Thursday 24 May 2012

SOS الاستغاثة الاخيرة

توضيح:
سبب احتمالية ان شفيق يعيد حاجتين
1- الاقبال ضعيف
2- انه بيدفع فلوس ما بين 400 جنيه الى 1000 جنيه.. ده من كذا مصدر
من مراقبين داخل اللجان، ومعظم اللي صوتوا لشفيق ناس غلابة قوي ومعظمهم بيبصم.. 
3- كان فيه محاولة امبارح لتبديل الصناديق بس الحمد لله انها فشلت
بمعنى ان شفيق مش حينجح الا بالرشوة والتزوير
------------
الساعة واحدة وربع على ما اخلص البوست حتبقى واحدة ونص على ما يتقري وينتشر حتبقى اتنين ونص تلاتة.. يعني ما عندناش وقت كتير بس لازم اخلص ضميري للمرة مليون قدام ربنا
الوضع دلوقت حرج جدا، والبلد في رقبة اتنين بالتحديد: ابو الفتوح وحمدين.
لو اتحالفوا دلوقت حالا بإنهم يشوفوا مين اصواته اكتر ويبقى هو الرئيس واللي بعديه نائب انشالله بنص صلاحيات الرئيس يبقى بيوفروا دم كتييييييييير جدا... كل الدم اللي نزف قبل انتخابات الرئاسة كوم، والدم اللي حيسيل في حال ما اذا شفيق او مرسي نجحوا كوم تاني
وده طبعا لاننا عارفين يعني ايه شفيق يبقى رئيس.. يعني القذافي.. يعني كتاب البلوفر اللبني، يعني اطاطا بتتكلم كل يوم وتقول لنا: سرقة الجزم من قدام الجوامع لسه ما حدش يعرفها، سرقة مستودع الانابيب انا بس اللي اعرفها.. عشان انا فريق جدع.. وانت عارف ان انا فريق جدع
عصام سلطان؟ ده نحمده يا ولا.. نحمده بتاعة البخور
بما انه عسكري + فلول + مجنون + حاسس بالاهانة من كم الجزم والتهزيء اللي اخده وعايز يثبت شخصيته فالمدابح اللي عملها العسكر طول السنة والنص اللي فاتت مش حتيجي حاجة في اللي هو حيعمله فينا.. حيبقى القذافي حرفيا
وبما ان فيه ناس كتير مش حتقبل يحكمها القذافي فالموضوع ممكن يتطور وتبقى حاجة شنيعة جدا
بالنسبة لمرسي فهو الخيار الثاني اللي لحد دلوقت الارجح يطلع الاعادة مع شفيق
وهو حكم آل سعود مترجم ومدبلج باللهجة المصرية.. مش محتاجين يعني نتناقش في اسلوب حكم الاخوان اللي مش حيبقى وراهم غير الختان والمواقع الاباحية ومنع الخمور + ان الاخوان معاهم فلوس بالعبيط وعايزين يكسبوا الناس والبلد عندها ازمة اقتصادية، مصطنعة صحيح بس اهي موجودة، فحيضخوا فلوس كتير لانهم زي مرجان احمد مرجان كده متعودين يشتروا الناس بالفلوس
يعني اربع سنين قمع وفلوس.. وتعالى بقى بص على المصريين النسوان محبوسة في البيت بتلزبن على بعض والرجالة بكرش وبينطوا على السواق الهندي
وده مش كلام عنصري، لانه مش مرتبط بطبيعة شعب، ده مرتبط بطبيعة حكم
حرية + رفاهية = تقدم
قمع + فقر = ثورة
حرية + فقر = فوضى
واوحش حاجة على الاطلاق اللي بتشوه طبيعة الانسان
قمع + رفاهية = جاموسة
هات السويد وخليها في رفاهيتها واعمل لها قوانين قمعية وتعالى بعد سنتين حتلاقي الراجل بينط على السواق الهندي والستات بتشقط ستات تانيين من على النت
هات السعودية واحتفظ برافهيتها واديها حرية وتعالى بعد سنتين حترجع تلاقيهم بيطوروا قنبلة نووية
حتقول لي ايران دولة قمعية وفيها تقدم علمي حاقولك ايران مافيهاش رفاهية، الانسان لازم يشتغل عشان يلاقي ياكل، مش بياخد الاعدادية وياخد عليها اعانة، صحيح مش ضاربهم السلك زينا، بس ماحدش بيلاقي ياكل الا اللي بيشتغل وعندهم مشروعين مهتمين بيهم التعليم والمشروع النووي فزي ما اللي عايز ياكل عيش في مصر بيغني او بيلعب كورة اللي عايز ياكل عيش في ايران لازم يتعلم.. الى جانب انك مش سامع عن ايران غير المشروع النووي اللي هو مشروع دولتهم، لكن ما تعرفش مثلا ان ايران فيها اعلى نسبة ادمان للمخدرات في المنطقة، وماهياش يعني يوم الهنا يوم المنى مبروك علينا كلنا ولا حاجة
الخلاصة... الاخوان ما عندهمش مشروع غير فلوس كتير وقمع كتير وده حيخليك غصب عنك تضرب الفلبينية وتنط على السواق الهندي، لانك مذلول وطافح الكوتة، ومعاك فلوس كتير مش عارف توديها فين، فبتروح تجيب اي حد غلبان تطلع عليه عقدك
مبارك افسد الانسان المصري بما فيه الكفاية.. مبارك خلى الانسان المصري فرجة العالم، وبقت الناس تشاور علينا وتقول الشحاتين اهم.. الواطيين اهم.. الاندال اهم.. الجبنا اهم
وده يفسر سر اقدام الناس على الموت بشكل هيستيري وكلامهم عن الكرامة بشكل هيستيري زي اللي بينفي عن نفسه تهمة الجبن والوطيان والشحاتة.. وزي ليه؟ هي كده فعلا
احنا ما عملناش ثورة وصبحنا الفساد اللي عمله فينا مبارك اتغير.. احنا عملنا ثورة عشان نجيب نظام يصلح الفساد اللي عمله فينا مبارك
واذا كان مبارك خلق من قطاع كبير منا واطيين وشحاتين وجبنا واندال.. فمش ناقص نجيب شفيق يخلق منا معاتيه، ولا مرسي يخلق منا جواميس.. كده بقى اختصر وقول شامبانزي.. حنعيش ليه؟ احنا لحقنا نعالج نفسنا من الامراض اللي جابها لنا مبارك لما حنجيب لنفسنا امراض تانية؟
وطبعا.. بما ان فيه قطاع في مصر حيبقى واعي لده كله فبرضه مش حيسكت لما مرسي يمسك الحكم
ومن ثم حيبقى فيه دم كتير تاني
ودم بقى بما لا يخالف شرع الله.. والدم بتاع شرع الله ده بيبقى بحور والناس بتسكت لبعدين تخش النار
طبعا الثوريين مش حيسمحوا لشفيق او مرسي انهم يخربوا الثورة
الا الثورة على جثتنا
بس لازمتها ايه جثتنا واحنا عندنا الحل
عبد المنعم ابو الفتوح وحمدين صباحي في ايديهم الحل انهم يضموا على بعض دلوقت حالا
بدل ما بتوع الحملتين دايرين على اللي انتخبوا خالد علي يشحتوهم.. 
انا انتخبت خالد علي لاني قرفانة منكوا.. كان مفروض من الاول تعملوا فريق رئاسي وخالد قال ان لو حمدين وابو الفتوح عملوا فريق رئاسي هو حيتنازل
لكن خالد اترشح واحنا انتخبناه لما يأسنا منكوا، وعددنا مش كبير، احنا بالمقاطعين، بتتوع ابو العز الحريري بالبسطويسي مش ممكن نعمل لكم اي حاجة دلوقت.. انتوا اللي في ايديكم الحل بدل ما انتوا نازلين شتيمة في بعض
ما تبقوش زي ما ام كلثوم بتقول: انا وانت ظلمنا الثورة بالغيرة وجبنا للظنون سيرة، وعز عليك تسيب العند وتسامح، وعز عليا أكون البادي واتصالح
وده محمد واكد مستقل ومقاطع الانتخابات وبيراقبها وبيقول ان ابو الفتوح وحمدين عوروا بعض جامد وانفصالهم خلى لحد دلوقت اولا: الاقبال ضعيف جدا، ثانيا: الاعادة لحد دلوقت حتبقى بين مرسي وشفيق
الاستطلاعات بتقول ان ابو الفتوح متقدم على حمدين
واجب ابو الفتوح انه دلوقت حالا يتصل بحمدين صباحي ويتعهد له بانه يدي له صلاحيات نائب نص صلاحيات الرئيس
وواجب على حمدين انه يقبل
مافيش غير كده.. مافيش حل تاني.. ده اللي حيزود الاقبال في الساعات الاخيرة على الانتخابات، وده اللي حينقذ الموقف وينجينا من دم محتوم
احنا مش حنسيب بلدنا تروح للعسكر ولا لنظام فاشيست قمعي يشتري الناس ببطنهم
ومستعدين نموت... ولو ابو الفتوح وحمدين ما ضموش على بعض دم اللي حيموت بعد الانتخابات في ايديهم
وانا احملهم مسئولية كل واحد حيموت بعد الانتخابات.. وباقولكم انا حانزل احاول اموت تاني بما ان الموت مش راضي يستعبرني.. ومش حنسيب بلدنا.. بس انتوا تقدروا توفروا دمنا.. ومافيش غيركم يقدر يعمل ده في البلد كلها دلوقت وفي الساعات المقبلة.. لو انقذتوا البلد حتبقوا ابطال قوميين... ولو استمريتوا على المعاندة والانانية مش حنسامحكم لا واحنا احياء ولا واحنا اموات
ألا هل بلغت؟ اللهم فاشهد

Sunday 6 May 2012

تجميع فيديوهات العباسية

انا مش محتاجة اتسول دعم حد من اللي بيدافعوا عن الجيش لان الحق ظاهر والباطل ظاهر واللي بيشتم في المتظاهرين والقتلى والجرحى كل مرة نفس الجهات
بس انا قلت اجمع فيديوهات احداث العباسية الناس كلها تشوفها، عشان اتأكد كده ان اللي بيدافع عن الجيش بيدافع على بينة عشان اطمن من قلبي انه ان شاء الله يحشر مع طنطاوي وحمدي بدين والملا في الاخرة

 واخر حاجة كنت اتوقعها من بعض الناس ان الاسلاموفوبيا توصل بيهم انهم يخالفوا ضميرهم ويشمتوا في ناس مظلومة ومقهورة ومحبوسة ومصابة ومقتولة لمجرد ان دول سلفيين واللي وقف معاهم.. ويوصل بيهم الامر انهم يقولوا احسن يحصل كده للسلفيين ولما ناس تانية تقولهم مش كل اللي ماتوا سلفيين (طبعا انا عمري ما اقول كده لان عيب.. انا سلفية لما السلفيين ينضربوا ومسيحية لما المسيحيين ينضربوا.. انا على دين المظلوم ايا كان.. بس فيه ناس بتدافع بالطريقة دي) يردوا ويقولوا احسن يستاهلوا اللي يروحوا يقفوا مع السلفيين عشان يبقوا يمشوا ورا السلفيين تاني! ايه الـ.. ال ايه؟ مش عارفة اشتم اقول ال ايه؟ وساخة؟ ابقى باشتم الوساخة؟ الحقارة؟ لا عيب.. الحقارة ما عملتليش حاجة.. ايه الكفر ده؟ مالهم الكفار؟ طب ده فيه كفار يتحطوا على الجرح يطيب والله.. مش لاقية صفة والله.. اول مرة يعجز لساني الزفر عن وصف الناس دي.. هم انجس من اي شتيمة

Saturday 5 May 2012

رجاء نسخ هذه الشهادة على كل المدونات لتأمينها

قمت بتصوير هذا الفيديو وسط البلطجية ... شاهدوا أولاً


نأتى الى شرح الفيديو:
وجدت بعض من أهالى العباسية بيناشدوا اهالى تانيين من البلكونات للنزول لحماية البنزينة من الاحتراق وبعض منهم  يهتف ايد واحدة وبعض منهم يهتف "العباسية مش بلطجيةوسمعت صوت ضرب نار كتير وتصفير
فى اللحظة دى شوفت مجموعة من البلطجية راجعين من العباسية فى وشى وتذكرت أحدهم وقمت بعرض صورة له فى اخر الفيديو وساشرح فيما بعد ملابسات تصويرى له يوم ٢٢ يوليو الماضى ٢٠١١ 
ودا كان المشهد الاول فى الفيديو اللى عرضته

المشهد الثانى كان على مدخل شارع امام جامع النور بعد شارع البنزينة
ظهر صاحب الرشاش الألى الذى لا انسى شكله عندما ضرب فى الشارع وهتف البلطجية "خش عليهم" وراءه دخل عليهم
وضرب واختفى داخل شوارع العباسية مرة أخرى
حاملاً الرشاش




أستقريت فترة فى هذا الشارع وكانوا يحضرون لضربة فجائية مباغتة للمتظاهرين وفى الوقت دا ظهر شخص بتى شيرت أصفر مخطط قوى البنية يحمل حزام للمسدس بها طبنجة ومعه صندوق مولوتوف يقدمه للبلطجية ويأخذ سلاح ابيض ويشير به الى المتظاهرين هاتفاً ايد واحدة  ايد واحدة!!
صورة بالطبنجة



دخلت فى اللحظة دى الى الشارع  التانى واللى فيه البنزينة ودا كان المشهد الثالث عندما شاهدت فى النور كل طاقم حراسة منصات الفلول فى العباسية مع البلطجية بينما ظهر مرة أخرى فى الضوء الشاب ذو الطبنجة ليأتى لهم بالمولوتوف والجميل انه بيقول لولد يحمل مولوتوف "فين الجيش اللى انت بتدافع عنه بقى يجى يشوف اللى بيقع منكوا"

المشهد الرابع هو فيديو للشاب ابو سكسوكة اثناء حراسته لمنصة العباسية فى ٢ ديسمبر ٢٠١١
صورة واضحة وجدتها فى حملة عسكر نشطاء اثناء افتعاله خناقة امام وزارة الدفاع مع المتظاهرين فى فبراير الماضى

المشهد الخامس هو الشاب الذى رأيته ليلا ولم أجد الفرصة لتصويره ولكن ظهرت صورته فى ثانى يوم صباحا على جريدة المصرى اليوم فقمت بعرض صورة أخرى له قد التقطها له يوم ٢٢ يوليو قبل يوم موقعة العباسية  أثناء التعدى على المتظاهرين أمام جامع النور اثناء وجود الجيش وكان معى والدة علاء عبد الفتاح وبعد اصدقاء الثورة وعندما أصروا على التعدى علينا قمت بتصويره لتخويفه فحاول ضربى فهربت فى عربة أحد مصورى المصرى اليوم
الشاب العارى الجسد تماما ببنطلون جينز


تحليلى لما شاهدت علماً بأنها ليست اول مرة أكون فيها مع أهالى العباسية:
- أولاً جملة أهالى العباسية جملة غير دقيقة لان منطقة العباسية منطقة كبيرة جدا وفيها فرق فى طبقات المجتمع بشكل واضح
- صاحب الرشاش الشهير معروف جدا بين أهالى المنطقة
- بعض الشباب الذى يقوم بضرب المتظاهرين يدافع عن المجلس العسكرى بدافع ما يظن انه يقوم بعمل وطنى حمايةً للجيش
- صاحب الطبنجة الذى يأتى لهم بالمولوتوف يبدو انه من كبار المنطقة وهم يعرفونه جيداً وتعليقه للشاب على موضوع حماية الجيش هى محاولة منه لاقناع الشاب ان ما يفعلونه ليس لحماية الجيش وانما لحماية المنطقة
- بعض الشباب الذى يقوم بضرب المتظاهرين هم من مناطق اخرى مجاورة ولكنهم على علم بأهالى المنطقة
- معظم البلطجية هم من أهالى الوايلى واصحاب مقاهى وقادرين على فعل اى شىء مقابل المال ويستخدمهم منظمى تظاهرات العباسية فى حمل البانارات وتأمين المنصات وبعض من هؤلاء قد شاهدتهم اكثر من مرة فى أحداث مختلفة يفتعلوا مع المتظاهرين امام وزارة الدفاع مشاجرات
- ان البلطجية فى بداية الأمر جروا المتظاهرين الى ميدان العباسية ثم الى شوارع العباسية ليظهر أمام الرأى العام ان المتظاهرين هم من قاموا بترويع أهالى العباسية
- بعض من هؤلاء البلطجية ساعدوا التحريات العسكرية فى جمعة ٢ ديسمبر على اعتقال مراسل الجزيرة مباشر أمام عينى
- البلطجية عارفين انواع الاسلحة وصوتها وايه الفرق بين الصوت والحى والخرطوش لانى سألتهم اكثر من مرة بأسئلة استنكارية ويشتهرون بقنابل تسمى قنابل المونة تباع الواحدة ب ٣ جنيه على حد معلوماتى منهم.

ليس هذه فقط كل المعلومات التى أعلمها عن بلطجية العباسية ولكن الباقى مازلت اتحرى عن مدى صحته

مداخلتى مع ريم ماجد بخصوص شهادتى عن الاحداث فى الرابطين التاليين