Saturday 30 April 2011

شرف الاخوان زي عود الكبريت

هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش
احنا مش قلنا كخ كده كخ؟
حتندموا ندامة الكسعي لما غدت منه مطلقة النوار
فيه اخطار واضرار كخ كخ كخ
1- الاخوان عاملين زي النشافة، لما بيلزقوا في حد بيطبع عليهم ويبقوا شبهه، وفي الحالة دي الوسطية اللي بيتكلموا عنها، وهي مكسبهم الوحيد قصاد السلفية، حيخسروها
2- اذا لم يتماهى الاخوان مع السلفية الناس طبيعي حتروح للاكثر راديكالية عشان هي دي بقى الثورية والاخوان حيضطروا يزايدوا في الراديكالية عشان يكسبوا مقاعد في البرلمان، دلوقت السلفيين محتاجين عدد الاخوان، بس لو فضل الاخوان يدعموا الخطاب السلفي، في البرلمان السلفيين حيبقى لهم اليد العليا ويبقوا يقابلوني بقى ساعتها لو عرفوا يسيطروا عليهم، ويخرجوا من ذل مبارك يخشوا على ذل السلفيين، والسلفيين حيحسوا بالخطر من الاخوان فحيتغدوا بيهم قبل ما الاخوان يتعشوا بيهم
3- انتوا بتئذوا السلفيين كده، وبتدعموا الخطاب الاعلامي الناري ضدهم، السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن واهم راحوا يتهجموا على الكاتدرائية امبارح، ويقول لك احنا ما مارسناش عنف، مع ان فعل التظاهر قدام دار عبادة للترويع ده في حد ذاته عنف، واذا كانوا ما عندهمش تقدير سليم لما هو عنيف وما هو غير عنيف، يبقى التطور الطبيعي للحاجة الساقعة حيبقى خارج سيطرة الاخوان... انتوا ما بتتعلموش؟ مش كفاية اللي حصل مع الجهاد؟
4- وبتئذوا نفسكم كمان، دي اول تجربة لكم وانتوا مش محظورة، ولما الناس تشوفكم اول ما خرجتم من اطار المحظورة لاطار اللا محظورة بتتحالفوا مع ناس بتتظاهر قدام الكاتدرائية يبقى بتدعموا كل خطاب مبارك اللي كان ضدكم طول تلاتين سنة، واول حاجة الناس حيقولوها: اهم بانوا على حقيقتهم اهم.. لا وسطيين ولا نيلة
5- لون السلفية مش لايق عليكم.. السلفية بيليق عليها الوان تانية، وغالبا بيبقوا احسن لما بيبقوا لوحدهم كده، ادوهم للجيش واتحالفوا انتوا مع حد تبانوا جنبه انكم ناس طيبة ومتسامحة وكل المخاوف اللي كان بيبثها مبارك ضدكم طلعت كدب
ولما باقول ادوهم للجيش انا مش باهزر، هم لازم يتحركوا في اطار قيادة، وقيادة حكومي كده، غير كده عيارهم بيفلت، ولما عيارهم بيفلت بيجيبوا ضرف اللي هم متحالفين معاه قبل ما يجيبوا ضرف نفسهم
انتوا بتليقوا على اليساريين، بيخلوكوا تتكلموا في قضايا كويسة وقريبة من الناس، وبتقدموا خطاب مجتمعي كويس، واليساريين بيكسبوا ان قضيتهم بتتروج، وانتوا بتكسبوا ان شكلكم بيبقى حلو
اديني جبت لكم من الآخر اهو، وبمنتهى الوضوح والصراحة عشان انا ما احبلكمش الاذية
برضه كنتوا جدعان في الميدان
والله الموفق 

Friday 29 April 2011

تميم البرغوثي: مطلب صعب

مطلب صعب


تميم البرغوثي
نقلا عن الشروق


لا يصبر أحد على القتل، إلا من أراد الحرية فلا سبيل له سواه، ورغم ما جرى فى سوريا يوم الجمعة الماضى، لا يسعنا إلا التأكيد على السلمية المطلقة للمظاهرات لكى لا ننقل ليبيا إلى الشام.


إن كلاما كثيرا يدور فى واشنطن عن العالم العربى وتحديدا عن تعويض الولايات المتحدة خسارتها فى مصر بإطالة الحرب فى ليبيا واستحداث حرب أهلية فى سوريا. والهدف من الحرب الأهلية فى سوريا انحلال الحلف الذى كتبنا عنه مرارا والذى أصبح يضم كلا من إيران وتركيا والعراق وسوريا ولبنان ومصر وغزة.


إن حربا أهلية طائفية فى سوريا لا سمح الله ستؤدى إلى توتر إيرانى تركى حيث سيتحالف أحد أطراف الحرب مع تركيا ويبقى طرفها الآخر على حلفه مع إيران، كما ستؤدى إلى تأجيج التوترات الطائفية فى لبنان ما يضع ضغطا كبيرا على مقاومته النبيلة المنتصرة ويفقد العرب أنجح وسائلهم فى الضغط على إسرائيل.


ولا يوجد ما يمنع هذه الحرب أن تنتشر إلى العراق، حيث يعاد تفعيل التوتر الطائفى فيه فيجد الأمريكيون فى ذلك حجة للبقاء ويتأخر انسحابهم من هناك، فيخرج بذلك العراق من الحلف، وقد تصطف مصر الثورية مع من ترى فيهم ثوارا يشبهونها.


فتخرج كذلك منه. بتعبير آخر، إن السيطرة الأمريكية التى تكاد تكون احتلالا مباشرا والتى عانينا منها عقودا طويلة كادت أن نتنتهى إلى غير رجعة بانتصار المقاومة العراقية والمقاومة اللبنانية والثورة المصرية والديمقراطية التركية، والحرب الأهلية فى سوريا تهدد بعودة هذا الاحتلال وانشقاق الأمة.


ولا يمكن لأحد أن يطلب من الشعب السورى أن يتنازل عن حقه المشروع فى الحرية والديمقراطية حفاظا على هذا الحلف، بل يجب علينا أن نطالب الحكومة بالوقف الفورى للعنف ضد المتظاهرين، وقد كتبت سابقا وأكرر هنا.


إن كل رصاصة فى قلب متظاهر هى رصاصة فى ظهر مقاوم. وفى المقابل، ولدرء المخاوف من الحرب الأهلية فإن على من يطالبون بالحرية فى سوريا الالتزام الكامل بسلمية المظاهرات وأن يعلموا أن كل طلقة فى بر الشام تطلق على غير إسرائيل ولغرض غير حماية المقاومة، إنما هى طلقة إسرائيلية.


كما أرى خطرا عظيما فى أن ينشأ توتر بين المطالبين بحرية البلد فى سوريا والمقاتلين من أجل حريتنا جميعا فى لبنان. إن موقفا واضحا مؤيدا للمقاومة فى لبنان.


ومعاديا للولايات المتحدة وإسرائيل هو من ضرورات تحقيق المطالب الشعبية فى سوريا، ويسحب ورقة مهمة من أيدى خصومها.


ولا بد أن يصدر هذا الموقف الداعم للمقاومة حتى وإن لم يكن الود متبادلا بين طرفيه، فدعم القوم للمقاومة غير مشروط بدعمها لهم، إنما تُدعم المقاومة لأنها تقاتل إسرائيل فعلا لا قولا وتنتصر حقا لا خيالا، وتعيد أرضا وأسرى، وتبقى لبنان بعيدا عن حرب تقدر عليها وتنفر منها.


وتُدعم المقاومة أيضا لأن باراك أوباما ربط بين مصالح السوريين المشروعة فى الحرية والديمقراطية، وبين الانقضاض على ما أسماه هو بالإرهاب ويقصد به المقاومة. أعرف أن هناك تعديا صارخا فى أن يطلب أى أحد أى شيء من ناس يموتون بالعشرات كل جمعة لأنهم يريدون حقوقهم، ولكن سبق وطلبنا من الحكومة وقف القتل أو إيقافه، ولا يبدو أن مطلقى النار يسمعون، فبقى أن نطلب من الضحايا.


وهو مؤلم لنا ولهم، لكنه السبيل الوحيد لنجاح مطالبهم ومنع تحويل ما يجري، لا إلى حرب أهلية واحدة، بل إلى ثلاث حروب فى ثلاث دول.


لقد ذهب الليبيون إلى الثورة فى شرق البلاد قبل غربها، وفى الوقت الذى كان عليها فيه الانتقال من الشرق للغرب ارتكب القذافى من القتل ما أجبر الثوار على التسلح، فلما تسلحوا دخلنا فى الحرب الأهلية، وأتى الأجانب لا لإنهائها بل لضمان بقائها، فهم يرون الإخوان المسلمين فى جهة والقذافى فى الجهة الأخرى فلا دافع لهم أن ينصروا طرفا على آخر.


والدليل على ما أقول هو قضية السلاح الإسرائيلى الذى وصل إلى القذافي، فإن كانت إسرائيل تسلح القذافى والناتو يوفر الغطاء الجوى لخصومه، فنحن أمام سياسة احتواء مزدوج كتلك التى طبقها الغرب أيام الحرب العراقية الإيرانية: يسلحون الطرفين لإطالة الحرب وبقائهم فى المنطقة.


واليوم أكرر أنهم يريدون تكرار النموذج الليبى فى سوريا، والقتل الذريع الذى حصل يوم الجمعة جريمة فى حقنا جميعا وفى حق سوريا والسوريين ويدفع بالجميع إلى حافة الهاوية.


هذا الكلام يعلنه الأمريكيون فى الندوات وينشرونه فى أوراقهم البحثية وهو يملأ واشنطن أكثر من هوائها، وهم لا يخجلون منه.


فهل فى سوريا من يسمع؟ هل يسمع الضابط الذى يطلق النار على المتظاهرين؟ هل يسمع المواطن أن هذا القتل إنما يتعمد استفزازه ليتسلح فيقع فى الفخ؟ هل يسمع المواطن أيضا قلق جيرانه من فتنة طائفية لا تبقى ولا تذر إلا إسرائيل؟ سلمية الاحتجاج المطلقة وانحياز المحتجين المطلق للمقاومة مهما كان موقفها وموقف حلفائها مطلب صعب.


خاصة أننا نطلبه من ناس يموتون فى الشوارع ساعين إلى حقهم فى العيش الحر، ولكنه الضمانة الوحيدة للنجاح والضمانة الوحيدة لكى لا ينفك هذا الحلف المعادى لإسرائيل.


أما الحكومة، فالتسريع بسياسة الإصلاح والاستجابة غير المشروطة ولا المؤجلة لمطالب الناس العادلة يفيدها ولا يضرها ويقويها ولا يضعفها، ولا أرى فى تعدد الأحزاب والقضاء على بعض الفاسدين وإن علا شأنهم تهديدا لأمن سوريا القومي.


ولكن التهديد هو فى قتل الناس فى الشوراع. لا أعرف سوريا يعترض على السياسة الخارجية لبلاده إنما خلافهم على السياسة الداخلية، والحرية والديمقراطية حق لهم فلتتغير السياسة الداخلية وليحتفظ بالسياسة الخارجية رغم صعوبة ذلك الجمة، ولكن الشعوب دائما أعلى وأحكم، وضباط الأمن دائما على العكس من ذلك.

لقد نزل علينا الخبر كالصاعقة

تحديث:
يعني ايه الكلام ده؟ هي اليوم السائع الكدابة صحيح، لكن برضه نحب نفهم
ايه ايه ايه؟
في ايه؟
مش حنعرف نشوف اشغالنا بقى؟ انتوا بتعطلونا ليه؟
لسبب غير مفهوم مرتضى منصور خرج من السجن... ليه يعني؟ عشان ايه؟ يا ريت توضيح
وايه موضوع موقعة الجمل؟ انا مش فاهمة حصل فيه ايه بالظبط؟ 
وبثينة كامل تقعد مع اللواء اسماعيل عتمان يقوم يقولها الثوار كانوا بيقبضوا بالدولار؟ والبنات اللي اتكشف على عذريتهم كانوا بيناموا مع الشباب في الميدان؟ طب حتى مافيش جهاز مخابرات عدل يجيب له معلومات صح؟ مافيش كومن سنس؟ مين دول اللي كانوا بيقبضوا بالدولار ومن مين؟ ولما بيقبضوا ما اتقبضش عليهم ليه؟ ولا العشرين مليون دول كلهم كانوا بيقبضوا بالدولار؟ يالهوي... امال بيقولوا الاقتصاد واقع ليه لما الدولارات مالية البلد؟ وبعدين اللواء اسماعيل عتمان مش لما يتكلم يقول معلومات بناء على تحريات اجهزة؟ ولا بيتفرج على المحور؟ 
وبعد شوية بقى صفوت الشريف حيطلع ولا ايه؟ ولا مبارك هو اللي حيطلع؟ 
وايه السباعي واللي قاله امبارح ده؟ يسري فودة بيقول له الرئيس حالته مستقرة يقوم يقول له: نفسيته تعبانة؟ 
اففففففففففففففففف
ده وجع دماغ ده.. كل ما نهدا كده ونتفاءل ونبتدي نفوق لنفسنا تحصل حاجات تضايقنا؟ ماحدش يضايقنا بقى تاني
احنا حناخد دولارتنا، وبناتنا اللي بيناموا مع الشوباب، وننزل بقى يوم واحد مايو.. اما نشوف الحكاية دي
وخلينا بقى نحسن الظن.. هم ما بيحبوش الكسل.. عايزينا دايما ناشطين كده عشان ما نتخنش

Tuesday 26 April 2011

احب على رجلين السوريين.. بلاش تدخل دولي

عقوبات ايه بقى؟
انا مش عايزة عقوبات على بشار
ده خازوق مغري للثوار السوريين.. يوه.. نسيت، تميم قال لي كلميهم بالفصحى احسن بيفتكروكي بتتخانقي
طيب
هذا خازوقٌ سيثبت بالغراء ولن يخرج أبدا يا أهل الشام. أي نعم. آخر ما تحتاجه الثورة السورية هو التدخل الدولي ولو بكلمة دعم، وأكثر ما يحتاجه النظام السوري هو ذات التدخل الدولي بنفس كلمة الدعم. 
إذا كنا نسخر من تصريحات الديكتاتوريات العربية "مصر ليست تونس"، "ليبيا ليست تونس ومصر"، "اليمن ليست تونس ومصر وليبيا"، "البحرين ليست تونس ومصر وليبيا واليمن".. فنحن نواجه حقيقة واقعة قد لا تجد صدى عند البعض بسبب ابتذالها: سوريا ليست تونس ومصر والبحرين وليبيا واليمن. تختلف سوريا عن بقية الدول العربية في أنها تنتمي إلى معسكر الممانعة، وأن فزعا يتملك الأغلبية الصامتة، التي لام عليها الثوار، من الشقاق الطائفي. 
انا زهقت
ايه اللي انا باكتبه ده؟ طب انا حاكمل عادي ويبقى حد يترجم لكم بقى
بصريح العبارة كده، اهالي دمشق وحلب اللي انتوا نازلين فيهم شتيمة دول عندهم اسباب تخليهم يحجموا عن المشاركة
اولا: لأن المقاومة والاستقلال من ثوابت المجتمع السوري
ثانيا: لإنهم خايفين من شبح الطائفية
وبصراحة ناس عداها العيب وقزح.. حتفهموها دي؟ اقصد: لهم كل الحق في التمسك بثوابتهم والخشية على بلادهم من التمزق الطائفي.
جه بقى امريكا عايزة تحط صباعها في الليلة عشان تجيب ضرفها
اللي هو: التدخل الامريكي لا يصب في مصلحة الثوار بالمرة، بل على العكس... هو يخدم النظام السوري، ويزيد من شعبيته، ويحزم أمر المتردد ويجعله ينحاز لمعسكر النظام إلى غير رجعة. 
هارش؟ اللي هو: فهمت علي؟
انا عايزة افهم، الثوار السوريين ما بيمسكوش علم فلسطين ليه؟ مكلف العلم يعني؟ بكام ليرة يعني العلم الفلسطيني عشان مكسلين تشيلوه؟ 
الرجل يطرح نفسه بوصفه: الداعم للمقاومة، وحامي حمى بر الشام من التمزق والاحتلال، وهو خطاب يلقى صدى في نفس أي سوري وطني. 
ليه بقى انت يا كابتن ما تطرحش نفسك كالآتي:
ولو.. وأنا كمان مع الاستقلال وضد التدخل الأجنبي، وأنا كمان مع المقاومة، وأنا كمان ضد الطائفية... بس أنا سلمي وهو مسلح، أنا طالب حرية وهو قمعي.
خلاص.. خلصت الليلة كده.. اللي هو: قضي الأمر الذي فيه تستفتيان، ورجحت كفة الثوار. 
ماذا وإلا حيطربقها والله ويهرب فلوسه ويسافر قوامان
اللي هو: إذا لم يتمسك الثوار بالمبالغة في سلمية الثورة، والتأكيد على الثوابت الوطنية للمجتمع السوري والتي تحظى فيها المقاومة بالأولولية، ورفض اي تدخل أجنبي، ولو بكلمة دعم، ولو بفرض عقوبات، فإن الخيار الوحيد المطروح أمام الثوار هو العودة للمنازلهم فورا إن كانوا لا يرغبون في إشعال حرب أهلية في بلادهم.
والله الموفق. 
حد فهم من امي حاجة في الليلة دي؟

المركز المصري للحقوق الاقتصادية والاجتماعية يستقبل شكاوي العمال الفلسطينيين والسودانيين

رجاء النشر على اوسع نطاق، خدوا كوبي من عندي وانشروها على مدوناتكم:

قام المركز المصري للحقوق الاقتصادية والاجتماعية
ecesr.com
بمقابلة وزير القوى العاملة احمد البرعي, بناء ع شكاوي عديدة وصلت للمركز عن ظروف عمل مجحفه لاشقاء فلسطينيين وسودانيين, وقد تعهد السيد احمد البرعي, بحل كل تلك المشكلات.
وعليه يتقدم المركز لكل الاشقاء الذين لديهم مشاكل خاصة بظروف العمل التقدم بشكاوي مكتوبه له لحلها.
عنوان المركز
1ش سوق التوفيقية وسط البلد الدور الرابع القاهرة

ما تقسوش على الناس اللي متعاطفة بشار

في موضوع سوريا ده، الموضوع مش ابيض واسود لاسباب كتير
يعني مثلا انا عرفت ان غسان بن جدو استقال من الجزيرة، وغسان بن جدو راجل شريف مائة بالمائة، بس هو مصدق الرواية السورية الرسمية للاحداث
مش لازم في الموضوع ده اللي ما يساندش الثوار يبقى شخص مش نضيف، بس ممكن يبقى شخص طيب زيادة، غسان مثلا ضحى بأكل عيشه، واحتمال كبير ما يلاقيش في التوقيت ده مكان يشتغل فيه، لأن كل القنوات الفضائية اللي ينفع غسان يشتغل فيها بتغطي سوريا ومش بتغطي البحرين.. وش كده، وهو استقال عشان عدم تغطية البحرين، وعشان هو بيقول ان التغطية لما يحدث في سوريا اثارية ومش جايبة وجهتين النظر
الكلام ده ممكن يبقى مزعج لحد زيي مثلا، بس انا مش حاتهم غسان في ذمته ابدا، لأسباب كتير، أولا لإن ذمته نضيفة فعلا، ووطني فعلا، ثانيا لأن اساسا معسكر الممانعة دول مش معاهم فلوس يشتروا بيها ذمم، دول هم دولتين تحت الحصار، وحركة تحت الحصار، وحزب بيعمل ماجات ودبابيس عشان يلاقي يصرف على نفسه لو اي حد من حلفائه خلي بيه، ولو معاهم فلوس كانوا اشتروا ذمم وخلصوا من زمان، واللي حيقول لي لا معاهم فلوس وبيشتروا ناس حاقول له حضرتك كحيان وما شفتش يعني ايه فلوس يا جعان، جرب كده تشتغل مع السعودية ولا مع امريكا وهم ينغنغوك، امال يعني الفرقة اللي بتشتغل مع السعودية كبيرة والفرقة اللي بتشتغل معاهم هم عددها قليل ليه؟ 
وانا مش فاهمة ليه فيه ناس كتير من المتعاطفين مع معسكر الممانعة مصدقين رواية الاعلام السوري مع انها مش معقولة ابدا
وناس انا باثق فيهم عمالين يبعتوا لي ميلات يقولوا لي ما تنسيش ان بشار عمل اكتفاء ذاتي من القمح، وعمل تطوير للصناعة، وساند المقاومة، وعمل وعمل
طب يا جماعة استنوا خمسين سنة عشان تقولوا الكلام ده لو سمحتوا، ما ينفعش الكلام ده تقولوه وفيه ناس بتموت، وما يصحش تقولوا لي عدد القتلى 400 بس! استنوا خمسين سنة، التاريخ لسبب ما لا يعبأ بالدم، ولا يعبأ بالقهر، ولا يعبأ بالظلم، ولا يعبأ بواحدة زي طل الملوحي، بعد خمسين سنة حيقولوا على بشار اللي بيقال على محمد علي وعبد الناصر، عشان هو فعلا عمل كل اللي قلتوه ده واكتر، بس دلوقت ما تضغطوش على اعصاب الناس، واعصابي انا بالتحديد وتقولوا لنا الكلام ده، وما ينفعش كمان تطلبوا من ناس خرجت تطلب حرية ارجعوا بيوتكم عشان ده عمل اكتفاء ذاتي من القمح والمحاصيل الاستراتيجية وطور الصناعة السورية، طيب دول بني ادمين اللي خرجوا دول، مش مشنة قمح، ولا مكنة في مصنع، دول بني ادمين، ومقهورين، وزهقانين، ومظلومين، واتقتلوا، و400 في خمس اسابيع مش شوية، و4 يتقتلوا مش شوية، ودم البني ادمين غالي، اغلى من ستميت مصنع، والف غيط قمح، وعشر حروب ينتصر فيها على اسرائيل، وانا ماليش دعوة بإن فيه ناس من مأجورين السعودية وامريكا سخنانين على الثورة في سوريا، انا مالي؟ انا ضميري ما يسمحليش اشوف ناس بتتقتل واسكت، وما ينفعش تربط الولاء الوطني بشخص، وكأن الشعب السوري في اساسه خاين وبشار هو اللي حايشه عنا، وبعدين، طب ما يسيب للناس نفس يتنفسوه يعني، كابس على انفاسهم لما انفجروا فيه ليه؟ ما يخليهم يتكلموا زي ما الناس بتتكلم، ويفرج عن المعتقلين ويسيبهم يعيشوا، ويعمل اصلاحات سياسية، هو بيربي مواشي في زريبة عشان يقولهم مالكوش عندي غير الاكل والشرب والحماية؟ بيخوفهم ليه؟ انت لو قابلت سوري في الدنمارك وقلت له: ايه حكاية المظاهرات في سوريا، حيسيبك ويمشي من كتر الرعب... طب ليه بيعمل كده يعني؟ ايه المبرر لده؟ وحزب البعث ده الحزب النازي العربي، والناس بتقعد تدافع عشان خايفة لبعدين اللي مراقبها يروح يقول ان الزعيم اتشتم وهي سكتت، وكل واحد مراقب التاني، واخرتها يموتهم ويدخل لهم الدبابات؟ وانتوا مصدقين ان الثوار مسلحين؟ وبعدين الاعلام السوري بيقول الثوار مسلحين وبيطخوا على الجيش والشرطة
طيب ماشي
مسلحين وبيطخوا على الجيش والشرطة، ويروحوا جايبين لك فيديو بتاع نضال ده، مسكوه بيقولك سحلوه وبعد ما ضربوه دبحوه بالسكينة.. الله! وليه المجهود ده كله في شخص واحد؟ هم مش برضه مسلحين ومعاهم قناصة وسلاح جايبينه من - قال ايه -  سعد الحريري.. سعد الحريري التافه ده بيعرف يسلح حد؟ طيب يا سيدي، سعد الحريري التافه بيعرف يسلح حد، بس حتى الفيديو ده اللي جايبه التلفزيون السوري نفسه ما شفتش فيه سلاح، وبعدين هو باين فيه حاجة؟ واحد مضروب لما معدوم العافية، وكل دول ملمومين حواليه، كل الشعب ده ملموم عشان يقتل واحد؟ ومسلحين؟ دول لو كان معاهم طوبة كبيرة شوية كانوا خلصوا بدل الهلولة دي
افففففففففففففف
الموقف تراجيدي فعلا
تراجيدي لإن اللي واخدين موقف متعاطف مع بشار مش ناس مأجورة، بس زي ما يكونوا كده سلموا مخهم لنظرية المؤامرة لابعد الحدود، وزي ما يكونوا مش عارفين ما يصدقوش الاعلام السوري اللي كدبه مفضوح لإن لسان حالهم: طب يعني هو معقولة واحد بيطور الصناعة والزراعة ويساند المقاومة يكدب؟ 
اه معقولة على فكرة يكدب... واساسا القمع والقهر اللي هو فارضه على الناس ده مالوش اي مبرر، وحبس عيلة عندها 19 سنة خمس سنين حبس عسكري بتهمة الخيانة العظمى مالوش مبرر، والطخ على الناس مالوش مبرر، و400 قتيل مالوش مبرر، ومافيش حاجة تشفع لده كله، حياة الانسان اغلى من اي حاجة
وفيه من اللي واخدين موقف مساند للثورة مغرضين ويا اما طائفيين ومرضى بالفاشية ضد الشيعة، يا اما هم اصلا من القبيضة فعلا بقى، لإن السعودية وامريكا بيعكموا كويس، وعندهم امل ان بشار يتشال وييجي مكانه حد زي السادات كده يبيع لهم سوريا، او عندهم امل ان سوريا تبقى زي ليبيا وتقلب حرب اهلية
ومش شرط ابدا املهم يتحقق، لإن اولا ربنا موجود، ثانيا القياد في ايد الثوار ويقدروا يسيطروا على الموقف، ثالثا، السوريين وطنيين فعلا، عشان تلاقي واحد عميل امريكاني وسطهم، حياكلوه اكل وهو واقف كده
والخلاصة بالنسبة لي، انا ماليش دعوة مين واخد موقف مع مين ومين مع ايه؟ انا ليا دعوة بالحق
الانسان من حقه يعيش حر، ومن حقه انه لا يقمع، ولا يقهر، ومش يتجبر انه يعلق صورة الزعيم، ويبقى عايش حياته خايف يتكلم، واخوه بيكتب فيه تقارير وهو بيكتب تقارير في اخوه، ولما الناس تخرج وتقول زهقنا، من حقهم يخرجوا ويقولوا زهقنا، وماحدش يطخ عليهم، وماحدش يخوفهم، ولا يموتهم، وماحدش فوق ده كله يتهمهم بالعمالة، والطرف الاقوى هو اللي يلام
وممكن تبقى مشكلة تلخبط الناس لما يبقى المختلف عليه واحد زي بشار مش زي مبارك، حيث ان مبارك لا بنى دولة، ولا احترم انسان، لكن بشار بنى دولة، لكنه ما احترمش الانسان
وانا ما اعرفش ليه فيه ناس حاسة ان الاولوية مش للانسان؟ ليه يعني؟ طظ في الدولة على فكرة، انشالله يبقوا عايشين في خيم يا اخي بس في امان وكرامة وما يخافوش من حد، حتعمل ايه بانسان مرعوب ومش قادر ينطق ولا يتنفس؟ مالوش قيمة الانسان ده، مالوش اي قيمة خالص.. واللي يكسر حاجز الخوف تحت حكم قمعي بالشكل ده مالوش عندي غير الاحترام والمساندة، واللي يقف يقابل الرصاص بالطريقة دي يبقى شهيد... ايا كانت تبعات تحركاته، وايا كانت الجهات اللي حتشمت واسبابها.. الانسان له الاولولية
قضي الامر الذي فيه تستفتيان

Monday 25 April 2011

قضية عمر سليمان

وصلنا الميل ده
بخصوص الشاب محمد عبد الهادي هذا ليس لديه مشكلة في رفع قضية على المخابرات المصرية حيث أنه سجن لديهم ما يقارب 6 شهور ثم تم تحويله لأمن الدولة
بخصوص الشباب المفقوديين فهم كالتالي :
الرقم
الاسم
الحكم
مدة الحبس الفعلي
التهمة
السجن
1.           
علاء محمد محمود المنسي
بلا حكم
3 سنوات ونصف
سياسي
لا يعرف مكانه
2.           
عبد الرحمن محمد سلامة النجار
بلا حكم
3 سنوات ونصف
سياسي
لا يعرف مكانه
3.           
لؤي زكي الاغواني
بلا حكم
4 سنوات
سياسي
لا يعرف مكانه
4.           
حمدي زكي ابراهيم الفسيس
بلا حكم
4 سنوات
سياسي
لا يعرف مكانه
5.           
محمد محمود عبد الرحمن حماد
بلا حكم
3 سنوات
سياسي
لا يعرف مكانه
6.           
حسن زكي محمد حنيف
بلا حكم
4 سنوات
سياسي
لا يعرف مكانه

 هؤلاء تم إعتقالهم على يد السلطات المصرية داخل سيناء ومن ثم إختفت أثارهم
ولقد تم البحث عنهم في جميع سجون أمن الدولة والسجون المركزية ولكنم يعثر لهم على أثر لذا نرجو التعاون في سبيل إثارة قضيتهم
بالاضافة أننا نود رفع قضايا على امن الدولة بسبب التعذيب الشديد الذي مورس ضد أبنائنا في السجون
وكذلك لرفع أسماء من تم الافراج عنهم من القائمة السوداء الممنوعين من دخول مصر
إن أمكن التعاون في هذا المجال فنكون مشكورين لكم لذلك

ودي رسالة من تونس.. يادين النبي

انا كنت قلت الشعوب العربية لازم تنسق مع بعض ونعمل جامعة الشعوب العربية بدل جامعة الدول العربية
اول تنسيق نعمله ان ماحدش يقوم بثورة قبل ما زميله يخلص ثورته بقى.. احنا كده مش حنلاحق، وبعدين احنا ثوراتنا فيها غباوات وقتل وقرف، فعلى الاقل بقى كل واحد يهدا كده وقبل ما يعمل الثورة بتاعته يستأذن زمايله احسن يكون فيهم حد مش مستعد
تونس الظرف فيها صعب
واحنا اعتبرنا ان الثورة بتاعتهم نجحت وانشغلنا في بقية القتلا اللي عندنا دول
ودي رسالة من تونس:
طيب
انتوا قريتوا البوست
اقروه كويس
احب بقى اقول للاخ التونسي، اننا لازم ننسق مع بعض فعلا، لإن عندنا مشاكل كتير من اللي هو حاططها، بس الشهادة لله احنا فعلا مشاكلنا اقل
يعني مثلا احنا بنحاكم مبارك وشلته
بس ديول مبارك اكبر مما يتخيل الاخ التونسي
اقصد قصاد ما احنا حاكمنا مبارك هم ما عندهمش مظاهرة اسفين يا ريس مثلا، ودول هم الصراصير اللي لو مبارك اتحاكم حيجيبهم شاءوا ام ابوا
بالنسبة لان رئيس الجمهورية هو رئيس مجلس الشعب السابق عندهم، وهو ما يوازي فتحي سرور عندنا، وهو زي فتحي السرور قلبا وقالبا، يعني مش مجرد بيشغل نفس وظيفته، لكن مكانه السجن هو كمان زي فتحي سرور
فاحنا فعلا وضعنا احسن، ايا كان اللي بيتلووا على المجلس العسكري، فهم الشهادة لله ناس عوجة يعني، بصرف النظر عن الشرطة العسكرية، لان دي حتبقى في نقطة تانية هو اتكلم فيها، بس اللي اقصده ان المجلس العسكري هو سلطة الجيش اللي تبقى موجودة في اي بلد المفروض انها بلد حرب، وهو جاب لنا حكومة عصام شرف، وانا شخصيا مبسوطة جدا من الحكومة دي، ومرتاحة لأدائها، وباحب عصام شرف، وانا بصراحة سمعت السبسي وهو بيتكلم وشتمته على التويتر لما اتكلم وبعدين واحدة تونسية كبستني وقالت لي لا هو كويس، فسكت بقى، مافيش داعي امرر عليها عيشتها مدام بتحبه
بس انا ما عجبنيش خالص
بس احنا كمان عندنا جدل العلمانية والاسلامية ده ومتجاهلين استحقاقات الثورة
يعني مثلا عندنا نجيب ساويرس عمل حزب، مع ان الثورة دي قامت ضد سيطرة رجال الاعمال على الحكم، والناس كلها مش بتتكلم في النقطة دي، الناس كلها بتتكلم ان النزاع علماني ولا اسلامي، واحنا خايفين جدا من البرلمان، لإن الصراع ده معناه ان حقوق الفقرا حتضيع، يعني لا ساويرس ولا الاسلاميين حيتكلموا عن الضريبة التصاعدية ولا عن منع الاستثمار في مجال التعليم والصحة ولا عن حقوق العمال والفلاحين - ساويريس عايز يلغي العمال والفلاحين، ولو يطول يعمل عبودية جديدة مش حيقول لا - ولا عن الحد الادنى والاقصى للاجور
الاسلاميين حيتكلموا عن المادة التانية 
وساويرس حيعيد سيطرة رجال الاعمال على نظام الحكم وكأنك يابو زيد ما غزيت
- ييجي واحد يقول لي ابوكي دخل الحزب بتاعه اقوله وانا مالي؟ اتصلوا بيه وطلعوه من الحزب ده، انا شخصيا اتخانقت معاه - 
انتوا مثلا ما عندكوش فتن طائفية، احنا كل شوية الفتن الطائفية تطلع لنا من تحت طقاطيق الارض
بالنسبة للحزب الوطني، هو فعلا اتحل، بس بتوع الحزب الوطني لسه شغالين، زي عندكم بالظبط
ايه العمل؟
انا شايفة اننا ننسق مع بعض ودي احسن حاجة
احنا حتى الحكومة بتاعتنا اللي احنا بنحبها قاعد فيها يحيى الجمل الطود الراسخ بلا اي مناسبة، وده راجل بتاع السادات ومبارك مش بس بتاع مبارك
بالنسبة للقمع.. احنا عندنا شرطة عسكرية كمان وبيضربوا الاعتصامات وبيفضوها وبيضربوا نار في الهوا كمان.. انتوا مش عارفين ولا ايه؟
نعمل ايه بقى؟
عموما احنا لازم نشتغل مع بعض، اقصد ان مصر وتونس عندهم مشاكل متشابهة، وعندنا استحقاقات واحدة كمان، محتاجين زي ما اجهزة الاستخبارات الاستبدادية كده بتنسق مع بعضها وترفع لنا علم السعودية في قنا، محتاجين بقى احنا في مصر وتونس اننا ننسق مع بعض ونشتغل مع بعض ونشوف اوجه التشابه والاختلاف وازاي نقدر نتغلب عليها
يعني مثلا عايزين نعرف انتوا ليه ما عندكوش ناس بيقولوا لكم كفاية او بيقولوا اسفين يا ريس
انا مش حاقدر انكر ان الوضع في مصر احسن من الوضع في تونس من حيث التطهير والتنضيف والتخلص من رموز النظام السابق ومحاكمة الرئيس وكمان ان اللي ماسك المجلس العسكري اللي هو متعاطف مع الثورة مش متدبس فيها، وحكومة الثورة بتاعة عصام شرف وهو كان بايت معانا في الميدان
لكن من حيث التجانس المجتمعي ومن حيث النشاط والوحدة انتوا احسن منا 
بالنسبة للاعلام، احنا الاتنين زي بعض، وبالنسبة للفصائل السياسة انا شايفة انكم احسن منا، على الاقل ما عندكوش ساويرس، كمان الاسلاميين اللي عندكم احسن بكتير من الاسلاميين اللي عندنا، اقصد مخهم نور عن اللي عندنا، اكيد مش بيتخانقوا على كاميليا شحاتة يعني
يبقى مافيش غير اننا نستفيد من خبرات بعض ونساعد بعض بقى، عشان احنا كمان محتاجين مشورتكم في حاجات كتير
بس شوية كده
اصل احنا وانتوا بصراحة دمنا حيبقى سم قوي لما نتكلم الكلام ده وفيه ناس بتموت في بقية الدول العربية
يعني مثلا احنا مش عارفين نعمل اي حاجة لليبيا، ده ليبيا طالع عينها يا عيني
غير سوريا، وغير البحرين دي اللي قاعدين على صدرها وكاتمين على نفسها عشان اللي بيموتوا شيعة فحلال حلال حلال... اليمن دلوقت بقت احسن وضع في وسط التانيين مع ان كل يوم يموت منهم حبة حلوين
ملحوظة: انتوا فاهميني؟ اقصد التوانسة فاهمين اللهجة؟ اصل السوريين مش فاهميني وانا استغربت قوي وتميم البرغوثي قال لي دول بيزعلوا منك عشان فاكرينك بتتخانقي وانا عمال اقولهم مش بتتخانق هي اللهجة شكلها كده
والله ما باتخانق ايها الاخوة في سوريا.. تقبروني ولاد عمي 
:)