع النخبة

سواء اخوان و لا ميبرالييين

و بلاش البوستعان دي

دي كلمة عيب الا اذا كان قصدك

تريقة علي عمر سليمان

و قولي كلمة الحق بقي

و الله كاميليا مظلومة

و من حقها تختار

دي الحرية

ما فيهاش فصال

بقي انتي

ما تخافيش من مبارك و لا اميركا

و هتخافي من محاكم التفتيش

انت ايه ما بتختشيش

أستهدي بالله كده

و أقصدي خير

و قولي كلمة الحق

للكل كليلة

و هي تعمر

Ahmed . M . Abdulrahman said...

!!!!!!!!!!!!!!!!!!!!!!!!!!!!!

ايه ده

ايه

مش عارف

هى الوساخه وصلت للدرجه دى

يعنى لما المجلس بيعمل كده فى اهالى الشهداء

امال حيعمل فينا ايه

لازم تعرفى حاجه المخطط دا شغال من اقبل فض هذا الاعتصام

بأسبوعين

فى الاقاليم

بنفس التكنيك

الكلام دا حصل فى بورسعيد

و فى اماكن اخرى

و القوى السياسيه الى انسحبت من الاعتصام

انا على ثقه انها كان عندها ولو خبر بذلك

و عدم وجود سيطره حقيقيه ع الاعتصام هى التى ادت الى هذا الاختراق البشع

بس دى مش نهايه الحرب

دى هزيمه فى معركه

الحرب لسه طويله

حسنى و عياله ورجالته و المجلس

وانتى عارفه مين الى وراهم

عاوزين حاجه واحده

ان المسئله تطبخ

دا الموضوع وصل ان القناه الفضائيه المصريه و كل الفضائيات المصريه

متقطعش المسلسلات بتاعتها ولا برامجها الى هى فى نظرهم اهم من دم الشهداء

و يجيبوا الخبر فى شريط

دا غير برامج النفاق شو الى بيعملوها

النهارده باذات كانوا نازلين شتيمه فى المعتصمين وتخوين فى الشعب


انا محصور بصراحه

يعنى انا لو مكنتش بكتبلك ع مدونه محترمه

كنت حكتب الفاظ ابيحه

بس هى خلاص بانت لبتها

وينجيب حقهم ينموت زيهم

الثوره لم تنتهى

نحن الان فى مرحله

ثوره بارده كالحرب البارده

لعب من تحت الطربيظه وضرب تحت الحزام

ولازم يعرفوا ان من يضحك اخيراً يضحك كثيراً

واحنا صامدون صامدون صامدون حتى الموت

وخلى بالك من نفسك العين عليكى دلوقتى

المرحله الجايه الى حيعملوها انهم حيلموا حناجر الثوره

وحيستخدموا سياسه الترهيب و الترغيب

المخابرات دول ثعالب خاصه العامه

سكتهم سكت موت

و التخطيت دا فى مسحه مخابراتيه

نص المجلس الى انتى شيفاه بهائم

باختصار المخابرات هى الذراع الطويله للجيش المصرى

اهنا مش عاوزين نقطع الذراع

احنا عوزين نقطع الدماغ

احنا عوزين المجلس

المجلس هو المتحكم الان فى اذرعه الجيش

بفكرك تانى

خلى بالك من نفسك واحنا معاكى

و الشعب مع الثوره

بس هو دلوقتى رجع لهيئته الاولى

طور الخمول ودا = كارثه

لانه ممكن يعد كده 30 سنه كمان

خلى بالك من نفسك للمره الثالثه

وبأى اتاكدى انهم مش مراقبين التليفونات

وربنا معاكى و معانا و مع اهالى الشهداء و مع الشعب

وسلام مؤقتاً يا نواره
_________________________
الى عاوزنى يجينى
http://misr25jan2011.blogspot.com

ساعي الخير said...

ازاي نميز بين الثائر و البلطجي

بكلمة الحق

مش بالطرمخة و سهر الميادين

بوضوح الهدف اللي يخدم الناس فعلاً

مش يستخدمهم وقود للثورة

و بعدين يحلقلهم

بطلبات ما تجيبش حق

ازاي احقق العدل بقضاء و قوانين فاسدة

طبعص هيطلعوا براءة

لأنكم أغبياء و انتي بالأخص يا نوارة

لا مؤاخذة يعني

حد يستحمي بمية مجاري

ده ايه ده

Anonymous said...

يااااااااااااااااااااااااااارب :((

Knight Revolution said...

نوارة انا كنت فالميدان من يوم الجمعه ومشيت يوم الاحد وجيت يوم خناقة البياعين و البلطجية اللي بيهاجموا الميدان من بره وقولتلك انا شوفت تدوينتك عن اعتصام بورسعيد واحنا اللي جايين نحميكم من بورسعيد

Knight Revolution said...

الى المجلس العسكري:يامن بالتحرير قد هتك فقد شرعيتك
شرعيتك غير شرعية واعلانك الدستوري الغير مستفتى عليه دليل
ولو الشعب مش عارف يبقى اهبل

Azeem said...

@hardway:

تصدق إنك واد مخنس وشرموط ..دول اشرف منك يا خول ..روح شوف حد يديك العود

خالد عبد الناصر said...

يا نوارة ..نعمل ايه ؟؟ انا ..عايز اشتغل ..انا زهقت .. واضح اننا لازم نغير استراتيجيتنا تماما.. و لازم نعرف ازاي نكسب الشارع و ازاي و ليه بقى بيكرهنا كدا :S

Azeem said...

يا نواره قلتلك من الأول تسليم السلطه للجيش كان الخطه الاخيره لحسني مبارك ..يا بنتي إنتي غلبانه ومدخلتش الجيش ..طنطاوي مكروه في الجيش زي مبارك ما كان مكروه من الشعب بس الحكم في الجيش أصعب ومفيش حل غير انقلاب عسكري ضد مجلس العواجيز الخونه ..

احلام جوليا said...
This comment has been removed by the author.
معرفش(ده أنا) said...

can I share this post on facebook,please???

معرفش(ده أنا) said...

Can I share this post on facebook, please??
law mawfe2teesh bardo hanshoro :)
:)
waitind for ur replay
thanx

Passant said...

http://www.facebook.com/l.php?u=http%3A%2F%2Fno-scaf.blogspot.com%2F%23.TjeTTr0G4I0.facebook&h=aAQAEpjVl
بصى على الموضوع اللى فى اللينك
على فكرة انا متفقة معاكى فى حاجة مهمة اوى ابقوا قابلونى لو جالنا رئيس عادل اذا كنا احنا اصلا خاينين لبعض الا من رحم ربى يعنى احنا شعب بيحب يتذل خلاص نلم شوية المثقفين و شوية الناس اللى لسة فاضل عند امها ريحة الكرامة و نقعد فى الصحرا

mahmoud said...

لا المجلس العسكري ولا مليون زيه يقدروا يقهروا الشعب ولا امريكا ولا اللي يتشددلها ودي مش فنجرة بق الشعب هادي لانه مترقب اللي حيحصل ليس الا ولان القوي اللي الشعب بيثق فيها ومن ضمنها الاخوان لم تعطي ضوء اخضر بالعصيان او بغيره نحن في وضع ترقب وليس استكانة ولا تعطوا الفلول اكبر من حجمهم

Boss said...

دة درس يانوارة ان اللي بيحصل دة اكبر منكم
والدرس التاني انة حتي لو كان الحق معاكم فلاذم توصولوا رسالتكم للشعب لانكم من غيرة ضعفا جدا
حاليا انا لااثق الا في الاخوان وبحترم ارائهم جدا
الاخوان دلوقتي مركزين علي المعركة الحقيقية
الانتخابات
يعني باصين علي المستقبل مش الماضي
ولما السلطة تبقي في ايديهم ياخدوا حقوق الناس دي براحتهم
اما انتم فتدخلوا في مئات المعارك الجانبية اللي انتوا مش قديها بعد ما فقدتوا تأييد الناس ليكم
والمعارك دي نتيجتها الوحيدة المزيد من الضعف وكرة الناس ليكم
ولما يأتي وقت الحرب الحقيقية لما المجلس العسكري يفكر يلعب بديلة ويحتاج لوقفة حقيقية هتلاقوا نفسكم لوحديكم وضهركم للحيط
صوتي ان شاء الله في اي انتخابات بعد كدة للاخوان

Boss said...

دة درس يانوارة ان اللي بيحصل دة اكبر منكم
والدرس التاني انة حتي لو كان الحق معاكم فلاذم توصولوا رسالتكم للشعب لانكم من غيرة ضعفا جدا
حاليا انا لااثق الا في الاخوان وبحترم ارائهم جدا
الاخوان دلوقتي مركزين علي المعركة الحقيقية
الانتخابات
يعني باصين علي المستقبل مش الماضي
ولما السلطة تبقي في ايديهم ياخدوا حقوق الناس دي براحتهم
اما انتم فتدخلوا في مئات المعارك الجانبية اللي انتوا مش قديها بعد ما فقدتوا تأييد الناس ليكم
والمعارك دي نتيجتها الوحيدة المزيد من الضعف وكرة الناس ليكم
ولما يأتي وقت الحرب الحقيقية لما المجلس العسكري يفكر يلعب بديلة ويحتاج لوقفة حقيقية هتلاقوا نفسكم لوحديكم وضهركم للحيط
صوتي ان شاء الله في اي انتخابات بعد كدة للاخوان

hardway said...

لبست جلابية السلفية..ولم تدخل عليهم
لبست افرول الجيش....ولم تدخل عليهم
تتحدثي دائما مع عمو بلتاجي..ولم يقتنع بك الاخوان
ارتديت ملابس الحداد..وتسولت بدم الشهداء
رد عليك المجلس العسكري واراد ان يعلمك كيف يكون التعامل بكرامة و احترام لدم الشهيد
لبست جوب اللبرالية..لفظك ساويرس وتحاشك حمزة وخاف منك البرادعي أحسن تتحرشي به
الي أين يا نرنر..؟؟؟؟؟؟؟؟
تسمع كلامي...أنت مكانك ...لـيـبـيـــا
تاخدي الحج معاك و هو حبيب القذافي..
ياما قال فيه شعر ونثر و قصائد..و من طرابلس نسمع صوتك يانرنر
Passant said...خدي معاك
عايزة تروح الصحرا..بس تاخد معاها اللينك

تعالوا said...

يانواره مش ملاحظه معايا انك عايشة دور جنون العظمة بدرى شوية وعاملة فيها جيفارا من غير لازمة اولا انا من الثوار اللى كان يتمنى انه يكون شهيد لكن ماليش حظ ومكنتش عاوز الشهادة علشان اهلى يا خدوا التعويض ولا اهلى كانوا اصلا ليهم فى موضوع الثورة وشايف انك نسيت هدف الثورة بجد وبتدوري ليكى على دور فى الاحداث
احنا عملنا الثورة من اجل الحرية
حرية الاتخابات - حرية الاقتصاد - حرية البحث العلمى .......... هى دى الحاجات اللى هتغير الوضع السيئ اللى الشهدا ماتوا من اجل تغييره

غريبه ببلادي said...

اجبك يا نواره انت فخر لكل بنات المسلميين

غريبه ببلادي said...

اجبك يا نواره انت فخر لكل بنات المسلميين

غريبه ببلادي said...

اجبك يا نواره انت فخر لكل بنات المسلميين

hend anwar said...

انتى وحدة مش محترمة اصلا وياريت مدخليش نفسك فى السياسة .. اصلك مبتحترميش نفسك ولا بتحترمى حد .. ماشاء الله على كلامك فى تويتر بعد جمعة الوحدة .. حلوة ولاد الوسخة اللى بتقوليها للاخوان دى . منتى مجبتيش من بعيد التربية بردوا بتفرق ..

Gamal Abdel Hamid said...

ليه يا نوارة انت واصحابك المهيسيين الشعبيين ماتعملوش هدنة مؤقتا لاعادة ترتيب الاوراق والاولويات وكمان عشان تستحموامن الخونة اللى خلوا ريحتكم فظيعة لكن معلش ماحدش بيتعلم ببلاش ....زمان العقاد ألف كتاب رائع اسمه "التفكير فريضة اسلامية"دلوقت السلفيين بيقولوا "لا تناقش ولا تجادل يااخ على" شوفوا الزمن بيعمل ايه فى البشر

ملكش دعوة said...

شوفي ... انا كنت من ناس كتير بتتابعك بأهتمام وبتصدق اي حاجه تقوليها لكن الظاهر ان وجهه نظري فيك مكنتش في محلها وده مش رائي انا لوحدي
واكيد انتي حسه ان في ناس كتير انفضت من حولك والنجوميه بتاعه قناه التحرير طفتك بدل ما تلمعك
يا ريت يكون وصلك ان الناس زهقت من اللي بيحصل والكلام اللي كان الاعلام بيردده عن وقف الحال وبسكلته الانتاج بأه الراجل اللي بيكنس الشارع بيقوله
وده طبعا بيجسد خيبتكوا الاويه لانكم كل يوم كنتم بيحرقوا كارت وبتستنفذوا من رصيدكم عند الناس
خسرتوا كتييير والله ...خسرتوا مصداقيتكم وتعاطف الناس معكم
وده طبعا يرجع لعشوائيه التفكير واتخاذ القرار ولانكم سبتوا ناس ملهمش 60 لازمه يتكلوا بلسان ثوار التحرير ولانكم تماديتوا في التعنت والاقصاء مع اطراف بعينها.... والجيش ساب لكم الحبل علي الغارب لغايه ما ييجي اليوم اللي الناس نفسها اللي كانت معاكم تنقلب ضدكم
بصراحه ...خبتم خيبه جامده لم تأت لاحد
والله الموفق والمستعان

mohamed said...

والله يا جدعان اللى مش عاجبه الكلام وشايف فى نفسه الرجوله واخداه اوى ويعرف يعمل حاجه ينزل بدل ما هو قاعد على خده زى الحريم عدم اللاموأغزه

mohamed said...

والله يا جدعان اللى مش عاجبه الكلام وشايفه نفسه يقدر يعمل حاجه ينزل بدل ما هو قاعد ف بيتهم زى الحريم عدم اللاموأغزه

mkadry28 said...

طبعا مادام ناس كتير انتقدتك وشتمتك على البوست ده يبقى انتى ماشية صح ، كملى بقى زى مانتى علشان تخسرى الناس كلها وتقتنعى فى الأخر إن دماغك راكبة غلط .... أنا عمرى ما شكيت فى نواياكى بس دلوقتى أتأكدت من غباءك السياسى
وبالمناسبة يعنى ، هوا لما كان حسنى مبارك بيتشتم بعد كل قرار بياخده أثناء الثورة ، يا ترى كان ماشى صح؟

احلام جوليا said...

باقصى سرعة ممكنة جمعوا اهالي الشهداء واختاروا منهم الي شكلهم مناسب مش الغلابة لان للاسف الغلابة في نظر الناس بلطجية واكتر الناس بتبص عليهم بتكبر نادي الناس العادية من اهالي الشهداء والي يبانوا ولاد ناس وخلوهم يظهروا في التليفزيون والجرايد والبرامج علشان يحكوا حكاية شهدائهم اطفال شباب اباء تركوا ارامل وايتام جمعوهم اكسبوا تعاطف الناس من تاني مبارك يكسب التعاطف بالمشهد التمثيلي لنومه في القفص ووقفه ولاده على رجليهم طول المحاكمة بعكس باقي المتهمين اتصرفوا بسرعة وائل غنيم لما بكى انقذ الثورة من تعاطف الناس مع مبارك اكسبوا الشارع باهالي الشهداء اعملوا حملة كاملة لشحن الرأي العام معكم شباب زي الفل يقدر يختار الي وشهم فوتو جونيك والي بيعرفوا يتكلموا والي وشهم ملائكي والي شكلهم عليه سلام وهدوء وايمان علشان يطلعوا يحكوا حكاية اولادهم الشهداء علموهم استخدموا الحيل ان امكن والحقوا الثورة فالثورة نجحت بتعاطف الناس ومسانتدهم مش بمعاندتهم وافتكري الي حصل لما الناس ساندت الثوار ونزلت الشارع بعد ضربهم وبعد موقعه الجمل وتعاطفهم مع وائل غنيم نزلوا وسندوكم وده الي انقذ الثورة فاشحنوا اهالي اشهداء الي شكلهم مقبول تليفزيونيا علشان تنقذوا مصر من تعاطف مع مبارك

ملكش دعوة said...

احلاااااااام جوليا
ننقي يعني الناس اللي شكلهم حلو ونحفظهم كلمتين حونينين ونلبسهم حلو ونستغل ظروفهم عشان ..............

ايه السطحيه دي ... هو اي حاجه في اي حاجه وخلاص انتوا هتشحتوا بيهم
اللي من القلب بيوصل للقلب حتي لوشكلهم مش حلو ومش حافظين السيناريو

يا نهار اسود .... لو كل اللي في التحرير بيفكروا كده .... كارثه

احلام جوليا said...

يا استاذ " ملكش دعوة " اسمح لي التفكير السطحي الي مش عاجبك ده هو الي بياثر في 90 % من شعبك ومتنساش ان مصر فيها 65% من الجهلا والفقرا كم واحد مات بايد الشرطة ومحدش اتهز له شعره لكن خالد سعيد ابن الناس قضيته سمعت العالم كله اخته الرقيقة الملائكية الملامح بنت الناس ووالدته الست الي باين انها من الناس الراقية هزوا مشاعر العالم انما واحد زي عماد الكبير محدش بص له وناس كتير قالت فيه احسن لانه سواق مشروع غلبان وقالوا سواقين المشاريع بلطجية صباح الفل يا عم عميق التفكير حتى في اقوى دول العالم عارفين كويس انك علشان تلعب بالراي العام وتحركه لازم تجيب ناس مقبولة ومدربة ولو شفت التحليلات السياسية يا عم العميق التفكير كنت لقيت ان الكل بيقول ان مبارك مدرب على الثبات وعلى تمثيل المرض كذلك وان ابناءه مدربين على الظهور بمظهر الثبات والسخرية حتى يستفزوا الرأي العام انت فاكر لما تطلع واحده ست بلدي وهدومها مبهدله وبتتكلم ببجاحة وبفظاظة وبتحكي على ابنها الي مات شهيد حد حيصدق انه شهيد احب اعرفك انه من فترة جابوا كم واحد من اهالي الشهداء شكلهم غلابة قوي وكنت قاعدة يومها بتفرج مع مجموعة مصرين كلهم اجمعوا ان شكلهم يا عم صيع شكلهم بلطجية تلقوهم ماتوا وهم بيهربوا اهاليهم من اقسام الشرطة ده مش شكل اهل نشطاء سياسيين هي دي الحقيقة مظهرك بياثر في الناس التفكير السطحي الي مش عاجبك بيشتغل به برضه الشرطة العسكرية الي بتنزل تلم من الميدان العيال الي شكلهم غلابة وتقبض عليهم وتقول بلطجية وتسيب الوشوش المعروفة للاعلامين والفنانين والنشطاء الي شكلهم شيك واسال شباب التحرير ونواره نفسها تقولك انت في دولة اغلبيتها جهلاء وفقراء وبيحتقروا نفسهم قبل ما يحتقرهم الناس

احلام جوليا said...

يا استاذ " ملكش دعوة " اسمح لي التفكير السطحي الي مش عاجبك ده هو الي بياثر في 90 % من شعبك ومتنساش ان مصر فيها 65% من الجهلا والفقرا كم واحد مات بايد الشرطة ومحدش اتهز له شعره لكن خالد سعيد ابن الناس قضيته سمعت العالم كله اخته الرقيقة الملائكية الملامح بنت الناس ووالدته الست الي باين انها من الناس الراقية هزوا مشاعر العالم انما واحد زي عماد الكبير محدش بص له وناس كتير قالت فيه احسن لانه سواق مشروع غلبان وقالوا سواقين المشاريع بلطجية صباح الفل يا عم عميق التفكير حتى في اقوى دول العالم عارفين كويس انك علشان تلعب بالراي العام وتحركه لازم تجيب ناس مقبولة ومدربة ولو شفت التحليلات السياسية يا عم العميق التفكير كنت لقيت ان الكل بيقول ان مبارك مدرب على الثبات وعلى تمثيل المرض كذلك وان ابناءه مدربين على الظهور بمظهر الثبات والسخرية حتى يستفزوا الرأي العام انت فاكر لما تطلع واحده ست بلدي وهدومها مبهدله وبتتكلم ببجاحة وبفظاظة وبتحكي على ابنها الي مات شهيد حد حيصدق انه شهيد احب اعرفك انه من فترة جابوا كم واحد من اهالي الشهداء شكلهم غلابة قوي وكنت قاعدة يومها بتفرج مع مجموعة مصرين كلهم اجمعوا ان شكلهم يا عم صيع شكلهم بلطجية تلقوهم ماتوا وهم بيهربوا اهاليهم من اقسام الشرطة ده مش شكل اهل نشطاء سياسيين هي دي الحقيقة مظهرك بياثر في الناس التفكير السطحي الي مش عاجبك بيشتغل به برضه الشرطة العسكرية الي بتنزل تلم من الميدان العيال الي شكلهم غلابة وتقبض عليهم وتقول بلطجية وتسيب الوشوش المعروفة للاعلامين والفنانين والنشطاء الي شكلهم شيك واسال شباب التحرير ونواره نفسها تقولك انت في دولة اغلبيتها جهلاء وفقراء وبيحتقروا نفسهم قبل ما يحتقرهم الناس

احلام جوليا said...

يا استاذ " ملكش دعوة " اسمح لي التفكير السطحي الي مش عاجبك ده هو الي بياثر في 90 % من شعبك ومتنساش ان مصر فيها 65% من الجهلا والفقرا كم واحد مات بايد الشرطة ومحدش اتهز له شعره لكن خالد سعيد ابن الناس قضيته سمعت العالم كله اخته الرقيقة الملائكية الملامح بنت الناس ووالدته الست الي باين انها من الناس الراقية هزوا مشاعر العالم انما واحد زي عماد الكبير محدش بص له وناس كتير قالت فيه احسن لانه سواق مشروع غلبان وقالوا سواقين المشاريع بلطجية صباح الفل يا عم عميق التفكير حتى في اقوى دول العالم عارفين كويس انك علشان تلعب بالراي العام وتحركه لازم تجيب ناس مقبولة ومدربة ولو شفت التحليلات السياسية يا عم العميق التفكير كنت لقيت ان الكل بيقول ان مبارك مدرب على الثبات وعلى تمثيل المرض كذلك وان ابناءه مدربين على الظهور بمظهر الثبات والسخرية حتى يستفزوا الرأي العام انت فاكر لما تطلع واحده ست بلدي وهدومها مبهدله وبتتكلم ببجاحة وبفظاظة وبتحكي على ابنها الي مات شهيد حد حيصدق انه شهيد احب اعرفك انه من فترة جابوا كم واحد من اهالي الشهداء شكلهم غلابة قوي وكنت قاعدة يومها بتفرج مع مجموعة مصرين كلهم اجمعوا ان شكلهم يا عم صيع شكلهم بلطجية تلقوهم ماتوا وهم بيهربوا اهاليهم من اقسام الشرطة ده مش شكل اهل نشطاء سياسيين هي دي الحقيقة مظهرك بياثر في الناس التفكير السطحي الي مش عاجبك بيشتغل به برضه الشرطة العسكرية الي بتنزل تلم من الميدان العيال الي شكلهم غلابة وتقبض عليهم وتقول بلطجية وتسيب الوشوش المعروفة للاعلامين والفنانين والنشطاء الي شكلهم شيك واسال شباب التحرير ونواره نفسها تقولك انت في دولة اغلبيتها جهلاء وفقراء وبيحتقروا نفسهم قبل ما يحتقرهم الناس

المواطن مصري said...

سلام عليكم
سؤال مهم
يا ترى هل هنسكت على اللي حصل اول يوم رمضان؟!
يعني حصلت يوم 9 ابريل و كشفوا ع البنات عديناها و قلنا ماشي
انما لو سكتنا على الموضوع ده يبقى كدة احنا لا مؤاخذة و بنحب كدة
على فكرة انا بقول رأيي و ما بسخنش
بس انا معدوم الحيلة و مسافر برة مصر اصلا لكني قلبا و قالبا مع الثورة
الثورة دي لو فشلت كلنا هنلبس احلى خازوق و برضة العالم هيبقوا معجبين بيه اوي زي ما كانوا معجبين بثورتنا!

المواطن مصري said...

طيب سؤال للجميع و لنوارة خصوصا
هل هنسيب اللي حصل اول رمضان ده يعدي كدة ؟
يعني حصلت قبل كدة في 9 ابريل و سكتنا
هل هنسكت تاني؟!
مش لازم مظاهرات ولا اعتصامات بس نتحرك على المجال الحقوقي و نتكلم على الفضائيات و نسأل عصام شرف اللي عمل فيها مش من هنا ولا اتكلم في الموضوع!
هو ايه اللي بيحصل؟
يعني نسأل المجلس و شرف و نقولهم لوفي دماغهم حاجة يرسونا على التيتة عشا ننفهم من غير ما حد لا يتكرهب ولا يتسحل
و كل ثورة وانتم طيبين