Monday 28 February 2011

النائب العام يمنع مبارك وعائلته من السفر :))))))))

:)
عشان شجرة الدر تبقى تيجي هي وابنها وتقول انا مش خايفة وابنها يقول حارفع عليكم قضايا
طب ما انس الفقي اللي اتصل وبجح اتحبس، والعادلي اللي قال ولا حصل لي اي حاجة بيتحاكم بتهم القتل، وشجر الدر وتوران شاه - اللي بالمناسبة يذكر في التاريخ انه كان اهبل والظاهر ده سلسال - اتمنعوا من السفر واتجمدت ارصدتهم اهو
امال كنتوا بتطولوا لسانكم علينا ليه سيبتوا مفاصلنا وخليتوا هيكل يقول لنا بؤرة وبتاع لما كركب لنا مصارينا
والحصر المبدئي لثرواتنا اللي عند المسئولين المصريين نص ترليون.. رزقنا.. رزقنا... صبرتي ونولتي يا مصر، كانوا بيحوشوا لنا الفلوس
ميرسي ليكم كتير على ذوقكم
كده بقى نزرع الصحرا كلها، ونزرع قمح، ونزرع قطن تاني، ونعمل صناعات بقى، ونسلح الجيش بفلوسنا، لأن اساسا الجيش ما بياخدش معونة امريكية فعليا، بياخد المعونة يشتري بيها اسلحة من امريكا، ونعمل ري بالتنقيط، ونعمل كل اللي نفسنا فيه
يا رب.. والنبي يا رب

عاجل: ائتلاف شباب ثورة الغضب يتقدم بجدول زمني بالمطالب للمجلس الاعلى للقوات المسلحة



قبل ايييي حااااجة.. البيان ده لازم يتقري في الجزيرة والعربية والحرة والبي بي سي والسي ان ان وينزل في وكالات رويترز
فورا فورا فورا، البيان مش حيبقى له قيمة لو ما اتنشرش في كل حتة ووصل لكل ابناء الشعب المصري فورا عشان يبقى عدانا العيب قدام الناس اللي عمالة تنأرزنا في الرايحة والجاية دي
ما اعرفش يعملوا ايه، بس يتصلوا بالجزيرة ويوزعوا البيان ده بسرعة، لان ده اللي حيساعدنا على الحشد ليوم الجمعة ان شاء الله
شكرا شكرا شكرا شكرا شكرا شكرا يا ائتلاف شباب ثورة الغضب
شكرا.. شكرا.. ربنا ما يغلب لكم ولية ولا يفشل لكم ثورة ولا يضرب لكم معتصم قادر يا كريم
يا رب... انت كريم يا رب
اليكم البيان:

بناء علي لقاء مجموعة من الائتلاف بالمجلس الأعلى للقوات المسلحة اليوم نرجو أن يرد علينا المجلس بتحديد جدول زمني في تنفيذ أول ثلاث مطالب خلال يومين.


1 إقالة حكومة الفريق أحمد شفيق، وإعادة تشكيل حكومة تكنوقراط من غير الحزبيين، يترأسها شخصية وطنية متوافق عليها، في حد أقصاه شهر من الآن.


2 الإفراج عن كافة المعتقلين السياسيين، قبل وبعد 25 يناير، في مدي زمني أقصاه شهر من الآن، والنظر في العفو عن المسجونين السياسيين في غضون شهرين من الآن.


3 تقديم كل المسئولين الحقيقيين عن قتل الشهداء بإطلاق النار، أو بإصدار الأوامر للمحاكمة العادلة، بتهم واضحة، في أمر أقصاه شهر من الآن.


في حالة عدم تحديد جدول زمني للاستجابة للمطالب المذكورة أعلاه سوف يتوقف الائتلاف عن التفاوض ويعمل مع جموع ثوار مصر علي الضغط من أجل تحقيقها كي يثبت أن هذه هي مطالب جموع المصريين الذين اعتصموا في التحرير وسائر مدن مصر ولم يرحلوا الا عندما اعتقدوا أنها قيد التحقق
في حالة موافقة المجلس علي مطالب الثورة المصرية سننتقل الي التفاوض في بقية المطالب المتمثلة في التالي:


4 إعادة هيكلة وزارة الداخلية، بما يسمح بالإشراف القضائي الكامل عليها، والمراقبة الشعبية الحقيقية على أدائها، على أن يتولى رئاستها وزير مدني سياسي، في غضون الستة أشهر المحددة للفترة الانتقالية.


5 حل جهاز مباحث أمن الدولة في مدي زمني شهرين من الآن، وإلغاء توجيه المجندين لقطاع الأمن المركزي في غضون الستة أشهر المحددة للفترة الانتقالية.


6 الإسراع في تشكيل مجلس رئاسي مدني يضم شخصية عسكرية في مدي زمني شهرين من الآن ، مع تحديد صلاحيات المجلس ، ويتولي بنفسه مع الحكومة الانتقالية الإشراف علي تحقيق المطالب الثورية وإجراء الانتخابات التشريعية والرئاسية .


7 تقديم موعد انتخابات المحليات في حد أقصاه الستة شهور المحددة للفترة الانتقالية، وإعادة النظر في قانون الحكم المحلي .


8 ملاحقة بقايا النظام من الفاسدين ، والمتربحين من دماء هذا الشعب ، وتقديمهم للمحاكمة العادلة ، ومصادرة أموالهم وممتلكاتهم .


9 الشكر والتقدير للجنة التي تم تشكيلها لتعديل الدستور برئاسة المستشار طارق البشري علي المجهود القيم الذي قامت به ، ونؤكد علي أننا في سبيل إعداد ورقة دستورية وقانونية للمشاركة بها في الحوار المجتمعي الدائر حول التعديلات والقوانين المكملة لها ، ولكننا نطالب المجلس العسكري بمطالبة اللجنة بإضافة قانون الأحزاب إلي القوانين المكملة للدستور والتي تعتزم اللجنة تعديلها أو تغييرها .


بيان ائتلاف شباب الثورة
27 فبراير


وهنا لنك البيان


انا باحبكم قوي.. باحبكم قوي يا ائتلاف شباب ثورة الغضب.. متشكرة متشكرة، يا رب المجلس يرد في خلال يومين ان شاء الله 
بس اهم حااااجة، خصيمكم النبي ياللي بتدخلوا على المدونة ولكم صلات بوكالات انباء او قنوات فضائية لتنشروا البيان ده في كل حتة وعلى حبل الغسيل، ولو تقدروا توصلوا للتلفزيون المصري يبقى كتر خيركم
وبالنسبة للجزيرة زياد العليمي يقدر يتصل بيهم دلوقت حالا ويبلغهم بالبيان ويقراه عليهم
بادبسه اهو
-------
بالنسبة للي في التحرير الحمد لله الجيش سابهم يباتوا وما ضربهمش المرة دي

Sunday 27 February 2011

اللواءات بيقولوا للي في التحرير يروحوا، وانا باقول يروحوا برضه

تحديث للتذكير:
لو تذكروا المقابلة مع هشام البسطويسي لما قال ان الثورة المضادة بتعمل على ان ناس تعمل اعتصامات ومظاهرات باعداد قليلة لا تكسب الشارع، وتفضل الاعداد تتناقص لحد ما يرجعوا 200 واحد على سلم النقابة وبعدين مبارك ينزل مظاهرة مليونية ترجعه او تجيب ابنه... وقال ان النزول يوم الثلاثاء اللي كان العدد فيه 10 الاف كان غلط.. وقال لنا: ما تتكررش تاني، ركزوا على الحشد ليوم الجمعة بس، وده ضاغط كافي، النزول للتحرير في وسط الاسبوع بيستعدي الناس
---------------
اللي بيحصل ده خصم من يوم الجمعة
والحقيقة اننا كان لازم يوم الجمعة لما نزل نص العدد بتاع جمعة القرضاوي نحترز ونعرف اننا نقدم الجدول الزمني وما ننزلش الا بعد انتهاء الجدول الزمني
انما المرواح والمجي على التحرير باعداد، عشرتلاف، وبعدين خمستلاف، وبعدين دلوقت بتاع الفين واحد في التحرير، احنا كده بنخسر، وبنخسر الشارع قبل اي حاجة
حاطط وشك في وش الجيش وحكومة شفيق ومدي ضهرك للشارع كالعادة زي ما المعارضة بتعمل طول عمرها
طول عمر المعارضة حاطة وشها للنظام، والنظام حاطط وشه لامريكا وامريكا باصة لاسرائيل وواقفين عاملين طابور والناس وراهم 
بصة مبارك لامريكا خسرته كرسيه
وبصة المعارضة للجيش والشفيق حتخسرها الشارع اللي هو اساسا عمل الثورة دي
ارجعوا، مش حنعرف نحشد ليوم الجمعة كده، وكل يوم بننزل فيه من غير اذن الناس، اللي هم اهم من الجيش ومن شفيق ومن اي حد، كل ما بنخسر اكتر، وبناكل من العدد اللي جاي يوم الجمعة
الجيش ضربنا فجر 26 والناس انحازت للجيش، لاسباب عديدة:
1- فيه علاقة حب بين الجيش والشعب فعلا، الشعب بيحب الجيش، وبيهابه، وحيكرهنا لو حس اننا بنورطه في تصرفات تهز صورته في عينه، مش حيكره الجيش، ماحدش بيكره جيشه، والمصريين بالتحديد مش حيكرهوا جيشهم مهما عمل، حيكرهوا اللي اضطر جيشهم - من وجهة نظرهم - انه يعمل تصرف يتنافى مع عشمهم فيه
2- اننا في اليوم ده اعتصمنا من غير اذن الناس، ولو كان الناس اذنت لنا كانت باتت معانا
قبل ما تستأذن اللواءات، وقبل ما تستأذن اللي معاك، استأذن الناس، الناس ما اذنتش يبقى ما تكملش، رحت لقيت العدد قليل روح، الناس كده مش عايزة، ومدام مش عايزة تبقى مش عايزة
وكل ما بتشيل الناس منك كل ما بتخليهم ما ينضموش لك في اي حاجة، ما تجبرش الناس انها تنحاز انحيازات حتضرك وتضرهم
البيات يوم 25 اكل من رصيدنا
خلاص.. خلاص.. نفهم بقى؟ رحت تاني يوم ولقيت العدد قليل ولقيت الناس مش منفعلة معاك، بل ومتغاظة منك.. خلاص
خلاص انت كده بتخسرهم
يعني تخسر الجيش وتخسر الناس، وتكسب ايه؟ تكسب هبلك
مش مهم تكسب الجيش، المهم تكسب الناس
الناس نوعين، نوع بني اسرائيل ده، يولعوا بجاز وسخ
واغلبية نزلت معاك واتبهدلت واتقتلت واتعورت وبتقول لك مش عايزة انزل.. يبقى خلاص، هم ادرى، وبوصلتهم احسن، بدل ما تقعد تتكلم عليهم بشكل نخبوي وتقول جايين يطبلوا ويغنوا، جايين ياكلوا حمص الشام، اتنيل على عينك واسمع كلامهم
وامشي وراهم مش تمشيهم وراك، مشيك وراهم هو اللي نجح الثورة 
انا شخصيا شايفة ان يوم الجمعة مش حيبقى ناجح ولا حاجة، ولو اني نازلة، انا بانزل حتى في الحاجات اللي مش موافقة عليها عشان الواجب بس، للمؤشرات الاتية:
1- يوم الجمعة اللي فات العدد كان مليون بس تقريبا، الجمعة اللي قبلها كانت خمسة مليون، يبقى الجمعة الجاية حتتناقص
2- ضرب الجيش للمعتصمين قلل من رصيد المعتصمين مش الجيش، وشيل الناس منا
3- الناس مش شايفة سبب قوي للنزول
لذلك، كنت افضل الجدول الزمني والاعلان اننا مش حننزل لمدة تلات جمع، وحنستنى انتهاء الجدول الزمني
لكن اذا كنا حنحشد ليوم الجمعة، يبقى تأكدوا، تأكدوا، تأكدوا، ان كل يوم بننزل فيه باعداد قليلة وسط الاسبوع بيسحب اضعافه من العدد اللي جاي يوم الجمعة
الادعاء بان يوم الجمعة مش مؤثر دي هلاوس سمعية وبصرية
يوم الجمعة بيبث مباشر للقيادات العسكرية وبيسمعوا فيه بالظبط الهتافات والطلبات ايه، ويوم الجمعة ضاغط، والعدد ضاغط، واهم حاجة بالنسبة لهم العدد، لو العدد كبير حيعرفوا ان دي رغبة الناس
ودي مثلا احد الاسباب  اللي خلت بعض ظباط الجيش يقووا قلبهم ويضربونا، ان عددنا كان قليل، احنا بالنسبة لهم مش الشعب اللي ما يهونش عليهم يضربوه، احنا ناس مندسة عايزة تعطل البلد، نستاهل الضرب، دي طريقة تفكير الجيش، ودي طريقة تفكير ناس كتير.. والمفروض ان شكوانا من اننا انضربنا اليوم ده نحاول نصالح الناس فيها باننا نؤكد ان عمرنا ما حنمد ايدنا على الجيش واننا لسه بنحترم الجيش وان ده ما كانش العشم ابدا واننا متأكدين ان القيادات ما ادتش اوامر، وان فيه فعلا مندسين عشان يوقعوا بين الشعب والجيش
وده تطييب لخاطر الناس اللي بتحب الجيش.. مش مفروض انك تتجاوز مع الجيش حتى وانت بتشتكي من سوء معاملته كرامة لعيون الشعب اللي فعلا بيحبه
والله عايز تتخانق.. اتخانق، بس شوف الخناقة حتكسبك ايه؟
عايز ترجع لعقلك وتمشي ورا وجدان الشارع يبقى اللي في التحرير دلوقت يرجعوا مدام الجيش قال لهم ارجعوا، وما ينزلوش تاني لحد يوم الجمعة، ولو فيه وسيلة لتقديم جدول زمني والغاء يوم الجمعة يبقى ياريت
ياريت
ياريت
ابوس ايدكم يعني
ولازم ترجع الهيبة للجيش، مش مجاملة للجيش، مجاملة للشعب اللي فعلا بيحب الجيش، ومن زمان وهو بيحبه، ومش بيقبل عليه اهانة، وفي اي خناقة حينحاز له، حتى لو كان هو اللي غلطان، وكبيرة عنده قوي ان الجيش يعتذر، وانا شخصيا متأكدة ان فعلا القيادات ما ادتش الاوامر دي، بس حتى الظباط الصغيرين عشان يوصل له احساس اننا نستاهل الضرب، يبقى ده احساس مصريين كتير، ماهم الجيش والشعب ايد واحدة فعلا، لان الجيش من الشعب، دول مش مؤسسة معزولة زي الشرطة، دول شعب
سايس حصانك
عارفة ان الكلام ده مش حيعجب ناس كتير
وعارفة اني اساسا ماحدش بيسمع كلامي لاني واحدة ست
بس انا باخلص ضميري
الا هل بلغت؟ اللهم فاشهد

ايه ده بقى؟

تحديث:
وبعدين بقى في اليوم المدوحس اللي مش عايز يعدي ده
اتفضلوا
الفيديو ده لازم يروح للمشير نفسه




ما اعرفش ازاي ممكن يوصل للمشير، بس اي حد له اتصال بالجيش لازم يوصل الفيديو ده للمشير، حتى لو دول بلطجية، حتى لو دول قتالين قتلا.. الجيش المصري بيعامل الناس كده من امتى؟ ده الجيش المصري ما عذبش الاسرى الاسرائيليين وعاملهم احسن معاملة في تلاتة وسبعين.. دول ما يشبهوش الاسرى الاسرائيليين؟
تحديث:
وده من بورسعيد
-----------
وكما تساءل علاء سيف: وايه اللي يخلي ضابط جيش يتدرب على التعذيب اساسا؟ ضابط الجيش بياخد تدريب على القتال مش على التعذيب.. او هكذا المفروض
وانا بقى باتساءل: وايه اللي يخلي ضابط جيش يقول يعيش حسني مبارك اساسا؟ ولما ضابط جيش يقول علينا بناخد خمسين يورو يبقى المخابرات بتعمل ايه؟ مش ممكن يعني ضباط الجيش بيستقوا معلوماتهم من تامر امين وسيد علي وهناء السمري كمان قبل ما يغيروا رأيهم، يعني دول من ساعة ما مبارك اتخلع ما شافوش تلفزيون؟ ولا دي المخابرات بتتفرج على التلفزيون وتبعت لهم اس ام اس؟ 
فيه ناس ابتدت تقول ان كان فيه ضباط شرطة لابسين جيش ضمن المجموعات، بس طب يعني الجيش ليه يلبس الشرطة لبسه يعني؟ وقلنا الجيش ما يقعدش مع الشرطة تاني، ولا يتفرج على التلفزيون كمان
وبعد ما نحل امن الدولة عايزين نعمل اختبار ذكاء للمخابرات واي حد الاي كيو بتاعه اقل من 130 يترفد، بلاش 130 عشان ده ذكي، اي حد الاي كيو بتاعه اقل من 110 يترفد من المخابرات، ويشتغل في الشرطة، يدوب كده كويس
دول حطموا لي كل تصوراتي اللي بناها لي صالح مرسي ونبيل فاروق عن رجل المخابرات خالص.. لما رئيس المخابرات السابق بيقول براذر موسليمهود ورئيس المخابرات الحالي كان بيقول سمك القرش ده مخطط اسرائيلي وكل بتوع سيناء جواسيس ويقول للقوافل الاجنبية بلاش تدخلوا المساعدات دي لغزة ما تجيبوها ده احنا عندنا فقرا كتير.. وبعدين يطلع ان اجندات وكنتاكي وخمسين يورو دي مش مجرد دعاية ضد الثوار دي معلومات بيمدوا بيها بعض عناصر الجيش... يبقى انا اروح اشتغل في السي اي ايه بقى.. سي اي ايه ايه؟ ده انا اروح اشتغل في ناسا
احنا عايزين تحقيق في الوقائع المذكورة في البوست ده
صاحب البوست حاطط اسمه وصورته، يعني ما عندوش حاجة يخاف منها، اللي ضربه هو اللي ما نعرفش اسمه ولا شكله، عشان هو جبان، ايا كان، جبان
احنا لما نعوز نشتكي من حاجة زي دي نروح نشتكي لمين؟ 
قطع ايد اللي يضرب مصري... انشالله يكون مين

واجب وطني للقوات المسلحة المصرية والتونسية

من غير ما تقولوا لنا انتوا بتعملوا ايه، تنسقوا مع بعض وتساعدوا الثوار جوة
ده واجب وطني حفاظا على بلادنا من الاحتلال، لو الوضع استمر حتيجي قوات دولية تحتل ليبيا ومش حتطلع، ولو جات قوات اجنبية لليبيا، تونس حتنهار ومصر حتتعمل ساندوتش، قبل يوم الجمعة القذافي ده لازم يطلع والثورة لازم تنجح
ومصر وتونس واجبهم ينسقوا مع بعض ويساعدوا الثوار من غير ما يعلنوا بيساعدوهم ازاي، بس يساعدوهم بكل الطرق والكباري، اي حاجة محتاجينها الثوار الليبيين، مصر وتونس ملزومين يساعدوهم فيها
واللي انتوا محتاجينه منا برضه تعلمونا واحنا نعمله، من مات دون ارضه فهو شهيد، واللي يدافع عن ثوار ليبيا لازاحة القذافي من المصريين والتونسيين يبقى بيموت دون ارضه 
احنا كنا بنقول لو القذافي استمر فيه خطر على الثورتين التونسية والمصرية
بس كده القذافي انتهى
باقي حماية ليبيا من التدخل الاجنبي
ثورة بقى مش ثورة.. اي تدخل اجنبي في ليبيا هو دعك استراتيجي لمصر حتى لو كانت ايام المخلوع ما ينفعش كان يسكت
(هو صحيح كان حيعمل صفقة ويسيبهم يدخلوا بعد ما يطلع منهم بمصلحة، بس دي كانت حتقود مصر لكارثة) واحنا دلوقت مش زمن المخلوع
احنا عايزين نحافظ على مصر بحدودها دي اللي بقالها خمستلاف سنة زي ماهي
وكذلك اكيد تونس مش عايزة تحصل لها كارثة
الا هل بلغت.. اللهم فاشهد... ليبيا تتلحق فورا.. تتلحق فورا من التدخل الاجنبي وتخلص من القذافي وعياله النهاردة قبل بكرة

هوبا تيتو مامبو... فساد فساد فساد.. ما قلنا هاتوا جمال مبارك وهو حيعترف

الخبر ده اهداء لكل واحد بيقول ان البني ادم ينفع يبقى ملياردير من الحلال:
تلاشت‏..‏ والضوابط لم يعد لها وجود‏..‏ والمعايير اختفت في قواعد العمل وباتت العلاقات الشخصية سيدة الموقف‏..
إذا ملكت القدرة علي الاقتراب من أنس الفقي وزير الإعلام السابق‏..‏ في غضون عام علي أقصي تقدير‏..‏ تصبح صاحب ملايين وتتدفق عليك الأموال بشكل منتظم‏.‏
أصحاب شركات إنتاجية عددهم لا يتجاوز أصابع اليد الواحدة‏..‏ نفذوا إلي شاشة التليفزيون وتربحوا من أمواله‏..‏ في ظل غياب صارخ للقواعد المالية‏..‏ وتعطيل للجان والقانون‏.‏
معلومات غاية في الخطورة‏..‏ تكشف عن تفاصيل وقائع فساد جديدة في قطاعات اتحاد الإذاعة والتليفزيون‏..‏ ترسخ الاعتماد وزير الإعلام السابق علي علاقاته الشخصية في إدارة دفة العمل الإنتاجي‏.‏
المعلومات استقاها الأهرام من مسئولين بوزارة الإعلام و الرقابة الإدارية ووثائق العقود أبرمت مع شركات إنتاج يملكها أقارب مسئولين كبار‏.‏
الوقائع متشابكة لكنها تتكشف أمام وطأة الأحداث الصاخبة ووقوع أنس الفقي في قبضة الحبس الاحتياطي علي ذمة تحقيقات نيابة الأموال العامة‏..‏ الأسرار تتجلي‏..‏ وتبزغ الحقائق‏..‏ ويطفو الفساد فوق السطح وتراه العيون رأي العين‏..‏ فقد أزيح الستار عن حقيقة تعاقده مع شركة يوز ألن التي تبين أن مالكها زوج شقيقة الدكتور يوسف بطرس غالي وزير المالية السابق‏,‏ تم منحها عشرة ملايين دولار لإعادة هيكلة قطاعات اتحاد الإذاعة والتليفزيون‏,‏ وصوت القاهرة‏,‏ ومدينة الإنتاج الإعلامي‏.
وحصلت الشركة علي كل مستحقاتها المالية دون تنفيذ الدراسات التي أجراها لتطوير الأوضاع الإدارية ورفع المستوي المهاري للإدارات وعلاج مشكلاتها‏.‏
وأسند إلي شركة إكس ريتد مهمة عمل تترات وفواصل برامجية للقنوات الإقليمية بقيمة‏054‏ ألف دولار‏,‏ ويملك الشركة زوج ابنة راوية راشد رئيسة الإدارة المركزية للعلاقات الخارجية برئاسة اتحاد الإذاعة والتليفزيون‏,‏ ورفضت اللجنة الأعمال التي نفذت عبرها لضعف مستواها الفني‏,‏ في الوقت الذي حصلت فيه علي كامل مستحقاتها المالية‏.‏
وأراد الفقي مجاملة جمال عبدالعزيز سكرتير الرئيس السابق حسني مبارك فمنح زوج ابنته أشرف هريدي بالأمر المباشر عقدين متتاليين قيمة الأول‏8‏ ملايين جنيه يتولي فيه مسئولية تنظيم الاحتفال بمرور خمسين عاما علي إنشاء التليفزيون‏,‏ والثاني‏7‏ ملايين جنيه لتنظيم مهرجان الإعلام العربي الماضي‏.‏
وأغدق علي سمير يوسف زوج مذيعة دريم مني الشاذلي أموالا طائلة تصل حصيلتها السنوية إلي‏72‏ مليون جنيه نظير إسناده إنتاج البرامج الرياضية في جميع قنوات التليفزيون ومنع جميع العاملين في إدارات البرامج الرياضية وقناة نايل سات من العمل‏,‏ ليخلي له الساحة منفردا‏,‏ وعلي خليفة ذلك تجري الرقابة الإدارية ـ بحسب مصدر مطلع ـ فحصا فنيا للأجور التي يتقاضاها نظير إنتاجها ومدي اتساقها مع التكلفة الإنتاجية‏.‏
ووفق ما ذكره مصدر بالرقابة الإدارية فإن خيوطا قد تكشفت للوقوف علي نفوذ صاحب شركة فيل ميكر محمد ثروت وحصوله علي إنتاج أهم برامج الفورمات الأجنبية العائلة تكسب والفائز أبي والقصر بأسعار مبالغ فيها‏,‏ وكيف فتحت له شافكي المنيري رئيسة القناة الثانية طريق المنتج المنفذ في ماسبيرو‏.‏
إذا كانت الظروف والأوضاع الراهنة قد ساعدت علي فتح ملفات كثيرة‏,‏ فإن الرقابة الإدارية عاودت فتح ملف شركة بركة ديزاين لإجراء تحقيقات واسعة في المخالفات المالية التي ارتكبها أنس الفقي وزير الإعلام السابق لحساب الشركة‏,‏ وأضاع علي خزانة الاتحاد ملايين الجنيهات‏,‏ بدءا من إسقاط قيمة إعلانات غير مباشرة قيمتها‏51‏ مليون جنيه في برنامج البيت بيتك وإعادة تحديث ستوديو واحد وتزويده بأحدث الأجهزة والمعدات بتكلفة بلغت‏12‏ مليون جنيه‏,‏ وإعطائه للشركة بقيمة إيجارية نصف القيمة المحددة بمعرفة القطاع الاقتصادي‏,‏ ومنح الشركة إنتاج مسلسلات بقيمة‏71‏ ألف جنيه للساعة بالمخالفة للأسعار السائدة في سوق الإنتاج‏.‏
--------------
كل ده وانا يتخصم لي من المكافأة والحوافز وفلوسي تتأخر تلات شهور وهم كلهم على بعضهم الفين جنيه وساعات اقل بعد الخصومات
حسبي الله ونعم الوكيل... فلوووووسيييييييييييي
طب كانوا يدوني الالفين جنيه بتوعي اللي انا فرحانة بيهم وفاكرة نفسي اقطاعية وعمالة قال ايه اشتغل ببلاش في اي شغلانة برة الوظيفة بتاعتي عشان حاسة بالذنب اني باخد من ضرايب المواطنين ومش باخدمهم بما يكفي نظرا لسوء الخدمة اللي بيقدمها التلفزيون المصري
حسبي الله ونعم الوكيل
حسبي الله ونعم الوكيل
حسبي الله ونعم الوكيل
ويلاحظ ان فيه بعض الاسماء المتورطة او اللي اجوازها متورطة كانت عاملة فيها معارضة
يعني انا اجيب الفقرا افرج الناس عليهم واعيط جنبهم واشحت عليهم: احنا بنناشد كل المشاهدين بالتبرع لحالة شحيبر.. شحيبر ابن مصر
وفي الاخر اخد ملايين كل سنة، واقول دي اعلاناتي، وكمان مش مكفيني وطالقة قرايبي يهبشوا
ومناضلة برضه بعد ده كله... واخش الجنة بالمرة
يعني ابقى غنية ومناضلة واخش الجنة... طب بالنسبة للبلطجية المندسين اللي بيناموا في الشارع، بلطجية، وعندهم سوء تغذية، وحيدخلوا النار كمان
ولسه ولسه
اتاري كان كل اللي بيعارضهم من الاعلاميين يتصرفوا معاه باستهزاء واستهتار واحتقار، عشان عارفين مصارينه
ولسه ولسه... بس والنبي هاتوا جمال مبارك وصفوت الشريف عشان هم دول اول الخيط والله صدقوني

التعديلات الدستورية جميييلة

تحديث:
اللنك ده بيقول متزوجا من غير مصري.. يعني ممكن الستات تترشح، مش عارفة انهي خبر الصح، حنستنى لحين التأكد


اللنك ده فيه نص التعديلات الدستورية
وانا مبسوطة منها قوي، اهم حاجة باسطاني في التعديلات انها بتنص على ان الدستور ده مؤقت، وانه بيحط كل حاجة في ايد القضاء، ودلوقت تلقائيا القضاء بقى مستقل، انا نفسي بقى يعملوا قانون لوحده للقضاء يضمن ان القضاء ده يبقى مستقل اخر حاجة... ههههه ما اعرفش بقى انا ما بافهمش في القانون، بس اللي اقصده يعني انهم يعملوا حاجة يخلوا القاضي يمسك رئيس الجمهورية يمهمطه وما يقدرش رئيس الجمهورية يفتح بقه، نفسي منصب رئيس الجمهورية ده يبقى منصب اللي نعوز نعذبه، ومبسوطة ان الانتخابات حتبقى بالرقم القومي زي ما اللجنة قالت امبارح، والقوائم بالرقم القومي
بالنسبة للتلاتين الف توقيع اللي قلقوا الناس، هي تقلق لو قانون الاحزاب زي ما هو، لكن انا عرفت ان اللجنة انتهت من مسودة قانون الاحزاب وان شاء الله خير
انا نفسي في حاجة واحدة بس: استبعاد كل اعضاء الحزب الوطني من خوض الانتخابات المقبلة، اللي هي الشعب والشورى والرئاسة
يا ريت، انا مش طالبة حل الحزب الوطني، اللي هو مفروض والله لانه اساسا حزب مقرف، ولا طالبة استبعاده الى الابد، انا طالبة استبعادة في اول انتخابات بس
واظن ده حقنا يعني
وباطلب من لجنة التعديلات الدستورية انها تعمل لنا الحكاية دي في قوانين الانتخاب، عشان هم بيعملوا القانون كمان

انا شايفة ان التعديلات الدستورية عملت كل اللي احنا عايزينه منها لسه بقى بيعمل قانون الاحزاب وقوانين الانتخابات
وحانقل برضه نص التعديلات الدستورية عشان ننبسط كلنا بعد يوم نكد امبارح 
الحمد لله... لجنة التعديلات الدستورية ما خيبتش املنا اللي عمال يخيب مؤخرا كذا مرة كدهون

وفيما يلى نص مواد الدستور التى تم إدخال تعديلات عليها


مواد الدستور التى تم إدخال تعديلات عليها


(مادة ٧٥)


يشترط فيمن يُنتخب رئيساً للجمهورية أن يكون مصرياً من أبوين مصريين، وأن يكون متمتعاً بحقوقه المدنية والسياسية، وألا يكون قد حمل أو أى من والديه جنسية دولة أخرى، وألا يكون متزوجاً من غير مصرية، وألا تقل سنه عن أربعين سنة ميلادية.


:) المادة دي بتقول ضمنا ان مافيش ست حتترشح لأنها بتقول "وألا يكون متزوجا من غير مصرية".. يالا، نثور لكم وناكل من بيتنا، 


(مادة ٧٦)


يُنتخب رئيس الجمهورية عن طريق الاقتراع السرى العام المباشر.


ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضواً على الأقل من الأعضاء المنتخبين لمجلسى الشعب أو الشورى، أو أن يحصل المرشح على تأييد ما لا يقل عن ثلاثين ألف مواطن ممن لهم حق الانتخاب فى خمس عشرة محافظة على الأقل، بحيث لا يقل عدد المؤيدين فى أى من تلك المحافظات عن ألف مؤيد.


وفى جميع الأحوال لا يجوز أن يكون التأييد لأكثر من مرشح، وينظم القانون الإجراءات الخاصة بذلك كله.


ولكل حزب من الأحزاب السياسية التى حصل أعضاؤها على مقعد على الأقل بطريق الانتخاب فى كل من مجلسى الشعب والشورى فى آخر انتخابات، أن يرشح أحد أعضائه لرئاسة الجمهورية.
هااااايل حكاية مقعد واحد بس دي، استوحياطا برضه
وتتولى لجنة قضائية عليا تسمى «لجنة الانتخابات الرئاسية»، الإشراف على انتخابات رئيس الجمهورية، بدءاً من الإعلان عن فتح باب الترشيح وحتى إعلان نتيجة الانتخاب.


وتُشكل اللجنة من رئيس المحكمة الدستورية العليا رئيساً، وعضوية كل من رئيس محكمة استئناف القاهرة وأقدم نواب رئيس المحكمة الدستورية العليا، وأقدم نواب رئيس محكمة النقض، وأقدم نواب رئيس مجلس الدولة.
هاااااااااااااااااااييييلللللل
وتكون قرارات اللجنة نهائية ونافذة بذاتها غير قابلة للطعن عليها بأى طريق وأمام أية جهة، كما لا يجوز التعرض لقراراتها بوقف التنفيذ أو الإلغاء، كما تفصل اللجنة فى اختصاصها، ويحدد القانون الاختصاصات الأخرى للجنة.
ايوة كده.. اديلو على عينه.. اقصد الرئيس القادم، ايا كان بقى
وتُشكل لجنة الانتخابات الرئاسية اللجان التى تتولى الإشراف على الاقتراع والفرز على النحو المبين فى المادة ٨٨.


ويُعرض مشروع القانون المنظم للانتخابات الرئاسية على المحكمة الدستورية العليا قبل إصداره وتقرير مدى مطابقته للدستور.


وتُصدر المحكمة الدستورية العليا قرارها فى هذا الشأن خلال خمسة عشر يوماً من تاريخ عرض الأمر عليها، فإذا قررت المحكمة عدم دستورية نص أو أكثر وجب إعمال مقتضى قرارها عند إصدار القانون، وفى جميع الأحوال يكون قرار المحكمة ملزماً للكافة ولجميع سلطات الدولة، ويُنشر فى الجريدة الرسمية خلال ثلاثة أيام من تاريخ صدوره.


(مادة ٧٧)


مدة الرئاسة أربع سنوات ميلادية تبدأ من تاريخ إعلان نتيجة الانتخاب، ولا يجوز إعادة انتخاب رئيس الجمهورية إلا لمدة واحدة تالية.


(مادة ٨٨)


يحدد القانون الشروط الواجب توافرها فى أعضاء مجلس الشعب ويبين أحكام الانتخاب والاستفتاء.


وتتولى لجنة عليا ذات تشكيل قضائى كامل الإشراف على الانتخاب والاستفتاء بدءاً من القيد بجداول الانتخاب وحتى إعلان نتيجته، وذلك كله على النحو الذى ينظمه القانون.


ويجرى الاقتراع والفرز تحت إشراف أعضاء من هيئات قضائية ترشحهم مجالسها العليا، ويصدر باختيارهم قرار من اللجنة العليا.


(مادة ٩٣)


تختص المحكمة الدستورية العليا بالفصل فى صحة عضوية أعضاء مجلس الشعب.


وتقدم الطعون إلى المحكمة خلال مدة لا تجاوز ثلاثين يوماً من تاريخ إعلان نتيجة الانتخاب، وتفصل المحكمة فى الطعن خلال تسعين يوماً من تاريخ وروده إليها.


وتعتبر العضوية باطلة من تاريخ إبلاغ مجلس الشعب بقرار المحكمة.


(مادة ١٣٩)


يُعين رئيس الجمهورية خلال ستين يوماً على الأكثر من مباشرته مهام منصبه، نائباً له أو أكثر ويحدد اختصاصاته، فإذا اقتضى الحال إعفاءه من منصبه وجب أن يُعين غيره.


وتسرى الشروط الواجب توافرها فى رئيس الجمهورية والقواعد المنظمة لمساءلته على نواب رئيس الجمهورية.


(مادة ١٤٨)


يعلن رئيس الجمهورية حالة الطوارئ على الوجه المبين فى القانون ويجب عرض هذا الإعلان على مجلس الشعب خلال السبعة أيام التالية ليقرر ما يراه بشأنه.


فإذا تم الإعلان فى غير دور الانعقاد وجبت دعوة المجلس للانعقاد فوراً للعرض عليه وذلك بمراعاة الميعاد المنصوص عليه فى الفقرة السابقة.


وإذا كان مجلس الشعب منحلاً يعرض الأمر على المجلس الجديد فى أول اجتماع له.


ويجب موافقة أغلبية أعضاء مجلس الشعب على إعلان حالة الطوارئ.


وفى جميع الأحوال يكون إعلان حالة الطوارئ لمدة محددة لا تجاوز ستة أشهر ولا يجوز مدها إلا بعد استفتاء الشعب وموافقته على ذلك.


(مادة ١٧٩)


تلغى


(مادة ١٨٩) فقرة أخيرة مضافة


ولكل من رئيس الجمهورية، وبعد موافقة مجلس الوزراء، ولنصف أعضاء مجلسى الشعب والشورى، طلب إصدار دستور جديد، وتتولى جمعية تأسيسية من مائة عضو، ينتخبهم أغلبية أعضاء المجلسين من غير المعينين فى اجتماع مشترك، إعداد مشروع الدستور فى موعد غايته ستة أشهر من تاريخ تشكيلها، ويعرض رئيس الجمهورية المشروع خلال خمسة عشر يوماً من إعداده على الشعب لاستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء.


(المادة ١٨٩) مكرراً


يجتمع الأعضاء غير المعينين لأول مجلسى شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقاً لأحكام الفقرة الأخيرة من المادة ١٨٩.


(المادة ١٨٩) مكرراً١


يمارس أول مجلس شورى بعد إعلان نتيجة الاستفتاء على تعديل الدستور، بأعضائه المنتخبين، اختصاصاته.


ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاستكمال المدة الباقية للمجلس على النحو المبين بالقانون.


خلاص كده لا فيه تخلي ولا تنحي ولا حاجة تخوف ان شاء الله فيما يخص الدستور


ناقص بقى نخلص من شفيق يا راجل وجمال وصفوت ويحلوا لنا امن الدولة، عشان مافيش انتخابات محترمة حتتعمل طول ما امن الدولة عايش


امن الدولة مش لازم يعيش ليوم التلات... ولا الاربع


انا باحب طارق البشري قوي :) 
بالنسبة للناس بتوع: انا اعترض على التعديلات الدستورية.. فتقول له معترض ليه؟ يقول: عشان... عشان... عشان.... لان اساسا كده
:)
بس انا مبسوطة من حزب انا اعترض ده حتى لو مش موافقة معاهم على الاعتراضات
ما قعدنا تلاتين سنة نقول موافقون... ما جراش حاجة لما شوية يفضلوا يعترضوا عمال على بطال، على الاقل عشان يعملوا شوية توازن في حركة التاريخ

ما حدث في فجر 26 فبراير

تحديث:
اه.. نسيت حاجة مهمة جداااااااااا
ظباط الجيش اللي كانوا على الدبابات اللي عند شارع مجلس الشعب، مختلفين تمامااااااااااااا عن ظباط الجيش اللي كانوا على الدبابات اللي بين شارع القصر العيني والطريق المؤدي للتحرير
اللي كانوا في القصر العيني هم الظباط اللي بيعاملونا المعاملة اللي نعرفها، بيضحكوا معانا، وبيوقفونا على الدبابة، وواحد فيهم مسك الميكروفون ووجه كلامه للي واقفين على الدبابات اللي على شارع مجلس الشعب وقال: ما تدخلوا الناس.. هو فيه ايه؟ فالناس سقفت له وقالت له: انت معاناااااااااااا وقعدوا يضحكوا مع بعض
غير خالص اسلوب اللي واقفين على دبابات الجيش اللي على مجلس الشعب
---------
ما كنتش ناوية احكي لأن مافيش حاجة تفرح في اللي باحكيه ده، وبعدين حاحكي على الجيش؟ اتفها تنزل في عبي يعني؟
بس بلال قال لي احكي بالظبط لأن بيان الجيش بيقول إن القيادات لم تصدر هذه الأوامر، فلازم يتحكي لهم بالظبط ايه اللي حصل، واتشجعت اكتر لما ناس ابتدت تقول على ناس انهم بلطجية لمجرد إنهم غلابة و"دون المستوى" وشكلهم مش عاجبهم
طيب
من اول اليوم، اللي هو يوم الجمعة 25 فبراير والمعاملة سيئة بشكل ما اتعودناهوش من الجيش، الجيش دايما بيبتسم في وشنا، وبيأمنا، ولطيف معانا
اليوم ده أولا الرقابة ما كانتش كبيرة على اللي داخلين، ما كانوش بيشوفوا البطاقات، مكشرين في وشنا، ومتحفزين لنا، وشكلهم زي ما يكون حد شاحنهم علينا
اول ما دخلت الميدان الضهر لقيت مجموعة ظباط جيش ماشيين جنبي، فقعدت اكلمهم عادي زي ما باعمل دايما فواحد منهم قال لي: باقولك ايه؟ ما تروحي، اصل هنا فيه تحرشات واغتصاب! قلت له: اغتصاب؟ صعب قوي.. قال لي: خلاص يا ستي انا غلطان حقك عليا.. فيه ناس مندسة هنا بتغتصب البنات واخدوا بنت في محل وجبناها كما ولدتها امها!
قصرت معاهم في الكلام ومشيت
على المغرب كده رحت اعتصام المجلس، كان فيه دبابتين قافلين شارع المجلس وناس كانت جوه عددهم قليل، وبقية الناس برة وعمالين يقولوا عايزين ندخل، وموقفين بين الدبابتين عساكر لابسين بدلة عسكري وعلى راسهم خوذات سودا، سألت عسكري جيش قلت له هم دول امن؟ قال لي لا دي قوات خاصة
جوة بقى عند مجلس الشعب لقينا واقف مع ظباط الجيش ظابط شرطة واتنين امن دولة، الناس قعدت تشتم بتوع امن الدولة من الحديد وتقول للجيش انتوا ليه واقفين مع دول
قعدوا يقولوا عايزين ندخل عايزين ندخل
كان فيه ظابط جيش هناك، الراجل ده هو اللي كان معانا في اعتصام مجلس الشعب ليلة خطاب المخلوع الاخير وهو ده اللي قال لنا يوميها: لو انتوا قتلتوا مننا العشرات عمرنا ما نمد ايدينا عليكم والناس قعدت تعيط وتقول له احنا نفديكم بارواحنا
يوم 25 فبراير بقى هو كان متحفز لنا كده من غير سبب، قلت له: هو انتوا مش بتدخلونا الشارع ليه؟ هو هنا فارق عن جوة؟ قال لي: قولوا لنفسكم، ما انتوا قاعدين هنا!
وظابط على الدبابة باقوله انتوا مش بتدخلونا ليه؟ قال لي ما ينفعش.. الناس فضلت تقول له ما احنا كنا معتصمين جوة لا كسرنا ولا حرقنا ولا عملنا حاجة، انتوا ليه المرة دي مش عايزين تدخلونا؟ وهم ابدا
عرفنا بعد شوية ان تامر السعيد خرج بعد ما انضرب علقة موت جوة مجلس الشعب وخارج وشه مشلفط، ومع ذلك حتى اصحابه قالوا: يا جماعة مش عايزين نعمل مشكلة مع الجيش، ما هو برضه كتر في الكلام معاهم، كان ممكن يتفادى الموضوع ده.. معلش معلش.. الصبر
فضلنا قاعدين، وكل شوية عربية اسعاف تعدي علينا في الاعتصام رايح جاي، الدبابات اللي في القصر العيني تعديها في الرايح والجاي، كل تلات دقايق عربية اسعاف تعدي، بالظبط كده، رايح جاي
فيه ملحوظة مهمة: احمد فيصل قال كان فيه ناس مندسة بتضايق الجيش واحنا كنا بنهتف ضدهم
واحب اوضح ان مافيش دليل على انهم ناس مندسة ده اولا، ثانيا هم ما عملوش حاجة، هم قعدوا يهتفوا عسكر عسكر عسكر ليه احنا في سجن ولا ايه؟ وعددهم كان قليل اللي كانوا بيرددوا الهتاف ده، واول ما يهتفوا كده الناس كلها تقاطعهم: الجيش والشعب ايد واحدة
كان فيه مجموعة شباب حاولوا يعدوا من وسط القوات الخاصة بنفسهم فالناس كلها قعدت تزعق لهم وتتخانق معاهم، بس ده مش معناه انهم مندسين
واغلب الهتافات كانت الجيش والشعب ايد واحدة، يا مشير يا مشير احنا ولادك في التحرير، يا جيشنا يا رجالة طهرونا من الزبالة
وبعدين فوجئنا ان شخص ما في الدور الرابع في مجلس الوزرا طافي النور في الاودة وعمال يفتح الستارة ويفتح الشباك كأنه بيستفزنا فالناس قعدت تشاور عليه وتقول: الجيش المصري فيييين الحرامية اهم
وظابط الجيش اللي على الدبابة قعد يشاور له عشان يدخل ويبطل اللي بيعمله ده وهو مصمم يفضل يفتح الستارة ويقفلها ويفتح الشباك ويقفله
فالناس قالت لازم ندخل ونعتصم جوة، وقعدت تهتف: واحد اتنين الجيش بيحمي مين؟
ودول برضه كان عددهم قليل راحت الاغلبية مغطية عليهم: الجيش والشعب ايد واحدة
فجأة لقينا عربية اسعاف دخلت شارع مجلس الشعب اللي هو اصلا ممنوع حد يدخل فيه، ودخلت بالسرينة، ووقفت شوية، وبعدين راحت لافة وراجعة، ده غير بقى عربية الاسعاف اللي رايحة جاية
الغريبة بقى ان كمان بعض من عساكر الجيش وبعض من الظباط غير انهم مكشرين في وشنا قعدوا يقولوا لنا: احنا زهقنا بقى، احنا مش بننام... فنضحك في وشهم ونقول لهم: طب كلموا المجلس الاعلى خليه يمشي لنا شفيق واحنا نمشي
على فكرة الجيش عمره ما كلمنا بالطريقة دي ابدا
بعد شوية جات عربية فيها حد من الشرطة العسكرية رتبة كبيرة، مش عارفة باين بيقولوا رئيس الشرطة العسكرية ولا ايه، مش عارفة هو مين بالظبط، بس حد مهم، ونزل وسط الناس وراح شاخط فيهم وهو مكشر وقال لهم: امشوا...
بس كده، ما قالش غير كده
الناس برضه قعدت تبوس فيه وتحايل فيه عشان يسيبهم يقعدوا
بعد شوية جات عدت عربية الاسعاف اياها تاني، رحت انا رايحة وقلت لهم هي ايه حكاية الاسعاف اللي رايحة جاية دي، لقيت واحد بيقول: الحقوا الحقوا فيه بلطجية في ميدان التحرير.. روحوا لهم.. روحوا لهم.. ده فيه اصابات. فقلت لهم ماحدش يمشي، دول بيقولوا لكم كده عشان يمشوكم، وواحد قال: يا جماعة العدد في التحرير اضعافنا احنا حنروح ننقذ اللي في التحرير وهم عددهم قدنا عشر مرات؟
المهم الناس فضلت قاعدة وانا مشيت ناحية التحرير اشوف حكاية البلطجية دي، وكان فيه ناس جاية منه فسألتهم: فيه بلطجية صحيح في الميدان؟ قالوا لي: ولا فيه اي حاجة..
لقيت مالك جاي في وشي فرجعت معاه تاني للمجلس
بعدين مالك قال لي انا رايح اجيب البطانية من التحرير، فقلت له اجي معاك عشان اجيب البالطو بتاعي من العربية، خرجنا من المجلس متوجهين للتحرير وسمعنا واحنا رايحين انهم بيقبضوا على الناس او حيقبضوا عليهم او ضربوهم او بيضربوهم مش فاكرة بالظبط، المهم سمعنا اخبار مقلقة وبعدين قبل ما ندخل التحرير لقينا باص كل اللي فيه شرطة عسكرية فرجعنا بسرعة للمجلس عشان لو حصل للناس حاجة نبقى معاهم
فضلنا قاعدين شوية وفجأة على الساعة اتناشر الا تلت كده الجيش والشرطة العسكرية عملوا علينا كوردون وقالوا لنا اصل ده عشان حظر التجول، قعدنا نقولهم احنا كده مش بنخرق حظر التجول لاننا مش متظاهرين، احنا معتصمين والاعتصام مش خرق لحظر التجول، المهم فضلوا يضيقوا علينا، وواحد انفعل وقعد يقول انتوا بتعملوا معانا زي الشرطة ليه؟ فقعدنا نسكته، وبعد شوية فكوا الكورودون من علينا في نفس الوقت اللي التليفونات ابتدت تجيلنا من ميدان التحرير يقولوا لنا ان الشرطة العسكرية بتضربهم وبتعتقل ناس منهم، كل واحد جاله التليفون وما رضيش يحكي للي جنبه
بعد شوية جه ناس من ناحية القصر العيني وكان منهم شادي الغزالي حرب عايزين يدخلوا لنا والجيش مش عايز يدخلهم والناس بتقول دخلوهم دخلوهم وسمعت شادي بيقولهم: انتوا بتحموا الثورة مش مفروض تعملوا معانا كده.. ما اعرفش بقى اتقبض عليه ساعتها ولا بعد شوية لاني رجعت اقعد في الاعتصام
بعدين دخلت عربيتين تاكسي ابيض، فواحد وقف اول تاكسي وقال له: ايه اللي بيحصل في التحرير، فالجيش زعقوا له عشان يسيب التاكسي يمشي، والظابط اللي واقف قال قدامنا: اللي بيسأل عن التحرير.. بعد شوية حتعرف ايه اللي حصل في التحرير
فواحد سأله: يعني ايه؟ حتعملوا فينا ايه؟ احنا سمعنا كلام... بس مش ممكن نصدقه ابدا
فالظابط شاور عليا وقال له: لو دي المدام خدها وروح احسن.. دي نصيحة
فهو قال له: ما احنا سمعنا انكم ضربتوهم في التحرير.. بس احنا مش ممكن نصدق حاجة زي دي ابدا
فقال له: لا طبعا.. ما ضربناش حد.. بس فيه ناس اتقبض عليها لخرق حظر التجول، واللي بيتقبض عليه بيروح النيابة العسكرية
المهم الناس اتلمت عليه وقعدوا يتكلموا وهو كل كلامه: انا مش باقول لحد يروح، بس فيه ناس اتقبض عليها، واحنا ما ضربناش حد، اللي بيقولوا انهم انضربوا دول اللي كان بيتقبض عليه فبيقاوم!
بعد شوية جه ظابط شعره ابيض، عارفاه انا برضه من ايام الاعتصام الاولاني، قال في الميكروفون: انتوا عارفيني لو سمحتوا اسمعوا كلامي وامشوا دلوقت احنا حنستضيفكم من الساعة ستة الصبح للساعة اتناشر، امشوا دلوقت وتعالوا بكرة!
رحت لمالك وقلت له: الناس دي يا مالك لازم تمشي.. العدد قليل وحيتعجنوا، اللي سمعته من التحرير انهم ما بيعملوش حاجة للستات، بس حيبهدلوا الرجالة، لازم يمشوا، قال لي انا مقتنع بكلامك بس ما اقدرش اقولهم كده، انت شايفة هم متمسكين بالاعتصام ازاي
المهم الناس فضلت تقول للظابط: احنا مش بنخرق حظر التجول ده اعتصام.. اعتصاااااام.. الاعتصام مش خرق لحظر التجول، احنا مش في مظاهرة احنا في اعتصااااااااااااام... المهم الظابط قال لهم انا قلت لكم وبعدين وهو بيدخل تاني شارع مجلس الشعب واحد منا الجيش قبض عليه، فالناس قعدت تقول سيبه سيبه سيبه، راح الظابط ده وقف وقال لهم خلاص، هاته يابني، تعالى.. وراحوا مرجعينه فالناس صقفت وقعدت تقول الجيش والشعب ايد واحدة..
(الناس غلابة قوي.. مش كده؟)
المهم.. بعد ما الظابط ابو شعر ابيض دخل راحوا عملوا علينا كوردون، والناس اول ما اتكردن عليها قعدت تقول: الجيش والشعب ايد واحدة الجيش والشعب ايد واحدة الجيـ.... آآآآه آآآآآآه آآآآآه... اجريييييييييييييي اجرييييييييييييييي
وجرينا، ما تفهمش مالك كان ماشي على مهله ليه، وبعدين الناس ابتدت تتدافع فباشده عشان نجري قال لي اجري انت، وبعدين جه صوت من ورايا قال: البنات تطلع قدام البنات تطلع قدام.. كان معانا الدكتورة ليلى سويف، ما اعرفش دي عرفت تجري، ولا كمان تطلع قدام، ازاي؟ ، واحنا بنجري لقيت الشباب بيجروا ويعيطوا.. اه والله، البنات ما عيطتش، الشباب، اللي كانوا بيشتعلقوا على مدرعات الامن المركزي، هم اللي عيطوا
وبعدين واحنا بنجري لقيت واحد بيلتفت وراه وبعدين فجأة راح فاتح لهم صدره عشان يضربوه وهو بيعيط ويقول: الجيش والشعب مش ايد واحدة.. الجيش والشعب مش ايد واحدة... عاااااا عاااااا
وبعدين الناس تعبت من الجري والظاهر التانيين سابونا شوية، فبدأنا نمشي بالراحة وبعدين فجأة سمعنا: آآآآآآآآآه آآآآآآآآآآآه.. اجرييييي اجرييييي
فجرينا تاني.. وانا كنت على الرصيف، ولقيت الجيش بيجري ورانا وواحد من الجيش بيقول: اجروا.. اجروا... ما حدش يقف
وبعدين سمعنا واحد بيصرخ: دول بيقبضوا على النااااس
فدخلنا شوارع جانبية واحنا بنجري لقينا ظابط بيجري ورا بنت كانت في اخر الصف بتاعنا وبيقول لها: يالا من هنا.. عاملة لي بطلة؟
ظابط جيش يعني، احسن حد فيكم يفتكره شرطة
وبعدين دخلنا بقى الشوارع الجانبية، وقابلنا ناس تانية بيقولوا لنا: الجيش بيقبض على الناس
ما اعرفش حد من اللي كانوا معايا غير واحدة بس قابلتها مرة واحدة في مظاهرة كوبري خمستاشر مايو في يوم 28 يناير اسمها ريم، والباقيين مش عارفاهم، كنا حوالي تسعة كده، وبعدين ريم قالت انا ليا واحدة صاحبتي ساكنة هنا تعالوا نروح لها
كان معانا واحدة قالت وطوا صوتكم لبعدين الجيش يعرف احنا فين وييجي يمسكنا، لان واحد جاله تليفون بيقول له: الجيش بينتشر وبيقبض على اي حد
واحنا ماشيين قابلنا ناس جيش واقفين حراسة في حتة كده في جاردن سيتي ووقفونا وقالوا لنا انتوا رايحين فين، فقلنا لهم اصل الجيش قال لنا نمشي ودلوقت مافيش مواصلات فرايحين نبات عند ناس صحابنا، فسألونا عن العنوان اللي احنا رايحينه وبعدين سابونا نروح، فضلنا مستخبيين في مدخل العمارة لحد ما بقى ريم صحت صاحبتها وجوزها واستقبلونا في بيتهم
وخلاص كده
انا بس ما صعبش عليا ولا خلاني اعيط غير اني لما نزلت الصبح بقيت لما اشوف جيش في الشارع اخاف زي ما كنت باخاف لما اشوف شرطة... اول مرة احس بالاحساس ده يوميها
بعدين انا كنت راكنة عربيتي في شارع الجلاء على الناحية التانية من مستشفى الجلاء، رحت مع البنت اللطيفة دي اللي مش عارفة اسمها لقيت الازاز بتاع الشباك اللي ورا السواق مكسور والعربية مفتوحة وكل اللي في داخلها مسروق، الكاسيت وشاحن العربية وكل اللي فيها، العربية اللي ورا عربيتي سليمة ما جرالهاش حاجة، مع انها راكنة من ساعة ما ركنت انا، بس مافيش حاجة بتميز عربيتي عن العربية السليمة غير اني معلقة ورقة مكتوب عليها: الشعب يريد حل حكومة شفيق، محاكمة المخلوع، وانهاء حالة الطوارئ، وورقة تانية مكتوب عليها: مبارك السفاح مكانه في السجن وليس في شرم الشيخ.
كلمت مية واربعين ادوني ارقام 122 و136 و19197 طوارئ الجيش مش بيردوا كلهم
لقيت عربية شرطة وناس قاعدة في الحتة الورانية دي، هي دي اسمها بوكس ولا ايه؟ عربية الشرطة اللي شكل النص نقل دي وفيها حتة ورانية كده، المهم دي قاعد فيها ناس لابسين مدني وحاطين حوالين راسهم علم مصر، ومش مقبوض عليهم، يعني قاعدين مرتاحين ومش متكلبشين
طبعا ما سألتش فيا العربية دي
المهم فضلنا ماشيين عشان نلاقي اي حد جيش مش لاقيين، الدبابات كلها مقفولة والناس الظاهر نايمة جوة، رحنا لحد المتحف المصري، وقبل ما اوصل للمتحف ردت علينا طوارئ الجيش وقالوا لي: طب مين اللي سرقها؟ قلت له ما اعرفش، قال لي ولو انتي مش عارفة مين اللي حيعرف؟ قدمي بلاغ في الشرطة، قلت له واللي مش عايز يتعامل مع الشرطة؟ قال لي: يبقى مع نفسه.
رحت لظابط الجيش اللي عند المتحف وقلت له عربيتي كانت راكنة في الجلاء واتسرقت، قال لي: وانت راكنة في الجلاء كنتي فين؟ قلت له كنت في التحرير، قال لي: كنتي سيبيها في البيت وتعالي.. عموما احنا ما نقدرش نعمل حاجة، احنا هنا للتحرير، روحي قسم قصر النيل، سيبيها مكانها وروحي بتاكسي
رحت قسم قصر النيل، لقيت ظابط شرطة صغنطوط كده بيقول لي اصل الجلاء مش تبعنا، روحي قسم بولاق، طب بصي استني اشوف قسم بولاق شغال ولا لا، قعد يتصل بالناس وماحدش يرد عليه، ويسأل واحد كده ويقول له يعني نعمل المحضر هنا ونبعته لهم ولا ايه؟ وبعدين قال لي معلش استني شوية لحد ما اعرف حنعمل لك المحضر هنا ولا هناك؟ فضلت قاعدة كتير، لان بولاق مش بيرد، وبعدين قلت له طب فيه حد من المعاينة طيب.. قال لي: هو انت ما تقدريش تجيبيها هنا؟
المهم البنت اللطيفة اللي معايا قالت لي نسيبها ولما جيت احط ايدي على العربية قالت لي حاسبي البصمات ههههههههه البنت دي اول ما سمعته بيقول ما تقدروش تيجبوها هنا جالها ذهول، وماما كلمتني قالت لي: يالا يا بنتي، محضر ايه وبتاع ايه؟ عليه العوض ومنه العوض
وروحت
----------------------
انا عايزة كل رموز النظام تمشي وعلى رأسها حكومة شفيق، ورئاسات التحرير ومجالس الادارة بتاعة الصحف القومية، وقيادات التلفزيون المصري اللي لسه بتشتغل بنفس العقلية وبتغطي على الحقايق
وعايزة صفوت الشريف وجمال مبارك بالتحديد يتقبض عليهم ويتحقق معاهم في الفساد
ومش عايزة التهم اللي توجه للعادلي تبقى تهم مضحكة، العادلي متورط في جرائم قتل، ولازم توجه له جريمة القتل
وعايزة اعرف مدير امن البحيرة اتفصل ولا اتنقل، عشان لو اتنقل يبقى ما عملناش حاجة
وعايزة امن الدولة يتحل.. لازم امن الدولة يتحل.. بشكل فوري
اللي كنت حاساه يوميها من معاملة الجيش ان حصل اختلاط بين الجيش وامن الدولة وان امن الدولة بوظ الجيش علينا والظاهر قعد يقول لهم بقى: ده شعب ابن كلب ما يجيش الا بضرب الجزمة... ادي انتوا بتعملوا لهم كل حاجة لحد ما مرعتوهم ودلعتوهم.. دول ما يجوش غير بالسك على دماغهم.. ولاقينها ظيطة بقى وعايزين مظاهرة كل يوم.. ولو ما سكتوهمش مش حيمشوا عدل.. اماااال... دول كانوا بيترعبوا مننا
لا على فكرة
ما كناش بنترعب منهم، كنا مغلولين منهم ومسكناهم رنيناهم علقة وجريناهم لحد ما استخبوا زي الفيران في جحورهم
واحنا مش بننزل في الظيطة، ولا بنيجي بالسك على فكرة، السك بيخلينا نحوش وننفجر، واحنا ما جريناش من الجيش عشان احنا جبناء، احنا جرينا من الجيش عشان عمرنا ما حنعرف نمد ايدنا على الجيش ونعمل فيه اللي عملناه في الامن المركزي والشرطة... وزي ما قلت، نتفها تنزل في عبنا
مافيش انتصار في اننا نمد ايدنا على جيش مصر، ومافيش كرامة في ان جيش مصر يمد ايده علينا، فمشينا من وشهم.. مشينا من وشهم
لان لو ضربونا اهانة لينا ولو ردينا لهم الضرب اهانة لينا برضه، كفاية اسرائيل تكتب في جرنال من الجرايد ان المواطنين المصريين ضربوا الجيش المصري. عمرنا ما نعمل حاجة زي دي ابدا مهما حصل
فيا ريت بقى رتب الجيش الصغيرة ما تبقاش تقعد تاني مع الشرطة وامن الدولة ولا تسلمهم ودنها، لو الشرطة بتنفع كانت نفعت نفسها، وما كانوش جريوا زي المعيز قدامنا، ولو امن الدولة بيفهم وعارف "الشعب ده" ما كانتش قامت ثورة من اساسه... ولا ايه؟
ونداء لقيادات الجيش اللي نزلت البيان وقالت انها ما ادتش اوامر باللي حصل - وانا متأكدة مليون في المية انهم فعلا ما ادوش اوامر باي حاجة من دي - انهم ما يبقوش يسمحوا للجيش انه يختلط بالشرطة... ده بجد يعني
احنا مطالبنا واضحة واضحة واضحة:
اكررها تااااااني:
اقالة حكومة شفيق وتشكيل حكومة كفاءات وطنية - وفيه مائة اسم مطروحين للمجلس العسكري - وما يبقاش فيها اي من رموز النظام السابق، وتريحونا بقى من رؤساء التحرير ومجالس ادارات الصحف القومية اللي بيقرفونا في حياتنا
تبتدوا برؤوس الفساد في التحقيقات مش ديولها، يعني على رأسهم جمال مبارك وصفوت الشريف، والاتنين دول لو اتحقق معاهم واتعاقبوا حتوفروا على نفسكم تحقيقات كتير لانهم حيكروا كل الفساد اللي في البلد بدل ما النائب العام بيقول احنا محتاجين كل وكلاء النيابة في مصر يشتغلوا معايا... هات جمال مبارك وصفوت الشريف والليلة كلها حتخلص، وعمر سليمان حييجي في السكة معاهم
تحلوا لنا امن الدولة وتشوفوا لهم شغلانة شريفة نافعة للبشرية بدل ماهم مشكلين مافيا كده وبيرازوا في مخاليق ربنا
وبمجرد ما يتم تشكيل حكومة كفاءات كل المعتقلين السياسيين حيخرجوا ومشاكل العمال حتتحل وبكده يبقى مش محتاجين اعتصامات ومش محتاجين نتكلم في تفاصيل
وبمجرد ما تحلوا امن الدولة وتشغلوهم شغلانات شريفة كل البلطجية حيختفوا
وبمجرد ما تقدموا جمال مبارك وصفوت الشريف للتحقيق كل الفاسدين حقعوا
بس يتعمل لنا التلات حاجات دول ولو اتعملوا وحد نزل تاني سيبوهولي انا بقى، انا اللي حانزل بعصايا الغلية ألمهم
عدانا العيب؟
عدانا العيب... والمسامح كريم... وصافي يا لبن.. حليب يا قشطة
--------
بالنسبة بقى لمجموعة بني اسرائيل اللي عمالة تقول لنا: أوذينا من قبل أن تأتينا ومن بعد ما جئتنا... وخلصوا بقى.. وكفاية بقى.. مش حاقول غير حسبي الله ونعم الوكيل
ناس اتعودت على العبودية وعاملة زي بني اسرائيل لما كانوا بيقعدوا يزهقوا في سيدنا موسى: انت حتقعد تأكلنا من البتاع ده؟ انا عايز طبق عدس من اللي امي كانت بتعملهولي هناك في البلد
انتوا مش قعدتوا تشتكوا تشتكوا تشتكوا وتعيطوا؟ طب احنا سمعناكم ونزلنا اتبهدلنا وانضربنا واتقتلنا عشان نغير لكم الحال وبدل ما تعيشوا وتموتوا عبيد وتقعدوا تشتكوا زي الولية نغير الحال.. دي ثورة، فاهمين يعني ايه ثورة؟ ماحدش بيخلص الثورة عشان عنده شغل بكرة الصبح وبيتخصم له لما بيتأخر، ارجعوا عبيد بقى ولا ربنا يكتب علينا كلنا التيه اربعين سنة، بس على الله حد فيكم يشتكي تاني

Saturday 26 February 2011

تصريح القوات المسلحة في التلفزيون

تحديث:
الدستور المعدل دستور مؤقت كما ورد في الخبر
يبقى فاضل لنا التلات مطالب اللي قلناهم... شوفوا بقى حتتفقوا على ايه، بس المهم تتفقوا وتحشدوا صح.
--------------
قالوا اللي فضيناهم ما كانوش متظاهرين، دول كانوا متواجدين بعد حظر التجول وعادة مافيش تظاهرات بعد حظر التجول، وقالوا قبضنا على 27 واحد طلع منهم تمانية بلطجية، وكان فيه ناس بتحدف ازايز فارغة على الجيش، واحنا بنأسف اذا كان سباب حد من شباب الثورة اتأذى بس كان فيه بلطجية مندسين وسطهم
طيب.. انا مش حادخل في مناقشات ولا مهاترات في الحادثة، الاعتصام كان دايما بيبقى بعد ساعات حظر التجول وكنا بننام في الشارع وكانوا بيسيبونا، فيه 8 بلطجية وسط 27، ده ممكن يصاغ بجملة تانية: فيه 19 بريء اتقبض عليهم، انا ما شفتش ازايز فارغة اتحدفت على الجيش عن المجلس، بس الله اعلم، يمكن حصل في الميدان، اذا كان فيه بلطجية اندسوا وسط المتظاهرين.. الله اعلم، بس البلطجية كانوا بيندسوا وبيدخلوا على المتظاهرين وبيضربوهم وبيقتلوهم زي يوم الاربعاء الدامي.. وما شفناش ضرب من القوات المسلحة لا للمتظاهرين ولا للبلطجية
على اي حال
خلاص... الموضوع ده اتقفل، واللي حصل حصل، وياريت ما يتكررش تاني، ماحدش يمد ايده علينا تاني، احنا ما اتبهدلناش كل البهدلة دي عشان نفضل ننضرب، ولو فيه بلطجية احنا اول الناس بنمسكهم ونسلمهم للقوات المسلحة، واذا كان الجيش بيأسف لشباب الثورة، شكرا وعلى راسنا، بس شباب الثورة مش عايز اسف من القوات المسلحة
شباب الثورة عايز مطالبه تتحقق، واذا كان القوات المسلحة مش عارفة تسرع في تحقيق مطالبنا، ممكن تستعين بمجلس رئاسي
1- صفوت الشريف وجمال مبارك يتقبض عليهم...... اييييييوووووووةةةةةةة اييييييييييوووووووووةةةةةة
اذا كان الجيش بيتكلم عن اندساس بلطجية، انا مصدقاه، بس احنا عشرة مع النظام ده ونعرفه اكتر منهم، ماحدش بيحرك البلطجية غير صفوت الشريف وجمال مبارك
وجمال مبارك رفض يقدم اقرار ذمة مالية... تتجمد كل فلوس جمال مبارك، وبما انه رفض تقديم اقرار ذمة مالية، يبقى يتقبض عليه، وصفوت الشريف يتقدم للتحقيق وتتجمد امواله، ويتحقق بالذات في موضوع البلطجية ده ويتجاب صفوت الشريف وجمال مبارك
2- حل امن الدولة
3- اقالة حكومة شفيق وتشكيل حكومة كفاءات من شخصيات مالهاش علاقة بالنظام البائد
4- المطلب الرابع محتاجة اتأكد انه اتحقق، اللي هو الدستور المؤقت، المستشار طارق البشري قال حاجة بالمعنى ده، بس عايزة ايضاح اكتر عشان نفهم كلنا، احنا مش قانونيين
بس كده
انا شخصيا باقترح جدول زمني
الاسبوع ده يتم تجميد اموال جمال مبارك واعتقاله لانه رافض لتقديم ذمة مالية وتقديمه بتهم التورط في الفساد بوصفه امين السياسات السابق، ويتم القبض على صفوت الشريف والتحقيق معاه في قضايا الفساد (وماحدش يدخل يحط لي اسامي كل واحد غايظه، كفاية قوي نجيب جمال مبارك وصفوت الشريف عشان العجلة تكر لوحدها، دول في ديلهم بلاوي، نجيبهم بس وربنا يسهل)
واقتراحي ان لو ده حصل الاسبوع ده يبقى ما ننزلش الجمعة الجاية
الاسبوع الجاي اقالة حكومة شفيق وتشكيل حكومة كفاءات وطنية مافيهاش ولا رمز واحد من رموز النظام ولا عضو واحد في الحزب الوطني
ولو اقيلت الاسبوع الجاي ما ننزلش الجمعة اللي بعدها
الاسبوع اللي بعده يتم حل جهاز امن الدولة ولو ده حصل الاسبوع البعد الجاي.... يبقى كل واحد يروح بيتهم
اظن وقت كافي اهو، وجدول زمني، بمطالب واضحة، وكل مطلب يتحقق في اسبوعه ما ننزلش جمعته 
ده مجرد اقتراح مني، وشايفة اننا لو نفذناه يبقى عدانا العيب وقزح، وفيه وقت كافي للمجلس الاعلى للقوات المسلحة مدام هو بيحب يعمل كل حاجة بالراحة وعلى مهله.. اهم تلات اسابيع طوال عراض اهم، بس نحس ان فيه استجابة لمطالبنا
وبكده، احنا نستعيد الثقة، وهم يستعيدوا الثقة برضه
---------
ملحوظة:
امبارح في وقت الضهر كده لما كنت في الميدان بعت لخالد عبد الحميد - عضو ائتلاف شباب ثورة الغضب - اقترح عليه موضوع الجدول الزمني ده - واللي هو اقتراح بلال فضل اساسا - عشان ما يبقاش مولد سيدي جمعة كل جمعة وما ردش عليا
يا ريت بما ان ائتلاف شباب ثورة الغضب هم دلوقت اللي بينظموا وبيتكلموا مع الجيش وبيتكلموا في الاعلام، يبقى هم الملزومين بموضوع الجدول الزمني ده وهم اللي يقولوا عليه للمجلس الاعلى للقوات المسلحة بما انهم على اتصال بيهم، وهم يعلنوا عنه بما انهم هم اللي بيتكلموا مع الناس والاعلام المصري قابلهم يوجهوا الناس
وكده يبقى احنا ارتاحنا وريحنا القوات المسلحة
ولا ايه؟ 
انا شخصيا... مقموصة.. اه.. زعلانة.. زعلانة زعلانة زعلانة وحاسة ان كل حاجة بتضيع وان كل حاجة بتتوضب عشان جمال مبارك او عمر سليمان يمسك وصفوت الشريف يطلع لنا تاني بما انه مستر اكس مالوش نهاية، اقصد من ناحية الثورة المضادة
ومن ناحية الجيش حاسة انه بيطبق حظر التجول والظبط والربط في الشارع اسرع ما بيستجيب لمطالب الناس
ومن ناحية الثوار حاسة ان كل واحد بيهوبص وبيجتهد بدماغه وما عمالين يفصلوا من بعض ويفكوا من بعض وده مش عاجبني
وانا شايفة ان ائتلاف شباب ثورة الغضب مسئول مدام حمل نفسه المسئولية، مدام قرر ان الناس تثق فيه، وقرر انه يتكلم مع القوات المسلحة، وقرره يطلع بيانات مع وضد، يبقى هو مسئول يصلح وضع الثورة والا لو ما عملش كده يبقى ذنبنا في رقبته، اللي يشيل مسئولية يسأل عنها
فدلوقت بقى اذا ما كانش الثوار يوحدوا نفسهم تاني ويعملوا حاجة لها راس ورجلين
واذا ما كانش الجيش يعبرنا وبدل ما كل اللي يهمه انه يمسك لنا الساعة لحظر التجول يبتدي يطبق لنا مطالبنا
انا حاقفل ضرف المدونة دي ومش عايزة ابص في خلقة حد تاني... يالا بقى اشربوها، وعليه العوض ومنه العوض
عليه العوض ومنه العوض
عليه العوض ومنه العوض 

شيل كفنك واحفر قبرك وانزل التحرير

مسامحينك من قبل ما تعتذر... الخناقة مش معاك.. احنا عارفين طريقنا كويس، وعارفين عدونا كويس، وعشان كده كنا بنطلب منك تسمع كلامنا... كله خير ان شاء الله
---------
مبارك بيتناصح علينا؟
ما عاش ولا كان اللي يفتكر نفسه بيضحك علينا... ده احنا المصريين، نودي اتخن تخين البحر ونرجعة عطشان، احنا طيبين اه، عبط لا، ومش عشان كل اللي حواليه اغبيا افتكر نفسه نبيه
ها؟ اخر حلقات الثورة المضادة ان تحصل مواجهة بين الجيش والشعب؟ ها؟ ده اخر ما جادت عليك بيه المنوفية يا مبارك؟ طب احنا عندنا منايفة انبه منك كتير، ده انت عريت المنايفة
احنا شايلين اكفانا وحافرين قبورنا
وآدي رسالة للجيش المصري باسم الشعب المصري، وايوة باتكلم باسم الشعب لاول مرة في حياتي، وانا ضامنة برقبتي، باسم الخمسة وتمانين مليون بني ادم:
مش حنرفع ايدنا على الجيش المصري، ولا حيطلع من بقنا له غير كل خير، وكل بر، وكل طيبة... واذا احنا هُنّا عليه وقرر يموتنا، احنا بنوعده اننا رافعين ايدينا لفوق، ايادي عزل، وحننام له كمان تحت الدبابة عشان ما نتعبوش في الجري
لئن بسطت يدك إلي لتقتلني ما أنا بباسط يدي إليك لأقتلك... ولا أزقك، ولا حتى أمنعك إنك تقتلني
مش احنا... مش احنا ابدا، ومافيش حد، مهما يعمل، حيعرف يلتف على ثورتنا، واللي احنا عايزينه هو اللي حيحصل، احنا اصحاب الثورة، واحنا اصحاب التضحية، واحنا اصحاب الفلاح... واللي عايزينه هو اللي حيحصل إن شاء الله
يا ريتك بقى يا مبارك تلم تعابينك عشان ما تتعبش قلبك.. سنك ما يستحملش
احنا قلبنا ما بيتعبش، ما عادش خلاص، قلبنا تعب لحد ما نحس، وبعد ما شفنا الجيش بيضربنا مش باقيين على الدنيا دي
اللي عايز يموتنا يموتنا... ويبقى كسب فينا جميلة، واحنا مش حنمنعه يقتلنا، ولا حنمد ايدنا بالسوء، ولا حنلطخ صوابعنا بالشر
مبارك كان دايما يقول للامريكان: انتوا اصلكم ما تعرفوش الشعب المصري
وانت يا مبارك ما تعرفش الشعب المصري
مصر ام الخير... واحنا الخير
والخير له الكلمة الاخيرة

Friday 25 February 2011

من اجل ثورة كاملة

الجروب هنا، بس انا مش عارفة اشترك في اي حاجة عشان الفيس بوك قفل على صباعي، بافكر اعمل اكاونت تاني سري 
وده نص البيان




إن ثقتنا فى رجال القوات المسلحة والمبنية على الموقف الوطنى الذى اتخذته أثناء الثورة تعتبر من الثوابت التى لا نسمح لأحد بالمزايدة عليها. ولوعينا بوجود قوى مضادة تسعى للإفلات من المحاسبة والاستيلاء على السلطة مجددًا. فإننا نؤكد على أننا مستمرون فى ثورتنا ضمانا لتحقيق مطالبنا كاملة احتراما لتضحيات الشعب ودماء الشهداء.


أولا: الرفض التام لكل محاولات الإبقاء على حكومة الفريق أحمد شفيق والإصرار على الاسقاط الفورى لهذه الحكومة الفاقدة للشرعية والتى اقسمت يمين الولاء أمام رئيس وصل الى منصبه عبر شرعية زائفة (تزوير صناديق الاقتراع) سقطت تماما فى الخامس والعشرين من يناير بخروج الشعب مطالبا باسقاط نظام هذا الرئيس.


ثانيا: عدم الاكتفاء بتعطيل الدستور الحالى واعلان الغائه التام.مع اصدار ميثاق وطني مؤقت (وثيقة دستورية) يشمل المواد المعدلة بعد الموافقة الشعبية عليها فى استفتاء يجرى تحت اشراف قضائى كامل، بالاضافة الى اعتبار المبادئ الواردة بكافة المواثيق الدولية المتعلقة بالحقوق والحريات سارية فى تلك الوثيقة الدستورية ويتمتع بها المواطنين المصريين. على أن يسقط العمل بهذا الميثاق الوطنى بمجرد اقرار دستور جديد تضعه لجنة تاسيسية منتخبة تضع دستورا جديدا يلبى آمال الشعب المصرى ومطالبه فى دولة مدنية ديموقراطية تحكمها المؤسسات.ويعد اسقاط هذا الدستور (الذى جرى ترقيعه لسنوات لخدمة القوى غير الديمقراطية التى تولت حكم البلاد فى الاعوام المنقضية) اسقاطا لفرص فلول نظام الرئيس مبارك فى العودة عبر وجوه واقنعة جديدة.خاصة وان اسقاط هذا الدستور يعنى الاسقاط الكامل للنظام.


ثالثا: نرفض كافة محاولات الالتفاف على المطلب الشعبى الخاص بالمحاسبة الفورية لكل من تسبب فى اراقة قطرة دماء مصرية فى محافظات مصر المختلفة وكل من تسبب فى اصابة او اعاقة مواطن مصرى سواء بتوجيه الأمر أو عبر تنفيذه. ونخص بالذكر قيادات وزارة الداخلية التى مازالت تنكر على لسان وزيرها اللواء محمود وجدى وجود أى دور لها فى الاعتداء على الثوار السلميين خلال الايام الثمانية عشرة الأولى من ثورتنا الشعبية. رغم وجود شهادات عدة وثقها المواطنون من المدنيين وابناء جهاز القوات المسلحة تثبت تورط عناصر من الوزارة فى هذه الجرائم المرتكبة ضد الشعب وضد الانسانية. ونؤكد أن بناء الثقة بين المواطن وأجهزة الأمن مرهون بالمحاسبة وتطهير الأجهزة الأمنية.


رابعا: العمل على الغاء اجهزة القمع الامنية وبخاصة جهاز مباحث أمن الدولة الذى تورطه فى جرائم عدة ضد الانسانية عبر ثلاثين عاما قضاها الرئيس المخلوع فى الحكم وقضاها الجهاز فى خدمته، بالاضافة للعمل على اعادة هيكلة باقى الاجهزة التابعة للوزارة ومن بينها قطاع السجون التى سجلت منظمة العفو الدولية تجاوزاته فى حق المسجونين وجهاز المباحث الجنائية الذى ثبت لسنوات لجوء عناصره لانتزاع الاعترافات عبر التعذيب عوضا عن استخدام الاساليب الشرطية والعلمية للبحث الجنائى.


خامسا: الافراج الفورى عن المعتقلين لدى الاجهزة المختلفة والتحقيق فى حالات الاختفاء القسرى والتى تدفع المواطنين للتشكك فى وعود الإفراج عنهم .


سادسا: نؤكد عبر هذا البيان تضامننا الكامل مع مطالب العمال المشروعة وكل ما يتخذوه من اجراءات فى سبيل تنفيذها بما فى ذلك الحق فى الاعتصام والاضراب بما لا يعطل عجلة الانتاج. خاصة وان مطالبهم المشروعة المتمثلة فى رفع الحد الادنى للاجور وتطهير المؤسسات تتفق مع اهداف الثورة فى التغيير والعدالة الاجتماعية. ونهيب بعمال مصر تنظيم مواقفهم الاتجاجية اسوة بعمال المحلة الذين استطاعوا الضغط لتنفيذ مطالبهم دون ان يتوقف الانتاج بمصانعهم. مع التأكيد على حقهم فى اتخاذ الاجراءات التنظيمية اللازمة لاصلاح وتطهير نقاباتهم.


ونؤكد بما لا يدع مجالا للشك لدى أى طرف أن الثورة ودماء الشهداء هى المرجعية الوحيدة لمشروعية أى قرارات للمجلس العسكرى. وعليه فان أية قرارات تأتى مخالفة لمطالب الثوار هى قرارات باطلة ومنعدمة الشرعية بالتبعية.




Thursday 24 February 2011

رفعت القاعدة

بمناسبة ان القذافي قال ان القاعدة هي اللي بتحرك الثورة وبن لادن بيوزع حبوب هلوسة على الثوار