Wednesday 22 January 2014

قوتنا في ركوبتنا

عارفين العميان في مسرحية وجهة  نظر لما طول المسرحية بياكلوا بالجزم واول ما جات ميسز بوكس لبسوهم هدوم انتيكة وحموهم وقعدوا يشرحوا قد ايه هم بيحبوهم وبيعطفوا عليهم؟ اهم ثوار 25 يناير زي العميان دول... على فكرة هم زيهم في كل حاجة، حتى في تصرفاتهم وهبلهم وطيبتهم، حتى في قلة عقلهم لما يصدقوا على بعض ادعاءات كدب، حتى في غباوتهم لما يتهموا بعض وكل واحد فيهم اعمى ويقول شوفت بعيني.... ده حتى رياض الخولي عامل زي مطربي الثورة
ثوار 25 يناير عاملين زي اليتيم في ملجأ اللي بياكل بالجزم من كل الناس، واللي اصلا دخله الملجأ، مرات ابوه اللي طمعت في فلوس ابوه بعد ما مات، ودخلته الملجأ عشان تصرف ورثه على الرجالة اللي بتتجوزهم ولما اتزنقت بعد ما الرجالة قشطوها راجعة تدور على ابن جوزها الاولاني وعايزة تجيبه من الملجأ عشان تشغله وتكسب من وراه، والعيل ده بينضرب من اللي في ادارة الملجأ، واول ما تيجي الكاميرات يلبسوه ويحموه ويبوسوه وهم بيتصوروا جنبه
امبارح مرات ابونا... قصدي الاخوان، طلعت بيان سموه بيان اعتذار باين، وانا مش عارفة الاعتذار فين غير ان جماعة الاخوان بتقول زي يسرا: عيبي اني قلبي كبير ومتسامحة... اكتر غلطة ندمت في حياتي اني عملتها اني وثقت في ناس ما يستاهلوش
والبجاحة ان الاخوان بيقولوا: الكل اخطأ!  وفي ثوار شايفين ان الاهانة دي مقبولة، مقبول انهم يتساووا بالاخوان، طب وما يتساووش بالداخلية كمان بالمرة ليه؟ الكل اخطأ في ايه؟ والثوار اخطأوا في ايه غير ان غلطتهم الاساسية اللي بيدفعوا تمنها لحد دلوقت انهم وثقوا في الاخوان، ومن ساعتها والمصايب نازلة ترف عليهم، والاخوان بيسموا جرايمهم دي اخطاء؟
والله بيان امير الاحزان بتاع الاخوان ده في الاول كان حيغيظني، وبعدين قعدت اضحك، دول كان ناقص يكتبوا في اخر البيان: مافيش صاحب يتصاحب، وبيبرروا كل الوساخة والقذارة والجرايم والخيانة اللي عملوها من ساعة ما ربنا بلانا بيهم في الثورة لحد هاذوها اللحظة التي تتم فيها كتابة هذه السطور بأحرف من ذهب على صفحات التاريخ القرمزية بلون الكاتشب، بإنهم "أساءوا التقدير" وإنهم "أحسنوا الظن"، وناس علقت على الهراء ده بإننا ما ينفعش نخش في نوايا الناس، مدام قالوا اساءوا التقدير ما يينفعش نكدبهم! هههههههه  خلاثي لاثي لاثي يا ناس... نخ ضهرك بقى عشان مرات ابوك تركب
مرات ابونا بقى عايزة اللي بيحب يستحمر نفسه ينزل معاها يوم 25
في ذات نفس الوقت الذي اصدرت فيه مرات ابونا بيان آه يا دنيا، أصدر أبد الفتاهـ أوميجا تصريحا بإنه لن يسمح بتشويه ثورة يناير... صباح الخييييييييير
صباح الخير صباحنا... وخروفين دبحنا... صباح الخير أنا أقول... يا رب زيد العمر طول
ملحوسة: ده سجع امي كانت بتقولهولي وهي بتصحيني اروح المدرسة، احسن حد يفتكر ان خروفين دبحنا ده المقصود بيهم الاخوان في فض الاعتصامات ولا حاجة، حاكم البهايم كتير
انا كنت باقول لأبد الفتاهـ صباح الخير... صباح الخير يا وش الخير... حبيب هارتي، أنت سابوك يروح عليك نومة من 3 يوليو ولسه صاحي امبارح؟
لن تسمح بايه؟ إيه تاني يا خد الجميل؟ لن تسمح بتشويه ثورة يناير؟ كنّ كل اللي كان بيحصل الشهور اللي فاتت واللي وصل ان ام تبلغ عن ابنها ده كان حاصل غصب عنك؟
ماهو لو كان عكاشة وبس كنا قلنا امن الدولة مش عارف ينضف، لو كان احمد جاموسة بس كنا قلنا رجال الاعمال عايزين ياكلوا عيش، لو كان عبد الرحيم علي معاهم وخلصت كنا قلنا ممكن تتلم، الا حضرتك مافيش قناة،ما عدا روتانا سينما وموجة كوميدي، من شق صباح الخلاق لحد ظلمة الليل البهيم الا ونازلة شتيمة في ثورة يناير، وثوار يناير العملا، الجواسيس، القبيضة، بتوع امريكا، وانا لما فتحت زوري لما حد حب يدوس لي على طرف رجعوا قالوا لا نوارة مش من الثوار القبيضة، نوارة من الثوار العبط، على اساس ان ثورة يناير دي ماحدش شارك فيها الا يا عميل يا عبيط، وخلاص الناس كلها اقتنعت، واستقر الامر على كده، وكل اصدقائي من "النوشتاء" اللي الكل عمال يتريق عليهم، امهاتهم خلاص اقتنعوا انهم طابور خامس وابتدوا يتعاملوا معاهم على انهم بيدعوا الفقر، والولية راحت عملت محضر في ابنها، والواد لبس قضية الانتماء لتنظيم ارهابي، والولية دلوقت حاليا عندها احساس انها رأفت الهجاص وضحت بابنها عشان ماسر، وتعيشي يا بلدي يا بلدي تعيشي وزاد الفجر ان ناس من اللي شاركوا في ثورة يناير ينزلوا فيها شتيمة وتشكيك، وناس محسوبة على الثورة بقت تستخدم ضدنا وحجة علينا، ومن كتر ما بذل جهد خرافي لتشويه ثورة يناير الثوار نفسهم شكوا في بعض، وبقوا يفسروا خلافاتهم انهم قبيضة، يعني اللي قرر ينحاز للدولة ابتدا يقول على غيره عميل وقبيض، واللي قرر ينحاز للاخوان ابتدا يقول على غيره جبان وامنجي... ناس واكلين مع بعض عيش وملح وواجهوا الموت مع بعض، يعرفوا بعض اكتر ما امهاتهم تعرفهم لانهم شافوا بعض في مواقف حصرية امهاتهم ما شافتهمش فيها... خسروا بعض ويا ريتها وقفت على الخسارة، خسروا بعض بوساخة، وسخوا مع بعض قوي، قوي قوي قوي، وسبب الوساخة ان الاعلام، اللي حضرتك ما سمحتلوش ومش حتسمح له، واللي منه ناس المفروض كنا بنثق فيها ومحسوبة علينا، اقنعتهم انهم مكريين على بعض... وانا شخصيا، وفريق اخر من الثوار، سبب اننا قررنا اعتزال الفرق المتصارعة - وليس اعتزال الحياة السياسية احسن الناس فهمت كلامي غلط المرة اللي فاتت - هو الوساخة اللي عملها الناس في بعض، وبعدين يزعلوا لما قلت الثورة فيشلت.. فيشلت امال ايه؟ هي الثورة دي مش فكرة؟ طيب اذا كان حملة الفكرة تخلوا عنها وبقى كل واحد فيهم بيتهم زميله اما بانه جاسوس وقبيض او انه امنجي وجبان... تبقى فيشلت ولا ما فيشلتش، ومين السبب في التخبيط الفظيع ده اللي خلا كل الناس تخسر بعض وتوسخ مع بعض؟ مش تشويه ثورة يناير اللي ابد الفتاهـ اوميجا مش حيسمح بيه؟
وانت حضرتك مش حتسمح بيه امتى؟ ده الفرخة مدبوحة، ولو سياستك حبيت تصلح، حتصلح كل ده ازاي؟ حتصلح ان مبارك بريء وما عملش حاجة والشرطة ما ضربتش حد ازاي؟ حتصلح المكالمات اللي اذاعها عبرحيم علي واللي هي عبارة عن: ابقى هاتلي ربع حلاوة ونص كالاماتا... بس عنوانها: فضيحة الناشط فلان... والناس لان الاعلام عمال يأهلها طول الفترة اللي فاتت ان النشطاء دول ناس انجاس، فبقت تسمع هاتلي ربع حلاوة ونص كالاماتا على اساس انه فضيحة وتمصمص شفايفها وتقول شوفتوا النشطاء طلعوا ايه؟ 
طلعوا ايه يا حيلتها؟ طلعوا ايه يا عميان مسرحية وجهة نظر؟ عاملين زي الشيخ عبد الباري: عرفة لابس احمررررر والعياذ بالله
واحد بيقول للتاني: يا كبير طلعت بتاع نسوان يا كبير وبيضحكوا... دي فضيحة في ايه؟
واحدة بتشتم في امن دولة، بقت فضيحتها هي؟ ولا فضيحة مقدم البرنامج اللي قال: امن الدولة اكبر جهاز وطني في مصر، اسماء محفوظ بتتآمر على أمن الدولة المصري، مش الاسرائيلي
والنبي حد يقول للافندي ان اسرائيل مافيهاش امن دولة.. وان جهاز امن الدولة وما شابهه موجود بس في الدول المتخلفة اللي ما بتعملش سعر لمواطنيها ولا لحياتهم ولا امنهم
وبعد ده كله، وبعد ما الناس وقعت في بعض وقعة ما تسمحش ابدا، ابدا، ابدا، انهم يرجعوا يبصوا في وش بعض تاني
"لن نسمح بتشويه ثورة يناير"؟ 
حضرتك ثورة يناير على وش ولادة
ادارة الملجأ اللي بتعلقنا من رجلينا لن تسمح بتشويه صورتنا وعايزانا ننزل معاها يوم 25
يا دين النبي يا محمد
كل ده عشان يوم 25 يناير قرب؟
بقى الاخوان والسيسي اللي ما كانوش طايقين وش الثوار اتحوجوا لقفاهم دلوقت عشان كل واحد فيهم عايز الثوار الخونة العملا الجواسيس اللي بياخدوا 200 جني وترامادول ينزل معاه هو ما ينزلش مع ضرته؟
سبحان من له الدوام... طب وليه كده؟ ده الثوار دول المفروض يعرفوا حجمهم ويعرفوا انهم مالهمش وجود في الشارع وينزلوا من على التويتر وكده يعني
بالنسبة للاخوة الثوار
اوعى تفتكر اني باحاول امنعك انك تتركب... ابسلوتلي.. انا قررت ما احاولش امنع اي حاجة تحصل لاني مش حاقدر امنع حاجة.. وخصوصا بعد الوساخة اللي وسخها كتير مننا مع بعض.. وسلمت ودنك ودماغك يا للاخوان يا للفلول.. حضرتك عايز تتركب من الاخوان، عايز تتركب من السيسي، براحتك، ما انت حمار اصلا، وهو لازمة الحمار ايه غير انه يتركب؟ 
انا اللي عايزة اقولهولك ولكل انسان مصري مكافح حاجة واحدة: 
معقم البيبرونات... اوعى تشتريه، ده عبارة عن تنظيف بالبخار، هات حلة فيها مية وحط عليها مصفى وحط البيبرونات في المصفى وغطيهم... ولا انك تدفع الفلوس دي كلها، وماحدش يقول لجوزي الكلام ده، عشان انا اللي دبسته في الفلوس دي كلها، وهو حاسس انه جاب حاجة مهمة، بلاش تحسروه على اللي دفعه

Wednesday 15 January 2014

صوت صمت نزف نصف طائر

ملحوظة:
البوست ده طويل بشكل غبي ومتعمد بهدف ان ماحدش يقراه غير اللي مهتم فعلا وعنده طاقة يقرا بوست طويل، لان من عادة اللجان الالكترونية - سواء اخوان او فلول - انهم ما يقروش حاجات طويلة، الوقت اللي حيستهلكوه في قراية بوست طويل، يخشوا فيه على تلاتين صفحة ويشتموا اكبر عدد ممكن من البشريات، ومن ثم، فما فيش وسيلة لتعجيزهم غير انك  تقطع نفسهم في القراية فييأسوا، وانا سيد من يقطع نفس القارئ وانا مش قاصدة، فما بالك وانا قاصدة، زي مثلا اني اكتب ملحوظة المفروض عرفا لا تتجاوز سطرين واعملها لحاف زي ما انتوا شايفين كده، ثم ان التجربة علمتني ان اللي مالوش خلق يقرا حاجة طويلة ما بيبقاش شخص ينفع تحترم مخه... الواحد طلع ميتين اهله في الثورة دي، وانا ما كنتش كده قبل الثورة، ده انا كنت برنسيسة، وياما طلعت ميتين مبارك في اطار البرنسسة بتاعتي، بس بعد الثورة آمنت بان الثورة دين جديد زي ما مالك مصطفى بيقول، واخدت على نفسي عهدة الكرازة، ومشيت حافية ولابسة خيش وعرضت نفسي لكلاب السكك وفيران البلاعات وعرس الجراجات عشان ابشر بالدين الجديد... لكن خلاص.. زمن الللللللللل.... خلاص انتهى، وحارجع تاني للدايرة المحدودة بتاعتي اللي كنت باتحرك فيها، لان الدين الجديد حسينه اتقتل، وكتابه اتركن، ومشايخه بقوا بتوع فتة بدري بدري، وانا ما ارتدتش... بس... ولا على ايه؟ اقرا البوست عشان تعرف
توكلنا على الله
بسم الله الرحمن الرحيم
***
لسه لما باتصل برقم بابا باتوقع ان ام زينب ترد عليا وتدي ابويا التليفون
لسه لما احتار في حاجة اقول في مخي: ابقى اسأل بابا... وبعدين افتكر اني مش حاقدر اسأله
لسه لما اقابل حاجة تضحك ابقى عايزة احكيها لبابا، في جزء من الثانية مخي يقولي: ابقي قولي لبابا، وبعدين يرجع يفتكر اني مش حاقدر اقولها لبابا
لسه يا بابا.. لسه في كلام كتير ما قولتوش، حكاوي كتير ما حكيتهاش، اسئلة كتيرة ما سألتهاش، ضحك كتير كنت شايلاه عشان اضحكه معاك، اغاني كتير كنت عايزة اغنيها معاك.. لسه في حيرة كتير عايزاك تفصل لي فيها.. لسه في نبوءات كتير عايزاك تتوقعها لي.. ولسه لما حد يقول اسم ابويا ويتبع الاسم بعبارة: الله يرحمه، ابقى مش فاهمة هو بيتكلم عن ايه؟ لسه يا بابا... خليت بيا وانا لسه مش عارفة اتعامل مع الفكرة
الاب ما يتعوضش
والاستاذ ما يتعوضش
والصاحب ما يتعوضش
والمثل الاعلى ما يتعوضش
ولما يبقى الاب هو الاستاذ والصاحب والمثل الاعلى حاستعوض ربنا في ايه ولا ايه؟ العوض على الله عموما، بس اللي انا عارفاه كويس اني ما بقتش زي الاول، ومش عارفة حاقدر ارجع زي الاول ولا لا؟ بس هو فيه فجوه حصلت في قلبي كده او حفرة، مش عارفة حتتردم ازاي؟ 
الناس ممكن تستغرب ان ابويا عمره 84 سنة ومع ذلك ما توقعتش انه يموت... الحقيقة اني ما توقعتش خالص، عمر ما عرفت اعمل رابط بين ابويا والموت، ولحد دلوقت مش عارفة اعمل الرابط ده، حاسة كأنه مسافر مثلا، طفشان في حتة من الحتت اللي كان بيهج فيها وحيرجع تاني
احساس الفقد الفادح ده مغير كتير من نظرتي للحياة والامور على الاقل دلوقت، ما اعرفش بعد كده حابقى عاملة ازاي؟ بس عندي احساس كده ان كله محصل بعضه، وعندي احساس كمان اني اتعمل فيا مغرز وان الدنيا مالهاش امان وممكن تعمل فيا مغرز تاني، والغريبة اني مش عارفة ايه الاحتياطات اللي الواحد ممكن يتخذها عشان يتجنب مغارز الدنيا اللي شبه كده، ثم انا مش متعودة اني اقابل موقف ما يبقاش له حل، ودايما بافكر في حل، او تصرف، يا تحل المشكلة، يا تخلينا نتجنب اسوأ نتائجها
اللي اكتشفته بقى بعد تجربة الفقد دي ان مافيش حل لاي حاجة، وان مافيش منطق في اي حاجة، وان غالبا احنا لا بنحل ولا بنربط، والمرواح والمجي اللي احنا بنعمله ده مجرد دوشة عشان نوهم نفسنا اننا عملنا حاجة، والحقيقة ان ربنا هو اللي عامل كل حاجة بنسبة 100%، وكل اللي احنا بنقول عليه حلول او تصرفات مجرد غرفشة كده عشان نعمل حس لبعض، يعني مثلا، ابويا جات له جلطة من حوالي 12 سنة، والمفروض انه كان يموت، ليه بقى؟ لان ابويا لما جات له الجلطة، جاله الدكتور عشان يلحقه، فابويا ولع سيجارة، ونقلوه العناية المركزة، وابويا كان بيدخن في العناية المركزة، جواها يعني، ولما ام زينب حاولت تمنعه، قال لها: انت مالك؟ قالت له: انا مراتك ولازم احافظ على صحتك.. قالها: لا انت مش مراتي.. انت طالق اساسا... وراح مولع سيجارة تانية... مارلبورو احمر... علبتين تلاتة في اليوم... جوه العناية المركزة، لا انا ولا مراته ولا الدكاترة ولا الممرضات عرفوا يمنعوه... ام زينب قالت للدكتور ده رمى عليا يمين يا دكتور.. قال لها انت شايفة ان ده يجوز له اي حاجة من اللي بتجوز على الناس العادية؟ ده بيولع سجاير في العناية المركزة
الاول دخل مستشفى صديقه محمود عبد الظاهر، وكان بيجيب صحابه ويسهروا في المستشفى، ويدخن عادي، بعدين نقلناه المعادي، وبعدين السلام، بعدين مستشفى تانية في شارع سوريا، انا مش فاكرة الترتيب بتاع المستشفيات، بس احنا دخلناه العناية المركزة بتاعة كل المستشفيات، يخش مغمى عليه، يدوبوا له الجلطة، اول ما يفوق يولع سجاير ويجيب صحابه يسهروا في الرعاية
الطبيعي ان واحد بيعمل التصرفات دي يموت... امال يعيش ازاي يعني؟ واحد بيلف سجاير في العناية المركزة وهم معلقين له المحاليل اللي بتدوب الجلطة، لا وجايب صحابه وحرافيشه وقالبين الرعاية مجلس قيادة السطوح... يعيش ازاي بقى؟ 
بس هو عاش... الغريب انهم لما عملوا له اشعة مقطعية على المخ قالوا له ده انت كان عندك اثر جلطة قبل كده... فام زينب افتكرت انه من كام سنة قبلها جات له حالة شبه الحالة اللي جات له وقت الجلطة، بمعنى بقه اتعوج واغمى عليه وايديه ورجليه اتيبسوا، وام زينب قعدت تفوق فيه، وبعدين فاق وبقى كويس من غير دكتور ولا مستشفى
وغير الجلطة اللي خف فيها ذاتيا دي، وغير الجلطة المشار اليها، جات له بعد كده جلطتين، يعني اربع جلطات، ولا مرة فيهم بطل تدخين وشاي وقهوة وسهر... وعاش عادي، ما ماتش
ابويا بقى قبل ما يموت بسنتين كان مبطل التدخين خالص، وكان بينام بدري، وقبلها بخمس ايام كان عامل فحص كامل والدكتور قال له: ايه يا عم احمد ده؟ دي تقارير طبية بتاعة شاب عنده عشرين سنة... ده انت اصبى مني
بس مات
مات بطريقة غريبة قوي، صحى ام زينب وعمل لها كوفي ميكس، وقال لها انا حاروح اجيب بانادول عشان الخنفرة اللي بتجيله كل لما يسافر مع تغيير الجو.. ام زينب سمعت صوت هبدة، راحت له لقته واقع مكان ما كان واقف وجنبه البانادول، بتقلبه على ضهره لقته بياخد نفسه بصعوبة قامت تجيب له مية ورجعت لقته رافع صباعه وبيتشاهد... وخلاص
كده
بمنتهى البساطة
واحد قضى حياته كلها في قلب الخطر، كان المفروض يموت وهو بينضرب في السجن، او وهو واقف في مظاهرة قصاد الامن، او وهو هربان من القبض عليه، او يموت من الجوع اللي ما كانش بيفارقه، او يموت من الجلطات، او من اهماله في صحته، او من حياته اللي مش مستقرة... تجاوز ده كله وعاش... ومات بعد ما الدكتور قال له صحتك زي شاب عنده عشرين سنة
حتتعب نفسك وتسأل طب ليه؟ مافيش اجابة غير: ربنا بقى
حاجة كده زي الحاجات اللي بتحصل في الدنيا ومالهاش اجابة غير ربنا، زي مثلا ان اتنين متجوزين تحاليلهم الاتنين زي الفل ومع ذلك ما يخلفوش، بينما ناس تانية تمنع الحمل وتخلف، او تقاريرها الطبية تقول انها محتاجة علاج وتخلف... ازاي؟ ربنا بقى
ويبدو ان اجابة "ربنا بقى" هي الاجابة الوحيدة الصحيحة على كل حاجة، حتى الحاجات اللي احنا شايفين لها اسباب مباشرة، زي مثلا ان الثورة فشلت بسبب الاخوان.. دي الاجابة المباشرة، بس الحقيقة هو ربنا بقى
ربنا اللي بيعمل كل حاجة... وده في حد ذاته الشئ المريح الوحيد في حياتي دلوقت
انا ما حضرتش حفل تأبين ابويا، ومش السبب اني لسه والدة، السبب ان ابويا نفسه مات... حاعمل ايه بحفل التأبين؟
انا اتحرمت من الحضن ده

ومافيش حاجة حتعوضني عنه
***
حضراتكوا عارفين ان انا نفسة وكده، ومن ثم فمتابعتي للاشياء اللي بتحصل في الحياة مش على مستوى الاحداث
وعموما احسن
عشان كل ما اعرف حاجة بالمصادفة او اسمع طراطيش كلام الاقي اخبار تغم وتقرف الكلب الاعور الحزين، والزعل وحش على اللي زيي... وحرام عليا الانسانة المسكينة دي اللي ربنا ابتلاها بيا، كفاية من ساعة ما خلفتها دايرة بيها على المستشفيات والدكاترة والحضّانات، والحمد لله على كل حال
وانا كل ما الاقي نفسي متضايقة اقول ربنا اللي عمل كده فارتاح
وانا مش باحاول اريح نفسي ولا حاجة، هو ربنا فعلا اللي عمل كده، اهو ما انا لخصت لكوا حياة ابويا اهو، ما ماتش وقت ما كان منطقي يموت، ومات وقت ما كان مش منطقي يموت
على كل حال
سمعت طراطيش ان الجيزاوي اتحكم عليه وبيتجلد تقريبا، او حاجة كده، عرفت الموضوع ده من اخوانجي كان بيزايد عليا ويسألني مش حتقولي طظ في ذاتك الملكية زي ايام الاخوان
وانا مش عارفة ليه هو عرص، غير انها حكمة ربنا برضه، لان حملة طظ في ذاتك الملكية دي كانت فترة حكم طنطاوي، مش مرسي، بس يبدو ان الاخوان شايفين ان طنطاوي جزء من حكم الاخوان
هم ادرى... بس هم سربوا للسيسي تسجيل بيقول فيه ان طنطاوي هو اللي ورا كل ده وما معناه احنا عايشين بحسه
حية مولفة طنطاوي ده.. وحيموت على سريره عشان تبقوا عارفين يعني، اهو ده الوحيد اللي مش حيجرا له حاجة على كل الدواهي اللي عملها، كلنا لابسين في حيط وداخلين على ايام سودا، والسواد اللي شوفناه قبل كده كوم واللي جاي علينا كوم تاني، وحيطول كل الناس بما فيهم اللي رقصوا قدام اللجان، الا طنطاوي.. حيفضل في مأمن، وبكرة تشوفوا، وحتى في الاخرة مش عارفة ربنا حيحاسبه ازاي؟ اصله الراجل مقتنع انه بيعمل ده كله عشان الوطن وخير الانسانية، ومقتنع تماما انه انقذ البلد من مؤامرة كونية هو نفسه مش عارفها... وواضح ان السيسي كمان مش عارفها، بدليل انهم عمالين يدوروا عليها في تسجيلات عبد الرحيم علي، بس واضح كمان انهم مقتنعين فعلا ان فيه مؤامرة، يعني بيشتغلوا نفسهم كمان مش بيشتغلونا احنا بس
احنا ايه للي جابنا هنا؟
اه.. الجيزاوي
فانا بقى هاذوها الكائنات الاخوانجية بتزايد على ايه مش عارفة؟ اذا كان احنا تظاهرنا عشان الجيزاوي ايام طنطاوي، واللي راح يلحس شبشب الملك كان الكتاتني ومحمد حسان ومصطفى بكري رجل كل العصور، وبعدين مرسي مسك الحكم وما عملش حاجة للجيزاوي، واحنا ما عملناش مظاهرات ولا حاجة، عملنا ندوة بس، ثم انا حاتظاهر عند السفارة ازاي وانا والدة وبطني مفتوحة؟
من الحاجات المؤلمة جدا اللي حصلت وعرفتها برضه طراطيش كلام لاني ما كنتش في حالة تسمح لي اعرف، ان باسم محسن مات
مات تاني يوم ما ولدت، وما حدش قال لي... عرفت بعد كده، ومن غير تفاصيل، باسم بقى ده عبارة عن ملخص للثورة المصرية، باسم داخلية مبارك اصابته في 28 يناير 2011، طنطاوي طير له عينه في محمد محمود، مرسي حاكمه عسكريا وسحلوه في جمعة كشف الحساب وعذبوه، واخيرا السيسي قتله وريحه من الشقا المتواصل ده
وعرفت ان الاخوان اتصنفوا جماعة ارهابية، وعموما احنا حندفع تمن القرار الاحمق ده، زي ما دفعنا وبندفع تمن فض اعتصام رابعة بالقوة
انا مش عايزاكوا تقلقوا من حاجة.. احنا لابسين لابسين، كلنا، يعني اللي بيقرن وبيوسخ وبيطبل عشان فاكر انه بينجي نفسه مش حينجو من حاجة، حيلبس معانا... طرفين في منتهى الشر والغباوة بيتصارعوا، واحنا في النص زي سرحان عبد البصير، والحقيقة اللي انا شايفاه ان الطرفين المتصارعين قرروا يولعوا في نفسهم وياخدوا بعض بالحضن ويدفسونا معاهم... فكلنا مولعين بجاز وسخ، ومافيش اي جندلة ولا وساخة حتنجي حد من حاجة.. وعلى رأي امي: اللي يروح في داهية ما يتوهش، ومش عايزاك تقلق، انت تقلق لو رايح في داهية لوحدك، انما مدام كلنا رايحين فيها يبقى فيه ونس ان شاء الله، مش حتبقى لوحدك
هو ايه سبب انهم صنفوا اي حد يتقال عليه اخوان انه ارهابي غير انهم مش عارفين يسيطروا؟ الاخوان جماعة ارهابية.. طيب، حتعرفهم منين الاخوان دول؟ ما عندهمش قوائم عضوية، وما عندهمش كارنيهات، انت ناسي دي جماعة محظورة؟ ثم ان دول لما كانوا في الحكم كانوا بيبقوا اخوان ويقولوا انا مش اخوان على فكرة، يبقى حتعرف منين الاخوانجي؟ هو القاسم المشترك اللي بين الاخوان كلهم انهم لزجين ودمهم تقيل، بس دي خاصية لا ينفرد بيها الاخوان بس.. يعني لو قررت تعتمد الصفتين دول عشان تحدد الاخوانجي، يبقى حتقبض على عبد الرحيم علي ومصطفى بكري بتهمة انهم اخوان
عرفت كمان ان احمد ماهر ومحمد عادل واحمد دومة انطسوا تلات سنين، وناس بتقول عليهم احسن يستاهلوا عشان محمد عادل واد رخم واهبل، وفي ناس بتستشهد بكلامي لما اتخانقت معاه وقلت له انت اخوانجي.. طيب يعني هم ناويين يحبسوا كل اللي انا باتخانق معاهم مثلا؟ انا موافقة على فكرة، لو معيار الحبس اي حد نوارة تتخانق معاه، يبقى قشطة... بس الحقيقة انا مش فاهمة هم التلاتة اللي عكس بعض دول انطسوا تلات سنين ليه؟ والاهم هي الناس شمتانة فيهم ليه؟ بالنسبة للاخوان هم قاعدين يشمتوا على روحهم عادي، بس الطرف التاني اللي انا مش عارفة اطلق عليهم اسم ايه بالتحديد، ما ينفعش اقول عليهم فلول بس لان مش كلهم فلول، وما ينفعش اقول سيساوية بس لان مش كلهم سيساوية، هم ينفع يتقال عليهم الوجه الآخر لعملة الاخوان، ومع عدائهم المريع للاخوان، بس هم فولة واتقسمت نصين من الاخوان الحقيقة، دول حتى هم الاتنين شمتوا ان علاء عبد الفتاح اتقبض عليه، والاتنين قالوا ان ربنا انتقم من علاء عشان شتم الشعراوي! والطرفين بيحبوا الشعراوي ومسميين نفسهم الثائر الحق، ممكن يكونوا بيشمتوا من نفس المنطلق اللي خلا ام علي الزيات تبلغ عنه.. وانا الحقيقة ما اقدرش اهاجم الطرفين فقط واتجاهل بقية الاطراف بما فيهم ناس انا محسوبة عليهم او هم محسوبين عليا.. عشان فيه حالة وساخة عامة
يعني اللي بيأخون بيأخون بوساخة، اللي بيفل بيفل بوساخة، اللي بيثور بيثور بوساخة، حتى اللي عامل عنده ضمير بيضمّر بوساخة برضه... انا كنت باقول فسية شيطان، بس واضح ان الموضوع تطور والشيطان جاله اسهال وطرطش ولغوص الكل، عشان كده مش متشجعة قوي اشارك في ما يحدث في الحياة.. اولا انا عارفة ديتها وعارفة اننا لابسين لابسين، ثانيا، انا مش لاقية طرف مش متعاص كاكا... حتى اللي عاملين ثوار واصحاب مبادئ... طبعا مش لانهم عملا وجواسيس، بس لانهم متلخبطين، والواحد  لما يتلخبط يعتزل... زي ما انا قررت اعتزل كده، لان فعلا المشهد مربك
وقد تكون دي اخر نبوءة لابويا، اصل ابويا كل اللي حصل قبل كده هو تنبأ به، وقد يكون موته في  حد ذاته نبوءة للي جاي... خلع، ابويا خلع
وعرفت ايه تاني؟ عرفت ايه تاني؟
عموما مش مهم... ممكن اكون مش فاكرة، وممكن اكون ده كل اللي عرفته، بس انا الحقيقة مش حاعرف اعمل حاجة حيال اللي انا عرفته ده، غير اني اتضايق، لان كلها اخبار تضايق، وردود افعال الناس اللي مع واللي ضد كمان تضايق
زي ما قلت: في روح وسخة لابسة البلد كلها... وفي ظلم كتير، قتلى كتير، مساجين مظلومين كتير، افترا كتير، وامهات بتبلغ عن عيالها... اظن مافيش اوسخ من كده، واظن قرب قوي الوقت اللي لما حد يتقال له يابن الوسخة يفرح، او يقول للي بيشمته: انا ابن وسخة وبنت وسخة كمان
***
بالنسبة للاستفتاء، فانا من اول ما ابتدوا يعملوا الدستور وانا متوقعة ان نسبة المشاركة حتبقى كبيرة قوي وان نعم حتكتسح ايا كان اللي مكتوب في الدستور، مش لاني مكشوف عني الحجاب، ابويا ومالك مصطفى بس هم اللي مكشوف عنهم الحجاب، لكن لاني عندي دم وباحس بالناس
الناس تعبت، وعلى راي امي حين تردد المثل الشهير اللي كانت بتقوله جدتي تعليقا على اي حد زهقان وعايز يخلص: إخري في طاقيتي خليني امشي
اولا الناس مستفزة جدا، بفتح الفاء، وكان ممكن الغباوة اللي بيعملها النظام الحاكم ضد الاخوان تخلي الناس تتعاطف مع الاخوان تاني، لولا الغباوة اللي بيعملها الاخوان ردا على الغباوة اللي بيعملها النظام، وكل واحد فيهم عمال يجيب اجوان في نفسه، بس لحد دلوقت هداف الاخوان اللي بيجيب اجوان في نفسه مكتسح، فطبيعي الناس حتصوت بنعم وحتشارك بنسبة كبيرة، ومش عارفة اي حد كان متوقع حاجة تانية كان متوقعها ازاي؟ البعيد ما عندوش دم؟ ما هو لو كل انسان حس بغيره كان مشاكل كتير اتحلت... لكن اظن ان اغلب المشاكل اللي حصلت لنا سببها ان ماحدش حاسس غير بنفسه هو وبس، وبخسائره هو بس، ومش عارف يحس بغيره، لو فكرت تحس بغيرك حتعرف تتوقع حاجات كتير من ردود افعال الناس... اما موضوع الرقص ده، فسببه انهم عايزين يكيدوا الاخوان... وعموما النسبة العالية بتاعة المشاركة والتصويت بنعم دي مش في مصلحة النظام الحاكم خالص... مع انها مش متزورة ولا حاجة، بس تنم عن عشم يودي في الداهية، اصل الشعب ده ماشي بمبدأ: ماحدش بيثور قوي الا لما يتعشم قوي... زي ما اتعشم في الاخوان وبعدين اتغابى عليهم
انا ما نزلتش طبعا، مش عشان مقاطعة لا سمح الله... بس عشان السبب ده

الاستفتاء مش متزور
ونسبة المشاركة فعلا كبيرة والناس فعلا قالت نعم نعم نعم نعم نعم نعم نعم من جوه القلب
بس ده الاستفتاء الاول في تاريخ البشرية اللي بيتقبض فيه على اللي بيصوت بلا مع ان لا مكتوبة في البطاقة.. يعني لو التصويت بلا عيب او خيانة... كاتبينه ليه في البوطاقة؟ عاملين كمين للخونة
الايام بينما
بكرة حيعملوا انتخابات ويرصدوا اللي ما نزلش يصوت ويقولوا عليه مقاطع ويقبضوا عليه.. احسن تفتكر نفسك يعني حتفلت لما ما تشاركش في عملياتهم الانتخابية... آه... ده احنا مصحصحين قوي
طبعا ياعيني الوجه الاخر لعملة الاخوان اللي هم مجموع اللي ضد الاخوان بس عاملين زيهم ماسكين في الثوار وعمالين يقولوا لهم عشان تعرفوا حجمكوا يا نكسجية، انزلوا من التويتر على ارض الواقع... انا سمعت الكلام ده فين قبل كده يا اخواتي؟ اه... بعد انتخابات مجلس الشعب اللي كسب فيه الاخوان باكتساح... يا فندم احنا عارفين حجمنا كويس، وماحدش فينا قال اننا من الاغلبية الصامتة ولا الناطقة، احنا من الاقلية اللي مالهاش لازمة.. المهم تعرفوا انتوا حجمكوا... هيييييييييه... سبحان من له الدوام، الملايين اللي نزلت تصوت بنعم دي هي هي ذات نفسيتها اللي نزلت انتخبت الاخوان باكتساح في مجلس الشعب.. هو الشعب كده زي الخيارة
بالنسبة للبوس اللي اكله الظباط على صداغهم... بجد صعبوا عليا، ربنا ما يحكم نسوان المصريين على ظباط
اما يا عيني الاخوان، فهم عايشين في عالم موازي، وبيقولوا ان مافيش اقبال على الاستفتاء هههههههههههه وبيقولوا الشرعية للشارع مش للصناديق.. الاخوان بيشككوا في الصناديق بعد ما كانوا بيقولوا لنا الصناديق هي لعبتنا وانتوا منعزلين عن الشارع واعرفوا حجمكوا... ياعيني ع الحلو اما تبهدله الايام، لا ونازلين يعملوا لبش في اللجان.. هو في حد بيعمل ثورة على شعب يا عم انت؟ والاخوان مسميين الدستور ده "دستور الدم" على اساس ان مجلس الشعب اللي كانوا فرحانين بيه ما كانش مجلس شعب معمول على الدم برضه.... اظن يعني انتخابات مجلس الشعب كان على دم ضحايا محمد محمود واحنا ما نزلناش نحاول نمنع اللجان انها تشتغل زي ما الاخوان عملوا المرة دي؟ مش لاي سبب، غير لان اي حد عنده الحد الادنى من المفهومية ما يصحش يتحدى الشعب، سوا شايفه غلطان ولا صح.. على الاقل لان دي معركة مش متكافئة
كانت فاطمة عابد قالت لي: انت مش ملاحظة ان الناس في سنة واحدة بالغت قوي في كره الاخوان اكتر ما كرهوا مبارك في 30 سنة؟ فقلت لها: السبب الاساسي هو التعالي
مافيش انسان في الدنيا يكره قد اللي يتعالى عليه ويحسسه انه زبالة وانه جاي ينضفه
وده الاحساس اللي وصله، ومازال بيوصله، الاخوان للناس.. احنا جايين ننضفكوا.. احنا الساجدين الحرائر وانتوا العبيد، ووصل الامر بصفحة اخوانية تكتب تقول: احنا اللي عملنا لكوا صوت وفي الاخر تشيعونا! هم جايببين الاوهام دي منين والنبي؟
ده حتى المهفوف محمد الجوادي بيقول ان الاخوان مهمين للامن القومي وانهم هم اللي حيبنوا مصر زي ما البيوريتانز بنوا امريكا! احنا عايشين في عنبر العقلاء والله
والحقيقة احنا في مصيبة كبيرة... مصيبة كبيرة.. والثورة فيشليت زي اللمبي بالظبط، ومافيش سبب لكل اللي بيحصل لنا دلوقت غير الاخوان حصرا... حصلت لهم معجزة منزلة من السما، خرجوا من السجن على الحكم، وبدل ما يتواضعوا لله ويتقوا ربنا، وسخوا اوسخ وساخة
والحقيقة كمان، فيه اجماع على وساخة الاخوان، حتى الاخوان نفسهم مقرين انهم وسخين، انت عمرك سمعت حد من الاخوان، غير محمد الجوادي المهفوف، لما تقول له: انتوا اوساخ، يقولك: لا مش اوساخ؟ والله ما حصل... كل دفاعهم: مش احنا الاوساخ الوحيدين في البلد
طيب اذن بما ان فيه اجماع على وساخة الاخوان، بما فيهم الاخوان نفسهم، ايه اللي موقع الناس في بعضها ومخليهم يخونوا بعض، ويضربوا بعض، والامهات تبلغ عن عيالها؟ الخلاف الاساسي في كيفية التعامل مع هذه الوساخة
في ناس شايفة اننا لازم نبيد الاخوان.. والحقيقة ان الحل ده، فوق انه متوحش، مش عملي، وكمان مكلف، احنا ما عندناش ميزانية ابادة، الى جانب ان نتائجه مش مضمونة، هتلر عمل محرقة لليهود وبرضه ما عرفش يبيدهم، وكانت النتيجة ان اليهود استغلوا الهولوكوست، وكان الهولوكوست في مصلحتهم... زي ما فض اعتصام رابعة في مصلحة الاخوان كده
وفي ناس كرد فعل للناس اللي عايزة تبيدهم بتنضم ليهم وهي سادة مراخيرها.. ولما تقولهم: بتعصروا لمون تاني ليه؟ يقولك: ما احنا واضح اننا حنضطر نعصر لمون في كل الاحوال، وهي وجهة نظر برضه، بسبب حالة الوساخة العامة، فهم حاسين انهم لو حيعصروا لمون في كل الاحوال يا اما على الاخوان يا اما على ناس بتقول عليهم نكسجية، يبقى على الاقل ما يتضامنوش مع اللي في السلطة
بس انا عندي امكانية اني اعتزل كل الاطراف وانا ضميري مرتاح، انا مش محتاجة اثبت حاجة لحد، ومش عايزة اخالف ضميري، ولا حاقدر اخالف ضميري، وماعنديش حاجة عايزة اكسبها
عارفة ان كان فيه ناس بتسأل عليا كنوع من انواع الاستعباط والوساخة، وفي ناس بتسأل عشان نتونس ببعض زي ما انا باسأل عليهم
بس انا عايزة اقول لكوا اني فعلا مش عارفة
ربنا اللي بيعمل كل حاجة فعلا.. وانا ما عنديش اي اجابات تانية
يعني ابويا مات، والثورة فشلت، والناس اتهبلت في تزامن تاريخي عجيب
وزي ما حفل تأبين ابويا ما حضرتوش لان الحفلة مش حترجع لي اللي مات، حفل تأبين الثورة اللي بيحصل دلوقت مش ناوية احضره
ممكن كلمة "الثورة فشلت" تكون خبطت في وش حد ضايقته دلوقت
بس انا ما اقدرش اغش حد، ولا اضحك على نفسي... ومش ناوية اشهد زور مهما حصل
فاجتنبوا الرجس من الاوثان، واجتنبوا قول الزور
بصراحة: مافيش امل حاليا دلوقت.. ومبارك قالها لنا كلمة حكمة من سنين طويلة: احنا داخلين على ايام سودا
مش حتلاقوني عندي الامل اللي ممكن ناس يكون نفسها اديهولها عشان نتونس ببعض... انا اسفة
انا كنت قاعدة اقول ايام سودا واحنا داخلين على ايام سودا، ومالك مصطفى زعق لي وقالي ما تقوليش كده للناس وتحبطيهم
وبعدين مؤخرا قال لي: اللي جاي اسود من اللي فات
فكده خلاص بقى... الحاجة الوحيدة اللي محيراني، اللي قاعدين شمتانين في "النكسجية" دلوقت، حيلبسوا معانا ذات نفس الخازوق، واللي بيبلغ عن عياله عشان خونة، هو نفسه حيتهم انه خاين كمان شوية، واللي فرح في اسراء عبد الفتاح انها تم الاعتداء عليها، حينضرب هو كمان... يعني حتى اكثر الناس فلولية وسياسوية حيلبسوا في الحيط... وصعبانين عليا
محيراني ليه؟
لاني بطلت انبسط لما ربنا ينتقم من الظالم
بطلت ادعي على الظلمة ربنا يوريهم في نفسهم وعيالهم اللي هم قابلينه على المظلومين
لان بقالنا 3 سنين ربنا لما بينتقم من الظالم انا اللي بازعل
لما دخلت اودة العمليات وانا باولد دعيت الدعوة الآتية: يا رب انصف المظلوم على خير وانت اعلم بيه، واهدي الظالم على خير وانت اعلم بيه
بصراحة لان الكل بقى ظالم والكل بقى مظلوم، ومش حاقدر اقول اني مش حيرانة، ومش محتاسة، وان الامور واضحة وضوح الشمس بالنسبة لي
كنت الاول باقول جانب المستضعف دايما امان... جانب المظلوم دايما امان
بس دلوقت الكل بقى مستضعف وغلبان ومظلوم، والكل بقى مفتري وجبار وظالم في ذات نفس الوقت، نفس الشخص في مشهد 1 ظالم، في مشهد 2 مظلوم
حتى ابد الفتاهـ اوميجا هههههههههههههههههههههههههه
يا عيني
والله لما سمعت التسجيل صعب عليا
هو ازاي يعمل كده؟ ازاي يبقى فيه تسجيل في الاودة وهو عارف، وبيكلم صحفي، ويحكي حاجة زي دي ويقول له خليها بيني وبينك؟ وكان رئيس مخابرات؟ مبدئيا موضوع انه بيشوف حاجات بتتحقق دي انا سمعتها من زمان، من ايام مرسي، دي حاجة مترددة في محيطه على الاقل، عرفت من حد من ظباط 8 ابريل انه معروف في الجيش بانه بيشوف فعلا حاجات وبتتحقق.. اه والله قال لي كده، وقال لي كمان انه شاف ان طنطاوي حيبقى وزير دفاع في اليوم الفلاني وحكى له لما كان بيمر على وحدة، ولما اتحققت طنطاوي دور عليه وبقى يتفائل بيه، بس الحاجات اللي هو شافها دي تفسيراتها مش حلوة على فكرة، لها معاني كان اصول يسأل عليها لو مهتم بدل ما يحكيها لياسر رزق في تسجيل... مش قلت لكوا كل الناس غلابة 
اوميجا يعني النهاية
والسادات مات مقتول
وانا مش حافسر اكتر من كده
عموما جيران سيدنا الحسين منفوحين كلهم... ربنا ما يحرمناش منه
وبمناسبة سيدنا الحسين، ده قعد شهر قافل على نفسه.. سيدنا الحسين، يعني حتى سيدنا الحسين كان قافل وفين وفين لما فتح.. 
الخلاصة اني انا شخصيا مش مبسوطة
بس حالة الوساخة دي او اسهال الشيطان مطرطش على الصورة ومخليني مش عارفة اتخذ موقف واضح وابقى ضامنة ان ضميري مرتاح ومش ظالمة حد... الموقف الوحيد اللي مريح ضميري اني اعتزل كافة الاطراف... طبعا ما عدا الاسرى المظلومين
ولحد ما حد يجيب مية وصابون ويمسح اسهال الشيطان انا بارضع بنتي بقى
دلوقت انا مافيش حاجة شغلاني غير اني ارجع لوزني اللي كنت عليه قبل الحمل، واشد حيلي لان الحمل والولادة والرضاعة بجد هدوني هدة غير مسبوقة، ده كنت فريد شوقي زمان.. الحمل والولادة خلوني ولا الاخوان
----
اخيرا
كلمة حق: انا جربت انواع كتير من الشقا، بدءا من الجري ورا المدرعات او الجري من المدرعات مرورا بالنوم على الرصيف وشم الغاز وانتهاءا بالاضراب عن الطعام والوقوف وسط الجثث، النوم على البلاط في السجن... كل ده كوم وتعب وشقا الحمل والولادة كوم تاني... بجد يعني الاخوة الرجالة عايشين كومبارس صامت في الدنيا دي، اللي ما حملش وولد ما شافش شقا ولا تعب
ومن هنا نفسي اعرف ام علي الزيات بعد التعب ده كله بلغت عنه ازاي؟

نسيت صحيح... للي بيسال عن العنوان.. ده عنوان رواية امي قالت لي عنها، دورت عليها بس هي مختفية... لكن عجبتني الصورة اللي في العنوان