Tuesday 31 March 2009

حملة بلال فضل للتصدي للانتداب الاجنبي في مصر

عشان انتوا عارفين، مش فاضية بافكك اسرائيل :)، المهم كلمني مينا النهاردة وقال لي شفتي كلام بلال فضل على المدارس الانترناشونال؟ فقلت له: ما انا عارفة ده بقى انتداب، قال لي بلال استخدم نفس الكلمة، فتحت العمود بتاعه واتكسفت من نفسي، اقول لكوا ليه اتكسفت من نفسي
انا بصراحة مش باحب الناس دي، اه معلش، الناس اللي بتدخل عيالها مدارس بخمسة وستين الف جنيه في السنة، وعشان ما نتدخلش في مهاترات: جايب منين خمسة وستين الف جنيه كل سنة
ح نقول انه جايبها من حلال
طيب بذمتك يا اخي دي بلد يتصرف فيها خمسة وستين الف جنيه في السنة على مدارس تروح لاوروبا والدول المتقدمة؟ يعني انت يا عم الامور بتصرف على اورومبا من فلوسك "الحلال"؟ فبصراحة كده قلت ما بيني وبين نفسيتي: يغوروا في داهية هم وعيالهم الف مرة الف ونص مرة
بس لما قريت المقالات لقيت بلال يا عيني قلبه مخلوع وقايل لنا في المقال ده: انتوا ما بتخافوش ربنا؟
جرى ايه يا عم بلال؟ انت ح توجع لنا قلبنا ليه؟
ايوة، انا عارفة انهم مش بيدرسوا تاريخ مصر ولا جغرافيتها، وعارفة ان الخريطة بتاعة فلسطين عندهم في الكتب مكتوب عليها اسرائيل (ملحوظة: انا افخر كمصرية اننا لحد هذه اللحظة مدارسنا التابعة لوزارة التربية والتعليم لا تعترف باسرائيل في كتب التاريخ والجغرافيا) وعارفة انهم بيطلعوا معسكرات ويتقابلوا مع ناس من كل انحاء العالم من ضمنهم اسرائيليين، وبصراحة ما اهتمتش اتكلم
انا وحشة؟
امممم، انا وحشة فعلا، عشان مهما كان دول بني ادمين، وحتى لو هم واهاليهم اللي جايبين الفلوس مش عارفة منين ما يستاهلوش الواحد يعبرهم ولا يهتم هم بيتعلموا ايه، ممكن جدا يكبروا ويمسكوا مناصب على اساس بقى ان دول اللي متعلمين ومتنورين واحنا ولاد البطة السودا
انا فعلا مش مقتنعة بحكاية اصل تعليم الحكومة مش تعليم، الموضوع ده مش داخل دماغي بنكلة، انا صحيح مش تعليم حكومة، بس انا كمان مش تعليم انتداب، مدرستي كانت ارسالية انجليزية وبعد الثورة ما اتأممتش لكن بقت تابعة لوزارة التربية والتعليم وملزمة بالمنهج بتاعها وتحت رقابتها زيها زي المدارس الحكومة يعني تعتبر حكومية مملوكة لاشخاص ودلوقت حولوها تجريبية، يعني بقت مدرسة حكومة
انا عايزة افهم مال المدارس الحكومة؟ انا كل اللي اعرفهم ومخهم زي الفل تعليم حكومي، بما فيهم بلال فضل، وعلى فكرة لما كنا صغيرين كانوا بيقولوا نفس الكلام: لااااا التعليم الحكومي كان كويس زمان، دلوقت باظ
ودلوقت بيقولوا كده، ماهو انت عندك ابن فاشل ومخه على قده عشان واخد غباوتك الجينية ومش بيذاكر وعايز يصيع، والله لو وديته السربون برضه مش ح يفلح، ما تزعلش مني انت اللي مش عارف تربي، مش المدرسة هي اللي مش عارفة تعلمه، وانا عايزة اعرف تعليم ايه وتربية ايه اللي انت عايزهم لابنك اذا كان العيل ح يطلع ولاءه لبلد تانية غير بلده
يا اخي مش عاجبك البلد دي انت وعيالك غوروا منها احنا كنا ناقصين بلاويكوا؟ لكن تربوا لنا جيل ما عندوش ولاء ولا انتماء وكمان له صحاب اسرائيليين بيقابلهم كل سنة وممكن واحد منهم يكبر ويمسك منصب، وساعتها مش ح يبقى خاين، ساعتها ح يبقى مندوب الاحتلال بجد
ماحدش بقى يقول لي كل واحد عايز يطلع عياله متعلمين كويس، هو ده تعليم كويس؟ ده تعليم كويس؟ ايه وجه الكوسنة في ان ابنك يطلع ممزق ومش عارف هو منتمي لايه؟ يعني عشان يدوا له بسكوت في الفسحة ويلعبوه بالمكعبات تقوم تضحي بصحته النفسية؟ ده ح يطلع ايه؟ مصري وللا اجنبي؟ ويا اما ح يبقى عنده احتقار لبلده ولاهله، ولما يسافر على فكرة ح يتعامل على انه عربي معفن يعني لا طال بلح الشام ولا عنب اليمن، يا اما ح يحاول يستعيد نفسه وهويته الحقيقية لما يكبر (بعد ما يصب عليك اللعنات في اللي عملته فيه) وفي الحالة دي ح يبقى مسخرة كل المحيطين لانه ح يبقى "الواد الخواجة اللي عايز يعمل صايع" ليه كده؟
انا عايزاكوا تقروا كتاب الدكتور جلال امين بتاع "اكذوبة التقدم والتخلف" كتاب صغير مش كبير عشان تعرفوا ان اسطورة: التعليم المصري فاشل، دي اسطورة فاشلة في حد ذاتها
ده كلام فارغ، التعليم المصري مش فاشل، بدليل ان اخيب عيل سقيط بياخد كحك في المدرسة عندنا لما بيسافر يدرس بيجيب ايه وايه بلاس
ماشي، انت طبعا بما انك كنت بتجيب كحك وبتسقط لما تسافر وتدرس وتاخد نمر عالية ح تقول التعليم الاجنبي احسن
طبيعي، ما هو اللي بينجحك يعني وبيديلك نمر عالية
بس واقع الامر ان التعليم المصري مش تعليم وحش ولا حاجة، وخيبتنا مالهاش علاقة بالتعليم ومناهج التعليم بتاعتنا
مش صحيح ان التعليم مليان حشو، مافيش حاجة في الدنيا اسمها حشو، المخ ده زي المعدة، الاتنين نفس فكرة القربة، كل ما تملاهم كل ما يوسعوا، ومافيش حاجة اسمها وانا ح استفيد ايه بكل المناهج دي، ح تستفيد، واستفدت، ولو جربت تعمل دراسات في اي داهية ح تلاقي نفسك استفدت من مناهج البحث اللي درستها في المناهج اللي مش عاجباك
مناهج رذلة صح، بس حضرتك بتدلع، هم مفروض يعملوا لك اراجوز وهم بيعلموك؟ 
مش صحيح ان التعليم قائم على الحفظ مش على تشغيل المخ، ده برضه هجص
اولا الحفظ ده قدرة ذهنية وتنشيطها واجب لان الذاكرة هي نص التعليم، ثانيا، انت مش بتاخد رياضيات؟ وبتحل مسائل، ايه مافيش تشغيل مخ دي؟ ماهو بتشغل مخك اهو، ثم ان فيه حاجات كتير ما ينفعش معاها غير الحفظ مش الفهم، مش بس في مصر في اي حتة في العالم
عاصمة انجلترا: لندن
ح يفهمها لك ازاي المدرس دي؟ ما انت لازم تحفظها زي ما هي كده
شواذ الافعال في اللغة الفرنسية، ح يفهموها لك ازاي هي بتتحفظ زي ما هي، وعلى فكرة كل ما بتحفظ اكتر كل ما بيحميك من خطر الزهايمر في الكبر اكتر، ده كلام علمي
جلال امين اللي هو استاذ في الجامعة الامريكية بيقول التعليم الامريكاني اهبل، ومعظم اللي تميزوا في مصر لا كانوا تعليم امريكاني ولا تعليم اجنبي، كانوا تعليم وطني، واحنا ما عندناش مشكلة امخاخ، احنا عندنا مشكلة سيستم لتوظيف الامخاخ دي
بيدوا العيال كتب كتير وكبيرة والعيال مش بتقرا الكتب دي كلها، بييجوا اخر السنة يفروا الكتاب وينشنوا ويلخصوه في ملزمة
طيب ايه رأيكوا بقى ان ده اسمه القراءة السريعة اللي الناس في اورومبا والدول المتقدمة بتاخد له كورس ست شهور عشان تتعلمه: ازاي تقرا كتاب كبير بسرعة وتستوعب اهم النقاط اللي فيه وتلخصها، ومعظم طلبة الدراسات العليا بيلتحقوا بالكورس ده
يعني دي مهارة تانية بيتعلمها العيال في المدارس المصرية
والاهم من ده كله: انك بتطلع مصرييييييييي
مصرييييييييييييييييييييييي
لو ح يطلعوك اينشتاين ومالكش ولاء لبلدك يبقى غور في داهية مش عايزينك  

ما تشوفوا لنا ايه الحكاية دي يا شباب

هم بتوع قسم عبري عندهم تخلف نتي وللا ايه؟ مش معانا خالص ما يساعدونا يساعدهم ربنا
الولية المجنونة، فاكرينها؟ اللي كانت بتقول الجماعات الاسلامية دول يهود مخطوفين ومدربين في السي اي ايه :) المهم احنا طبعا مش ح نلتفت لتحليلاتها للظواهر اللي موجودة، احنا بس نلتفت للحقائق اللي هي بترصدها لانها ولية فضحية وبتقول كلام كتير ماحدش فيهم يجرؤ يقوله ومقطعة البطاقة ونبقى نحلل في معمل تاني
مين الدوردائيم دول؟ مالهم يهود اليمن؟ مضطهدين ليه في اسرائيل؟
دي طالعة بتعيط عليهم... طبعا بعد ما الفت ولحنت وقالت ان التلمود اللي موجود ده مش هو التلمود الحقيقي، وان اللي الف التلمود ده هو الفاتيكان، معلش هي حاطة الفاتيكان في دماغها وعندها تصور ان الفاتيكان هي اللي عملت كل حاجة في الدنيا، وان الفاتيكان دي هي ابليس اللي طلع ادم من الجنة وهي التفاحة كمان، ما احنا اتفقنا انها مجنونة
بس ما تشوفوا لنا الدوردائيم واليهود المضطهدين في اسرائيل دول بدل ما احنا قاعدين نهبل ونقول سنة وشعية ومسيحيين ومسلمين
ماهو



الكلام اللي هي بتقوله هنا مش مجانيني قوي لان اللنك ده بيقول نفس كلامها، بس هي بتقول ان اسرائيل بتضطهدهم...مال الفاتيكان بقى؟ اه ده انا نسيت، هي كانت قبل كده قالت ان الفاتيكان هو اللي عمل اسرائيل، ههههههههههههههههه، والله اصحاب العقول في راحة، لا ويقولوا لك: احنا اذكى جنس بشري، ومتفوقين على كل الاجناس في المخ
المهم خلينا في الفئات المضطهدة من اليهود في اسرائيل، هاه؟ بدل ما احنا ماسكين في شعور بعض ومفرجين الناس علينا، دي بتقول ان يهود اليمن بيخفوا حقيقتهم عشان ما يتقتلوش، يعني اظن مهما وصل تخلفنا عمرنا ما وصلنا للدرجة دي، وللا هاه؟ وساترين على نفسهم ولا حد يعرف عنهم حاجة وعاملين كمان رقابة على الكتب والكتاب ده اتنشر بدون اذن الرقابة في اسرائيل وواحد اسرائيلي اللي كتبه اسمه فضائح بن جورين واحد ابن حلال ربنا يستره سابهولي في التعليقات وصاحب الكتاب خلع من اسرائيل ونشره على النت وبيتم ملاحقته دلوقت، على الله ما يكونش اتقتل وانا باكلمكوا، واحنا اللي فاضحين روحنا وعمالين بس نندب ونقول اسرائيل دولة ديمقراطية "شبه" علمانية

Monday 30 March 2009

احنا شعب متدين، بس هو احنا شعب مؤمن؟

انا باتكلم عن نفسي قبل ما اكون باعني اي حد في الدنيا دي، انا ما اعرفش الناس ايه اخبارها، بس، هو الواحد يعرف ازاي انه مؤمن؟ فيه حاجة بتحدد ان الواحد مؤمن وللا مش مؤمن؟ يعني مثلا لا يؤمن احدكم حتى "يحب" لاخيه ما "يحب" لنفسه
انا مش عارفة، مش متهيالي اني كده
يعني سهل ان الواحد ما يرضاش على غيره اللي ما يرضاهوش على نفسه، بس يحب لغيره اللي يحبه لنفسه دي حاجة تانية، يعني مثلا مثلا، لو انت في المدرسة، تبقى عايز تطلع الاول،وعايز كل الفصل يطلع الاول؟
صعبة دي، البني ادم بيحب يتميز، بس غلط، مش غلط ان الواحد يتفوق، بس غلط انه يبقى عايز يتفوق "على" حد، بس ح تتفوق ازاي الا على حد؟ انا شخصيا باكره المنافسة وعمري ما باحط نفسي في منافسة ولا مقارنة مع حد، بس ده مش معناه اني بالضرورة اني اكون باحب لغيري اللي باحبه لنفسي
اصل يعني سيدنا محمد بيختار الكلام بالمللي، يعني ما قالش يتمنى، ما قالش يريد، قال يحب، يعني من كل قلبك كده يبقى نفسك للناس اللي انت عايزه لنفسك، ودي حاجة تانية خاااااااااااالص غير انك تكره لغيرك اللي تكرهه لنفسك، دي سهلة على فكرة، بس انا مش عارفة ازاي الواحد يعرف انه بيحب لغيره اللي يحبه لنفسه
سهلة دي؟
صعبة مش كده؟ وللا سهلة؟
طب المصريين متدينين، مسلمين ومسيحيين، يعني كل الناس بتصلي تقريبا، قليل اللي مش بيصلي، وحتى اللي مش بيصلي بيبقى يا بيصلي ويقطع يا بيصلي الصلاة الاسبوعية (الجمعة او الاحد)، يا بيصلي في المواسم، يا بيصلي ايام الامتحانات، قليل اللي قاطع خالص ده
طب احنا مؤمنين؟
ملحوظة: انا مش باقول كده عشان اسمع احكام قاسية على الناس: لا طبعا احنا مش مؤمنين احنا شعب ابن كذا وكذا، انا باسأل عشان انا باسأل نفسي ومش عارفة اجابة، ويمكن لما كل واحد يسأل نفسه يطلع لنا واحد يقول: ايوة انا مؤمن، بدليل كذا وكذا، اقوم اعرف منه ازاي الواحد يحكم، ونستفيد منه كلنا، اسهل حاجة الواحد يحكم على غيره، بس مجهود كبير قوي انك تعرف ازاي تحكم على نفسك

Sunday 29 March 2009

علاء الدين والهولوكوست السحري

يعني الحكاية دي فيها سبوبة كويسة؟ وللا بيعملوها محبة؟
امبارح طفاطيفو وميدو الظاهر ضايقتهم في حاجة فقرروا يحدفوني بخبرين في دماغي يمكن اموت ويرتاحوا مني، بس هااااااااا انا ذاااااااا
مستر اكس مالوش نهاية
الخبر الاول بيقول ان مؤسسة ذاكرة المحرقة (!) في فرنسا اطلقت مبادرة لمحاربة انكار المحرقة في العالم العربي وشارك فيها عدد كبير من العرب والمسلمين من ضمنهم الامير الحسن بن طلال (هههه وبعدين في العيلة دي بقى) واياد علاوي (ههههه وبعدين في الطقم ده بقى) والاكاديمي الجزائري محمد اركون والاديب التونسي العفيف الاخضر (عفيف؟ بذمتك مش مكسوف) والشيخة هيا من البحرين والرئيس السنغالي عبد الله واد ووزراء الشئون الدينية في كل من المغرب وقطر وتونس (يا حليييييلة) غير ميتين شخصية عربية واسلامية ما شاء الله ما شاء الله، رقاصة وفتاحة للزباين ما شاء الله ما شاء الله، والاستاذ لولو هو اللي بيدربهم
هوبا...واحد اتنين تلاتة اس..واحد اتنين تلاتة اس
الخبر التاني بيقول ان فاروق حسني حبيبنا اللي مسيطنا الونج ويذ الحكومة كلها اللي مسيطانا قال خطبة عصماء قدام المعتمر بتاع المحرقة وقال يجب اننا نتعلم من معاناة اليهود
(انا الحقيقة مش عارفة نتعلم من معاناتهم ونستعين بكتب خارجية ليه؟ ما ربنا كارمنا من وسع يعني)
واتكلم عن التقارب (يا جدع احنا مالنا يا جدع.... يا عم احنا مش بنتقارب احنا انت روح اتقارب لوحدك ح تجيب لنا تهمة؟) وعن اننا لازم نحب بعض موت موت موت
اما جاك شيراك فقال: والله فكرة كويسة يمكن تخلي العرب والمسلمين يتعاطفوا مع اليهود ومع اسرائيل! الراجل ده اهبل؟ اهبل مش كده؟ اه، هو طويل واهبل كده باين عليه
يعني فيه مهمة دلوقت عاجلة مطلوبة من العرب وعلى رأسهم الفلسطينيين، يلحقوا يدفنوا عيالهم بسرعة اللي لسة ميتين من شهرين عشان يلاقوا وقت يعيطوا فيه على ناس ماتوا من اكتر من ستين سنة، وطبعا احنا لما نعرف عن المحرقة وازاي انها كانت حاجة مؤثرة مؤثرة مؤثرة ح نتعاطف مع اسرائيل ونقول لهم: قطعني يا معلم، ونبتدي نتعامل معاهم على انهم ناس عندها اصطدان في النفسية على اساس العاطفة ومن ثم نسيبهم بقى يموتونا مرة من نفسهم
ثم ايه علاء الدين دي؟ مين صاحب الاسم البيت بيتك ده؟ ليه ما اسموش السندباد مثلا؟
يعني هي بقت المشكلة دلوقت في ان اليهود مش صعبانين علينا، يعني برضه طلعنا احنا الغلطانين،
طب خلاص، صعبانين صعبانين، احنا بقى ح نصعب على مين؟ احنا مش صعبانين على حد ابدا ليه كده؟
انا لا بانكر المحرقة، ولا تفرق معايا اذا كان اليهود اللي ماتوا فيها ستة مليون وللا نص مليون، ماهو دول بني ادمين ودول بني ادمين، ح تفرق يعني لو كانوا ستة من عشرتلاف حتى؟ ثم ان ماحدش انكر المحرقة، الناس كلها بتتساءل:
1- الحرب العالمية التانية مات فيها ستين مليون انسان، اتنين مليون من الجيش والباقي من المدنيين
اشمعنى فاكرين الهولوكوست وناسيين اللي كان في النص؟ اههههههههه، شفيييييق يا رااااجل، دول اتنين وخمسين مليون، يتنسوا ازاي يعني؟
2- الناس بتعمل ابحاث على الكتب المقدسة وتعمل روايات تتريق على ربنا وتنكره
اشمعنى الهولوكوست اللي ممنوع التريقة عليها او انكارها او حتى فتحها للبحث، ليه يعني باب الاجتهاد مغلق في الهولوكوست بالذات بالذات بالذات وممنوع اي حد يعمل اي بحث جديد بخصوصها؟
ماهو منع اجراء ابحاث تاريخية عن الهولوكوست معناه حاجة من الاتنين: يا اما هي كدب
يا اما هم عارفين بقى ان الابحاث العلمية دي كلها سبابيب وانها مش بالدقة اللي بيحاولوا يصوروها وانها ممكن تتفبرك
3- واحنا مالنا؟ واحنا مال اللي جابوا اللي خلفوا اهالينا؟ ليه المانيا ما عملتلهمش دولة على ارضها هي كتعويض عن اللي عملته فيهم
ثم ناس كتير اتحرقوا في المحرقة، منهم المثليين جنسيا
طب ليه مافيش دولة للمثليين جنسيا؟
4- هتلر كان مجرم، ده صحيح، بس هو مش اكثر اجراما من تشرشل وديجول وترومان، بالعكس، هو اقل اجراما منهم بدليل انهم هم اللي كسبوا الحرب، والحروب ما بتتكسبش بالاخلاق، خصوصا حروب زي الحرب العالمية التانية، اللي بيكسب الحرب عادة بيبقى هو الاكثر دموية
اشمعنى انجلترا قتلت عشرة مليون هندي لدرجة ان واحد انجليزي كان بيكتب مذكراته وبيقول ان اودية الهند بقى لونها ابيض من عظام فلاحين القطن الهنود
اشمعنى عشرة مليون بنغالي ماتوا من الجوع، من الجووووووووع، انتوا متخيلين يعني ايه بني ادم يفضل يجوع لحد ما يقع ميت؟ عشان الشركة الانجليزية في الهند احتكرت الاكل عشان تغليه في العالم
اشمعنى مليون ونص قتلتهم فرنسا في الجزائر
اشمعنى هيروشيما ونجازاكي؟ الامبراطورية الامريكية اللي وقعت من قبل ما تتأسس ابتدت عهدها بقنبلة ذرية، اول قنبلة ذرية تستخدم في التاريخ
حد في دول اخد تعويض حتى ولو قرش صاغ وللا شاندوشت جبنة بيضا بالجرجير في نص رغيف بلدي؟
كل دول مش بني ادمين وهم اليهود بس اللي بني ادمين؟ وللا عشان اليهود من الجنس الابيض وممنوع انهم يموتوا؟
هي كده، والله هي كده، في كتاب اساطير الصهيونية جون روز قال الغرب كله مستبشع الهولوكوست عشان بيعتبر اليهود اللي ماتوا فيه جزء من الغرب عرقيا وحضاريا (بيض بقى وقشطة) لكن اي حد تاني يموت في افريقيا وللا في اي داهية يبقى في داهية
وعايزينا نتعاطف
صحيح ان الاقوياء هم اللي بيكتبوا التاريخ، وصحيح ان العالم مافيهوش عدل، وصحيح ان اللي يبطلج اكتر هو اللي بيكسب والشر هو اللي بينتصر في الاخر، دي حقيقة
بس يا فاروق حسني يا فنان......ياااااااااااا فنااااااااااااااان
دي مش مهمة الفنان انه يشارك في بناء مجد الساسة وفلوس بتوع البزنس على جثث الابرياء
الفنان مهمته يبقى ضمير الانسانية، ينحاز للقيم الانسانية مش للقوة، لمعذبي الارض مش لبلطجية الارض، ولو ما قدرش ينقذ الابرياء اللي جثثهم بتبني قلاع القوة للساسة ورجال الاعمال يبقى على الاقل يعيط عليهم.... مش يشارك في تجميل قتلتهم وتبرير مصارعهم
هو كده، ربنا خلق الفنانين عشان كده بالذات مش عشان اي مهمة تانية، واللي ما يعرفش كده يبقى مش فنان ولا حاجة
يبقى صنايعي شاطر

Saturday 28 March 2009

جميييييييييييييييييييييييييييلة

الواد جو ده على فكرة خسارة في جتتنا، ده لو كان يهودي كانوا عملوا له تمثال وداروا بيه في كل حتة عشان يثبتوا ان الجنس اليهودي متفوق على كل اجناس العالم، بيهللوا لنفسهم بطريقة عجيبة، ووالله ما عندهم نص اللي عندنا، احنا بس عندنا عته جمعي
كاتب مقال رااااااااااائع عن كامب ديفيد، وشايل التعليقات :) مش عايز يسمع غباوات الظاهر، فانا سايبة لكوا التعليقات هنا :) بس ما حدش يتغابى بقى عشان الفسفور في مخه ح ينور ولو اتعصب ممكن يحرق واحد هنا وانا مش مسئولة عن الخسائر في الارواح
الا برضه في ظرف يومين اتناقشت مع واحدة ساداتية لايف، وواحدة صهيونية على ماي سبيس وسبحان الله فولة واتقسمت نصين
الساداتية: الجمسي كداب...الشاذلي كداب.... عصمت سيف الدولة ناصري كداب... ابراهيم كامل كداب... كارتر ده كبر وخرف... لا اللي حاصل دلوقت مالوش علاقة بكامب ديفيد... السادات مضى على تصدير البترول بس ما كانش ناوي يصدره :) الاخيرة دي كانت جامدة موت، كل دول ناصريين ولاد...
طيب مين اللي صادق؟ اذا كل الناس بما فيهم الطقم الجديد اللي جه بعد ما الطقم القديم استقال ورضي يبقى رقاصة وفتاحة للزباين ما شاء الله ما شاء الله حتى الطقم ده قال:  كان اسود يوم في حياتي (راجع بطرس غالي) لو كل دول كدابين، ثم الواقع اللي احنا فيه دلوقت، الواقع الاقتصادي والسياسي وكل ما نتكلم يقولوا ما نقدرش عشان خاطر كامب ديفيد كل ده كدب مين اللي صادق؟
تبتدي تشتم بقى وتخرف في الكلام
في نفس ذات اليوم واحد صهيونية على ماي سبيس: الفيديوهات دي متفبركة...الفلسطينيين كدابين....الامم المتحدة تقاريرها مش دقيقة.... الجزيرة كدابة.... ايه يعني كام عيل في الجيش الاسرائيلي قالوا مجرد كلام مالوش ادلة، انا بطبعي شكاكة ومش باصدق اي حاجة تتقال
هايل...انا اتفق معاكي تماما، انا كمان مش باصدق اي حاجة، على كده انت مش مصدقة بقى الهولوكوست اليهودي-
لا..الهولوكوست اليهودي عليه ادلة-
ايوة يعني ايه الادلة اللي على الهولوكوست اليهودي اقوى من فيديوهات مصورة ونقل اخباري لايف وشهادات ضحايا وفوق ده كله شهادات جناة بيعترفوا انهم قتلوا اطفال عشان يخدموا ربنا، لما انت شكاكة قوي لدرجة انك ما تصدقيش ده كله، مصدقة حاجة حصلت قبل ما تتولدي ما عليهاش ولا دليل من الادلة المذكورة دي؟
تبتدي تشتم بقى وتخرف زي الساداتيين بالظبط
ربنا يوفقهم مع بعض ويفرحنا بيهم ويشيلوا عيالهم وعيال عيالهم

هيكل لسة بيشد في شعره

على فكرة الشعب العربي كله ح يبقى مجموعة من القرع
الحوار انا شفته في الاعادة لما جو بعت لي ينبهني، الحوار حلو قوي كان، بس هو لسة عمال يشد في شعره ويقول ما معناه: يا ناس حرام عليكوا ح تنقطوني، فيه حد في الدنيا يعمل في نفسه كده؟ امريكا ايه اللي عايزين ترضوها هي عارفة تتلايم على نفسها، ما تشوفوا نفسكوا بقى
ده ملخص الحوار
بس هو تاعب نفسه على الفاضي وهو لسة عامل عملية
ياللا اهو بيبري ذمته قدام ربنا

ايه بنات؟

انا لحد دلوقت خمستاشر واحد بالعدد حكى لي على البنات اللي بتتقدم له، اقربها تلاتة في اقل من تمانية واربعين ساعة والتلاتة ما يعرفوش بعض، كل واحد فيهم ستايل مختلف عن التاني خالص ودماغ تانية وشغلانة تانية، ومن ضمنهم واحد متجوز مسكته واحدة وقعدت تقول له: وانت بتشتغل ايه؟ ووالدك؟ وانتوا ساكنين فين؟ كويس كويس، ما تنزل توصلني، انا ح اركب من عبد المنعم رياض انت نازل فين؟ وبتقبض كام؟ وعندك شقة؟ كويس كويس، وفارشها؟ عموما مدام جبت الشقة دي اهم حاجة، وريني الموبايل بتاعك؟ ايه ده؟ مين ده؟
ده ابني-
ابنك؟ هو انت لسة متجوز مامته؟
طبعا هو كان عمال يشتغلها "عشان اشوف اخرها ايه" لحد ما اكتشفت لوحدها لما طلبت منه الموبايل 
!!!!!!!!!!!!!!
ايه بنات؟ فيه ايه؟ مش بالراحة كده؟ وبعدين الرجالة بيتجننوا من الكلام وبيفتكروا انهم لقطة، حرام عليكوا، ما عندكوث اخوات ثبيان؟
اظرف حاجة واحد كلمني النهاردة وبيقول لي: عايز اقعد معاكي، جايلي كذا عرض جواز وعايز اخد رأيك
ده بقى ستايل تاني غير المتجوز، مطرقع شوية، مطرقع شويتين تلاتة مية 
التالت بقى محرج ومتواضع: والله انا خايف احكي لك احسن تقولي عليا اتجننت، انا والله ما اتجننتش، ولا فاكر نفسي الان ديلون ولا حاجة والله
ايه بنات؟ ايه حكاية عريس يابوي عريس يابوي، مش نلم نفسنا كده؟ نصيبك ح يجيلك يا حبيبتي، مافيش داعي اي واحدة "تجري على اكل عيشها" زي ما واحد فيهم قال لي
بالراحة بالراحة....حرام عليكوا سرعتوا العيال، ماحدش بياخد غير نصيبه، تجري يابن ادم جري الوحوش غير جوزك ما راح تحوش
اهدوا شوية
فيه حاجة في الاكل والله العظيم
طب والله العظيم كمان مرة فيه حاجة في الاكل

Friday 27 March 2009

في ذكرى 26 مارس...صباحية مباركة

بس لو كان رش رشة جريئة شمال يمين كده....ياللا اهو نصيب
منين أجيب ناس لمعناة الكلام عارفين
شبه الأمارة إذا حفظوا الوداد عارفين
شرعت سن القلم
رمحي جرح قمحي
جعلت عشقي الغنا زادي
وناس عارفين
ياليل يا عين يا وطنيا صحرا يا بساتين
يا جرحي يا غنوتي
يا ناسي يا غايبين
موالي من غربتي اخضرخضاره حزين
حزين كلام الغنا
والسامعين عارفين
***
آه يا زمان الخنا يا ماشي بالمعكوس
آه يا زمان الخنا يا ماشي بالمعكوس
فيك اي شيء ينشري
وكل شيء بفلوس
حطيت عديم الرجاع الخايب المتعوس
خراب وحاكم أغا
يا قهرة العارفين
ركِب الأغا ع البلد
ركّب عليها الخوف
خاين
قليل التنا
جاهل
عديم الشوف
خان التراب والهوا
خنق الضمير ف الجوف
وداس بنعل الوطاع الحق والعارفين
مين في البلد يا بلد
كان صوته من راسه
يحسب يكيد العدا
ويصون وداد ناسه
دار المدار بالخبل
وسقانا من كاسه
مين تحت الحكم الأغ
اينطق يقول عارفين
ياللي قريته الجرايد
كله كلام مغشوش
ياللي قريته الجرايد
كللللللله كلام مغشوش
ومركبين في الصحافة
بتوع وليها كروش
يدوسوا زر البتاعة
ينزل كلام مطروش
حمضان في حبر المطابع
وكلكوا عارفين
***
أصل الحكاية ولد
فارس ولا زيه
اصل الحكاية ولد
فارس ولا زيه
خد من بلال ندهته
ومن النبي ضيه
خد من بلال ندهته
ومن النبي ضيه
ومن الحسين وقفته
في محنته وزيه
قدم شبابه فدا
والحق له عارفين
خالد
يابن الربيع والامل
والشمس والزينة
مين يا فتى أعلمك
فعل الخريف فينا
وكبرت برة الزمان
اللي ابتلاك بينا
نايمين على ودننا
مع اننا عارفين
صاااااااااااااح من سكون الخرس
كروان بغنيوة
الملك لك
يا فتى
يا مصري
يا حليوة
رقصت نجوم الفلك بالضي تتعانق
والشمس ويا القمر
في برجهم عارفين
شيل الغطا يا عطا
عبد السلام مددين
عبد الحميد يا فتى
قطب الرجال يا حسين
داعي المروءة دعا
والعمر مش عمرين
خالد يقول صحبتي
واحنا الجميع عارفين
الله أكبر هناع الباغي والجبار
طعن الفتى طعنته
خار الأغا وانهار
المجد ده ابننا
والفارس الكرار
راكب على مهرنا
والكدابين عارفين
المجد ده ابننا
والفارس الكرار
راكب على مهرنا
والكدابين عارفين
مين يا فتى علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم على زندك
الاسم خالد
ولكن
عاشق
ولك هندك
ام الدلال
علمك طبع الاسود
عندك
مين يا فتى علمك
عشق الملاح والميل
هندك يا ادهم هنا
اصلك
وسلسالك
والناس يا خالد
هنا عمك
هنا خالك
يا غنوة من قهرنا
اسمك وموالك
ويا الربيع والامل
في دمنا عايشين
وليه اجيب ناس
لمعناة الكلام عارفين
واحنا الامارة
اذا حفظوا الوداد
عارفين
احمد فؤاد نجم

اخلاء سبيل المدون ضياء عبد السميع جاد

ميدو ساب لي التعليق ده والتفاصيل عنده
حمد الله على السلامة يا ضياء

هو اللي كتب الاغنية دي يعرفني؟

هو اللحن مش لحن اصلا، لحن بتاع واحد بيهشك عيل، بس كلمات الاغنية غريبة قوي، بالنوسبة لي يعني، انا ما اعرفش ايهاب عبده ده، اعرف ايهاب عبده تاني بس مش هو اللي كاتب الاغنية، هو يعرفني؟ اصلي حسيت انه حاططني قدامه وبيكتبني يا اما يعرف حد من صحابي بقى وحكى له عني، طب ليه كده بقى؟ هي دي الصحوبية؟

Thursday 26 March 2009

اسلام نبيه خرج؟

يا حليلة، الخبر ده جاني على مجموعة مصريين ضد التعذيب قال لك "علي حسَن سَلّوكه" خرج بتلات اربع المدة
احم
طاه
حمد الله على سلامته

اطفال جنين يغنون للناجين من الهولوكست عبر جمعية خيرية اسرائيلية

لا اسم الله عليا انا ما اتجننتش، انا شفتها بحبابي عنيا اللي ح ياكلهم الدود على البي بي سي عربي
عارفين نغمة ننة هوه؟ اهو، اهي هي هي نفس النغمة بس جايبين كام مراهق ومراهقة (البنات كلهم محجبات اذا كانت المعلومة دي تهمكوا) من جنين بيقولوا على نغمة ننة هوه الاغنية دي: نحن نصلي للسلااااااااااام، نحن نصلي للسلااااااااااااااااام، نحن نصلي للسلااااااااااااااااااام، نحن نصلي للسلاااااااااااااااااام، نحن نصلي للسلاااااااااااااااام،
لا استنوا الغنوة لسة ما خلصتش
نحن نصلي للسلااااااااااااااااام، نحن نصلي للسلاااااااااااااااااااااام، نحن نصلي للسلاااااااا
طب ما تزقوش
والعيال وهم بيغنوا كان شكلهم عامل كده
اما بالنوسبة للناجين من الهولوكوست اللي كانوا قاعدين يسمعوهم فكان شكلهم كده
طب وليه الجوازة اللي مش نافعة دي ؟ هو الحب بالعافية؟
العالم كله عاملين زي اتنين بينهم بزنس وعشان كده عايزين يجوزوا العيال لبعض والواد والبت مش طايقين بعض
كام سؤال على الماشي:
-مش جينين دي اللي كان فيها محرقة من كام سنة وشارون رفض هيئة التحقيق اللي جاية من القلل المنتحرة تدخل جنين وقال مستعد اتحمل عقوبات منعهم ومش مستعد اتحمل تبعات دخولهم؟ بصراحة كده
-جمعية خيرية اسرائيلية... استخرج جملة مفيدة مما سبق
امي سألت سؤال وانا ما اقدرش احرمها من حاجة، دي امي: مين السمسار اللي ورد العيال دي؟
وبما اني انسانة مادية فانا باسأل: اخد كام؟
--------
وفي نهاية الحفل عزفوا لهم اغنية انت عمري بمنتهى النشاز اللي خلقه ربنا في الدنيا كلها، عمري في حياتي ما سمعت نشاز كده، ياريت كان فيه تسجيل كنت سجلت لكوا بصوتي عزفوها ازاي
تقريبا بينتقموا منهم، مين عارف؟ يمكن عملوا استراتيجية جديدة في المقاومة انهم يفضلوا يغنوا لهم نشاز ويعزفوا لهم نشاز لحد ما ما يقعوا من طولهم فيييييضررررب برجلك تررررررررررهب العديوووووووو

Tuesday 24 March 2009

نيموذج للانسان المصري الاصيل

تحديث:
لما فتحت الكتاب لقيتهم عارضينه مش جايبين النص كامل وانما جايبين منه نصوص كتير
للاسف مش لاقية النص الكامل للكتاب بالعربي
لكن هو موجود على التورنت بالانجليزي للي عايز يقرا النص الكامل، خصوصا ان المترجم وهو بينقل بعض النصوص لخبط في الترجمة وقال "انا وروزالين" والحقيقة ان الراجل قال: "روزالين وانا" كان لازم المترجم يلتزم بالامانة
اللي ما دخلش عليه ولا جين من "الغزاة" خالص، هو هو، من ايام مينا موحد القطرين لحد النهاردة خط الجينات بتاعه ماشي زي قطر السكة الحديد....ايه ده:
السلام عليكم:الرابح الأكبرأسرئيل والخا سر الأكبر العرب وعلى رأسهم مصر ورحم الله الرئيس السادات كان سابق عصره فى قرائته للمستقبل وتنبؤه بسقوط الأتحاد السوفيتى وأمتلأك أسرائيل للسلاح النووى وأن تسعة وتسعون فى المائة من أوراق الضغط على أسرائيل فى أيدى الأمريكان. المهم ما هى محصلة السلام مع الدولة العبرية؟ أستعادة مصر السيادة على أرضها كاملة عقبال الجولان. السلام خيار أستراتيجى لأمفر منه لكى تكون هناك تنمية حقيقيه بدل طوابيرالبطالة والعيش وأزمة الأنابيب على فكرة أحنا فى حالة سلام وليس حرب !!!!!!
---
انا مش ح اكتب اسمه عشان ربنا حليم ستار، بس هو مشارك في استفتاء البي بي سي عن معاهدة كامب ديفيد
انا ما يهمنيش اللي مع المعاهدة، وطبعا يهمني اللي ضد المعاهدة وفي عيوني من جوة، بس الحقيقة النيموذج اللي انا طارحاه هو بالظبط بالظبط حالة المصريين، ده تلخيص للتيه المصري في الوقت الراهن: طبعا اسرائيل هي الرابح الاكبر ومصر هي الخاسر الاكبر واكيد يعني السادات كان سابق عصره وعشان كده عندنا طوابير عيش واحنا في سلام واستعدنا سيادتنا والحمد لله
بيفكرني بحسين اخو ام زينب لما راح الجزائر مع بابا وقابل جميلة ابو حريد وقال لها: انا شفتك في الفيلم لما كنتي ماجدة
قالت له: مش انا دي ماجدة
قال لها: لا انت، بس كنتي صغيرة ماجدة كده، كانوا حتى بيقلعوا لك ضوافرك...انا مبسوط قوي اني اخيرا قابلت امينة ابو حريك
سواء كان اللي كاتب التعليق ده قصده يهزر (وده احتمال ضعيف) او هو فعلا زي ما بيقولوا في الدراما شخصية
larger than life
بمعنى انك ممكن تسقطها على عدد كبير من الناس
سواء اي حاجة من دول فانا استكنيصت جدا من التعليق، ابهرني الحقيقة
مع كامل احتراسي للاختلاف في الرأي بس لما يبقى المشرف والمحرك والمحرض والضاغط والفاعل والدافع لعملية السلام بين مصر واسرائيل يقول في كتابه للاسف كامب ديفيد اسرائيل فيها هي الرابح الوحيد، لانها حيدت اكبر قوة عربية مما اداها فرصة انها توسع المستوطنات وتفرض امر واقع على العالم العربي كله، ومصر ما كسبتش كتير، الحقيقة ما كسبتش خالص، بس انا والله العظيم ما كنت اقصد، انا كان قصدي خير، حتى اسألوا روزالين، طب ده انا قلت لروزالين اني متفائل قوي، بس روزالين بتقول اني كان لازم اخد احتياطات حماية لصالح مصر اكتر من كده، خصوصا ان السادات كان جاي معزول عن خلفيته العربية، وانا عشان كنت عايز اخلص ضغطت عليه يقبل تنازلات، روزالين بتقول اني مش لازم اقسو على نفسي بس انا قلت لروزالين....
طبعا روزالين دي مراته
ما تقروا الكتاب يا جدعان وتوفروا على نفسكوا الجدل ده كله، ده الاسرائيليين مسحوا بكرامة اهله البلاط على الكتاب ده، لانه هو قوله فصل في الموضوع ده، لا مصر ولا اسرائيل جهات موثوقة يتاخد منها شهادات، الشهادة الوحيدة اللي يؤخذ بها هي شهادة كارتر
وشهادة روزالين طبعا، ح تلاقوها موجودة في كل صفحة، روزالين مش معاهدة السلام، وبيقول: روزالين وانا
روزالين اند اي..الاحترام واجب برضه
خصوصا لما يبقى امريكاني يعني، ربنا يوعدكوا كده يا شباب بهجرة امريكاني ويرزقكوا بمزة شبه انجلينا جولي
ياااااااااااااااااااااااااااااااااااا ربببببببببببببب خدوا من قلبي وصروا
يارب كللللللللللللل الرجالة العرب يتجوزوا امريكيات شبه انجلينا جولي
1- ح تحسنوا لنا النسل
2- وسيلة لا بأس بها لاحتلال امريكا
3- ح تتربوا بقى:
حيث ان المدام ممكن تتعصب عليك وتروح لاطشاك بالقلم، تيجي انت ترد تروح طالبة لك ناين وان وان، طبعا ح تقول للظابط يا ح الظابط دي سفختني حتة كف على وشي، احنا رجالة زي بعض، يرضيك يا معلم
ح يقول لك: يرضيني وح تنضرب...دي واحدة ست، واكيد انت وترتها، وبعدين ممكن تكون في مرحلة تغير هرموني ادى الى توترها
(اه والله طول النهار يتكلموا كده)
تقوم تمد ايدك عليها؟ يو هاف ذا رايت اوف وان تليفون كول، يو كان تشوز نوت تو سبيك ويذاوت يور لوير
بينا ع القسم
ولو كرامتك وجعتك وقررت تطلقها براحتك، ح تاخد نص ثروتك، لو ما عندكش ثروة ح تاخد نص هدومك، لو ماحيلتكش غير الهدوم اللي عليك، انت وذوقك بقى، يا تديها القميص يا تديها البنطلون
الولاد؟ على كيفها، لو عايزاهم ح تاخدهم، لو مش عايزاهم ح تديهم لك
ولانهم متربيين في مجتمع بيقول ان الستات عندهم كرامة مش هفئات وارضي بقسمتك ونصيبك انت ولية، سيبيه لربنا اللي بييجي على الولايا ما بيكسبش (الغريبة انه بيكسب)، فهي ح تدور على ايه اللي يضايقك وتعمله، يعني لو عايز العيال هي ح تاخدهم، لو مش عايزهم ح تديهم لك
طبعا ح تقول لي: وليه الاذية دي ما نطلق بشكل محترم
اه ده بالنوسبة لاي راجل تاني، بالنوسبة لك انت ده مش ح يحصل، معلش بقى ربايتنا واحنا عارفين عملنا فيكوا ايه
امال هو عمال يقول روزالين اند اي ليه؟ كل واحد يحترس نفسه ويلزم مكانه باحترامه بدل ما روزالين تتنرفز ويبقى نهاره مدوحس
4- لما واحد يتكلم زي الاخ اللي فوق ده ما يلزموش غير واحدة امريكانية تقفل له بقه بالمسامير والقادوم
شوفتوا؟ كلها فوايد
ياااااااااااااااااااااااااااااااااا ررررررررررررربببببببببببببببببببببببب كل الرجالة العرب يتجوزوا امريكيات
(ملحوظة: للي ما بيحبش انجلينا جولي، الحمد لله امريكا فيها كم كبير من المزز المختلفات في الشكل واللون والحجم، فيه السمرا وفيه البيضا فيه الشقرا وفيه الصفرا- من جوة قلبها كمان، بس كلهم طبع واحد...القانون في صفه، القانون يحميه، ربنا يوعدكوا يااااااااااااارب، انتوا تستاهلوا كل خير يا شباب)
قولوا امين

انباساطوا لكوا شوية

هو الواحد المفروض يبقى ضهره معمول من ايه عشان يرقص كده



هو انا مش عاجبني بطل الفرقة قوي لانه بيتمشكح بهبل شوية بس بسم الله ما شاء الله، ضهره اسم الله عليه، الفيديو قديم، بس انا كنت بادور على اندريه ريو عشان اروق اعصابي قبل ما ابتدي قام طلع لي ده، شايفين الحلاوة
وبصوا الواد ده نيجيري، اسمه حكيم كامارا واندريه بيقول له أكيم


 
ياروحييييي، متضايق من الناس وعمال يبص للمدرس بتاعه عشان يشوفه مبسوط وللا لا
المهم، روقوا اعصابكوا كده عشان نبتدي حملة الاستقلال التام، مصعب والكلمة نور معانا ان شاء الله، وطبعا جابر انا حرة فيه اعذبه زي ما انا عايزة

Monday 23 March 2009

مدوا ايدكوا بسم الله

انتوا مش بتساعدوني ليه؟ انا باعمل ستميت حاجة حرام عليكوا
انا عايزة عناوين من الكتاب ده عشان خاطر نعمل وثيقة جماعية للمطالبة بالغاء اتفاقية كامب ديفيد
وده برضه كتاب سلام لا فصل عنصري تاني، حملوه، فيه حاجات كتير من المعاهدة وكلام كتير لكارتر عن ظروف المعاهد ينفع يتاخد قرينة ان السادات اضغط عليه واتحط في خانة اليك وانضحك عليه بنص كلام كارتر
وعليه فبالاعترافات دي يبقى الاتفاقية من حقنا نلغيها
كل ما اكلم حد من بلاد الفرنجة عن الموضوع ده كلهم كلهم كلهم بلا استثناء يقولوا لي: طيب هي المعاهدة دي مدتها قد ايه؟
اقول لهم ابد الابدين
يروحوا ضاحكين ويقولوا لي: بصراحة تستاهلوا، هو فيه حد بيمضي معاهدة تنتهي يوم القيامة؟ ده انتوا مش ماضينها مع العرب جتكوا خيبة
ايه الاحراج ده؟ وانا عمالة اسيط لنا واقول ده احنا نبها ده احنا مافيش منا اتناشر في سرس الليان، ده اذكى طفل في العالم مصري عربي ده اصغر فنان في العالم من اصل عربي افريقي ده اعلى اي كيو في العالم هو احمد زويل ده احنا النباهة والنباهة احنا لولا ميلة البخت والخيبة، ده احنا عندنا الترجمان ما يعرفش يقرا ولا يكتب وبيتكلم سبع لغات سماعي، ده العرب معروفين عبر التاريخ بالتفوق في الرياضيات والهندسة وعمالة اقول كلام عنصري حقير عشان اهشتكنا يقوم يطلع اغبى سياسيين في العالم من عندنا؟ طب اعمل ايه انا دلوقت؟

المعونة هي اللي خيانة عظمى يا مصطفى يا بكري

الاستاذ مصطفى بكري كان طالع امبارح مع منى الشاذلي في العاشرة يقول لها: وراحوا (سعد الدين ابراهيم وواحدة اسمها منى الطحاوي انما ايه؟ سعد الدين ابراهيم جنبها ملاك ينقصه الجناحين) لامريكا يطلبوا قطع المعونة.....طلب قطع المعونة عن مصر خيانة عظمى
يا سلاااااااااااام؟
يااااااااااااااااااااااا سلاااااااااااااااااااااااااااااام؟
ياااااااااااااااااااااااااااااااااااااااااااااااااااااا سسسسسسسسسسللللللللللللاااااااااااااااااااااااااااااامممممممممم؟
وكيف كان ذلك يا حاج دبشليم الفسلسوف؟
يا ناس... يا عالم، البلد دي فيها اعجب الاعاجيب، والطف الاهازيج، صحيح مصر يا ام العجايب
فيه في الدنيا معارض حكومي؟ فيه كده؟
بصرف النظر عن رأيي في سعد الدين ابراهيم ومنى الطحاوي، يعني لما ييجي حتى يتناقش مع الناس يقول لهم قطع المعونة عن مصر خيانة عظمى؟ ايه ده؟ انتوا عايزينا نبطل شحاتة وللا ايه؟ قلة ادب، ما داهية تكونوا عايزينا نستغل مواردنا ونحترم نفسنا ونبقى بلد عليها القيمة.....سفالة
فيه كده؟ فيه كده؟
هو فيه بلد في الدنيا بتنهض وهي بتاخد معونة؟ فيه بلد شحاتة بيبقى لها اي سعر في العالم؟
طب المعونة دي جزء من كامب ديفيد يا استاذ مصطفى، ولو كامب ديفيد ح تتلغي، وان شاء الله ح تتلغي، المعونة ح تتقطع توماتيكي توماتيكي، هو مش مصطفى بكري معارض لكامب ديفيد برضه؟
"وقد يكون جمال مبارك راح يتفاوض بشأن الصالح الوطني في امريكا في حاجات ما يقدرش يتفاوض فيها الا هو"
سبحان الله يا اخي، ويخلق مالا تعلمون
ده ايه الفتوح ده كله؟ ده انت لقطة 
طب المعونة دي معمولة في اساسها عشان تضعف الدول اللي بتاخدها وتخليها دايما معتمدة على امريكا ورهينة شروطها
واهو ابراهيم عيسى يا استاذ مصطفى بدون سابق انذار على غفلة واحنا قاعدين بيقول لك اهو
طب انا اللي افهمه، ان البني ادم لما يبقى عنده القدر القليل من المنطق، والقدر القليل من حل المسائل الرياضية (كانوا بيقولوا العرب جنس متفوق في الرياضيات اكتر حاجة.....مش باين) يقول حاجة بسيطة قوي: انت يا حاج انت والانسة اللي معاك رايحين تطلبوا قطع المعونة عن مصر، وانا معاكوا، طب انتوا بتاخدوا معونة ليييييييييييييييييييييييييه؟ هو انتوا مش مصريين برضه؟
مش كده؟ وللا انا هابلة؟
اه
انا هابلة، ما انا عارفة دي معلومة قديمة
بس بصراحة المنظر بقى مقزز قوي، قاعدين كل واحد فيهم ماسك في طرف المعونة ويقولوا: ما تشدش ما تشديش انتي ما تشدش ما تشديش انتي
طب والله العظيم الشحاتين في الاشارات عندهم كرامة اكتر من كده، والله العظيم كمان مرة العيل اللي عنده عشر سنين اللي ما رضيش ياخد مني فلوس من غير ما يبيع لي ورد محترم عنهم وقال لي بالاطة شديدة: انا مش شحات....انا باشتغل
بس دي هدية-
خلاص....وانت كمان تاخدي مني ورد هدية
انا عايزة الواد ده يحكمنا
يرشح نفسه في الانتخابات وانا ح اتبنى الحملة الانتخابية بتاعته انشالله ارفع الناس بالمسدس عشان ينتخبوه، اذا ما كانش عشان كرامته يبقى عشان نباهته ومخه النضيف
عنده قدرة على الاستدلال المنطقي على الاقل

رجاء قراءة الصفحتين دولم بتمعن، كلك عليها وهي تكبر





Sunday 22 March 2009

اقرا كتاب سلام لا فصل عنصري

ده كتاب جيمي كارتر، طبعا هو ح تلاقوه جايب سيرة مراته كتير عشان هو برج الميزان :) الرجالة برج الميزان بيخافوا من مراتاتهم... لا مش بيحبوهم، خالص، بيخافوا منهم بس
ومين الكميلة اللي في الفيديو ده؟



اسمعوا كلامه بقى بتركيز، هههههههههه مش عشان تبقوا ماركسيين، انا اقصد اسمعوا التحليل بتاعه كويس

حسبي الله ونعم الوكيل

انا عرفت ربنا بيعمل فينا ده كله ليه؟ طب والله ما باقول كده تهريج ولا تهبيل، انا فعلا عرفت ربنا بيعمل فينا ده كله ليه؟
بس قبل ما اقول لكوا لازم نكتب قائمة الشرف للخمستاشر عضو في مجلس الشعب اللي رفضوا اتفاقية كامب ديفيد مع انهم ما قروهاش ولا عرفوا المصايب اللي فيها، اصل مجلس الشعب اتكلفت في موضوع الاتفاقية ده
القائمة
الدكتور محمد حلمي مراد
محمود علي زينهم
احمد طه احمد
قباري عبد الله عبد الحليم
عادل عبد المقصود عيد
الدكتور مهندس احمد القاضي
كمال محمد احمد محمد
خالد محمد امين محي الدين
طلعت عبد الرحمن الهادي رسلان
عبد المنعم حسين ابراهيم
احمد محمد ابراهيم يونس
محمد كمال عبد المجيد سعد
احمد حسين ناصر
صلاح ابو اسماعيل محمد عبد الرحيم
محمد ممتاز محمد نصار
ده اولكشي
تانيكشي بقى، حسسسسسسسسسسسسسسسبي الله ونعم الوكيل
الله يرحم الدكتور عصمت سيف الدولة ويسكنه فسيح جناته، بس الراجل كاتب نبوءة مش كتاب، اي والله زي ما باقول لكوا كده، ولو روحه بترفرف علينا دلوقت زمانه اغمى عليه والملايكة بتفوقه فوق من كتر ما كل نبوءاته اتحققت
الكتاب مقسم الى الاتي: توقعات مرئية عن الجيل اللي ح ينشأ في المعاهدة المنيلة دي، تقولش كان حاططنا قدامه وبيرسمنا؟
نقد قانوني يبين عدم دستورية الاتفاقية وازاي ان مجلس الشعب اللي اساسا اتحل بعد ما وافق على الاتفاقية اصلا اصلا اتكلفت ولا عرف هو بيوافق على ايه: موافقة اجماع بالصلاة ع النبي، حتى قال لهم مرفق نسخة من الاتفاقية قالوا له: النسخ مش موجودة قال لهم لا ماهي في امانة المجلس
وزي ما انتوا عارفين يا اصدقائي الصغار اللي عند امانة المجلس ما بيروحش ابدا...ياااااه ده زمانها اتحرقت في المجلس دوقت
وبعدين صاحبك اتضايق ان فيه خماشر واحد قالوا لا، والدكتور محمد شامل ابراهيم الدسوقي اباظة امتنع عن التصويت
ماهو بصراحة ح يصوت على ايه؟ على وكستنا؟
راح بعد ما المجلس وافق بالاغلبية على الاتفاقية، ومن ثم قانونا بقت تجري مجرى القانون عمل استفساء يسأل الشعب بعد ما خلاص شرعها واتقبلت عن: موافقين على الاتفاقية وعلى حل مجلس الشعب وللا لا؟
قام طبعا زي ما احنا عارفين تسعة وتسعين وتسعة وتسعين من مية في المية وافقوا، والدكتور عصمت بيقول: طب قدر ما وافقوش؟ ماهو قانونا عدم موافقتهم غير صالحة لان المجلس خلاص وافق عليها
المهم يعني عمل علينا شغل تلات ورقات من اللي قلبك يحبه
الحاجة الاهم بقى، كلللللللللللللللللللللللللللللللللللللللللللللللللللللللللل اللي احنا فيه ده، نفر نفر وقملة قملة وبقة بقة كللللللللللللللللله منصوص عليه في الاتفاقية، كان ناقص يقولوا لنا نلبس ايه في العيد الكبير وايه في العيد الصغير، ظبطونا تمام بحيث فعلا مافيش اي مجال للاجتهاد، ماهو عشان كده اختار عوكل، راجل بياخد الاوامر وبس، ماهو واحد عنده ميول ابداعية يحكم في ظل هذه الاتفاقية يبقى ح ينتحر
والاتفاقية دي بقى مش جواز كاثوليكي، ده .... ده... ده ينصر دينك يا استاذ نفيسة
يعني اي مخالفة ح نعملها، مخالفة ايه؟ ده لو رمشنا، لو كحينا، لو عطسنا بطريقة ما تعجبش اسرائيل وتثير الشكوك، عنايات ابو سنة ح تتقتل مش بقى من البلطجي الصغير، من البطلجي الكبير اللي بنص الاتفاقية ملزم "بردع مصر لحماية اسرائيل" ومش بس كده، ده مصر ملزمة
اسمع انت عشان بتحب الكلام ده
مصر ملزمة بحماية امن اسرائيل من كل مواطن مصري يسيء اليها بالقول او الفعل في داخل مصر او خارجها ومن كل مواطن مصري وغير مصري يعيش على ارض مصر
ليه؟ ليه؟ ده احنا اتهزمنا وما قبلناش بشروط زي دي
ليه؟
انا اقول لكوا ليه؟
الكدب
والله العظيم مافيه اي مشكلنا عندنا غير الكدب، لو من اول لحظة الاخوة كرامازوف رسونا على البير وغطاه ما كانوش احتاسوا لوحدهم، وما كانوش اضطروا يقمعوا الناس اللي بتكشف كدبهم، وما كانوش عشان يداروا كدبهم يصلحوا الغلطة بغلطة اكبر لما فضلت المصايب تتكوم فوق دماغنا واحنا مش دريانين بحاجة لحد ما فاجئنا الاخ من كام شهر وهو بيقول لنا اننا مالناش اي سيادة على بلدنا، واننا لو استخدمنا مواردنا او غلينا السعر او وقفنا التصدير لاسرائيل او اتقلبنا واسرائيل نايمة او قزقزنا لب وهي بتتفرج على المسلسل ده يعد اعلان حرب
والاتفاقية ابد الابدين
كحك، ده قتل امين عثمان عشان قال اتجوزنا انجلترا جواز كاتوليكي، سبحان الله الراجل ده الظاهر كان راجل غلبان وللا على نياته، اصل ربنا انتقم له قوي وجاب اللي فيه في اللي قتله واكتر، اقصد يعني  انتقم له حتى مننا كلنا، ماله الراجل ده؟ دمه بيطاردنا كده ليه؟ 
 لولا الكدب من اول لحظة ما كانش كل ده حصل لنا، ما كانوا يقولوا لنا، كنا وقفنا جنبهم، هو احنا بنعمل حاجة لحد؟ ده احنا غلابة
ليه كدبوا علينا؟
انا اقول لكوا ليه؟ عشان الكدب ده تراث شعبي
انا بجد وانا عمالة اقرا ودمي اتحرق وحسيت قد ايه الكدب بيئذي، رغم ان مش دايما الكداب نيته وحشة، بس فعلا زي ما الرسول قال، ممكن تزني او تسرق بس ما تكدبش
صح
بس هم ح يجيبوه من برة؟ ما فلاحين وصعايدة وجايبينه من جيناتنا، كل حاجة بنكدب فيها
تبقى واحدة متدينة ومنقبة وتقول لك: والله مش ح اقدر اروح الفرح النهاردة بتاع فلانة، بطني واجعاني قوي، انا ح اعتذر لها بقى واقول لها اي حاجة، اقول لها ان ماما في المستشفى
الله؟ طب وتكدبي ليه يا بنتي ما انت عندك مغص-
ما ح تزعل
ما تتفلق يا ستي
---
واحدة يبقى جوزها نايم ويجيله تليفون: لا والله مش موجود
الله بتكدبي ليه؟
اصله يا عيني ما نامش من امبارح وما اقدرش اصحيه
يا بنتي طب ما تقولي له نايم هو ح يقول لك صحيه؟
ماهو كده انت بتعود لسانك على الكدب، الكدب ده نجاسة
ومش فارق فيه المتدين من اللي ما بيعرفش ربنا، انا ما شفتش حد ما بيكدبش ولا حتى الكدبات الصغيرة دي غير امي بس
انا مش عايزة بس اقع في حيص بيص، يعني مش عايزة احدث بذنوبي اللي ربنا سترها ومش عايزة برضه اعمل ابلة حكمت وتظنوا فيا حاجة مش حقيقية انا كمان باعمل كده:
ازي ماما يا حبيبتي



- بتسلم عليكي يا طنط
ما حصلش، ماما ما سلمتش عليها ولا حاجة، امال باكدب ليه؟ ماهو ده كدب، وماحدش يقول لي دي مجاملة، فيه ستميت كلمة اقدر اقولها غير بتسلم عليكي وهي ما سلمتش عليها، انا باقول حاجة ما حصلتش لو مش عايزة حد يكدب عليا ولا حتى اقول كلام زي ده عشان لساني ما يتعودش 
خصوصا ان البلد دي ما اتئذتش غير بالكدب، الهزيمة والنصر دول مقدر ومكتوب، وكل الناس بتتهزم، دي فرنسا احتلها النازي، يعني كله بيعدي، المهم ما يبقاش فيه كدب ويبقى كل حاجة على مية بيضا عشان ما نفقش نلاقي الهرم في الغردقة ونهر النيل تحت السرير زي ما احنا دلوقت، وعاملين زي بني اسرائيل في التيه، ونمشي نمشي نمشي ونوصل في النهاية لنقطة البداية اللي مشينا منها
لو عايزين نداوي المرض الرئيسي اللي اذى البلد دي، يبقى نداوي نفسنا منه
ها يا عوكل، قول قول ما تخافش، مخبي علينا ايه انت كماااااااااااااااااااااااااان؟ لو كدبت ح السعك بالنار، كفاية بقى، مش كل واحد ييجي يكشف كدب اللي قبله ويبتدي هو الفيلم الهندي بتاعه ويفضل ينخع علينا لما شككتونا في صوابع ايدينا حرام عليكوا  

Saturday 21 March 2009

وتاني بمناسبة المعاهدة اللي كانت مخلياكوا تصوتوا من شهرين

اقرا الكتاب بتاع الدكتور عصمت سيف الدولة واللي نشرت منه مقتطف في البوست اللي قبل اللي قبل اللي فات
الكتاب اسمه هذه المعاهدة حمل هنا
بس والنبي على قلبكوا تقروه كله ما تنطوش، انا ح اكل دماغكوا زي ما باكل دماغ الاسرائيليين، وعلى فكرة ما تتخضوش، مش احسن مننا في المفهومية كتير ولا حاجة
هو بس زاعق لهم نبي ومزهزهة معاهم لسبب مجهول الهوية
حظوظ يعني

Thursday 19 March 2009

هههههههههههههههههههه اقف مكانك... ما انا واقف مكاني يافندم




ههههههههههههههههههههه


ههههههههههههههههههههههههه


هههههههههههههههههههههههههههه


هههههههههههههههههههههههههههههههه


ههههههههههههههههههههههههههههههههههههههه


مش ممكن


لا حول ولا قوة الا بالله، ده كان عيل طالب حرام عليه، انا لو كنت مكانه كان اغمى عليا من الخضة: اقف مكانك...ما انا واقف يافندم...اقف مكانك...يافندم انا واقف


لاااااااااا


اقف مكانك


ومن النهاردة يا اولادي انا جاي عشان اقول لكوا كده، ح نحترم كبير العيلة

:)


هو احنا في دوار العمدة هنا؟ يعني احنا كل اللي حكمونا تحف، بس عمرنا ما جالنا واحد بيزعق غيره، ويستفرد بالعيال الصغيرة ويفضل يزعق لهم لحد ما عيل منهم زهق وراح مموته، هههههههههههه طب والله اتقتل عشان بيزعق مش عشان حاجة تانية، كل الحاجات التانية غيره عملها، الاختلاف الوحيد انه كان بيزعق عمال على بطال


انا اصلي كنت بادور على كامب ديفيد بمناسبة ذكراها السودا وكنت عايزة اشوفه بيتكلم مع اسرائيل وامريكا ازاي؟


لقيته نازل فيهم بوس ويزعق لنا احنا،


ويزعق لعيال صغيرة كمان كمان، طب ماهو اللي يزعق للعيال ما يخلاش من الاغتيالات

عشان كده بقى عوكل ما بيتكلمش معانا خالص، عشان لا يزعق لنا ولا نزعق له بالظبط زي الراجل اللي صاحبه ح يتجوز بكرة قال له: شوف...انت داخل على حياة جديدة ولازم تمشي مراتك على العجين، عايز تسمع نصيحتي، مافيش حاجة تمشي الست على العجين وتحرق دمها غير التجاهل التاااااااااااااااااااام، لا تعاتبها، ولا تتخانق معاها، ولا تمد ايدك عليها تجااااااااااهل

صاحبه: يعني ولا حتى اكلمها؟

هو: ولا تقول لها صباح الخير....عارف، المرة اللي معايا دي، ليلة الدخلة عملت فصل ما عجبنيش، من يوميها لساني ما يخاطبش لسانها بقالي عشر سنين، راخرة ماشية معايا زي الالف
صاحبه: الله...طب والتلات عيال دول جابتهم منين؟
هو: ولاااااااااااااااااا سألتها ... باقول لك تجااااااااااااااااهل

انا عند ظن عبدي بي

خفايا كامب ديفيد

فى ذكراه الثالثة عشر

خفايا كامب ديفيد


1ـ ننتهز فرصة الإحتفال بيوم 25 أبريل لنضع تحت نظر المواطنين ما خفى من إتفاقيات كامب ديفيد، مع التأكيد على أن ما سنذكره، منقولا من مواثيقه:



التفريط :




ـ فى يوم 22 مارس 1975 قال أنور السادات فى خطابه إلى مجلس الشعب :






" من ناحيتنا كنا نعرف ما نريد . إنسحاب جديد من سيناء يشمل المضايق والبترول. هذا الإنسحاب يتصل بخطوات متماثلة على الجبهة السورية والجبهة الفلسطينية .. ولا نريد إنهاء حالة الحرب وثلثى سيناء سوف يظل حتى بعد المرحلة المقترحة من الإنسحاب تحت إحتلال العدو . ثم كيف نريد أو نملك إنهاء حالة الحرب ولم يظهر تحرك على الجولان. ولا ظهرت نية تحرك من الضفة الغربية أو من غزة أولا وقبل كل شئ من القدس ؟. كيف نريد ذلك أو نملكه عمليا وكيف نريد ذلك تاريخيا " . وقال يوم 4 يونيو سنة 1975 فى حديث إلى التليفزيون اللبنانى :" إنه لايمكن أن توافق مصر على إنهاء حالة الحرب وهناك جندى واحد إسرائيلى على الأرض العربية وإلا كان معنى هذا .. دعوة للإسرائيليين لأن يبقوا على الأرض العربية ".






ولقد استطاع ـ رحمه الله ـ بتمسكه القوى بعدم إنهاء حالة الحرب إلا بعد تحرر الأرض العربية أن يقنع الأمريكين والإسرائيلين بترك مطلب إنهاء الحرب قبل الجلاء.






ولكن بدون إنتظار ، وبدون مقابل ، وبدون ضمان ، وبصرف النظر عما إذا كان الإتفاق سينفذ أم لا ينفذ تضمنت الوثائق الموقعة يوم 26 مارس سنة 1979 ، المسماة " معاهدة السلام " التزاما صريحا ينفذ ويصبح أمرا واقعا فور تبادل التصديقات على المعاهدة ، مضامينه هى : إنهاء حالة الحرب مع إسرائيل






( المادة الأولى فقرة 1 من الوثيقة الرئيسية ) . الامتناع عن التهديد باستخدام القوة أو استخدامها ضد إسرائيل على نحو مباشر أو غير مباشر ( المادة الثالثة فقرة 1 بند ج ) . كفالة عدم صدور أى فعل من أفعال الحرب أو الأفعال العدوانية أو أفعال العنف أو التهديد بها من داخل مصر حتى لو لم تكن صادرة من قوات خاضعة لسيطرة مصر أو مرابطة على أرضها إذا كانت تلك الأفعال موجهة ضد سكان إسرائيل أو مواطنيها أو ممتلكاتها ، الامتناع عن التنظيم والتحريض أو المساعدة والإشتراك فى أى فعل من أفعال الحرب أو أفعال العدوان أو النشاط الهدام أو أفعال العنف الموجهة ضد إسرائيل فى أى مكان فى العالم ومحاكمة أى مصرى يقيم فى أى مكان فى العالم أو أى أجنبى فى مصر ينظم أو يحرض أو يساعد أو يشترك فى أى فعل عنف ضد إسرائيل ( المادة الخامسة فقرة 2 ) . الإمتناع عن أية دعاية ضد اسرائيل ( المادة الخامسة فقرة 3 من البروتوكول ) . فتح قناة السويس لمرور السفن والشحنات الإسرائيلية ( المادة الخامسة فقرة 1) . فتح مضايق تيران للملاحة البحرية والجوية لإسرائيل ( المادة الخامسة فقرة 2 ).






السيادة :






3ـ تنص المعاهدة فيما يسمى " الملحق العسكرى " على أنه لايجوز لمصر أن تنشئ أى مطارات حربية فى أرض سيناء ( المادة 2 فقرة 5 ) كما لايجوز لها لأن تستعمل المطارات التى ستخليها إسرائيل فى أغراض حربية ( المادة 5 فقرة 3 ). ولايجوز لمصر أن تنشئ أية موانى عسكرية فى أى موقع على شواطئ سيناء ( على البحر الأبيض أو خليج السويس أو خليج العقبة ) ولا أن يستخدم أسطولها الحربى الموانئ التى بها ( المادة 4 فقرة " أ" و " ه" ). ولا يجوز لمصر أن تحتفظ شرق قناة السويس وإلى مدى 58 كيلو مرا تقريبا ( لم تنشر الخرائط الرسمية لنقول تحديدا) بأكثر من فرقة مشاة ميكانيكية واحدة لا يزيد مجمل أفرادها عن 22 ألفا وتزيد أسلحتها عن 126 قطعة مدفعية و126 مدفعا مضادا للطائرات عيار 37 مم و230 دبابة و48 عربة مدرعة من جميع الأنواع . ولايجوز لهذه القوة المحددة العدد والسلاح أن تخطو خطوة واحدة ولو لإجراء مناورات تدريبية شرق الخط المحدد لها بين أرض وطنها وبقية أرض وطنها ( المادة الثانية فقرة 2 بند 2و3 من الملحق العسكرى ). لايجوز لمصر أن تكون لها شرق الخط المشار إليه أية قوة عسكرية مقاتلة أو مسلحة بأسلحة قتالية من أى نوع كان. عادت سيناء ، وأربعة أخماس سيناء منزوعة السلاح .


أما بالنسبة إلى الأمن فتتولى حفظه قوات الشرطة المدنية المصرية. على أنه فى منطقة تمتد من حوالى 58 كيلو مترا شرق القناة إلى خط يبدأ من قرية الشيخ زويد على البحر الأبيض المتوسط (شرق العريش) وينتهى عند رأس محمد ( غرب شرم الشيخ ) ويبعد عن حدود مصر الشرقية بحوالى 33 كيلو مترا ، يجوز لمصر أن تستكمل " مهمة البوليس المدنى فى حفظ النظام " . ( هكذا يقول النص ) بقوة حرس حدود بشرط ألا تزيد عن أربعة كتائب وأن يقتصر تسليحها على الأسلحة الخفيفة والعربات ( المادة 2 فقرة أ بند ب من الملحق العسكرى ) ولايجوز لأن تساعدها ـ بحريا ـ إلا زوارق خفر الحدود المسلحة تسليحا خفيفا على أن يقتصر نشاطها على المياه الإقليمية فى هذه المنطقة ( الماد الرابعة فقرة 2 من الملحق العسكرى ) . أما باقى سيناء على طول الحدود الشرقية بعمق 33 كيلو مترا تقريبا ، بما فيها شرم الشيخ ومضايق تيران وشواطئ خليج العقبة فلا يجوز لمصر أن يكون لها إلا شرطة مدنية فقط . لاقوات ولا حرس حدود ولا بوارج ولا زوارق ( المادة 5 فقرة 2 من الملحق العسكرى ).


هذه هى سيناء التى " تحررت ".






السيطرة الأمريكية :






4ـ هل تضمنت المعاهدة إخضاع مصر للسيطرة الأمريكية ؟.. هل هناك إحتلال سياسى وعسكرى أمريكي لأرض مصر أم لا ؟






جاء فى المادة الرابعة فقرة 1 من المعاهدة :" ضمانا لتوفير الحد الأقصى للأمن لكلا الطرفين وذلك على أساس التبادل يسمح باشتراك قوات أمم متحدة ومراقبون من الأمم المتحدة ..".. وجاء الملحق العسكرى فاستبدل " بالتبادل" " القسمة والنصيب " . فكان من قسمة مصر أن ترابط قوات الأمم المتحدة على أرضها وحدها بالإضافة إلى مراقبين . وكان من نصيب الطرف الآخر مراقبون فقط ( المادة 6 فقرة 3 من الملحق العسكرى ). أما أين ترابط قوات الأمم المتحدة على أرض مصر فقد جاء تحديده فى وثائق إتفاقيات " كامب ديفيد " ( إطار الاتفاق لمعاهد سلام بين مصر وإسرائيل ) . حيث نصت على أن :" تتمركز قوات الأمم المتحدة فى :






( ا ) جزء من المنطقة التى تقع فى سيناء من الداخل لمسافة 20 كيلو مترا تقريبا من البحر المتوسط وتتاخم الحدود .






( ب) منطقة شرم الشيخ .






ما الذى ستفعله أو فى إمكانها أن تفعله تلك القوات ؟ قيل عن القوات المتمركزة فى منطقة شرم الشيخ أنها ( لضمان حرية المرور فى مضايق تيران ). إن حرية المرور لإسرائيل فى مضيق تيران لا تحتاج إلى ضمان إلا إذا وصلت القوات المصرية المسلحة إلى حدودها الشرقية فى تلك المنطقة وهددت المرور . ولم يقل شئ عن مهمة القوات المتمركزة فى الشمال . فهل يمكن أن تكون ضمانا لعدم إختراق القوات المصرية حدودها الشرقية إلى أرض فلسطين المحتلة .؟. أم أنها لضمان عدم إختراق القوات الإسرائيلية حدود مصر مرة أخرى إلى أرض سيناء ..؟ النصوص ، فى وثائق كامب ديفيد والوثيقة الرئيسية الموقعة يوم 26 مارس 1979 لا تجيب إجابة واضحة ، وإنما تأتى الإجابة واضحة قاطعة ، من النصوص التى حددت نشاط قوات الأمم المتحدة ومجالات ذلك النشاط .






فهى كما رأينا متمركزة فى أرض مصر فقط . ومهامها هناك ـ فى سيناءـ " تشغيل نقاط تفتيش والقيام بدوريات استطلاع " ( المادة 6 فقرة 2 بند 1 من الملحق العسكرى ) .. والتحقق الدورى من تنفيذ بنود الملحق العسكرى ( المادة 6 فقرة 2 بند ب من الملحق العسكرى ) وتقديم تقارير عن نتائج مهمتها لكلا الطرفين ( المادة 6 فقرة 5 من الملحق العسكرى ).






أين ..؟ يقول الملحق العسكرى بالنص :" تشرف قوات الأمم المتحدة على تنفيذ الترتيبات المنصوص عليها فى هذه المادة ( أ ) و (ب) و (ج) ( فقرة 3 ) أى فى أرض سيناء إبتداء من قناة السويس ثم شرقا إلى الحدود الشرقية . وواضح من هذا أن مهمة قوات الأمم المتحدة المتمركزة على أرض مصر أن تفتيش وتراقب وتستطلع جويا وتقدم تقارير عن أى نشاط أو تحركات لا على الحدود الشرقية ، ولا فيما تتجاوزها شرقا من أرض فلسطين المحتلة ، ولكن غربا حتى قناة السويس ، تفتش وتراقب وتستطلع وتحقق فيما إذا كانت مصر قد زادت من قوتها المحدودة أو من تسليحها وفيما إذا كانت مصر قد زادت من حرس الحدود أو زودته بأسلحة ثقيلة .. الخ . أما ما يلى حدود مصر شرقا فلا يجوز أن يكون محل تفتيش أو مراقبة أو إستطلاع أو تحقيق أو أن تقدم عنه إلى مصر تقارير . إنه يتعرض فقط ، وبعمق ثلاثة كيلو مترات فقط لما يستطيع أن يراقبه مراقبون من الأمم المتحدة ( المادة 6 فقرة 3 ).






والخلاصة أن مصر تخضع للتفتيش والمراقبة والاستطلاع والتحقيق من قبل قوات اجنبية متمركزة على أرضها وهذا هو المثل الذى يضربه عادة فقهاء القانون الدولى العام ، وفقهاء القانون الدستورى ، كحالة نموذجية لما ينقض السيادة ويتناقض مع الاستقلال الوطنى . لا يضعف من هذا الرأى القول بأن تلك ـ أولا ـ ليست قوات أجنبية بل هى قوات الأمم المتحدة . وثانيا ـ أن مصر هى التى قبلت تمركزها على أرضها وارتضت مهمتها " بإرادتها الحرة " .. فنضطر إلى العودة إلى الوثائق لتكشف الطبيعة المفزعة لحقيقة أنها قوات إحتلال أجنبى وأمريكى على وجه التحديد .






5ـ ولم يكتف الإحتلال بقوات أجنبية تأمينا ، بل لابد من إلتزام الولايات المتحدة الأمريكية بالوقوف ، بكل قواتها الدولية والعسكرية ، حائلا دون ما يخشونه وما يتوقعونه من الشعب العربى فى مصر . فيوجه الرئيس الأمريكى الى رئيس الجمهورية السابق ومناحم بيجين رسالة تضاف إلى وثائق المعاهدة وتصبح جزءا لا يتجزأ منها يقول فيها :" فى حالة وجود إنتهاك فعلى أو التهديد بانتهاك فعلى أو التهديد بانتهاك معاهدة السلام بين مصر وإسرائيل ستقوم الولايات المتحدة بناء على طلب أحد الأطراف أو كليهما بالتشاور مع الأطراف المعنية وستتخذ الإجراء الذى تراه مناسبا ومفيدا فى تحقيق الإلتزام بالمعاهدة وستقوم الولايات المتحدة ، بعملية الاستطلاع الجوى حسب طلب الأطراف وطبقا للملحق (1) للمعاهدة "






( الملحق العسكرى ).






هكذا إلتزمت الولايات المتحدة :






أولا : بأن تتولى هى الاستطلاع والمراقبة الجوية على مصر فى سيناء التى أسندت إسميا فى الملحق العسكرى إلى قوات الأمم المتحدة ( المادة 6 فقرة 2 بند 1 من الملحق العسكرى ).






ثانيا: أن تتخذ الإجراءات التى تراها ( هى ) مناسبة ومفيدة ( طبقا لتقديرها ) لضمان ألا تنتهك مصر المعاهدة أو تهدد بانتهاكها .






6ـ عنوان التعهد " مذكرة تفاهم " .. ولقد نشرت لأول مرة فى مصر يوم 30 مارس عام 1979 وفيما يلى نصها المنشور :






حق الولايات المتحدة فى إتخاذ ما تعتبره ملائما من إجراءات فى حالة حدوث إنتهاك لمعاهدة السلام أو تهديد بالإنتهاك بما فى ذلك الإجراءات الدبلوماسية والاقتصادية والعسكرية .






تقدم الولايات المتحدة ما تراه لازما من مساندة لما تقوم به إسرائيل من أعمال لمواجهة مثل هذه الإنتهاكات خاصة إذا مارئى أن الإنتهاك يهدد أمن إسرائيل بما فى ذلك على سبيل المثال تعرض إسرائيل لحصار يمنعها من استخدام الممرات المائية الدولية وإنتهاك بنود معاهدة السلام بشأن الحد من القوات أوشن هجوم مسلح على إسرائيل . وفى هذه الحالة فإن الولايات المتحدة الأمريكية على استعداد للنظر بعين الإعتبار وبصورة عاجلة فى إتخاذ إجراءات مثل تعزيز وجود الولايات المتحدة فى المنطقة وتزويد إسرائيل بالشحنات العاجلة وممارسة حقوقها البحرية لوضع حد الإنتهاك .






سوف تعمل الولايات المتحدة بتصريح ومصادقة الكونجرس على النظر بعين الرعاية لطلبات المساعدة العسكرية والاقتصادية لإسرائيل وتسعى لتلبيتها ".





لا يحتاج هذا التعهد الأمريكى إلى إيضاح ، فيه إنعقد حلف سياسى إقتصادى عسكرى بين الولايات المتحدة وإسرائيل ضد مصر تحرسه قوات أمريكية مرابطة فى سيناء .






وبعد :






7ـ وبعد ، فها هى سيناء التى تحتفل الدولة على " تحريرها" يوم 25 أبريل من كل عام . خلاصة قصتها أن (1) احتلتها القوات الصهيونية عام 1967 بالإتفاق مع الولايات المتحدة الأمريكية (2) بدأت مصر المستقلة تعبئة قواها لتحريرها واستردادها منذ يوم الهزيمة ذاته (3) بدأت القوات المسلحة معركة التحرير فى 1973 فهزمت الصهاينة وعبرت القناة وطاردتهم شرقا (4) تقدم رئيس جمهورية مصر السابق ليجنى ثمار النصر العسكرى وهو يعلن إرادة مصر المستقلة المنتصرة :






أ ـ إنهاء حالة الحرب مرفوض شكلا وموضوعا إلى أن يجلو آخر جندى صهيونى من الأرض العربية .






ب ـ نزع سلاح سيناء مرفوض لأنه إنتهاك لسيادة مصر.






ج ـ تطبيع العلاقات مع العدو الصهيونى مرفوض لأنه يمس سيادة مصر .



ثم ذهب ـ الله يرحمه ـ إلى كامب ديفيد الأمريكية وعاد بإتفاقية قايض فيها جلاء الجند الصهاينة عن سيناء مقابل الإحتلال الأمريكى لسيناء وتبعية مصر جملة وتفصيلا للولايات المتحدة الأمريكية ، وفى يوم 25 أبريل 1982 ، إنتقلت سيناء من السيطرة الصهيونية ، وعادت هى ومصر كلها إلى السيطرة الأمريكية ، ولم تعد سيناء المتحررة إلى مصر الحرة قط وبدأت حركة التحرر ضد الولايات المتحدة الأمريكية يخوضها صادقو الوطنية الذين لا يكذبون على أنفسهم ولا يكذبون على غيرهم ..



فأين المفر ؟..


كتب القتال عليكم وهو كره لكم فأعدوا لهم ما استطعتم من قوة . وما كانت دعوتنا إلى الإعداد للكفاح المسلح ضد الولايات المتحدة الأمريكية من بنات أفكارنا ، ولكنها دعوة صدق إلى التعامل بصدق مع الواقع الموضوعى الذى فرضته علينا إتفاقيات كامب ديفيد . والصدق منجاة فهل ثمن من يمارون ؟

دكتور عصمت سيف الدولة