Friday, 31 December 2010

سنة جديدة ان شاء الله تبقى سعيدة

بنختم السنة بكفاح الشعب التونسي ضد الطاغية الغاصب المحتل، وبالرغم من انه عمل تعديل وزاري، وغير المحافظين بتوع المدن الثائرة، وطبعا غيرهم لانهم مش قمعيين كفاية، الا ان التونسيين مستمرين في انتفاضتهم، ويارب ينصرهم
وزي ما قلنا ولسه بنقول، الكلاب المنافقين اللي مشغلين الطاغية لحسابهم ماحدش فيهم تدخل ولو بكلمة بالرغم من ان لسه فيه شاب استشهد امبارح، وبالرغم من الرقابة اللي بيفرضها على الانترنت، بل فيه حالة تعتيم وتجاهل من الاعلام العالمي 

SAYEB.SALEH.S01E01.GENESIS.VOST.ENG from Malek404 on Vimeo.
وقطع عنهم النور، وبعدين قطع عنهم الانترنت زي فيلم طير انت، وابتدا يصادر الهواتف المحمولة اللي فيها كاميرا، وبرضه مش عارف يقف قصاد الشعب التونسي، والله اكبر عليه وعلى اللي مشغلينه لحسابهم وطالقين ايده في الشعب التونسي المختطف، وينصرهم يا رب، وعقبال كل الدول العربية
السنة دي كانت حافلة بالاحداث، كلها احداث جسام، لكن كلها تتسم بانها احداث كاشفة بطريقة تخلي مافيش مجال للمواقف الرمادية ولا الشك، ونقدر نسميها بجدارة: سنة الشغل على مية بيضا
كل حاجة الحمد لله بقت اوضح البحر اهو البحر اهو.. وكل قناع سقط الحمد لله، ولسه فيه اقنعة صغيرة حتسقط كتبعة ان شاء الله
برضه بنختم سنة 2010 باعتقالات في الولايات المتحدة ضد المشاركين والمتعاطفين مع ويكيليكس، الكلام ده قاله اسانج في الجزء التاني في برنامج بلا حدود
واذا كانت امريكا بتلفق قضايا، وبتعتقل المتعاطفين مع ويكيليكس "المحظورة"، وبتحجب مواقع على الانترنت، وبتهاجم موقع ويكيليكس، امال بنت الكلب بتكلمنا عن الديمقراطية ليه؟ دي عاملة زي زين العابدين بن علي بالظبط يعني
برضه دي من الحاجات الكاشفة، مش لاني انا شخصيا كنت مخدوعة في الولايات المتحدة، انا شخصيا كنت باصنفها قوة قمعية ديكتاتورية الأسوأ في العالم، ونعد بالضحايا، مين غيرها في تسع سنين قتل تلاتة مليون ونص؟ بس فيه معاتيه بيتعاملوا معاها على انها رمز الحرية والديمقراطية، وكانوا بيقولوا انها "مش قمعية مع ناسها" وبصرف النظر عن عنصرية الكلام ده، لان الناس ناس، جوة او برة امريكا، اهي بقت قمعية وبتطارد صحفي وبتحبس المتعاطفين معاه من مواطنيها.. الحمد لله مافيش مجال للعته بقى
ومافيش مجال للعته في حاجات كتير، فيما يخص المعارضة المصرية، وفيما يخص الانتخابات، وفيما يخص سياسات النظام اللي تاكد بما لا يدع مجال للعته انه مقوقس مصر وكيل الاحتلال.. ما عادش حد يسميه الفرعون تاني، انا كنت مسمياه الفرعون وانا اسفة، كنت عبيطة وجاهلة، الفرعون كان مستقل
ده المقوقس.. يدوبك زي ما سيدنا محمد قاله: عظيم المصريين.. اللي هو الشديد بتاع القعدة يعني.. وفي الاول ما كلموش هو، كلم قيصر الروم الاول، وبعدين راح بعت له يمكن يبقى عنده كرامة ويحب يعني يستقل ولا حاجة
وامريكا مش دولة ديمقراطية، امريكا امبراطورية رومانية بكل ما في الامبراطورية الرومانية من توحش.. 
والحكام العرب ولاة عكا، يدوبك ولاة.. ما يجيبوش ملك ولا رئيس ولا امير، دي كلها القاب جبر خاطر
واسرائيل مش حتكمل اكيد.. خلاص بانت اهي، مش حتكمل ابدا ان شاء الله
وخلاص، عرفنا اولنا فين واخرنا فين، عشان اللي ياخد موقف ما يبقاش متلخبط ولا مستعبط كمان، واللي كان عايزه بن لادن بتقسيم العالم الى فسطاطين، حصل: فسطاط امبريالي لا حر فيه، وفسطاط احرار لا امبريالي فيه، او: فسطاط مفتريين لا غلبان فيه، وفسطاط غلابة لا مفتري فيه، في كل تفصيلة في العالم، وكله موصل على بعضه والخيوط الموصلة كلها بانت ووضحت والسلك اهو يا عم، ما تعمليش عبيط بقى وتقول لي احنا خلينا في مصر واللي يعوزه البيت يحرم على الجامع.. سلك البيت طالع من بوكس الجيران والفيشة بتاعته داخلة في كوبس المشترك بتاع العالم والمشترك بتاع العالم في ايد قوة قاطعة علينا النور، ما تقعدش في البيت تغير اللمض وتستغرب: اللمبة جديدة.. امال مش بتنور ليه؟ المشكلة مش في اللمبة، المشكلة في المشترك ... مقفول يا عم، واللي بس بيشاور على المشترك ويقول: الحقوا دول قافلين المشترك وانتوا عمالين تغيروا اللمض.. بيبقى ارهابي، حتى لو - سبحان الله - مش مسلم يعني
هارش؟
برغم كل الاهوال اللي حصلت السنة دي.. الحمد لله عليها، وسنة داخلة علينا جديدة، وان شاء الله سنة سعيدة، ان شاء الله... اوحش حاجة في الدنيا التوهة، والحمد لله، ادي كل واحد عرف واتعرف هو حاطط رجله فين وما بقاش فيه توهة، ناقص بقى الخناقة، ماهي مش حتتساب كده من غير خناقة
السنة دي برضه شهدت بزوغ لنجم الاخوة الطيبين قوي دول اللي اسمهم الاناركيين، وطبعا ماحدش حيشوفهم طيبين غيرنا في هذه المنطقة المنكوبة من العالم، اقصد العوالم العربية والاسلامية والافريقية ويمكن امريكا اللاتينية واي حد غلبان وطالع ترابتنتينه في الحياة، واحنا بنرحب بيهم وبنقولهم: عاطف عاطف تعالى فيه مكان
على دخول السنة الجديدة السودان حتتقسم، وكمان طالعين في دارفور عايزينها تبقى ولاية لوحدها، وده مش حيعدي بالساهل، اقصد انها حتتقسم وكل حاجة.. بس حتحصل كارثة تتطلب مواجهات
الاضرابات تجتاح العالم، وبطلت عندنا مش عارفة ليه؟ ههههههههههههه احنا عسل قوي، بس نحب نقول برضه ان لنا الريادة وكنا بنعمل اضرابات والعالم عمال ياكل في قتة محلولة وبعدين هم بيتهم اتخرب وعملوا اضرابات وسألناهم فاضي يا اسطى قالوا لنا فاضي قلنا لهم انا بقى مش فاضي
وبمناسبة الريادة، بعد موضوع تونس ده طلبت معايا اسمع الاناشيد الوطنية بتاعة كل الدول العربية ولاول مرة اتأمل جملة في نشيدنا الوطني: وعلى كل العباد كم لنيلك من ايادي.. احنا بنعاير الناس حتى في نشيدنا الوطني؟ :) والنبي احنا عسل، لا بجد، ازاي نقول للناس كده في نشيدنا الوطني؟ وبعدين طبيعي اذا كنا بنقول كده في النشيد الوطني اللي فضلنا طول فترة المدرسة نغنيه الصبح ان تطلع دي شخصيتنا، ماهو اتزرع في عقلنا الباطن خلاص هههههههههههههه
بس احنا عملنا حاجة حلوة قوي، واظنها تقدم، في نفس يوم ماتش الاهلي والزمالك، واللي كان زمان اليوم بيبقى ميت من اول النهار، بس في نفس اليوم ده كان فيه مظاهرة ضد مولد ابو حصيرة والمظاهرة كانت كبيرة، ودي حاجة حلوة اظنها ما حصلتش قبل كده في يوم يبقى فيه ماتش بين اهلي وزمالك
وحنبقى نوضح موضوع مولد ابو حصيرة عشان فيه ناس ابتدت تهلوس وتقول مولد السيد البدوي في لندن وتخاريف كده، بس المختصر يعني، ان الاهالي رفعوا قضية لمنع المولد والمحكمة حكمت لهم حكم نهائي، مش لانهم بيكرهوا اليهود، بس لان ماحدش بييجي للمولد ده غير الاسرائيليين، وغير ان الاهالي مش عايزين اسرائيليين في مدينتهم، الامن بيحبس للزوار الاهالي ويفضلوا طول فترة المولد ما يعرفوش يبصوا من الشباك، وما اظنش ابدا ان فيه مولد في الدنيا كلها الامن بيخلي المدينة من اهاليها عشان الاغراب يحتفلوا بمولد ديني، الاسرائيليين اهم حاطين ايدهم على مقدساتنا ومقدسات المسيحيين ولما حد بيروح يحج بيعملوا فيه كده وماحدش بيحوشهم ولا يحبسهم





يعني سارقين البلد ومطلوقين على الحجاج يسبوا لهم الدين، واللي عاجبه ع الكحل يتكحل واللي مش عاجبه يترحل، واحنا اصحاب البلد ابا عن جد يحبسونا عشان هم ييجوا يقرفونا في بلدنا من غير ما نزعجهم وكمان حاجة مش اصيلة في الديانة اليهودية ومافيش ح معتقد فيها من اليهود غير الصهاينة، بس انا مبسوطة من المظاهرة يوم الماتش ولو اني مش عارفة مدى صحة الكلام ده
عموما انا باحب النشيد الوطني، ولما باسمعه باقوم اقف، اه والله، حتى وانا قاعدة في الاودة لوحدي، انا اصلي التربية القومية كانت مأثرة فيا قوي، هم لسه بيدوا العيال تربية قومية؟ ولا اعتبروا من اللي حصل لنا وبطلوا؟
قوموا اقفوا بقى
  


يا بلادي عيشي حرة واسلمي رغم الأعادي

Thursday, 30 December 2010

وبعد ما هديت.. ايها الاخوة الزملاك نادي الزمالء

لو مش حتغلبوا الاهلي في هذه اللحظة التاريخية اللي تحول فيها لدار مسنين وبقى في حالة لا يرسم لها... حتغلبوه امتى؟ ها؟
لا.. ماحدش يحوشني على فكرة.. لا الزمالك ولا المسيحيين ولا الجمعية الوطنية للتغيير حيصعبوا عليا بعد كده
انتوا ايه اللي عملتوه النهاردة ده؟ ها؟ ايه.. ايه؟ بجد يعني، ده كان ايه اللي انا شفته ده؟
ليه؟ ايه الازباب يعني؟ دي اول مرة من ساعة ما اتخلقت اسمع كذا اهلاوي قبل الماتش يقول: احنا حنتغلب النهاردة
مالكم؟ اللون الاحمر بيعمل لكم ايه بالظبط؟ انتوا فاكرين الجايات اكتر من الرايحات؟ ابسلوتلي.. الرايحات الله يرحمات.. مش جايات تاني ولا بالطبلات البلديات يا عالم يا نحس  
يارب يكون حسام ضربكم في اودة اللبس

صباح الخير يا تونس



يوم الاحد القادم 2 يناير الساعة خمسة وقفة تضامنية مع الانتفاضة التونسية في طلعت حرب ان شاء

Wednesday, 29 December 2010

لتونس من قلوبنا سلام

ارجل شباب.. احسن ناس.. ومش مستنيين من اوباما القذر يعبر عن "بالغ اسفه وقلقه" ولا الامم المتحدة الوسخة، ولا الاتحاد الاوروبي المنافق، الراجل بيفتح الرصاص على الناس، والعيال بتولع في نفسها ودول ودن من طين وودن من عجين




جندوبة تنتفض



الشرطة التونسية تخرب بيوت الاهالي




بيان الشبكة العربية عن احداث تونس، بينوشيه العرب يقابل الاحتجاجات السلمية بالرصاص

ده الاستاذ عبد الرؤوف العيادي نائب رئيس المؤتمر من اجل الجمهورية، كان قد تم اختطافه وتعذيبه بهذا الشكل









شددوا الدعاء لتونس وأهالي سيدي بوزيد، يرفع عنهم وعنا البلاء والظلم وينصرهم يارب
الجدعان.. بيحيوا تونس وصحبتها ومجالها، والدعاء للشهداء بالرحمة، وللمعتقلين بالحرية، ولسيدي بوزيد وتونس كلها بالفرج العادل، ولابن الهابلة ده: 



يشفي الكلاب ويضرك
ولما تسمعه تفتكر النكتة اللي بتقول: واحد راح القسم وقال للظابط عايز اترشح رئيس جمهورية
الظابط قال له: انت اهبل؟
الراجل رد: هو شرط؟

Monday, 27 December 2010

Saturday, 25 December 2010

لا شيء يهبل اكثر من الهبل ذاته

محمد توفيق على التويتر قال لي ان الريس بيقول: لا شيء ينجح أكثر من النجاح ذاته، انا طبعا ما صدقتوش، حيث انه انسان مغرض ومشكك ومتشكك، ولا شيء يشكك اكثر من الشك ذاته زي ما كلنا عارفين، فقررت اقرا لان لا شيء يقرأ
اكثر من القراءة ذاتها، ايه ده؟ ايه الفتوح دي كلها؟
في ما يلي نص كلمة الرئيس مبارك أمام المؤتمر السنوى للحزب الوطني
الأخوة والأخوات أعضاء وقيادات الحزب الوطنى الديمقراطى ..

- الضيوف الأعزاء ..

- السيدات والسادة ..

أرحب بكم جميعا .. ويسعدنى أن أتحدث اليكم فى مستهل مؤتمرنا السنوى السابع .

أعرب لكم عن تهنئتى بالاداء المتميز للحزب ومرشحيه فى الانتخابات الاخيرة لمجلس الشعب .. وأتطلع معكم لمؤتمر ناجح .. ومناقشات مفيدة لقضايا الوطن والمواطنين .. تعزز عطاء الحزب من أجل مصر وشعبها .. تعطى عملنا الحزبى والوطنى دفعة جديدة الى الأمام .. وتؤكد دور الحزب الوطنى الديمقراطى ..كحزب للاغلبية.

نلتقى معا اليوم .. بالعديد من أعضاء الحزب وكوادره وقياداته .. وممثلى الوحدات الحزبية والهيئة البرلمانية .. جاءوا من كافة المحافظات .. تجمعنا معا مسيرة العمل الوطنى والحزبى .. والاجتهاد فى خدمة الوطن.

إننى أعبر لهم .. ولكم جميعا .. عن مشاعر الاعتزاز والتقدير . أشد على أيدى رموز الحزب وأعضائه ممن تواصل عطاؤهم عبر السنوات الماضية .. وأتوجه بالتحية لشباب الحزب وشاباته .. طليعة تطويره .. ومصدر قوته وحيويته المتجددة.

نلتقى اليوم .. بعد انتخابات حاسمة لمجلس الشعب .. استعد لها الحزب منذ عام 2005 بتطوير متواصل على المستوى التنظيمى وجهود جادة لتنفيذ برنامجه خلال السنوات الخمس الماضية وبرنامج طموح للسنوات الخمس المقبلة.

إننى أتوجه بالإشادة لما كشفت عنه هذه الانتخابات من مستوى رفيع للالتزام الحزبى .. وأتوجه بالتحية لقيادات الحزب وكوادره لمن تم ترشيحهم ولمن لم يرشحهم الحزب (الاحياء منهم والاموات) وأتوجه بالتهنئة لمن فاز من مرشحى الحزب مع تمنياتى بنتائج أفضل فى المستقبل لمن لم يحالفهم التوفيق.

لقد جاءت نتائج الانتخابات لتثبت من جديد أن العمل الحزبى يظل رهنا بالتواصل مع الشارع المصرى بمشاكله وهمومه وآماله وبقدر ما تحققه الأحزاب من تطوير وإصلاح فى هياكلها وبنائها المؤسسى وكوادرها وفيما تطرحه من فكر ورؤى وبرامج عملية قابلة للتنفيذ.

لقد أثبت الحزب دائما انفتاحه على كل فكر جديد يعى واقع المجتمع المصرى وينحاز لمصالح الوطن والمواطنين . خضنا بهذا الفكر الجديد الانتخابات التشريعية عام 2005 ببرنامج حاز ثقة الشعب وخضنا به الانتخابات البرلمانية الأخيرة ببرنامج طموح يبنى على ما حققناه حتى الآن .. يعى شواغل وهموم وأولويات المواطنين ويحتضن آمالهم وتطلعاتهم للحاضر والمستقبل الأفضل.

خضنا انتخابات مجلس الشعب مدركين ـ كعهدنا ـ أن العمل الحزبى والوطنى مسئولية وعطاء . نعلم تماما أن ما حققه الحزب من أغلبية كبيرة تقابله مسئولية كبرى داخل البرلمان وخارجه خلال المرحلة المقبلة نمضى بتجربتنا الديمقراطية خطوات للأمام نؤمن بأن الديمقراطية ثقافة نسعى لنشرها وممارسة تتدعم قواعدها وسلوكياتها عاما بعد عام .

وأقول مخلصا .. إننا فى الحزب الوطنى ننأى بأنفسنا عن إحتكار العمل الوطنى والحزبى . نتطلع لتعزيز التعددية والمنافسة الشريفة ونشجع على ذلك ونسعى إليه .

نواصل العمل فى خدمة الوطن والمواطنين .. نجتهد من أجل العطاء لمصر والمصريين ونرحب بكل اجتهاد يدفع بنا وبشعبنا ووطننا الى الأمام .

-الإخوة والأخوات ..

لقد بدأنا مع مطلع هذا العقد برنامجا شاملا للاصلاح .. وفق رؤية إستراتيجية واضحة ومحددة . وضعنا الأسس اللازمة لبناء دولة مدنية حديثة .. بإصلاح سياسى طور بنيتنا الدستورية والتشريعية . كانت التعديلات الدستورية نقطة تحول جوهرية فى مسيرة الديمقراطية على أرض مصر . تعديلات هى الأكبر والأشمل فى تاريخنا المعاصر .. أرست مفهوم المواطنة كأساس للحقوق والواجبات .. فى مجتمع مدنى حديث .. يحقق المساواة بين كل المصريين .. بغض النظر عن الدين أو العقيدة أو أى اعتبار آخر .

تعديلات دستورية .. فتحت الباب - ولأول مرة فى تاريخنا - لكى ينتخب المصريون رئيسهم بالإقتراع الحر المباشر .. حققت المزيد من التوازن بين السلطتين التشريعية والتنفيذية .. وأفسحت المجال للأحزاب السياسية للمشاركة فى عملية التحول الديمقراطى .. ولتصبح محورها ومحركها.

إصلاح دستورى .. أتاح آفاقا جديدة لمشاركة المرأة فى الحياة السياسية .. لتحتل مكانتها فى العمل السياسى .. ولتتوج المكتسبات التى حققتها المرأة المصرية عبر مسيرتها .. كما عزز هذا الإصلاح مفهوم اللامركزية .. واستقلال القضاء.

وفضلا عما حققناه من إصلاح سياسى .. فقد قام برنامجنا للاصلاح الإقتصادى على تحول هام وجذرى .. لإعادة صياغة دور الدولة من كونها المحرك الأوحد للنشاط الإقتصادى .. والمصدر الرئيسى للتشغيل .. إلى دور جديد ومتطور .. يضع الأطر المنظمة للنشاط الإقتصادى .. يفسح المجال للقطاع الخاص .. يتابع ويراقب أداء الإقتصاد .. ويعنى بتصحيح مساره .

اتبعنا منهجا حديثا ومتطورا للاصلاح الإقتصادى .. عزز البنية الأساسية والتشريعية الجاذبة للاستثمار .. أفسح المجال للقطاع الخاص المصرى والعربى والأجنبى .. ووضع ضوابط واضحة للمنافسة . إصلاح عالج التشوهات الهيكلية فى اقتصانا .. بمنظومة متكاملة من السياسات والتشريعات فى النظام الضريبى والنظام المصرفى .. مهدت لتحقيق معدلات غير مسبوقة من النمو الإقتصادى .. فاقت فى متوسطها ما تحقق فى ثلاثة عقود.

اجتزنا أزمة إقتصادية طاحنة واجهها العالم زعزعت اقتصادات العديد من الدول المتقدمة .. وحافظنا على مكانتنا كقوة اقتصادية ناشئة باقتصاد عززت قدرته خطوات الإصلاح يقوم على أسس راسخة تكفل له النمو المتواصل.

شهد النمو فى قطاع الصناعة معدلات متزايدة خلال السنوات الخمس الماضية وتضاعفت صادراتنا بمختلف مصادرها البترولية وغير البترولية (يعني ايه البترولية وغير البترولية؟). شهدت قطاعات السياحة والتجارة الخارجية طفرة كبيرة وفتحنا المجال لأنشطة صناعية وتجارية جديدة تخدم احتياجات مجتمعاتنا المحلية لفرص العمل والنمو الإقتصادى ورفع مستوى المعيشة.

لقد خضنا هذه التحولات الإقتصادية الكبرى وعيوننا على غير القادرين من أبناء الشعب واخترنا البديل الصعب عندما اتبعنا منهجا متأنيا للاصلاح يحفظ التوازن بين فئات المجتمع حتى لا يدفع غير القادرين الفاتورة الباهظة للتحول الاقتصادى فكانت تحولاتنا الإقتصادية مدفوعة ومدعومة على الدوام بسياسات موازية لتحقيق العدالة الإجتماعية ورعاية الفئات المحرومة والأكثر إحتياجا.

كان البعد الإجتماعى - وسيظل - المحور الأساسى المحرك لكافة سياساتنا الإقتصادية ، وضعنا سياسات واضحة لتحقيق العدالة الإجتماعية ولتوسيع شبكة الضمان الإجتماعى ، إتبعنا سياسات محددة لإستهداف الفقر تقوم على تمكين غير القادرين والأخذ بيدهم للخروج من دائرته ومعاناته.

نجحنا فى مضاعفة الأجور والمعاشات ومضاعفة المستفيدين من شبكة الضمان الإجتماعى وكان هدفنا دائما - وسيظل - تحسين أحوال المعيشة للفئات محدودة الدخل لتصل إليهم ثمار التحول الإقتصادى والنمو والتنمية.

وضعنا صعيد مصر فى قلب أولوياتنا وأقمنا مناطق صناعية ومشروعات كبرى للمرافق والخدمات والبنية التحتية وإمدادات الغاز غيرت وجه الحياة فى صعيد مصر ووضعته على مشارف إنطلاقة تنموية وإقتصادية غير مسبوقة.

كان الفلاح المصرى - وسوف يظل - فى قلب خطط الإصلاح والنمو والتنمية بسياسات داعمة ومساندة للمزارعين .. تضمن لهم الحصول على عائد مجز من المحاصيل الأساسية .. بالإضافة إلى حسم المشكلات المتراكمة والمتعلقة بمديونيات المزارعين.

كان شاغلنا الشاغل - وسيظل - هو تحسين نوعية الحياة (يعني ايه نوعية الحياة؟).. ورفع مستوى معيشة الإنسان المصرى .. وتطوير ما يقدم له من خدمات التعليم .. والرعاية الصحية .. والإسكان والمرافق .. وغيرها .

وقد حققنا الكثير فى إتاحة وتطوير هذه الخدمات خلال المرحلة الماضية .. وحققنا طفرة غير مسبوقة .. بمشروعات مترامية لشبكات مياه الشرب والصرف الصحى .. كما واجهنا الزيادة السكانية ببرامج طموحة للتوسع العمرانى .. وقرى الظهير الصحراوى .

ذلك بعض ما حققنا لأبناء الشعب ..خلال المرحلة الماضية .. وذلك ما نعتزم مواصلته والبناء عليه خلال المرحلة المقبلة .. نتعهد ونلتزم به حزبا وحكومة .. ونمضى فى الوفاء به بعزم لا يلين .

- الإخوة والأخوات ..

إن الأولويات الثلاث الرئيسية للمرحلة المقبلة .. هى المزيد من الإستثمار والنمو وإتاحة فرص العمل .. والمزيد من توسيع قاعدة العدل الإجتماعى بين أبناء الوطن ومحافظاته ..والمزيد من تدعيم المشاركة الشعبية .. بالتوسع فى اللامركزية على مستوى المحليات.
(يعني ايه البتاع ده اللي بالازرق؟)
أعلم أنه لا تزال أمامنا تحديات وصعاب .. لكن الحزب يدرك تماما المسئولية الكبيرة التى تقع على عاتقه .. للمضى فى سياسات الإصلاح .. كما يتحمل مع الحكومة وأعضاء هيئته البرلمانية .. مسئولية تنفيذ البرنامج الذى طرحه للسنوات الخمس المقبلة .. بخطوات ملموسة وتوقيتات واضحة ومحددة .. تنعكس على حياة المواطنين .. ويشعرون بآثارها ونتائجها وثمارها.

وتحقيقا لذلك .. فإننى أحدد مهاما وتكليفات واضحة للحزب وحكومته وهيئته البرلمانية لتنفيذ ما تعهد به الحزب فى برنامجه للانتخابات الأخيرة لمجلس الشعب ، تكليفات .. أوجز أهم محاورها فيما يلى :

أولا : المضى فى سياسات الإصلاح الإقتصادى وبرامجه والعمل على الإرتفاع بمتوسط معدلات النمو (8\%) خلال السنوات الخمس المقبلة ووضع قضية الإستثمار والتشغيل على رأس أولوياتنا بما لذلك من مردود إيجابى على دخول المواطنين .. وإتاحة فرص العمل وفتح أبواب الرزق للشباب .

ثانيا : الإرتقاء بأداء الجهاز الإدارى للدولة والتصدى لجرائم إساءة استخدام السلطة والتعدى على المال العام .. مع مواصلة سياسات تحسين الأجور والسيطرة على الأسعار وخفض معدلات التضخم .

ثالثا : النهوض بأوضاع الفلاح المصرى والعمل على زيادة دخله وإنتاجيته .. بالمزيد من تطوير سياسات الزراعة والرى والمزيد من الأخذ بأساليب حديثة للتصنيع الزراعى والمزيد من الجهود لمضاعفة الصادرات الزراعية.

رابعا : التوسع فى المناطق والإستثمارات الصناعية لإرساء قاعدة جديدة للصناعة على مستوى المحافظات تتيح فرصا جديدة للاستثمارات الوطنية والأجنبية وتفتح مجالات جديدة للعمل .
(يعني ايه دي؟)
خامسا : مواصلة تطوير منظومة التعليم والتوسع فى إتاحة فرص التعليم المتطور بمختلف مستوياته وتخصصاته بما يحقق نقلة نوعية فى التعليم وجودته . كما أشدد على إيلاء الإهتمام الواجب بالتعليم الفنى .. وتطبيق النظام الجديد للثانوية العامة بما يخفف من أعباء الأسرة المصرية ويسهم فى تطوير التعليم الجامعى وقبل الجامعى. سادسا: تحقيق معدلات أعلى .. فى تنفذ برنامج الإستهداف الجغرافى للفقر .. والعمل على مضاعفة عدد الأسر المستفيدة من مساعدات الضمان الاجتماعى .. للمرة الثانية .. وتوفير معاش لمن لا معاش له .. هذا .. مع إضافة الملايين من الأسر المصرية للتأمين الصحى .. من خلال الاستمرار فى تطوير النظام الحالى .. وبدء العمل بنظام التأمين الصحى الجديد.

سابعا: تحسين مستوى ما يقدم للمواطنين من خدمات .. وطرح حلول غير تقليدية ومبتكرة.. للمشكلات المزمنة التى تواجه المواطنين فى حياتهم اليومية.
(يعني ايه؟)
ثامنا: المضى فى تطوير الإطار التشريعى والتنفيذى للتوسع فى اللامركزية .. بما يعزز نطاق المشاركة والرقابة الشعبية للمحليات .. وبما يحقق الاستخدام الأمثل للموارد .. ويلبى إحتياجات المواطنين واولوياتهم.
:-((( ايه؟ يعني ايه؟
تلك هى تكليفاتى للحزب .. وحكومته.. وهيئته البرلمانية (طب هم فهموا؟).. وتلك هى رسالتى لكم خلال هذا المؤتمر السنوى . إن العمل لتنفيذ برنامج الحزب لابد أن يبدأ من اليوم .. وأن ينطلق من هذا المؤتمر . إننى أطالب الحكومة بأن تبدأ على الفور فى وضع البرنامج التنفيذى للنهوض بهذه التكليفات .. وتنفيذ تعهدات البرنامج فى عامه الأول .. وفق إطار زمنى محدد .. وتوقيتات واضحة .. سوف أتابعها أولا بأول .. وأحاسب على الالتزام بها .

الأخوة والأخوات ..

إن شيئا لاينجح أكثر من النجاح ذاته .. ولقد حقق الحزب من النجاح خلال السنوات الماضية .. ما يلهمنا خلال المرحلة المقبلة . وأقول لكم جميعا .. إن تحرككم لابد أن يظل فى الشارع المصرى .. ومع الناس .. اعملوا من أجلهم .. اشرحوا لهم برنامج الحزب وتوقيتات تنفيذه (اه، يعني هم حيفهمونا انت بتقول ايه، دي مهتمهم في الخمس سنين الجاية، صح؟) .. قولوا لمن لم تصلهم بعد ثمار النمو والتنمية .. إنها فى الطريق اليهم (بس اتزنقت في اشارة عبد المنعم رياض، قلت لها ميت مرة تاخد المترو اسرع).. انشروا الأمل وتصدوا للمشككين .. فبالأمل والعزيمة تبنى الشعوب مجتمعاتها .. وتصنع الأمم مستقبلها .

سوف نمضى فى تنفيذ البرنامج الجديد للحزب بذات العزم والتصميم الذى بذلناه خلال المرحلة الماضية واضعين نصب أعيننا مصالح الوطن والمواطنين وبعيدا عن أية مصالح ذاتية أو حزبية ضيقة.

لا شئ يعلو لدينا على أمن مصر القومى عيوننا ساهرة على كل من يتربص بنا (عيوننا ساهرة على كذا يعني عيوننا تحرس كذا، صح؟ مرة زمان قال: إن الإرهابيين يد الله فوق أيديهم... انا عرفت النحس جاي منين، يد الله فوق أيديهم يعني يباركهم: إن الذين يبايعونك إنما يبايعون الله يد الله فوق أيديهم) ونعلم أن السلام لايعنى الركون للتراخى أو الإسترخاء ، نواصل التحرك من أجل قضايا منطقتنا وأمتنا نبذل أقصى الجهد من أجل القضية الفلسطينية والسلام العادل والشامل ، نعمل من أجل استقرار لبنان والعراق ومنطقة الخليج ونولى إهتماما فائقا للحفاظ على أمن وإستقرار السودان بشماله وجنوبه وفى دارفور.
(يا خرابي، انا كنت فاكراهم حيقسموه اتنين، طلعوا تلاتة؟)
إن العالم إذ يحتفل بأعياد الميلاد والعام الجديد وإذ يتأهب أقباط مصر للاحتفال بعيد الميلاد المجيد فإننا نتطلع لأن يعم السلام الشرق الأوسط ولأن يحمل معه الأمن والطمأنينة والخير لسائر دوله وشعوبه فلقد طالت معاناة هذه المنطقة المضطربة عقودا طويلة وآن لها أن تنعم بالسلام والأمن والإستقرار وأن تحقق ما تصبو إليه من تقدم وازدهار.

إن هذا المؤتمر السنوى السابع هو تجديد لوعد والتزام ، وعد لأبناء الشعب بإنطلاقة جديدة وإلتزام بتعهد الحزب بتحقيقها، إنطلاقة نحلم بها ونسعى إليها تستكمل أركان مجتمع مصرى حديث ومتطور يدفع بجميع فئات شعبه إلى الأمام ويعزز الأمل والثقة بالمستقبل فى قلوب أبنائه ، مجتمع يرسخ دعائم الدولة المدنية لا يخلط الدين بالسياسة ويعزز قيم المواطنة والمشاركة بين مسلميه وأقباطه ، مجتمع متماسك يحفظ وحدته الوطنية ويقطع الطريق على قوى الإرهاب والتطرف ، مجتمع لمصريين أحرار يعلمون طريقهم للمستقبل ويسعون من أجله ويقوى به إقتصادهم ويرتفع مستوى معيشتهم عاما بعد عام.

سيظل الإنسان المصرى هو الغاية والهدف وستظل مصر وطنا عزيزا نعيش فيه ويعيش فينا نبذل من أجله كل جهد وعطاء لتظل راياته مرفوعة خفاقة على الدوام.

تمنياتى لكم بمؤتمر ناجح ..

والسلام عليكم ورحمة الله وبركاته ،،

Thursday, 23 December 2010

I love Anarchists :)


اهم هم دول..


شفتوا طيبين ازاي؟

زملاؤنا في الارهاب.. ايوه بقى احنا عالم ارهابيين واللي مش عاجبه يولع بجاز وسخ ويطلع يجري والنار والعة فيه نص ساعة على الطريق الزراعي لحد ما تيجي مقطورة تشيله تحدفه على الترعة يموت غرقان
يا قهلا وسهلا بالزملاق الارهابيين من القنارقيين، والنبي ونستونا بدل ما احنا قاعدين في الارهاب لوحدنا كده والدنيا كلها نازلة فينا هبد ورقع وقتل وبمب فسفوري وكمان زعلانين مننا وبيشتمونا، يعني ضرب ضرب وكمان فيه شتيمة، مش حارمينا من حاجة، اهو تيجوا تتهبدوا معانا، الهبدة ام ودنين يشيلوها اتنين، بسم الله.. اي مساعدة في الفشل احنا حاضرين، احنا كده اتكتب علينا سجايرنا تبجى واحدة، انتوا تفرقوا بمبة ما تموتش حد احنا نفرقع بمبة ما تموتش حد ونموت احنا الاتنين عادي..  بس قشطة، الاناركيين مش بيتكشفوا بسهولة، مالهمش لبس معين، مالهمش لون معين، لونهم مش بني زينا يعني، ما بيصلوش، مالهمش عزيز، ما ينفعش تعمل لهم بيبي على كتاب الاناركية ولا ينفع ترسم لهم ميخائيل باكونين ولا وليام جودوين وتتريق عليهم ويزعلوا ويغمن عليهم، مش حيزعلوا، الحمد لله بلطين وحياخدوا لنا حقنا، ما بيقولوش اساسا انهم اناركيين.. ورونا بقى حتمسكوهم ازاي 
الاناركيين اجدع ناس
انا مش عايزة ندالة من المسلمين خالص، اديني باحذر اهو
اه.. اصل ده طبع انساني وسخ
بعد حداشر سبتمبر الافرو امريكان قالوا: الحمد لله.. لقوا حد يكرهوه غيرنا، ونزلوا علينا هبد ورقع عشان فرصة ليهم انهم يندمجوا بالاسلوب القذر ده اللي هو "احنا معاكوا اهو.. شايفين؟ حبونا بقى" اتعلموا العليمة الوسخة دي من الميكسيكانز، والباكستانيين بيعملوا مع العرب نفس الحركة الوسخة، والهنود بيعملوا مع الباكستانيين نفس الحركة الوسخة
اظن بقى ماحدش ياخد خمسين قفا على سهوة.. صح؟
لا.. نستجدع بقى.. نستجدع مع الاخوة الاناركيين دول منهم اسانج حبيب قلبي روحي روحي روحي روحي
ما نعملش حركات واطية والنبي، الناس جاية ونس معانا يعني، وبعدين دول طيبين قوي، قوي، اللي عرف اناركي واحد في حياته يعرف الناس دي قد ايه طيبة طيبة الفيل.. طيبين لدرجة تخليك تعيط ومتعاطفين مع ناس كتير ما يخصهمش في حاجة بس عشان غاويين ينكدوا على نفسهم
الاناركيين فلة.. خدوا بوسة :xxx
ملحوظة، بعض التعريفات:
الارهاب: هو أنك تزعل على روحك لما تتقتل ولا تحتل ولا تتسرق ولا يطلع تلاتين ميتين اهلك في الحياة وتقول لروحك: هي موتة ولا اكتر؟ ما انا كده كده ميت ميت 
اللي مش ارهاب: 
الباب الاول:
تبقى قوة عسكرية، أو رأسمالية، او دولية، وتطلع ميتين اهل الناس بفلوسك
مثال: 
تسرق الناس وتجوعهم في اسبانيا واليونان وروما وسويسرا عشان تعبي كرشك- 
-تحتل الناس، الدول ذات الاغلبية الاسلامية بالتحديد، حيث ان الاسلام دين ارهاب اساسا والناس دي تستاهل تموت، وترمي عليهم قنابل عنقودية او فسفورية او مدمرة للملاجئ من اللي بتخرم الارض 
الباب الثاني:
يتعمل فيك كل المذكور آنفا وتسكت
هذا وبالله التوفيق

صوصو صوصو صوصوصو اسانج على الجزيرة :)

Tuesday, 21 December 2010

ده الزلزال ارحم

انا حاكلم اسانج اخليه يجيب وثائقكم التوب توب توب سيكرت عشان تسكتوا بقى
اسمع يا سيدي:
وأكد سامح سيف اليزل على أن مصر لن تقطع علاقاتها مع إسرائيل على الإطلاق بسبب هذه الأعمال التجسسية، التى لن تؤثر فى شىء، موضحا "عملية جمع المعلومات بين مصر وإسرائيل متبادلة مستمرة، فيوجد لدينا جواسيس فى إسرائيل ولكنهم أكثر حنكة من هؤلاء الذين يتم كشفهم".
ههههههههههههههههههههههههه يا راااااجل.. ومخبيهم تحت السرير؟
طب انا اعمل ايه دلوقت؟ اعمل ايه؟ النوبة اللي فاتت (شوفتوا النوبة دي.. ياااا قديييمة فشخ) المهم، النوبة اللي فاتت الراجل يقول للادميرال احنا قلنا لايران احنا زارعين عندك جواسيس، ويا باشا اي وقت تحبوا تعملوا فيه زغزغة لاستقرار ايران احنا تحت الطلب، وما شافهومش وهم بيسرقوا شافوهم وهم بيتحاسبوا، ولجل الغباوة كل الناس تعزي ايران في ضحايا التفجيرات والوحيدين اللي ما عزوش ايران مصر واسرائيل، حتى امريكا عزتها، يعني ده لو مش انتوا اللي عاملينها بتشككوا الناس فيكم
والنوبة دي - النوبة تاني - النوبة دي يتكشف عندنا شبكة جواسيس ما بينا احنا وسوريا ولبنان، بدل ما نعمل زي الناس العاقلة ونقطع نفسنا ونشحت عليها ونقول للعالم شايفين احنا غلابة ازاي؟ شايفين احنا بتوع سلام وهم ولاد وسخة بيسلطوا علينا جواسيس ازاي، نقول لهم: لااااا ده احنا عندنا هناك جواسيس وجواسيس جامدة كيك
طب اقطع دراعي من لغلغوه ان كان لنا جواسيس في اي حتة في الدنيا ولا حتى في بوركينا فاسو، ماحدش حيرضى يشتغل معانا حنفضحه
وجواسيسنا الاكثر حنكة دول بقالهم تلاتين سنة من ساعة السلام ما اتكشفوش؟ الا كل الناس لها جواسيس في اسرائيل حتى حزب الله، وسمعنا عن ناس منهم اتكشفوا ده امريكا كشفت جواسيس لاسرائيل عندها، واسرائيل كشفت جواسيس لامريكا عندها، وعمري ما سمعت عن جاسوس مصري واحد اتكشف من ساعتها، واحنا بقى اكثر حنكة من الموساد والسي اي ايه.. صح.. صح يا حاج، واديك قلت لهم خليهم يدوروا بقى.. لو فيه انسان واحد كان عنده ذرة شك في اننا ممكن نكون اكثر حنكة - وطبعا ده تأثرا بصالح مرسي الله يرحمه ويسامحه على اللي عمله في الشعب - دلوقت خلاص.. مش ممكن حد يصدق بعد الكلام ده ان عندنا كابرتاية نتغطى بيها في التخشيبة
احترسي نفسك يا اسرائيل.. احترسي نفسك.. احنا اكثر حنكة وحنشأمظك شأميظ شأميظ كده، وعندنا جواسيس جامدين آخر حاجة، ولو مش مصدقانا احنا ممكن نديكي اساميهم عشان تعرفي اننا مش كدابين يعني ولا فنجرية بق ولما بنقول بنعمل، عندك مثلا احمد سبايدر ده اكبر جاسوس وبطل قومي في التاريخ 
لا.. انا عايزة اسانج يتصرف لي معاهم الناس دي

لاااااااااااا حول ولا قوة الا بالله

ايران يا عيني جالهم زلزال ستة ونص ريختر وفيه تلات قرى اتسوت بالارض
استغفر الله العظيم، ده ايه النحس اللي نازل عليهم ده يا عيني.. ده انا قاعدة باترجم الوثائق بتاعة سفارة امريكا في تل ابيب وعاملين لهم يا عيني خطة ما تخرش المية، والفالحين بتوعنا قالوا لهم زودوا عليهم العقوبات يقوم يضطروا يرفعوا الاسعار والضرايب يقوم الناس تعمل عليهم انقلاب غير الخلايا السرية، وكمان جالهم زلزال؟ انا لو مكان نجاد اتجنن والله.. ده زمانه يا عيني فاكر ان الزلازل دي اللي عملتها اسرائيل، وساعتها بقى ماحدش يكلمه والنبي.. سيبوه، كفاية اللي هو فيه
يالا بقى.. يعني هم حييجوا اغلى من مصر والعراق؟ ربنا يتولاهم بقى، كنت باقولهم على التويتر اني مش صعبان عليا الا سوريا
تعمل وحدة مع مصر، مصر تتهزم وربنا يسلط عليها رقاصة تقلعها مالط ومن يوميها ياخويا واحنا مش لاقيين حاجة نستر بيها نفسنا
تتصاحب مع العراق، العراق بختها المدوحس يوقعها في صدام ومن يوميها وهم قافشين على بعض
تمشي مع ايران، اهي قاعدة تاخد بالشلاليت والبونيات من كل حتة حتى الزلازل
ما تتصاحبيش على حد بقى يا سوريا بقى.. او تتصاحب على اسرائيل بقى يمكن تعرف تجيب اجلها

Sunday, 19 December 2010

توضيح

الاوشاعة اللي طالعة عن ويكيليكس انها ما نزلتش حاجة عن اسرائيل دي جات منين؟ رجاء الدخول على رسائل السفارة الامريكية في تل ابيب والاطلاع على الوثائق، واللي نزلنا جزء منها هنا مترجم، اللي بتقول ان اسرائيل خايفة من جولدستون وان امريكا طمنتهم انها حتعمل كل اللي تقدر عليه عشان التقرير ما يصعدش لمجلس الامن، وانها طلبت من مبارك انه يأمر وزارة الخارجية بعدم فتح الملف النووي الاسرائيلي، واعترفت بانها هي اللي عملت الانقلاب في ايران وجندت عناصر من اتحاد الطلبة الايراني والمعارضة الايرانية، وانهم هم اللي دعموا فريق 14 اذار في انتخابات لبنان بفلوس السعودية، ونتانياهو وهو بيقول مش حندي الفلسطينيين ارض هم مش عايزين غير ياكلوا حنأكلهم ونشغلهم بلقمتهم، وكلام داجان عن ضرورة الانتباه الى ان العرب بيكرهوا ايران لاسباب طائفية مش عشان الخطر النووي ولازم ينموا الاسباب الطائفية دي، وكلام بيريز حين قال: الد اعداء اسرائيل هم ايران وحماس وحزب الله ويجب أن ندول هذا العداء ثم ننسحب نحن من الصورة ليواجه العالم اعداءنا، وكلام الامريكان عن ان الاسرائيليين دايما عايزين غيرهم يخوض لهم معاركهم، وكلام اسرائيل عن عدم رغبتها في المشاركة في مواجهة مع ايران ونتنياهو وهو بيقول مافيش داعي للضرب حلفاءنا من المعارضة جاهزين والانتخابات على الابواب واذا ما عرفوش يسقطوا النظام على الاقل يسقطوا احمدي نجاد بانهم يعملوا عليه انقلاب، اهو اهو، يعني عارفين انه حينجح ومدبرين له انقلاب اهو ونتنياهو وداجان قايلين كده بعضمة لسانهم، والخلافات اللي بين القيادات الاسرائيلية إبان حرب لبنان، واعتراف اسرائيل بانها اتهزمت في حرب تموز، واعترافهم بأن حرب تموز هي كمان اللي خسرتهم الحرب في غزة، وكلامهم عن ضرورة فصل سوريا عن ايران وتقديم الرشاوى لها عشان تستجيب، وكلامهم عن عدم استعدادهم لتقديم اي تنازلات بشأن ملفهم النووي، وضرورة تفوقهم النوعي العسكري عن بقية بلاد المنطقة، واقرار الامريكان بده، ووعد الامريكان لهم بأن مبارك حيضغط على ابو الغيط عشان ما يتكلمش في الموضوع ده تاني، صحيح كل الوثائق التي تخص إسرائيل ملطوط فيها العرب بس ويكيليكس واسانج مالهمش ذنب على فكرة في لطة العرب يعملوا لنا ايه اذا حكامنا خونة؟ ده ذنبهم يعني؟

ده اولا
ثانيا، هو لسه ما نزلش كل الوثائق

ثالثا، مين اللي متخيل ان اسرائيل عندها اي اسرار اكتر من اللي هي بتقوله، دي ناس بتحرق العيال الصغيرة في وضح النهار، انتوا عايزين تعرفوا عنها ايه اكتر من كده؟ يعني ايه المفاجآت اللي كنتوا مستنينها من وثائق اسرائيل اكتر من اللي انتوا شايفينه؟ ولازم تراعوا انه ما نزلش وثائق توب سيكريت، يعني اللي نفسكوا فيه مش حتلاقوه ولا حتى في وثائق مصر لانها مش وثائق توب سيكريت ومع ذلك فيه وثيقة في السفارة في مصر عمر سليمان قبل الحرب على غزة بسنة ونص.. سنة ونص، بيقول للادميرال: السلطة الفلسطينية لازم ترجع غزة ومش حترجع الا "بسحق" حماس والصواريخ لازم تقف واحنا مش حنطالب اسرائيل بوقف اطلاق النار الا لما حماس تبطل ضرب صواريخ
فاهمين الكلام؟ ساعتها ما كانش فيه نار اساسا عشان مصر تطالب بوقفها؟ فاهمين حاجة؟
كنتوا عايزين تسمعوا ايه؟ كنتوا عايزين تسمعوا الاسرائيليين وهم بيقولوا: يالا نحضر سمكة القرش عشان نرميها على مصر؟ طب هم مش حيقولوا كده، عشان اساسا مافيش حاجة اسمها يسعروا سمك قرش ويرموه عندنا ده هبل ده
اما كلام اسرائيل عن ان الوثائق لم تضر بها.. وايه يعني؟ ماهي لازم تعمل كده؟ لم تضر بها ازاي وهي فضحت عملاءها؟ وهي لو عايزة تبقى على عينك يا تاجر كانت اعلنت زي ما فضلت تشكر مبارك طول حرب غزة لما خليتنا كلنا عبارة عن تمانين مليون مبلول من الكسفة، ايه يعني لما قالت كده ما النظام المصري راخر بجح وقال نفس الكلام وقال صورتنا زي الفل.. وهم الاتنين صحاب وتلاقي نظامنا هو اللي نصح نتنياهو بالكلمتين دول ومذكور في الوثائق ان "نتنياهو يثمن أراء الرئيس مبارك" امال حيقولوا اتفضحنا؟ ماحدش قال حاجة، ده حتى نجاد ما قالش: شفتوا بقى مش قلت لكوا المعارضة جاسوسة؟ لان ده مش مصلحته، قال: ابدا ولا في اي حاجة من دي واحنا كلنا سمنة على عسل..ماهو لازم يعمل كده، امريكا متجننة عليه عشان امريكا قوة تقدر تجيبه، ومش خايفة تقول انها خايفة من الوثائق لان ما عندهاش حاجة تخاف منها، اللي خاف بجد هو اللي قال انا ما خفتش، وبعدين هو فيه حاجة تضر بمصالح امريكا وتنفع مصالح اسرائيل؟ لو فاكر ان امريكا واسرائيل حاجتين منفصلتين اقرا الوثائق لو سمحت... اقراها كويس

واستنوا الوثائق مش كلها نزل
والرحمة بقى شوية.. ارحموني بقى شوية
انتوا تيجوا في المؤامرة اللي بجد وتقولوا مافيش داعي للتخوين ولما ما يبقاش فيه مؤامرة تدوروا على المؤامرة؟ انتوا معمول لكم عمل؟
هو ربنا عرفوه بالعقل ولا بمشط الرجل ياناس؟ الراجل طالع دينه وعمالين يدوروا له على كل بت عاكسها وكل بت علقها عشان مش لاقيين له ذلة يمسكوه منها، ده كده متآمر؟ متآمر ويتفضح الفضيحة دي؟ متآمر واهبل؟ طب اكل ايه وشرب عليه مية
ومع ذلك نستنى
الله اعلم، يمكن جوة السجن ضغطوا عليه، يمكن يستجيب للضغط، يمكن ما يستجيبش، احنا مانعرفش، حيبان من الوثائق اللي لسه حينزلها اللي نزله لحد دلوقت كويس، حنشوف اذا حيغير سياسته في الوثائق اللي حتنزل بعد كده نقوم نعرف انه ضغط عليه وهو في السجن واستجاب، ولا حيستمر زي ما كان يبقى نمسك الوثائق ونحللها
مش عشان اكتشفتوا ان حاكمكوا جواسيس تجيلكم حالة انكار وتقعدوا تقولوا مؤامرة
ايه يا اخواتي ده؟

Saturday, 18 December 2010

اه يا اسانج يا صايع يا بتاع النسوان


انت فاكر ان حاجة زي دي حتخفى عليا؟ زنوبيا صاحبتي جابت لي اللنك وفطمتني على كل حاجة يا هلاس يا فلاتي 
وربنا لاوريك يا اسانج... وطول ما في على الارض دولة السويد الميمونة عمر ما فيه ولية حتغلب ابدا

والختمة لاعمل فيك محضر في قسم ستوكهولم اتنين واخليهم يجرجروك ويلففوك كعب داير، حاقول لهم يا باشا مسك ايدي قال ايه بيعديني، وداير على النسوان في الاحلام يعلقهم الواحدة ورا التانية بعد ما عشمني واستغل براءتي وسذاجتي وقلة خبرتي وانه خامس راجل في حياتي وحلق لي شعره ظبايكي عشان يغرر بيا يا باشا، واتاريه من ورايا ييجي يضحك في وشي ويسيبني من هنا ويروح على احلام النسوان التانية عبر القارات من هنا الخاين ابو قلب جاحد، بس هه.. وساعتها بقى مش حيطلبوك بالانتربول، ده انت حتتحط على قائمة الارهاب صورتك كده تنور جنب صورة بن لادن ويلففوك على مصر والاردن وسوريا ثم يشيعوك على بلاد الاتحاد الاوروبي حيث الووتر بوردينج والشنكلة والشعلقة والتعليق والكهربا وفي الاخر حيرجعوك على مصر عشان تنتحر بعد ما يبلعوك علبة الصبغة اللي كل شوية تغير بيها لون شعرك ثم يشحنوك باسفكسيا الخنق على الجوانتانمو حيث يحتاسوا فيك بعد ما يقبضوا عليك ويقولوا مش حنعرف نخرجه اصل عذبناه قو وممكن يخرج ينتقم منا، كل ده عشان يقرروك ويعرفوا منك ازاي تبقى في سجن انجلترا وتلف الدنيا وتدخل في احلام النساء العذارى يا صايع يا ضايع يا حرماتي يا بتاع النسوان، انت اغتصبت مخنا كده

اسانج اغتصب مخنا ولسه سادر في غيه وبالع مصنع فياجرا مخية ومستمر في عمليته الوحشية واقتحامه لأحلام النسوان بالرغم من الاجراءات المشددة اللي اتخذها كل من الانتربول، مع شرطة بريطانيا، مع بلاد السويد الميمونة جابرة خاطر الولايا المغلولين من الرجالة اللي بيقلبوهم (نصيحة اختي في السويد والعروبة والدين والانسانية، اللي يقلبك اقلبيه وسويه على الهادي مش تعملي فضيحة لنفسك كده، تعالي مصر نعلمك ازاي تندميه انه سابك، هو كده ندم انه عرفك يا خايبة)، مع التايم الامريكية اللي بالدراع كده شالوا هذا الذئب البشري من قائمة شخصية العام بالرغم من ان القراء اختاروه، الا ان القراء المساكين تحت تأثير الاغتصاب الفكري وغير مسئولين عن تصرفاتهم، فقامت التايم مشكورة بمنح لقب شخصية العام للواد اللي وشه شكل فردة البلغة مقاس اربعة وخمسين لأنه ما بيغتصبش المخ، هو بيراقب الاكاونتات لصالح الاستخبارات العالمية، وبيوصلهم لحد المدرسة ويستناهم قدام باب المدرسة ليزوغوا ويروحوا السينما مع شباب وبعدين يروحهم لحد بيت الاستخبارات عشان مافيش حد يعاكسهم، وبيقفل الصفحات لصالح الأنظمة المستبدة زي ما عمل مع صفحة البرادعي، وده طبعا مسلك بناء، لأن اغتصاب المخ، لا مؤاخذة حيفتحه، لكن قفل الصفحات هو شكل من اشكال وضع حزام العفة على مخ الانسان مننا ونظرا للتاريخ المشرف والحافل والطويل لزاكربرج (الشهير بزكريا برج) في ختان الاكاونتات والصفحات لحماية الشرف والعرض الاستخباراتي الاستبدادي، فقد استحق عن جدارة تاج الجزيرة السلطانية، اما اسانج الفاجر اللي فعل الخطيئة في مخنا كلنا، رجالا ونساء (الستات عندهم الشجاعة انهم يقولوا احلامهم بأسانج، الله اعلم الرجالة يا قلبي بيحلموا بإيه وكاتمين في قلبهم) فإنه مجرم خطيييير ولكل مجرم عقاااااب، كله الا المنطقة اللي فوق دي يا اسانج اللي اسمها الراس.. من فضلك لو سمحت، نزل ايدك تحت، وعيش يا عم، بس تمد ايدك على الفوق نقطعها لك

اه يا شيريز... انا مش حاسكت على اللي اسانج عمله في مخي، ده خلا مخي هنادي خالص، ولبس مخي العار، ووشي بقع وشعري طقطق ابيض من ساعة اللي عمله ده، السويد اللي بتقوم بدور آمنة حتنتقم لي من الباشمهندز ولسه لما يفتحوا له قضية انه، لا مؤاخذة، بينط على احلام الحريم الابرياء وهم نايمين لا بيهم ولا عليهم

اسانج.. ايها الذئب الصحفي السيبري المتوحش
ايه يا راجل الصورة دي؟ انت اتصورتها وانت بتتجسس على لجنة السياسات؟ 
نيجي بقى لتفسير الاحلام بتاع ضحايا اسانج، شوفي بقى ياختي، الضاكتور اللي انت جايباه ده ما بيفهمش حاجة واصل في تفسير الاحلام
ان اسانج قاعد عندك في البيت وبياكل كل الاكل اللي في البيت، لازم كنتي تقولي بياكل ايه؟ حاجة حلوة، حاجة حادقة، لونها ايه؟ بس عموما الاكل خير وطول عمر، ماشي ياختي؟ الظاهر بقى حيجيله خير على ايدك يا بنت المحظوظة 
صاحبتك التانية اللي شافته في حفلة وهو واقف يخطب فيها، دي نصرة كبيرة قوي له ان شاء الله.. اه.. وربنا حينصفه ويقيد شمعته وينصره على مين يعاديه، اه والنبي
صاحبتك التانية اللي بيقولها انا الماستر اوف يور دريمز، دي خليها تتغطى كويس وهي نايمة.. نسوان صايعة ما اتربتش 
خير اللهم اجعله خير

Thursday, 16 December 2010

الف حمد الله بسه يا بطل



عقبال الفرحة الكبيرة يوم البراءة بقى وناخد لك حناطير وفرقة حسب الله قدام القسم
:)

حوار نادر مع الشيخ إمام أجرته الصحفية صافي ناز كاظم الجزئين 1و2

والله عال، ماما بقت مدونة وبتنافسني في التدوين وقلنا ماشي، كمان بقت لها صلات منفصلة مع الوسط التدويني وبيشتغلوا مع بعض؟ الاستاذة عندنا حوار نادر وقديم مع الشيخ إمام، راحت ادته للاستاذ احمد فوزي المدون، وما ادتهونيش انا، وفجأتن راح منزله على اليوتيوب وده الجزء الاول



بس والله لسه محتفظة ببرائتها، أصل قالت لي على الموضوع وهو بعتهولها بالميل، فانا قلت لها هااااايل، هاتي بقى الفيديو انزله على مدونتي.. هي مش عارفة اني باخد منها سبق وانزله عندي قبل ما تنزله عندها هههههههههههه هيييه هييييه هيييه


على فكرة يعني انا اللي عاملة لها المدونة دي وليا حق الانتفاع لمدة لا نهاية

رجب طيب أردوغان، أول زعيم تركي سني في التاريخ يحضر احتفالات عاشوراء

هو أول رئيس وزراء تركي منذ تأسيس تركيا الأتاتوركية، يحضر احتفالات الشيعة بعاشوراء
وهو أول زعيم تركي سني في تاريخ جزيرة الأناضول يحضر احتفالات الشيعة بعاشوراء
ولأول مرة في تاريخ تركيا تحضر كل الاحزاب التركية، بما في ذلك احزاب المعارضة العلمانية، احتفال الشيعة بعاشوراء
جدير بالذكر أن اردوغان اتشح بالسواد وردد في خطبته الكلمات الأخيرة للإمام الحسين قبل استشهاده، وبكى كل الحضور، ثم ردد لبيك يا حسين، كما أنه وعد بمراعاة المذهب الشيعي في المناهج الدراسية الدينية، ودي برضه حاجة غير مسبوقة في تاريخ تركيا من ساعة ما ربنا خلق جزيرة الاناضول اساسا
يذكر إن امبارح في احتفالات حزب الله بعاشوراء اللي القى موعظة اليوم التاسع كان شيخ سني، ناسية اسمه
ويذكر ان سوريا امبارح عملت مؤتمر الوحدة الاسلامية المسيحية
ويذكر ان السيد حسن نصر الله امبارح قال بأن عنده معلومات مؤكدة بأن المخطط الرئيسي اللي بتركز عليه امريكا واسرائيل للمنطقة دلوقت هو خلق الفرقة بين المسلمين والمسيحيين لإنهاء الوجود المسيحي الشرقي من المنطقة، والفتنة بين السنة والشيعة لضعضعة الوجود الإسلامي في المنطقة عشان اسرائيل تكسب تحالف السنة ضد الشيعة، وبعد ما تخلص عليهم (تخلص على السنة، لأن إسرائيل بتخلص على حلفائها مش على أعدائها) تتنقل على التحالف مع الشيعي وتخلص عليهم، بمعنى تضعضعهم وتكسر مقاومتهم
وانا باصدقه، مدام قال عندي معلومات مش مجرد تحليلات يبقى معلوماته صح، عمره ما كدب قبل كده كدبة واحدة من ساعة ما ظهر في حياتنا، وقال انه عنده معلومات ان الفتنة الاسلامية المسيحية في مصر اسرائيل اللي وراها، ومدام قال كده يبقى هو كده، هو مش بيكدب
الخلاصة
اي حد حيسعى في الفتنة بين المسلمين والمسيحيين وبين السنة والشيعة هو بالنسبة لي اسرائيلي، حاجز لسانه من لغاليغه

Wednesday, 15 December 2010

نداء إنساني

ممكن حد يجيب لأسانج محامي غير ده؟ 
مش عارفة ليه حاسة انه بكرافتته دي حيجيب له مؤبد... ايه كميلة دي؟
طب ما خالد علي ولا مالك عدلي يتطوعوا يدافعوا عنه الواد حيروح في شربة مية

Tuesday, 14 December 2010

Sunday, 12 December 2010

كايدة العزال انا من يومي ايوة اه.. ابراهيم عيسى على الجزيرة :P

ان شاء الله حيبدأ يقدم برنامج صالون ابراهيم عيسى على قناة الجزيرة مباشر... والبقية تأتي بإذن الله
خلي رضا ادوارد بقى يكتب جوابات للرئيس ان التلوث البيئي براحته 
وحصوة في عين اللي ما يصلي ع النبي واللي يطق يموت، انا توقعت حاجات كتير الا الغيرة والنفسنة، واكتر حاجة مفرحاني في موضوع برنامج الجزيرة ده ان فيه زملاء حيناموا ما يقوموش من الغل

اسكندرية

ولا الهوا... ولا شايفين ضل عسكري ولا سامعين صوت سرينة اسعاف ولا الهوا، طب هو ما بعتش، احنا يا كباتن مش جاملنا اسرائيل؟ مش ترد الجميل؟ 



عاجل من داخل المظاهرة

تحديث:
الصورة دي للي مش متأكد اني شبشب يعني، اظن بعد الصورة دي كده ثبت بما لا يدع مجال للشك اني شبشب

تحديث:
اولا فيه مصنع وقع وفيه خمسين عامل وناس ماتت، وطبعا ماحدش بعت طيارة عشان ينقذهم لان اسكندرية مافيش بينا وبينها معاهدة سلام واسكندرية بتغرق
ثانيا: المظاهرة بتزيد وفيه اخوان اتقبض عليهم وهم رايحين الوقفة، وفيه صور جديدة
ما نزلتش ليه؟ عشان انا شبشب.. صحيت لقيت الجو كده قلت لااا ما حدش حيروح وقعدت تحت اللحاف اترجم الوثائق.. شبشب عادي، ولو حد قال لي يا انسة شبشب من هنا ورايح مش حازعل، العدد ده كله نزل المظاهرة وانا ما نزلتش.. حيكون ايه السبب غير اني شبشب؟
لمتابعة المظاهرة انقر هنا






رجالة والله



طب والله احنا اسياد العاقلين واسياد الناس، كل دي توثيقات لتزوير الانتخابات؟ رجالة 

Saturday, 11 December 2010

المقال ده جامد كيك

هو انا مش عارفة ايه اللي خلاه ينفجر في وشنا كلنا مرة واحدة كده، اقصد دلوقت يعني، فضل كاتم في قلبه ومرة واحدة راح رازعنا المقال ده
بس جامد المقال، واهو برضه شكل من اشكال الاعتذار بعد اصابتكم بالتلوث على اثر قراءة رضا ادوارد.. اديني باصالحكم
اصل المقال هنا
لا مش حاحطه هنا، لان اصحاب الموقع يتساهلوا انكم تعملوا لهم زيارات، انا وانا باقرا المقال ظبطت نفسي عمالة اقول: الله الله الله، في المقاطع كده كأني باسمع أم كلثوم
لا ومتستف كده ومترتب، وماسح بينا كلنا البلاط بمزاج يعني، حاجة كده معمولة وصاية يعني

Friday, 10 December 2010

حبيبي حبيبي حبيبي حبيبي

يا خوااااتيييي يا خووااااااتييييي يا خواتي باحبها... دي حبيبة امها
رضا ادوارد يتحدث عن التلوث البيئي..... برضه
قالك مشاكل التعليم والصحة  والبطالة والمشاكل التي تهدد امها واستقرارها دي كوووووم، ومشكلة التلوث البيئي دي كوم تاني خااااااااااااالص
وقالك عندنا حلول، وياريت تسمع الحلول، وحاقولك الحلول، بس انا عندي حلول، ومش حاخبي الحلول عنك، حاقولها لك اهو... حاقولها لكوا طبعا اذا الوقت ناسب
ههههههههههههههههههههه والله عامل زي السادات بالظبط مش ممكن ايه العسل ده؟ 
وقالك انتخابات مجلس الشعب شيء لا يسدكه عكل على رأي شويكار، ولن يتحدث عنها عشان الكلام عنها بيخدش حياءه وهو ما يحبش الالفاظ النابية 
والاخ رضا ادوارد الاشتراكي ضد رجال الاعمال قراصنة الاموال عايز المثقفين اللي زيه كده، خصوصا ان تزاوج السلطة بالمال اكبر غلط يعني، وهو بقى اللي حينصح مبارك انه يدخل التاريخ من اوسع ابوابه زي ما دخل هو التاريخ من اوسخ ابوابه 
عسسسسللللللللللللللللللللل باحبه باحبه باحبه وايه الاسلوب الطلي الرائق ده؟  الله الله الله... اسلوب عانت فظيع فعلا 
بيقولك: الغريب ان هذه المشاكل لها حلول فورية
طب وايه الغريب في كده يا حبيبي؟ هو الاساس ان المشاكل مالهاش حلول؟ وايه موضوع المرور ده؟ وتعرضت وارسو لنفس المشكلة وتم حلها بنفس الاسلوب... اللي هو ايه؟ 
مشاكل خطيرة تؤدي بالتبعية الى نتائج خطيرة ايضا 
هذا الرجل احبه
اي لاف يو... اي لاف يو .... اي لاف يوووووووووووو
باحبه يالمبي باحبه
سيادة العامل الكادح رضا ادوارد... كلمة واحدة حارد بيها على كل اللي كتبته

Thursday, 9 December 2010

شقانا ووجع قلبنا يا ولاد الحرامية

الدول الاسكاندنيفية العظيمة، مثلها مثل كل دول الغرب، بتبعت صناعتها للصين عشان العامل عندها مكلف وله حقوق كتير بتوجع دماغهم، وانتاجه اقل لان عدد ساعات العمل بتاعته اقل، وعليه فالصين بتكسبهم اضعاف اللي ممكن يكسبوه من العامل بتاعهم، وده اللي بيخليهم يعرفوا يعيشوا كويس، ويدفعوا للعامل اللي قاعد عاطل اعانة شهرية ما يحلمش بيها باشمهندز ولا ضاكتور مصري قد الدنيا
اغلبية الدول الاسكاندنيفية - جنة الله على الارض - مشاركة في قوات التحالف اللي بتحتل افغانستان والعراق وطالعين لهم بسبوبة كويسة من الموضوع ده
بالمختصر، الدول الغربية بشكل عام، ومنها دول سكاندينافيا عايشين عوالة على غلابة العالم
كل ده ماشي وشغال يا عم... كلوا وانبسطوا، واحنا حسبنا الله ونعم الوكيل، اللي عند ربنا ما بيروحش ان ما كانش في الدنيا يبقى في الاخرة
انما ان السويد تكلف فلوس لمرتبات ظباط شرطة، ومية وكهربا في المحاكم، ومرتبات قضاة، ومصاريف على سجون، وبلاغات دولية، عشان تعقد جلسة لجوليان اسانج تقول له: قالت لك طلعه ما طلعتوش؟
لاااااااااااااااااااااا كده كتيييير قوي
كده كتير
يا اولاد الحرامية ده الصين بتشغل اطفال تحت سن خمس سنين بعدد ساعات هلامية من غير اكل ولا رعاية صحية ، ستات شرق اسيا، يا بتوع حقوق المرأة بيقعوا ميتين وهم بيشتغلوا في الصناعات اللي انتوا بتبعتوها يا عالم يا منافقة يا نصابة يا كدابة
طب راعوا مشاعرنا
عاملين قوانين تضمن للعامل انه يعمل الباديكير على حساب صاحب العمل بفلوسنا وبدمنا وباحتلال اراضينا واستغلال عمالنا ماشي
بتعملوها قضية دولية وتفرسونا ليه؟ ده احنا الستات عندنا بتشتغل في العتالة عشان تصرف على جوزها المدمن
طب قشطة
على فكرة بقى ده مالنا ودي ثرواتنا وبترولنا وشقى ناس غلابة زينا ومال مسروق من مواردنا واراضينا المحتلة ودي جتت ناسنا الميتة بالقنابل
لينا فيه بقى
كل موظفة في العالم التعيس المأكول المذموم من بتوع: خلصني بقى صاحية من تمانية الصبح وعندي جرد بكرة من ستة
كل بنت اتقال لها بعد خمس ست سنين من التفعيص والبوس: صدقيني انا ما استاهلكيش انت تستاهلي احسن مني
كل مخطوبة اتقال لها في التليفون: انت مالك انا فين؟ انا مش قايل لك ما تسألنيش السؤال ده تاني؟
كلهم يعملوا لجوء جنسي وعاطفي للسويد
وبكده مش اقل من مليار راجل في الدول النامية والصاعدة حيطلبوا في الانتربول
ومش عايزة الاخوة الزملا الرجالة يفتكروا اني عايزة انتقم منهم.. ابسلوتلي، صدقني يا صاحبي، العيشة في سجن السويد انضف واحلى واجمل واشيك بكتير من ام الشقة المعفنة اللي انت قاعد فيها دلوقت وبتقرا البوست
على الاقل حتشم هوا نضيف وتخلص المدة وتخرج وتعيش وتشوف نفسك وحياتك بقى
ع البركة
هجوووووووووووووووووووووووووم

Wednesday, 8 December 2010

نداء إلى كل مواطن صالح: ما تخافش من المخبرين المخبر عرة


ده مش اول انسان يتقتل في الشارع قدام الناس وماحدش يتدخل ولا يحوش عنه
ما ينفعش كده يا ناس
انا عارفة ان الناس بتخاف، بس خايف من ايه؟ دول اتنين مخبرين، وانتوا عشرميت انسان في الشارع وهم موقفهم ضعيف لأنه مش قانوني
1- المخبر مش مفروض يقبض على الناس في الشارع، لو لقى انسان اشتبه فيه المفروض يراقبه ويبلغ في القسم انه اشتبه في فلان وخط سيره كذا ومحل اقامته كذا، مش اول ما يشوفه في الشارع ينزل عليه يعني مثلا القتيل ده كان عليه حكم واتلغى لانه اتصالح مع البنك
2- المخبر مش معاه سلاح.. وما يقدرش يستخدم سلاح اساسا ضد المارة في الشارع، وبعدين يا سيدي هو مش معاه سلاح ولو معاه سلاح يبقى تبلغ فيه لأنه مش مفروض انه مسلح
3- تحت اي ظرف مش مفروض ان المخبر ينزل عجن وضرب في الانسان اللي بيقبض عليه، لما يشده من هدومه حاجة، ولو ان ده مش قانوني، ولما ينزل عليه ضرب لحد ما يفيص في ايده دي حاجة تانية، ما تقنعنيش ان اول ما حط ايده عليه موته، ده قعد يضرب فيه على الاقل تلت ساعة عشان يعرف يطلع روحه ده لو ضاربه بالرصاص مش حيموت في ساعتها
ماذا تفعل حين تمر من شارع وتجد ان انسان ما يتم سحله:
1- فين النسوان؟ اخصصصص على نسوان مصر.. اي ست معدية ترقع بالصوت كده: يالهوي يالهوي يالهوي.. بقية الستات حيرقعوا بالصوت وراها
2- المارة حيتلموا على صويت الستات
3- الشارع المصري مليان بغال واكلين كشري وفول.. يرموا جتتهم على الواد اللي بينضرب عشان يحوشوا عنه
4- تلات بغال تانيين يمسكوا في المخبرين - ده اذا فضل المخبرين واقفين لسه وما جريوش، لانهم لو لقوا الشارع اتلم عليهم حيجروا على فكرة - المهم يمسكوهم وهاتك يا عزق فيهم... بس ماحدش تاخده الجلالة ويموت المخبر، عشان بس ما يعملوش شهدا علينا وينضربوا لما يبان لهم صحاب
خلاص كده
البني ادم المشتبه فيه في ايديكوا، والمخبرين ما قتلوهوش، تاخدوا المخبرين والمشتبه فيه وتطلعوا على القسم بربطة المعلم لو يعني القانون واخد حده معاكم... وانا بصراحة لو مكانكم اهربه، يعني حيكون عامل ايه الواد يعني؟ لو عملته كبيرة قوي قوي ويستاهل فعلا عليها عقوبة مش حتلاقيه ماشي في الشارع اساسا.... حتلاقيه عضو مجلس شعب
فاهدوا كده واطمنوا، مافيش حد من اللي بيتجرجروا على الاقسام يستاهل اساسا يتجرجر
اه....... نسيت حاجة مهمة قوي
لما تمشي جنب الحيط مش حتسلم.. ليه بقى؟ لأن المارة لما وقفوا يتفرجوا على الراجل وهو بيموت بعد شوية البوليس جه لمهم عشان هم شهود، وزمانهم بيتعذبوا دلوقت، ادعوا بقى ماحدش منهم يموت

مقتل ضحية جديدة بالاسكندرية

بنفس طريقة خالد سعيد اتقتل الضحية الجديدة
والتفاصيل هنا