Tuesday, 31 August 2010

قالك حريمنا ما بيبانوش على متظاهرين

كده يعني.. كده.. طب دي اسمها ايه؟ بلطجة؟ ولا فوضى؟ ولا استهبال؟
كده واحدة تحتجز بشكل غير قانوني، اللي سلمها الازهر، سلمها لمين؟ لامن الدولة، بتهمة ايه؟ بتهمة انها عايزة تسلم! قام امن الدولة سلمها للكنيسة، قامت الكنيسة حجزتها وفيه ناس بتقول ان البنت اتجننت.. صحيح ده كلام لسه في اطار الاشاعة بس جائز لان الكنيسة قالت بنغسل لها مخها المغسول لانه اتغسل غسيل البرك وما فضلش بطينه
اللهجة اللي بتتكلم بيها الكنيسة لهجة فيها تحدي للقانون، وللحقوق المدنية، وللانسانية، والكلام اللي قاله نجيب جبرائيل كلام اقل ما يقال عنه انه منحط وحقير ومضحك في آن واحد.. حقا وصدقا ويقينا
دلوقت المسألة مالهاش علاقة بواحدة اسلمت ولا ما اسلمتش مش دي القصة دلوقت
القصة ان جهة، اي جهة، غير ذات صفة، تحتجز مواطن، وتعلن ببجاحة انها بتعذبه، وبتدي له عقاقير، وتتحدى الناس لما يطالبوها انها تلتزم بالقانون، دي اسمها بلطجة، وبلطجة باشراف من الدولة، الدولة نفسها باجهزتها بتتحدى القانون وتتحدى الارادة الشعبية اللي بتتساءل فين القانون
هي بقت كده؟ طيب مدام من حق امن الدولة والكنيسة انهم يخطفوا الناس، ويعذبوهم، ويحتجزوهم، يبقى من حقي انا لما اتغاظ من واحد اولع في جتة امه وماحدش يسألني انا باعمل ايه؟ اللي يقدر على حاجة يعملها، ولما الدولة نفسها مش بتحترم القانون يبقى احنا نحترمه ليه؟ وباي عين حد يحاسبنا
طيب صادف بقى ان الجهة المختطفة للمواطنة دي هي جهة دينية
ها؟ يا بتوع الحقوق المدنية؟ ها؟ جهة دينية
وصادف سبحان الله ان الجهة دي هي الكنيسة
ها؟ يا بتوع المواطنة.. ها؟ المواطنة والحقوق المتساوية والقانون وحقوق الانسان، بصوا على نجيب جبرائيل بيقول ايه، بتاع حقوق الانسان
طيب
دلوقت القضية دي متحولة طائفية، وحتفضل طائفية ومالهاش حل تاني غير انها تبقى طائفية طول ما المسيحيين ساكتين على اللي حصل ومعتبرين ان ده عادي
طيب ماهي زي ما خطفت وعذبت واحتجزت كاميليا لاي سبب من الاسباب حتعمل كده في اي حد تاني مدام "من رعاياها" وبعد كده لما مسيحي يسرق ولا يقتل ولا ما يسددش شيكات يسلموه للكنيسة بدل ما يسلموه للقسم
طب اسمع حد يتكلم عن المواطنة تاني بقى
واذكر فيما اذكر اني انا ووائل خليل ايام مذبحة نجع حمادي قلنا واجب المسلمين التضامن مع ضحايا نجع حمادي بكل قوتهم لو مش عايزين فتنة طائفية في البلد، لان تضامن المسلمين مع ضحايا نجع حمادي حيحول القضية من طائفية لجريمة قتل ويحاصر الطائفية والاعتراف بوجود مشكلة طائفية ضد المسيحيين من قبل مسلمين حيحلها او يحطها على سبيل الحل، وده واجب اي مواطن محترم والحقيقة ان فيه مسلمين كتير استجابوا
دلوقت كاميليا مواطنة بيحصل فيها اللي حصل لخالد سعيد، وغالبا اكتر، لان الموت اهون من الجنان، ربنا يثبت علينا عقلنا ودينا، حيث ان اللي بيفقد دينه بيفقدوه عقله توماتيكي توماتيكي، خالد سعيد اللي قتله اتنين مخبرين وظابط في قسم، يتقدموا لمحاكمة، الطب الشرعي يطنش عليهم، اهو نعرف نتصرف، لكن دي مؤسسة دينية بتتصرف زي اتنين مخبرين بيعذبوا واحد ويقتلوه، وواخدة دعم من الدولة وامن الدولة وكمان حتى مش بتنكر
المؤسسة الدينية دي مسيحية وسكوت المسيحيين على جريمة زي دي يحول الجريمة الى طائفية ويذكي نارها
لانه معناه ان المسيحيين موافقين ضمنا على اللي بيحصل
طااااب خلاص موافقين يعني؟ طب لو موافقين بقى ما نسمعش حس المواطنة دي تاني، وبعد كده فعلا بقى اللي يعمل حاجة، اي حاجة، مالوش كلام مع بقية المجتمع، لا في خير ولا في شر، نكلم ابلة الكنيسة وهي ترد علينا، ولو احنا اللي حنكلمها يبقى ياريت، المصيبة ان مش احنا اللي حنكلمها، ده مبارك اللي حيكلمها، وامن الدولة اللي حيكلمها: لمي عيالك تلمهم، بعتريهم تبعترهم، واللي يسكت على عذاب انسان زي دي بالطريقة دي حيحصل له اللي حصلها ان شاء الله.. اذا ما كانش عشان بريئة وما اجرمتش في حاجة يبقى عشان واحدة ست لا حول لها ولا قوة اذا ما كانش عشان ست يبقى عشان انسانة اذا ما كانش عشان انسانة يبقى عشان كائن حي
كما تدين تدان
المفروض ان فيه مسيحيين كتير كانوا بيتكلموا عن المواطنة والمساواة في الحقوق المدنية... مش سامعة حسهم، حسهم مهم قوي دلوقت، بنفس اهمية حس المسلمين بعد مذبحة نجع حمادي، وحسهم هو اللي ينقذ البلد من تفاقم الفتنة
واحب انبه على المسيحيين واوضح حاجة... حسهم لو سكت دلوقت على الجريمة دي، ماحدش حيسمع حسهم لو اتكلموا عن المواطنة تاني بعد الموضوع ده يعدي ده اذا عدى اساسا
اعيد الكلام تاني؟
صوت المسيحيين اللي كانوا بيتكلموا عن المواطنة والمساواة لو ما طلعش دلوقت ضد الجريمة دي وبقوة مش حيطلع لهم صوت تاني بعد ما الجريمة دي تعدي لو اتكلموا عن المواطنة.. لا هم مش حيسكتوا.. هم حيتسكتوا.. وماحدش حيعرف ينقذهم، ولا انا ههههههههه على اساس اني العمدة الالي.. ده واجبهم الوطني وواجبهم المسيحي، ولازم يبقوا واضحين واقويا في موقفهم، مش بيان ولا مؤتمر لا مؤاخذة، وضوح كامل ضد الجريمة دي وتسمية الاشياء بمسمياتها..
دلوقت، في هاذوها اللحظة الحرجة اللي بتمر بيها مصر بقالها سبعتلاف سنة
الكنيسة حطت المعيار والقانون: انا دولة جوة الدولة، عايزيني احوش عنكم فيدوني وافيدكم.. دول شعبي ورعايايا وبتوعي واغسلهم واكويهم وانشرهم واشفيهم
خلاص فهمنا الكنيسة مش عايزة مواطنة ولا حقوق مدنية ولا مساواة ولا نيلة، عايزة تفضل ماسكة المسيحيين المصريين من رقبتهم وتقدم خدمات للنظام في مقابل كده
فير جيم وعداهم العيب هم الاتنين، سوا الكنيسة او مبارك
ودلوقت في هاذوها اللحظة الحرجة، المسيحيين المصريين في مفترق طرق، عايزين مواطنة ومساواة وحقوق مدنية؟ يقفوا بقوة قصاد الجريمة اللي حاصلة دي
مش عايزين، يسيبوها تبقى خناقة المسلمين على "اختنا في الله" اللي اسلمت.. مش انسانة انتهكت بدون اي مسوغ قانوني
بس خلاص.. ده حيبقى قانون وانتوا ارتضيتوه، ماحدش بيمشي الكون على كيفه، لما تبقى عليا ابقى عايزة مواطنة لما تبقى ليا ابقى عايزة سلطة دينية
حتكرروا غلطة الخط الهمايوني تاني؟
(للي ما يعرفش قانون الخط الهمايوني الخاص بحظر بناء الكنائس الا بموافقة الخليفة ده كان مطلب من البطرياركية المصرية عشان تتصدى للامريكان اللي كانوا بيبنوا كنائس بروتستانتية ويغيروا طايفة الاقباط والخليفة استجاب بس مسكوا فيها بقى)
ومن ساعتها مش عارفين يخلصوا من الخط الهمايوني
ها؟ فيه عرف بيتثبت دلوقت... المسيحيين عايزين الوضع ده؟ المسيحي اللي مش عايز الوضع ده، وفعلا عايز مواطنة حقيقية ومساواة حقيقية وحقوق مدنية حقيقية ومش عايز الموضوع يتحول لقضية طائفية واجبه يعلن موقفه وبحزم ضد الانتهاك الصارخ ده للقانون ولحقوق مواطنة تتبهدل كده لمجرد انها من رعايا الكنيسة، وكأنها مش مصرية
اما بتوع المجتمع المدني، مافيش غير جمال عيد وحسام بهجت اللي اتكلموا في الموضوع
انا حطيت صوابعي العشرة في الشق خلاص
وخلاص يا جدعان، خلاص.. الوقت بيروح والقضية عمالة تتعمق في الطائفية ومالهاش اي شكل غير ان المسلمين عايزين اختهم في الاسلام ترجع.. لو حتثبتوها كده ثبتوها، انا شخصيا ما عنديش مانع، اربط الحمار مطرح ما يحب صاحبه
بس مش عايزين وجع دماغ تاني بعد كده.. عشان ضيعت وقتي كتير انا في الموضوع ده وطلع لا دول عايزين مواطنة ولا دول عايزين مواطنة، حارقة نفسي انا ليه؟

Sunday, 29 August 2010

سعد نبيهة بيخليها ذكرى جميلة لبعد العييييييد

تعيشوا وتاخدوا غيرها يا شباب
طبعا انا ما وصلتش من البراءة والشزاجة وطيبة القلب والنية الصافية اللي تخليني اثق في سعد نبيهة بيخليها ولا اتصدم فيه لما يوقع بيان جمال مبارك، الا هو بيان جمال مبارك ده اللي هو يتقال عليه ايه؟ يعني بيان البرادعي اسمه بيان التغيير.. جمال بيانه اسمه بيان التثبيت؟ عموما اهو ثبتنا جمال وخلا سعد نبيهة يوقع له
وطبعا توقيع سعد نبيهة مهم في حاجة واحدة، ان ده معناه ان الادارة الامريكية وافقت على جمال خلاص.. اقصد وافقت والمفاوضات انتهت 
هو البرادعي راح فين؟ هو مش كان جاي عشان ما جمال ما يثبتناش؟ مسافر مسافر... ما انا قعدت اقول خايفة من بكرة واللي حيجرا لما تروح وتغيب سنة وتفوت هنا حبيب مجروح.. ادي سعد نبيهة جاب لنا من الكنترول نتيجة الامتحان الامريكاني منك لله يا برادعي... كلمة واحدة حارد بيها على كل اللي عملته فيا




رووووووووووووح
انتوا واخلاقكوا وكرامتكوا بقى يا مصريين، يا ترضوا بقضاء امريكا يا تصنعوا قدركوا زي الشعوب المحترمة.. يووووو، ده انا نسيت ان المسلمين والمسيحيين داخلين لبعض مظاهرات ومش فاضيين ولا ينطبق عليهم الا مقولة بلال فضل: هذا ما فعله العيان بالميت 
طب بقى البسوا... انا حاسيب لكوا البلد لو الجدع ده مسكها

مؤتمر بالشبكة العربية لحقوق الإنسان عن اختفاء كاميليا شحاتة ومحمد ترك

ده طلع فيه حاجة اسمها اليوم العالمي للاختفاء القسري :)
الشبكة العربية عاملة مؤتمر بمناسبة اليوم العالمي للاختفاء القسري بكرة بمقر الشبكة
وحيتكلموا فيه عن الاختفاء القسري لكاميليا شحاتة ومحمد ترك والتفاصيل هنا

إحالة العمال للمحاكم العسكرية موت وخراب ديار


يرجى توقيع البيان هنا
لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.

وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة.
--------
المشاركون في الحملة
me myself and I
ماحدش فاهم
جنين
دهووم
انسانة
طراطيش
غريب
ياباني
ميزو
ثورة مصر
صرير قلم
ادهم
مدونة شاب مصري
الحلم العربي
رسائل البحر
أنا وهؤلاء
ايجي فويس
مدونة دودا
مصري

تأملاتي
مصري في فرنسا
مركز الدراسات الاشتراكية
تضامن
المنتدى النقابي الحر
اخوان اون لاين (اياد جاي؟ :)
هرش مخ

حكايات مصرية
كومة ورق
مصر الحرة
Mostahfazana
اما نعيمة
المحلة مصر
مصريون من اجل سيادة القانون

lost princess

ذات
Marwa Learns
مدونة بهية

محمد نجم
الخوجة
زنوبيا
ايام سودا    

ونرجوا من الجميع نشر البيان في كل المدونات

اياد نصار اخد المزية رسمي

تقرير الجلوبال فويسز ادا اياد نصار المزية واصبح سعادة اياد مز نصار
والله وباضت لكم في القفص يا اخوان.. على الله يعرفوا يستثمروا النجاح ده وما يخيبوش نفسهم.. تاني
ما يعينوا اياد نصار مرشد بجد يمكن ربنا يفتحها في وشهم ويجعل اخرة صبرهم خير بدل ما كل شوية يعملوا مظاهرة: العجل هد المصطبة شرب سبرتو واللي جاله جاااااله شرب سبرتو واللي جاله جااااااله
اتفرجوا بقى على المسلسل الجماعة وبدل ما ترفعوا قضايا وتشغلوا نفسكم بالحسبنة شوفوا ايه اللي خلا الناس تحب حسن البنا في مسلسل المفروض بيشتمه واعملوا زي ما بيعمل.. صعبة دي؟ ده انتوا اساتذة في البرمجة يعني.. برمجوا صح مرة واحدة في حياتكم
بس والنبي الظاهر ناس نيتها نضيفة، بكرة نلاقي نيويورك تايمز كاتبة
brotherhood and the mozz leader
مبروك :) جلوبال فويسز صحيح مدونة، بس مقروءة كويس قوي في العالم كله
احنا بقى نلم من بعض ونخلي وحيد حامض يكتب انشالله فيديو كليب عن اليسار يمكن ربنا يفرجها... ده لو لمينا اللي بيتصرف على قهوة الحرية وحوشناه حيعمل لليسار ييجي سهرة تلفزيونية وفيلم قصير كمان بدل ما يوسف معاطي هو اللي مستلمهم ومضحك عليهم الناس
وبرضه نصيحة لبتوع حملة البرادعي، شوفوا الراجل وخلوه يشتم لكوا البرادعي بدل ماهو قاعد يكتب تويتات كرهتنا في عيشتنا
ده حتى جمال مبارك ممكن يدفع له عشان يشتمه بدل ما الواد يا قلبي عمال يشغل لنا في البلكونة حمال الاسية ظالمينك حبايبي.. واذا كنا حنشربه حنشربه يبقى على الاقل وحيد حامد يحليه في عينينا بدل ما نعيش في نكد

Saturday, 28 August 2010

عدم اللا مؤاغذة

اصل قهوة كتكوت كان كاتب لي تعليق وكنت حارد على التعليق بتعليق وبعدين قلت لا اكتبه بوست احسن، بيقول لي ليه جبتي سيرة السلفيين في مقال كاميليا شحاتة مع انهم هم المجني عليهم باين
حنتكلم حنتكلم ثانية واحدة
بس عدم اللا مؤاغزة انا يحق لي اخزق عينيكوا واحد واحد عشان بصراحة انا اتخنقت من ام البلد على الشعب ونفاقكوا
انا بالذات يحق لي ليه؟ عشان عدم اللا مؤاغزة انا ما قصرتش في حق
لا قصرت في حق مسلمين ولا مسيحيين ولا ملحدين ولا سنة ولا شيعة ولا سلفيين عشان الحق حق 
اللي مقصرين ومزدوجي المعايير ونصابين سواء اللي بيبثوا خطاب كراهية من اي طائفة.. ماحدش يفتح بقه معايا
عدم اللا مؤاغزة يعني
اما عن السلفيين، انا مش فاهمة السلفيين ضحايا ازاي في موضوع كاميليا شحاتة؟ ام التجارة واستثمار الموقف اللي هم فيه، وعلى فكرة انا مش ضد استثمار المواقف، بس اكيد اهداف السلفيين اهداف لا شريفة ولا محترمة ولا مخلصة ولا انسانية ولا اسلامية ولا اخلاقية ولا نيلة خالص في اي داهية.. الواحد بيدافع عنهم لما يتقبض عليهم عشان هم انسان والحق حق وغير مقبول تعذيبهم او القبض عليهم او منعهم او المصادرة على رايهم، لكن هم ما عندهمش اخلاق.. خالص يعني واهدافهم دايما طائفية ومذهبية وتفريقية واشعال فتن عشان يلهوا الناس عن الحاكم.. انتوا ليه بتضغطوا عليا وتخلوني اقول كلام مش عايزة اقوله، انا لو قلت كل شكوكي ناحية السلفيين حازعل ناس كتير، بس هم مش مظبوطين واهدافهم مش مظبوطة ووراها حاجة، مش هم بنفسهم، لكن اللي بيحركهم والاسطوات بتوعهم، ومن الاخر كده الاتجاه السلفي ما بيخدمش غير اهداف الامبريالية والصهيونية
فيه مسيحيين بيستثمروا المواقف طبعا.. طبعا، ولا اخلاقيين ومش محترمين ومش عادلين ولا وطنيين ولا يتبص في خلقتهم وبيبثوا خطاب كراهية، وحتى اللي فيهم عامل علماني عايز العلمانية على المسلمين انما هو يفضل مسيحي وطائفي ومخه قفل وشرير جدا.. إلخ .. بس هم عددهم كام وتأثيرهم ايه؟ تأثير الكنيسة جاي من القوة اللي بتديها لها الدولة مش من قوة الاقباط، ثم ان الكنيسة عمالة تخرف مؤخرا بزيادة، الظاهر ده بشوي ولا ايه، لانهم عاملين زي الهابلة اللي مسكوها طبلة وبيلطشوا، ولا ده مبارك اللي ملبسهم ولا ايه؟ المهم يعني بتصرفوا بغباوة فوق الفاشية يعني
لكن المناخ الطائفي ده نحمله لمين؟ الواحد بقى يبقى حقاني ولا يبقى منافق؟ 
ايوة الكنيسة طائفية وكتير جدا مسيحيين طائفيين طبعا، ده بقى الاتجاه السائد، ده مؤخرا اتجننوا رسمي ومخهم لسع تماما.. بس مين المسئول عن المناخ الطائفي؟ المنطق بيقول ان الاغلبية هي المسئولة عن اي مناخ في الدنيا طائفي او سلمي، والحقيقة ان الاقلية هي اللي بتتعدي من الاغلبية مش العكس، والاقلية هي اللي بتعمل رد فعل للاغلبية مش العكس، والاقلية هي اللي بتقلد الاغلبية مش العكس، ما تخليكوا حقانيين عشان ربنا يكرمكوا ولا ياخدني ويريحني منكوا بقى ايه القرف ده؟ ما تعملوا قياس كده على المسلمين في العالم عشان تفهموا غباوة المسيحيين المصريين جاية منين؟ ماهو انت لو حتعذر المسلمين بسبب الاضطهاد العالمي وتقول ان ده رد فعل تعرف برضه ان المسيحيين المصريين ده رد فعل، وزي ما فيه مسلمين بيعملوا غباوات وانا باتعاطف معاهم عشان مقدرة موقفهم، المسيحيين المصريين بقوا يعملوا غباوات كتير، طب الاغلبية بتعمل كده ليه؟ عشان على راسها نظام بيسلط عليها ناس مش شريفة ومش محترمة ومش مخلصة بتستغل الدين عشان تحفز المشاعر الطائفية
خلاص بقى اجني ما زرعت يداك، او ما زرعت أيدي الحويني وحسان والمصري ويعقوب الخ الخ الخ
يعني الهرم كده: المسيحيين المصريين اتجننوا عشان المسلمين المصريين اتجننوا، ليه اتجننوا عشان على راسمهم مشايخ مجانين، مين اللي جنن المشايخ امن الدولة، امن الدولة بيجنن المشايخ ليه؟ عشان بينفذ اوامر النظام، النظام بيدي الاوامر دي ليه؟ عشان دي اوامر "الغرب المتحضر" طب دي اوامر الغرب المتحضر ليه؟ عشان مافيش حاجة تخدم اهداف الامبريالية والراسمالية غير ان المسلمين يطابقوا الصورة اللي هم بيصدروها عنا وان يبقى فيه بينهم شقاق ونزاع وان يتم عزل المسيحيين الموجودين في المجتمعات اللي فيها اغلبية اسلامية عشان حينفعوا بعدين، يا يتجندوا طابور خامس، يا يتحيدوا وما يحسوش بانتماء، يا يبقوا حصان طروادة، اهم ينفعوا، طب ازاي يعني نخلي ناس بقالها الاف السنين عايشة في بلدها تعمل كده؟ نكرههم في بلدهم، ويحسن ان عداوته بقت مع المسلم وكذلك المسلم يحس ان عداوته بقت مع المسيحي
الموضوع ده معقد قوي لدرجة انه محتاج كل الشرح ده؟ انا بقيت اكرهكوا خلاص.. كلكوا على فكرة
بكرة تقعدوا على الحيطة وتسمعوا الظيطة، وادي دقني ان الموضوع ده عدى على خير
بصوا بقى.. بصوا.. الموضوع مش حيعدي على خير
انا باقول لكوا.. الموضوع الطائفي ده مش حيعدي على خير، ومش حنخرج منه بسلام، ومش زعبوبة وخلصت.. وبكرة تقولوا نوارة قالت
احترموا نفسكوا بقى ولايموها، لا، مسلمين ومسيحيين، مش مسلمين بس ولا مسيحيين بس، واياك حد يقول لي بقى بتساوي بين الضحية والمش عارف اي الكلام الطين ده
انا اللي ماسكة الموضوع من اوله وانا اللي عارفة امتى دول كانوا ضحية وامتى دوكهمة كانوا جلاد
خلاص يا بشوات
دلوقت كلكوا مسئولين وكلكوا محتاجين تلايموها، وما عادش فيكم ضحية لا من دول ولا دول، انتوا الاتنين دلوقت بتستعبطوا وتستهبلوا.. ولا ما عادوش ضحية، لا المسيحيين عادوا ضحية ولا المسلمين عادوا ضحية في اللحظة دي كلكم مسئولين
واسمعوني بقى
سرقة الجزم من قدام الجوامع لسه ماحدش يعرفها.. فلوس السعودية مش حتنفعكوا بحاجة
سرقة مستودع الانابيب انا بس اللي اعرفها.. ووعود امريكا برضه مش حتنفعكوا بحاجة لو بتنفع كانت نفعت غيركوا
والسعودية وامريكا الاتنين بيشتغلوا مع بعض، مش حاجة غريبة ان واحدة منهم تدي فلوس لاتجاه والتانية بتدي فلوس لاتجاه تاني قال يعني ده الاتجاه المغاير له؟ يا سلااااام يا سلااااام
لايموها بقى، وما تخلونيش افسر اكتر من كده واقول اللي لسه ماحدش يعرفها.. عشان انا ست جدعة.. وانت عارف ان انا ست جدعة 
يا فرحة امكوا بيكوا وانتوا قاعدين تتخانقوا على الحريم وتخطفوهم من بعض ... بصراحة اتفو
واتفو على الحقوقيين النصابين كمان.. ماهم دول كمان راخرين هابلة ومسكوها طبلة مش عايزين نفسر
بس خلاص ما عادش.. ما عادش الموضوع مستحمل، وما عادش فيه وقت نطنش ونقول معلش اهو احسن من قلته، معلش اصلهم مظلومين، معلش اصلهم مذعورين
لا بقى.. الكل بقى حاجة مقرفة خالص، والكل وصل لمرحلة الاستعباط 

Friday, 27 August 2010

وحيد حامض حبيب قلبي

أنا حاتفرغ له بقى من هنا ورايح ومش حيبقى لي شغلانة غيره
وارجوكوا ارجوكوا ارجوكوا اتفرجوا على مسمسم الكماحة... ده غلب مسلسل حرب الجواسيس بتاع السنة اللي فاتت
امتى بقى رشيد رضا اخد فلوس من السعودية في التلاتينات؟ قبل تولي الملك فاروق يعني قبل سنة سبعة وتلاتين.. هي السعودية وقتها كان حيلتها ايه تديه لرشيد رضا؟ نوى البلح؟ لا وايه.. قال ايه الشعوعيين اتهموا رشيد رضا بانه بياخد فلوس من السعودية، شعوعيين التلاتينات اتهموا رشيد رضا؟ اولا هم شيوعيين التلاتينات كانوا فاضيين للكلام ده؟ ثم في التلاتينات بتاخد فلوس من السعودية دي زي اللي يقول لحد دلوقت: انت ممول من نيجيريا.. دول كانوا طبقة كادحة على ابوه
وقال ايه؟ رشيد رضا انهار على الكرسي يا مرسي وقعد يصرخ ويقول بيتهموني في ديني
طب وانا ممولة من بوركينافاسو

ابراهيم عيسى فاحت المصري اليوم ههههههههههههه احسن

ميدو جاب لي الفيديو.. شوفوا رد ابراهيم على المصري اليوم في الدقيقة 31 هههههههههههه بهدلهم


Watch live video from hwawshy on Justin.tv

Tuesday, 24 August 2010

أنا اتنصب عليا يا جدعان

الا موضوع حرية العقيدة ده طلع اشتغالة؟ ولا طلع كلام الصحف القومية صح ودي ناس مزقوقة؟ ولا ايه الحكاية بالظبط؟
مش مهم الحكاية ايه بالظبط، المهم ان السادة الحقوقيين بلا استثناء كلهم ضحكوا عليا
اييييييييييييييووووووووووووننننننننننننننننن
اييييييييييييييووووووووووووووووووووووننننننننننننننننننننننن
انا اتاكلت على قفايا
ومش حاسكت على فكرة انا فضحية

بقى السادة الحقوقيين اتشالوا واتحطوا على حرية العقيدة من كل ناحية، وانا اتشالت واتحطيت على حرية العقيدة من كل ناحية برضه زيهم
وعملنا حملات وهيصة وبوليكة وهلولة، تيجي يا عم موضوع كاميليا شحاتة، ماهو ده حريات.. اشمعنى كاميليا مسكوت عنها
تيجي تكلمهم يقولوا لك: ما الناس سكتت عن قضايا الحريات التانية
انهي ناس؟ انا ماليش دعوة بمخاليل السلفيين واللي ماشيين في ديلهم.. احنا اخدنا مواقف مع الحريات، مع البهائيين، مع اندرو وماريو، مع محمد حجازي، مع العائدين للمسيحية، على اساس حريات، كلنا مش كده، اقصد كل المهتمين بالحريات الدينية صح؟
طب ايه؟ اشمعنى كاميليا شحاتة مش مهتمين خالص، قال ايه كل اللي عملته المبادرة انها طالبت النائب العام ان كاميليا تبقى بخير وصحة وسعادة وقالت لهم مدام مش موجودة بارادتها حاجزينها ليه؟ اخص عليك اخص
#a7a
في نهار رمضان.. انتوا كنتوا بتنصبوا عليا؟ يعني انا ماشية اطبل وراكوا وتطلعوا انتوا كمان انتقائييين وبتشتغلوني؟ هي حرية العقيدة دي لاي حد غير المسلمين؟ وحرية الرأي دي لاي حد غيرهم؟ وخطاب الكراهية احنا ضده لما يبقى ضد اي عقيدة في الدنيا الا المسلمين؟ ليه؟ طب ده حتى المسلمين مضطهدين عالميا واكتر ناس طالع دينهم في الكون، مش انتوا بتوع حقوق الانسان اللي قلبكوا عاطفي؟ مش صعبان عليكوا المسلمين ليه؟
دلوقت ايه وجه استشعار الحرج في الكلام عن قضية كاميليا شحاتة وانها قضية حرية دينية فعلا وان الكنيسة كمؤسسة كبيرة بمساندة الدولة تدخلت في اختيار انسانة لديانتها؟ انا افهم استشعار الحرج لما الانسان تبقى مواقفه مش متسقة
يعني مايجيش محمد حسان مثلا يتكلم عن الحرية الدينية لان ده مافيش اتساق
لكن حقوقيين اخدوا مواقف مشددة ورفعوا قضايا وعملوا حملات عشان حرية العقيدة عند ناس.. ساكتين على ناس تانية ليه؟
ثم ايه خطاب الكراهية اللي شادد حيله اليومين دول ضد المسلمين؟ انتوا بتندموني اني وقفت معاكوا في يوم من الايام يعني؟ بتحسسوني اني غلطانة وان شكوك السلفيين كانت في محلها؟ وان الموضوع كله سبوبة واشتغالة وان القضايا دي مفتعلة؟ وان مافيش اي حاجة من القضايا دي، دي كلها ناس مدفوعة عشان تعمل حملات معينة؟ ما هو ده بقى كان كلامهم وانا كنت باضحك على كلامهم.. بس الظاهر كلامهم صح، والظاهر فيه ناس لما بتتحط في المحك بتبان على حقيقتها، هي حرية العقيدة دي من حق كل الناس ويتعمل حملات لصالح كل الناس الا ناس معينة؟ وناس معينة كمان يتوجه لهم خطاب كراهية وايه حكاية حملة: انا فاطر واللي له شوق في حاجة يطلع لي برة دي؟ ها؟ دي تعليمات؟ ياريت بقى اعرف مين المشرف على الحملة دي ولو متمولة مين اللي ممولها
شكرا شكرا يا ولاد الاصول
بس انا اللي بينصب عليا باخلي اللي ما يشتري يتفرج عليه على فكرة.. انتظروني بقى وقد جعبر من فنظر

Sunday, 22 August 2010

بلا خشخاش بلا بانجو.. مافيش اجمد من البيسة

الوزير عرف بالتليفون ان اللوحة اتسرقت، قام اتصلوا بيه بالتليفون وقالوا له اللوحة رجعت، قام اتصل بالتليفون بوزير الداخلية قام ما ردش عليه وتلاقيه قال له: ييييييييييييييييييييييي قام الريس ما سكتش.. اتصل بالتليفون بالوزير وقال له لازم نقبض على العصابة، وبعد ما طلع بيان انهم لقوا العوصابة ارتضح انهم ما لقوش العوصابة ولا حاجة، وما لقوش اللوحة، وان دي كلها هلاوس صحفيين
انا اللي صحفية وباقول لكوا الصحفيين بيهلوسوا، حتى بصوا على الخبر
الواد بيقول القاهرة اليوم في الساعات الاولى من صباح يوم السبت، مع ان السبت ده كان امبارح.. وكما قلت على التويتر شعار مؤتمر الحزب الوطني القادم:
ابويا يطلب قهوة اعمل له شاي واسقيه لامي، وخيالك ييجي على سهوة ما افرقش خالتي من عمي
ايه الوش ده كله؟ كل ده عشان الخشخاش
طب ما احنا عندنا لوحات اجمد منها
اهي



ولو ما عجبتكوش صور الانسان الانوي النادر دي
حطوا صورة اوشة اخت مليجي
احلى ولا مش احلى؟ مزة ولا مش مزة
بطلوا مبالغات بقى

Saturday, 21 August 2010

بتتفرجوا على اهل كايرو ولا لا؟

حلو حلو حلو حلو حلو حلو حلوووووووووووووووووووووووووووووو
مكتوب حلو
واخراج حلو
وتمثيل حلو
بالقلم والمسطرة

ضبط لوحة فان جوخ في مطار القاهرة بحوزة شاب ايطالي

سمعت الخبر في راديو مصر: خبر عاجل: ضبط لوحة الخشخاش لفان جوخ بحوزة شاب ايطالي بمطار القاهرة
يعني حتى مش عصابة
الواد دخل زي كريم عبد العزيز وماجد الكدواني حط اللوحة التقليد ولهف اللوحة الاصلية وحطها في شاندوشت ومشي بيها
عادي كده... مافيش تأمين، مافيش شوية مجهود يعمله زي كاترين زيتا جونز عادي كده
عسل عسل عسل

ابن العميل بابل بيتريق على النشطاء

 تحديث:
انا لقيت ان المجموعة اللي عاملة فيديو المناضلين ده عاملين فيديو لرجل اعمال حرامي، قلت لازم انزله عشان حرام اظلمهم



هههههههههههههههههههههه ايه العيال دي؟ بيستعطوا ايه؟ بس عمرهم ما حيعرفوا يجيبوا احمد عز واشرف مروان
برضه اعملوها انتوا 
-------------
هو الفيديو معمول حلو ويضحك فعلا، عشان نبقى موضوعيين
الفيديو بتاع ميلودي، اللي هو ازاي تبقى مناضل
ده



حلو ودمه خفيف فعلا... بس لو كان اللي عامله اي حد غير ابن الجاسوس.. معلش بقى الانصاص قامت والقوالب نامت، ما بقاش الا ده كمان، تيجي من اي حد تاني غيره
وعلى اي حال، تقديرا منا للابداع، المفروض كمان النشطاء يعملوا فيديوهات: ازاي تبقى مليادرير وبطل قومي والريس يمشي في جنازتك بعد ما كنت كحيان ومش لاقي تاكل، تبقى سلسلة فيديوهات 
1- ازاي تعلق بنت الريس: اختار الهابلة اللي فيهم
2- ازاي تبقى البلد امانة في ايديك يا رأفت
3- ازاي تبلف اللي ييجي بعد حماك وتشوط كل اللي وقفوا جنبك
4- ازاي تبقى رجل لكل العصور
5- اتعلم من اخطاء غيرك وما تقفش في البالكونة
6- موت وانت ماسك ذلل على غيرك عشان ماحدش يفضحك لا وانت عايش ولا وانت ميت
ياريت والله واد عترة ابن عترة يعمل الفيديوهات دي وتبقى دمها خفيف ولطيفة بدل ماحد يطلع يتشنج ويعمل لنا الرفيقة الدادا ام عطيات الشغالة ويضحك علينا الناس اكتر ههههههههههههههههههههههههههههههههههههه
بس الواد اللي في الفيتيون ده شبه علاء سيف ههههههههههههههههههههههههههههههههههههههههه اموت واعرف مين صاحب الفكرة وكاتبها والمخرج بتاعها، عيال صايعة والله، انا مش معترضة على الفيديوهات، بس كانوا يبيعوها لاي حد تاني غير ميلودي، معلش انا تافهة في الحاجات دي، بس مش ده اللي يذيع الحاجات دي
وانتوا راخرين.. ابقوا احلقوا كده واستحموا وما تشيلوش كتب في الرايحة والجاية يعني، وما تلبسوش زي بعض، وبعدين هههههههه ايه ده؟ ايه البت دي عرف يجيبها ازاي كده؟ دي شبه معظم البنات اللي على البورصة فعلا ههههههههههههه ولاد الحراااام.. بس برضه مش ابن العميل بابل اللي ينزل حاجة زي دي
وعموما، حد يفكر في اقتراحات الفيديوهات دي، واهي بالمرة يتعمل واحدة زيها لاحمد عز وواحدة زيها لجمال مبارك، وعندنا عيال كتير بتعرف تمثل وعيال كتير شاطرة في الفيديو وعيال كتير صايعة ودمها خفيف
ومتشكرين لابن العميل بابل اللي ادانا الفكرة.. عايزين يدخلوا فيديوهات، ندخل فيديوهات، وهم اللي حيطلعوا خسرانين فيها

ربنا يسلط عليك مخك كمان وكمان يا حامض

حد يجيب اياد نصار يعمل دور حسن البنا في مسلسل بيهاجم الاخوان؟ ده مين الاخواني اللي عمل الكاستينج ده؟ اهو كلللللللللللل البنات دلوقت وقعوا في غرام حسن البنا ومن بكرة الصمح الساعة حداشر صباحا الخامسة عصرا حينضموا للاخوان
ده الاخوان نفسهم لو كانوا عملوا المسلسل ما كانش حيخطر في بالهم ابداااااا يجيبوا اياد نصار.. دول غلابة دول ما يفهموش في الكلام ده، اخرهم كانوا حيجيبوا مجدي كامل ويكرهوا الكون كله في حسن البنا
وطبعا حسن البنا طلع شعوعي في المسلسل
الحمد لله الحمد لله... ربنا جبر خاطري واهو شتم اليسار في السكة الحمد لله وطلع حسن البنا شعوعي والشيخ حب يهديه ويقول له يا شيخ حسن ده الشيوعية كفر قام بمنتهى الفجر والبلمبم قال له: فيه كتب كافرة وكتب مؤمنة؟  وما رضيش يسمع نصيحة الراجل
ههههههههههههههههههههههه الله يحظك يا حامض
وسلفي.. عميل للسعودية وتبع رشيد رضا
ومسيحي واخد من فرنسا فلوس عشان يبني جامع
كل ده وهو اياد نصار... ولا الهوا يا حامض، والله لو قلت عليه اسرائيلي، اللي عمل الكاستينج عمل فيك مقلب
وزي ما قلت لهم على التويتر في نهاية المسلسل حيطلع ان حسن البنا ما اتقتلش، حسن البنا مات باسفكسيا الخنق بعد ما بلع طربوشه
اتاري الاخوان بقالهم تمانين سنة بيحسبنوا... صبروا ونالوا وحسبنتهم جابت نتيجة
ولاد المحظوظة
انا باتابع على فكرة مسلسل الجماعة... حلو حلو تابعوه، احلى حتت بتاعة حسن البنا طبعا 
;)

Friday, 20 August 2010

سواحل كفر البطيخ كلاكيت 5748938574069 مرة

الرسالة دي وصلت لماما بالفاكس:
بسم الله الرحمن الرحيم
إلى الأستاذة صافي ناز كاظم
أنا نشوى حسن عبد العزيز عصفور من دمياط مركز كفر البطيخ وزوجي محمد عزت محمد خضر من دمياط مركز كفر البطيخ أيضا، زوجي إنسان طيب وخير وخطيب مفوه وتخرج من كلية دار العلوم سنة 1998 وهو الآن يدرس في مرحلة الماجيستير في جامعة طنطا كلية الاداب قسم اللغة العربية شعبة الدراسات الاسلامية وقد قام بواجبه نحو بلده واهل بلده منذ عام 2001 وهو يدعو اهل البلد شبابا وشيوخا ورجالا ونساء الى الله عز وجل يدعوهم الى فعل الخيرات وترك المنكرات والتكافل الاجتماعي فيما بينهم وبالفعل التف اكثر اهل كفر البطيخ حوله وخاصة الشباب فاصبحوا بعد الضياع يصلون في الجماعة ويحفظون القرآن ويكفلون الايتام ويساعدون الفقراء والمحتاجين واعجبت بعض شركات التسجيلات به فاخرجوا له بعض الاشرطة فازدات شعبيته فكانت هذه جريمته ان احبه الناس فالتفوا حوله فما كان من الجهات الامنية الا ان كمموا فمه واوقفوه نهائيا عن الخطابة منذ 6 سنوات لماذا لا ندري ولم يكتفوا بذلك فاذوه ايذاء شديدا فكل فترة يهجمون على بيته ليلا ثم ياخذوه الى امن الدولة فترة ثم يعيدوه مرة اخرى من اجل مضايقته وارهاب الناس من حوله ويسألهم زوجي لماذا تفعلون بي ذلك وانا خطيب في انصار السنة المحمدية ومعلوم ان انصار السنة جماعة مسجلة لدى الجهات الامنية ومصرح لها لهذه الانشطة التي يقوم بها زوجي فكان لا يجد جوابه عند امن الدولة سوى بعض التطاول ثم كانت الطامة الكبرى وهو انه تم اعتقاله يوم 28/2/2010 فجرا وكان زوجي في هذا اليوم مريضا وطريح الفراش منذ خمسة عشر يوما كل الذي علمناه عنه انه تم ارساله الى جهاز امن الدولة بالقاهرة للتحقيق معه في ماذا لا ندري، وهناك لقي من صنوف الهوان والتعذيب البدني والنفسي ما لقي ثم تم اعادته الى فرع امن الدولة بدمياط بعد حوالي 20 يوما حيث اسفر التحقيق عن لا شيء وكنا نظن انه سيخرج الينا سالما حيث انه رجع من الجهاز ولا توجد له تهمة واذا بنا نفاجأ بعد عشرة ايام من احتجازه بدمياط انه تم اعتقاله بسجن ابي زعبل شديد الحراسة لماذا لا ندري، حيث ان زوجي لم يتم الى الان توجيه اي تهمة له على الاطلاق.
وارجو منكم أن تسألوا عنه اهل بلدته كفر البطيخ اسألوا بالله عليكم عن الشيخ: محمد عزت محمد خضر، اسألوا عنه وعن سمعته الطيبة في بلده.
المهم أننا قمنا بعمل تظلم له وبالفعل قبل التظلم وافرج عنه بموجب افراج قضائي في يوم 17/6/2010 وتم ترحيله الى فرغ دمياط ولكن فوجئنا انه لم يخرج من امن الدولة بدمياط وتم احتجازه هناك فاردنا ان نزوره انا وامه واطفاله وهذه اقل حقوقنا الانسانية فمنعونا من الزيارة وكانوا يقولون لنا تعالوا للزيارة وكانت امه العجوز المريضة بالقلب والضغط والسكر والمرارة والكبد - تتكبد المشقة للزيارة ثم حينما تصل الى باب من الدولة يقولون لها ولنا ارجعوا لا زيارة اليوم فتقول لماذا انتم قلتم لنا تعالوا فيقولون انها اوامر فلما علم زوجي بذلك مرض مرضا شديدا حيث انه يعاني تسعة امراض:
1- ارتفاع في ضغط الدم
2- ضيق في التنفس والربو
3- الحساسية المزمنة
4- التهاب المرارة والقولون العصبي
5- الصداع المزمن النصفي
6- اضطرابات بالدورة الدموية وخفقان القلب
7- غضروف بالفقرة القطنية
8- خشونة شديدة بالركبتين
9- النقرس
وكل هذه الامراض عندنا بها شهادات الاطباء فلم يرحموا مرضه وحالته الصحية هذه بل قاموا بالاعتداء عليه بالضرب في فترة تواجده هنا في دمياط وذلك كان في يوم الاثنين 21/6/2010
حيث اصيب زوجي بحالة نفسية عصبية سيئة للغاية اشبه بالهيستريا من جراء ما فعلوه معه من الاهانة وكان زوجي مصابا في ذلك الوقت بضيق في التنفس وارتفاع في ضغط الدم وسرعة بضربات القلب فطلب الكشف عليه بالمستشفى فقال له امين الشرطة لابد ان تعرض اولا على رئيس مكتب امن الدولة فوافق زوجي فقال له امين الشرطة اخلع نظارتك فقال له زوجي لماذا قال لاننا سنربط قماشة على عينيك ونغميك حتى لا ترى شيئا فقال له زوجي كيف ذلك وانا عندي ضيق في التنفس فما كان من امين الشرطة الا انهال عليه بالضرب والشتم وهو في هذه الحالة الصحية السيئة وهو خارج للعلاج حتى كاد زوجي ان يلفظ انفاسه الاخيرة وتحت الاكراه والضرب والسب والشتم عصبوا عينيه وادخلوه على رئيس المكتب المحترم فما كان منه الا ان انهال عليه هو ايضا بالسب والشتم فازدادت حالته سوءا وكاد قلبه ان يتوقف وانفاسه ان تنقطع حتى خشي على نفسه ان يصبح مثل الشاب خالد سعيد السكندري وفي اليوم التالي الثلاثاء 22/6/2010 تم اعتقال زوجي مرة اخرى الى سجن ابي زعبل شديد الحراسة وهو في هذه الحالة النفسية والصحية السيئة بلا ذنب ولا جريرة فإلى متى هذا الظلم؟
نشوى حسن عبد العزيز عصفو
كفر البطيخ
------------
يذكر ان سواحل كفر البطيخ تعاني من استهداف امن الدولة لاهاليها منذ التسعينات
يذكر ان سواحل كفر البطيخ منها الحضري اللي بيرقص
يذكر ان الشيخ عزت من تلامذة الشيخ حسان
يذكر ان الراجل حيموت كده.. ولو طلع دلوقت حيحتاج لعلاج نفسي عشر سنين قدام
يذكر ان خالد سعيد بقى مضرب الامثال
يذكر ان الراجل ماحدش بيعمل له حاجة لا من معارفه ولا بلدياته ولا حد سائل فيه
يذكر ان ايه الخرا ده؟ حسبي الله ونعم الوكيل

Thursday, 19 August 2010

ممموووواااااهاهاهاها هاهاهاهاهاااااااااااااع هاهاهااااااااااااعععع هاع هاع هيييييع

انني الساحرة الشريرة.. بص هنا
>>>>>>
انا الساحرة اللي باعذب الناس... خدوا التعويذة دي:
مقال محمد وعلي وابراهيم عن مسمسم الجماعة... الا صحيح نسيت اقول لكوا، كان الراجل بيسأل ابنه اللي لسه خارج من السجن حالا بالا ابو الفصاد: ايه اللي دخلك الاخوان؟ قام ابنه قال له: عشان انا انتهازي ههههههههههههههههههه
خدوا المكال واتعذبواااا... اتعذبوووووووووووواااااا


أسرار "الجماعة" .. انكشفت!



كتب - رئيس التحرير:
الإخوان المسلمون غاضبون جداً من مسلسل وحيد حامد "الجماعة".. لم يحدث أن أصابهم الهياج الشديد من أي إجراء تتخذه الدولة ضدهم لأنهم بنوا سمعتهم وشهرتهم علي أنهم هم "فقط" الأوصياء علي الإسلام (لا.. ده عشان الدولة عجزت بس، هات لهم هيفاء وهبي وانت تشوف).. مفاتيح الدين معهم.. أبواب الجنة رهن يمينهم يفتحونها لأتباعهم.. ويغلقونها علي المسلمين الآخرين.
لماذا انزعجوا من الدراما؟! لأنها ببساطة وضعتهم في النور.. أدخلتهم إلي كل بيت.. سلاحهم
كان السرية والغموض فجاء وحيد وكشف المستور..

الإخوان عاشوا عقوداً وحولهم هالة من القدسية بأنهم مباركون.. فجاءت الدراما المبنية علي تاريخ موثق كتبه بعضهم مثل مؤسسهم البنا ومرشدهم التلمساني لتزلزلهم!
المفاجأة أن تدعي جماعة الإخوان المسلمين أنها قوية وذات بأس شديد ثم يهزها عمل فني من الأعماق..

الفن أقوي من أي سلاح آخر ضد الإخوان لعدة أشياء.. أولها أنه "موثق" وثانيها أن المسلسل قدم رأياً آخر للإسلام علي لسان شيوخ من معاصري وأساتذة حسن البنا.

هناك إسلام آخر هو الإسلام الصحيح ويتميز بأنه لا يسعي للسيادة علي الناس وتفصيل نموذج انعزالي معاد للمجتمع. وإنما هو دعوة إلي سبيل الله بالحكمة والموعظة الحسنة فإذا الذي بيننا وبينه عداوة كأنه ولي حميم.
الجماعة المحظورة سخرت موقعها الإلكتروني للرد علي المسلسل وتكذيبه وتفنيد حقائقه. لكن المشكلة أن وحيد حامد رغم عبقرية السرد التي صاغها بمهارة المخرج محمد ياسين. إلا أن البناء الدرامي غير مكتمل لأنه لا يمكن أن تمزج الوثائق التاريخية بدراما ملحمية مثلما فعل من قبل مع مسلسل "العائلة" الذي قدمه قبل 18 عاماً فجاء عملاً درامياً مكتملاً (ياخبر اسود ومنيل، كل ده وطلع في الاخر غير مكتمل؟).
الإخوان يقولون إن القصد من إذاعة المسلسل في هذا التوقيت هو توجيه ضربة قوية لهم قبل انتخابات مجلس الشعب!.. والسؤال هو هل أصبحوا فجأة بهذه الهشاشة بحيث يؤثر فيهم مسلسل!.. يزعمون أنه كان جاهزاً للعرض قبل 3 أعوام وأن الوزارة"ادخرته" لتضايقهم في الانتخابات القادمة! والرد بسيط. فلو كان المسلسل أذيع 2007 لقالوا إنه قبل انتخابات الشوري ولو تم بثه في 2008 لقالوا إن القصد منه تمرير قانون الطوارئ ولو أذيع في 2009 لقالوا إنه لتشويه منظمة "حماس" أحد فروعهم والمؤتمرة بأوامرهم والتي ارتكبت أكثر من جريمة في حق مصر كاجتياح معبر "رفح" وقتل شهيدين من أولادنا هما ياسر عيسوي وأحمد شعبان.(اللي اختشوا ماتوا واندفنوا وزمانهم بقوا بترول، ياراجل اتلم ده المية والكهربا مقطوعة من دعاهم علينا)
لن يعدم الإخوان حجة لانتقاد المسلسل رغم أن ما به من معلومات مستمد من مصادر إخوانية كعصام العريان نفسه وكتاب جمعة أمين عبدالعزيز مؤرخ الجماعة وحصاد العمر لصلاح شادي وحقيقة التنظيم الخاص لمحمود الصباغ بالإضافة لمذكرات عمر التلمساني وحسن البنا.. النص راجعه اثنان من أساطين تاريخ مصر الحديث وهما الراحل د. يونان لبيب رزق ود. كمال شقرة.. ومن ثم فإنه حاصل علي ختم الجودة العلمية وهو شيء نادر في الأعمال الفنية.

لقد ضرب المسلسل الإخوان في أهم ركن لديهم وهو أنهم جماعة ربانية لا يأتيها الباطل من بين أيديها ولا من خلفها.. المحظورة أصبحت للمرة الأولي مطالبة بأن تراجع نفسها وهو ما كانت تعتبره قبل ذلك ضرباً من الجنون.. قالوا إن يد الله مع الجماعة.. القرآن دستورهم والحديث الشريف قبلتهم ومن ثم لا يصح أن يراجعهم أهل الدنيا.
وحقيقة الأمر أن المسلسل يقدم- لأول مرة- وقائع عليها إجماع. والخوف أن يتطرق الأمر إلي كوارثهم التي يرفضون الاعتراف بها كحادث إطلاق الرصاص علي عبدالناصر في ميدان المنشية عام 1954 والذي أدي إلي قطيعة بينهم وبينه.. هناك أسرار يخشي الإخوان أن يتطرق إليها المسلسل مثل المظاهرات التي سارت تندد باتفاقية الجلاء التي وقعها الرئيس الراحل مع بريطانيا يوم 18 يونيو .1954
الجلاء كان أول مشروع وطني لناصر ومع ذلك خرجت عشرات المظاهرات ضد الاتفاقية واتهموه بالخيانة العظمي رغم أن جمعيتهم الوحيدة التي لم تحل.. د. القرضاوي كتب ذلك في مذكراته ومثله د. عبدالعزيز كامل وزير الأوقاف الأسبق المتعاطف مع الإخوان. الأمر الذي يثير علامات استفهام قوية بأنهم كانوا يعملون مع الإنجليز ضد عبدالناصر.. وقد ثبت أن البنا حصل علي مساعدات من بريطانيا عند تأسيس الجمعية.

الإخوان يخشون أن يتطرق المسلسل إلي تفاصيل التنظيم الذي أنشأه سيد قطب ومدي مسئوليتهم عنه. خصوصاً أنه التنظيم الذي خطط لاغتيال عبدالناصر "بالمناسبة هناك شهادة حق قالها د. فريد عبدالخالق لقناة الجزيرة في هذا الصدد ويا حبذا لو ظهرت في المسلسل".
العمل الذي يقدمه التليفزيون الآن يؤكد خطورة الاستسلام إلي فكرة الدولة الدينية إذا ما سادت لدي البعض (ايهييييييي دلوقت الجزيرة بقت حلوة ومش بتشوه سمعة مصر؟).. ببساطة ستنظر الجماعة لنفسها باعتبارها بقرة مقدسة لا يجوز الاقتراب منها (لا انا عارفة مين البقرة في الليلة دي، قليل من الذكاء).. لا تتحمل معارضة.. لا تقبل الرأي الآخر.. وتنسي أنها طالما عملت بالسياسة أصبحت "دنيوية".
ولعل من أغرب الاتهامات التي توجه للمسلسل علي موقع الإنترنت أنه يصور وكيل نيابة أمن الدولة العليا "يقوم بدوره حسن الرداد" باعتباره عمر بن الخطاب في عدله وذلك- علي حد مزاعم المحظورة- ليتقبل منه المشاهدون بعد ذلك حكمه بالإرهاب علي الإخوان.. إذا كانت هذه هي حجة "المحظورة" فإنهم- كعادتهم- تغافلوا عن الموضوعية التي تعامل بها المؤلف وحيد حامد مع شخصية حسن البنا في بداياته عندما "هش وبش" في وجه الزبون القبطي الذي جاء لإصلاح ساعته. (بش وتس؟ بش وتس يا ولا؟ طب خليك انت للترجمة الصيني) وكيف رحب به البنا. رغم أن هذا ضد ما يروج له الإخوان بأن الأقباط عليهم دفع الجزية!!
علي أي حال الدعاوي القضائية والملاحقات القانونية التي تهدد المسلسل والشائعات بأن وراءه صفقة "أمنية" كلها أسباب تؤكد أن الجماعة لديها ما تخشاه وأنه نقطة ضعفها الكبري وهو .. التاريخ!

Wednesday, 18 August 2010

البسوا

انا باتغاظ منكم قوي لما باشوف الحاجات دي



والبت مش شايفة حاجة في اللي عملته والسجناء تلقوا معاملة حسنة وواخدة صور للتذكار! على اساس انها كانت بتشتغل في جنينة الحيوانات ومتصورة جنب الحيوانات النادرة
بصوا بقى... كل اللي بيحصل كوم وطريقة تعامل المجندات مع الناس بالطريقة دي كوم تاني.. ماحدش يسألني ليه؟ بس القنابل اهون عندي

Tuesday, 17 August 2010

انا معاك يا اسد الاسود.. اديله ما تريحوش

فاكرين انتوا الموضوع اللي كتبه اسد في المصري اليوم عن ستيفن ريتشارد الاسرائيلي اللي جه في الكونجرس الاسلامي هنا في مصر وقابل طوب الارض اخوان على بهائيين على قرآنيين.. (انتوا يا عيال هبل؟ اي حد يقول لكوا تعالوا اوريكوا القطر تروحوا معاه؟) وعمر اتصل بداليا زيادة وقال لها: قال؟ قال يا داليا قال؟ فقالت له: اومااااال، ده حتى ستيفن "انسانا رائعا ويعرف معنى أن يكون إنسانا" وكان انسانا ولا كل الانسانانات وكان بشرا ولا كل المبشورين
قام قال لها: ده اسرائيلي
قام قالت له: وماله؟ احنا مش بنفرق ما بين الناس على اساس "ديانتهم وموقعهم الجغرافي"! المهم يبقى انسان.. انسان.. انسان، انسان قوي، انسان خالص، انسان آخر حاجة
قوم انا طبعا سخنت، انتوا عارفين انا بالعلع في حاجات دي
قوم داليا زيادة كتبت رد تقول فيه برضه موضوع انسان وبشر ده وقالت: لن اسمح لاحد بالمزايدة على وطنيتي بس انا ماليش في السياسة، وبعدين ستيف اوستين الانسان بحق ده مش اسرائيلي.. ده امريكي، ثم ازاي يعني واحد ينتهك خسوسية ستيف اوستين وينشر بياناته على الفيس بوء (اللي بيقول فيها انه اسرائيلي وانه عضو في حركة اسرائيلية ومتصور بعلم اسرائيل اسم الله على مقامه) وقالت كلام واعر وشيريز كتير قوي
!!!!!!!!!!!!
اي والله عليكوا ولا اعدم ستيفن وداليا في ساعة واحدة
قام عمر ما سكتش، قال بتطلعني كداب؟ وراح جاب كل شيجن من مصارينه في هاذوها البوست المعنون: داليا زيادة والصهيوني الطيب وحاطط صورة ستيف اوستين وهو متصور بالعلم الاسرائيلي
هههههههههههههههههه يا عيني... بس اكيد يستاهلوا، ماهو ربنا مش حيوقع الكونجرس الاسلامي في ايد عمر الهادي الا يكونوا يستاهلوا، امال حيعاقبهم العقوبة الجامدة دي ليه؟ ربنا ما يكتب على مؤمن عداوة عمر الهادي
وانا معاك يا معلم.. بس والنبي اتشوقت اني اشوف انسانية ستيفن اللي بيعرف معنى انه يكون انسانا.. حد يعرف معنى انه يكون انسانا؟ اصلي ما باعرفش لغات، مش عارفة ليه لما داليا زيادة اتكلمت عنه وقريت كلامها في نهار الصيام جعت.. حسيت انها بتتكلم عن برطمان نوتيلا

اختبر قوة ايمانك في نهار رمضان بقليل من الذكاء

قليل من الذكاء
اظن ده عذر كافي عشان يكتب اللي هو عايزه من غير ما نحاسبه.. وله فوايد كتير في رمضان
يعلمك الصبر على المكاره، ضبط النفس واللسان واليد، وكل ما بتتعرض لضغوط اكتر ربنا بيكتب لك ثوابات اكبر
عشان كده، انا قلت تاخدوا الثواب معايا عشان نروح كلنا الجنة مع بعضينا 
قبل ما تقروا المقال احب انبه عشان لو حد بعد ما يقرا يخلص في ايدنا ولا حاجة ما الحقش اقول له، نتقابل ان شاء الله يوم القيامة، الجنة، قسم ضحايا محمد وعلي وابراهيم
اتشاهدوا على روحكوا:
قليل من الذكاء
بقلم:محمد علي إبراهيم
أين ابتسامة المصريين؟!
ماذا فعل الزمن بالمصريين؟ كانوا في خضم الأزمات قادرين علي الابتسام..اشتهرنا بأننا أفضل من يقول النكتة في العالم .. في كل مكان كان السؤال عن آخر نكتة يسبق أي حديث .. وبالنكتة أيضا يودع الأصدقاء بعضهم بعضا.. لكن النكتة ماتت.. شيعناها الي مثواها الأخير .. ونسينا أن نترحم عليها..
الابتسامة التي اختفت من حياتنا سحبت معها أشياء أخري.. التحية التي كنا نلقيها علي بعضنا في الشارع.. والمصعد.. وأثناء مرورنا بمكاتب بعضنا البعض.
لقد شاهدت موظفين وأطباء وصحفيين يدخلون الي مكاتبهم دون أن يلقوا تحية الصباح علي زملائهم..
حتي في شهر رمضان ننظر في الوجوه فنراها متجهمة.. العبوس صار ملمحاً رئيسياً لنا..
المهم أن الإسلام يحضنا علي انه اذا حيينا بتحية أن نردها بمثلها أو أحسن منها..إننا نتحدث كثيراً عن الحضارة الغربية ورغبتنا في أن نلحق قبساً منها. لكننا ننسي أن أهم ملمح للحضارة الغربية أنك تقابل ببسمة في أي مكان.. "هاللو" أو "هاي" إذا ما صافح وجهك وجه شخص آخر.. الرجال يرفعون قبعاتهم للسيدات.. ونحن المسلمين نغتصبهن.(الجملة دي تتسجل في موسوعة كنس: هاللو.. او هاي، والقبعات ده ما شافش افلام امريكاني من ايام سينجينج إن ذا رين، ونحن المسلمين نغتصبهم.. امور امور امور، طب حد يفهمه ان لا الاجانب بقوا يلبسوا قبعات، ولا المسلمين فيهم صحة يغتصبوا)
في رمضان نسمع للأسف سباب البعض لآخرين لأننا تجاوزناهم في الإشارة أو لأن سيارتك سبقتهم في عبور الطريق.. ستطاردك اللعنات والسباب وتشويه الآباء والأمهات.(هههههههههههه ده شكله اتشتم في الشارع كتير، انا الحمد لله بامشي في الشارع وباسوق زي سواقين الميكروباص وماحدش شتمني لحد دلوقت، شوف انت بقى بيشتموك ليه؟ والله الشعب المصري ده قلبه دليله ومكشوف عنه الحجاب)
الابتسامة في شوارع الغرب هي أهم الجماليات الحضارية (حد يروح يساعد الباشكاتب بتاع موسوعة كنس لانه مش حيلاحق على الجمل).. فهي لا تحتاج إلي لغة.. إنها دليل الإنسانية نحو القلوب (تحت الرمش حنين وحنان وعيون بتقول).. هل فكرنا لو عادت الابتسامة لشوارعنا ماذا سيحدث؟!
الابتسامة هي التي ستعلمنا آداب الشارع الشائعة (الباشكاتب بيكتب ورانا؟).. الآداب التي كانت سائدة ثم فقدناها.. غض البصر وعدم التحديق في الآخرين أو الأخريات.. التحديق هو نوع من التلصص علي الخصوصيات.. لكننا لا نشعر بهذا الشعور ونحن نمارس انتهاك الحرمات.. نريد أن نتعلم استعادة ضحكتنا وابتسامتنا.. مطلوب أن نهدم عواميد الأسمنت من وجوهنا الخرسانية (عااااااا عاااااااااا عااااااااااا مش قادرة مش قادرة، باصرخ ولا بتوع كاظم الساهر وتامر حوستي، ايه ده؟ ايه ابداع شرايين اليأس تتفجر في احقاد الضغينة دي؟).. لابد أن يعود لتحية الصباح والمساء اعتبارها.. انها الشيء الوحيد الذي يخلصنا من أشياء سيئة كثيرة صارت تلاحقنا ونلخصها في السلوكيات السيئة.
إذا ابتسمنا لبعضنا سنحل مشاكل متعددة.. أكثر ما ستعيده الابتسامة الينا هي أخلاق الشارع.(فعلا والله دي اخلاق شوارع)
وأول جماليات هذه الأخلاق هو الابتسامة التي تقفز اليك بمرح حينما تلتقي عيناك صدفة بوجه يسير في الشارع أو يقود سيارة أو دراجة بخارية في اتجاهك.(باحبه باحبه باحبه باحبه باحبه باحبه باحبه.. فين القليل من الذكاء؟ كان هنا، مين المفجوع اللي اكله لوحده وهو عارف انه قليل ويادوبك يقضينا؟)
الابتسامة ستجعلنا نتجاوز عن "البرطمة" مع كل خطأ.. والسباب مع أي تجاوز.. والعراك عند أي اختلاف فهل نقدر؟! (مش قادر يا نفيسة مش قادر)
-----------
ايها القراء... الى جنة الخلد ونعيمها... مع السلاااااامة يا الامونيااااااااا

Saturday, 14 August 2010

عشان ناس متربية وعندها اخلاق وقيم ومحترمين

المسلسل يعني اكيد مش حيبقى بيسيء لسيدنا عيسى، بمعنى انه اكيد مش حيبقى مصور سيدنا عيسى في عمته قنبلة، ولا بيتريق عليه ولا كاتب عليه ارهابي، كل الحكاية انه بيطرح وجهة نظر محل الخلاف بين المسلمين والمسيحيين، والخلاف بين المسلمين والمسيحيين معروف لكن عرضه في مسلسل تسبب في جرح مشاعر المسيحيين
وانا شايفة ان تصرف قناة المنار تصرف محترم، ووطني وانساني... وولاد الناس برضه حاجة تانية
جدعان والله حزب الله... ومحترمين وعندهم اخلاق، الا ده لو كان مسلسل دنماركي بيتريق على الرسول كان زمان الشراشيح اللي عندنا بيدافعوا عن حرية التعبير
مافيش حرية تعبير في جرح مشاعر الناس
بس انا ان شاء الله بقى ناوية انسل الشبشب على دماغ عبيد المنزل اصحاب الجلد الاسود والاقنعة البيضاء في الفترة اللي جاية اللي ما يعرفوش حرية رأي وتعبير غير في سب الدين ومش اي دين.. هو دين واحد بس اللي نازلين فيه سب، كأنه اتجوز امهم، مع اني اسمع ان امهم انسة
وبمناسبة امهم الانسة.. فيه قضية مرفوعة في امريكا اعتراضا على بناء مسجد في جراوند زيرو وده المكان اللي كان فيه البرجين اللي وقعوا، قال ايه عشان اهالي الضحايا حيتجرحوا لما يعدوا في السنوية بتاعة عيالهم ويلاقوا جامع في وشهم
جرا ايه يا ولاد ال... آنسة... في نهار رمضان كده الواحد مش عارف ياخد راحته؟ قاتلين لنا تلاتة مليون عراقي وافغاني ومشردين لنا ستة مليون عراقي واربعة مليون افغاني ومنين ما بنمشي بنلاقي ماك دونالدز وعلم امريكا وسفاراتكوا في خلقتنا، ما كانش تلاتلاف واحد وفاتحين عليهم مناحة كأن المليون ونص اللي قتلتوهم في العراق والاتنين مليون اللي قتلتوهم في افغانستان مش بني ادمين ترفعوا قضية عشان جامع بيتبني؟ طب احنا نرفع ايه بقى عشان قواعد عسكرية بتتبني عندنا عشان تموتونا منها؟ 
على فكرة انا مش طايقاكوا انتوا.. اه انتوا، اللي بتقروا المدونة دي.. عشان انتوا السبب اللي جرأتوا علينا كناسة البشر دول

القبض على مجموعة كبيرة من شباب الجمعية الوطنية للتغيير ونحتاج لمحامين

تحديث:
خرجوووووواااااا
مها سكوت هنصوت اتصلت بيا دلوقت وبعتت لي اسامي المقبوض عليهم:
مها الجمل
نهى الجمل
محمد الزيني
محمد الطيب
محمود شقير
اماني امه
ماجد وابرايم لويس

واسماء اخرى مها مش عارفاها ومتوزعين من الشروق لحد الجيزة
ومحتاجين محامين
الله يخرب بيتك يا امن الدولة وينكد عليك بحق الايام المفترجة دي
------
المحامين كلهم نايمين.. حد صاحي يروح للعيال
فيه ناس في قسم شيراتون مش عارفين اساميهم 

Friday, 13 August 2010

والله وباضت لك في القفص يا اوووسااااااااااااا

والنبي الاخوان دول قلبهم ابيض ونيتهم صافية وولاد حلال، والا ما كانش ربنا يكافئهم على صبرهم ويستجيب دعاهم ويخلي وحيد حامض يكتب مسلسل ضدهم ويحبب الناس فيهم
مشيم مشيم.. اللي هي الحركة اللي بالبق دي.. ايوة يا عم ايوة يا عم.. والله فرحت لكوا، الف الف مبروك والله.. ده انا قاعدة دلوقت قدام مشهد ابو واحد قدام مرشد الجماعة.. الحوار كده:
المرشد: ابنك مش عضو في الجماعة يا استاذ عبد الحميد، ابنك محب للجماعة
الاب (واكرر.. الاب): محب ومش عضو يقوم يشترك في عرض عسكري ويلعب كراتيه؟ امال لو كان عضو كان دخل حرب؟
(هههههههههههه الراجل بيبلغ عن ابنه)
وبعدين الاب قال: طب انا عايز اسأل حضرتك، الابن اللي يخرج عن طوع ابوه يبقى ايه في الشرع؟
المرشد: ابنك عنده كام سنة؟
الاب: واحد وعشرين سنة
المرشد: يبقى مسئول عن نفسه وعن افكاره، وانت مسئول عن نفسك وعن افكارك
الاب: ده رأي حضرتك
المرشد: ده رأي الشرع، وقانون البلد اللي انت فيها
الاب: ماهي بلدنا كلنا وماحدش فيها يرضى ان ابن يخرج عن طوع ابوه ويخيب امله فيه
المرشد: انت خاب املك في ابنك؟
الاب: الاب اللي ابنه في السجن لازم يخيب امله في ابنه
المرشد: ابنك في السجن مش عشان ارتكب جريمة ولا جناية، ده مسجون في قضية رأي، وله الشرف
الاب: ده انت ناقص تقول لي انه لو مات حيموت شهيد
المرشد: ماهو كده فعلا.. احنا ناس عاديين وبسطاء، صحيح محظورين، بس اللي يستاهل الحظر هو اللي بينشر الفساد
----------
انا لو من امن الدولة اقبض على وحيد حامض بتهمة الترويج لجماعة محظورة.. الدروس المستفادة من الحوار ده ان الاخوان اجدع ناس والاب ده ابن كلب بيشتغل في امن الدولة وراجل متخلف ورجعي وقمعي.. قال طوع ابوه قال، والمفروض اني اتعاطف؟
يارب يارب يارب وحيد حامض يكتب مسلسل يشتم اليسار، اهو غلابة ومحتاجين ربنا ينفخ في صورتهم.. قادر على كل شيء

Wednesday, 11 August 2010

اتفرجوا على اهل كايرو

المؤلف بلال فضل
والمخرج محمد علي
والممثل خالد الصاوي
اكيد حيبقى حلو.. انا لسه باتفرج اهو ولحد دلوقت حلو قوي
هو دلوقت على نايل لايف جه الساعة عشرة
ياريت بقى حد يقول لي معاد تاني مناسب غير الساعة عشرة عشان اعرف اتفرج، هو ده اللي انا حاتابعه ان شاء الله
بالنسبة لمسلسل نادية الجنسي
مش حاتفرج، بس ياريت الحلقة اللي حتنضرب فيها وتخر دم وتقول لاعاااا والتيترات تنزل ياريت تشوفوهالي وتقولوا لي الاعادة بتاعة الحلقة دي بالذات امتى عشان اشوفها لو سمحتوا
اه نسيت اقول لكوا، انا شفت النهاردة برنامج ابراهيم عيسى في دريم عن سيدنا عمر
حلو جدااااااااااا وما كنتش عايزاه يخلص لدرجة انه لما خلص قلت: استنىىىىىىى
:)

أغاية الإلحاد أن تهروا كبدكمو يا أمة ضحكت من سيسها الأمموووووووووووووو

وزي ما المسلمين والمسيحيين المصريين مالهمش زي في العالم كلللللله
الملحدين المصريين مالهمش زي في العالم كللللله
انا والله عارفة، وقلت لكوا من زمان المشكلة في المصريين مش في اي عقيدة ولا فكرة
انا والله يابني كنت في الشارع من ساعة ما صحيت، بس بما اني العمدة الالي زي ما ياسمين مسمياني، الناس اشتكوا لي من اللي حصل النهاردة على التويتر من مجموعة من الملحدين
ايه التخلف ده؟ فيه ملحد سلفي؟ 
بقى هالله هالله ع الجد والجد هالله هالله عليه، بنتي لازم تطلق
البني ادم المقتنع بحاجة، اي حاجة، ما بيتضايقش من وجود اشخاص مش مقتنعين باللي هو مقتنع بيه، خالص
ليه بقى؟ لأنك ولنفرض انك مؤمن، لما بتشوف واحد ملحد وتضايق ده معناه انك مش مؤمن ولا حاجة، لأن وجود الملحد في الحياة بيوترك، ومعنى انه يوترك انك مش مقتنع تماما بايمانك، اصل حيوترك ليييييه الا اذا كان جواك خالص حاسس انه ممكن يبقى معاه حق وعشان كده وجوده حواليك بيقلقك ويخليك حاسس انه ممكن يخليك تفكر في اللي هو مؤمن بيه ويقلب لك دماغك
البني ادم بطبعه بيحب يستقر على حاجة وخلاص، مش عايز حواليه بقى ناس تاكل دماغه
بس البني ادم المقتنع تماما بايمانه ما عندوش مشكلة ان ناس تانية تبقى مش مقتنعة بيه، اقصى حاجة حيصعبوا عليه 
ونفس الحكاية بالنسبة للملحدين، بقى كل السلفيين اللي في كون ده كله كوم، والملحدين المصريين وعدم تسامحهم مع المؤمنين كوم تاني، ده ولا اللي لابسهم بس الله الرحمن الرحيم، يتضايقوا لما يشوفوا كلمة الله، يتضايقوا لما يسمعوا الادان، يتضايقوا لما بيشوفوا واحد بيصلي، يتضايقوا من رمضان، يتضايقوا من الحجاب، ده انا كان فيه واحد بيعمل معايا زي كفار مكة كل ما يشوفني باصلي وما كانش ناقص غير يحط حجر عليا وانا باصلي ويقول لي اذكر الهتنا بخير واله محمد بسوء
عارفين ليه؟ عشان حاسس بالذنب.. حاسس من جواه خالص انه المفروض يصلي، وشكلي وانا باصلي بيفكره بانه مقصر
وعشان بس ما ابقاش متجنية انا اعرف كام ملحد مصري ما عندهمش المشكلة دي، بس هم تلاتة بس اول عن اخر، مافيش مشكلة فعلا، لانهم فعلا مصدقين ان مافيش ربنا، وعشان كده وجود مؤمنين في الحياة مش بيضايقهم، ولا بيفتحوا سيرة الدين اساسا، ولا بتجيلهم الحالات الهيستيرية لما بيشوفوا واحد بيصلي اللي بتيجي لمعظم الملحدين المصريين، القبلة فين يا فلان؟ كده.. وخلاص، لا بيتجنن ولا بيفضل يلف حوالين نفسه، ولا بيشتموا ربنا، ولا بينهم وبين سيدنا محمد ضديات، لسبب بسيط، هو مؤمن ان ربنا مش موجود حيشتم حد مش موجود ليه؟ مجنون؟ وبعدين يشتم سيدنا محمد ليه؟ بالنسبة له ده راجل مات من زمان قوي وما اذاهوش بشكل شخصي، ويتضايق من رمضان ليه؟ ده حتى رمضان فوانيس، ومسلسلات، وكنافة، وعزومات، ومش بيصوموا من زمان ومش ماشيين في كل حتة يقولوا انا مش باصوم انا مش باصوم زي العيل اللي بيعاند ابوه وبيبجح، وممكن يكون بيشرب بس مش سكري، عشان وراه حاجات يعملها، وهو مش محدث صياعة ولا الحاد ولا عايش في دور الواد الكول الملحد بقى السكري بتاع النسوان
كل حاجة تتعمل في ام البلد دي بتتعمل باحداث، الاسلام باحداث والمسيحية باحداث والالحاد باحداث والليبرالية باحداث والشيوعية باحداث
محدثين كل حاجة.. ومراهقين في كل حاجة.. ومتطرفين ومبالغين في كل حاجة
ايه بقى ناس تقعد على التويتر تقول لنا انها متضايقة من رمضان عشان مش حتلاقي خمرة؟ اللي للدرجة دي مش حيقدر يستحمل شهر ما يشربش خمرة محتاج مصحة ادمان يتعالج فيها مش تويتر يشكي لنا عليه همه انه مدمن خمرة، مدمن الخمرة ده كائن فاشل، وبيتبص له انه فاشل ومالوش لازمة في الحياة في كل حتة في الدنيا، دي حاجة حد يفتخر بيها؟
ايه ناس محدثة الحاد تفضل تقول لنا: احنا مش حنصوم، زي الواد اللي طفشان من بيت ابوه وكل شوية يتصل باخوه الكبير ويقول له: قول لابوك اني دخلت ادبي مش علمي زي ما هو كان عايز.. عشان حاسس باالذنب
دي ناس كلها حاسة بالذنب، ومش مقتنعين بجد باي حاجة بيعملوها، والا ما كانوش هللوا عليها بالطريقة دي زي المراهقين اللي فرحانين انهم بيشربوا سجاير 
كلهم منافقين.. وعندهم مشاكل، يابني لو انت زعلان من ربنا في حاجة حلها معاه، لو انت نفسك تبقى كول قص قصة تامر حسني والبس شورت وامشي بيه في الشارع، الالحاد والايمان ما بيخلوش الواحد كول
وانتوا اخرتكوا يا حتموتوا بهرية الكبد من الخمرة اللي بتعبوا فيها دي كأنها عرقسوس، يا اما حتربوا دقنكوا وتلبسوا جلابية قصيرة وبرضه حتشتموا في الكفار زي ما بتشتموا في المؤمنين دلوقت
حاجة تقرفففففففففففففففففففففف

Tuesday, 10 August 2010

مولاي صلي وسلم دائما أبدا على حبيبك خير الخلق كلهم

رمضان كرييييييييييييييم
:)

محمد سيد الكونين والثقلين والفريقين من عرب ومن عجم

:) رمضان كريم يابن النبي



وكلمته اللي اسعدتني وابهجتني هنا
واكتر ما ابهجني: فلاح عربي، لا بيعرف انجليزي ولا فرنصاوي، ما يعرفش غير لسان جده، نازل فحت وردم في اسرائيل ودلاديلها
الا ايه احساس السياسيين العرب اللي بيشتغلوا لحساب اسرائيل لما يعرفوا ان اسرائيل مصوراهم وبتراقبهم.. زي سمير جعجع بدون ذكر اسماء يعني، واللي كشفهم السيد؟ وايه احساس اسرائيل وافلامها السرية بتتعرض كده ولا افلام محمد هنيدي؟ 

Monday, 9 August 2010

عمر الهادي أسد أسد

يابن الذين يا عمر... الواد قعد يدعبس لحد ما عمل فضيحة لسبوبة موضوع حرية العقيدة دي
من حيث المبدأ حرية العقيدة حرية العقيدة... مش محتاجة بالو يعني ولا محتاجة نتناقش فيها كتير لأنها حق مكفول للانسان
لكن من حيث الحقيقة، حرية العقيدة تحولت الى سبوبة، واذ فجأتن لقينا اشكال بتظهر، وهوجة كده، وصراصير طالعة من جحور، واحنا مش فاهمين فيه ايه
بس اهو.. حنعمل ايه يعني؟ الحق احق ان يتبع، صحيح الواحد بيبقى من جوات نفسيته حاسس ان فيه حاجة مش مظبوطة، بس عادي يعني، احنا مقضيين حياتنا نقف مع ناس قرفانين منهم لاننا بنقف مع مبدأ
بس ده برضه ما يمنعش اننا نفهم ايه الحكاية ونحاول نحلل الموقف، والسر وراء ظهور مجموعات غريبة وهوجات اغرب ولا هوجة اغنية لولاكي، مواليد التسعينات يخرسوا خالص ما اسمعش حسهم، المهم
عمر اسم الله عليه فتوة بقوة اسم الله عليه، راح جاب قرار الواد ده وانا مش عايزاه يسكت
هو يفضل يتتبع الخيوط، واحنا هنا نصيح له لما كل الخيوط تتكشف قدامنا
قال اييييييييه، اسرائيلي بيناضل من اجل حرية العقيدة في مصر
وقال اييييييه، داليا زيادة، اللي اطلق عليها احمد ناجي لقب: امرأة من زمن الحب، بتتعامل معاه بوصفه بشر! حنينة قوي داليا زيادة
امرأة من زمن الحب فعلا
طب دعبس تاني يا عمر كده.. انا واثقة انك حتلاقي بلاوي.. وانتهك يا عم خصوصيات براحتك... اه، قال اسد بيقول لي ان فيه ناس قالت له انت انتهكت خصوصية الواد الاسرائيلي لما نشرت معلوماته اللي على الفيس بوك
الواد فاتح الاكاونت بابليك، ومتصور بعلم اسرائيل، وجوزه داخل عليه ولقى راجل معاه في السرير ودول يقولوا له: ما شاء الله راجع الساعة اتنين بالليل؟ ولما جوزه يقول له: مين ده؟ يقولوا له: ما تغيرش الموضوع
بس الواد اسد.. اسد من ضهر اسد

سماحة السيد حيتكلم النهاردة

ان شاء الله النهاردة الساعة تمانية ونص مساء السيد حسن حيتكلم عشان يكشف الوثائق بتاعة مقتل الحريري
1- الكلمة تتسجل لاني حابقى برة البيت، حاحاول جاهدة اني اشوفها في المكان اللي انا فيه بس احبها تتسجل
2- التويتر يعملوا هاشتاج عشان لو ما عرفتش اتفرج في ساعتها اشوف اهم العناوين
3- اللي بصرم خلي صرمه يولع هع هع هع هععععععععععععع

Wednesday, 4 August 2010

حراااااااااااااااااااااااااااااااااااااااام

a7a
ايه ايه ايه؟
ياترى ماحدش قبض على اللي هيك على جرنال الشروق الجزائري ليه؟ ماحدش بيقبض على اللي بيهيكوا على الاكاونتات في الفيس بوك ومواقع ومدونات تانية ليه؟ اشمعنى يعني اليوم السائع هي اللي لما حد يهيك على موقعها يتقبض عليه؟
ماشي هو واد اهبل وحط ميت سؤال يفطسوا من الضحك، بس خلاص، واد اهبل، زي كل العيال الهابلة، اشمعنى يعني؟
ده اولا: عدم العدالة والمساواة بين كل القضايا المشابهة، زي ما اتهيك عليهم اتهيك على غيرهم، هم ليه يتقبض على الهاكر بتاعهم والباقي لا؟
ثانيا: اليوم السائع هي المسئولة عن ده كله.. انا مش عايزة اقل ادبي ورمضان داخل، ماحدش قبض على رئيس تحرير اليوم السائع عشان نزل مانشيتات قلة ادب وسفالة عن سيدنا محمد
هم متوقعين ايه؟
حرية رأي وما يتقبضش عليه.. صح، كمان اللي بيهيك حر ما يتقبضش عليه، ماهو يا كل الناس احرار، يا كل الناس عليهم قوانين وقيود، زي ما اتقبض على العيل الغلبان اللي حيتنفخ عشان كان بيلعب على الكمبيوتر، يتقبض كمان على رئيس تحرير اليوم السائع بتهمة ازدراء النبي هو كمان
نهار اسود ومنيل.. ده عيل يا ناس، عيل وعمل رد فعل
اي حد حيزعل على شتيمة سيدنا محمد، ومش كل الناس بتعمل نفس ردود الافعال، انا زعلت، وعيطت، وانا قلبي جامد
واي حد منتمي للثقافة - حتى لو مش مسلم - حيزعل ويحس بالاهانة
سيدنا محمد بالنسبة للمسلمين نبي، اللي مش مؤمن انه نبي سيدنا محمد عمل له هوية وتاريخ وجغرافيا ومنظومة قيمية اذا كان هو جزء من الشرق الاوسط يعني، ومؤثر كمان على الحضارات التانية، واهانته مش حرية رأي، لان هو بشخصه مات واللي بيتطاول عليه مش بيتطاول على شخصه، ده بيتطاول على مؤسس هوية ثقافية مش بس دينية، يعني مش بس مليار ونص بيتهانوا بسبب انتماءهم للهوية الدينية اللي هو اسسها، فيه غيرهم ملايين منتمين للهوية الثقافية اللي هو اسسها ودي اهانة موجهة لهم، واهانة الهويات الدينية والثقافية اسمه خطاب كراهية، ده غير انه له تأثير مباشر على الثقافات والهويات الاخرى، واللي ينكر كده يبقى يا جاهل يا معتوه، ولو حرية رأي يبقى كل واحد حر يرد وكل واحد بقى بمخه، اللي عصابي، واللي اهبل، واللي بيفهم، واللي حيعيط زيي، واللي حيهيك على الموقع.. امال هم كانوا متوقعين ايه لما يستفزوا الناس بالطريقة دي؟ يرهبوا الناس عشان لهم صلات بالامن
وعلى كل الاحوال بقى... اللي حصل ده اكبر دليل على ان اليوم السائع هو جرنال امن الدولة ومن هنا ورايح حنحاسبه على انه ممثل لامن الدولة، يعني لما نحب نتكلم مع امن الدولة، نتصل باليوم السائع