جبهة التهييس الشعبية

انا ماليش اي صفحات على الفيس بوك

2012-02-01T14:30:00.003+02:00

بتاتا...

الاكاونت اللي كان ليا اتهاك وخلاص.. ماليش اي نشاط على الفيس بوك خالص، كل الصفحات اللي باسم نوارة نجم دي فان بيدجز ناس عاملينها مشكورين بس هي مش صفحاتي وانا مش مسئولة عن اي حاجة بتتنشر عليها

نوارة نجم

يا بتاع الغلابة

2012-01-25T10:03:00.003+02:00

يا ربنا

الشاعر تميم البرغوثي: رئيسنا واحد شهيد يحكم من التحرير

2012-01-25T03:32:00.000+02:00

منصورة يا مصر مش بجميلة العسكر

إحنا اللى روَّحنا بدرى بس مش أكتر

قول للى روَّح عشان يرتاح فما ارتاحشى

الراحة كلِّ ما تستعجلها تِتْأخَّر

واللى ها ينزل ها يُحكُم لو ما روَّحشى

قصر الرياسة بْبلاش، بسِّ انتَ مستخسر

●●●

قصر الرياسة ما فيش بينك وبينه كتير

فيه سلك شائك وكيس رملة وكُشْكِ غفير

لو جيت لوحدك، ها يضرب، والرقاب ها تطير

وان رحت مليون، ها يهرب، وانتَ تبقى أمير

رئيسنا واحد شهيد، يحكُم من التحرير

قصر الرياسة الجديد بِصينِيَّة ومدوَّر

●●●

منصورة يا مصر بجميلة خيام الخيش

بيحرقوها عشان تمشى ولا تمشيش

يا مصر عُمْرِ ما فيه ثورة تقوم بِشْوِيش

المُلك ده اللى ادِّتيه للعسكرى بقشيش

حقّ العيال اللى ماتوا فى طابور العيش

وبنت عَرّوها فى الشارع وشيخ أزهر

●●●

يا حاجّة ياللى بتقرى الكفّ والفناجيل

إقرى وشوش البشر، ع النصر تلقى دليل

ده حقنا ف مصر مش ها نسيبه للتساهيل

وان قلتى نصبر يومين، يبقى ها نصبر جيل

أجلنا قبل كدة فادنا بإيه التأجيل

رَمْيِ الجُثَثْ فى الزبالة فى الضُّحَى الأحمر

●●●

منصورة يا مصر بجميلة ولاد وبنات

بجميلة اللى انحبس بجميلة اللى مات

بجميلة التريَقَة والضحك فى الأَزَمات

ودم فوق الرصيف ناقش سُوَر وآيات

يا مصر ياللى انتصرتى فْ جُمعِتين وِتَلات

نفس العَدُو هُوَّه هُوَّه بَسِّ متنكَّر

●●●

الصبح طالع لِقِى دبابة فوق راسُه

مربَّعة فوق دماغُه وكاتمة أنفاسُه

والشرق مقفول وخِتْمِ النِّسر ترباسُه

قام خبَّا شمسُه ووزَّعها على ناسُه

على العيال اللى ماتوا غدر وانداسوا

بقى شرق فى كل جسم، وشمس بتنوَّر

●●●

الشعب واقف وصدره للرصاص عريان

والدولة خايفة ولافَّة نفسها ف جدران

وزى ما الحاوى ممكن يلدغُه التعبان

شوفوا حيطان السجون بتلفّ ع السجان

والفالح اللى بيتهوَّر على النسوان

ما شفناهوش ع الحدود يا ناس بيتهوَّر

●●●

كان للفراعنة إله قرد وإله تمساح

وللإله كهنة وعسكر يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية براح

يا عينى ع الآلهة بقوا فرجة للسياح

ياللى بنسر وسيفين فرحان ومتكبَّر

●●●

الشمس تُدعى الغزالة فى اللغة فاعلم

وبالغزالة المضيئة فى السما باحلم

غزالة ممكن تبيِّن طبعها الوحشي

ما تغرّكمش الأسامى ورقِّة المبسم

دى شمس واللى يِقَيِّدها ما يفلحشي

ومصر حالفة، ها تتحرر، هاتتحرر

----------------

يا رب تعيش الف سنة يا تميم

بالنسبة لحملة الارهاب

2011-12-20T01:57:00.001+02:00

انا نمت ست ساعات صحيت لقيت الناس كلها بتتكلم عن 100 بنت محتجزين في مجلس الشعب وبيتم اغتصابهم!

مين اللي ورا الكلام ده، واحد اسمه حسام عامر.. اللي ان شاء الله لما اشوفه حانسل كل ما يلبس في القدم على دماغ امه ولو راجل يوريني وشه، حيث انه زمان كان كتب عليا نوت ان انا معمول عليا كنترول وحلف بالله.. والله العظيم حلف بالله، انه شاف بنفسه الصور المخلة بالاداب اللي ممسوكة عليا من المخابرات.. ومافيش حد صدق على كلامه ونشر كلامه غير اتنين: ايمان بدوي وواحدة اسمها نورهان رمضان، وان شاء الله ربنا يوري ايمان بدوي دي في بنتها، حيث انها واكلة معايا عيش وملح، ومش حادعي على نورهان رمضان لان ربنا مش حيعمل فيها اكتر من اللي عامله في مخها وقال ايه الصور دي متاخدة لي مع واحد اسمه م ج.. وكل اللي يخش يقرا النوت بتاعته يضحك...

بتضحكوا على ايه يا مجرم انت وهو :)))) لعلمكم انا مخلة ومن زمان، وعملت في خلل علامات.. الخلاصة يعني الناس دخلت قالت له يعني انت مخابرات؟ ولا انت م ج ولا ايه بالظبط؟ ما هو يا نوارة اللي قالت لك وده مش ممكن، يا المخابرات اللي قالت لك وده معناه انك مخابرات.. وموضوع ان ماحدش شك فيا خالص دي عمل لي عقدة نفسية ههههههههههههههههه مش شاكين في سلوكي ليه؟ انا رحت على اكاونت حسام عامر ده عشان اطلع النوت بتاعته اللي كتبها عني ولقيته شالها... بس برضه لو شفته حانسل الجزمة والصندل على دماغ اللي جابوه..

طيب.. لو انا صديقة م ج ومعمول عليا كنترول يبقى فيه 100 بنت في مجلس الشعب بيغتصبوا

انا مش باستبعد عن المجلس العسكري والجيش انهم يعملوا كده واوسخ من كده كمان، هو فيه اوسخ من انهم يقلعوا بنت في الشارع؟ بس الاخ اللي مطلع على المخابرات وبيقسم بالله انه شاف صوري المخلة (انا بس ما غاظنيش في النوت دي غير انه قال ان الصور المخلة دي اتاخدت لي في عربية... اخصصصصص.. انا عربية؟ ليه؟ عربية ايه؟ ايه الجربوع ده؟ يعني يوم ما اقرر انحرف انحرف مع واحد مش لاقي يأجر اودة في اوتيل تلات نجوم؟ يعني مطلعني جربوعة كمان؟ طب مخلة قشطة.. الصيت ولا الغنا.. لكن جربوعة لا.. جربوعة لا.. ده ناقص يقول اني حاطة مانيكير مقشر من غسيل المواعين.. المانيكير المنقط احمر فابيض ده، عارفينه؟ ولابسة التحجيبة ام ترتر وحاطة روج احمر محدداه بقلم نبيتي.. كمان اتغاظت لما العيال قعدوا يقروا النوت ويضحكوا ولاد اللذين لا وكمان يشيروها على انها نكتة ههههههههههه)

طب حيث انك راجل مطلع على المخابرات يا ريت تقول لنا يعني ازاي العساكر يقولوا لواحد معدي كده ان الصناديق دي فيها جثة بنتين ماتوا من كتر الاغتصاب؟

حاجة من الاتنين.. يا اما الكلام ده صحيح، وفي الحالة دي الواد ده مخابرات، يا اما الكلام ده مش صحيح وفي الحالة دي الواد ده مخابرات برضه... او فتاي.. او مخبول.. لان الغرض من الكلام ده هو تخويف البنات انها تنزل، وانا شايفة ان الجيش بيبذل جهد كبير عشان يخوف البنات انها تنزل، ليه عايز يخوف البنات؟ عشان الرجالة ما بيخافوش على حاجة غير الستات.. فمش بس مش حينزل امه ومراته واخته وبنته، ده هو كمان ممكن يخاف ينزل لبعدين يتقبض عليه ويتعمل حاجة في حريمه.. ده تصور العسكري يعني، غالبا تصور غلط لانه عادة متخلف عقليا ومش بيفهم حاجة في حياته، الناس حتنزل اكتر على فكرة

انا مش باقول المعلومات صحيحة ولا مش صحيحة، انا بس باسأل كام سؤال

فيه 100 في مجلس الشعب.. مافيش 5 منهم لهم اهل يسألوا عليهم؟ مافيش اسرة واحدة من الخمسة دول عرفوا يوصلوا للتلفزيون؟ انا بقالي يومين باسمع كلام مرسل عن فظائع بترتكب في مجلس الشعب

اللي انا اقدر اصدقه بشكل كبير ان فيه عدد غير معلوم محتجز في مجلس الشعب واكيد بيعذبوهم، امال يعني بيآنسوهم؟ فيه بنات ولا لا؟ ما اعرفش.. ممكن آه ممكن لا.. بس 100 دي واسعة قوي.. فيه اغتصاب ولا لا.. برضه وارد، الجيش اللي يقلع البنات ويكشف على عذريتهم وارد يعمل كده، لكن مش اكيد.. ووارد جدا ما يعملش كده عشان هو مش عايز فضايح اكتر من كده كمان

الخلاصة، عشان مصداقيتنا، وعشان ما يبقاش شكلنا وحش قدام الناس، وعشان ما يبانش اننا ظياطين وبنقول كلام مرسل ما نروجش كلام احنا ما نعرفوش ومش متأكدين منه، ونعقل الكلام، واللي يقول كلام زي ده يقول انا مستعد اشهد

يعني اللي شاف صندوقين فيه ميتين، ما صورش ليه؟ ممكن يبقى معاه تليفون معفن.. طيب، يروح يقدم بلاغ، انا عارفة ان البلاغ ده نبله ونشرب ميته، بس ده تأكيدا لصدق اللي شافه عشان لما نعمل حملة ونقعد نروج لكلام يرعب البنات والاهالي بالطريقة دي نبقى حاسين اننا مركونين على شهادة واحد اتخذ كل الاجراءات اللي تخلينا ما نكدبوش

وبرضه انا ما اصدقش واحد زي ده.. مش بس عشان قال عليا الكلام ده بس عشان متخلف عقليا ومش عارف يألف كدبة محترمة تتصدق وبس ما نابنيش غبر الناس تشاور عليا وهي بتتشقلب على ضهرها من الضحك: هاهاهاااااع مخلة مخلة.. واستلموني بقى: صباح الخير يا م ج.. ازي م ج يا نوارة؟ بيقولوا م ج بيبعت لك كلمني شكرا او بيكلمك من خدمة "ادفع لي شكرا".. هي العربية نوعها ايه؟ 127 بيضا؟ انت بقالك شوية مش على التويتر.. اوعي تكوني نزلتي تقابلي م ج

نستنى ونشوف على الاقل واحدة منهم تخرج لو فيه او اي حد من المعتقلين نعرف نوصل له باي طريقة.. ما هو لو حاجة زي دي ربنا مش حيسيبهم، ده ربنا كبير قوي وحيوصلنا لهم

وبرضه ما بنخافش.. ومش حيحصل لنا غير المكتوب

واي حد ضد العسكر خصوصا البنات والشباب اللي بيواجهو في الصفوف الاولانية يقروا ده

الحلقة الجديدة والاروع من توك شوز

2011-12-11T17:58:00.001+02:00

دعاء بقت بتعمل حلقات توك شوز على الانترنت

خوطة المجلس الكتشيتة... فسسسسسسسسسسسسسسسسسسسسسسسسسسسسسس

2011-12-09T16:46:00.001+02:00

الا فاكرين البوست اللي كتبت فيه ان عندي احاسيس ومشاعرين عبارة عن هلاوس سمعية وبصرية بتخيل لي ان المجلس العسكري لمن يلاقي الطخط عليه بالجامد قوي يقوم يعمل انقلاب عسكري على نفسه؟ قال ايه؟ قال اه... قال طلع الموضوع ده صحيح فعلا وطلعت ان انا - مدد مولانا الحسين - قلبي حس، انتوا عارفين بقى زمان ايام ما كان المجلس مغرغر بيا كنت باحبه، واللي يحب ما يكرهش يا ولاد.. برضك قلبي بيحس بيه لمن ييجي يعمل شقاوة

صلي ع النبي

عليه افضل الصلاة والسلام

شششووووووف يابني... بقى انا بقالي فترة كده شامة ريحة مش تمام في الاعتصامين، خصوصا ان كلنا عارفين ان اعتصام التحرير مليان تحريات عسكرية، بيبقوا جامدين اخر حاجة... الاكثر ثورية على الاطلاق، ولا الحاج اسماعيل اللي دايما يرجع في كلامه في فيلم مطب صناعي.. اللي حصل منهم كالآتي:

اولا: في اثناء معركة محمد محمود فيه شخصن ما جه كده وقال لفرسان محمد محمود: انا معايا سلاح... نستخدمه؟ قام قالوا له: شكرام يا حاج.. احنا شغالين بالطوب والمولوتوف ومتشكرين على كده احنا مش وش ذلك ولا ذلك وش وخدوه من ايده طلعوه برة وقالوا له خالتي بتسلم عليك وبتقولك ما تجيش هنا تاني ولو شفت خلقة امك ولا اي حد من طرفك حنظبطك.. وامنوا المكان - في عز ما هم بيتقتلوا - عشان يضمنوا ان ماحدش بسلاح يخش لهم

ثانيا: دايرين بقى العيال التحريات.. اللي انا عارفة انهم تحريات وربنا، عمالين يقولوا للناس: كده مش حينفع.. احنا لازم نشيل سلاح هههههههههههههههه وطبعا انتوا عارفين الشيعب بتاعنا: ايه؟ غور يالا من هنا.. اعوذ بالله من الشيطان الرجيم... بس بقى فيه حاجة وحشة، قصاد كل واحد تحريات عسكرية فيه عشرة معاتيه قدامه، ما بيبقوش تحريات ولا حاجة يا عيني، بيبقوا مهاطيل، زي المهاطيل اللي كانوا بيقولوا: وماله لما يعملوا انقلاب عسكري.. شباب الجيش الطاهر النضيف الشريف العفيف.. تقول له: يعني انت عايز عبد الناصر تاني؟ يقول لك: لأ... لأ طبعا.. (حتى اللي بيحبوا عبد الناصر شايفين ان النموذج مش مناسب للتوقيت بتاعنا) قوم تقول له: ما هو كده.. قوم يقولك: ااااااه.... تصدق؟ صح وربنا.. وربنا صح... انت مخك ذري والله، ماهو الواحد بيحب المشورة عشان كده

اهم برضه نفس العيال المهاطيل يروحوا يكروا نفس الكلام: خالتك سلمية ماتت.. احنا لازم نشيل سلاح.. تقول له: تعالى يابني.. تعالى.. انت عايز فترة تسعينيات تاني؟ قوم يقول لك: ازاي يعني؟ (طبعا عشان هو ما كانش اتولد اصلا، او حتى كان في اللفة) قوم تقول له: ماهو مع اول خمس عيال حيشيلوا آلي الجيش حيعلن الاحكام العرفية والناس حتقول له عداك العيب يابو رحاب.. افرم ما ترحمش، وده اللي حصل في التسعينيات بالظبط، كان فيه تواطؤ شعبي مع القتل في الشارع وانتهاك حقوق الانسان والطوارئ والتعذيب وتقول لهم: حرام عليكم.. يقولوا لك: ولاد وسخة ارهابيين.. هو يا ياخدوا الحكم بالعافية يا يشيلوا علينا سلاح ويعملوا لنا حرب اهلية؟ يولعوا بجاز وسخ.. يتعذبوا ويطلع ميتين ابوهم كمان..

كده.. ده كان رأي الشارع المصري على فكرة.. وفي احيان كتير مبارك كان بياكل نفسه قبل ما حد ياكله، يعني كان بيعمل تفجيرات لنفسه عشان يلم ناس كتير والناس تقول له: راجل يا حسام.. لحد ما الشرطة توحشت وبطلت تعذب في الجماعات الاسلامية بس وبقت تعذب في سواقين الميكروباص وبعدين ابتدت تعذب في شباب الطبقة المتوسطة وبعدين ما بقاش لها كبير ولو كانت استنت شوية كانت عذبت مبارك.. يا ريتنا استنينا شوية

الخوف بقى ان المجلس العسكري يقرر ياكل نفسه قبل ما حد ياكله

قبل اي حاجة احنا لازم نعرف ايه السلمية وايه اللي مش سلمية وايه هي الثورة وايه اللي مش ثورة وامتى الثورة بتحتاج تشيل سلاح:

الثورة السلمية هي اي عمل ثوري يهدف الى اسقاط النظام القائم بدون اللجوء لاي اساليب عسكرية

بمعنى، اللي بيحدف بالطوب والمولوتوف قصاد واحد بيضربه بالرصاص الحي دي اسمها مقاومة سلمية، لان مافيش اي عمل عسكري في اللي هو بيعمله، يعني لما انت تخنقني اقوم اقرص دراعك عشان اشيله من رقبتي يبقى احنا الاتنين زي بعض؟ يعني انتفاضة الحجارة كانت ارهاب؟ انتفاضة الحجارة بالاجماع العالمي انتفاضة سلمية... ماحدش وصفها بانها عمل عسكري ابدا، ولا حتى القلل المنتحرة اللي دايما بتطالب الطرفين بضبط النفس

الشخص اللي بيقتحم القسم وهو مش شايل سلاح بهدف ثوري ده اسمه عمل ثوري سلمي، هو ما دخلش بالآلي على اللي في القسم وقتلهم، هم مجموعة من الثوار اقتحموا الاقسام اللي بتمثل بالنسبة لهم غرف تعذيب المواطنين بالظبط زي ما ثوار فرنسا اقتحموا سجن الباستيل... يعني اللي اقتحموا سجن الباستيل بلطجية؟ ما كانوش شايلين سلاح معاهم، وكذلك اللي اقتحموا الاقسام وامن الدولة ما شالوش سلاح معاهم، مافيش اي تحرك عسكري في اللي عملوه، ده تحرك ثوري سلمي

وطول ما فيه تحرك جماهيري من غير سلاح - في اي اتجاه - ضد النظام الحاكم دي اسمها ثورة سلمية.. امتى بتبقى مش سلمية لما بتلجأ لأساليب عسكرية

اول ما تشيل سلاح كده ما بقتش سلمية... وما بقتش ثورة كمان، بقت حرب اهلية

امتى الثوار بيحتاجوا يشيلوا سلاح، او بيحسوا انهم محتاجينه، لما ما يبقاش فيه اجماع شعبي على الثورة دي، جزء من الشعب عامل ثورة والجزء التاني يا اما عامل عبيط يا اما مع النظام القائم.. وفي الحالة دي الثوار بيشيلوا سلاح وفي الحالة دي اه بيبقوا بلطجية طبعا... هو بالعافية؟ انت اخترت تعمل ثورة ونزلت دفعت التمن، نص الشعب التاني طلع بيحب النظام القائم، ولا مستفيد منه، ولا حتى ندل وجبان يا سيدي، تقوم تشيل عليه سلاح؟ دي اسمها بلطجة بقى، ولو هو مساند للنظام حيشيل سلاح هو كمان، وتبقى حرب اهلية

الخطة الامريكية المكررة المحفوظة: ما عرفتش تقمع الثورة اعمل حرب اهلية... كلهم بيسمعوا الكلام في الموضوع ده، ما عرفوش يسمعوا الكلام بدري عندنا عشان ثورتنا عليها اجماع شعبي

لما ينزل عشرين مليون في ثورة دي مشاركة كبيرة جدا جدا جدا

لما الناس انضربت في محمد محمود الميدان بقى فيه مليونية كل يوم من غير كل القوى السياسية اللي استخبت تحت الترابيزة وخذلتنا... ده اسمه اجماع شعبي

وهنا بيت القصيد.. آن آن آآآآآآآآن

بقى المجلس نجح بمساعدة التيارات السياسية انه يفضل في الحكم، وهو عازم على البقاء في الحكم، حكاية انه خايف ملفاته تتفتح والكلام ده، ده كان زمان...... دلوقت هو عايز يفضل في الحكم.. انتوا عارفين كرسي عرش مصر عليه عسل وغرا الاتنين مع بعض، وكمان اتورط في دم، يعني لو خرج فيها رقبته.. يخرج ليه بقى؟ لا لازم يفضل

طبعا التيارات السياسية ساعدته انه يحبط الموجة التانية من الثورة وما يمشيش، لكن هو مش حمار بقى زي الراجل اللي فات، او بالاحرى، اللي بيديله المعونة مش حمار وهو بيسمع الكلام مش عندي زي الراجل اللي فات، هو عارف انه خلاص اتكره، واذا كانت دي فشلت عشان ما حدش لقي بسرعة بديل للمجلس العسكري وراح شاقطنا بموضوع الاسنتخابات ده، فهو خلاص.. ماحدش بقى طايقه، وهو عارف ان ماحدش بقى طايقه، والناس مرقدة له، واذا ما عرفوش يمشوه المرة دي حيمشوه المرة الجاية.. طب وهو حيستنى المرة الجاية؟ خمس عيال بآلي وخلص الليلة

خمس عيال بآلي اغلبهم - ان لم يكن كلهم - عيال من المعاتيه اللي بيسلموا ودنهم لبتوع التحريات العسكرية.. ثوار التحريات العسكرية الاكثر مزايدة على الاطلاق... مش حتقدر تغمض عينيك

ايه الدليل على اللي انا باقوله... الدليل (بخلاف ان بتوع التحريات العسكرية هم بالتحديد اللي عمالين يتكلموا عن السلاح وليبيا والكلام الفارغ ده) هو المجالس اللي هو عمال يخترع لنا فيها

مجلس الشعب بدون صلاحيات... طب كده مجلس الشعب ممكن يتخانق معاه، قوم لما يتخانق معاه الناس اللي راحت انتخبت مجلس الشعب ما حتصدق تنزل له: ارحل يا عم.. احنا مش قلنا لك كده المرة اللي فاتت؟ طب خلاص، نجيب له مواطنين شرفاء في مجلس استشاري يتخانقوا معاه، وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري احسن العسكري ده بيضرب جامد.. حلوة حكاية المجلس الاشتشاري دي نمسك في خناقة ويمسك في خناقنا بالادب.. مجلس الوزرا اسمه ايه ده اللواء الجديد.. عبد الحق باين؟ فيه شخصما كتشيت كده ظهر في الافاق قال: صلاحيات الجنزوري مطلقة.... زي صلاحيات شرف بالظبط.. واهو الحاج ابو صلاحيات ده، اسم الله على مقامه حيفضل مشغول بالبت صلاحيات يشورها ويجهزها عشان احنا نتخانق معاه على الداخلية والاسعار وسوء الاحوال المعيشية والمحاكمات وخلافه.. والمجلس العسكري بيحرك كل الاطراف من خلف ستار لانه عارف ان ماحدش طايقه ولازم يغور من وشنا الساعة دي، فهو حيحط برقع بس... لكن برضه، ليه نسيب حاجة للظروف؟ ماهم الناس دي اصلها تلف تلف وتروح ماسكة فينا وهاتك يا شتيمة فيك يا مجلس يا عسكري، نقولهم طب نجيب لكم عنان يقولوا لنا إلأ إلأ.. نقول لهم طب اهو الجنزوري يقولوا لنا إلأ إلأ.. امشي امشي امشي... وانا مش عايز امشي.. لو اتزنقت حاعملها حرب اهلية بقى واللي يحصل يحصل.. بشكل محدود، زي عمليات مبارك المحدودة بخصوص الارهاب وزي عمليات المجلس العسكري نفسه المحدودة بخصوص الكنائس والفتن الطائفية، قوم الناس تقول: في عرضك خليك قاعد

وبهذا يا اصدقائي الصغار، اذا ما نفعتش الخناقة السياسية تنفع الخناقة ام خمسة آلي المهم يسيبونا قاعدين والنبي والنبي والنبي.. اصل الكرسي حلو وهزاز

وبرضه نحفظ خط الرجعة ونقول ينكن تطلع تخاريف غاز... بس برضه اهو الواحد يعمل فضيحة شبه الفضيحة بتاعة المرة اللي فاتت قوم لو عقلهم وزهم على الكلام ده يعرفوا ان احنا كاشفينهم وحافظينهم وعاجنينهم وخابزينهم ومش واكلين من الاعيبهم.. حسكم عينكم تلعبوا باليح... اوعى اوعى.. مافيش لعب باليح احسن نلسعك ونجيب لك واوا.. وحنقفشك برضه وانت مستخبي ورا الستارة.. بخ

ومافيش عيال عبيطة حتسمع كلام التحريات العسكرية، هم عبط اه.. بس من كتر طبيتهم، وبيحبوا البلد اكتر منك يا طنطاوي واكتر من امهاتهم كمان

مافيش حد فيهم عايز لبلده حرب اهليه.. ولا حد فيهم عايز لبلده انقلاب عسكري ولا انشقاق مسلح... احنا شعب فلة.. انتوا اللي مالكوش في الفلة نصيب

المجد للشهداء

2011-12-09T11:48:00.001+02:00

كلمني مالك عدلي وقال لي ان اسماء محفوظ اتصلت بيه وطلبت منه اننا نعمل مجموعة عمل لحصر كل اسماء الشهداء بالكامل، واستشهدوا ازاي، وحالتهم الاجتماعية، واسرهم، يعني نعمل حاجة زي بيبلوجرافيا لشهداء محمد محمود وشهداء مصر من يوم 25 يناير، طبعا تحمست للفكرة جدا واجتمعنا وحضر عدد من الشباب اللي متحمسين للفكرة وقررنا اننا الاول نحط تعريف للشهداء وهو كل من قتل على ايد النظام في احداث الثورة، سواء كان بيتظاهر، او بيقوم بعمل ثوري زي اقتحام الاقسام (لو اقتحام الاقسام عمل بلطجة يبقى اقتحام سجن الباستيل في الثورة الفرنسية كان بلطجة.. الحقيقة تبقى الثورة الفرنسية كلها عبارة عن عمل بلطجة من اوله لاخره)، او قاعد لا بيه ولا عليه واتقتل من النظام زي المساجين اللي اتقتلوا اثناء عملية فتح السجون، او واحد ماشي في الشارع ومش بيتظاهر ولا بيعمل حاجة واتقتل من غير ذنب.

احنا ابتدينا من الآخر للأول، يعني بنحاول نجمع اسماء شهداء محمد محمود، ما عرفناش نوصل غير لسبعة وخمسين اسم، المستشفيات الميدانية في ميدان التحرير بتقول انها طلعت 88 جثمان، وفيه مستشفى ميداني بتقول انها طلعت 27 شهيد الاسعاف اخدتهم ومش عارفين ودتهم فين، لا وصلوا المشرحة ولا راحوا اي مستشفى، ده غير الجثامين اللي كان الامن بيسحبها اثناء معركة محمد محمود، حاولنا نتحصل على اسماء الشهداء من مصلحة الطب الشرعي فحدث الآتي:

اسماء محفوظ راحت مصلحة الطب الشرعي عشان تطلب الاسماء فدخلوها على واحدة اسمها ماجدة قالت لها: انت جاية تسألي على الـ980 جثة انا عارفة.. بس انا ما عنديش غير 43 بس، بيقولوا عليا اني مع المجلس العسكري، بس انا مش مع المجلس انا مع شغلي. اسماء قالت لها: انا مش جاية اسأل على الـ980 جثة انا جاية اطلب قائمة باسماء التلاتة واربعين دول، فقالت لها: طيب فين اذن النيابة؟ فاسماء قالت لها: لا انا جاية اطلبها ودي كده، فقالت لها: يعني عايزة تديني رشوة؟ فاسماء قالت لها: انا جبت سيرة رشوة؟ فالست ماجدة قالت لها: انتوا مش عملتوا ثورة وعايزين البلد تمشي صح؟ هاتي اذن نيابة.. ولعلمك مش كل التلاتة واربعين دول شهدا، احنا اتخانقنا مع اهالي عشان عيالهم كانوا ميتين في حاجات تانية في نفس اليوم وعايزين يحسبوهم شهدا، والتلاتة واربعين دول فيهم اشكال بلطجية ما يجيبوش شهدا خالص...

واخيرا ادتها رقم لدكتور في الطب الشرعي عشان يقولها على الاجراءات اللي تجيب بيها الاسماء، ولما اسماء سألتها هو حضرتك اسمك ماجدة ايه؟ قالت لها اعملي سيرش على اسم ماجدة الطب الشرعي وانت تعرفي كل حاجة عني ما انتوا بتهاجموني في الجرايد

ههههههههههههههههه لا الحقيقة الست ما تستاهلش الهجوم ولا حاجة.. دي فلة، بتشتم ناس ميتين بطلق ناري وتقول عليهم اشكال، شكل الميتين مش عاجب الست ماجدة

بس فيه نقطة مهمة في كلام الاستاذة ماجدة، ان فعلا فيه شهداء وهي ما رضتش تكتبهم شهداء عشان شكلهم مش عاجبها، هي اللي قالت انها اتخانقت مع الاهالي واتهمتهم انهم بيدعوا ان عيالهم مقتولين في محمد محمود... معلش يعني واحد جايب جتتة ابنه مضروبة بالنار، تفتكر يعني حيقعد يخطط انه يكتبه مقتول في مكان غير المكان اللي اتقتل فيه؟ هو في ايه ولا في ايه؟ وايه المصلحة؟ اهالي شهداء محمد محمود كلهم خاضعين للتهديد دلوقت، والناس خايفة جدا لان حاسة ان مدام اللي قتل عيالها جيش يبقى مافيش امل ياخدوا حق ولا باطل، والناس كلها عارفة كده؟ فيه حد حيجيب المشاكل لنفسه؟ دول ما رضيوش يطلعوا جنازات عيالهم من التحرير من كتر ما هم خايفين، لو فيه حد من الاهالي حاول يزور يبقى حيحاول يكتب ان ابنه ماماتش في التحرير عشان يخلص من وجع الدماغ والتهديدات اليومية، مش العكس، انما الاستاذة ماجدة بتقول انها ما رضتش تكتب البلطجية شهداء وده معناه ان الجثة اللي شكلها مش شيك الست ماجدة ما كانتش بترضى تكتبهم شهداء.. وعلى رأي عمرو مصطفى: باعترافهم باعترافهم

عموما رقم 980 ده انا حاسة انه مبالغ فيه قوي، العدد كبير، ويمكن اكتر بكتير من ال88 اللي طلعتهم المستشفيات الميدانية لان فيه جثامين كتير سحبها الامن اثناء المعركة، ده غير ان كل يوم فيه مصاب بيموت، فممكن العدد يوصل ل200 او 300، ومع ذلك مش عايزين نسبق، حندور عليهم وحنجيبهم ان شاء الله

بس كمان احنا فكرنا في اننا نعلن في كل حتة، بعد ما نبذل احنا الجهد المرضي من ناحيتنا، ان اللي ابنه مختفي، او يعرف انه مقتول، واي حد عنده فيديوهات، او صور، او معلومات سواء عن استشهاد بعض الناس قدامه، او انتهاكات من قبل السلطات، او اي حاجة، اي معلومة ولو صغيرة واي وثيقة ولو تافهة، يتصل بينا، الموقع الالكتروني تحت الانشاء، وخطوط التليفون ان شاء الله تبقى جاهزة قريب وعملنا الميلات اللي الناس ممكن تراسلنا عليها

MartyrsGlory@Live.Com
MartyrsGlory1@Live.Com

فيه ميثاق للمجموعة دي، والميثاق المفروض حيكتبهولنا الدكتور تميم البرغوثي، وفيه مستندات بالشهداء حيجيبها لنا مالك عدلي

اللي خلاني بس اتكلم عن الموضوع بدري قبل ما نجهز بكل حاجة اننا محتاجين مساعدتكم

اي حد عنده فيديوهات فيها اطلاق نار او اعمال عنف من قبل قوات الامن والجيش يا ريت يبعتها لنا على الميلين دول

ودي صفحة الحملة على الفيس بوك

--------

حاجة اخيرة... انا حانزل قائمة الاسماء اللي حصرناها، غير انكم تحتفظوا بيها، انا طالبة منكم انكم تسلموا على اسم اسم وتترحموا عليه ولو مسلم تقرا له الفاتحة ولو مسيحي تصلي له، وحتشوف، وعلى ضمانتي الشخصية، البركة اللي حتحل عليك لما تعمل كده، انا باقول لكم حاجة مجرباها، ومش لازم احكي تفاصيل، بس انا لما عملت كده حصلت لي حاجات غريبة جدا جدا جدا جدااااااااااا، لدرجة اني بقيت ماشية اكلم نفسي وابص على قائمة الاسماء واقول: مين دول؟ انتوا مين يا عم؟ انتوا مين؟

والله العظيم.. جرب كده تعمل اللي انا عملته وحتشوف بنفسك: السلام عليكم يا فلان ورحمة الله وبركاته، وتقرا له الفاتحة او تصلي له.. ولما تعمل كده قول لي حصل معاك ايه

القائمة لشهداء محمد محمود بس اسم احمد سرور فيها مع انه في مجلس الوزرا بس باعتبار انها كمالة لنفس المعركة
كمان فيه راجل في الاخر عنده 57 سنة استشهد بالاختناق، ده ما كانش جاي يتظاهر، ده كان جاي يدور على ابنه

شهداء محمد محمود :

1- محمد الحسيني البرعي

2-محمد السيد محمد عبد الفتاح

3- محمد بشر انور

4- محمد بشير تهامي

5- محمد نبيل ربيع شحاتة

6- محمد سعيد امام

7- محمد سمير رمضان

8- محمد صلاح محمد

9- محمد عبد النبي عبد الغني مصليحي

10- محمد محمود

11- مصطفى محمد عبد المنعم

12- مصطفى محمد عمر السيد

13- منتصر مكرم عبد الرحمن

14- احمد سيد سرور

15- يحيى زكي

16- شهاب احمد السيد

17- احمد البدوي

18- د. محمد قناوي

19- سيد خالد سيد

20- سيد جابر محمد سليم

21- شهاب الدين احمد ابراهيم الدكروري

22- عادل امام جاد كريم

23- عاطف محمد داوود

24- عاطف محمد محمد عوض

25- عاطف محمد محمد فاروق

26- عبد الخالق السيد عبد الخالق

27- عبد الرحمن عبد الحميد سيد علي

28- عزت عبد الواحد29- عصام السيد صابر

30- علي صلاح خضر

31- عمرو محمد احمد عبد الخالق

32- عمرو محمد البحيري

33- عمرو محمود محمد

34- ماجد يوسف

35- محمد احمد السيد العباوي

36- ابراهيم سليمان محمد سليمان

37- ابراهيم عبد الناصر قطب

38- احمد سمير احمد رمضان

39- احمد صديق

40- احمد طارق

41- احمد عبد الرؤوف

42- احمد فاروق حسين

43- احمد محمد احمد عبد العليم

44- احمد محمد عبد الحميد

45- احمد محمود احمد

46- ايمن احمد عبد الرؤوف

47- بدري حمد بدري

48- حازم

49- حازم مشحوت محمد ابراهيم

50- حسام السيد صابر

51- حسام حمدي خليفة

52- محمد انور محمد عبد الله

53- احمد محمد محمد عبد الحميد

54- ايمن محمد احمد عبد الحليم

55- فراج محمد أحمد سليمان عوض السن: 57 عامامكان الوفاه: ش محمد محمود / ميدان التحريرالتاريخ: 23/11/2011قضية: 9793 لسنه 2011قيدت: سجل مدني قصر النيلتاريخ: الأربعاء 27/11/2011رقم: 325جهة الأصدار: صحة قصر النيل محافظة القاهرةسبب الوفاه: توفي متأثرا بالأختناق نتيجه القاء قنابل الغاز والمسيل للدموع بكثافة بالشارع المذكور وهو عامل ببنك ناصر ويعمل بعد الظهر بعياده خاصة في الشارع المذكوراول المكالمات لأهله كانت من قيادي بالداخلية وأبلغهم خالص التعازي والمساواه والتأكيد علي حق الشهيد

56- حسام مصطفى المصرىالتاريخ : 6\12\2011توفى فى المستشفى بعد احداث مجمد محمود

--------

تاني.. اي تنتوفة بخصوص احداث عنف ارتكبت من السلطات يا ريت تبعتها لنا، ولو فيديوهات او صور ابعت وانت مغمض

بالنسبة للدكتور احمد معتز اللي اكتشف المواد المسممة اللي مات بيها الجثث.. الدكتور ده حسب ما عرفت انه مهدد، وواجب علينا اننا نحميه كلنا لحد ما يكمل اركان القضية

بيان هام

2011-11-21T14:53:00.001+02:00

البيان منفصل:

من أجل الخروج من الأزمة التى تمر بها البلاد والجدل الدائر بين جميع القوى السياسية وغضب الشارع المصاحب له نعلن نحن المعتصمين بميدان التحرير عن رفضنا لسياسة العنف فى التعامل مع مطالب الشارع واحتجاجاته وتناسي ما وافقت عليه جموع الشعب المصري حول محتوى الإستفتاء الدستوري بتاريخ 19 مارس 2011 ونعلن عن خطة مقترحة للخروج من الأزمة تعبر عن مطالبنا وندعو جميع المعتصمين بميادين مصر لدعمها وكذا القوى السياسية وجماهير الشعب المصري وبنود الخطة المقترحة كالأتى:

أولا: ان يقوم المجلس العسكري بالعودة إلى ثكناته والتفرغ لادارة شئون الجيش وتسليم كافة سلطاته إلى مجلس مشكل من رؤساء الهيئات القضائية وهى رئيس المحكمة الدستورية العليا و رئيس المجلس الأعلى للقضاء ورئيس مجلس الدولة لتولى إدارة شئون البلاد فى المرحلة الحالية التى تنتهى بنهاية شهر إبريل2012

ثانيا: يكون هذا المجلس مسئولا عن اجراء الإنتخابات البرلمانية فى موعدها على ان يعقبها الإنتخابات الرئاسية مباشرة.

ثالثا: يتولى البرلمان المنتخب تشكيل جمعية تأسيسية تعد دستورا جديدا للبلاد بالتزامن مع إجراء الإنتخابات الرئاسية ليقوم الرئيس المنتخب بطرح الدستور الجديد على الشعب فى إستفتاء عام.

رابعا: يتولى المجلس المشكل من رؤوس الهيئات القضائية تشكيل حكومة إنقاذ وطنى تطهر وزارتي الداخلية والاعلام وتعمل على حل المشكلة الأمنية والإقتصادية فى البلاد.

خامسا: إلغاء كافة أشكال المحاكمات العسكرية للمدنيين وإحالة جميع المتهمين أمام القضاء العسكرى والمحكوم عليهم إلى قضاء مدنى مختص لإعادة محاكمته.

بيان هام اخر خمسة وسبعين حاجة

2011-11-21T13:06:00.001+02:00

تحديث:
البيان صاغه مالك عدلي وباسم.. بس الاجتماع كان فيه ناس كتير قوي ووافقنا كلنا بالاجماع عليه
---------
امبارح اجتمعنا مجموعة كبيرة واتفقنا على بنود المطالب

المطالب مش نكتة ولا كيميا ولا حاجة... المطلب ان العسكر لازم يمشي... طبعا الاخوة ابناء مصر هبة الاستقرار قعدوا يقولوا لنا امال مين ييجي... الصراحة انا مش فاهمة يعني ايه امال مين ييجي دي لما تتقال على العسكر!!!!!!!!!! يعني كانوا بيقولوا على مبارك: ماهو لو مشي ايه البديل؟ على اساس ان الراجل عشرة ووعيوا على الدنيا ما لقوش غيره فمش عارفين يتخيلوا حد غيره رئيس... انما ولاد امبارح دول كمان اخدتوا عليهم زي الطير ما اتعود عشه اتعودت عليك يا حبيبي؟ هم دول كمان حيعملوا فراخ دستوري؟ مش ناقص غير يقولوا لنا المجلس العسكري الاب

المفروض ان الحكم العسكري ده وضع استثنائي.. وبعد ما قتل لنا اكتر من 22 شهيد في يوم واحد ما بقاش نافع يقعد ولا ثانية، وسؤال مين ييجي ده سؤال استفزازي قال يعني هم ممشيين البلد... ايش حال ان ما كنتوش عمالين تشتكوا من وقف الحال وتقولوا الثورة.. هي الثورة بتحكم البلد؟ اللي حاكم البلد هو اللي واقف حالها، ولما كنا قاعدين بطولنا التمنتاشر يوم البلد كانت ماشية زي الفل

لكن ما علينا... بما ان مصر هبة الاستقرار، وانا مقدرة برضه انها اقدم دولة في التاريخ والناس مش عارفة تتخيل ازاي يعني الناس الكبارة تمشي.. تمشي تروح فين؟ خلاص من مييييين؟ بلاش السلوجان ده

وبما ان الناس مدمنة مؤسسات، وآخر عامود في الخيمة والكلام الفارغ ده، فاحنا اتفقنا على اننا نقترح حلول ما تعملش خلافات بين الناس، يعني بدل ما نقترح اسماء اشخاص وكل شوية حد يطلع لنا زي الخازوق ويقول لنا: البرادعي لأ... ابو اسماعيل لأ... ابو الفتوح؟ دي مؤامرة اخوانجية... ننقل السلطة الانتقامية من مؤسسة الجيش الى مؤسسة القضاء

طبعا برضه انا مقدرة ان الناس في الميدان قلبها محروق.. وحيبقى عندها تحفظات على حاجات كتير، زي ان نفسهم المجلس يتحاكم ويتعلق من رموشه بعد ما حرق قلوبنا كلنا، زي انهم شايفين زي ما انا شايفة ان مؤسسة القضاء مؤسسة فاسدة زيها زي مؤسسة الجيش.. بس نيجي على نفسنا يا شباب.. عادي بقى، ما احنا ناكل العلق ونقعد نحايل في اللي قاعدين في بيوتهم.. عشان اللي قاعدين في بيوتهم خايفين.. اه... اللي واقفين قدام الرصاص الحي مش خايفين وهم اللي قاعدين يحايلوا في اللي قاعد تحت البطانية ويطمنوه.. هي مصر كده.. ام العجايب، زي ما هي البلد الوحيدة اللي الاغنيا فيهم هم اللي عندهم حقد طبقي على الفقرا والفقرا ما عندهمش اي حقد ويقعدوا يقولوا: ربنا يزيده ويرزقه.. نصيبنا بقى.. اجيب لكم شعب منين؟ استورد؟ ولا حنرميهم يعني؟

احنا مضطرين ننقل السلطة الانتقالية الى مؤسسة في الدولة عشان ما يقعدوش ياكلوا دماغنا ويقولوا لنا بتهدوا الدولة بتهدوا الدولة كأننا بنهد الهرم.. اصلا ربنا عامل لنا معجزة في الهرم الاكبر لها رمزية كبيرة:

الهرم الاكبر قمته عليها خازوق.. سبحان الله، فعلا قمة الهرم في مصر عبارة عن خازوق.. اكبر خازوق في حياتنا.. قمة الهرم في كل حاجة وكل مؤسسة وكل تنظيم... بس الناس بتحب الهرم.. خلاص... نحايل الناس وناخدها على قد عقلها بس نخلص من المقتلة المستمرة دي

اه طبعا مؤسسة القضاء مش حتفرق عن مؤسسة الجيش من حيث الفساد، بس اولا: مش حتحاكمنا عسكريا، ثانيا: لما ننزل نتظاهر ضدهم مش حينزلوا لنا شرطة عسكرية ولا حيدهسونا بمدرعات مرتبكة، يدوبك حينزلوا لنا الداخلية تقتلنا ودول بنعرف نبهدلهم. ثالثا: الاقتراح ده مطابق للاستفتاء اللي الناس قالت عليه نعم، اللي اخل بالاستفتاء وغير ارادة الشعب هو المجلس العسكري، لكن الشعب قال نعم على التعديلات الدستورية، التعديلات الدستورية لدستور 71.. مش الناس قالت له نعم؟ خلاص.. بينا وبينكم الورق والاستفتاء وختم النسر يا اقدم دولة في التاريخ.. مبسوطين كده؟ جبنا لكم ختم نسر ومؤسسة اهو. رابعا: القضاء حيبقى قدامه فرصة بحد اقصى 60 يوم مش حيقعد يقول لنا احنا مش حنقعد اكتر من ست عشر تلاتين شهر سنة قرن كده.. يدوبك مسافة السكة.. خامسا: لو مرمطناهم ماحدش حيقول لنا خط احمر وعايزين تهدوا البلد واسرائيل حتهجم علينا وفنزويلا حتحتل شبرا والكلام ده.. الجيش يرجع يحمي الحدود.... هأ.. قال يحمي قال.. يا ريتنا ما شفناكم ولا عرفنا حالكم المنيل.. يا ريتنا قعدنا عليكم ساعة ما خلفناكم.. هييييه... يالا... نصيبنا... المهم يعني.. اعتبروهم راحوا يحموها.. المهم نغورهم من وشنا والنبي.. انا ما بقتش مستحملة خلقة ميري تاني.. الشرطة احنا نعرف نتصرف معاها... المهم الجيش بشرطته العسكرية بمحاكمه العسكرية بخطه الاحمر بصابرين صابرين صابرين بسلاطاته ببابا غنوجه يغور من وش امنا بقى.. ونستعد للفل الجديد

بالنسبة لاقتراح حكومة انقاذ وطني... ده عند امه يا ادهم.. دي حكومة انقاذ العسكر مش حكومة انقاذ وطني، حنغير شرف ونجيب البرادعي ولا نجيب ملاك منزل من السما برضه هو تحت حكم العسكر والمسدس على راسنا وراسه.. مافيش الكلام ده.. الكلام ده فارغ.. فارغ وقلة ادب.. قلة ادب.. ده استعباط.. استعباط زي استعباط مبارك لما عين عمر سليمان نائب واقال الحكومة كأن المشكلة كانت في ان مالوش نائب وان الحكومة دي هي اللي وحشة.. احنا بنهزر معاكم؟ بنهزر معاكم؟

ينعل ابو عبده مشتاق اللي عايزين اي منصب دول.. وانتوا خاسس عليكم حاجة؟ حد بيموت لكم؟ حد بيتخزق له عين من اعز الحبايب لكم؟ من انتم؟ من انتم؟

باقولكم ايه... انتوا مش عبده مشتاق؟ استنوا لما الانتخابات الرئاسية تتعمل عشان تشتاقوا براحتكم

الانتخابات البرلمانية تتعمل في معادها... عشان الاخوان ما يزعلوش.. قال يعني حتفرق في حاجة انتخابات من عدمها طول ما احنا تحت حكم عسكري.. بس معلش.. ناخدهم على عقلهم عشان ما نزعلهمش

حاجة تانية مهم قوي: عفا الله عما سلف.... شششششششششششششششش شت شت شت... بااااااااس... ما تشدش في شعرك ياللي في التحرير.. انت عايز المصلحة ولا عايز تقعد تغل في نفسك؟ لو كنت عايز حاجة تانية غير المصلحة ما كنتش بهدلت نفسك كده

خلاص.. يبقى المصلحة اهم.. المصلحة المشتركة دلوقت ان العسكر يمشي.. وده مش حيمشي الا كلنا نتجمع ونتغاضى عن خلافتنا، لا نقعد بقى نلوم في الاخوان، ولا نقعد نأنب في اللي استندلوا في احداث ماسبيرو ونفكرهم بسكوتهم وقتها، ولا نسلخ في حازم ابو اسماعيل عشان خلع من الاعتصام يوم 18 نوفمبر ونقول للبرادعي انت جيت شهقة يا رمضان ولا اي حاجة من دي.. خلاص.. عفا الله عما سلف.. ولو مؤقتا، لحد ما نخلص من العسكر

عايزين نطمن كل الناس اللي خايفة تنزل الميدان لتاخد بالجزم القديمة والشباشب المتعاصة في الكنيف ان جزمنا في رجلينا وشباشبنا مش حنعوصها في الكنيف.. انزلوا بكامل طاقتهم وما تخافوش.. وما تعملوش فينا مقالب عشان خايفين منا.. عفا الله عما سلف.. مش حنضرب حد، المصلحة الواحدة دلوقت ان الحكم العسكري ينتهي فورا.. فورا فورا

وده البيان المقترح اللي عملته المجموعة وبيتوزع دلوقت في الميدان عشان ناخد بيه موافقات من الناس اللي عمال تتعجن من يوم 18 بالليل دي... معلش سامحوني يعني.. هم اولى ناس يبقى لهم الكلمة الاولى وبعدين اي حد غيرهم ييجي بعدهم.. ده كفاية ان المصابين اتصابوا تاني

البيان:

ثانيا: يكون هذا المجلس مسئولا عن اجراء الإنتخابات البرلمانية فى موعدها على ان يعقبها الإنتخابات الرئاسية مباشرة

شيروه.. وخدوا عليه موافقات

واحنا حناخد عليه موافقات في الميدان ونشوف.. الكلمة الاخيرة للميدان برضه.. معلش يعني... عدم اللامؤاغزة..

احنا كمان بنجمع عليه توقيعات من شخصيات عامة، وفيه ناس كتير موافقة عليه
سؤال بقى:
22 شهيد... الميدان مش مليونية ليه؟
كلمة وقلتها ايام ماسبيرو وباعيدها تاني: اللي يرضاها للناس او يسكت عليها... يشوفها، يشوفها.. مش دعا على حد.. ده تقرير واقع.. عدل ربنا كده، وقلت لكم لو فلتوا بعملتهم في ماسبيرو مش حيكبروا لحد... ولو فلتوا بعملتهم في ماسبيرو ربنا مش حيسيبنا
ابدا... ماحدش سمع الكلام.. خليكم بقى.. انا خالية ذمتي امام الله الحمد لله
والعسكر حيمشي.. العسكر حيمشي.. المجلس العسكري كله قصاد شعراية من مالك مصطفى عندي.. حرقوا قلبي
حرقوا قلبي

يالله توكلنا على الله

2011-11-18T11:32:00.001+02:00

الله

العسكري حيمشي :)

2011-11-18T03:50:00.001+02:00

ان شاء الله

انا عارفة اننا مش طايقين بعض خالص دلوقت حاليا... بركات المجلس العسكري بالصلاة ع النبي... لا تقولي زوبة ولا زنوبة ده انت لهلوبة يا اوسطتنااااا

احنا خارجين من الميدان يوم 11 فبراير سمن على عسل.. كل مسيحي واخد في دراعه سلفي وماشيين يتمشكحوا على الكورنيش.. كل ليبرالي حاطط دراعه على كتف اخواني وماشيين يقزقزوا لب، وكنا في حالة من الحب اللزج

خدنا عشر شهور بقيت انا شخصيا ايدي اليمين مش طايقة ايدي الشمال.. وعورنا بعض جامد

وزي ما قلت لهم على التويتر، لو قلت نحب بعض حيبقى مطلب صعب.. احنا مش طايقين بعض من الاعماق.. انا شخصيا مش طايقاكم.. اه... كلكم.. من ساعة ماسبيرو وانا مش طايقة حد غير بعض اصحابي.. والباقي قلبت عليهم خلاص

بس احنا دلوقت لازم نطيق بعض مؤقتا كده لحد ما العسكري يمشي... وحيمشي.. حيمشي حيمشي حيمشي... ان شاء الله

مش حنمشي.. العسكر يمشي

قولوا يا رب.. مالناش غيره، ونستحمل بعض بقى في الميدان.. يعني نحاول بقى نتجنب نتكلم مع بعض خالص عشان لو قلنا لبعض صباح الخير حنرد على بعض وكمان بتقول صباح الخير؟

العسكر مش حيمشي بانفراد فصيل واحد بالميدان... اتعلمنا كده ان الناس دول بيمشوا لما كلنا بنتجمع.. تلقى السما ع الارض.. واما البشر يتفرقوا تلقى السما بتنفض

فالسلفيين مضطرين يستحملوا صلاح عناني... وانا مضطرة استحمل السلفيين.. والاخوان مضطرين يستحملوني.. والمسيحيين مضطرين يستحملونا كلنا... وهكذا

لحد ما العسكري يمشي.. لو ما اتجمعناش العسكري مش قاعد ل2013.. حيقعد ل2064 على كده. لو فضلنا متخانقين

احنا قاعدين في الميدان ان شاء الله... لما العسكري يمشي

احنا ما كناش بنهزر معاه لما عملنا ثورة

قولوا يارب

لازم كلنا نروح نشهد

2011-10-13T15:51:00.002+02:00

تحديث:
المركز القومي لحقوق الانسان بيستقبل الشهادات ومقره:
ش التحرير بالدقي، عمارة سينما التحرير، الدور 14
موجودين يوميا ويوم الجمعة كمان من الساعة 11 وحتى الساعة 7 مساء
--------
للاسف قضية ماسبيرو اتحولت للقضاء العسكري.. بس هم طالبين شهادات الناس والادلة اللي عندهم

لازم نروح كلنا نشهد، اللي حضر حاجة لازم يشهد بالحق مش كفاية انك كتبت شهادتك ونزلت الفيديوهات، لازم تشهد قدام القاضي، ولا تكتموا الشهادة ومن يكتمها فإنه آثم قلبه

عشان الناس ممكن تقلق من موضوع القضاء العسكري ده

المركز القومي لحقوق الانسان بيجمع الشهادات، رجاء الاتصال بالاستاذ نبيل شلبي

01001889317

او الاتصال بالمركز المصري للحقوق الاقتصادية والاجتماعية لانه ماسك القضية

العنوان : 1ش سوق التوفيقية - الدور الرابع - وسط البلد - القاهرةتليفون :25783076

د.صفوت حجازي كلمني

2011-10-09T14:24:00.000+02:00

صحيت الصبح لقيت تليفون من الدكتور صفوت حجازي والمكالمة كانت بخصوص التصريحات بتاعته

انا حانقل لكم المكالمة زي ما هي، هو قالي:

بصي يا نوارة انا باتشتم ليل نهار ومش بيهمني وفيه ناس قليلة تهمني انت منهم عشان كده كلمتك، الموضوع اللي انا قلته ده معروف لكل الناس هو انت مش عارفاه؟

انا: لا يا دكتور مش عارفاه ومش عايزة اعرفه.. وانا شايفة ان الكلام ده ما يلقيش بقيمتك ومش موفق

هو: انا عارف اني غلطت اني قلت كده، وعارف انه كلام مش موفق، بس انا تعبت، انا مش باقعد في البيت، ومش عايز حاجة من حد، ومش حاترشح، ولا حاقبل مناصب، وعايز لما الثورة دي تخلص اروح اقعد في المدينة المنورة واريح دماغي، انا بقيت متهيالي اني ارمي التليفون ده، فيه مجموعة معينة ما وراهش غيري، ووصل الامر انهم يقدموا فيها محاضر وبلاغات كاذبة ان صفوت حجازي تعدى علينا بالضرب، وانا العيال دي عارفها بالاسم، وعارف هم ايه؟ وعارف الاحزاب اللي بتاخد فلوس من الجيش، وقلت ان فيه احزاب بتاخد فلوس من الجيش في نفس الندوة دي وماحدش بروز الكلام ده، ولا حد قال اني قلت اننا مش حنقبل حاكم عسكري لمصر، كل اللي بروزوه الكلام التاني اللي قلته، انت ما تتخيليش الضغط على اعصابي عامل ازاي، واتهامات على طول، وتخوين على طول، وانا عندي بيت واسرة وبناتي بيعيطوا لما بيشوفوا الكلام ده عن ابوهم، ويجنني بقى لما الاقي الكلام ده من ناس انا عارفهم، وعمري ما حاقول اسماءهم بس انا عارفهم وعارف هم ايه.. ويوم 8 ابريل وقعوني وكان هدفهم الاغتيال، ويوم صلاة العيد تعدوا عليا، وعلى طول يطلعوا في الاعلام ما وراهمش غير صفوت حجازي، هو صفوت حجازي ده مش بني ادم؟ ما بيحسش؟ ما بيغلطش؟ انا باحاول اعمل اللي اقدر عليه لله وللبلد ومش عايز حاجة ومش عايز حاجة ومش ناوي اقبل اي مكافئات دنيوية، بس انا بشر، وليه التصيد اللي على طول ده؟ وليه لما اقول حاجة كويسة تتخفي والاعلام ما يركزش عليها، ولما اغلط تنزل مانشيت؟ وكوني غلطت اتشنق يعني؟ طب هم ياما خاضوا في عرضي وقالوا عني كلام سافل كتير.. هه.. ماحدش اتكلم ليه ولا قال حاجة ولا دافع عني؟

------------------------------

بصوا بقى... انا فاهمة تماما اللي هو بيقوله.. تماما

وفاهمة الضغط النفسي اللي واقع عليه، وفاهمة احساسه بصراحة، وفاهمة يعني ايه الواحد يبقى طالع تلاتينه في الحياة ويلاقي عيال رمم وزبالة عمالة تزايد عليه، وانا بصراحة عمري ما كلمت صفوت حجازي على غفلة ولقيته في بيتهم ابدا، وعمري ما رحت في حتة ولا كلمت مصاب ولا محبوس ولا منكوب ولا ابو شهيد الا ولقيته وهو بيشتكي لي يقول لي: والله لولا صفوت حجازي كان زمانا مش لاقيين ناكل..والله صفوت حجازي اللي جاب لنا المحامي، والله صفوت حجازي هو اللي دخلني المستشفى

دي شهادة لوجه الله واللي مش مصدقني ينزل بنفسه يروح للمصابين ويجيب قدامهم سيرة صفوت حجازي، ولا يروح يزور اللي مقبوض عليهم في المحاكمات العسكرية ويجيب سيرته، حتى الناس اللي هو مش موافق على مواقفهم زي ظباط 8 ابريل، بيروح لهم برضه

ايه بقى اللي بيخلي الناس تبقى عدوانية عليه؟ ان ناس تانية برضه بتعمل شغل ومجهود ويفضلوا يقولوا لي: يعني هو ماحدش انضرب في الميدان غيره؟ هو ماحدش وقف مع المحابيس غيره؟ هو ماحدش وقف مع المصابين غيره؟ ماحدش ماسك ملف الشهدا غيره؟

لا فيه ناس كتير عملت حاجات غيره.. بس هو اللي بيتشتم مش هم، منى سيف ومالك عدلي واحمد سيف واحمد حلمي وغيرهم بيعملوا حاجات كتير للمقبوض عليهم والمصابين واهالي الشهداء، بس ما سمعتش حد بيشتمهم، ولما بتيجي سيرتهم بيشكروهم، ناس كتير كانت حتموت في الميدان، ومالك مصطفى مثلا انا برضه كنت باشوفه على طول وهو اول ما يشوف ضرب يجري عليه، يشوف رصاص يجري عليه، بس ماحدش بيشتم مالك مصطفى

بطلوا تشتموه وانا ابطل ادافع عنه

بطلوا تشتموه وهو يبطل يقول تصريحات مرة تصيب ومرة تخيب

وانا فاهمة والله يعني ايه الواحد يتعب ويزهق ويحس انه بيحفر في بحر وانه بيتعامل مع اشكال قليلة الاصل لحد ما يغلط غصب عنه، فاهماها تماما.. اذا كنت انا الفسلة اللي ما باعملش نص اللي هو بيعمله بابقى عايزة اولع في الناس ومرة اتخانقت مع واحد كاتب على التويتر: انا في المسيرة ومش شايف نوارة

قلت له: ونوارة مش نازلة تاني خالص بقى.. لك عندها حاجة؟ انت مش ابويا عشان تفتش عليا.. هو انا الدادا بتاعتكم؟ اشمعنى انا اللي باتعامل كده؟ اقعد في الاعتصام في الصينية يقولوا طالعة تتصور، اخش الخيمة يقولوا هي جاية تعتصم ولا تنام في الخيمة، اكنس الميدان يقولوا بتستعرض، اسيب ام المقشة واقعد يقولوا فاكرة نفسها اميرة ومشهورة وهي تقعد والناس تخدم عليها، وتنزلوا المسيرات تدوروا عليا؟ انتوا نازلين المسيرة عشان حاجة مقتنعين بيها ولا عشان تفتشوا عليا وتشوفني نزلت ولا لا؟ اشمعنى ماحدش بيدور على بلال، ولا على ابراهيم عيسى، ولا على الحملاوي، ولا على رشا عزب، ويوم ماحد يشوفهم يبقى كتر خيرهم انهم نزلوا، وانا كنت الخدامة يعني ولا ايه مش فاهمة؟ والناس قعدت تقولي: معلش يا نوارة ما يقصدش.. ده من العشم.. وانا برضه غلطت نفسي اني اتكلمت كده، هو ما قالش حاجة لده كله.. الجدع بيدور عليا محبة يعني.. بس الضغط العصبي بيخلي الواحد اعصابه تفلت

وبمناسبة بقى بلال وابراهيم عيسى، اول ما يختلفوا معاكم يبقى بلال وابراهيم عيسى باعوا نفسهم.... انا زهقت على فكرة

زهقت قوي.. زهقت من قلة الاصل والمزايدة واللي يوضيكم زي اللي ينجسكم.. بلال وابراهيم ايه اللي حيبيعوا نفسهم؟ ايش حال ما شفتهم سنة 98 وهم بيتقاسموا سندوتشات الطعمية وبيرموا على بعض حساب القهوة زي فيلم المنسي لما عادل امام قال لاحمد ادم: انا جبت لامك ازازة زيت الاسبوع اللي فات حاسب انت حساب القهوة بقى... وكان جرنالهم مقفول وطالع عينهم ومش لاقيين يدفعوا الايجار ولو كانوا قالوا يا بيع ساعتها كانوا لقوا الف شاري.. ما عملوهاش وهم مش لاقيين ياكلوا حيعملوها دلوقت؟ وهو كل عيل اهطل نزل له يومين افتكر نفسه صلاح الدين الايوبي وحيفضل يزايد على ام الناس وينصب لهم محكمة؟

خلاص.. صفوت حجازي قال تصريحات مش موفقة من كتر الضغط وهو حاسس انه غلط... ندبحه على العيد؟ ندبحه على العيد وننسى ان راسه كانت مفتوحة في الميدان وما رضيش يخيطها ولبس عليها حلة وراح وقف تحت تمثال عبد المنعم رياض يشاور للقناصة عشان يضربوا عليه

هو لوحده اللي عمل كده؟

لا مش هو لوحده اللي عمل كده... بس هو لوحده اللي مشهور ومعروف وشجاعته في الاقدام على الموت شجعت شباب كتير من اللي بيثقوا فيه.. وهو لوحده من ضمن المشاهير اللي ما كانش بيرضى ان "مريديه" يحاوطوه ويعملوا له بودي جاردز زي ما بنشوف مع بقية المشاهير، وكان بيزقهم ويجري على الضرب وده كان بيشجع شباب تاني، يعني اخد ثواب نفسه وثواب غيره من الشباب اللي بيحبه واتشجع لما لقاه بيعمل كده، وهو لوحده من المشاهير اللي كان بيتخانق مع الناس اللي بتقوله: خليك انت يا دكتور صفوت ورا، ويمكن اول مرة يشتم قال: ينعل ابو الشهرة انسوني سيبوني ماحدش له دعوة بيا

التصريحات اللي قالها دي غلط، وما يليقش انه يقولها، وبتحط ناس كتير ابرياء في دائرة الاتهام، وهو قالها بسبب الضغط العصبي اللي عليه وانا بصراحة فاهمة قوي موضوع الضغط العصبي، الشهادة لله انتوا تكرهوا الواحد في عيشته وتندموه على انه عمل خير في حياته ولو تعرفوا في القعدات الخاصة فيه ناس وصل بيها الامر انها تقول: والله مبارك كان معذور.. ده ايه القرف ده؟

ولا فيه ام تمييز وبالظبط بالظبط اللي يوضيكم زي اللي ينجسكم، واللي ما بيعملش حاجة غير الرغي الفارغ وتفريق الصفوف واحنا عارفين عنهم حاجات مش عايزين نقولها تعملوهم عجل ابيس وتقدسوهم واياك حد يتني لهم كلمة، واياك حد ينتقد اي حاجة بيقولوها، وعمالين تألهوهم واحنا عارفين دواخلهم وعارفين اتصالاتهم بالجيش وعارفين الاعيبهم واتصالاتهم بالسفارات كمان ومش عايزين نتكلم، وعشان ما بنتكلمش انتوا عاملينهم آلهة وماحدش يقدر يقول عنهم حاجة مع ان مواقفهم باينة، وتمشوا وراهم وورا طراشهم ولما يعكوا الدنيا تختلقوا لهم اعذار.. مع ان ابسط حاجة الناس دي قاعدين في بيوتهم يعني عمرنا ما شفنا لهم نزلة ولا بهدلة ولا نيلة، وهرابين من المواجهة كمان... واللي يتفانى بجد ووارد انه يقع في الغلط زي اي انسان تطلعوا ميتين اهله لما حاجة بقت تقلب البطن.. ماهو طبيعي اللي ما بيعملش حاجة ما بيغلطش واللي بيعمل عشرين حاجة وارد انه خمس حاجات تفلت منه... ايه؟ وطبيعي انه لو بيعمل عشرين حاجة تتفق معاه في تلاتاشر حاجة وسبع حاجات تختلف معاه فيهم، تسيب التلاتاشر حاجة وتمسك في السبع حاجات وتخونه كمان عشان مش متفق معاك؟

بس ده حال الدنيا.. حنعمل ايه؟ الصبر.. الصبر

هم يعني الناس اللي بتشتم دي احسن من سيدنا علي اللي قالوا له: انت على الحق، تقبل حلول وسط ليه؟ انت كافر.. يالا توب بقى وادخل الاسلام

ماهو التاريخ فيه الفئة الباغية اللي كسبت الدنيا.. واللي اعتزلو وقعدوا مالهمش اي تلاتين لازمة في الحياة غير يرغوا وطبعا كفوا نفسهم شر الناس وماحدش اتعرض لهم لانهم حزب كنبة.. والفئة اللي على الحق ودي الفئة الوحيدة اللي اتشتموا وكل واحد فيهم مات مقتول

هو ربنا عايز كده

بس برضه نتعلم من سيدنا علي.. صحيح ماحدش فينا زيه مهما حاولنا، وبرضه البني ادمين ضعفا، بس هو اتشتم على المنابر واتكفر واتقال عليه كلام اوحش من ده كله وما وقعش نفسه في الغلط وقبل ما يتكلم كان بيحسب كل حرف طالع منه.. نحاول على قد ما نقدر، وده اللي انا قلته للدكتور صفوت، يحاول على قد ما يقدر انه يمسك نفسه، ولو لقى نفسه مرهق قوي يرتاح 48 ساعة بس.. ده ما بيهمدش خالص.. خالص.. ده زمان مراته وعياله بيدعوا على الثورة دي، والضغط ده والارهاق ده هو اللي وقعه في الغلط.. هو مش عيل صغير على البهدلة دي وكمان قلة ادب

وانا مش حاشهد شهادة زور عشان اعوم على عوم الناس واراضيهم على حساب الحق، ومش حامسح مساهمات بني ادم وبطولاته عشان قال تصريحات غلط، الغلط يتقال عليه غلط بمعزل عن تشويه الشخص، وهو معترف انه كان غلط يقول كده، الكلام ينفع يعتذر عنه والموضوع ده يتقفل ويتحرم استخدام الاسلوب ده في الكلام خالص بينا وبين بعض، لكن الافعال ما تتنسيش

وقبل ما اي عيل خايب في الحساب يقول لي ما مبارك عمل الطلعة الجوية نسامحه؟

والله لو مبارك اخطاؤه على قد الكلام بس كنا سامحناه، لكن خطيئته تعدت القول الى الفعل وقتل ناس وبقى فيه دم ابرياء، ثم ان مبارك كان في موقع مسئولية ورئيس، صفوت حجازي لا رئيس ولا وزير ولا حتى مدير البوفيه

والناس اللي قاعدة ما ورهاش غير تدور ورا خلق الله.. والله لو فكروا يعملوا اي حاجة مفيدة في حياتهم مش حيبقى عندهم وقت يشتموا الناس

ومدام جبنا سيرة سيدنا علي بقى، احب افكركم ان الخوارج كانوا ثوار، وثوار انقياء كمان، وكانوا بيدوروا على الحق، وكانوا راديكاليين، وانتهى بيهم الامر انهم كفروا سيدنا علي وولاده.. واللي شتموا سيدنا ابو بكر وسيدنا عمر برضه كانوا ثوار، وانقياء، وبسبب اختلاف في المواقف السياسية مسحوا 23 سنة من الكفاح والبهدلة والتضحيات وقرروا انهم ناس وحشة عشان موقف واحد

البني ادم ما يسارعش لفتح جاعورته كده.. كل واحد وارد انه يغلط، ومدام مش بيكابر في الغلط يبقى الموقف انتهى

اقرأوا الفاتحة للبطل الحقيقي لنصر أكتوبر

2011-10-06T13:07:00.001+02:00

بطل نصر اكتوبر الحقيقي: الفريق سعد الدين الشاذلي رحمه الله، اللي ما استفادش حاجة

اضغط على الصورة عشان تحمل مذكراته

الفاتحة موهوبة لروح بطل النصر سعد الدين الشاذلي:
بسم الله الرحمن الرحيم، الحمد لله رب العالمين، الرحمن الرحيم، مالك يوم الدين، إياك نعبد وإياك نستعين، اهدنا الصراط المستقيم، صراط الذين أنعمت عليهم غير المغضوب عليهم ولا الضالين.
سلام على روح البطل سعد الدين الشاذلي، السلام عليك أيها الشريف ورحمة الله وبركاته، أنتم السابقون ونحن بكم إن شاء الله لاحقون

استحملوهم.. اصل احصابهم تعبانة

2011-10-05T13:29:00.000+02:00

معلش معلش... سد يا بابا سد... الجيش الشجاع الهمام ومعاه الامن المركزي الدكرة الجامدين قوي اللي انضربوا على الحدود واتقتل منه ستة ومالقوش حد يسأل في حقهم ولا ياخد تار دمهم غيرنا، واتوقعوا في عرضنا واحنا عند السفارة: اوعوا تمشوا قبل ما تخلصوا لنا الموضوع ده.. واخرتها يتقبض على اكتر من 110 واحد ويتقدموا للمحاكمات العسكرية عشان كانوا بيدافعوا عن جيشهم اللي انضرب على الحدود.. دولم بقى الظاهر يا قلبي دمهم اتحبس قوي، وبقوا حاسين انهم الصراحة راحة يا روحي

قالوا لك نعمل رجالة على مين، نعمل رجالة على مين؟

راحوا عملوا رجالة على الجدع ده.. ولو فيهم راجل كان وقف له فارس لفارس، مش يتكاتروا عليه لحد مايقلعوه هدومه

جاتها نيلة اللي عايزة خلف، يفتحوا للبلطجية يوم الجمل واقول لواحد فيهم اتحرك يقعد يعيط ويقولي مافيش اوامر، ينضربوا على الحدود ويفتحوا بقهم، يحرقوا للناس كنايسهم عشان يلاقوا حجة يجددوا بيها الطوارئ ولما الناس تبكي وتنوح على كنايسها تنضر.. راجل يا حسام.. طب بالنسبة لانهم مسكوا الشباب من شعرهم يوم 15 مايو وقالوا لهم: حتحرر فلسطين بشعرك ده؟ عندي اقتراح لاحسن رجال.. ما تجربوا تطولوا شعركم ينكن ربنا ينفخ في صورتهموده فيديو تاني
احنا النهاردة ان شاء الله الساعة سبعة مساء عندنا مسيرة تبدأ من السيدة عائشة مرورا بالسيدة زينب ووصولا الى التحرير... يا رب يحودوا على مولانا بالمرة اهو نسلم

حقيقة ما حدث في جمعة 9/9: حاقول لابني ايه؟

2011-10-01T13:12:00.002+02:00

"عشان شكله فقير الظابط قال: بقى ده منظر ده؟ ده منظر الواحد اول ما يشوفه يشتمه" وهي دي الطريقة اللي جيشنا المغوار وشرطتنا المضروبة بيحكموا بيها على "المجرمين والبلتجية والخارجين عن الكانون" عشان كده جمال مبارك شاور لنا بصباعه وماحدش شتمه.. اصل مستحمي

اسفخص على اشكالهم.. ماله منظر الفقير؟ مش احسن من مناظرهم الواطية؟

بيان ثوري ردا على بيان 75

2011-09-30T01:06:00.001+02:00

ده بيان المجلس العسكري اللي بيقول لنا فيه انه ناوي يخرب منشآت ويتهمنا فيها، وناوي يحط مندسين يعتدوا على وحدات عسكرية

اولا:

بيان الى المجلس:

قديمة يا مجلس... اي احداث شغب تحصل بكرة انت الجهة الوحيدة المسئولة عنها.

ثانيا:

اي حد حنلاقيه عامل ثوري وبيزايد علينا عشان يجرنا لمواجهات تؤدي لتخريب منشآت او اعتداء على وحدات عسكرية حيتمسك ويترن علقة ما شفهاش حرامي في مولد ونشكر المجلس على حسن تعاونه انه بلغنا عن التحريات العسكرية بتاعته وعن هم ناويين يعملوا ايه ويقولوا ايه ويزايدوا علينا بايه.. واحنا حفظناهم دول خلاص، حتى بقينا عارفين وشهم

والله الموفق

توكلنا على الله

2011-09-29T20:31:00.002+02:00

بكرة ان شاء الله كلنا نازلين...

كلنا يعني كلنا.. يعني حزب الكنبة والمواطنين الشرفاء... يعني شباب الاخوان والقيادات لا، وشباب الاخوان اللي نازلين عمالين يدعوا على مكتب الارشاد ولا دعايا على عمر سليمان.. يعني شباب السلفيين والمشايخ لا... المسيحيين والكنيسة ما فتحتش بقها... يعني اللي بيسموهم ليبراليين لما بيلاقوهم مطولين شعرهم.. والباقيين اللي هم احنا بقى.. العالم الصايعة اللي راشقة في اي مظاهرة واعتصام دي.. اللي هو اللمة بتاعتنا دي بالصلاة ع النبي، المندسين، واللي خربوا البلد وكدهون

فوايد شهادة المشير انها لغت الاستقطاب الايديولوجي والمصلحجي والطبقي ورجعت استقطاب: ناس حقانية وناس ولاد تيت.. من كل الفئات والتوجهات والطبقات

ايه بقى؟

على الشعب ان يستعد تماما

المجلس قفل قناة الجزيرة، وبيدينا اشارة انه ناوي يستفرد بينا، وبيعمل عمليات ارهاب وترويع وتكفير ونفس الشغل اللي عمله مبارك يوم 24 يناير.. بس الحمد لله احنا المرة دي اشجع من المرة اللي فاتت، ومستبعيين اكتر من المرة اللي فاتت.. وقلبنا محروق بالدم اللي راح

وزي ما قلنا المرة دي حنقول تاني

انت بتعمل الصح يا حزلئوم، انت على جانب الحق يا معلم.. نزلت لقيت اللي مع الحق عددهم كبير خير وبركة، نزلت ما لقتش غير انت ومحسوبتك يبقى احمد ربنا انك نجيت وعرفت الحق فين

انا حاعتصم ان شاء الله

لو فيه مسيرة حاشارك فيها ان شاء الله

لو ربنا كرمني بالشهادة يبقى اخير دعواتي استجيبت.. قولوا يا رب ينولها لك يا نوارة يا بنت صافي ناز.. قولوا

لو ما قطعوش النت احنا حنصور وننزل فيديوهات ونبعتها للجزيرة مباشر مصر هنا

ولو عايزين نقول اي مداخلة حنتصل على الرقم ده

0140447722

الجزيرة دي وقفت جنبنا في ثورتنا، ومش حنسمح للمجلس انه يقفل اي قناة، دي لو كانت المحور اللي هي احقر قناة خلقها ربنا ما كناش سكتنا، ما بال اللي وقفوا جنبنا، واحنا ان شاء الله حنديهم السبق

متوقع من المجلس انه يعمل اي حاجة

متوقع انه يسلط بلطجية

متوقع انه يعمل حرايق او تخريب من اي نوع عشان يلبسنا فيها وعشان كده قفل الجزيرة عشان ما تكشفش ستره

متوقع منه يعمل اي مصيبة

معلش.. هي دي اول طبلة دقت على راسنا؟ احنا نعرف نحمي بلدنا ونحمي ثورتنا ونحمي نفسنا من الاضيشهم وتكالنا على الله

قولوا يا رب

مالناش حد غيره

ياااااااااا رب

ألا في الفتنة سقطوا

2011-09-29T02:05:00.004+02:00

البيان ده من حملة حازم صلاح ابو اسماعيل وكتبه المقداد جمال.. روح يا شيخ، الهي يجبر خاطرك، ويعلي مراتبك، وينور طريقك، وينجيك من الجاي انت وحملتك قادر يا كريم.. دي مش اول حركة مجدعة يعملها حازم وحملته.. ربنا ينصفكم يا شيخ، كفاية انك مش قذر ولا بتاع صفقات

واللي اتخلوا عنا واعلنوا انهم مش نازلين يوم 30 سبتمبر منكم لله.. احنا كده كده لابسين في حكم عسكري بسببكم، بس منكم لله، اشوفكم كده وهم متسلطين عليكم زي ما بعتوا الغلابة واشتريتوا الظلمة.. اشتكيتكوا لربنا يا ظلمة.. يا ظلمة، شاكياكم لربنا، ايوة ايوة، الدعوة السلفية والاخوان بدون ذكر اسماء.. شاكياكم لربنا بحق دم الشهدا اللي راح وانتوا بتفاصلوا عليه، ربنا يبقى يورينا فيكم.. ده الاخوان دول انا صبرت عليهم ولا صبري على المجلس ودي اخرتها؟ يقولوا مش لاعبين، ويقعدوا يفاصلوا مع المجلس؟ لو ما عملتش جدول حننزل يوم 30.. عملت؟ خلاص مش نازلين، بس لو ما عملتش القوائم اللي احنا عايزينها حنقاطع الانتخابات.. فاصلوا فاصلوا.. خلي الفصال مع الظلمة ينفعكوا، لو فصالكم مع مبارك نفعكم يبقى فصالكم مع المجلس ينفعكم، وعشان ما اظلمش حد، الدعوات دي على مكتب الارشاد، مش على كل الاخوان، عشان فيه اخوان كتير بيقطعوا في شعرهم حاليا دلوقت وانا باكلمكم، على الاقل اهالي الشهداء منهم

اليكم البيان:

" السفينة التائهة في البحر .. ردا على بيان الدعوة السلفية الأخير "

بسم الله الرحمن الرحيم

لقد كنا – نحن الإسلاميين - والشعب المصري جميعاَ كمن كان محبوسا في سجن كبير في جزيرة معزولة , ثم مالبث أن خرج من السجن , وأطاح بالسجَان, ثم ترك الجزيرة الموحشة المظلمة التي فيها كل شيء سيء , وركب في سفينة جديدة , تبدو ضعيفة وهشة , ولكنه أحس أنها تستطع نقله , وأنها ستفي بالغرض.ركب فيها كأي راكب, موجها طرفه ناحية الأمل والمستقبل المشرق , ينظر تارة إلى نفسه فيري آثار السياط التي لازالت على ظهره, فيتذكر الماضي الحزين , وينظر مرة أخرى إلى الأمام, فيرفع بصره إلى أعلى سائلا الله أن ترسوا سفينته على بر العدل والرحمة.ركب في السفينة كأي راكب, ولم يكن هو السائق, ووثق في قيادة القبطان, ولكنه بعد فترة اكتشف أن القبطان لا يعرف القيادة, وبدأ يتخبط , وبدأت السفينة تميل يمينلا وشمالا, ففزع الناس, وبدأوا يصعدون له ويكلموه, كلُ بطريقته وأسلوبه ولكنه طمأنهم ووعدهم, ثم بعد فترة اكتشفوا أنه يقود السفينة إلى نفس الجزيرة السابقة , بل إنه سيرسوا على نفس الشاطىء الأليم الذي هربوا منه !!فلما همّ الناس أن يجتمعوا على كلمة واحدة رغم اختلافهم ليقولوا له " لن نرجع".. قال لهم البعض منهم:سنجلس نحن في أسفل السفينة حتى تبتّوا في أمركم, وتنهوا نزاعكم,لأننا نريد المسير للأمام والحفاظ على السفينة!!مع أن السفينة الآن لا تسير مطلقا إلى الأمام.لقد سائني وأحزنني ما قرأته من بيان الدعوة السلفية الأخير, وإن كنت لم أعجب منه!فلقد اكتشفت أن منا من لم يفهم الدرس التاريخي الأليم في 1952, ولم يحسن قراءة الواقع إلى هذا الحد.لقد كان قادة العمل الإسلامي يدخلون على قادة ثورة 52 ويخرجون, وأحيانا يرشدون ويوجهون, ومع ذالك لم تمض عليهم شهور حتى علّقوا على المشانق .أنا لا أخوّن رجال المجلس العسكري – ولا أخوّن من خوّنهم! - , وأتمنى أن يكونوا خيرا منا جميعا.ولكني حسبت أن فشل المجلس العسكري في إدارة المرحلة الانتقالية كان كافيا لأن نقف جمعا وقفة رجل واحد لنرفض التمديد له والمماطلة, ونرفض أن يحكمنا أكثر من عام واحد لم يحقق لنا فيها شيء. !! حتى محاكمة المخلوع المزعومة التي بدت أشبه بالمسرحية التي أكاد أشعر أن الفصل الأخير منها سيفاجىء كل الجمهور!!فقد يخرج لنا البطل "المخلوع" من وسط الجمهور ليلوح إلينا بيده بعدما لوّح لنا ابنه الموقّر بأصبعه !!إني أرجو من مشايخ وعلماء الدعوة السلفية قبل أن يخرجوا بياناتهم أن يستشيروا أهل السياسة, والعلم بالواقع , وهم لايبعدون عنهم كثيرا !!َ, وأن لا يكتفوا فقط برأي العلماء بحجة أنهم من يقرر الأمور لأنهم الأعلم بفقه الكتاب والسنة.ولنذكر جميعا أن هؤلاء العلماء كانوا هم أيضا الموجودون في الثورة, ورغم كل ميراث العلم ورغم كل تعاليم النهي عن الظلم والجور وأوامر التوحيد والكفر بالطاغوت !! عندما اختاروا اختاروا الخيار الخاطىء. وكتب التاريخ لأول مرة في تاريخ مصر الإسلامي , أن المشايخ والعلماء والازاهرة لم يكونوا هم قادة الثورة , ولكن كان الشباب الطاهر الشريف الذي أكثره لم يجلس يوما تحت أقدامكم ولم يسمع بأذنه كلماتكم.هؤلاء الذين منّ الله عليهم بأن يكتب قبل اسمهم كلمة " شهيد" , بينما جلس حفاظ القرآن والحديث في البيوت خوفاّ من الفتنة !! " ألا في الفتنة سقطوا" يا قوم .. هل تدركون أن البلاد تضييع ؟, وإن أعظم الجرم الآن أن نترك البلاد للمجلس العسكري يديرها بنفس أسلوب ( مليونية & بيان ) .. كلما أردنا منه شيئا نزلنا إلى مليونية , وهو يجيبنا فيخرج لنا بيان!!إن السبب في " خراب البلد المزعوم " وتعطلها , وحالة عدم الاستقرار فيه ,هو أداء المجلس العسكري الحاكم , الذي يخطوا في تحقيق أهداف الثورة العادلة كانه لايريد أن يحققها , كلما أقدم خطوة للأمام رجع ألفا إلى للخلف! إن سبب ارتباك البلاد الذي تشعرون به هو أن المسئول عن حماية ثغر الأمة الشرقي جالسٌ على الانترنت يكتب بياناتِ على الفيس بوك, بينما أبنائنا يقتلون على الحدود بأيدي اليهود !!يا أيها العلماء .. لقد ارتكبتم جرما عظيما , ستتحملون أنتم نتيجته أمام الأمة , لقد كرّه فريق كبيرٌ منكم الناس في الاعتصامات والمظاهرات, ولم يدرك أنه ينزع من الناس سلاحهم الوحيد الذين ظلوا ثلاثين سنة حتى يعرفوه, وثلاثين سنة أخرى حتى يستخدموه ويفعّلوه !!إني أتفهم جدا وأعلم تماما أنه خلال الشهور الماضية حدثت أحداث مراهقة كثيرة من بعض الحركات كانت لابد وأن لا تكون, وكان لها عامل كبير جدا في تشويه مسيرة الثورة. ولكن هذه ليست حجة لتبريد المسيرة الثورية التي لم تكتمل بعد , فالمجلس العسكري الذي لا يستجيب للضغط الجماهيري وللمسيرات والمظاهرات , لن يستجيب لبيانِ في موقع اسمه " انا السلفي !" ؟؟إني أقول لكم إن كنتم حقاَ تخافون من بعض الأفعال الصبيانية , فلما لا تنزلون أنتم للشوارع وتؤمنون الميادين؟؟ وأنتم أكبر فصيل موجود في مصر؟! وتستطيعوا أن تديروا محافظات وليس ميدان صغير يجتمع فيه بضع ملايين! وعندكم كثيرٌمن الشباب ألفوا النزول وعندهم خبرة كافية لتسيرالأمور كأحسن مايكون.كل ما أتمناه أن لا تكونوا دائما أول المؤيدين وآخرالمُنكرين , يخدعكم وعد من أخلف وعده , وتصدقون كلام من لم نعهد صدقه, تجيبونه دوما إذا أشار, وتحسنون الظن به مهما صار, وتظنون أنكم منعتم تلاميذكم الأخطار!!! وتنقص سياستكم من الفقه والفن , فتمنعون من أجل ذالك كل حراك , ويحمي شبابكم مبنى الأمن!! أنني أشعرأن الصفوف بدأت تمتاز كما امتازت يوم الثامن والعشرين, ولكني على يقين, أن من نزل من قبل سينزل مرة أخرى, وأن السلبيين الذي يحبون الاستقرار في القاع , الذين كانوا يرون مبارك خيرمما عداه , هم أيضا لن ينزلوا !وكذالك الذين فاتتهم الثورة الأولى, يبدوا أنهم ستفوتهم الثورة الثانية ! وإنا لله وإنا إليه راجعون .

===========

بقلم : م.المقداد جمال \عضو في حركة حازمون حركة- ثورية -شبابية - إسلامية– من فكر ومبادىء حازم أبو إسماعيل.

------------

وإنا لله وإنا إليه راجعون.... اعمل الصح يا حزلئوم وتوكل على الله

مصر مزة بأهلها

2011-09-26T18:35:00.000+02:00

وكل ما تجيب اجوان اكتر فرصتك في الفوز تكتر.. وانا واصيك من الفوس واصيك من الفوس

المجلس مش عايز يصدق ان فيه ثورة، ولا عايز يصدق ان الحكم للشعب.. والشعب المصري مش بتاع كلام، بتاع افعال

زي ما حلينا امن الدولة بايدينا وهو بيحاول يرجعه

وزي ما مشينا السفير بايدينا وهو بيحاول يرجعه

وزي ما - لا مؤاخذة - خرقنا حظر النشر وهو بيحاول يستره

نعلن نحن شعب مصر.. المز اخر تلات حاجات... ان حالة الطوارئ انتهت استنادا على الاعلان الدستوري اللي صوت اغلبيتنا عليه بنعم واللي الاقلية منا اللي صوتوا بلا احترموا وخضعوا لاراداة الاغلبية.. عشان احنا شعب جدع.. وانت عارف ان احنا شعب جدع، مالك يا مليجي؟ مالك ومال ابن بنت بنت بنت بنتي؟

وبما ان المجلس مش عايز يعلن انهاء حالة الطوارئ اللي المستشار طارق البشري اكد انتهاءها قانونا، زي ما هو مش عايز يعترف ان فيه ثورة كده وعايش في عالم موازي وعنده حالة دينايال يا قلبي، فاحنا حنحاول نساعده ونعلن احنا انهاء حالة الطوارئ بنفسنا.. والقانون في صفنا.. القانون يحمينا

اللي ما عندوش اكاونت تويتر يخش يعمل اكاونت تويتر ويكتب الهاشتاج ده ويكتب اسمه ويعلن حالة الطوارئ

مثال:

أنا فلان الفلاني اعلن انتهاء حالة الطوارئ #sep30

ودي صفحة على الفيس بوك كله يخش يعمل اتند ويشير.. حنحتفل بانتهاء حالة الطوارئ

وادي احنا بنحاول نساعد المجلس انه يعيش في الواقع اللي احنا خلقناه، ماذا والا حنعمل فيه زي قناوي بقى

نتقابل يوم 30 سبتمبر بقى ان شاء الله

البوسة دي لاهل مصر المحروسة :)

شهادة المشير امام المحكمة

2011-09-25T17:05:00.001+02:00

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟
ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟
ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس

س3: ما الذي أبداه رئيس الجمهورية في هذه اللقاءءات ؟
ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟
ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟
ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟
ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟
ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟
ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟
ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟
ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟
ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟
ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟
ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر ؟
ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟
ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا
ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟
ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟
ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟
ج19 : هذه مسئولية جهات التحقيق

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟
ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه ولكن التظاهر وفضه هي خطة وتدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟
ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟
ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟
ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟
ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات ؟
ج 25 : لأ

س26 : هل أبلغت بفقد ذخائر خاصة بالقوات المسلحة؟
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟
ج27: هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟
ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟
ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟
ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

دي اقوال طنطاوي.. لو سمحتوا كل واحد ياخد كوبي بيست وينشرها على مدونته او صفحة الفيس بوك، لان اللي محمد الجارحي كده ممكن يتحبس وكل ما ننشر اكتر ما يقدروش يحبسونا كلنا او بقى يحبسونا كلنا، لو الف مدون واكاونت فيس بوك نشرها ما يقدروش يحبسونا كلنا، او يحبسونا كلنا ويتفضحوا يالا.. المهم ان شهادة طنطاوي دي حقنا نعرفها، لان اصلا القضية دي كلها تحصيل حاصل.. احنا عارفين مين اللي قتل ولادنا، وعارفين المتهم، ووعارفين الحكم، والشهادات دي مالهاش اي لازمة غير تبين لنا مين معانا ومين علينا... احنا صابرين على المحاكمات دي واحنا عارفين الحق والعدل فين عشان ما ننتهكش القانون بسوهم مش من حقهم يطلعوا قانون يمنعونا نعرف ايه اللي بيحصل في بلدناسيبنا لهم البلد مش عارفين عنها حاجة 30 سنة بحجة الامن القومي وادي النتيجة... لا.. من هنا ورايح يكلمونا زي ما بنكلمهم ومافيش اسرارالبلد بلدنا واحنا احرار فيها

المجلس العسكري: وسأتابع بنفسي....

2011-09-21T16:45:00.001+02:00

تحديث:
يالا يا شباب.. حملة جمع التوقيعات ضد الحكم العسكري وقانون الطوارئ
شير في الخيييييرررررر
-------------
عااااااااااااااااااااااااا.... عاااااااااااااااااااااااااااااا.... عاااااااااااااااااااااااا

الشعب ضاع.. ده كان بصباع.. ده لسه جديد.. ده كان للعيد

ايه الخبر ده؟ ايه ايه ايه ايه؟ مين فين ايه؟ قرار جمهوري ايه واحنا خالعين الرئيس ومجلس شعب ايه وهو مزور واحنا حالينه وقانون رقم ايه واحنا عاملين ثورة وايه الكلام ده واحنا عاملين اعلان دستوري بيقول ان قانون الطوارئ خلص يوم 19 سبتمبر ومده يحتاج الى استفتاء شعبي؟ ايه؟ مين؟ ايه؟

ايه هاه؟ هاه؟ هاه؟ اي حد يقلقني وانا باشطح هاكا ولا هاكا قلقه... نعم؟

بالصلاة ع النبي كده مش حينفع.. كده مافيش الشك حيقتلني بقى، اهي وضحت اهي

طبعا حنسأل كلنا زي الشاطرين عن الاخوان المسلمين االلي قالوا احنا ساكتين بس عشان الانتخابات انما وربنا.. وربنا لانيمك من المغرب يا صين لو ضرب على الانتخابات ومد الطوارئ

بالنوسبة للسلفيين اللي قالوا ان الشعب قال للدين نعم، فالمجلس اهو قال للدين لا وخرق الاعلان الدستوري

بالنوسبة للمواطنين شرشاء بتوع الاستقرار.. كل الاستثمارات بتهرب عشان مصر تحت حكم عسكري والله العظيم، تلاتة بالله العظيم الحكم العسكري هو اللي مطفش الاستقرار والاستثمارات والسياح وكافة شيء.. اقروا والواشنطن بوست

طب حينزلوا معانا ولا مش حينزلوا كافة هاذوها الفئات؟ الله اعلم.. هم طبوا ساكتين فجأتن، ممكن يكون اغمن عليهم، ممكن يكون نزلوا الملاحة.. ممكن يكون ضربوا نفسهم بالرصاص.. ممكن يكون لسه عايشين وحينزلوا بس هم بطبعهم خطوتهم تقيلة شوية

ما جراش حاجة.. والله نزلوا معانا على عينا وراسنا من فوق واهلا وسهلا ومرحبا بيهم يأنسونا وكلنا ايد واحدة يا بهجت

ما نزلوش.. حسبي الله ونعم الوكيل وكل واحد منه لله وكل واحد يعمل اللي عليه، يعني هم كانوا نزلوا يوم 25؟

نبتدي التحريض بقى:

بسم الله الرحمن الرحيم

1- المستشار طارق البشري قال الطوارئ انتهت، يعني مد الطوارئ غير دستوري، المحامين اللي خلقهم ربنا كلهم يرفعوا قضية فورا

2- فيه واحدة اقترحت اننا نجمع توقيعات بسرعة، والتوقيعات دي قشطة على فكرة، نفعتنا قوي في قضية الثلاثي المرح.. فاكرين؟ التوقيعات هي اللي حبستهم اصلا

3- نحضر لمليونية واعتصام الجمعة مش الجاية دي عشان مافيش وقت.. الجمعة اللي بعدها، ومن هنا للجمعة الجاية مظاهرات يومية، وزن بقى، عشان الشارع ما يهداش

4- كله ينزل الاعتصامات والاضرابات ويدعمها، اولا حنجمع منها توقيعات كويسة، ثانية طريقة كويسة للحشد، ثالثا، هي اللي حتساعدنا ان الشارع ما يهداش من هنا للجمعة بعد الجاية

الا حرضت؟ اللهم فاشهد

ده بيقولك يونيو 2012... جدر البطاطا اللي كان السبب يا ضنايا.. امال فين القفز على ارادة الشعب؟ ده كده قفزوا لامؤاخذة على الشعب نفسه

لا وجايبين لكم قوانين من سنة 81 ههههههههههههههههههههههههههههههههههههه اه يانا ياما.. اتاري احنا االلي طلعنا قناوي، ولبسونا بدلة الفرح وحطونا في الازعاف.. عم مبلوليييي.. عم مبلوليييي... ما تسيبنيش يا عم مبلولييييييي

اظن بان دلوقت ان لعبة الدستور اولا ولا الانتخابات اولا دي كانت شخشيخة بيلهونا بيها لحد ما يحضروا الخازوق المتقلوظ

الالتراس اجدع ناس

2011-09-11T00:37:00.001+02:00

الفاتحة لقلة الاصل

كله سلت ايده من الالتراس عشان وقفوا جنب اهالي الشهدا يوم محاكمة مبارك، وعشان ضربوا الامن المركزي اللي اصلا كل اللي يشوفه يضربه، هو بقت دي شغلته اساسا... ثم هو اللي ضربهم الاول، وضربهم عشان شتموا العادلي ومبارك، وعشان مشوا لنا السفير الاسرائيلي اللي كنا لايدين عشان نمشيه

الله الله على الاصل والاخلاق يا بتوع: ايه ده ايه ده؟ بيقولوا الفاص بسيئة.. يا حلوووةةةةة... الله يرحمه آخر كلمة قالها بدل ما يتشاهد سب الدين لامك.. ايوووووةةةةة امك انت

الناس دي كانت في حالها بتضرب الامن قدام سفارة الجزائر وتحرق عربياته وتخرج في نفس اليوم، وتضرب اتوبيس اللعيبة الجزائريين والامن يغطي عليهم، وكل اللي بيسلت ايده منهم دلوقت كان بيشجعهم، جات قامت ثورة قام قالوا: طب ما نمشي بما يرضي الله ونخدم بلدنا، وخدموا بلدهم احسن خدمة

هم اللي فتحوا لنا الميدان يوم 25، وهم اللي شاركوا في تأمين الميدان، وشاركوا في موقعة الجمل بكثافة، وهم اللي شاركوا في تلقين الامن اللي عاش تلاتين سنة يدينا على قفانا درس مش حينساه، وهم اللي دافعوا عن اهالي الشهدا، وهم اللي مشوا لنا سفير اسرائيل... ولا هو سفير الجزائر بس اللي وحش؟ ولا هي كرامة مصر بتتهان لما نلعب زي وشنا في ماتش ونخسره ولما يتقتل لنا 6 على الحدود من الجيش والامن المركزي الكرامة تعمل عبيطة؟ وبدل ما الجيش والامن المركزي يعملوا رجالة على اللي قتلوهم رايح يتمرجل على اللي مشوا له السفير واخدوا له حقه

انا مع الالتراس.. ولو فيه عضوية لستات اخش معاهم، وانا في ائتلاف الالفاص البسيئة... من مجموعة البلطجية واللي بيخربوا البلد

وباحب الشتيمة بالاب والام خصوصا لما تبقى للعادلي واللي يتشدد له

قال ايه؟ قال اكتر شعب في الدنيا بيسب الدين والميتين والاب والام زعلان من الالتراس؟ ده احنا عندنا السلفيين الوحيدين في العالم اللي بيشتموا بالاب والام بس بالفصحى عشان تبقى حلال
وايه اللي ستة ابريل هببته ده؟ بقى احنا نقف جنبهم لما يقولوا لهم بتاخدوا تمويل وبتسافروا برة وهم يطلعوا يجرسونا ويقولوا: اه بجد تصدقوا، خدنا تموين وسافرنا فعلا... وهم يستندلوا مع الالتراس؟ ليه؟ هم اللي متقدمين لمحاكم عسكرية دول مش كانوا بيدافعوا عن البلد والثورة؟ مش احنا اللي عملنا فيهم كده؟ مش احنا اللي اقنعناهم ان فيه ثورة ولا ايه؟ اقتنعوا ودخلوا بكل طاقتهم، والمجلس عايز ييجي عليهم عشان غلابة ويعملهم عبرة... احنا حنسيبهم؟ ايه الندالة دي؟
ايه قلة الاصل دي؟
ايه الوطيان ده؟
اللي حيتعمل في الالتراس النهاردة حيتعمل في كل الناس بكرة، حتى اللي مش بيقولوا الفاص بسيئة... ولو اني اشك ان فيه مصري ما بيشتمش
انا مع الالتراس لآخر نفس... من انفاس مبارك.. شد يا معلم.. ما اتعودتش اقل اصلي مع اللي خيرهم عليا، وما اتعودتش اخلا بصاحبي والله.. ولا فاكرين العيال السيس دي كانت حتعرف تعدل ولا تبدل لولا الالتراس وسكان العشوائيات وقفوا لنا وحمونا

علم ونافذ يا ولي المؤمنين

2011-09-07T00:16:00.003+02:00

ابراهيم الهضيبي قال: الثورة دي فيها شيء لله

وانا قلت لكم: مقر قيادة الثورة في الملأ الاعلى.. والله يوم 9 ده كان حيفشل لولا الداخلية جابته لنفسها

وربنا جابها لنا من الداخلية، الاشارة وصلت من فوق، ربنا عايزنا نحل الداخلية، يبقى المطلب الاساسي ليوم 9/9 حل الداخلية

علم ونافذ يا ولي المؤمنين

وفيه واحد من الالتراس استشهد

عندكوا وقت تسمعوني ولا فرحانين زي يوم 11 فبراير؟

2011-08-21T03:27:00.001+02:00

وماله لما تفرحوا؟ افرحوا انتوا.. انا ربنا ما خلقنيش للفرح، خلقني لشيل الهم

انتوا ايه؟ حتروحوا؟

طبعا كل البنات بتسأل دلوقت احمد الشحات مرتبط ولا لا.. وهو بطل فعلا، بس احنا مش قاعدين هناك عشان احمد يتشعلق ويعرض حياته للخطر ويخلع قلب امه ونروح كده.. لو الموضوع واقف على احمد كان اي حد يعملها من غير اعتصام ولا مظاهرات

انا لحد دلوقت بالوم نفسي اني احتفلت مع الناس يوم حداشر فبراير وما روحتش في يومها الم ناس واقولهم خلينا قاعدين عشان كذا وكذا

مش عارفة حالتكم النفسية تسمح ولا لا.. بس افتكروا اننا قاعدين عشان السفارة دي تتقفل، والسفير ينطرد شر طردة، لا مش يسحبوه، ينطرد شر طردى، يعني مش يتخلى.. يتنحى

انا مش عايزة النهاردة يبقى زي يوم 11 فبراير وبكرة يبقى زي يوم 12 والتحريات العسكرية تنزل لابسة مدني ويقولوا الشعب يريد اخلاء الميدان ويشيلوا اللي قاعدين هيلا بيلا والناس ما تنزلش وتسمع كلامهم

مش عايزين نرجع نندم تاني، ادينا دقنا الندم وعرفنا طعمه مر ازاي، وبيدفعنا اتمان باهظة ازاي، وبيخلينا نبذل مجهود مضاعف بعد كده عشان نصلح الغلطة ازاي

احنا لازم نفتكر احنا عايزين ايه والناس اللي ما نزلتش تنزل، حننزل وحنفضل قاعدين لحد ما:

السفارة دي تتقفل بالضبة والمفتاح وما تتفتحش تاني ابدا

السفير ينطرد شر طردة

سفيرنا يرجع بجد وما يروحش هناك تاني ابدا

المعبر يتفتح

الغاز يتوقف ضخه.. مش كل شوية حد زي الملثم وزي احمد هم اللي يحلوا المشكلة

يتم اتخاذ قرار رسمي بوقف تصدير الغاز.. فورا

اظن ده الحد الادنى من المطالب.. ومش حنتعتع الا لما نحققه، واللي ما نزلش اديه شاف احسن شباب عملوا ايه؟ المفروض اللي قاعد في بيته وما نزلش اليومين اللي فاتوا يتكسف على دمه من احمد الشحات وينزل، الولد كان حيقع اكتر من مرة، وعرض حياته للخطر عشان بلده، وكان ممكن الجيش ينشه، لولا ان الجيش والمجلس في موقف حرج ما يقدروش يعملوا كده، وربنا ستر برضه

اتكسفوا على دمكم وانزلوا.. اتكسفوا على دمكم لو عندكم دم وانزلوا

واللي موجود ما يمشيش.. مافيش الشعب يريد اخلاء الميدان تاني.. مافيش تحريات عسكرية تاني.. باشكر احمد الشحات وباشكر الملثم

حي على الجهاد.. كل ينزل، واللي قاعد في بيته من غير عذر ندل

2011-08-20T17:07:00.001+02:00

مصر تواصل تحررها.. مصر بتتحرر والعدد قدام سفارة الكيان الصهيوني حيبقى كبير عشان التحرر يبقى كامل بدل ما ترجعوا تندموا يوم لا ينفع الندم، وحافكركم بحاجة انتوا تشيلوا ذنبها... لا حاجتين

الحاجة الاولى: اننا مشينا يوم 12 فبراير وادينا بنعض بنان الندم اهو

الحاجة التانية: اننا واحنا بنفك امن الدولة عند لاظوغلي العدد ما كانش كبير ولو العدد كان كبير قوي كنا اقتحمنا لاظوغلي وجبنا الوثائق وكان امن الدولة ده ما قامتلوش قومة تاني ابدا... بس لسبب ما الناس جبنت انها تنزل قدام لاظوغلي وادي النتيجة امن الدولة رجع يشتغل

انا باقولك دي المحطة التالتة للندم لو ما نزلتوش باعداد كبيرة... دي المحطة التالتة للندم وحتضربوا نفسكوا بالجزمة، واحب اوجه رسالة للي بياخدوا الجيش في العضل.. الجيش معانا، والظباط والعساكر اللي واقفين عند السفارة دول لو جات لهم اوامر ضرب حيولعوا في نفسهم ولا يضربونا.. وخلي بقى اي قيادة تقل عقلها وتدي اوامر بالضرب، احنا لو عملنا ايه مش حيضربونا

لو عملنا ايه مش حيضربونا وياريت يضربونا عشان نخلص بقى وتبقى آخر لقطة لهم وننزل التيترات

انا شخصيا مش باحب افرق ما بين الجيش والمجلس لانهم كلهم دماغ واحدة فعلا، بس في موضوع اسرائيل ده بالذات الجيش موقفه مش زي المجلس، يعني اغلبية الجيش فعلا مقتنعين اننا خربنا البلد والكلام الفارغ ده، بس في موضوع اسرائيل الجيش كله معانا، ولو عملنا ايه الجيش كله معانا... كله كله كله

خلاص خلصنا كده؟

طيب.. حتى بقى لو ما كانش الجيش معانا نزولنا قدام السفارة واجب وطني المقصر فيه مجرم، والسفير الاسرائيلي لازم يرحل، والسفارة الاسرائيلي لازم تتقفل، والعلم الاسرائيلي لازم يتنكس، ومصر بعد المخلوع مش هي مصر قبل المخلوع، والالفات اللي كانوا عند السفارة دول مستعدين يتجندوا ويموتوا، ونفسهم ومنى عينهم يحاربوا، وجواهم كميات مهولة من الغل ولو سيبتوهم على اسرائيل بايديهم وسنانهم ياكلوها من غير سلاح، بس اسرائيل هي اللي مش عايزة تحارب

افهموا بقى.. افهموا اللي قاعدين في البيت وتربية مبارك ولسه جبنا ومش شايفين الدنيا غير من خرم الباب.. اسرائيل هي اللي مش حتحاربنا، هي اللي مش عايزة تحاربنا، وبرضه لو عملنا ايه مش حتحاربنا، لو احنا اللي رحنا جرينا شكلها مش حتحاربنا

اهمدوا بقى

اهمدوا وانزلوا حرروا بلدكم، كل الخراب اللي حل بالبلد بسبب تبعيتها لامريكا واسرائيل، لا عمرنا حنعمل ديمقراطية، ولا حنعمل محاكمات للفاسدين، ولا حنعمل انتخابات، ولا حنعمل دستور عدل، ولا حنعمل عدالة اجتماعية ونتملك مواردنا ولا اي حاجة عدلة في البلد حتتعمل ولا اي حاجة حتختلف عن ايام المخلوع طول ما السفير الاسرائيلي في مصر وطول ما احنا تابعين لامريكا واسرائيل، كل شقانا حيروح، كل دم اللي ماتوا حيروح لو فضل السفير ده قاعد وتبعيتنا زي ماهي، مش بس كده، عمرنا ما حنبقى بني ادمين طول ما الناس رباية مبارك مش شايفة ما بين الذل وما بين الحرب اي مساحة للتعامل، يعني لما نقول اننا مش عايزين نبقى تابعين لامريكا واسرائيل يردوا نفس كلمة المخلوع: يعني نحارب؟
هو احنا بنحارب ايران ولا ايه؟ اه.. ايران.. ما نعامل اسرائيل زي ما بنعامل ايران يا اخي جاتنا وكسة، ايران مالهاش سفير هنا، والتبادل التجاري بينا وبيها عصفر، وبنقل ادبنا عليها عمال على بطال خاصة ايام المخلوع، ما نعامل اسرائيل نفس المعاملة يعني مش فاهمة
ما نعمل فيهم اللي عملناه في الجزائر.. انتوا ناسيين جريمة الجزائر اللي لازم تكفروا عنها؟ ماشي لزقناها في المخلوع، بس انتوا سفلتوا قوي يعني.. بقى عشان ماتش تعملوا ده كله في الجزائر واسرائيل تموت لنا ناس ما نتحركش؟ كفروا عن خطيئتكم اللي عملتوها في الجزائر
المكان قدام السفارة لحد جامعة القاهرة لازم يتدرز ناس.. انزلوا حرروا بلدكم، لو عايزين تغيير وحرية وعدالة اجتماعية، لو عايزين تبنوا بلدكم السفير الاسرائيلي ده ما يقعدش، ومصر يتعمل لها حساب تاني في العالم، وتستعيد ثقلها تاني، وسفير حبايب المخلوع يرحل وراه على طول.. انزلوا انزلوا انزلوا انتوا بتصنعوا تاريخ

انتوا بتصنعووووووووووااااااااااااااااااا تارييييييخخخخخخخخخ انتوا ليه مش حاسين بقيمة نفسكم؟ ليه مش حاسين انكم بترجوا العالم

انزلوا

انزلوا عشان اللي مش حينزل حيرجع يندم

باراك يأسف لقتل المصريين.. مش يعتذر

المصريين لازم سعرهم يبقى حاجة تانية، ووزنهم حاجة تانية، وقيمتهم حاجة تانية، لو فعلا عايزين نبني بلدنا ونخليها متقدمة، لو نزلنا باعداد كبيرة سفير اسرائيل حيمشي، واسرائيل مش حتقدر تعمل حاجة، وامريكا مش حتقدر تعمل حاجة، وزي ما في يوم وليلة اكتشفتوا ان انتوا والنبي مصر، في يوم وليلة حتكتشفوا انتوا اسياد الدنيا وما كنتوش دريانين

انزلوا

انزلوا احنا عندنا فرصة تاريخية دلوقت مصر تاخد مكان تاني خالص في العالم، والشعب يحكم مصر الى الابد، لو اسرائيل ضربت الحدود والجيش وقف ساكت والشعب هو اللي مشى السفير ماحدش حيعرف يرفع عينه تاني فينا

انزلوا

لو الشعب المصري الغلبان ده عرف يمشي سفير اسرائيل اللي قعدت حاكمة مصر بقالها خمسة وتلاتين سنة ماحدش حيجرؤ يدوس لنا على طرف، لا جيش ولا قوى سياسية ولا امريكا ولا مخلوق... حنبقى اسياد البلد، ومش عايزة اطمعكوا بقى اكتر من كده واقولكم حنبقى اسياد ايه كمان، سيبوها على الله

انزلوا

حي على الجهاد.. ده جهاد اصلي

انزلوا قدام السفارة

يا سيدي لو مش قادر تنزل قبل الفطار انا مسامحاك تنزل بعد الفطار تصلي التروايح هناك وتتسحر وتفضل قاعد لحد ما النور يشقشق

قلت ايه؟

بس غير كده مش مسامحاك

مش مسامحاك وحسبي الله ونعم الوكيل فيك، واي حاجة حتتعمل تئذي البلد دي من تحت راس كسلك وتأخرك عنها انا مش مسامحاك، وحسبي الله ونعم الوكيل فيك.. حسبي الله ونعم الوكيل فيك.. حسبي الله ونعم الوكيل فيك ياللي ما نزلتش قدام السفارة ومالكش اعذار

حسبي الله ونعم الوكيل فيك

بحق الايام المفترجة دي توريني في السلفيين يا رب

2011-08-16T00:46:00.003+02:00

على فكرة.. انا قرفانة من عيشتي آخر حاجة يعني، ومش فايقة لهبل السلفيين خالص دلوقت حاليا

دلوقت حمدين صباحي بيقول إننا لازم نصبر عليهم لحد ما يتعلموا يتعاملوا زي البني ادمين لانهم فضلوا في عزلة تلاتين سنة لحد ما جالهم هبل، وانا بصراحة مش مكلفة اني اصبر عليهم لانهم اصلا كانوا ضد الثورة، وبيقولوا اللي ماتوا في الثورة مش شهداء، وداير مشايخهم على اهالي الشهدا يطلبوا الناس تقبل بالدية

خلاص كده؟

راح الاخوان اتحالفوا معاهم بسبب عته منغولي متوفر بكثرة عند الاخوان ولهم تراث فيه

خلاص كده؟

راح الجيش استغل التحالف ده عشان يعمل وثيقة المبادئ الحاكمة ويمررها وبعد ما جرهم عشان يستعرضوا عضلاتهم بالطريقة الفظيعة المريعة الشنيعة دي، استخدم يوم 29 يوليو عشان يبقى ذريعة كويسة لتمرير وثيقة المبادئ الحاكمة

خلاص كده؟

جيت انا انسحبت من لساني على التويتر وفكرت الاخوان بالكلام اللي كتبته هنا

واللي ملخصه ان انا وتميم البرغوثي عايزين نعمل مبادرة وحدة وطنية كتب تفاصيلها تميم هنا

ولفينا على مرشحين الرئاسة عشان نعمل مبادرة اجماع وطني تتفق على المبادئ الاساسية للثورة، اللي هي الهوية العربية والاسلامية - وحمدين زود الافريقية - والعدالة الاجتماعية، والحرية متمثلة في اعادة هيكلة الداخلية

اللي وافقوا على المبادرة من حيث المبدأ هم: عبد المنعم أبو الفتوح، وحمدين صباحي، ومحمد البرادعي

بعدين المبادرة باظت عشان الدكتور البرادعي ما رضيش يطلع مع حد من مرشحين الرئاسة في نفس البورنامج

بينما المستشار هشام البسطويسي قالنا اللي بتقولوه ده مش مهم، المهم دلوقت فك الارتباط اللي بين الاخوان والجيش من خلال اننا نقدم له وثيقة فوق دستورية ونعمل الدستور اولا وندي الجيش صلاحيات لان الجيش اللي مخوفه ان ملفاته تتفتح ولو احنا طمناه واديناه صلاحيات مش حيضطر يتحالف مع الاخوان، فتميم قال له: احنا عايزين نعمل اجماع وطني اللي بتقوله ده مش حيعمل اجماع وطني، قاله: حنعمل اجماع وطني من غير الاخوان، قاله: حضرتك واخد بالك انك كده بتفتح باب لأمريكا؟ قاله: اه.. بس شوية، عشر سنين، خمس سنين من غير الاخوان. فتميم قاله: الاخوان فصيل وطني وما ينفعش نستنثنيه، وبعدين مش حيسكتوا على اللي بتقوله ده، فقاله: يبقى يضطروا يواجهوا الجيش بقى..

فطبعا ما عجبناش الكلام ومشينا وطلع هشام البسطويسي من المبادرة

وعشان اخلص ضميري قدام ربنا كتبت الكلام ده في البوست من شهرين وما ذكرتش اسم البسطاويسي لإنه ما كانش اخد اجراء، بعد ما نزل الوثيقة بتاعته على المصري اليوم، الناس على التويتر قالوا لي، هو ده بقى اللي انت اتكلمتي عليه في البوست بتاعك وما قلتيش اسمه، قلت لهم ايوة هو ده اللي اتكلمت عليه، ووالله العظيم يعني انا مش ذنبي ان الاخوان بيتصرفوا بغباوة وان السلفيين مصلحجية وكانوا عارفين الموضوع ده من زمان وسكتوا عليه وعملوا عبط ولما حسوا ان الخازوق بيتقلوظ لهم ابتدوا يعملوا صياح دلوقت على حاجة قديمة، وكمان بينقلوا الاخبار غلط

مخطط امريكي ايه اللي نوارة كشفته؟ ايه العته اللي السلفيين كاتبينه ده؟ في جرنال اسمه الفتح، يصدر من جامع الفتح طبعا.. فتح الله دماغهم بساطور الايمان والتقوى قادر الكريم

وايه ام المزايدات دي اللي على المسا؟ ايه: وانتوا ازاي ما تردوش عليه؟ ردينا عليه.. بصراحة انا ما ردتش عليه، انا جالي ذهول وسكت، اللي رد عليه تميم، وبعدين ابلغ رد انه ما دخلش المبادرة، وبعدين هو حر الراجل يحط المبادرة اللي هو عايزها، والله البسطويسي قدم مبادرة للجيش والمبادرة جات على هوى الجيش

لا ذنب البسطويسي ولا ذنب الجيش ان الاخوان راحوا اتحالفوا مع السلفيين وخوفوا منهم الناس، ولا ذنب اي حد ان السلفيين ينطبق عليهم مثل لا تتحالف مع العبيط ولا تخلي العبيط يتحالف معاك

لو فيه حد يتحمل مسئولية ان الجيش حياخد صلاحيات يبقى السلفيين نفسهم بالمشهد المرعب اللي عملوه يوم 29 وطالعين كمان يقولوا لو عملتوا وثيقة فوق دستورية حنعمل ثورة اسلامية.. عوض عليا عوض الصابرين يا رب، طب يعني الناس تحمل غيرها مسئولية تخلفها ليه؟

وتصدقوا انا جزمة فعلا.. عشان قلبي الحمار ده ما هانش عليا الاخوان ورحت في ساعتها احذرهم ورحت فتنت للاخوان وقلت لهم الحقوا حيتعمل فيكم مغرز، ثم اصلا الكلام المكتوب في الوثيقة هو الكلام اللي اتقال في القعدة الخاصة.. فرحت انا بقى قلت للاخوان، كتبت على المدونة، وكتبت اياميها على التويتر، وكلمت كل الاخوان اللي اعرفهم وقلت لهم يا جدعان حيتعمل فيكم مغرز

ما صدقونيش.. ولا طبعا المهاطيل اللي هم ساحبينهم وراهم ومقعدينهم على حجر مصر من غير كافولة دول صدقوني، وبعدين لبسوا في وثيقة مبادئ حاكمة ولسه، قوم بافكرهم باني حذرتهم راح طبعا السلفيين حوروا الكلام خالص واخترعوا اختراعات.. ما قلت مهاطيل والله.. خلاص.. آدي الله وآدي حكمته، في كل مجتمع كده حتلاقي كائنات شكلها كده، مستوى ذكاء منخفض، مستوى حماس مرتفع، داخلين الخناقات الغلط، وبيفهموا كل حاجة بالمشقلب.. دي مجموعة معروفة كده، زي جمهور فوكس نيوز في امريكا

بعدين تميم اتشتم ليه دلوقت حاليا؟ طب انتوا واخدين على شتيمتي انا، الراجل قال عليه الرويني اسمه غريب وشكله غريب ولهجته غريبة وكان عنده امل انه يعمل وفاق وطني، سمع الكلمتين دول ورد على الراجل وطلعه من المبادرة، بيتشتم ليه دلوقت الراجل من تحت راسي زي ما قبل كده برضه بلال اتشتم من تحت راسي وابراهيم الهضيبي اتشتم من تحت راسي؟ انا مش حاجيب سيرة حد تاني.. وعلى فكرة مش حانصح حد تاني، يا رب تلبسوا كلكوا

لا..

انا مش حاعرف حد اساسا

انتوا عايزين مني ايه دلوقت؟ انتوا مش عملتوا ثورة وانبسطوا؟ نعم؟ عايزين مني انا ايه دلوقت؟ انا حاروح اشتغل في صفحة الفن، او صفحة المرأة، وحاحط على المدونة دي اغاني فرنصاوي، وحاطلع سفاري في واحات الداخلة والخارجة، وحاقدم برنامج طبيخ، وحاغير من نفسي كومبليتلي.. حد عايز مني حاجة انا دلوقت حاليا؟

تصدقوا ده الجيش له حق يحس ان اللي بيوضيكي زي اللي بينجسكوا ويقرر ينجسكوا بقى مدام الاتنين زي بعض

انا قرفانة وعندي اكتئاب وروحي في مناخيري ومش عايزة حد يجيب سيرتي تاني.. ماحدش يقول نوارة تاني، ولو مصممين تقولوا نوارة، انا ما اسميش نوارة.. انا اسمي سكسكة زمبلك

حاجة تاني؟

الثورة المغدورة

2011-08-15T17:13:00.003+02:00

كل الناس بتتكلم عن كل الثورات، حتى هبل الامريكان، وتشرد الانجليز

وماحدش بيفتح بقه على البحرين، مع انهم لسه شغالين لحد دلوقت، وحسبي الله ونعم الوكيل على كل من ساعد في اظلام الدنيا على صراخ المساكين

استدعاء اسماء محفوظ غدا العاشرة صباح امام القضاء العسكري

2011-08-13T18:35:00.002+02:00

تحديث:
كمان لؤي نجاتي بكرة في س 28 الساعة تسعة الصبح، وغالبا اسماء في نفس المكان
والاسباب مجهولة

لحد دلوقت لا هي ولا حد عارف هم عاملين لها استدعاء ليه؟ وايه القضاء العسكري ده؟ ده غير النيابة العسكرية ده ولا ايه؟ يعني مكانه فين؟

يادي الصحيان بدري في الصيام.. حسبي الله ونعم الوكيل فيك يا فخرررررررررر

يوم 10 رمضان احتفال بالنصر.. ومافيش مسيرة

2011-08-06T15:24:00.001+02:00

الايفينت المعمول على الفيس بوك بمسيرة يوم 10 رمضان قال ايه "لتذكير الجيش بمهمته" ده اللي عامله تحريات عسكرية وش

معلش بقى.. انا اللي كنت بايتة معاهم تلات اسابيع وانا اللي عارفة هم بيسخنوا ازاي

بالبلدي بيوقعونا في الغلط عشان الناس تقول علينا مجانين وقلالات الادب ومغرورين.. يعني ايه مسيرة يوم 10 رمضان؟ ايه قلة الادب دي؟ مين المجنون اللي سولت له نفسه انه ممكن يوم 10 رمضان ينزل يعترض على نفسه انه انتصر على عدوه؟ ايه العته ده؟ ويعني ايه نفكر الجيش بمهمته؟

اولا لو كان عندك حشد يبقى من الحصافة انك تروح سفارة اسرائيل - اللي انطردت منها حماية لها - وتروح تفكرهم باننا انتصرنا عليهم

ده في حال ما يكون عندنا حشد

بس بما ان ما عندناش حشد، يبقى حنقعد في البيت.. حنقعد في البيت نفترج على فيلم بدور ونسمع اغنية وانا على الربابة باغني ونحتفل بنصر الفلاحين والصعايدة المصريين على اسرائيل.. بلا قلة ادب.. بلا قلة ادب.. مين السافل ابن السافل اللي عايز يتطاول على نصرنا؟

ومش من الحكمة اننا ننزل بلا حشد والناس عندها ميل اكتر للتهدئة

يوم 10 رمضان حتفطر مع الست الحاجة بقى.. وكنوا شوية في البيت.. اليوم ده بالذات حنكن كلنا في البيت، لان اي نزول في اطار الاحتقان اللي بينا وبين الجيش ده حيتم الترويج له على اننا بنتطاول على نصر المصريين واعز واغلى حاجة عندهم على مدى القرن العشرين كله

ده سب دين ده.. النزول يوم 10 رمضان ده اسمه سب دين للشعب المصري.. وسب دين ليا انا شخصيا، انا مرة واحد قال لي احنا في حرب اكتوبر ما انتصرناش سفخته بالكف على وشه قدام كل الناس اللي قاعدين، وكنا قاعدين في مطعم

دي قلة ادب.. وتصرف جارح لمشاعر اي مصري عنده نقطة دم في وشه

حوش الدم اللي في ايدك يا رويني

2011-08-04T04:21:00.003+02:00

الجنازة النهاردة اتلغت عشان راح على الطب الشرعي

اللي بات في الاعتصام يعرف محمد كويس، لو ما يعرفش اسمه يعرف شكله، يعرفه وهو بيكنس ارض الميدان، ويعرفه وهو مبتسم كده على طول، يعرفه هو في نص الليل يقرر يمشي في مسيرة، يعرفه وهو جاي يقولي: ايه نوارة؟ رأيك الاعتصام حينتهي على ايه؟ وانا ما اعرفش ارد عليه، يعرفه وهو بيوزع ورق، مش عارفة ورق مكتوب فيه ايه؟ بصراحة كنت باناوله لاي حد جنبي، لان كل الناس بتوزع ورق

آآآآه يا محمد.. يا ريتها كانت جات فيا انا.. انتوا مستقصدني ليه؟ يا تموتوا الناس قدامي يا تموتوا ناس اعرفهم؟ وانا حاستنى لحد ما حد صاحبي لا قدر الله يموت؟

محمد مات على ايد "المواطنين الشرفاء بالعباسية" اللي شكرهم المجلس العسكري في بيانه

قالوا واحد اسمه محمد محسن مات وحنشيع جنازته بكرة.. قلت هو احنا كل يوم بنشيع شهيد؟ ده احنا لو فلسطين مش حنفضل نشيع في شهدا كده.. بس لما شفت صورته وعرفته دخت ورجليا ساخت وايديا قاعدة تترعش.. هو كده، زي ما انتوا شايفينه في الصورة كده.. دايما مبتسم.. عمري ما شفته بيتخانق.. ولا بيعمل مشكلة، وعمره ما كان بيهمد، لازم يكون بيعمل حاجة مفيدة.. انا بقيت خايفة اعرف حد.. مش عايزة اعرف حد تاني.. مش عايزة اعرف حد واقعد معاه وبعدين يحصل له حاجة..

احنا فين هنا؟ احنا في احتلال هنا؟ مواطنين شرفاء ايه اللي عملوا كده؟ بتسلطونا على بعض؟ ايديكم فيها دم، عملتوا زي الولية اللتاتة ومشيتوا في الشوارع تحرضوا الناس على بعضها وتسخنوهم على بعضهم عشان ما عندكوش حتى الشجاعة تواجهوا ولد زهرة زي ده؟

حتقولوا ايه؟ حتبرروا اللي عملتوه ده بإيه؟ بلطجي؟ محمد كان زي النسمة، وعمري ما شفته مكشر حتى ولا صوته بيعلا، ولا عمره عمل مشكلة مع حد.. حتنكروا انكم حرضتوا الناس عليه والرويني معترف بعضمة لسانه انه هو اللي بيطلق الاشاعات؟ حتنكروا بيانكم اللي نزلتوه تقولوا للناس اقتلوهم دول بلطجية؟

انا مش بس باحملكم المسئولية انكم حرضتوا عليه واستعنتوا ببلطجية وقتلتوه، انتوا زرعتوا وسطنا تحريات عسكرية ومخابرات عسكرية وأمن دولة ومخابرات عامة كانت بتسخنا وتزايد علينا وتسحبنا.. وانا شاهدة ان اكتر عيال كانت بتسخن على المشير وتتشنج لحد ما يطق لها عرق هم العيال اللي بعد كده شفناهم لابسين خوذ وجاكيتات.. دي جريمة.. جريمة.. ليه كده؟ بتعملوا ناصحين علينا؟ قال يا سيدي عاملين لك نظرية مخابراتية قديمة قدم التاريخ نفسه اسمها المغناطيس، يزرعوا في كل مجموعة عناصر تزايد على المجموعة في افكارها، يعني المجموعة اللي عارفين انها ضد المجلس يحطوا وسطهم واحد يسخنهم على المجلس اكتر حاجة عشان يجذب اكبر عدد من اللي ضد المجلس ويعرفوا يحصروهم، اللي مع المجلس برضه يزرعوا واحد وسطهم يبقى اكتر واحد فيهم مع المجلس عشان يجتذبهم ويعرفوا يحصروهم، الجماعات الدينية، الجماعات السياسية.. وهكذا، كل مجموعة يحطوا لها واحد حيطق له عرق عشان يبقى عنصر الجذب والمجموعة اللي حواليه تثق فيه تقوم تكشف له اسرارها لو عندها اسرار، وفي يوم مظاهرة العباسية تلات اربع المظاهرة كانت تحريات عسكرية ومخابرات عسكرية، وقاعدين يسخنوا على المشير ثم يختفوا، ويقولوا لنا باتوا هنا في العباسية وبعدين يختفوا، واول ما نقول يسقط حكم العسكر يظهروا تاني عشان يغلوشوا على الهتاف ده بالذات.. مش واخدين بيه اوامر بقى، وفيه شهود على الموضوع ده، لأن فيه ناس واحنا في المسيرة جم قالوا لي: هو مين اللي اول ما نجيب سيرة حكم العسكر يحول الهتاف الى: الشعب يريد اسقاط المشير ويغلوش على الاعتراض على حكم العسكر؟ وكلنا كنا شاكين فيهم انهم تحريات عسكرية.. فالحين قوي

اكتشفتوا ايه يا ناصحين؟ اكتشتفوا ايه خلاكم تقتلوا محمد؟ اكتشفتوا ان انتوا اللي جبتوه لنفسكم وقلبتوا الناس عليكم بتصرفاتكم من غير سبب؟ بتعملوا فينا كده ليه هو احنا اسرائيل؟ عمل ايه محمد؟ راح يتظاهر قدام المجلس العسكري وجمال الغيطاني طالع يشتم فيه ويقول التظاهر امام المجلس العسكري خطيئة؟ ليه ان شاء الله.. هو كان الكعبة المجلس ده؟ عمل ايه محمد يستاهل انه يموت عشانه؟ ويموت على ايد مواطنين؟ مواطنين ولا بلطجية ما تفرقش.. المهم انهم مدنيين، وقتلوه من غير سبب.. مافيش عداوة بينه وبينهم وما عملهمش حاجة وما أذاش حد في حاجة عشان يموت، وما عملش حاجة غلط.. ماعملش غير انه بيحب بلده

وبمناسبة الجاكيتات والخوذ... انا رحت متأخر شوية عند قسم قصر النيل اشوف الشباب وهم خارجين

الشباب اللي اتقبض عليهم لأنهم لا مشاهير ولا تحريات عسكرية.. معتصمين بجد، ولولا اعتصامهم ما كناش شفنا مبارك في القفص، وكان زمان المحاكمة ما بقتش علنية، ده اذا كان اتحاكم، وكان زمان مبارك معمول له جنازة عسكرية بتابوت فاضي وهو قاعد في تبوك، العيال خارجة نفسيتها محطمة، عشان اتعذبوا في السجن الحربي، واحد منهم قال لي كهربونا وفينا ناس مش حتنفع في حاجة تاني، وكهربونا في حتت ما ينفعش اقولك عليها.. انا ضهري متشرح. قلت له فين التعذيب ده؟ قال لي في السجن الحربي

اللي دل عليه واحد عامل معتصم وبعد كده لبس الخوذة، واللي شده امن دولة، واللي عذبه ظابط جيش في السجن الحربي.. كل ده عشان بهدل نفسه في الشارع تلات اسابيع بيدور على حق الشهدا اللي اغلبية الناس مش سائلين فيهم.. كل ده عشان قعد في الشارع لحد ما جاب لنا مبارك في القفص.. يتعذب ويتهان في سجن حربي ليه؟ لو اسرائيلي كنتوا عذبتوه؟ والله العظيم تلاتة ولا تتجرأوا تعذبوا اسرائيلي ولا تمسوا شعرة منه.. عيالنا بس اللي ينضربوا ويتشتموا ويتعذبوا عشان بيتظاهروا قدام سفارة اسرائيل وبيقولوا نزل العلم

انتوا ازاي تعملوا كده؟ ازاي تعملوا كده؟ ازاي تزرعوا وسطنا عملا عشان يحفظونا ويدلوا علينا كأننا اسرائيليين، وازاي تسحبونا على ميدان العباسية وتسلطوا علينا مدنيين؟ وازاي تموتوا محمد؟ ازاي تموتوه؟ وازاي تعذبوا الناس كده؟ احسن شباب في البلد.. احسن شباب في البلد.. ازاي اشوفهم خارجين متحطمين ونفسيتهم تعبانة كده؟ ليه عايزين تكسروا نفسهم ليه؟

احنا ماحدش يكسر دماغنا.. ابدا... ابدا.. لا عاش ولا كان.. اذا كان انتوا ولا المواطنين الشرفاء المهاطيل بتوعكوا اللي اتقفل عليهم الميدان دلوقت بعد ما قعدوا يقولوا الله اكبر عشان الجيش والشرطة اقتحموا الاعتصام، على الله يكونوا مبسوطين وحالهم ماشي بعد ما اتسببوا في تعذيب الناس اللي كانت بتسعى عشان تجيب لهم كرامة

احنا النهاردة ان شاء الله حنشيع جنازة الشهيد محمد بعد صلاة الضهر من قدام معهد ناصر، هو على كورنيش النيل، تفضل ماشي على الكورنيش، لو جاي من مصر الجديدة تعدي ماسبيرو والنايل سيتي وتفضل ماشي على طول وتسأل هناك اي حد حيدلك

عايزة اشوفكم هناك ان شاء الله.. محمد مش بلطجي.. محمد كان زينة الشباب

هم دول اللي حطوا لكم مبارك في القفص

2011-08-03T15:37:00.003+02:00

اظن بتوع منكم لله خربتوا البلد كانوا لسه من قريب بيتناقشوا في ان المجلس ناوي يعمل لمبارك جنازة عسكرية، بقول اخر، مبارك حينتحروه وما يحضرش المحاكمة

دول بقى اللي وقفوا في الزور وخلوا مبارك يطلع في القفص النهاردة... محبوسين

ها؟ ازيكم يا بتوع روحوا بقى منكم لله خربتوا البلد؟ اظن انتوا نفسكم هم هم نفس الناس بتوع 1 فبراير: روحوا بقى منكم لله خربتوا البلد، ثم خرجتوا تحتفلوا يوم 11 فبراير بمنتهى البجاحة مع بقية الناس

طيب اللي حطوا لكم مبارك في القفص بدل ما يتعمل له جنازة عسكرية محبوسين... ومش عايزين منكم شكرانية، بس بطلوا كل ما تشوفوا وشهم تقولوا لهم: منكم لله خربتوا البلد.. عاملين زي اصحاب القرية: إنا تطيرنا بكم لئن لم تنتهوا لنرجمنكم أو ليمسنكم منا عذاب أليم.

احنا مش حنهمد على فكرة، عشان هو كده، كل حاجة بتيجي بالزق والهري والنكتة والمرمطة، غير كده مافيش حاجة بتتعمل، ولولا فض الاعتصام بالقوة كان لقوا اي حجة عشان مبارك ما يجيش... والناس قلقانة عشان علاء وجمال طالعين بيضحكوا وهم ماشيين في عربية الترحيلات، واحنا مش حنستنى اما المصيبة تحصل، حنفضل كده نخرب فيها عشان ييجي الاخوة بتوع منكوا لله خربتوا البلد ينبسطوا في الاخر ويقولوا ارفع راسك فوق انت مصري

"المتهمين" بحب الوطن فيه اثار تعذيب على اجسامهم.. وانا كنت ناوية اسكت وانبسط وافرح وابوس كل المصريين حتى الفلول، بس لقيت ناس بتقول نشكر المجلس العسكري، يعني شوية ملح في عينيكم يعني.. قابض على الناس وبيعذبهم ولسه فاضضهم بالقوة ولولاهم كان زمانه عامل نفسه ميت دلوقت.. ايه في ايه؟

المتهم الاول محمد حسني السيد مبارك.. افندم.. حاضر

2011-08-03T12:19:00.001+02:00

الجيش والشرطة والشعب واللجان الشعبية وبعض المعتصمين ايد واحدة

2011-08-01T20:37:00.005+02:00

دي شهادتي على عملية فض الاعتصام ومش عايزة حد يقرف في امي انا لسه راجعة، انا بس بادون اللي حصل قبل ما انساه

امبارح لاول مرة من تلات اسابيع انام في سريري، بس نمت نووووووم.... وكتير، وعلى بعضه، اول مرة انام كتير على بعضه

وبعدين صحيت الصبح قعدت اتوت واستظرف على خلق الله، وبعدين اخدت قرار اني اقف على البوابات، عادة مش باحب اقف على البوابات عشان حكيت لكم انا باتحول الى صندوق الدنيا او دبابة جيش من اللي العرسان بيتصوروا جنبها، بس قلت النهاردة حاقف على البوابات عشان الناس صايمة واخد ثواب اني اقف في الوقت ده اللي ماحدش عنده قوة يقف على البوابة فيه

مش معايا ساعة بس رحت قبل الهجوم مباشرة، لقيت عربيات شرطة عسكرية مرشقة في كل مكان وعربيات امن مركزي مرشقة في كل مكان دخلت من عبد المنعم رياض لقيت البوابة فيها عدد قليل وبيقولوا لي ابعتي لنا ناس جالنا اخبارية ان الامن المركزي جاي.. دخلت لقيت الناس بتصفر بتصفر رحت على مكان الصفافير عند بوابة باب اللوق لقيت عربيات امن وعربيات شرطة عسكرية وناس خرجت برة البوابات تمنعهم رحت خارجة برة وقلت لهم تعالوا عايزين ناس عند عبد المنعم رياض، فواحد قال لي يا نوارة خلي الناس هنا ولمي ناس من جوة، دول واقفين بيحموا البوابات، قلت له دول برة، قال لي ماهم عشان يمنعوهم يقتحموا، فقلت له طيب، ورحت الم الناس من جوة والف واجعر: اللي قاعد ما بيعملش حاجة يروح عند عبد المنعم رياض، الناس اتلمت عند عبد المنعم رياض لقيت صفافير وطبول الحرب عند بوابة طلعت حرب، رحت عند بوابة طلعت حرب لقيتها مهوية فبرضوا مشيت اجعر واقول: ماحدش يقعد في الخيم، تعالوا نوزع نفسنا عند البوابات، وانا بالف لقيت بوابة القصر العيني ومحمد محمود مهويين والناس بتصفر عندهم الناس جريت على البوابتين وبعدين صفافير من طلعت حرب فجريت على بوابة طلعت حرب وانا بارضه باجعر: ماحدش يقعد في الخيم.. ماحدش يقعد في الخيم، فواحد قاعد في الخيمة راح مزعق لي: ايه يا نوارة؟ في ايه؟ ما ردتش عليه طبعا يعني مش وقت خناق.. بس الشهادة لله كل الناس اللي ساعتها كانوا موجودين عمالين يقولوا لي يا نوارة، ييجي واحد يقول لي انت مشهورة اقول له اتلهي على عينك، اشمعنى مشهورة في الاعتصام ومش مشهورة برة الاعتصام؟ ماحدش يعني بيوقفني في الشارع ويمضيني على اوتوجرافات ولا حاجة، ده هو حتة برنامج غلبان في قناة التحرير مرة في الاسبوع وتقريبا ماحدش بيشوفه غير اصحابي

المهم، بصيت حواليا اشوف انهي بوابة مهوية اكتر حاجة عشان اقف عندها، لقيت طلعت حرب مهوية رحت اقف عندها، جه هشام يسلم عليا وقال لي على فكرة تشكيلات امن مركزي جاية عليكم، حتسألني مين هشام حاقولك مالكش دعوة، واحد اعرفه وخلاص، ده مش وقت اسئلة، طبعا الناس على البوابات عمالين يقولوا لي ارجعي يا نوارة ورا، وانا مش باسمع الكلام، وبعدين كان فيه ناس واقفين على الرصيف وساندين على السور الاخضر ده، منهم واحد راح برضه منادي عليا: يا نوارة اتق الله... فواحد من المعتصمين - اللي طلع معتصم مش تحريات عسكرية - قاله: مالك ومالها؟ ماهي متقية الله.. وانا ما ردتش عليه طبعا

بعدين فوجئت بخبط عند بوابة باب اللوق رحت ابص لقيت من ورايا مدرعات جيش دخلت الميدان رحت ابص عليهم لقيت حد بيسحبني من ايدي بابص لقيته محمود زغلول، لسه بيسحبني بعيد عن مدرعات الجيش اللي دخلت - تقريبا من عمر مكرم - لقينا مدرعات داخلة من باب اللوق، جينا ننتحي جانبا تجاه هدى شعراوي لقينا الامن المركزي داخل، والناس واقفة تصقف وتقول هييييييه.. الله اكبر... الله اكبر... الجيش والشعب ايد واحدة.. الجيش والشعب ايد واحدة... رحنا واقفين بقى، حنعمل ايه؟ بعدين محمود لقيته بيسحبني ودخل بيا في الشارع اللي هو متفرع من طلعت حرب وفيه عربيات كتير ده، مش عارفة اسمه ايه، باقوله انت واخدني فين؟ قالي انا عايزك تمشي عشان عايز ارجع الميدان، قلت له لا انا حارجع الميدان، قالي انت وشك معروف، قلت له ما انا مغطية وشي بالطرحة.. اه نسيت اقولكم، غطيت وشي بالطرحة عشان كان فيه قنابل مسيلة للدموع عند محمد محمود، المهم فضل يزن عشان يمشيني وانا ازن عشان اقعد راح داخل بيا في شارع باب اللوق، قلت له انا عايزة اخش الميدان، فضل يشدني ومعاه واحد تاني كان جاي من جوة، لقيت واحد ما اعرفوش فجأتن قال: خشي يا استاذة نوارة.. خشي انت نجمة.. لازم تخشي.. بصراحة استفزني، هو مال اهله اصلا، ومحمود زعق له، المهم سهيت محمود والشاب اللي معاه ومشيت ناحية الميدان راح محمود لاحقني، حاولنا نخش الميدان لقينا الشرطة العسكرية قافلة الميدان، وشفت واحد بيتقبض عليه شكله غلبان، وعربية شرطة عسكرية فيها اتنين شكلهم نشطاء - اللي هم العيال المطولة شعرها دي - وبعدين محمود فضل يدور على واحدة اسمها منة، لقيناها في الاخر، قالت لنا ان اللي في عربية الشرطة العسكرية ده اسمه موسى، قعدت انا ومحمود نحاول نخش الميدان مقفلينه من كل ناحية، وناس عمالة تقول الجيش والشعب ايد واحدة وظابط جيش بيصورهم وبيشاور لهم عشان يعلوا صوتهم، وستات عادية من المحجبات التخان دول، عمالين يقولوا علينا احسن احسن.. تميم جه ياخدني، فمحمود ما صدق قالي امشي انت معاه وانا حاجيب منة لانها تاهت مني تاني، فضلوا يقبضوا على الناس، وشايفين وشي وما قبضوش عليا، ومعايا تميم ما جوش ناحيته، وعارفينا بدليل انهم كانوا بينادونا باسامينا، تميم قال لي ده فيه ناس متحاصرة عند مسجد عمر مكرم، قلت له طب اروح لهم، فضلنا ماشيين، كل ما نيجي نخش من شارع نلاقيهم قافلينه بالامن المركزي، بقينا ندخل شوارع جانبية، يسلم علينا ناس شكلها غريب وعايزين يتكلموا ويسألونا انتوا رايحين فين؟ وبعدين يسيبونا، فضلنا نحاول نخرم من شوارع جانبية عشان نوصل لمسجد عمر مكرم لا عرفنا ننفد من اي شارع، ولا حد قبض علينا مع اننا كنا مقطورين، ومقطورين ايه؟ شعب كامل ماشي ورانا ونبص لهم يبتسموا لنا ويفضلوا ماشيين ورانا، وتميم يقول لي: يا رب يقبضوا علينا، دي حاجة كويسة في مصلحة الاعتصام هههههه، بعدين تميم قالي تعالي البيت الاول ارتاحي شوية وننزل تاني، رحنا البيت بعد شوية كلمني احمد زين وقال لي انه عند مسجد عمر مكرم وانهم بيدخلوا يجيبوا الناس من جوة، بس اللي فهمته من احمد زين انه مش اقتحام، بس بيخشوا يجيبوا الناس، واحمد كان معاه علاء سيف، احمد بيقول لي ان فيه واحد قالهم انتوا حيتقبض عليكم، ومسكوا علاء وسابوه بتاع تلات مرات، بعدين لقيت علاء على التويتر بيقول مين قال اني مستهدف؟ ما فضلت اعدي قدامهم ما عملوليش حاجة، فشوفوا بقى علاء روايته ايه بالظبط عشان انا ما شفتش بعيني، بعدين احمد قال لي ان فيه شوية دخلوا يحتموا بالمجمع فموظفين المجمع سلموهم للشرطة العسكرية، وان فيه حوالي 20 من اهالي الشهدا معاه دلوقت وان الشرطة العسكرية ضربتهم، واعتقلوا شوية منهم، بعدين محمود كلمني وقال لي انه تحت البيت، فنزلت انا وتميم لقيناه هو ومنة، وبعد شوية جم ولد وبنت مش عارفاهم، ومنة راسها والف سيف تروح ميدان التحرير تاني، فتميم قالها لو فيه حد لازم يروح يتفقد ميدان التحرير يبقى انا ونوارة عشان لو اتقبض علينا حيتعرف الموضوع والدنيا حتتقلب، لكن انت لو حصل لك حاجة ممكن ما يعملش مشكلة، رحت انا وتميم عشان نعرف نوصل للميدان ابدا.. وماشي ورانا موتوسيكل قاطرنا خطوة خطوة، لدرجة بقينا بقى نخش في اي شوارع عشان نشوف ايه حكايته نلاقيه ماشي ورانا، رجعنا ما لقيناش محمود والشباب، طلعنا البيت، تميم قعد يأتت فيا شوية، ودكتورة رضوى تسكته وتقوله مش وقته الكلام ده، وعمو مريد يطيب خاطري، بعدين شرحت له وجهة نظري، ما عجبوش كلامي دخل نام، شوية واحمد زين اتصل بيا وقال لي انا تحت البيت، عمو مريد نزلني عشان يتأكد اني في امان، نزلت لقيته مع ميار ولقيت وليد ومعاه كام حد جايين من شارع جانبي، ووليد متصاب في ضهره بعصايا، وبيقول لي ده فيه عيال من اللي كانوا معتصمين معانا اول ما حصل الهجوم لبسوا الخوذ، ابراهيم فين وفين بقى على ما صحي ههههههههههههههه هم يضحك وهم يبكي، كلمني عشان يطمن عليا، لقيت ليلى حسن سليمان برضه جاية مع خطيبها وبتقول الناس بقت تزقنا على الشرطة العسكرية وتسلمنا لهم وهم يسيبونا، بعدين مشيت مع احمد وميار لحد ما وصلنا عربيتي، لقيتهم زقوها بعيد عن الميدان، ركبنا العربية ووصلت ميار لمكان ركنتها واحمد نزل ياخد تاكسي، بعدين قلت اخد لفة في الميدان... من اول ما دخلت الميدان بالعربية، لقيت عيال كتير انا عارفاهم من اول يوم معانا في الاعتصام، معاهم شوم - من ضمنهم عيال كانت طردت الباعة الجائلين، عارفاهم بالشكل كويس عشان كل مرة كانوا يتخانقوا مع البياعين، ومن ضمنهم عيال كتير من بتوع: يسقط المشير، وفيهم اتنين من اللي كانوا سخنانين على قفل المجمع، ومنهم عيال كتير من اللجان الشعبية بس كل دول لابسين جيش مش حاجة تانية، اه والامن المركزي كان حونين قوي، كان ناقص يحضر لنا الرضعة ويكرعنا، اللي اتغابى علينا الجيش والناس اللي طلعوا انهم مش ناس، بس كان فيه ناس ناس وكانوا بيتغابوا علينا برضه - المهم ان المعتصمين دول لابسين جاكيتات جيش وخوذ، وفيه منهم عيال على الموتوسيكلات، كتير كتير كتير.. كتير قوي، تقريبا الاعتصام كله عدا انا واصحابي واهالي الشهدا، فقرا واغنيا، لابسين الجاكيتات دي والخوذ، وعربية زبالة بتنضف الميدان، والعيال اللي على الموتوسيكلات عمالين يلفوا حوالين الصينية ويعملوا: تيت تيت تت تييييت.

المهم انا كنت فاكرة ان لينا ومنى سيف مشيوا لانهم كانوا بايتين، فتوقعت انهم يروحوا الصبحية دي يرتاحوا، حتى تميم سألني عليهم قلت له دول في البيت.... اتضح انهم كانوا موجودين، هم كده ما ناموش خالص، بعدين محمد قاسم بعت لي رسالة: امشي من الميدان بيقبضوا على الناس. بعدين فضلت الف شوية، ماحدش قبض عليا ولا حاجة، يمكن عشان كنت في العربية، بعدين مشيت قلت افطر مع امي بقى، رحت اشتري سجاير وقلت لبتاع الكشك فضوا اعتصام التحرير، قال لي: اه.. احسن.. قلت له: احسن ليه؟ قال لي: سادين السكة واحنا رمضان، قلت له: انت عارف ايه اللي عمل المشكلة؟ المشكلة ان اهالي الشهدا الفقرا ما اخدوش حقهم، والظباط اللي قتلوا عيالهم بيشتغلوا لسه ولا اتوقفوا ولا اتحبسوا، وواحد قال لي: اللي قتل ابني جوة في القسم باروح واجي عليه.. اعمل ايه بقى؟ اخد حقي بايدي؟ بعدين جات الشرطة ضربتهم يوم 28 فالناس سخنت ونزلت لهم، وجه يوم 8 يوليو كان الناس سخنانة عشان اهالي الشهدا، بعدين اعتصموا والاعتصام كان كويس، بس جات قوى سياسية نحت اهالي الشهدا وطلعتهم برة الصورة، وبقت المنصات تتكلم عن مطالب القوى السياسية الدستور والمواد فوق الدستورية والناس تتكلم باسمنا زي ممدوح حمزة وبقى اهالي الشهدا واللي نزلوا تضامنوا معاهم مركونين على الرف واللي واكل الصورة هي القوى السياسية، فالناس انفضت عن الاعتصام، جم الاسلاميين نزلوا يوم 29 يوليو وقالوا يا مشير يا مشير م النهاردة انت امير فادوا شرعية للمجلس، وكان اصلا الاسلاميين نازلين يتخانقوا مع القوى السياسية ومالهمش في موضوع الشهدا ده زي ما القوى السياسية ما جابتش سيرتهم ولما نجيب سيرتهم ونقولهم يا جدعان ده اعتصام اهالي الشهدا يقولوا لنا كفاية متاجرة بدماء الشهداء! يعني حتى ولا عايزين يسمعوا سيرتهم.. لو الف كلب ماتوا ما كانوش عملوا كده، وعليه العوض ومنه العوض في اللي راحوا، احنا لو حكمنا بعد كده واحد وادانا بالجزمة القديمة وعمل فينا اوسخ من اللي عمله مبارك يبقى له الف حق.. احنا ناس مش باكيين على اللي ماتوا منا ومفرطين في دمهم.. فقال لي: معاكي حق.. ربنا يرزقنا بحاكم عادل.. قلت له: مش حيرزقنا.. انا باقولك اهو... طول ما كل واحد بيفكر في نفسه ومصلحته وماحدش سائل عن اللي ماتوا ربنا مش حيرزقنا الا بمصيبة تشيلنا ويعاقبنا على اللي فرطنا في دمهم دول.. ورحت ماشية وسايباه، رحت كشك تاني اشتري كروت شحن ورحت فاتحة نفس الحوار: فضوا اعتصام التحرير.. لقيت البياع بقى المرة دي ثوري: هو بعد اللي حصل في العباسية فيه كلام يا انسة؟ انت عارفة ساعة ما كنا في العباسية كان فيه ناس من اللي قالوا لك لازم نعتصم ونقعد في ميدان العباسية وما نمشيش.. فاكراهم؟ قلت له ايوة، اتخانقت مع واحد فيهم ابيض كده وطول بعرض وقلت له انت مين انا مش عارفاك؟ قال لي: اهو ده بقى تحريات عسكرية في سين 28.. لما لقيت ان نص المظاهرة طلعوا بيشتغلوا في سين 28 وعاملين ثوريين وبيحدفوا طوب على الجيش ولقيت شوية منهم كانوا معانا في الاعتصام قفلت من الاعتصام وما رحتوش تاني.. طلع كان معتصم معانا يا عيني

اتصل بيا احمد حلمي وقال لي: انا والله مشيت الساعة ستة الصبح من الميدان.. قلت له: انت مش مضطر يا احمد تبرر انك مشيت.. ام المزايدات دي بقى انا زهقت.. في عز ما بننضرب ناس تقول امال فين فلان؟ وناس قاعدة على التويتر مالهاش تلاتين لازمة عمالة تزايد علينا، وواحد يزايد عليا اني ما اتصابتش ولا اتقبض عليا.. فاحمد قالي: طب بس اهدي.. احنا لازم نعمل حاجة، مش ممكن الناس تنضرب تمشي كده، قلت له: شوف كده حتعملوا ايه وبلغني

بعدين منى سيف كلمتني عشان تطمن عليا، قلت لها: يا منى الاعتصام كله لبس خوذ وجاكيتات جيش.. ايه ده؟ قالت لي: عارفة.. شفتهم، قلت لها: طب ايه؟ الشعب كله بيشتغل مع الجيش ولا... استني استني.. فاكرة يا منى لما قالوا الجيش في حالة استنفار وعمل استدعاءات لناس كتير؟ قالت لي: قصدك ايه؟ قلت لها: هو كده.. عملت استدعاءات للمجندين عشان يشغلهم علينا.. اي حد تعرفيه اتجند في الجيش بقى حرصي منه.. ما تتعامليش غير مع اللي عنده التصاق في الفخذين

بعد شوية اتصلت بيا ميار وقالت لي: فيه واحد اسمه احمد جيفارا اتصل بيا وقال لي ان فيه 200 اسم مطلوبين واسمك فيهم ما تنزليش التحرير، قلت لها لو عايزيني حيجولي البيت، قالت لي ما انا سألته قال لي لا، هم مش حياخدوا حد من البيت هم حياخدوا اي حد من الميتين اسم دول لو نزل التحرير.. قلت لها طب هاتي لي بقية الاسماء.. قالت لي حاحاول حاضر. وانا مستنياها تجيب لي الاسماء
اه صحيح.. نسيت اقولكم:
كان فيه واد بدقن عند بوابة باب اللوق لما الجيش كان قافل الميدان عمال يقول للناس: احنا مشينا يوم الجمعة.. اللي فضلوا دول البلطجية

انتهى

والله الموفق

إن الله لا يهدي كيد الخائنين

2011-07-30T15:00:00.083+02:00

تحديث:
اه صحيح نسيت.. واللي بيقولوا ما وقعناش دول، هم ملتزمين بكلمة، وفجروا في الخصومة لما انكروا كلامهم معانا ومع ابراهيم وبانت نية خيانتهم
لكن هم ما يقدروش ينكروا اللي هم قالوه ونزل على لسانهم في الجرايد: لن نتظاهر لدعم المجلس العسكري.. ونفاجأ بيهم بيقولوا يا مشير يا مشير الف تحية من التحرير، بعد ما الناس في الاعتصام التزمت بكلمتها وشالت اليفط اللي فيها هجوم على المجلس
وبرضه ما يصحش ان حد يندم انه التزم بكلمته وان غيره طلع خاين.. المهم اننا نعلم عليهم.. وكل الناس تعرف انهم خونة وانهم ياكوف بنيامين حنانيا وانهم تبع المذهب الاشكينازي.. وتفضل ملزوقة فيهم طول العمر.. واللي يدافع عنهم يبقى خاين زيهم
-------------
تفجيييير... الاااااااااااااااااااااااااهوووو اكبااااااااااااااااااااااااار

هههههههههههههههههههههههههههههه انا واقعة من الضحك، قالك ولا شفناكم، ولا اتفقنا معاكم، ولا مضينا، من أنتم؟ او كما قال اللمبي: مش فاكرك ياض

طب انا حاحكي من الاول بقى مدام الحكاية بقت كده عشان نشتغل كلنا على مية بيضا

الموضوع وما فيه ان فيه مجموعة ناس راسهم والف جزمة قديمة يعملوا اجماع شعبي.. ليه؟ عشان حق الناس اللي ماتت واتصابت واعتقلت وطلع تلاتينها ما يروحش هدر، وعشان عدم اللامؤاغزة انا ما كانتش هدومي بتغرق بدم الشهدا عشان ييجي العسكر ياكلوها والعة ونعيش ستين سنة كمان نقول: يسقط يسقط حكم العسكر

واذا كان مصر فيها خير اجناد الارض - وما قالش جنرالات طبعا - فهي فيها اوسخ سياسيي الارض، ولو وسخين وربنا منور لهم مخهم زي السياسيين اللبنانيين اهي تبقى مبلوعة.. سياسي نيته وسخة ومخه نضيف، شغال، او سياسي نيته نضيفة ومخه وسخ، برضه شغال، لكن نيتهم وسخة ومخهم وسخ؟ اونلي إن ايجيبت وهو ما ادى بنا الى حكم عسكري اكتر من ستين سنة قابل للزيادة، وقال على رأي المثل: سياسي بنى له بيت عسكري سكن له فيه

يبدأ الموضوع من الاول خالص، من ساعة مبادرة الوحدة الوطنية بتاعة مرشحي الرئاسة اللي لفينا عليهم انا وتميم البرغوثي - اللي ان شاء الله حيسود عيشتي لاني حكيت بس معلش.. سماح المرة دي - رحنا لعبد المنعم ابو الفتوح - بعدين انضم لنا ابراهيم الهضيبي - وبصراحة الراجل عسل، من قبل ما نكمل كلام وهو موافق ومستعد يعمل اي حاجة عشان يوحد الصف، لو كنا طلبنا منه ينزل يكنس ميدان التحرير عشان يوحد الصف كان نزل والله

الفكرة كلها كانت ان مرشحين الرئاسة من تلات اتجاهات رئيسية: اسلاميين، ليبراليين، يساريين، يطلعوا مع بعض على التلفزيون ويقولوا يا جماعة كفاية خناق، احنا اهو مرشحين للرئاسة، وبينا منافسة، وبنقولكم كلنا ايد واحدة يا بهجت لتحقيق مطالب الاجماع الوطني وهم على تلات محاور: 1- الاستقلال الوطني وهوية الدولة العربية والاسلامية. 2- الحرية المطلقة، حرية العقيدة، والتعبير، وممارسة الحياة السياسية. 3- العدالة الاجتماعية.

كويس كده؟ رحنا قابلنا الدكتور البرادعي، والشهادة لله الراجل ساحر، ولطيف، ومهذب، وحبوب، واي بنت تتمناه. وقالنا انه موافق على المبادرة.

رحنا للمستشار البسطويسي فقال لنا كلام كتبه بعد كده في وثيقة المواد فوق الدستورية، وان اهم حاجة دلوقت فك الارتباط ما بين الجيش والاخوان بإننا ندي الجيش صلاحيات اكبر ونعرض عليه عرض احسن من عرض الاخوان

رحنا لحمدين صباحي طلع فاهم الفولة، قالنا انا موافق بعدين قالنا ما معناه بس شوفوا البرادعي طاه.. قلنا له الدكتور البرادعي تمام موافق

طبعا اللي دفعنا اصلا للف ده كان بعد موضوع "جمعة الوقيعة" والخناق الفظيع اللي حصل، وفوجئنا ان الصف الوطني بيتفتت والنظام القديم بيرجع ويتحد والداخلية داخلة علينا بصدرها

المهم البرادعي سافر ولسبب ما بقى الاتصال بينا وبين اطراف في حملته.

قلنا كده قشطة، يطلع البرادعي وابو الفتوح وحمدين مع يسري فودة يقولوا الكلمتين دولم قبل يوم 8 يوليو والله الموفق و"البوستعان" على رأي عمر سليمان، جم حملة البرادعي قالوا لنا لا.. البرادعي مش حيدعي لمليونية 8 يوليو عشان احنا مبدأنا انه لا يدعو لاي مظاهرة عشان لو طلعت صغيرة ما يبقاش شكله وحش. قلنا لهم قشطة، بلاش يدعي للمليونية، يطلع مع ابو الفتوح وحمدين يقولوا مطالب المليونية من غير ما يقولوا انزلوا المليونية.. قشطة؟

قشطة

بعدين الاخوان قالوا مش نازلين، فرحنا قابلنا الدكتور البلتاجي يوم الاتنين، فوعدنا خيرا.. وبصراحة الراجل ده محترم قوي ومافيش حاجة قالها لنا الا وعملها والتزم بيها، بس انا باتكلم على البلتاجي بس كشخص مش كممثل للجماعة، هو كشخص اي حاجة بيتعهد بيها بيعملها... لحد دلوقت.. والله اعلم برضه ماحدش ضامن عمره

جم بقى حملة البرادعي يوم الثلاثاء فجأتن قالوا لنا البرادعي مش حيطلع البرنامج مع يسري فودة.. ليه بس؟ اصله قافش، وبعدين هو مش معقول يطلع يركب على المليونية.. يا عم يركب ايه؟ ده حيساعدنا، المهم من هنا لهنا من هنا لهنا.. هاه هاه.. طيب حاطلع، قعدنا نرتب مع احمد رجب معد برنامج يسري، على اساس التلاتة حيطلعوا بقى، وابو الفتوح كان وراه سفرية لتونس واجلها، حمدين كان في كفر الشيخ باين وقال حيدخل بمداخلة تليفونية، ثم إذ فجأتن قالوا لنا بعد ما اشتغلنا معدين برامج كلنا انا واحمد رجب وتميم وابراهيم الهضيبي: البرادعي لو حيطلع يبقى يطلع لوحده ما يطلعش مع حد.. وقالوا كده ليسري، ثم اختفوا جميعا من حياتنا، نكلمهم ما يردوش، تميم ضغطه علي، وانا عمالة اطاردهم زي ما اكون باطلب منهم يصلحوا غلطتهم

جم يوم الاربع البلتاجي نفذ وعده والاخوان اعلنوا مشاركتهم يوم 8 يوليو

ثم فجأة ظهر بتوع حملة البرادعي قبل البرنامج بحبة صغيرين، بعد ما بقينا مش عارفين ايه اللي حيحصل، فاضطر عبد المنعم ابو الفتوح يا عيني يسافر، ثم قالوا لنا حيطلع لوحده، قلنا لهم طب بلاش يطلع بقى خالص، هي الفكرة انهم كلهم يطلعوا مع بعض، لو طلع لوحده تبقى المبادرة بتاعة البرادعي وده حيشق الصف مش حيوحده زي ما احنا عايزين

فطنشونا وراحوا مكلمين يسري واحمد، وطبعا يسري واحمد عندهم حلقة، وكانوا عاملين حسابهم على ضيوف، ودول بيكلموهم قبلها بساعة وابو الفتوح خد بعضه ومشي.. فراح البرادعي طالع لوحده، ودعا الناس لمليونية 8 يوليو بعد ما كانوا في الحملة قالوا لنا مش حيدعي للمليونية، وقال الكلام اللي اتفقنا عليه من غير الشكل اللي اتفقنا عليه، والشكل اهم من الكلام، لان الكلام كلنا عارفينه

ومافيش داعي اكمل بقى ايه اللي حصل بعد كده، انا اصلا على الكلمتين اللي قلتهم دول تميم وابراهيم واحمد رجب حيبهدلوني اني اتكلمت عشان كانوا قالوا لي اسكتي بقى مافيش داعي للفضايح
بس انا شايفة بقى ان فيه داعي للفضايح
ايها الاخوة.. انا عندي مبدأ في حياتي قلته لاحمد حلمي لما كنت باكلمه عن المجلس العسكري:
انا ما افهمش يعني ايه راجل كبير، وظابط جيش، وعلى كتفه رتب ويقول اتعهد.. ويرجع يحنث بعهده.. لو مش مكسوف من الناس، حيبص في وش عياله تاني ازاي
طبعا احمد حلمي بص لي بشفقة، وبعدين قالي: انا مش فاهم يا نوارة اللي بتقوليه ده خاااااالص.. انت اتجننتي يا حبيبتي
بس انا ما اتجننتش..
اللي اتجنن في مخه صحيح، هو اللي بيشتغل لحساب المجلس العسكري وبيعمل حماقات وخيانات بعلم او بغير علم عشان يسلم البلد على المفتاح لحكم عسكري مبرر وكمان بإرادة شعبية
ايه اللي السلفيين عملوه ده؟ وماحدش يطلع يقول لي ما تعمميش عليهم.. اعمم واللي منهم مش موافق على اللي حصل امبارح هو اللي ملزوم يبرأ نفسه قدامنا
احنا بعد مليونية 8 يوليو اعتصمنا مع اهالي الشهداء اللي كانوا اصلا معتصمين من يوم 24 يونيو وبعدين انضربوا واتقال عليهم بلطجية يوم 28 يونيو
جه الاخوان انسحبوا.. قشطة خلاص هم احرار
جه الاعلام قال علينا طبل وزمر وعلاقات جنسية كاملة في الخيم
جه ممدوح حمزة عين نفسه المتحدث الرسمي باسم الاعتصام وقعد يشيش ويقول مطالب مالهاش اي تلاتين علاقة بالاعتصام
جه فجأتن الاسلاميين كلهم بربطة المعلم قالوا لنا حنعمل جمعة الشريعة، لا جمعة الارادة الشعبية، لا بصراحة بقى.. احنا جايين نطهر الميدان من الملاحدة والكفرة وولاد الحرام وعلاقات جنسية كاملة في الخيم
جم القوى السياسية اللي متضامنة في الاعتصام اتفزعت طبعا، خصوصا بعد خطبة جامع الفتح الجميلة دي، وقبلها الرويني بيقول 6 ابريل جواسيس، فاللي هو ميتين ميتين يعني
واذا كان على الموت يا ريت.. المشكلة انهم حيخشوا يولعوا في خيم الدعارة بقى ويعملوا لنا هيئة الامر بالمنكر والنهي عن المعروف
جات القوى الموجودة في الاعتصام قعدت تجتمع وتقول: عايزين نفض الاعتصام من غير ما يبان اننا خفنا من السلفيين.. عايزين نفض الاعتصام من غير ما يبان اننا اتهزمنا.. عايزين نفض الاعتصام من غير ما يبان اننا فضينا الاعتصام
انا شخصيا مش عايزة افض الاعتصام.. عشان احنا سألنا اهالي الشهدا وقالوا لنا فضوه انتوا.. احنا قاعدين، فاللي حيمشي يبقى بيسلم اهالي الشهدا تسليم اهالي للسلفيين، وبعد ما بقوا بلطجية، حيبقوا علاقات جنسية كاملة في الخيم وحق اللي ماتوا حيضيع
قعدت اختكوا بقى تلطم وتصوت وعملت هليلة وهيصة وطبيلة، وقلت لهم بتسلمونا تسليم اهالي وويك ويك ويك ويا ولود كذا ويا ولود كذا
جه حزب النور السلفي طلع بيان وقال لا لا لا خلاص.. مش حنفض الاعتصام، احنا بس حننزل لمطالب الثورة وضد المبادئ فوق الدستورية
اهي.. ابتدت تندع اهي
جه ابراهيم عيسى قالي حاكلم خيرت الشاطر
جه ابراهيم الهضيبي كلم ابراهيم المعلم وقال له ايه بقى؟ ما تلم الناس.. فلم الناس
جات رباب المهدي كتبت بيان بالتشارك مع واحد من الجماعة الاسلامية
جم حزب النور وبتوع عبمنعم الشحات قالوا طب زودوا الغاء المطالب الفوق دستورية - والفوق لا مؤاغزة دستورية دي حاجة فاكسة اخر تلات حاجات - فقالوا لهم عداكوا العيب بس ده مطلب مش توافقي واحنا عاملين وثيقة توافقية
قالوا لنا.. طب قشطة، احنا ملتزمين بالوثيقة دي، ومش حنرفع شعارات خلافية، بس احنا نازلين ضد الفوق دستورية.. وبصراحة اكتر، ما تخافوش، لا شريعة ولا اسلامية اسلامية ولا الكلام ده.. قشطات؟ قلنا لهم قشطات.. الراجل بيتمسك من كلمته
الراجل بقى
اساسا ولا جابوا سيرة الفوق دستورية الا مرة او مرتين، وهاتك يا جعير كأنهم داخلين على قريش، وحنثوا بكل تعهداتهم وخالفوا وعودهم، وخانوا الامانة، وفجروا في الخصومة كمان وقالوا ولا نعرفكم ولا عمرنا شفناكم ولا اتفقنا معاكم على حاجة واللي عاجبه ع الكحل يتكحل واللي مش عاجبه يترحل ولو تعرفوا تلموا ناس زينا ابقوا تعالوا جنبنا
يعني الاربع خصال بتاعة النفاق فيهم.. منافقين خالصين ولله الامر من قبل ومن بعد
المكاسب من امبارح:
- انتزعنا من السلفيين اعتراف ان المعتصمين مش طبل وزمر وعلاقات جنسية كاملة ومش بلطجية وصرحوا بان المعتصمين من خيرة ثوار مصر وزادوا ان لولاهم ما كناش خرجنا من السجن - اللي بالمناسبة حترجعوه وترجعونا معاكم باللي بتعملوه ده وحسبي الله ونعم الوكيل
- انتزعنا من الاسلاميين كلهم ان المطالب اللي في الوثيقة مطالب توافقية وهم قابلين بيها وملتزمين بيها.. فيه اللي خانوا اللي الالتزام، وفيه اللي احنا مستنيين منهم موقف تعليقا على خيانة الالتزام من ناس المفروض انهم ضامنينهم.. اقصد الاخوان، الاخوان هم اللي جروا لنا السلفيين من ايدهم وقعدوهم على حجرهم في كل قعدة نقعدها معاهم مع ان السلفيين دول، وتحديدا حازم رجل الاستعراض، كانوا بيقولوا علينا خارجين عن الحاكم، ويمكن عشان كده مش سائلين في اهالي الشهدا ربما يكونوا مش معترفين انهم شهدا بالاساس مدام خارجين عن الحاكم.. ومسئولية الاخوان دلوقت انهم يا يفصلوا نفسهم عن السلفيين بدل ما يقصروا رقبتهم في كل مرة كده، يا يسيطروا عليهم، يا يدينوا موقفهم، يا حنحسبهم معاهم بقى
- الاعتصام ما اتفضش، صحيح ان واحد صاحبي بيقول لي ان فيه سلفيين قالوا له انهم زعلانين ان ما حصلش اشتباك وانهم كانوا جايين على خناقة، بس الحمد لله، ماحصلتش الخناقة، وما حرقوش الخيام زي ما بعضهم توعد، والاعتصام اخد زخم اكتر بعد الجمعة دي، اولا بسبب اللي السلفيين عملوه، ثانيا لان الخطاب الاعلامي تجاه الاعتصام اتغير بسبب محاولات التوافق
الخسائر:
ابراهيم الهضيبي ضغطه كان 150 على 110 ولو كان حصل له حاجة كنت ولعت في السلفيين كلهم وعليكوا على الثورة وعلى البلد.. حتموتوا لي صاحبي
الناس خافت، وبالذات المسيحيين، وجات لهم حالة هيستيرية، وابتدوا يخبطوا بلا مبرر، يخبطوا في بعض، ويخبطوا فينا، ويخبطوا في اي حد الا اللي خان العهد، والخوف كل الخوف ان بعضهم يروح للمجلس ويتوقع في عرضه ويقول له اقعد بقى حكم عسكري احسن من دول.. وهو المطلوب اثباته، واذا كنا افشلنا خطة فض الاعتصام مش لازم ننجح خطة الحكم العسكري تحت اي ظرف
ناس زي محمد واكد ندموا على ان كان عندهم اخلاق.. بذمة النبي ده اسمه كلام يا ناس؟ فيه حد يندم انه عنده اخلاق وبيلتزم بتعهداته؟
الحل:
احنا نفضل ملتزمين بمطالب التوافق الوطني.. وبصراحة بقى نبطل لهجة التعالي على البشرية، الفوق دستورية والدستور اولا تحمل في طياتها تعالي على الناس، احنا ملزمين بالمطالب التوافقية، ودي اللي مفروض نشتغل عليها، ولازم نفضل متمسكين بالمطالب اللي ماحدش يقدر يقول عليها لا حتى لو مبيت النية للخيانة، عشان يبقى هو اللي خاين
والمفروض نشتغل على المطالب دي مع الناس، وبقالي ست شهور اقول محتاجين فواعلية ينزلوا يبرموا في الشارع زي ما انا بابرم كده، ولا حماة لمن تهاتي
وممدوح حمزة يسكت بقى شوية
واهالي الشهداء يتصدروا الصورة وبيانهم هو اللي ينزل، ماحدش يتكلم باسمهم، وماحدش يتاجر بقضيتهم عشان يحقق مكاسب سياسية، وهم لهم لسان وبيعرفوا يتكلموا
ومافيش عاقل في الدنيا يندم انه عمل وثيقة توافق وطني ولم شمل، ومافيش عاقل في الدنيا يندم انه التزم بتعهداته وطلع عنده اخلاق، ومافيش عاقل في الدنيا لما يواجه ناس خونة للعهد يقوم يتخانق مع اللي ما خانش العهد.. دي هيستيريا دي
نهدا كده ونشتغل صح
الموضوع محتاج طولة بال
اليوم ما وقفش على امبارح، امبارح كان البداية، بداية محاولات العسكر للانقضاض على الحكم، يا نسيبها للعسكر يا نقاوم، والمقاومة تبقى باننا نتمسك بالتوافق الوطني والخاين يتعلم عليه ويتحاصر ويتفضح
انا شخصيا دلوقت حاليا ما وراييش بقى شغلانة غير اني اقول على المجلس والسلفيين انهم تعهدوا بحاجات وما عملوهاش..
واللي عمله السلفيين مش بس خيانة للعهد، ده خيانة للبلد وللثورة وبيسلموا البلد للحكم العسكري، ولو فيهم تلاتة مش موافقين على اللي حصل يبقى يعلنوا عن نفسهم وينفوا التهمة عن نفسهم مش احنا اللي حنمشي نحسس ونعتذر
ولسه الشغل كتير
احنا مكملين في الاعتصام
وملتزمين بوثيقة الوفاق الوطني، وحنشتغل عليها، ولازم الكل يشتغل عليها في الشارع ومع الناس، انشالله تطبع ميت نسخة وتمشي توزعها على الناس
ولازم الناس كلها تعرف مين اللي خان العهد ويتفضح
والله الموفق

الحمد لله.. ربنا يتمم بخير، نقرا الفاتحة؟

2011-07-27T10:21:00.003+02:00

آدي كمان بيان 6 ابريل

صباح الخير على الورد اللي فتح في جناين مصر

صلوا ع النبي.. وموسى نبي عيسى نبي محمد نبي وكل من له نبي يصلي عليه، وبحق من قال لموج البحر يهتدي لتقولوا يا عزيز

يجعلها بيضا ع الكريم سودا ع اللئيم بمبة ع اللي ما يساعد الحريم

البيان الآتي قعدت الاستاذة رباب المهدي والاستاذ... الاستاذ... نسيت اسمه، شيخ سلفي، ابراهيم الهضيبي قالي على اسمه ونسيت، هو من الجماعة الاسلامية غالبا، بس هو قعد مع رباب المهدي وقعدوا يكتبوا البيان ده وتم جمع التوقيعات عليه، المفروض البيان يتنشر في الشروق النهاردة ، وانا بصراحة مش باعرف ادور في موقع الشروق ده بيدوخني، فابراهيم بعت لي البيان بالميل وعلي الموقعين

بيان:
جمعة الارادة الشعبية ووحدة الصف

تؤكد القوى الوطنية المجتمعة، في هذا الظرف التاريخي الحَرِج الذي تمر به البلاد، على أن الجمعة القادمة (٢٩ يوليو) هي جمعة الإرادة الشعبية ووحدة الصف الوطني، الهادفة إلى إنهاء حالة الصراع والانقسام بين القوى السياسية المختلفة ورفض التشرذم حول مصالح سياسية أو حزبية ضيقة.

وتؤكد على استمرار التوافق والإجماع الوطني، الذي كان سببا رئيسيا في إنجاح الثورة، مع التأكيد على أن هذه الجمعة لن تشهد تنازعا بين أي من القوى السياسية المشاركة، والتي توافقت على المطالب التالية:

‪

1- ‫وقف المحاكمات العسكرية للمدنيين، أما من تمت إدانتهم فإعادة محاكمتهم
أمام المحاكم المدنية المختصة

2- ‫الإسراع في محاكمة قتلة الثوار، وإنهاء كل محاولات إهدار حق أسر الشهداء
في القصاص العادل والتعويض الملائم والتكريم اللائق بشهداء مصر

3- ‫تفريغ دوائر قضائية لضمان المحاكمة العاجلة والعادلة لرموز النظام
السابق

4- ‫إنجاز كافة الإجراءات التي تحقق رفع مستوى المعيشة للمواطنين وتحقيق
العدالة الاجتماعية عن طريق وضع حد أدنى وأقصى للأجور

5- ‫الإسراع في تفعيل قانون الغدر لمنع كل من أفسد الحياة السياسية من
المشاركة في صياغة مستقبل مصر

وإننا، إذ نؤكد على مشروعية وعدالة كل هذه الأهداف، فإننا نعول في تحقيقها على
الإرادة الحرة للمصريين، وعلى نضالهم السلمي، البطولي، في ربوع مصر المختلفة،
ونؤكد على أهمية قيام مؤسسات الدولة بدورها في حماية حقهم في التظاهر السلمي.

*الموقعوون:*

- إئتلاف شباب الثورة

- حزب الحرية والعدالة

- الجماعة الإسلامية

- حزب التحالف الشعبى الإشتراكى

- حزب العمال الديموقراطى

- الحزب المصرى الديموقراطى الإجتماعى

- الإشتراكيين الثوريين

- حزب مصر الحرية

- الجبهة القومية للعدالة و الديموقراطية

- حركة المصرى الحر

- اللجان الشعبية للدفاع عن الثوره

- حركة مشاركة .

-حركة بداية .

- حزب الوعي .

- حزب التيار المصري .

- رابطة الشباب التقدمي

- ائتلاف شباب اللوتس

- اللجنه التنسيقيه لتحالف حركات توعية مصر .

- شباب من أجل العدالة والحرية .
------------
والكلمة كلمة أهالي الشهداء والمصابين والمعتقلين والشورة شورتهم والرأي رأيهم واللي يقولوه يمشي على رقبة اتخن واحد في البلد
وده خبر عرفت اطلعه من موقع الشروق اللي بيلخبطني
--------
شوفوا بقى... هو انا متعودة اني لما ابتدي في حاجة كويسة اصحاب المصلحة المضادة يعملوا عليا حملة فده بيطمني، لكن انا عمري في حياتي ما لقيت سيل الشتايم دي كلها بمجرد ما عرفوا اني مشاركة في موضوع المصالحة وتوحيد الصف ده، انا بجد عندي فضول اعرف هم كانوا مدبرين ايه يوم الجمعة ده، هو مافيش غير ان اللي كانوا مدبرينه ان تحصل مواجهات دامية - ومازال احتمال اندساس ناس تعمل مواجهات قائم ولازم ناخد بالنا - وتنتهي بحكم عسكري، حيث ان القوى الوطنية اللي مش اسلامية بقى طلعوا عملاء والقوى الاسلامية طلعوا بلطجية وبتوع عنف، فكده بقى ما ينفعش حد يمسك البلد غير الجيش... لها تفسير تاني؟ انا شخصيا عقلي مش جايب لي اي تفسير تاني، واصلا دي لعبة مبارك القديمة: التيار الاقوى هو التيار الاسلامي ودول ارهابيين، والتيارات التانية ليبراليين ولا يساريين دول عملاء لجهات اجنبية... فانا احسن واحد في البلد. وعم احسن واحد في البلد ده ما وقعش الا لما العملاء والارهابيين اتحدوا.
المهم ان انا سعيدة لإن مش انا اللي عملت الجهد، انا اللي لهيت اصحاب المصالح عن اللي بيعملوا الجهد، اتلهوا فيا على ما التانيين يخلصوا شغل والحمد لله ربنا وفقهم، بس لسه احتمال الخطر قائم، انا وابراهيم اتفقنا اننا حنقف لجان شعبية يوم الجمعة ان شاء الله، ولو اني لما باقف لجنة شعبية بتتحول لصندوق الدنيا والناس بتتعامل معايا على اني دبابة جيش ويقفوا يتصوروا جنبي واللي واقف في الدور بيفضل يزعق عشان ملطوع في الطابور خصوصا لما يقعد زميله يسأله ادوس فين؟ طب تعالوا يمين شوية، طب شمال شوية، والناس واقفة تشتم ههههههه، بس اظن اليوم حيبقى زحمة ومش حيبقى عندهم خلق يقفوا يتصوروا
بس انا لازم ادي الفضل لاصحابه، وان شاء الله بقى مش حيتشتموا، او يتشتموا بقى اعملهم ايه؟ ما انا بقالي تلات ايام باحوش عنهم البونيات والشلاليت وعاملة لهم درع بشري:
رباب المهدي، ابراهيم الهضيبي، احمد سمير، ابراهيم عيسى، احمد الدوري.. وكان معكم عبر القارات مينا زكري - اللي طول عمري مش عارفة هو ذكري ولا زكري، طب لو زكري، يبقى يعني ايه زكري؟ - ونحب نوجه شكر عميق الى الدكتور البلتاجي، اللي عمل المستحيل عشان يتجاوز الاجراءات البيروقراطية في الجماعة عشان يوقعوا على البيان، انتوا عارفين بقى الاخوان لازم يعملوا اجتماع ودراسة واجتماع تاني ومناقشة واجتماع تالت وتصويت ولولا الدكتور البلتاجي كانوا مضوا على البيان على عيد الفطر هههههههه
ونشكر الجنود المجهولين على التويتر اللي كانوا بيبعتوا لي دايركتات ويقولوا لي انهم اجروا اتصالات للضغط
ومجموعة "لا للمحاكمات العسكرية" وعلى رأسهم منى سيف
ده غير 6 ابريل اللي اتصلوا بالسلفيين عشان ينسقوا لتأمين الميدان
باقي حاجة بقى مهمة جدا... بيانك في جيبك، وحدتك في صفك، اللي يشق الصف قطعه، من هنا لحد ما يوم الجمعة يخلص
هم لسه ما يأسوش، وماحدش يسألني مين هم؟ عشان انا نفسي مش عارفة، بتوع آسف يا ريس ضد المصالحة، بتوع السفارة الامريكاني ضد المصالحة، بتوع املنا هو الانقلاب العسكري ونوارة بوظت لنا الانقلاب ضد المصالحة، بتوع بنحبك يا مجلس ضد المصالحة، بتوع احنا الثورة والثورة احنا ضد المصالحة، بتوع يسقط المشير ولما تقولهم يسقط حكم العسكر يبصوا في السقف ضد المصالحة، ناس يبانوا انهم عكس بعضهم فجأة بقت المصالحة بتهددهم كلهم وقلبهم حيقف ومش عارفين يعملوا ايه عشان يوقفوا الموضوع ده، واظن حيعملوا حاجتين:
من هنا ليوم الجمعة حملات مزايدة وشتايم وجنان اصلي.. ودي سهلة قوي، انا اخدت بالي انك لما بترد عليهم الموضوع بيسخن، تجاهلهم لحد ما يزهقوا، ويا سيدي انا عن نفسي ما بازعلش من الشتايم وواخدة عليها، وما باحطش في بالي الاتهامات بالباطلة وبعد شوية بتروح وبيفضل الحق، فما تشغلش نفسك بيا، ولا تخلي حد يجرك لخناقة حتى لو شتمك، وانا باعرف اخد حقي بالصندل، وبالنسبة للاساميهم مذكورة، هم ناس مؤدبة ومش بتعرف ترد على الشتايم ولا عندهم صنادل، على الله حد يتعرض لهم بقى.. صندلي انا جاهز
من هنا ولحد يوم الجمعة ويوم الجمعة نفسه ناس حتندس من الطرفين وتعمل مشاكل وخناقات، عندك مثلا الواد اللي عامل سلفي ومش بيصلي - وبالمناسبة راح كحت اورته بغطا كوكاكولا لما عرف اني باقول عليه مش بيصلي - بعد ما جاب لنا البنت اللي عاملة مسيحية واسلمت راح جاب لنا امبارح بنت ويقول لي: مش معاها بطاقة، نعمل فيها ايه؟ قلت له مشيها، قالي: انت ترضيها لاختك؟
!!!!!!!!!!!!!!!!!!!!!!!!!!!!!!
انا ما اعرفش بيجيب كم البنات اللي مالهمش صاحب دول منين؟ هو لما عرف اننا كنا حلينا مشكلة البنت اللي عاملة مسيحية واسلمت دي راح قال لندى قصاص: انتوا فاكرينها اتحلت؟ ده انا حاجيب لكم الافات.. اه وربنا، فقد اعصابه خالص مش عارفة ليه؟ بس اغلب الظن انه كان ناوي يعمل مشكلة بإن ناس تيجي تدعي انهم عايزين بنتهم وناس تيجي تانية عايزين اختهم وتحصل مواجهات
ده مش اخطر حاجة، بس ده مثال، حنلاقي في الميدان حاجات شبه كده كتير، وكل شوية خناقة وافتعال مشاكل، وحنلاقي يوم الجمعة نفس الحكاية.. مهمتنا بقى اننا نحتويها، ونأمن الميدان كويس قوي، ومش بس نعمل على البوابات تأمين، نعمل شرطة شعبية داخل الميدان تراقب اي محاولات لافتعال مشاكل، واي محاولات على المنصات للهتاف بشعارات تفرق الصف وتعمل خناقة، او يفط تعمل مشاكل بين الناس
وزي ما قلنا: حاسبوا من اللي بيزايد على ثورية الناس ويعمل فيها ثوري اكتر من الثوريين.. ده امن وش، طول عمرنا من ايام الجامعة متعلمين الحكاية دي
والتيارات الاسلامية حاسبوا من اللي بيزايد على دين الناس ويعمل فيها سيدنا ابو بكر الصديق وبقية الناس بيفرطوا في دينهم.. ده برضه امن وش وبرضه متعلمين كده من ايام الجامعة
واهم من ده كله نقول: يا رب
يااااااااااااااا رب... مالناش غيرك يا رب
هو اللي عمل الثورة دي، وهو اللي حيحفظها ان شاء الله، وبأمر الله، وزي ما ربنا عودنا دايما، كل ما يعملوا لنا خطة ضدنا ربنا يرد كيدهم في نحورهم وتقلب ضدهم وتبقى في صالحنا... عشان ربنا عايز للبلد دي خير، وعايز للغلابة انهم يتنصفوا بعد كل اللي شافوه وصبروا عليه في حياتهم، وعايز لشباب طاهر خرج يموت نفسه عشان بلده انه يتجبر خاطره، وعايز لارواح الشهدا انها تستقر وترتاح لما البلد دي تتعمل زي ما هم كانوا عايزين ولما اللي هم ماتوا عشانه يتحقق
ونريد أن نمن على الذين استضعفوا في الارض، ونجعلهم أئمة ونجعلهم الوارثين، ونمكن لهم، ونري فرعون وهامان وجنودهما منهم ما كانوا يحذرون.
أمر الله نافذ
واحنا مكملين اعتصام لحد ما اهالي الشهداء ولحد ما المصابين واهالي المعتقلين والمتحاكمين محاكمات عسكرية يؤمرونا ويقولوا: رضينا
وعيب قوي قوي قوي يا اسمكم ايه اللي بتعملوه ده.. عيب عليكم كل شوية تبعتوا لهم ناس يساوموهم على دم ولادهم ولا على عينيهم المخزوقة ولا على ولادهم المرمين في السجون... لو كان الموضوع فلوس ما كانش بقى ده حالهم، لو كان الموضوع عيشة والسلام ما كانش ولادهم ماتوا ولا كانت عينيهم راحت ولا كان ولادهم اترموا في السجن، انتوا ترضوها على نفسكم؟ انتوا ترضوها على ولادكم؟ ولا عشان ماهم غلابة فاكرينهم حيتكسروا بالقرش؟ بكرة يعلموكوا درس ان الفقير عنده كرامة زيكوا واكتر منكوا.. هو فيه بعد الضنا ونور العين؟
ملحوظة تانية:
اهالي الشهدا متضايقين قوي ان فيه ناس بتطلع على المنصات تتكلم باسمهم، هم لهم لسان يعرفوا يتكلموا، ومتضايقين قوي ان ماحدش بيرضى يطلعهم على المنصات.. عيب عليكم، دول اسياد البلد كلها، المفروض ماحدش يطلع على المنصة غيرهم، وماحدش يطلع في الاعلام غيرهم، وماحدش يفصل ولا يحل ولا يربط غيرهم، وتاني نرجع نقول: اللي بيدفع ضرايب في بلده بيطالب بحقه فيها، امال اللي بيدفع دم ابنه يبقى ايه؟ هم اصحاب البلد الاصليين، وهم اللي يتسمعوا، وهم اللي انكووا بالنار واللي حرقتهم على ولادهم عرفتهم الصح من الغلط ووجهت بوصلتهم صح، مش عشان غلابة يبقوا ما بيفهموش، بيفهموا سياسة وبيفهموا في كل حاجة احسن من اي حد في الدنيا دي، واللي يقرروه هو الصح ويتسمع
اخيرا:
بالنسبة لرمضان.. احنا محتاجين عدد كبير من المسيحيين ييجي يأمن البوابات في نهار رمضان لإن الوقوف على البوابات بالنسبة لناس صايمة في الحر ده دبح دبح، وعادي يعني احنا عايشين سفلقة على المسيحيين هههههههههه يأمنونا واحنا بنصلي ويأمنونا واحنا صايمين :)))))) ويستحملونا يعني، ماهم زاعق لهم نبي وتفجير كنيسة القديسين جاب آخر مبارك... يالا مستنينكم
ولو تعرفوا تجيبوا لنا الراجل الجميل ده اللي بييجي يعمل قداس في الميدان يبقى كتر خيركم قوي
همتكم معانا بقى كلكم
ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب
والشوق بيقلب مع الحرمان ساعات بغضب
والصبر بس اما يخلص يبقى صبر جميل
ياااااااااااااا رب

حتى الآن.. لم يف بوعده سوى السلفيين

2011-07-26T16:41:00.002+02:00

تحديث:
الشيخ محمد عبد المقصود.. اقروا بيانه
عداهم العيب السلفيين كده
--------
شوفتوا بقى؟ قعدتوا تقولوا السلفيين هم المجرم الاثيم والقاتل اللئيم

ادي احنا قاعدين مستنيين البيانين بتاع ستة ابريل والاخوان وماحدش عمل التحرك الاول غير السلفيين

ادي حزب النور السلفي اهو

والله العظيم انا عارفة انهم اصلا غلابة وطيبين، هم بس بيتكلموا بالفصحى بتاعة الكتب القديمة فالناس بتفتكرهم بيشتموا، هم ما بيشتموش، هم بيتكلوا كده
بالنسبة للاخوان عندهم بيروقراطية ههههههههههه لازم يعملوا اجتماع وبتاع

مش عارفة ستة ابريل ملهيين في ايه؟ عمالين يعتلوا في البيان من امبارح

بالنسبة للصحف والاعلام.. اتقوا ربنا بقى، انتوا بتعملوا زي يوم 27 مايو لما لغينا الدستور اولا وانتوا قعدتوا تقولوا برضه الدستور اولا والمرة دي الناس قالت مش رايحين نطهر الميدان ولا حاجة وانتوا مصممين انهم رايحين يشتبكوا ورايحين لتطهير الميدان وجمعة الشريعة والكلام ده، حسبي الله ونعم الوكيل فيكم

احنا مستنيين الاخوان وستة ابريل بقى

وفيه ناس كتير مش عايزة المصالحة دي تتم، وفيه ناس عندها هلاوس ان نوارة اللي ورا المصالحة من امبارح وهم مطلوقين عليا، بتوع الفلول وبتوع الفلوس واللي عاملين ثوريين... كلهم ما وراهمش الا نوارة وواحد قال ان انا اخطر من المجلس العسكري :) وواحد قال: احنا كنا حاطين امل على انقلاب عسكري وجات نوارة بوظته بالبوست اللي كتبته! هههههههههههههههههههههههههه اه وربنا، انا اللي بوظت الانقلاب العسكري اذا كان 52 انقلاب يعقبه تخليه وانقلاب تاني وهو حاطط امل على انقلاب في الانقلاب المنقلب على الانقلاب؟ وكمان انا اللي بوظته؟

لا وشغالين في كل حتة: نوارة بوظت الانقلاب نوارة بوظت الانقلاب

طب الحمد لله اني انا اللي بوظت الانقلاب وانا اخطر من المجلس العسكري وانا عتريس انا بلوة سودا

الخلاصة يعني، يبدو اني ما بوظتش الانقلاب، يبدو ان اللي سعوا في المصالحة بوظوا خطة تانية مش عارفة هي ايه؟ بس ماحدش منهم مسحوب من لسانه واتكلم غيري، كلهم يعملون في صمت، واصلا المصالحة سهلة لان الخصومة كانت مبنية على سوء تفاهم من الطرفين والطرفين نيتهم سليمة

المهم.. عايزين بقى ربنا يوفقنا، وعايزين نعمل حملة مضادة لان الظاهر هم مش حيسكتوا على موضوع المصالحة وحيحاولوا يسخنوا بين الطرفين على قد ما يقدروا وناس جاية تقولي السلفيين بيشتموا فيكي قلت لهم: الله يسامحهم، ويبدو ان فيه مندسين بين الطرفين ناس بتزايد على تدين الناس في طرف وناس بتزايد على ثورية الناس في الطرف التاني، فعايزين بقى نتصدى لهم بكل ما اوتينا من قوة

ايدكم معايا

ونحب نشكر احمد الدروي وابراهيم الهضيبي واحمد سمير وابراهيم عيسى.. ما تشتموهم بقى معايا اشمعنى انا اتشتم لوحدي

ان شاء الله خير

2011-07-25T17:08:00.003+02:00

تحديث:
حركة 6 ابريل حتعمل الجمعة الجاية جمعة توحيد الصف وجاري كتابة البيان
وان شاء الله حيعملوا مع السلفيين لجان لتأمين الميدان
:)
واهل مصر صحابي واولياء الله
-------------
بصوا بقى، فيه شخصيات كتير متدخلين عشان ان شاء الله يوم الجمعة ده يبقى يوم لاستعادة وحدة الصف

مش عارفة اقول اسماء دلوقت ولا لا، بس اللي قالوا عن نفسهم في التويتر ابراهيم الهضيبي واحمد سمير واحمد الدروي

وانا كلمت د. عصام العريان ود. البلتاجي وهم تعهدوا ببيان لتوحيد الصف وتأليف القلوب

انا عايزة من المنسقين في ميدان التحرير كام حاجة كده

اولا: اللجان الشعبية الموجودة دي مش امان، عايزين نعيد هيكلتها بحيث ما تحصلش مشاكل الخميس بالليل

ثانيا: اليفط الخلافية تتشال اليوم ده بس ونرجعها لما يمشوا عشان برضه ما تحصلش مشاكل

بالنسبة لهم هم تعهدوا بإنهم يطمنوا الناس المعتصمة في التحرير وده اول تعهد ظهر وان شاء الله منتظرين منهم بيانات لتهدئة روع الناس في الميدان
وكمان اهالي العباسية رايحين يعتذروا لنا
والله حتروق وتحلا.. ده ربنا.. ربنا.. قولوا يا رب

------------

فيه حاجة مهمة قوي، فيه ناس مش عايزة المصالحة دي تحصل

انا ما اعرفش ايه مصلحتهم بالظبط، بس فيه ناس من اللي مش سيئي النية لكنهم عندهم اخوانوفوبيا واسلاموفوبيا نفسهم الاسلاميين ييجوا يضربونا وتحصل الاشتباكات دي عشان المظهر بتاعهم يبقى ان دول بلطجية ويتحرقوا

طبعا هم فاكرين ان ده حيفضي السكة لقوى سياسية تانية وده مش صحيح، اذا كان ضرب المربوط بيخوف السايب فضرب السايب بيقتل المربوط، حرق فصائل سياسية قوية يسهل حرق الفصائل التانية

وبعد ما تطلع 6 ابريل عميلة وجاسوسة ويطلع الاخوان والسلفيين بلطجية الناس حتتف علينا وتقول يا مرحب بالحكم العسكري يا مرحب

وبالمناسبة فاكرين لما قلت لو اتشتمت على البوست اللي فات يبقى كلامي صح، اتشمت فعلا، والنهاردة انفجار شتيمة عشان قلت اني انا واطراف تانية بنحاول نعمل تهدئة ومصالحة ما بين المعتصمين وما بين الداعين ليوم جمعة 29 يوليو وهيستيريا بقى وشتايم وافتراءات

فانبسطت بقى، حسيت ان كده صح

هو فيه ناس غيري والله بتعمل شغل، بس هم مش حابين يبانوا في الضوء دلوقت لحد ما يخلصوا، انا اللي مسحوبة من لساني، وبرضه احب اوافيكم بكل حاجة بتحصل عشان مش باحب الاسرار

البرهامي تعهد للدروي بإنهم يطلعوا بيان للتهدئة

والعريان والبلتاجي تعهدوا لي بنفس الحكاية وطلبوا مني ان بشكل مؤقت منسقين الاعتصام يشيلوا اليفط الخلافية عشان نعمل وحدة صف

طبعا لما نيجي نشيل اليفط الخلافية حتحصل خناقات من ثلاثي اضواء المسرح المزروعين وسطنا: المخابرات العسكرية، والمخابرات العامة، وامن الدولة.. زي ما احنا راسيين يعني، ما احنا اتعودنا من يوم 8 يوليو كل ما نيجي نعمل حاجة كويسة تلاقي الثلاثي ده انفجر بخناقة وابتدا يزايد على ثورية الثوريين، فعادي يعني احنا اتعودنا، نشرب احنا الخناقات في عدم حضور اللي جايين يوم 29 عشان دول بيتخضوا مش واخدين على الباللو بتاع كل تلات ثواني ده

وبالمناسبة ما بيحبوش الشتيمة.. بطلوا تشتموا فيهم، هو اللي بيقلبهم انهم بيتشتموا

وبعدين هم فاكرين ان ممدوح حمزة هو قائد الاعتصام، وما يعرفوش ان العيال اتلمت عليه لما جه وقالوا له: انت عمال تقول انت اللي مكلف الاعتصام، مكلفه في ايه؟ قول لنا دفعت كام واحنا نلمهولك

ولما كلمت البلتاجي لقيت سوء تفاهم كتير، هم فاكرين ان ساويرس وممدوح حمزة هم اللي ورا الاعتصام، وفاكرينا بنقول مواد فوق دستورية والدستور اولا، ومش عارفين ان فيه اهالي شهدا ومصابين بالكثافة دي، وفاكرين حاجات كتير غلط

فانا شرحت لهم الوضع

وانا محتاجة مساعدة 6 ابريل عشان نكمل موضوع التوافق ده

ولازم كل الاطراف تعمل حسابها ان اطراف كتير حتقاوم التوافق وعايزة تبوظ اليوم وتعمل مواجهات وخناقات، غير التلات اجهزة، الناس اللي عمالة تركب على الاعتصام وتقول مطالبها هي على التلفزيون وهم ما بيعتبوش الاعتصام

وانا بصراحة قلت للبلتاجي سبب ان فيه ناس بتركب على الاعتصام من براه هو تغيبكم انتوا، وانتوا تتحملوا المسئولية دي... فسكت

المهم يعني.. المهمة مش سهلة، اي حد بيحب مصر وعايز يعمل التوافق ايده معانا

ياللي تحب النبي ايدك معانا وشيل.. الحب اتقل من اسمه واسمه نفسه تقيل

المهمة حتلقى مقاومة فظيعة... كل واحد ييجي على نفسه عشان مصر لحد ما اليوم ده يعدي على خير

الهدف من اليوم ده هو حرق كل القوى الثورية لما يمسكوا في بعض عشان الناس تختار الحكم العسكري، وفيه ناس مستفيدة ودافعة فلوس في الموضوع ده

اتقوا الله في بلادكم وبلاش تبادل اتهامات وكل واحد يتهم نفسه ويبرأ اخوه..... زي ايام التحرير اللي بجد

فاكرين؟

مجرد احساس مالوش اي ادلة

2011-07-23T17:46:00.004+02:00

قلبي بيقول لي حاجات مالهاش اي ادلة في ايدي، بس مجرد احساس قلبي، ومش تحليل سياسي ولا حاجة، انا ما باحللش.. انا بامشي ورا الشعب، اللي شعب بيعمله باعمله.. عشان باحبه زي الستات اللي بتلغي شخصيتها لما بتحب واحد وتفضل تقول: احمد قال لي.. احمد ما يحبنيش اعمل كذا.. اهو انا بقى الشعب قالي.. الشعب ما بيحبنيش البس اصفر.. كده

بس مجرد احاسيس طفولية حبيت افضفض بيها معاكوا، والله طلعت صح انبسط بقى واحسن ان زياراتي لسيدنا الحسين جابت نتيجة، طلعت غلط يبقى يا رب تطلع غلط

- احساسي كده ان امريكا حاطة خطة لاحتواء الثورة المصرية بحيث انها ما تبقاش ثورة استقلال وطني حقيقي

- خطتها ان المجلس العسكري القائم ده حيمشي حيمشي، وحيخرج خروج امن حيخرج خروج آمن وهي الظاهر مطمناه بدليل انه ما بقاش متوقع في عرضنا زي زمان وكل ما نعمل له مليونية ولا اعتصام يخاف، ويبدو والله اعلم انه للوهلة الاولى انبسط بالثورة فعلا، وانا مصدقة دموع طنطاوي لما نزل لان المشهد مهيب فعلا، اذا كان اوباما نفسه اتخض من شكلنا وجاله انبهار، بس هم عليهم اللي عليهم، فامريكا قالت لهم خلصوا لي الشغلانة وانا اطلعكم.. الشغلانة بقى هي تفتيت القوى الثورية على الارض وتفريقها، والاستفراد بكل فصيل سياسي وياخدوه ويروه القطر لوحده، يدخل بشرفه يخرج وهو موطي راسه، نقوله مالك يا ولا.. ما يردش.. ايه اللي اتعمل فيك يا ولا.. ما يردش

- ويتمكن المجلس القائم ده انه يقتنص للجيش صلاحيات زي صلاحيات الجيش التركي، بحيث اي رئيس او برلمان ما يعجبش امريكا يتم الانقلاب عليه وكله بالدستورية وبـ - اللا مؤاغزة - فوق الدستورية وربنا يستر على ولايانا

- بس المهمة دي كده كده حتحرق المجلس عند الناس، فقبل ما الشعب يقولهم جرا ايه يا كتكوت انت وهو انت نسيت نفسك؟ قوم ييجي بقى شباب من الجيش "ثوري" يقول للمجلس.. يالا بقى من هنا، قال يعني ثوري بقى ومتضامن مع الثوار، وبما ان المجلس قرف الناس في عيشتهم فالناس حترحب بالضباط الاشراف الشباب.. يستملوا منهم بقى بالصلاحيات اللي هم اخدوها واللا مؤاغزة فوق دستورية وكدهون ويبقوا ابطال الوطن.. وقلبي الصغنن بيقول لي ان اعداد المجموعة دي شغال بقاله مدة، وبعلم المجلس... ده مجرد احساس

قووووووووووووووم الجيش يستلم برضه، بس بوجوه جديدة شابة مزة لطيفة ظريفة وسلم لي على الاستقلال الوطني والمدنية والديمقراطية

دي مجرد احاسيس

لو اتشتمت قوي قوي قوي قوي قوي قوي قوي قوي قوي عليها.. يبقى مدد يا سيدنا الحسين، كلامي صح - ده بالتجربة كده كل ما اتوقع حاجة صح باتشتم قوي، وانا عادة مش باتوقع حاجات صح كتير يعني

لو ما اتشتمتش يبقى دي هلاوس ومخاوف عندي وبارانويا ناتجة عن القفا السخن اللي اخدته

المهم بقى ان السيناريوم اللي كل دماغي ده لو صحيح يبقى الاخوان حيطحنوا لحد ما يتحولوا لسكر سنترافيش تذروه الرياح، وتبقى هذا ما صنعت ايديهم... بس قبلها حنكون كلنا اخدنا اعدام، بالذات انا بما انهم اخدوا التليفون بتاعي واكيد ما عرفوش ينزلوا من عليه اي علاقات شائنة يبقى حيلبسوني قضية تخابر للسودان ويعدموني، وعلى فكرة بقى.. انتوا مش فرغتوا التليفون؟ رجعوه بقى عشان النمر، وعشان العدة دي ام زينب جايباهالي هدية في عيد ميلادي، انتوا ايه ما عندكوش رحمة؟

بس يعني خطط امريكا - اللي هي اساسا انا اللي متخيلاها وما عنديش اي ادلة عليها غير البرانويا - مش قضاء الله وقدره، ينفع يتم احباطها بالاجماع الوطني واننا نقف كلنا مع بعض، وان العسكر يروحوا ثكناتهم، بكبيرهم وصغيرهم يا عم

اذا كنا مش عارفين نسلك مع عسكر عواجيز وحاربوا في 73، حنعرف نسلك مع عسكر شباب فيهم عافية وما حاربوش اسرائيل كمان؟ لا يا عم يفتح الله

مدنية مدنية.. ومش عايزين حكم مدني يبقى ستار للحكم العسكري زي عصام شرف كده، العساكر يروحوا ثكناتهم ويسيبونا في حالنا، لا شباب ولا كهول ولا شيوخ... ربنا يسعدهم ويرجعهم على الحدود واحنا حنغني لهم: احسن جيوش في الامم جيوشنا

وباقول الاخوان يعني لازم يتضامنوا مع 6 ابريل ويقفوا جنبهم عشان الحجر الداير لابد من لطه والدنيا زي الخيارة يوم في ايدك ويوم في السلاطة
وفي كل الاحوال:
مش لازم نمشي مشير عشان نجيب مشير تاني
ولا نمشي مجلس عسكري عشان نجيب مجلس عسكري تاني
مدنية مدنية..

والله الموفق

اما نشوف مين العميل للخارج

2011-07-23T14:54:00.002+02:00

بقى حركة 6 ابريل عملاء للخارج؟

طيب... متشكرين قوي على المعلومات الاستخباراتية العظيمة دي، بجد يعني نورتونا

طب بينا وبينكم المعونة يا مجلس.. اللي عايز المعونة الامريكية يبقى هو اللي عميل للخارج، وانا امة الله الفقيرة مستعدة اجمع لكم مليون توقيع عشان نلغي المعونة الامريكية، مش بس المعونة الامريكية... اي تمويل خارجي، زي السعودية مثلا بدون ذكر اسماء اللي بتخلي ناس تفتتح احزابها في جراند حياة.. اللي هو حزب سلفي بدون ذكر اسماء

واما نشوف مين اللي حيقول أي... واللي حيحمرأ يبقى هو اللي عميل للخارج

fair enough

بيان اسر الشهداء المعتصمين بميدان التحرير

2011-07-23T08:57:00.001+02:00

نظرا لما نشهده من تعتيم اعلامي وتضليل متعمد تجاه كل ما يتعلق بقضية شهداء ومصابي الثورة - وهي القضية التي فجرت الثورة المصرية – ولأن حتى الآن لم يحاسب القتلة بل تتم ترقيتهم ومكافأتهم وليس هذا فحسب بل وتطلق يديهم للممارسة الضغوط والتهديدات بشتى الطرق والأساليب مرورا بأحداث البالون وثلاثاء الغاز.. لذلك كله نحن معتمصون منذ ٢٤ يونيو وحتى الآن على أمل أن نجد من شرفاء مصر من يحمينا من البلطجية الذين يمارسون بلطجتهم في ثياب العمل الرسمي.

إن محاولة تصدير قضية دم شهداء هذه الثورة المباركة باعتبارها قضية مادية نسعى من خلالها لتحقيق بعض المكاسب أو تشويه ملامحها عبر إلصاق تهمة البلطجة بالشهداء وترويج أن الضباط القتلة كانوا يدافعون عن أنفسهم وعن مقار عملهم، هو تضليل وتزييف للحقائق التي تشهد عليها الكاميرات والوثائق. وعليه فإننا نؤكد نحن أهالي شهداء ٢٥ يناير على أن مطالبنا هي التالية:

١- حبس الضباط المسئولين والقيادات المتهمين بقتل خيرة أبنائنا وأخوتنا وذلك لمنعهم من الاستمرار في التأثير علي الشهود وطمس الأدلة وترويع أهالي الشهداء والشهود

٢- الاسراع في إحالة بقية قضايا قتل المتظاهرين التي لم تحال الي المحاكم الجنائية وتقصير مدة تأجيلات القضايا المنظورة بالفعل وسرعة تفريغ الدوائر

٣- تكوين فريق متفرغ من أكفأ رجال النيابة العامة يختص بالتحري وجمع الأدلة والمعلومات المتعلقة بالقضايا التي أحيلت من قبل

٤- اصدار بيان رسمي من وزارة الداخلية يتضمن اعتذارا رسميا للشعب المصري عامة ولأهالي الشهداء خاصة عن الممارسات التي حدثت تجاه هذا الشعب ويقر بأن شهداء ٢٥ يناير ليسوا بلطجية

٥- تشكيل لجنة دائمة من أهالي الشهداء ومحامييهم ورئاسة الوزراء وأعضاء من فريق النيابة العامة تكون مهمتها تذليل كافة العقبات التي تحول دون سرعة الفصل في هذه القضايا

٦- بث محاكمات المتهمين بقتل الثوار على محطات التليفزيون بثا مباشرا دون تعليق ذلك علي إذن القاضي أو أي جهة أخرى

٧- تكريم شهداء الثورة والمصابين ومساواتهم بشهداء الحرب وإعطائهم وسام الدولة

٨- إقالة وزير الداخلية والنائب العام لعدم قيامهما بواجبهما نحو دماء الشهداء وملاحقة قاتليهم

أخيرا، نؤكد أن مطالبنا ليست مستحيلة وليست مخالفة للقانون فأصل القانون هو إقامة العدل وأداء الحقوق ونحن فقط نطالب بحق دماء أبنائنا

أسر شهداء ومصابي ٢٥ يناير
٢٢-٧-٢٠١١

فليقل خيرا او ليصمت

2011-07-22T11:04:00.000+02:00

اللي مش قادر يعتصم مع اهالي الشهدا ينزل ساعة في اليوم يصور فيديو معاهم ويرفع على اليوتيوب، ياخد صور ولادهم وينشرها، يسمع مطالبهم ويرجع ينشرها، يتطوع ساعة في تأمين الميدان، مش قادر ينزل الساعة، ينشر مطالب الاعتصام واهالي الشهدا على صفحته وبين الناس، مش قادر ينشر، على الاقل يسكت ويرحمنا بدل ما ينشغل انه يشتم في الاعتصام عشان يبرر لنفسه هو ليه ما نزلش

اهم احتياجات الاعتصام:

نشر مطالب اهالي الشهداء، وصور الشهداء، وتصوير فيديو ونشره مع اهالي الشهداء لان فيه بعض العناصر بتحاول تخطف الاعتصام منهم

التطوع لتأمين البوابات ولو ساعة في اليوم

عايز تعمل كده مش حتتعب... مش عايز................ نقطنا بسكاتك، هو حد رفعك بالمسدس وقالك ليه ما نزلتش؟ ولا شكلك وحش قدام نفسك وبتقول العنب حصرم؟

مين ده اللي حيتعمل له جنازة عسكرية؟

2011-07-20T11:39:00.001+02:00

مين ده اللي حيتعمل له جنازة اساسا؟ مين اللي حيموت اساسا.. طب على الله نسمع انه مات.. على الله

هااااا؟ حتبيعوا سامح سيف اليزل احسن وتضرب صاحبك لو هم كتير ولا هااا؟

كده يا مجلس يا عسكري؟ علم مصر يتنكس عشان خاين مصر وقاتل المصريين وشباب مصر هم اللي ينزلوا على ركبهم ويتقالهم: علم اسرائيل مش حينزل لباسك هو اللي حينزل؟

صبااااح التحية العسكرية

واهو ده اللي اتعلمنا على ايديه القهر وقوة غليانه

ااااه.. انا باعترف يا شباب.. انا كلت على قفايا بالقوي، كلت بالكف السخن على قفايا.. مولع نار قفايا دلوقت، ودي مش اول مرة اكل على قفايا، بس اللي جرب واداني على قفايا قبل كده عارف كويس لما باتلفت له باعمل ايه؟ وكتاب الله بيندم انه اتولد اساسا

والله العظيم تلاتة

بورسعيد.. المدينة الباسلة

2011-07-19T09:20:00.001+02:00

بورسعيد بتتعرض على مدى تلات ايام لهجوم كاسح من البلطجية على اعتصامهم هناك، وآخرتها دخلوا عليهم بطلق النار والسيوف، دول داخلية داخلية مافيش كلام، والحاكم العسكري خلع منهم وقالهم ماليش فيه، والاعلام مطنشهم تقولش بورسعيد دي في اسرائيل؟ لا والنبي، ده انا ناسية ان المخلوع بعت طيارة انسانية لاسرائيل، وباينه المخلوع ما خلعش ولا ايه

لمتابعة اخبار بورسعيد رجاء الدخول هنا

طب انا لولا نومتي في التحرير كنت سافرت بورسعيد، مافيش اعلامي يهزها شوية ويسافر؟

الفيديوهات اهي

قال له ما عندناش تعليمات نحمي ثوار

طب على الله

2011-07-18T15:35:00.007+02:00

تحديث:
اتفضلوا.. ادي اخرة النومة في الشارع مخي ساح.. البلوجر عامل نظام جديد جيت انشر التعليقات بدل ما انشرها مسحت التعليقات اللي كنت نشرتها... انا اسفة لاصحاب التعليقات دي غلطة... مسحت ميت تعليق جاتني خيبة
------------
انا مش فاضية اكتب بوستات عشان انا في الميدان بايتة من يوم 8 يوليو، بس بارجع استحمى بس هههههه

بس وجدت انه من الضروري اقول كلمتين كده:

الاوشاعات كترت، وبقالهم من اول الاعتصام عمالين يرجوا اشاعات ان الجيش حيحتل ميدان التحرير بالقوة وحيضربنا ويكسرنا ويموتنا.. يامي يامي يامي... على الله يعملها

اولا: عشان يطلع اللواء الرويني انه بيقول كلام مش صحيح

ثانيا: عشان العشرين مليون اللي روحوا عشان وراهم شغل ينزلوا له تاني... وهو العشرين مليون نزلوا الا لما الامن ضربنا يوم 28؟

حتى لما تحب تتخض من اشاعات ابقى اعقلها شوية والنبي، الناس اللي في الميدان روحها في مناخيرها ومستبيعة على عمرها وسبب نزلتها من بيوتها ونومتها في الشارع هو حرقتها على الشهدا، وبيقولوا: يا نجيب حقهم يا نموت زيهم.. اللي حيدوس لهم على طرف هو الخسران

تميم البرغوثي: الشهداء أولا

2011-07-05T20:11:00.001+02:00

من جريدة الشروق

انا حاخد المقال كده زي ما هو كالعادة يعني

الشهداء أولا

تميم البرغوثي

ما هى رتبة الضابط الذى صاح فى الناس عند السفارة الإسرائيلية «كُلُّه على رُكَبُه»؟ ما هى رتبة الضابط الذى صاح فى ميدان التحرير الأسبوع الماضى يسب شعب مصر كله بأمه، فيهين كل أم فى مصر بشرفها؟ ما هى رتبة الضابط الذى كان يرقص بسيفين فى نفس الميدان طربا على سقوط ألف جريح؟ ما هى رتبة المسئولين عن تعذيب الناس فى الأقبية ووضعهم فى زنازين كالعُلَب لا يستطيعون فيها الوقوف أو النوم؟ ما هى رتبة الذين يعلقون الناس من أرجلهم حتى يتجمع الدم فى رؤوسهم؟ ما هى رتبة القادة الذين أمروهم بهذا كله؟ ما هى رتبة من اشترى أدوات الصعق بالكهرباء وقنابل الغاز والرصاص المطاطى والمتفتت والرش؟ من الذى كتب التقارير ظلما فى العباد وأرشد الناس إليهم؟ ومن الذى أدار جهاز المعلومات ذاك ووجهه لإرعاب شعب كامل؟ من الذى فجر الكنائس ثم اتهم الناس زورا بتفجيرها ثم قتلهم من التعذيب؟ من الذى يأخذ الناس من بيوتهم ويقول لأمهاتهم: «سنرجعهم غدا صباحا» ثم لا يرجعون؟ من الذين قتلوا شهداء هذه الثورة؟ أعنى الذين صوبوا البندقية على عين الفتى الأعزل وهم آمنون على سطح بناية ما، ثم أطلقوا الرصاصة ثم تبسموا راضين من حسن تصويبهم وإتقان عملهم؟ من الذى كان على سطح البناية يرى تزاحم الشباب على الفتى الشهيد بعضهم يحمله وبعضهم ينظر إلى الأعلى ضاربا بيده على صدره ينادى قناصا لا يراه: «إضرب هنا، إضربنى أنا»، فيضربه ذلك القناص ويتبسم مرة أخرى لأن مهارته أثبتها التكرار؟ من الجنود الذين وقف أمامهم رجل فى الإسكندرية فاتحا صدر سترته يريهم أنه أعزل فقتلوه لأنه أعزل؟ هل من المعقول أن هذه كلها حالات فردية؟ أألف شهيد كلهم قتلوا فى حالات فردية؟ هل آلاف المفقودين والفاقدين خربت حياتهم وحياة أهلهم فى حالات فردية؟

●●●

أيها الناس، إن هذه الوزارة، وزارة الداخلية، أتعبت الجميع، ولا يكفى لإصلاحها أن يسن لها قانون أو أن يشرف عليها قاض أو يوضع لها وزير داخلية جيد. إن هؤلاء الضباط كبارهم وصغارهم الذين يشتمون الناس سيتآمرون حتى على رؤسائهم حتى يحافظوا على سلطتهم المطلقة فى القتل والتعذيب والترهيب. إنهم يعتقدون أنهم لن يستطيعوا التعامل مع الناس بدون «هيبة» والهيبة عندهم هى أن يخاف المواطن من الضابط، هم يظنون الشعب المصرى لا يحكم إلا بالخوف، فإن أمرهم وزيرهم بغير ذلك لم يطيعوه. ألم يعلن السيد وزير الداخلية منتصف الأسبوع الماضى أنه أمر قوات الأمن بالانسحاب من ميدان التحرير فى أول الليل، فلم ينسحب أحد منهم إلا عند ظهر اليوم التالى وبعد سقوط ألف جريح؟ فإن كان الوزير صادقا فعليه أن يقيل ثم يحاكم الضباط الذين عصوا أوامره، وإن لم يكن أصدر الأمر أصلا أو أصدر أمرا علنيا وآخر سريا فالمصيبة أعظم.

لا أمان لهؤلاء الناس بأعيانهم، أعنى أن المشكلة ليست فى هيكل المؤسسة فقط بل فى كل من هؤلاء الضباط بأشخاصهم الذين يحتقرون الناس ويعتبرون مطالبتهم بحقوقهم تبجحا يعاقبونهم عليه.

إنهم قوة احتلال، وككل قوة احتلال تحتقر الواقعين تحت الاحتلال ولا تراهم بشرا مساوين لها فى الآدمية. لم تكن هذه الوزارة أبدا مصدرا للأمن، قال مستشار رئيس الوزراء إن مستوى الجريمة فى مصر واحد قبل الثورة وبعدها أى فى وجود الشرطة وغيابها، لم يكن الأمن إلا أمنا سياسيا إذن، يعنى كان احتلالا.

إن الاحتلال الإسرائيلى فى فلسطين حين كان يقتل الأطفال كان يتذرع بالأمن ويسميهم بالمخربين، وكانت هناك فرق من الجيش الإسرائيلى، تسمى فرق المستعربين، تلبس اللباس المدنى لتهاجم المتظاهرين فيظهر الأمر على أنه شجار بين مدنيين لا مظاهرة سياسية ضد الاحتلال. ألا يذكركم هذا بالبلطجية فى شيء؟ يسمون المتظاهرين المطالبين بحقوقهم بلطجية كما كانت إسرائيل تسميهم بالمخربين، ويطلقون عليهم البلطجية الحقيقيين الموظفين عند أجهزة الأمن. ويقتلون الطفل الفلسطينى لهوا ثم لا يحاكمون قاتله فإن حاكموه غرموه قرشا واحدا ثمنا لحياة كاملة أهدرها ثم تراه فى الشارع يطلق النار من جديد ويسب الناس بأمهاتهم. ألا ترون الشبه؟

●●●

أيها الناس، إن الخلاف القائم بين القوى السياسة عن الدستور أولا أو الانتخابات أولا خلاف خطير على الجميع. بداخلية كهذه لو أجريت الانتخابات فإنها ستزوَّر ولو كتب الدستور فإنه سيُنتهك. لا بد من مبادرة يتبناها الجميع لتطهير هذه الوزارة، ولا أراها تطهر إلا ببناء وزارة جديدة من الأساس، فيقال كل من عذب إنسانابريئا كان أومدانا. ولا بد من نيابة مستقلة للشكاوى فى قضايا التعذيب، ولا بد من إلغاء كل أجهزة الأمن السياسى التى ورثت جهاز أمن الدولة المنحل وإقالة كل العاملين فيها أو إحالتهم على التقاعد. ولقد تقدمت جمعيات حقوقية عدة بمشاريع فى هذا الصدد. إن كانوا لا يطيعون وزيرهم فكيف نأمنهم، ليسحب سلاحهم وزيهم الرسمى الذى يظلمون به العباد.

سيستفيد من ذلك كل مصرى، سيستفيد منه الأخوان المسلمون والليبراليون والاشتراكيون والقوميون والمستقلون والباعة المتجولون وسائقو سيارات الأجرة والتجار والفلاحون والعمال والعاطلون، أبعد الثورة يسبون الناس بأمهاتهم ويرقصون بالسيوف على جراحهم ويسمونهم بلطجية وهم البلطجية؟

إننى أدعو أن تكون هذه الجمعة القادمة جمعة لتطهير الداخلية جمعة لضحاياها من شهداء وجرحى، بل إن كل من خاف من لجنة فى آخر الليل هو من ضحايا الداخلية لأنه لا يدفع الضرائب ليخاف بل ليأمن. كما أتمنى أن يشارك فيها كل الأطراف السياسية فى البلاد وعلى رأسهم من كان متشككا فى أهدافها، ليست هذه جمعة الدستور أولا ولا الانتخابات أولا، هذه جمعة الشهداء والجرحى جمعة تطهير الداخلية جمعة لنشعر بالأمان الحقيقى، فالمصرى يخاف من الشرطى أكثر من خوفه من اللص، بل إن أكبر اللصوص هم الذين كانوا فى حماية الأمن.
----------------------

يا رب تعيش الف سنة

ما نفسيش اقول حاجة تاني بقى.. انا حاخليه هو يتكلم بعد كده بدل ما انا عاملة زي اللمبي كده

ده سي ممدوح.. مش ممكن يبقى من اعداء الوطن

2011-07-04T22:52:00.000+02:00

انا الشهادة لله ما باحبش فيلم البريء، بس كنت باخاف اقول، باحب الاغاني بس، لكن مش باحب الفيلم، مباشر كده، وشخصية احمد سبع الليل مبالغ فيها، ومعمول شخصيات ابيض واسود كده، بس افتكرت النهاردة المشهد بتاع: يا باشا ده سي ممدوح، مش ممكن يبقى من اعداء الوطن

وانا داخلة التلفزيون النهاردة، واحد من امن التلفزيون وقفني وقال لي: استاذة نوارة، هم ليه بيقولوا عليكي في الاعلام انك عدوة البلد؟ مع اني يعني مش حاسس انك بتكرهي البلد ولا حاجة... قلت له قالوا فين؟ قال لي: بيقولوا انا باسمع.. قلت له: زي ما كانوا بيقولوا علينا بناخد خمسين يورو

قال لي: طب يا استاذة والنبي عايز اسألك هو ليه مبارك اتساب شهرين على ما هرب فلوسه وبعدين حاطينه في شرم الشيخ ومش بيتحاكم؟ وليه جمال وعلاء بيتسئلوا على الفلوس؟ هو احنا اللي بينا وبين الناس دي فلوس؟ وليه الشرطة راجعة اسخم من الاول وبتضرب في الناس؟ وليه العادلي ما اتحاكمش بسرعة على الشهدا؟ وليه النائب العام ماشي ببطء كده؟ وليه ضربوا اهالي الشهدا؟ وليه ضربوا العيال عند السفارة؟ وليه مش عارفين يجيبوا الفلوس لحد دلوقت؟ وليه الظباط اللي قتلوا الناس مش مقبوض عليهم؟ دلوقت مافيش عيل صغير في البلد مش عارف ان الداخلية هي اللي مسرحة علينا البلطجية.. طب ليه بقى مسرحين علينا البلطجية؟ وليه بقى هم سايبينهم؟ وليه اللواءات اللي في الداخلية اللي بيعملوا كده مش بيتقبض عليهم؟

قلت له: ما انا باسأل نفس الاسئلة دي عشان كده بيقولوا عليا عدوة البلد.. حاسب بقى ليقولوا عليك كنتاكي

حقيقة ما حدث في التحرير يوم 3 يوليو

2011-07-04T00:02:00.000+02:00

انا مش حاتكلم.. انا حاسيب الفيديوهات هي اللي تتكلم وانتوا تحكموا

يوم الجمعة 8 يوليو... للداخلية.. بلطجية

2011-07-03T11:44:00.000+02:00

الداخلية.. بلطجية..

اه وربنا بلطجية، بس بلطجية بينضربوا، هههههه يا عيني، فاشلين حتى في البلطجة، لا وجايين جايبين لنا كنابل تلات انواع، واحدة بتطلع دخان اسود، وواحدة بتطلع دخان ابيض، وواحدة بتطلع دخان من غير لون وكلنا عاملين دماغ بقالنا فترة والناس يا اما عندها صداع مستديم، يا اما دوخة مستديمة، يا اما عينينا بتدمع ومناخيرنا بتحرقنا، يا اما عندنا اكتئاب وحالتنا النفسية مش تمام، يا اما جميع ما سبق

كمان واحنا بايتين في الميدان بيقعدوا يضخوا علينا غاز... والله، زي عمر سليمان لما رش مبيد على الفلسطينيين في النفق، هم برضه بيرشوا فليت علينا في الميدان، ويوم 29 او 30 مش فاكرة كنا قاعدين وفجأة كلنا عينينا دمعت وقعدنا نعطس.. اه، 29، ومالك عدلي مناخيره ساحت وعينيه باظت واقول له يا مالك بيضخوا علينا غاز زي عمر سليمان، يقول لي: بفيش حاجة يا شيخة، باتخافيش، ايه البرادويا دي؟ بلاش بقى دظرية البؤابرة، با يبكد بد اثار ابارح؟

اه.. بد اثار ابارح.. قال ايه؟ واحنا قاعدين كده الغازات بتطلع بواقيها من الارض مع الهوا قوم تخلينا كلنا يغمن علينا بالطريقة دي... مالك عدلي، اعرفكم، كل ده عشان ما يتبناش نظرية المؤامرة، مؤامرة ايه ما كلنا قاعدين في الميدان فجأة نكح

اجرام رسمي نظمي فهمي.. بيتعاملوا مع الشعب على انه حشرات

الشاهد

يوم الجمعة لازم يبقى للداخلية... السجين ده بتاعي، مش كل واحد نفسه في حاجة يحطها في المطالب كأن فتحوا له باب الكعبة وبيلحق يفتكر كل اللي عايزه من ربنا

بصوا، من الاخر كده الشعب ده مايص ومش بيحب الهبد والرقع، بيحب يفك حتة حتة وهو باله طويل، خلاص نمشي على الموجة بتاعته عشان ما نزهقوش

الموجة التانية من الثورة بتاعة اصحاب الثورة الحقيقيين... الغلابة

هي الفكرة كده من اولها، اهالي الشهدا الغلابة معتصمين عشان ما اخدوش لا حق ولا باطل وكمان ولا حتى بيطلعوهم في التلفزيون ولا بينزلوا صور عيالهم عشان شكلهم مش الا فرانكا وفيه وعي شديد عندهم بالموضوع ده وحازز في نفسيتهم

ما تشغلوش بالكم خالص بالناس اللي بتقول بلطجية، الموجة دي مش بتاعتهم، انا قابلت واحدة في الميدان شيك كده وبتبص حواليها وتقول مش ده الميدان بتاعنا ولا هم دول الناس بتوعنا

ايه ياخويا الناس بتوعهم؟ وهم الناس بتوعهم كانوا حيعرفوا يعلموا على الداخلية كده؟ الناس بتوعها اول ما الداخلية بتضرب بيطلعوا يجروا، من يوم 28 يناير بالمناسبة

وماله الشعب مش عاجبها في ايه؟ ما هو ده الشعب، بيلبس كده وشكله كده

على رأي محمود سعد: يا ريت تبلغونا بماركة بنطلون وتي شيرت شباب الثوار عشان نعرف نميزهم عن البلطجية

ما انا بابات في الميدان والشباب زي الفل، عيال ولاد بلد وغلابة بس، لكن بينظموا المرور، وبيكنسوا الميدان، وكمان ابتدوا يبيضوا يا عيني، ههههههههههههههههههههههههههههههه، كل ما التلفزيون يشتم المتظاهرين يشتغلوا لهم نقاشين عشان يثبتوا انهم ناس كويسة

وعندهم اخلاق، وبيحترموا الستات.. ولما كنا في المسيرة اللي لحد مجلس الوزرا وحبوا يدخلوا على مجلس الشعب لما حشرت نفسي في الاول وقلت لهم ارجعوا اول ما شافوا واحدة ست راحوا راجعين على طول.. طبعا يسري الشرقاوي لو شاف المنظر ده حيقول عليا الزعيمة، وتوفيق عكاشة حيقول ان انا الماسون الاكبر ودول المواسين الصغنين اللي تبعي، بس هي الحكاية مش اكتر من انهم شافوا ست بتقولهم ارجعوا فاتكسفوا وخافوا عليا لما لقوني رامية نفسي على بوابة مجلس الشعب

معلش.. اصلهم بلتجية، واحنا بقى عايزين نعمل نكابة للبلتجية

مطالب الناس دي هي اللي لها الاولوية، وهم لهم تار مع الداخلية.. وانا شخصيا بيني وبين الداخلية مناخيري، انا بقيت مدمنة غاز بكل الانواع دلوقت حاليا، يبقى خلوا العنوان واضح وبين ومفهوم، يعني ايه الثورة اولا؟ هم مالهم هم بالكلام ده؟ الكلام ده تقولوه على التلفزيونات وحزب الكنبة يتفرج عليكم ويمصمص شفايفه، الناس اللي شربت الغاز وقاعدة معتصمة دلوقت مالهاش الا حاجتين:

دم عيالهم، وحقهم من الداخلية

بس كده... يبقى اللي انضرب واتصاب وقدم شهدا هو الاولى يفرض مطالبه:

تطهير الداخلية واعادة هيكلتها:

1- كل اللواءات اللي اشتغلوا ايام العادلي يتم اقالتهم

2- سحب القنابل من الشرطة.. شرطة ايه دي اللي معاها قنابل.. شوية شوية حيبقى لها طيران بقى

3- عساكر الامن المركزي يرجعوا الجيش والامن المركزي يتقسم وحدات مكافحة شغب ويبقى سلاحه شوية عصيان وطلق صوت بالكتير قوي، والعصيان ما تبقاش كهربا كمان، الله، ما الشرطة العسكرية اللي شغلتها تقمع اي تمرد داخل الجيش مش معاها قنابل، وتبقى شغلانة وحدات الامن المركزي دي انها تحمي المظاهرات ويلبسوا اي لون تاني غير اللون الاسود المكئب ده، يلبسوا اصفر زي بتوع انجلترا ويقفوا كده يتشتموا وما يردوش زي ما الانجليز بيقعدوا يشتموا في قوات مكافحة الشغب والتانيين يبقوا واقفين ساكتين كده يا عيني

4- الامن الوطني يتحل.. كل اللي اشتغلوا في امن الدولة ما يشتغلوش تاني في الشرطة اصلا، هم دول نافعين ببصلة؟ ناس تفجر لنا كنيسة وتقتل لنا 24 شهيد، وكمان يستعبطوا ويقبضوا على السلفيين ويعذبوهم وواحد فيهم يستشهد في ايدهم وينفع الناس دي تشتغل؟ ده جهاز عدو للوطن، وماحدش يقول لبعدين يعملوا عصابات، هم عصابة بالفعل، وحيعملوا ايه اوحش من تفجير كنيسة مش فاهمة؟ ايه في الدنيا اوحش من كده؟ ده موضوع القديسين هو اللي خربها وجاب اخر الناس (ونرجع نطرح السؤال السرمدي: تفجير القديسين ما بيتحققش فيه ليييييييه؟ مين اللي متورط فيه وخايفين اسمه يجي؟)، ما هم دلوقت عصابة بقوة القانون وبالمناصب والعلاقات والسلاح، لما يفقدوا كل ده حيبقوا زيهم زي اي عصابة تانية خايبة، يتقبض عليهم، ايه محسن السكري يعني؟ حتة واد صايع اخره يقتل فنانات ويتقفش عشان سايب ادلة دامغة عليه الغبي، ده كان ناقص يسيب لهم الكارت بتاعه جنب الجثة، قول يا رب كلهم يبقوا محسن السكري، وبعدين امبارح مينا بيقول لي اصلهم عارفين معلومات كتير ففي ناس بتقول انهم حيشتغلوا جواسيس

الله.. ماهم بيشتغلوا جواسيس فعلا، وجواسيس بمرتب بياخدوه مننا، يا جدعان مش في مدينة نصر العيال طلعوا ورق انهم بيتعاونوا مع السي اي ايه والموساد وبيراقبوا تليفونات كل المسئولين بما فيهم المشير نفسه؟ راح فين الورق ده؟ كلته القطة؟ وبرضه شغلهم كجواسيس وهم في مناصبهم حيسهل عليهم الشغلانة اكتر.. لما يفقدوا كل آلياتهم من علاقات وحصانة ومعلومات متجددة حيبقى موقفهم اضعف ويروحوا يشتغلوا جواسيس.. هي جات عليهم يعني؟ ربنا بيسترها، اكتر من جاسوس حكمنا تلاتين سنة واهو قاعد في شرم ياكل حيسمون على حسابنا والحرس الجمهوري بيحرسه وناقص ياخدوا له الشعب يسيق له الفيلا ويغير له مية البيسين؟

ام الفزع المصري الشهير ده، والله العظيم يا مصريين ما فيكم عيب غير موضوع الفزع والهلع ده، عاملين زي الام المجنونة اللي خايفة تحمي ابنها لياخد برد لحد ما عفن وجاله جرب، طب الجرب ولا البرد؟ بس لو تبطلوها تبقوا كاملين من كله... البني ادم بيبقى اخطر وهو في منصبه ومعاه سلاحه وقانون بيحميه وحصانة شغله والناس بيقولوا له يا باشا... وهم مش جوزنا عشان نقول: خليهم تحت عينا احسن ما يسافروا وما نعرفش بيعملوا ايه ولا قاعدين مع مين.. هم مش حيبقوا تحت عينا، هم حيفضلوا كده متحكمين فينا، لا.. ينزلوا بقى من فوقينا ويبقى زينا زيهم وفارس لفارس، عايزين يشتغلوا مجرمين عايزين يشتغلوا جواسيس عايزين يشتغلوا حلاقين براحتهم، المهم ما يبقاش في ايدهم مصارين البلد واسرارها وسلاح وحصانة وكمان احنا اللي نقبضهم فلوسهم اللي بيخربوا لنا البلد بيها

مش عايزاهم انا الامن الوطني دول.. وماحدش يقول لي عشان الارهاب

احنا ما عندناش ارهاب، احنا عندنا جهاز بندفع له مرتب عشان يعمل لنا تفجيرات في البلد ويفجر لنا شرم وطابا والحسين وكنيسة عشان يجدد قانون الطوارئ، واكتشفنا ان احنا ناس زي الفل وشمعتنا قايدة، وبعدين ما عندنا مخابرات والامن القومي دي شغلته اساسا

مخابرات.. هههههههههههههههههههههه.. يا عيني.. بيقفشوا سياح يقولوا عليهم جواسيس وكمبيوترات يقولوا عليها اجهزة تنصت، معلش معلش، نستحملهم، ونعمل لهم لجان شعبية تساعدهم، برضه في وشنا، وانتوا ما يرضكوش ادهم صبري حاله يميل كده

المهم اهم موجودين المخابرات يا عيني.. نساعدهم انهم ينموا قدراتهم وبلاش الامن الوطني ده خالص

5- القناصة

يا ميت ندامة.. احنا فين هنا؟ فيه بلد محترمة يبقى عندها سلاح قناصة شغلته ينشن على الشعب؟ وكمان احنا اللي بندفع لهم مرتباتهم؟ فيه ايه يا جدعان؟ انتوا ماسكين علينا صور ولا ايه؟ ندفع لكم فلوس عشان ترموا علينا قنابل وندفع لكم فلوس عشان تتجسسوا علينا وتعذبونا وندفع لكم فلوس عشان تنشونا من فوق الاسطح وندفع لكم فلوس عشان تتعاونوا مع السي اي ايه والموساد.. طب نحضر لكم الحمام الاول ولا تتعشوا الاول؟

6- يغيروا لبسهم... ده بقى مطلب شعبي.. واهالي الشهدا انا اتكلمت معاهم وهم مش طايقين يشوفوهم بلبسهم ده، مش قادرين، كل ما بيشوفوا البدلة دي بيتجننوا وتجيلهم هيستيريا

واهالي الشهدا هم اصحاب البلد دي

نعيد ونكرر: اللي بيدفع ضرايب بيطالب بحقه في البلد... اللي بيدفع ابنه ولا اخوه ولا ابوه ولا جوزها دول اصحاب البلد اصلا واحنا ضيوف عليهم، واللي دافع عينه ولا رجله ولا اي اصابة سببت له عاهة مستديمة ده صاحب البلد دي واحنا ضيوف عليه، صحاب البيت اللي دافعين فيها دم هم اللي يحددوا شكل الستاير والانتريه واودة النوم ولون الحيطة وعايزين الشبابيك شيش ولا الوميتال.. البلد دي بلدهم هم، واي فتافيت تتبقى منهم يوزعوها زي ما يحبوا واحنا نبوس ايدنا وش وضهر ونشكرهم على كرمهم

ولو عايزين تسموا الجمعة اي اسم يبقى الشهداء اولا

واي حد يفتح بقه معاك ويقول لك عجلة الانتاج وخربتوا البلد قول له ربنا يدوقك اللي اهالي الشهدا فيه يا بطني يا جعان.. انت بتسأل على مرتبك وفلوسك واكلك ودول بيسألوا على دم.. تحب ربنا يحرق قلبك زيهم عشان تبطل اكل وتحس بغيرك؟

ايه حكاية الاكل دي؟ ما ياكلوا بكرة.. هم حيموتوا من الجوع يعني؟ ماحدش بيجوع في مصر.. وبعدين ما يجوعوا، احنا 66% عندنا بيعانوا من البدانة.. خسوا شوية، فيه دم سال..

فيه دم سال

العزا منصوب وانت بتسأل على العشا؟

وانا مش فاهمة ياخويا اللي يضرب تحية عسكرية للشهدا، واللي بيعلقوا صورهم، واللي متعاطفين مع اهالي الشهدا، وفي نفس الوقت بيدافعوا عن الداخلية.. يا جدعان انتوا تعرفوا حد قتل الناس غير الداخلية؟ يعني ينفع تتعاطف مع اطفال غزة وتدافع عن اسرائيل؟ ما هو يا اطفال غزة يا اسرائيل... يا شهداء مصر يا الداخلية

7- ودي اهم نقطة: كل من اصدر امر بضرب المتظاهرين، وكل من اطلق النار على المتظاهرين يتم التحفظ عليه فورا، لانهم بيروحوا يهددوا اهالي الشهدا، وبيقولوا لهم حندفع على الراس ميت الف جنيه، يا اما ابنك التاني ده مش حتعرف له طريق جرة

لازم تعرفوا ان الداخلية بشكلها الحالي اللي هو نفسه شكل الداخلية ايام مبارك مالهاش عدو غير اهالي الشهدا لان دول وجودهم في الحياة بيدين الداخلية كلها

يعني ما عادش فيها كسوف ياما اعملي معروف، الموضوع مافيهوش توفيق راسين في الحلال

يا انت مع الشهدا يا انت مع الداخلية... ما ينفعش شغل حسني مبارك ده اللي كان بيقول انا محايد وهو قاعد يخدم في اسرائيل.. طبيعي، الحياد في صراع بين ظالم ومظلوم لازم يخليك في صف الظالم، امال هي تبقى ازاي؟

8- امبارح زياد العليمي اقترح ان يبقى فيه جهة قضائية مختصة بشكاوى المواطنين ضد الشرطة

هييييييييييييه

لما نخلص الشرطة بقى نبقى نشوف النيابة.. حاكم ساعات وكلاء النيابة يبقى لهم صحاب ظباط شرطة وبيجاملوا بعض، ده غير ان مبارك عمل سياسة معينة كده انه بقى يحول ظباط الشرطة على النيابة بحيث يملا النيابة بظباط الشرطة السابقين، فيبقى اللي بيقفشك ظابط شرطة واللي بيحقق معاك ظابط الشرطة.. والحمد لله ان مالوش سلطان على الاخرة كان عمل الملكين اللي بيسألوك في القبر ظباط شرطة

وهذا نداء لكل مواطن: يا انت مع الشهدا يا انت مع الداخلية

وللمجلس العسكري: يا انت مع الشعب يا انت مع الداخلية

ولعصام شرف: روح يا حاج... انت تعبت.. نردها لك في الافراح

على فكرة.. تونس عينت ناشط حقوقي وزيرا للداخلية

يخربببب بييييييت الاجوان اللي عمالة تجيبها فينا... لا بقى.. يا حكم يا مرتشي، احنا نبات في الشارع وهم اللي ينجزوا؟

يا غربة الغلبان فيكي يا مصر

2011-07-02T19:32:00.001+02:00

فيه طفل من اطفال الشوارع كان في المعركة ضد الداخلية يوم 28 واخد قنبلة في وشه واستشهد.. شهود العيان بيقولوا كان في الصفوف الامامية وكان بيقاتل ببسالة

ماحدش عارف اسمه، ماحدش عارف له اهل... وطبعا ما حدش عرف يكرمه التكريم اللي يستحقه.. قال وانا قليلة الادب قليلة الرباية عديمة الاحساس الحلوفة قاعدة باكتئب قال.. ده انا رمة

الولد ده حقه يرجع قبل اللي لهم اهل... حاسبوا من زعل ربنا على الغلابة

ومن قتل مظلوما فقد جعلنا لوليه سلطانا فلا يسرف في القتل إنه كان منصورا

والغلبان ده وليه ربنا... تخيل لما السلطان يبقى لصاحب السلطان، وتخيل لما النصر يبقى لواهب النصر ويقتص للعيل ده

وبيقولوا فيه واحد كمان مات، عيل برضه

اوعوا من زعل ربنا على الغلبان.. اوعوا من زعل ربنا على الغلبان

هو انا ما اعرفش اكتئب شوية؟

2011-07-02T16:23:00.000+02:00

نوارة ايه اللي اتقبض عليها؟ مافيش حاجة انا مكتئبة ولاسباب شخصية بحتة وعايزة اغطس شوية

بعد اذنكم يعني.. ومالهاش اي علاقة بالثورة عشان ما حدش يقعد يشيلني ذنب اني باكئب الناس

مافيش حاجة، ما حصليش حاجة.. وعشان تبقوا فاهمين اللي عايز يعمل ما بيهددش... الخبر ده هدفه بس انه يهتكوا كده قال يعني لما تسمعوا ان واحدة بنت وبنت شاعر مشهور وكمان كان الناس بتقول عليها عميلة الجيش حيقبضوا عليها يبقى تخافوا وكده عشان دول ناس جبارة ومالهمش عزيز... معلش.. سامحوهم.. ما يعلموش انكم تخوفوا عفاريت الدنيا كلها

هو اللي ما يتهتش من موت صاحبه جنبه في الشارع حيتهت لما نوارة يتقبض عليها؟ ما تولع نوارة بجاز وسخ هي كانت من بقية اهله؟

بقى دي اشكال بتخاف ولا بتتهت والنبي؟ ده انتوا عيال سو وربنا مش حيوقع في ايدكم غير اللي هو غضبان عليه، بس ما تقلقوش.. وانا قايلة اني حاختفي شوية عشان مكئوبة.. مش عايزة انا بقى شغل جورج اسحاق ده يختفي ويسمع ان الناس بتقول مقبوض عليه ويسكت.. اديني باقول اهو.. انا تعبانة وعايزة ابقى لوحدي شوية.. وزي القردة مافياش حاجة

اجبرتوني افتح التليفون وانا مش عايزة.. هو كنتوا اشتريتوني؟ انا حاقفل التليفون اهو

لجنة الوساخ الوطني

2011-07-01T05:50:00.001+02:00

يامي يامي يامي... لجنة الوساخ الوطني اوصت بالقبض على المحرضين وخصت بالذكر نوارة نجم... اللي هي أنا

طب ربنا ينفخ في صورة غبائهم ويعملوها.. ويا ريت يعملوها معايا انا بالذات، عشان اشوف غلاوتي بقى عند اللي انا باحرضهم ولا بس فالحين تبربشوا لي وتقولوا لي يا آنسة في الميدان؟

ايه بقى القبض على محرضي الانترنت دي؟ ايه الجملة اساسا؟ انتوا اتجننتوا؟ ده ولا يوم من ايامك يا مخلوع... محاكمات عسكرية ومتاحف وعذرية واخرتها القبض على "المحرضين"؟ ايه ايه ايه؟ احنا فين هنا؟ ده المخلوع عمره ما عملها

وقابضين على عيل ناشط عنده القلب اللي هو لؤي نجاتي ومسمينه بلطجي؟

طب احنا بقى بلطجية ومحرضين واجندات وماسون وشعب ابن تيت واللي عاجبه ع الكحل يتكحل اللي مش عاجبه يترحل، وحنقدم بلاغ في لجنة الوساخ الوطني دي عشان بتحرض على النشطاء، ايه مالكم؟ مش عارفين تحكموا البلد ليه؟ نشطاء ايه اللي بلطجية ومحرضين وماسون ووقيعة بين الشرطة والشعب على اساس ان الشرطة والشعب كانوا سمن على عسل قبل كده

وايه الجمل دي:

واوضت اللجنة بضرورة الفحص الأمنى لمثيرى الشغب، والتعاون الكامل بين هيئات الدولة وجهاز الشرطة والمجتمع المدنى المنظم بضرورة التنبؤ بالأحداث التى تهدد الاستقرار، والمتزامنة مع القرارات والأحكام القضائية التى تقضى على الفساد، وفى القضاء على فلول منظومة الفساد والنظام البائد
!!!!!!!!!!!!!!!!!!!!!!!!!!!!!
حضارتكم النظام البائد... ولا مش واخدين بالكم؟
والفحص الامني ده بيتعمل ازاي راخر.. زي فحص العذرية كده؟ وجهاز الشرطة ده بتتعاونوا معاه ازاي يعني اكتر من ان كل قيادات العادلي بتشتغل في اماكنها وكل قتلة الثوار بيشتغلوا في اماكنهم ومافيش حد اتحاسب غير نجم الشاشة الاوحد امين الشرطة السني اللي بقى بطل تليفونات الفضائيات وخليتوه هو اللي قتل المتظاهرين لوحده، وهو عذب الناس لوحده، وهو اللي اكل الجبنة..
بالنوسبة لضرورة التنبؤ بالاحداث.. ايوووةةةة.. انا عايزاكم تتنبأوا بالاحداث كده، زي ما تنبأتوا بيها لما سيبتوا علينا كلاب الداخلية تضرب فينا بغازات لسه كلنا بنعاني من حرقان في الانف والعين ودوخة بسببها لحد دلوقت
والمحامي احمد ابو خليل قال لي انه قال للظابط انتوا ليه بتصعدوا انتوا تقدروا تلموا الموضوع قام الظابط قال له: لازم يحصل ضرب جامد.. دي اوامر
ثم اسمع بقى يا معلم:
وأشارت إلى أهمية كشف وتجريم التمويلات مجهولة المصدر ومن الجهات الأجنبية تحت زعم الديمقراطية،
اييييييييييووووووةةةة
انا معاكم.. كده صح.. واول تجريم يبقى للمعونة الامريكية.. ماهو عدم اللا مؤاغزة، ما تجيش تجرم لي مركز بياخد تمويل من مؤسسة تحت السلم في تنزانيا والمعونة الامريكية واكلة البلد.. مش عايزينها احنا بقى المعونة
وايوة بعد اذنك حضرتك احنا حنحل الداخلية.. الداخلية الموجودة دي مش نافعة
دي تتحل ويتبني مكانها جهاز امني يخدم المواطن مش يقبض على "المحرضين" اللي هم المواطنين، بحيث المواطن لما يشوف ظابط شرطة يبقى زي الافلام كده الامريكاني يجري عليه لما يخاف، مش يجري منه من كتر الخوف
ويالا بقى.. حطوا ايدكم في الكوبس خلي الثورة تعرف تحشد اكتر من الاول عشان ننضف ونخلص
انا بس عندي مشكلة.. تليفوني مش عايز يسكت.. يا عيال ما تخافوش يا عيال، احضر الشنطة، وتجيبوا لي زيارات كنتاكي، احنا ناس اجندات ومش مقامنا ناكل عيش وحلاوة
وانا مش احسن من اللي اتعرضوا على النيابة على العسكرية ودخلوا السجن الحربي وسموهم بلطجية وهم تفتهم اطهر حاجة في البلد دي
---------

اه نسيت.. بمناسبة التحريض

احنا النهاردة عندنا جمعة الشهيد

وعندنا مسيرة الساعة اربعة عصرا من مسجد عمر مكرم لمجلس الوزرا

وانا باحرضكم جميعا انكم تنزلوا الجمعة دي، وتمشوا في المسيرة دي، وباسخنكم اخر حاجة وباقولكم ان الشنب اللي حيقعد في بيته وفيه دم ناس سال وما اتاخدش حقه يبقى يمسح كلمة ذكر من البطاقة وما يحطش انثى عشان ما يجيبلناش احنا الكلام، ممكن يحط كانجرو